Ramcharitmanas Lanka Kand Part 2 (Doha 49–98)

दोहा 49#

परिहरि बयरु देहु बैदेही। भजहु कृपानिधि परम सनेही॥
ताके बचन बान सम लागे। करिआ मुह करि जाहि अभागे॥
बूढ़ भएसि न त मरतेउँ तोही। अब जनि नयन देखावसि मोही॥
तेहि अपने मन अस अनुमाना। बध्यो चहत एहि कृपानिधाना॥
सो उठि गयउ कहत दुर्बादा। तब सकोप बोलेउ घननादा॥
कौतुक प्रात देखिअहु मोरा। करिहउँ बहुत कहौं का थोरा॥
सुनि सुत बचन भरोसा आवा। प्रीति समेत अंक बैठावा॥
करत बिचार भयउ भिनुसारा। लागे कपि पुनि चहूँ दुआरा॥
कोपि कपिन्ह दुर्घट गढ़ु घेरा। नगर कोलाहलु भयउ घनेरा॥
बिबिधायुध धर निसिचर धाए। गढ़ ते पर्बत सिखर ढहाए॥

parihari bayaru dehu baidehī| bhajahu kṛpānidhi parama sanehī||
tāke bacana bāna sama lāge| kariā muha kari jāhi abhāge||
būḍha bhaesi na ta marateum̐ tohī| aba jani nayana dekhāvasi mohī||
tehi apane mana asa anumānā| badhyo cahata ehi kṛpānidhānā||
so uṭhi gayau kahata durbādā| taba sakopa boleu ghananādā||
kautuka prāta dekhiahu morā| karihaum̐ bahuta kahauṃ kā thorā||
suni suta bacana bharosā āvā| prīti sameta aṃka baiṭhāvā||
karata bicāra bhayau bhinusārā| lāge kapi puni cahūm̐ duārā||
kopi kapinha durghaṭa gaḍhu gherā| nagara kolāhalu bhayau ghanerā||
bibidhāyudha dhara nisicara dhāe| gaḍha te parbata sikhara ḍhahāe||

छंद
ढाहे महीधर सिखर कोटिन्ह बिबिध बिधि गोला चले।
घहरात जिमि पबिपात गर्जत जनु प्रलय के बादले॥
मर्कट बिकट भट जुटत कटत न लटत तन जर्जर भए।
गहि सैल तेहि गढ़ पर चलावहिं जहँ सो तहँ निसिचर हए॥
ḍhāhe mahīdhara sikhara koṭinha bibidha bidhi golā cale|
ghaharāta jimi pabipāta garjata janu pralaya ke bādale||
markaṭa bikaṭa bhaṭa juṭata kaṭata na laṭata tana jarjara bhae|
gahi saila tehi gaḍha para calāvahiṃ jaham̐ so taham̐ nisicara hae||

दोहा 49
मेघनाद सुनि श्रवन अस गढ़ु पुनि छेंका आइ।
उतर्यो बीर दुर्ग तें सन्मुख चल्यो बजाइ॥49॥
meghanāda suni śravana asa gaḍhu puni cheṃkā āi|
utaryo bīra durga teṃ sanmukha calyo bajāi||49||
दोहा 50#

कहँ कोसलाधीस द्वौ भ्राता। धन्वी सकल लोक बिख्याता॥
कहँ नल नील दुबिद सुग्रीवा। अंगद हनूमंत बल सींवा॥
कहाँ बिभीषनु भ्राताद्रोही। आजु सबहि हठि मारउँ ओही॥
अस कहि कठिन बान संधाने। अतिसय क्रोध श्रवन लगि ताने॥
सर समुह सो छाड़ै लागा। जनु सपच्छ धावहिं बहु नागा॥
जहँ तहँ परत देखिअहिं बानर। सन्मुख होइ न सके तेहि अवसर॥
जहँ तहँ भागि चले कपि रीछा। बिसरी सबहि जुद्ध कै ईछा॥
सो कपि भालु न रन महँ देखा। कीन्हेसि जेहि न प्रान अवसेषा॥

kaham̐ kosalādhīsa dvau bhrātā| dhanvī sakala loka bikhyātā||
kaham̐ nala nīla dubida sugrīvā| aṃgada hanūmaṃta bala sīṃvā||
kahām̐ bibhīṣanu bhrātādrohī| āju sabahi haṭhi māraum̐ ohī||
asa kahi kaṭhina bāna saṃdhāne| atisaya krodha śravana lagi tāne||
sara samuha so chāḍai lāgā| janu sapaccha dhāvahiṃ bahu nāgā||
jaham̐ taham̐ parata dekhiahiṃ bānara| sanmukha hoi na sake tehi avasara||
jaham̐ taham̐ bhāgi cale kapi rīchā| bisarī sabahi juddha kai īchā||
so kapi bhālu na rana maham̐ dekhā| kīnhesi jehi na prāna avaseṣā||

दोहा 50
दस दस सर सब मारेसि परे भूमि कपि बीर।
सिंहनाद करि गर्जा मेघनाद बल धीर॥50॥
dasa dasa sara saba māresi pare bhūmi kapi bīra|
siṃhanāda kari garjā meghanāda bala dhīra||50||
दोहा 51#

देखि पवनसुत कटक बिहाला। क्रोधवंत जनु धायउ काला॥
महासैल एक तुरत उपारा। अति रिस मेघनाद पर डारा॥
आवत देखि गयउ नभ सोई। रथ सारथी तुरग सब खोई॥
बार बार पचार हनुमाना। निकट न आव मरमु सो जाना॥
रघुपति निकट गयउ घननादा। नाना भाँति करेसि दुर्बादा॥
अस्त्र सस्त्र आयुध सब डारे। कौतुकहीं प्रभु काटि निवारे॥
देखि प्रताप मूढ़ खिसिआना। करै लाग माया बिधि नाना॥
जिमि कोउ करै गरुड़ सैं खेला। डरपावै गहि स्वल्प सपेला॥

dekhi pavanasuta kaṭaka bihālā| krodhavaṃta janu dhāyau kālā||
mahāsaila eka turata upārā| ati risa meghanāda para ḍārā||
āvata dekhi gayau nabha soī| ratha sārathī turaga saba khoī||
bāra bāra pacāra hanumānā| nikaṭa na āva maramu so jānā||
raghupati nikaṭa gayau ghananādā| nānā bhām̐ti karesi durbādā||
astra sastra āyudha saba ḍāre| kautukahīṃ prabhu kāṭi nivāre||
dekhi pratāpa mūḍha khisiānā| karai lāga māyā bidhi nānā||
jimi kou karai garuḍa saiṃ khelā| ḍarapāvai gahi svalpa sapelā||

दोहा 51
जासु प्रबल माया बल सिव बिरंचि बड़ छोट।
ताहि दिखावइ निसिचर निज माया मति खोट॥51॥
jāsu prabala māyā bala siva biraṃci baḍa choṭa|
tāhi dikhāvai nisicara nija māyā mati khoṭa||51||
दोहा 52#

नभ चढ़ि बरष बिपुल अंगारा। महि ते प्रगट होहिं जलधारा॥
नाना भाँति पिसाच पिसाची। मारु काटु धुनि बोलहिं नाची॥
बिष्टा पूय रुधिर कच हाड़ा। बरषइ कबहुँ उपल बहु छाड़ा॥
बरषि धूरि कीन्हेसि अँधिआरा। सूझ न आपन हाथ पसारा॥
कपि अकुलाने माया देखें। सब कर मरन बना एहि लेखें॥
कौतुक देखि राम मुसुकाने। भए सभीत सकल कपि जाने॥
एक बान काटी सब माया। जिमि दिनकर हर तिमिर निकाया॥
कृपादृष्टि कपि भालु बिलोके। भए प्रबल रन रहहिं न रोके॥

nabha caḍhi baraṣa bipula aṃgārā| mahi te pragaṭa hohiṃ jaladhārā||
nānā bhām̐ti pisāca pisācī| māru kāṭu dhuni bolahiṃ nācī||
biṣṭā pūya rudhira kaca hāḍā| baraṣai kabahum̐ upala bahu chāḍā||
baraṣi dhūri kīnhesi am̐dhiārā| sūjha na āpana hātha pasārā||
kapi akulāne māyā dekheṃ| saba kara marana banā ehi lekheṃ||
kautuka dekhi rāma musukāne| bhae sabhīta sakala kapi jāne||
eka bāna kāṭī saba māyā| jimi dinakara hara timira nikāyā||
kṛpādṛṣṭi kapi bhālu biloke| bhae prabala rana rahahiṃ na roke||

दोहा 52
आयसु मागि राम पहिं अंगदादि कपि साथ।
लछिमन चले क्रुद्ध होइ बान सरासन हाथ॥52॥
āyasu māgi rāma pahiṃ aṃgadādi kapi sātha|
lachimana cale kruddha hoi bāna sarāsana hātha||52||
दोहा 53#

छतज नयन उर बाहु बिसाला। हिमगिरि निभ तनु कछु एक लाला॥
इहाँ दसानन सुभट पठाए। नाना अस्त्र सस्त्र गहि धाए॥
भूधर नख बिटपायुध धारी। धाए कपि जय राम पुकारी॥
भिरे सकल जोरिहि सन जोरी। इत उत जय इच्छा नहिं थोरी॥
मुठिकन्ह लातन्ह दातन्ह काटहिं। कपि जयसील मारि पुनि डाटहिं॥
मारु मारु धरु धरु धरु मारू। सीस तोरि गहि भुजा उपारू॥
असि रव पूरि रही नव खंडा। धावहिं जहँ तहँ रुंड प्रचंडा॥
देखहिं कौतुक नभ सुर बृंदा। कबहुँक बिसमय कबहुँ अनंदा॥

chataja nayana ura bāhu bisālā| himagiri nibha tanu kachu eka lālā||
ihām̐ dasānana subhaṭa paṭhāe| nānā astra sastra gahi dhāe||
bhūdhara nakha biṭapāyudha dhārī| dhāe kapi jaya rāma pukārī||
bhire sakala jorihi sana jorī| ita uta jaya icchā nahiṃ thorī||
muṭhikanha lātanha dātanha kāṭahiṃ| kapi jayasīla māri puni ḍāṭahiṃ||
māru māru dharu dharu dharu mārū| sīsa tori gahi bhujā upārū||
asi rava pūri rahī nava khaṃḍā| dhāvahiṃ jaham̐ taham̐ ruṃḍa pracaṃḍā||
dekhahiṃ kautuka nabha sura bṛṃdā| kabahum̐ka bisamaya kabahum̐ anaṃdā||

दोहा 53
रुधिर गाड़ भरि भरि जम्यो ऊपर धूरि उड़ाइ।
जनु अँगार रासिन्ह पर मृतक धूम रह्यो छाइ॥53॥
rudhira gāḍa bhari bhari jamyo ūpara dhūri uḍāi|
janu am̐gāra rāsinha para mṛtaka dhūma rahyo chāi||53||
दोहा 54#

घायल बीर बिराजहिं कैसे। कुसुमित किंसुक के तरु जैसे॥
लछिमन मेघनाद द्वौ जोधा। भिरहिं परसपर करि अति क्रोधा॥
एकहि एक सकइ नहिं जीती। निसिचर छल बल करइ अनीती॥
क्रोधवंत तब भयउ अनंता। भंजेउ रथ सारथी तुरंता॥
नाना बिधि प्रहार कर सेषा। राच्छस भयउ प्रान अवसेषा॥
रावन सुत निज मन अनुमाना। संकठ भयउ हरिहि मम प्राना॥
बीरघातिनी छाड़िसि साँगी। तेज पुंज लछिमन उर लागी॥
मुरुछा भई सक्ति के लागें। तब चलि गयउ निकट भय त्यागें॥

ghāyala bīra birājahiṃ kaise| kusumita kiṃsuka ke taru jaise||
lachimana meghanāda dvau jodhā| bhirahiṃ parasapara kari ati krodhā||
ekahi eka sakai nahiṃ jītī| nisicara chala bala karai anītī||
krodhavaṃta taba bhayau anaṃtā| bhaṃjeu ratha sārathī turaṃtā||
nānā bidhi prahāra kara seṣā| rācchasa bhayau prāna avaseṣā||
rāvana suta nija mana anumānā| saṃkaṭha bhayau harihi mama prānā||
bīraghātinī chāḍisi sām̐gī| teja puṃja lachimana ura lāgī||
muruchā bhaī sakti ke lāgeṃ| taba cali gayau nikaṭa bhaya tyāgeṃ||

दोहा 54
मेघनाद सम कोटि सत जोधा रहे उठाइ।
जगदाधार सेष किमि उठै चले खिसिआइ॥54॥
meghanāda sama koṭi sata jodhā rahe uṭhāi|
jagadādhāra seṣa kimi uṭhai cale khisiāi||54||
दोहा 55#

सुनु गिरिजा क्रोधानल जासू। जारइ भुवन चारिदस आसू॥
सक संग्राम जीति को ताही। सेवहिं सुर नर अग जग जाही॥
यह कौतूहल जानइ सोई। जा पर कृपा राम कै होई॥
संध्या भइ फिरि द्वौ बाहनी। लगे सँभारन निज निज अनी॥
ब्यापक ब्रह्म अजित भुवनेस्वर। लछिमन कहाँ बूझ करुनाकर॥
तब लगि लै आयउ हनुमाना। अनुज देखि प्रभु अति दुख माना॥
जामवंत कह बैद सुषेना। लंकाँ रहइ को पठई लेना॥
धरि लघु रूप गयउ हनुमंता। आनेउ भवन समेत तुरंता॥

sunu girijā krodhānala jāsū| jārai bhuvana cāridasa āsū||
saka saṃgrāma jīti ko tāhī| sevahiṃ sura nara aga jaga jāhī||
yaha kautūhala jānai soī| jā para kṛpā rāma kai hoī||
saṃdhyā bhai phiri dvau bāhanī| lage sam̐bhārana nija nija anī||
byāpaka brahma ajita bhuvanesvara| lachimana kahām̐ būjha karunākara||
taba lagi lai āyau hanumānā| anuja dekhi prabhu ati dukha mānā||
jāmavaṃta kaha baida suṣenā| laṃkām̐ rahai ko paṭhaī lenā||
dhari laghu rūpa gayau hanumaṃtā| āneu bhavana sameta turaṃtā||

दोहा 55
राम पदारबिंद सिर नायउ आइ सुषेन।
कहा नाम गिरि औषधी जाहु पवनसुत लेन॥55॥
rāma padārabiṃda sira nāyau āi suṣena|
kahā nāma giri auṣadhī jāhu pavanasuta lena||55||
दोहा 56#

राम चरन सरसिज उर राखी। चला प्रभंजन सुत बल भाषी॥
उहाँ दूत एक मरमु जनावा। रावन कालनेमि गृह आवा॥
दसमुख कहा मरमु तेहिं सुना। पुनि पुनि कालनेमि सिरु धुना॥
देखत तुम्हहि नगरु जेहिं जारा। तासु पंथ को रोकन पारा॥
भजि रघुपति करु हित आपना। छाँड़हु नाथ मृषा जल्पना॥
नील कंज तनु सुंदर स्यामा। हृदयँ राखु लोचनाभिरामा॥
मैं तैं मोर मूढ़ता त्यागू। महा मोह निसि सूतत जागू॥
काल ब्याल कर भच्छक जोई। सपनेहुँ समर कि जीतिअ सोई॥

rāma carana sarasija ura rākhī| calā prabhaṃjana suta bala bhāṣī||
uhām̐ dūta eka maramu janāvā| rāvana kālanemi gṛha āvā||
dasamukha kahā maramu tehiṃ sunā| puni puni kālanemi siru dhunā||
dekhata tumhahi nagaru jehiṃ jārā| tāsu paṃtha ko rokana pārā||
bhaji raghupati karu hita āpanā| chām̐ḍahu nātha mṛṣā jalpanā||
nīla kaṃja tanu suṃdara syāmā| hṛdayam̐ rākhu locanābhirāmā||
maiṃ taiṃ mora mūḍhatā tyāgū| mahā moha nisi sūtata jāgū||
kāla byāla kara bhacchaka joī| sapanehum̐ samara ki jītia soī||

दोहा 56
सुनि दसकंठ रिसान अति तेहिं मन कीन्ह बिचार।
राम दूत कर मरौं बरु यह खल रत मल भार॥56॥
suni dasakaṃṭha risāna ati tehiṃ mana kīnha bicāra|
rāma dūta kara marauṃ baru yaha khala rata mala bhāra||56||
दोहा 57#

अस कहि चला रचिसि मग माया। सर मंदिर बर बाग बनाया॥
मारुतसुत देखा सुभ आश्रम। मुनिहि बूझि जल पियौं जाइ श्रम॥
राच्छस कपट बेष तहँ सोहा। मायापति दूतहि चह मोहा॥
जाइ पवनसुत नायउ माथा। लाग सो कहै राम गुन गाथा॥
होत महा रन रावन रामहिं। जितहहिं राम न संसय या महिं॥
इहाँ भएँ मैं देखेउँ भाई। ग्यान दृष्टि बल मोहि अधिकाई॥
मागा जल तेहिं दीन्ह कमंडल। कह कपि नहिं अघाउँ थोरें जल॥
सर मज्जन करि आतुर आवहु। दिच्छा देउँ ग्यान जेहिं पावहु॥

asa kahi calā racisi maga māyā| sara maṃdira bara bāga banāyā||
mārutasuta dekhā subha āśrama| munihi būjhi jala piyauṃ jāi śrama||
rācchasa kapaṭa beṣa taham̐ sohā| māyāpati dūtahi caha mohā||
jāi pavanasuta nāyau māthā| lāga so kahai rāma guna gāthā||
hota mahā rana rāvana rāmahiṃ| jitahahiṃ rāma na saṃsaya yā mahiṃ||
ihām̐ bhaem̐ maiṃ dekheum̐ bhāī| gyāna dṛṣṭi bala mohi adhikāī||
māgā jala tehiṃ dīnha kamaṃḍala| kaha kapi nahiṃ aghāum̐ thoreṃ jala||
sara majjana kari ātura āvahu| dicchā deum̐ gyāna jehiṃ pāvahu||

दोहा 57
सर पैठत कपि पद गहा मकरीं तब अकुलान।
मारी सो धरि दिव्य तनु चली गगन चढ़ि जान॥57॥
sara paiṭhata kapi pada gahā makarīṃ taba akulāna|
mārī so dhari divya tanu calī gagana caḍhi jāna||57||
दोहा 58#

कपि तव दरस भइउँ निष्पापा। मिटा तात मुनिबर कर सापा॥
मुनि न होइ यह निसिचर घोरा। मानहु सत्य बचन कपि मोरा॥
अस कहि गई अपछरा जबहीं। निसिचर निकट गयउ कपि तबहीं॥
कह कपि मुनि गुरदछिना लेहू। पाछें हमहि मंत्र तुम्ह देहू॥
सिर लंगूर लपेटि पछारा। निज तनु प्रगटेसि मरती बारा॥
राम राम कहि छाड़ेसि प्राना। सुनि मन हरषि चलेउ हनुमाना॥
देखा सैल न औषध चीन्हा। सहसा कपि उपारि गिरि लीन्हा॥
गहि गिरि निसि नभ धावत भयऊ। अवधपुरी उपर कपि गयऊ॥

kapi tava darasa bhaium̐ niṣpāpā| miṭā tāta munibara kara sāpā||
muni na hoi yaha nisicara ghorā| mānahu satya bacana kapi morā||
asa kahi gaī apacharā jabahīṃ| nisicara nikaṭa gayau kapi tabahīṃ||
kaha kapi muni guradachinā lehū| pācheṃ hamahi maṃtra tumha dehū||
sira laṃgūra lapeṭi pachārā| nija tanu pragaṭesi maratī bārā||
rāma rāma kahi chāḍesi prānā| suni mana haraṣi caleu hanumānā||
dekhā saila na auṣadha cīnhā| sahasā kapi upāri giri līnhā||
gahi giri nisi nabha dhāvata bhayaū| avadhapurī upara kapi gayaū||

दोहा 58
देखा भरत बिसाल अति निसिचर मन अनुमानि।
बिनु फर सायक मारेउ चाप श्रवन लगि तानि॥58॥
dekhā bharata bisāla ati nisicara mana anumāni|
binu phara sāyaka māreu cāpa śravana lagi tāni||58||
सोरठा 59#

परेउ मुरुछि महि लागत सायक। सुमिरत राम राम रघुनायक॥
सुनि प्रिय बचन भरत तब धाए। कपि समीप अति आतुर आए॥
बिकल बिलोकि कीस उर लावा। जागत नहिं बहु भाँति जगावा॥
मुख मलीन मन भए दुखारी। कहत बचन भरि लोचन बारी॥
जेहिं बिधि राम बिमुख मोहि कीन्हा। तेहिं पुनि यह दारुन दुख दीन्हा॥
जौं मोरें मन बच अरु काया। प्रीति राम पद कमल अमाया॥
तौ कपि होउ बिगत श्रम सूला। जौं मो पर रघुपति अनुकूला॥
सुनत बचन उठि बैठ कपीसा। कहि जय जयति कोसलाधीसा॥

pareu muruchi mahi lāgata sāyaka| sumirata rāma rāma raghunāyaka||
suni priya bacana bharata taba dhāe| kapi samīpa ati ātura āe||
bikala biloki kīsa ura lāvā| jāgata nahiṃ bahu bhām̐ti jagāvā||
mukha malīna mana bhae dukhārī| kahata bacana bhari locana bārī||
jehiṃ bidhi rāma bimukha mohi kīnhā| tehiṃ puni yaha dāruna dukha dīnhā||
jauṃ moreṃ mana baca aru kāyā| prīti rāma pada kamala amāyā||
tau kapi hou bigata śrama sūlā| jauṃ mo para raghupati anukūlā||
sunata bacana uṭhi baiṭha kapīsā| kahi jaya jayati kosalādhīsā||

सोरठा 59
लीन्ह कपिहि उर लाइ पुलकित तनु लोचन सजल।
प्रीति न हृदयँ समाइ सुमिरि राम रघुकुल तिलक॥59॥
līnha kapihi ura lāi pulakita tanu locana sajala|
prīti na hṛdayam̐ samāi sumiri rāma raghukula tilaka||59||
दोहा 60#

तात कुसल कहु सुखनिधान की। सहित अनुज अरु मातु जानकी॥
कपि सब चरित समास बखाने। भए दुखी मन महुँ पछिताने॥
अहह दैव मैं कत जग जायउँ। प्रभु के एकहु काज न आयउँ॥
जानि कुअवसरु मन धरि धीरा। पुनि कपि सन बोले बलबीरा॥
तात गहरु होइहि तोहि जाता। काजु नसाइहि होत प्रभाता॥
चढ़ु मम सायक सैल समेता। पठवौं तोहि जहँ कृपानिकेता॥
सुनि कपि मन उपजा अभिमाना। मोरें भार चलिहि किमि बाना॥
राम प्रभाव बिचारि बहोरी। बंदि चरन कह कपि कर जोरी॥

tāta kusala kahu sukhanidhāna kī| sahita anuja aru mātu jānakī||
kapi saba carita samāsa bakhāne| bhae dukhī mana mahum̐ pachitāne||
ahaha daiva maiṃ kata jaga jāyaum̐| prabhu ke ekahu kāja na āyaum̐||
jāni kuavasaru mana dhari dhīrā| puni kapi sana bole balabīrā||
tāta gaharu hoihi tohi jātā| kāju nasāihi hota prabhātā||
caḍhu mama sāyaka saila sametā| paṭhavauṃ tohi jaham̐ kṛpāniketā||
suni kapi mana upajā abhimānā| moreṃ bhāra calihi kimi bānā||
rāma prabhāva bicāri bahorī| baṃdi carana kaha kapi kara jorī||

दोहा 60(क)
तव प्रताप उर राखि प्रभु जेहउँ नाथ तुरंत।
अस कहि आयसु पाइ पद बंदि चलेउ हनुमंत॥60(क)॥
tava pratāpa ura rākhi prabhu jehaum̐ nātha turaṃta|
asa kahi āyasu pāi pada baṃdi caleu hanumaṃta||60(ka)||

दोहा 60(ख)
भरत बाहु बल सील गुन प्रभु पद प्रीति अपार।
मन महुँ जात सराहत पुनि पुनि पवनकुमार॥60(ख)॥
bharata bāhu bala sīla guna prabhu pada prīti apāra|
mana mahum̐ jāta sarāhata puni puni pavanakumāra||60(kha)||
सोरठा 61#

उहाँ राम लछिमनहिं निहारी। बोले बचन मनुज अनुसारी॥
अर्ध राति गइ कपि नहिं आयउ। राम उठाइ अनुज उर लायउ॥
सकहु न दुखित देखि मोहि काऊ। बंधु सदा तव मृदुल सुभाऊ॥
मम हित लागि तजेहु पितु माता। सहेहु बिपिन हिम आतप बाता॥
सो अनुराग कहाँ अब भाई। उठहु न सुनि मम बच बिकलाई॥
जौं जनतेउँ बन बंधु बिछोहू। पिता बचन मनतेउँ नहिं ओहू॥
सुत बित नारि भवन परिवारा। होहिं जाहिं जग बारहिं बारा॥
अस बिचारि जियँ जागहु ताता। मिलइ न जगत सहोदर भ्राता॥
जथा पंख बिनु खग अति दीना। मनि बिनु फनि करिबर कर हीना॥
अस मम जिवन बंधु बिनु तोही। जौं जड़ दैव जिआवै मोही॥
जैहउँ अवध कवन मुहु लाई। नारि हेतु प्रिय भाइ गँवाई॥
बरु अपजस सहतेउँ जग माहीं। नारि हानि बिसेष छति नाहीं॥
अब अपलोकु सोकु सुत तोरा। सहिहि निठुर कठोर उर मोरा॥
निज जननी के एक कुमारा। तात तासु तुम्ह प्रान अधारा॥
सौंपेसि मोहि तुम्हहि गहि पानी। सब बिधि सुखद परम हित जानी॥
उतरु काह दैहउँ तेहि जाई। उठि किन मोहि सिखावहु भाई॥
बहु बिधि सिचत सोच बिमोचन। स्त्रवत सलिल राजिव दल लोचन॥
उमा एक अखंड रघुराई। नर गति भगत कृपाल देखाई॥

uhām̐ rāma lachimanahiṃ nihārī| bole bacana manuja anusārī||
ardha rāti gai kapi nahiṃ āyau| rāma uṭhāi anuja ura lāyau||
sakahu na dukhita dekhi mohi kāū| baṃdhu sadā tava mṛdula subhāū||
mama hita lāgi tajehu pitu mātā| sahehu bipina hima ātapa bātā||
so anurāga kahām̐ aba bhāī| uṭhahu na suni mama baca bikalāī||
jauṃ janateum̐ bana baṃdhu bichohū| pitā bacana manateum̐ nahiṃ ohū||
suta bita nāri bhavana parivārā| hohiṃ jāhiṃ jaga bārahiṃ bārā||
asa bicāri jiyam̐ jāgahu tātā| milai na jagata sahodara bhrātā||
jathā paṃkha binu khaga ati dīnā| mani binu phani karibara kara hīnā||
asa mama jivana baṃdhu binu tohī| jauṃ jaḍa daiva jiāvai mohī||
jaihaum̐ avadha kavana muhu lāī| nāri hetu priya bhāi gam̐vāī||
baru apajasa sahateum̐ jaga māhīṃ| nāri hāni biseṣa chati nāhīṃ||
aba apaloku soku suta torā| sahihi niṭhura kaṭhora ura morā||
nija jananī ke eka kumārā| tāta tāsu tumha prāna adhārā||
sauṃpesi mohi tumhahi gahi pānī| saba bidhi sukhada parama hita jānī||
utaru kāha daihaum̐ tehi jāī| uṭhi kina mohi sikhāvahu bhāī||
bahu bidhi sicata soca bimocana| stravata salila rājiva dala locana||
umā eka akhaṃḍa raghurāī| nara gati bhagata kṛpāla dekhāī||

सोरठा 61
प्रभु प्रलाप सुनि कान बिकल भए बानर निकर।
आइ गयउ हनुमान जिमि करुना महँ बीर रस॥61॥
prabhu pralāpa suni kāna bikala bhae bānara nikara|
āi gayau hanumāna jimi karunā maham̐ bīra rasa||61||
दोहा 62#

हरषि राम भेंटेउ हनुमाना। अति कृतग्य प्रभु परम सुजाना॥
तुरत बैद तब कीन्ह उपाई। उठि बैठे लछिमन हरषाई॥
हृदयँ लाइ प्रभु भेंटेउ भ्राता। हरषे सकल भालु कपि ब्राता॥
कपि पुनि बैद तहाँ पहुँचावा। जेहि बिधि तबहिं ताहि लइ आवा॥
यह बृत्तांत दसानन सुनेऊ। अति बिषअद पुनि पुनि सिर धुनेऊ॥
ब्याकुल कुंभकरन पहिं आवा। बिबिध जतन करि ताहि जगावा॥
जागा निसिचर देखिअ कैसा। मानहुँ कालु देह धरि बैसा॥
कुंभकरन बूझा कहु भाई। काहे तव मुख रहे सुखाई॥
कथा कही सब तेहिं अभिमानी। जेहि प्रकार सीता हरि आनी॥
तात कपिन्ह सब निसिचर मारे। महामहा जोधा संघारे॥
दुर्मुख सुररिपु मनुज अहारी। भट अतिकाय अकंपन भारी॥
अपर महोदर आदिक बीरा। परे समर महि सब रनधीरा॥

haraṣi rāma bheṃṭeu hanumānā| ati kṛtagya prabhu parama sujānā||
turata baida taba kīnha upāī| uṭhi baiṭhe lachimana haraṣāī||
hṛdayam̐ lāi prabhu bheṃṭeu bhrātā| haraṣe sakala bhālu kapi brātā||
kapi puni baida tahām̐ pahum̐cāvā| jehi bidhi tabahiṃ tāhi lai āvā||
yaha bṛttāṃta dasānana suneū| ati biṣaada puni puni sira dhuneū||
byākula kuṃbhakarana pahiṃ āvā| bibidha jatana kari tāhi jagāvā||
jāgā nisicara dekhia kaisā| mānahum̐ kālu deha dhari baisā||
kuṃbhakarana būjhā kahu bhāī| kāhe tava mukha rahe sukhāī||
kathā kahī saba tehiṃ abhimānī| jehi prakāra sītā hari ānī||
tāta kapinha saba nisicara māre| mahāmahā jodhā saṃghāre||
durmukha suraripu manuja ahārī| bhaṭa atikāya akaṃpana bhārī||
apara mahodara ādika bīrā| pare samara mahi saba ranadhīrā||

दोहा 62
सुनि दसकंधर बचन तब कुंभकरन बिलखान।
जगदंबा हरि आनि अब सठ चाहत कल्यान॥62॥
suni dasakaṃdhara bacana taba kuṃbhakarana bilakhāna|
jagadaṃbā hari āni aba saṭha cāhata kalyāna||62||
दोहा 63#

भल न कीन्ह तैं निसिचर नाहा। अब मोहि आइ जगाएहि काहा॥
अजहूँ तात त्यागि अभिमाना। भजहु राम होइहि कल्याना॥
हैं दससीस मनुज रघुनायक। जाके हनूमान से पायक॥
अहह बंधु तैं कीन्हि खोटाई। प्रथमहिं मोहि न सुनाएहि आई॥
कीन्हेहु प्रभू बिरोध तेहि देवक। सिव बिरंचि सुर जाके सेवक॥
नारद मुनि मोहि ग्यान जो कहा। कहतेउँ तोहि समय निरबहा॥
अब भरि अंक भेंटु मोहि भाई। लोचन सूफल करौ मैं जाई॥
स्याम गात सरसीरुह लोचन। देखौं जाइ ताप त्रय मोचन॥

bhala na kīnha taiṃ nisicara nāhā| aba mohi āi jagāehi kāhā||
ajahūm̐ tāta tyāgi abhimānā| bhajahu rāma hoihi kalyānā||
haiṃ dasasīsa manuja raghunāyaka| jāke hanūmāna se pāyaka||
ahaha baṃdhu taiṃ kīnhi khoṭāī| prathamahiṃ mohi na sunāehi āī||
kīnhehu prabhū birodha tehi devaka| siva biraṃci sura jāke sevaka||
nārada muni mohi gyāna jo kahā| kahateum̐ tohi samaya nirabahā||
aba bhari aṃka bheṃṭu mohi bhāī| locana sūphala karau maiṃ jāī||
syāma gāta sarasīruha locana| dekhauṃ jāi tāpa traya mocana||

दोहा 63
राम रूप गुन सुमिरत मगन भयउ छन एक।
रावन मागेउ कोटि घट मद अरु महिष अनेक॥63॥
rāma rūpa guna sumirata magana bhayau chana eka|
rāvana māgeu koṭi ghaṭa mada aru mahiṣa aneka||63||
दोहा 64#

महिष खाइ करि मदिरा पाना। गर्जा बज्राघात समाना॥
कुंभकरन दुर्मद रन रंगा। चला दुर्ग तजि सेन न संगा॥
देखि बिभीषनु आगें आयउ। परेउ चरन निज नाम सुनायउ॥
अनुज उठाइ हृदयँ तेहि लायो। रघुपति भक्त जानि मन भायो॥
तात लात रावन मोहि मारा। कहत परम हित मंत्र बिचारा॥
तेहिं गलानि रघुपति पहिं आयउँ। देखि दीन प्रभु के मन भायउँ॥
सुनु सुत भयउ कालबस रावन। सो कि मान अब परम सिखावन॥
धन्य धन्य तैं धन्य बिभीषन। भयहु तात निसिचर कुल भूषन॥
बंधु बंस तैं कीन्ह उजागर। भजेहु राम सोभा सुख सागर॥

mahiṣa khāi kari madirā pānā| garjā bajrāghāta samānā||
kuṃbhakarana durmada rana raṃgā| calā durga taji sena na saṃgā||
dekhi bibhīṣanu āgeṃ āyau| pareu carana nija nāma sunāyau||
anuja uṭhāi hṛdayam̐ tehi lāyo| raghupati bhakta jāni mana bhāyo||
tāta lāta rāvana mohi mārā| kahata parama hita maṃtra bicārā||
tehiṃ galāni raghupati pahiṃ āyaum̐| dekhi dīna prabhu ke mana bhāyaum̐||
sunu suta bhayau kālabasa rāvana| so ki māna aba parama sikhāvana||
dhanya dhanya taiṃ dhanya bibhīṣana| bhayahu tāta nisicara kula bhūṣana||
baṃdhu baṃsa taiṃ kīnha ujāgara| bhajehu rāma sobhā sukha sāgara||

दोहा 64
बचन कर्म मन कपट तजि भजेहु राम रनधीर।
जाहु न निज पर सूझ मोहि भयउँ कालबस बीर। 64॥
bacana karma mana kapaṭa taji bhajehu rāma ranadhīra|
jāhu na nija para sūjha mohi bhayaum̐ kālabasa bīra| 64||
दोहा 65#

बंधु बचन सुनि चला बिभीषन। आयउ जहँ त्रैलोक बिभूषन॥
नाथ भूधराकार सरीरा। कुंभकरन आवत रनधीरा॥
एतना कपिन्ह सुना जब काना। किलकिलाइ धाए बलवाना॥
लिए उठाइ बिटप अरु भूधर। कटकटाइ डारहिं ता ऊपर॥
कोटि कोटि गिरि सिखर प्रहारा। करहिं भालु कपि एक एक बारा॥
मुर् यो न मन तनु टर् यो न टार् यो। जिमि गज अर्क फलनि को मार्यो॥
तब मारुतसुत मुठिका हन्यो। पर् यो धरनि ब्याकुल सिर धुन्यो॥
पुनि उठि तेहिं मारेउ हनुमंता। घुर्मित भूतल परेउ तुरंता॥
पुनि नल नीलहि अवनि पछारेसि। जहँ तहँ पटकि पटकि भट डारेसि॥
चली बलीमुख सेन पराई। अति भय त्रसित न कोउ समुहाई॥

baṃdhu bacana suni calā bibhīṣana| āyau jaham̐ trailoka bibhūṣana||
nātha bhūdharākāra sarīrā| kuṃbhakarana āvata ranadhīrā||
etanā kapinha sunā jaba kānā| kilakilāi dhāe balavānā||
lie uṭhāi biṭapa aru bhūdhara| kaṭakaṭāi ḍārahiṃ tā ūpara||
koṭi koṭi giri sikhara prahārā| karahiṃ bhālu kapi eka eka bārā||
mur yo na mana tanu ṭar yo na ṭār yo| jimi gaja arka phalani ko māryo||
taba mārutasuta muṭhikā hanyo| par yo dharani byākula sira dhunyo||
puni uṭhi tehiṃ māreu hanumaṃtā| ghurmita bhūtala pareu turaṃtā||
puni nala nīlahi avani pachāresi| jaham̐ taham̐ paṭaki paṭaki bhaṭa ḍāresi||
calī balīmukha sena parāī| ati bhaya trasita na kou samuhāī||

दोहा 65
अंगदादि कपि मुरुछित करि समेत सुग्रीव।
काँख दाबि कपिराज कहुँ चला अमित बल सींव॥65॥
aṃgadādi kapi muruchita kari sameta sugrīva|
kām̐kha dābi kapirāja kahum̐ calā amita bala sīṃva||65||
दोहा 66#

उमा करत रघुपति नरलीला। खेलत गरुड़ जिमि अहिगन मीला॥
भृकुटि भंग जो कालहि खाई। ताहि कि सोहइ ऐसि लराई॥
जग पावनि कीरति बिस्तरिहहिं। गाइ गाइ भवनिधि नर तरिहहिं॥
मुरुछा गइ मारुतसुत जागा। सुग्रीवहि तब खोजन लागा॥
सुग्रीवहु कै मुरुछा बीती। निबुक गयउ तेहि मृतक प्रतीती॥
काटेसि दसन नासिका काना। गरजि अकास चलउ तेहिं जाना॥
गहेउ चरन गहि भूमि पछारा। अति लाघवँ उठि पुनि तेहि मारा॥
पुनि आयसु प्रभु पहिं बलवाना। जयति जयति जय कृपानिधाना॥
नाक कान काटे जियँ जानी। फिरा क्रोध करि भइ मन ग्लानी॥
सहज भीम पुनि बिनु श्रुति नासा। देखत कपि दल उपजी त्रासा॥

umā karata raghupati naralīlā| khelata garuḍa jimi ahigana mīlā||
bhṛkuṭi bhaṃga jo kālahi khāī| tāhi ki sohai aisi larāī||
jaga pāvani kīrati bistarihahiṃ| gāi gāi bhavanidhi nara tarihahiṃ||
muruchā gai mārutasuta jāgā| sugrīvahi taba khojana lāgā||
sugrīvahu kai muruchā bītī| nibuka gayau tehi mṛtaka pratītī||
kāṭesi dasana nāsikā kānā| garaji akāsa calau tehiṃ jānā||
gaheu carana gahi bhūmi pachārā| ati lāghavam̐ uṭhi puni tehi mārā||
puni āyasu prabhu pahiṃ balavānā| jayati jayati jaya kṛpānidhānā||
nāka kāna kāṭe jiyam̐ jānī| phirā krodha kari bhai mana glānī||
sahaja bhīma puni binu śruti nāsā| dekhata kapi dala upajī trāsā||

दोहा 66
जय जय जय रघुबंस मनि धाए कपि दै हूह।
एकहि बार तासु पर छाड़ेन्हि गिरि तरु जूह॥66॥
jaya jaya jaya raghubaṃsa mani dhāe kapi dai hūha|
ekahi bāra tāsu para chāḍenhi giri taru jūha||66||
दोहा 67#

कुंभकरन रन रंग बिरुद्धा। सन्मुख चला काल जनु क्रुद्धा॥
कोटि कोटि कपि धरि धरि खाई। जनु टीड़ी गिरि गुहाँ समाई॥
कोटिन्ह गहि सरीर सन मर्दा। कोटिन्ह मीजि मिलव महि गर्दा॥
मुख नासा श्रवनन्हि कीं बाटा। निसरि पराहिं भालु कपि ठाटा॥
रन मद मत्त निसाचर दर्पा। बिस्व ग्रसिहि जनु एहि बिधि अर्पा॥
मुरे सुभट सब फिरहिं न फेरे। सूझ न नयन सुनहिं नहिं टेरे॥
कुंभकरन कपि फौज बिडारी। सुनि धाई रजनीचर धारी॥
देखि राम बिकल कटकाई। रिपु अनीक नाना बिधि आई॥

kuṃbhakarana rana raṃga biruddhā| sanmukha calā kāla janu kruddhā||
koṭi koṭi kapi dhari dhari khāī| janu ṭīḍī giri guhām̐ samāī||
koṭinha gahi sarīra sana mardā| koṭinha mīji milava mahi gardā||
mukha nāsā śravananhi kīṃ bāṭā| nisari parāhiṃ bhālu kapi ṭhāṭā||
rana mada matta nisācara darpā| bisva grasihi janu ehi bidhi arpā||
mure subhaṭa saba phirahiṃ na phere| sūjha na nayana sunahiṃ nahiṃ ṭere||
kuṃbhakarana kapi phauja biḍārī| suni dhāī rajanīcara dhārī||
dekhi rāma bikala kaṭakāī| ripu anīka nānā bidhi āī||

दोहा 67
सुनु सुग्रीव बिभीषन अनुज सँभारेहु सैन।
मैं देखउँ खल बल दलहि बोले राजिवनैन॥67॥
sunu sugrīva bibhīṣana anuja sam̐bhārehu saina|
maiṃ dekhaum̐ khala bala dalahi bole rājivanaina||67||
दोहा 68#

कर सारंग साजि कटि भाथा। अरि दल दलन चले रघुनाथा॥
प्रथम कीन्ह प्रभु धनुष टँकोरा। रिपु दल बधिर भयउ सुनि सोरा॥
सत्यसंध छाँड़े सर लच्छा। कालसर्प जनु चले सपच्छा॥
जहँ तहँ चले बिपुल नाराचा। लगे कटन भट बिकट पिसाचा॥
कटहिं चरन उर सिर भुजदंडा। बहुतक बीर होहिं सत खंडा॥
घुर्मि घुर्मि घायल महि परहीं। उठि संभारि सुभट पुनि लरहीं॥
लागत बान जलद जिमि गाजहीं। बहुतक देखी कठिन सर भाजहिं॥
रुंड प्रचंड मुंड बिनु धावहिं। धरु धरु मारू मारु धुनि गावहिं॥

kara sāraṃga sāji kaṭi bhāthā| ari dala dalana cale raghunāthā||
prathama kīnha prabhu dhanuṣa ṭam̐korā| ripu dala badhira bhayau suni sorā||
satyasaṃdha chām̐ḍe sara lacchā| kālasarpa janu cale sapacchā||
jaham̐ taham̐ cale bipula nārācā| lage kaṭana bhaṭa bikaṭa pisācā||
kaṭahiṃ carana ura sira bhujadaṃḍā| bahutaka bīra hohiṃ sata khaṃḍā||
ghurmi ghurmi ghāyala mahi parahīṃ| uṭhi saṃbhāri subhaṭa puni larahīṃ||
lāgata bāna jalada jimi gājahīṃ| bahutaka dekhī kaṭhina sara bhājahiṃ||
ruṃḍa pracaṃḍa muṃḍa binu dhāvahiṃ| dharu dharu mārū māru dhuni gāvahiṃ||

दोहा 68
छन महुँ प्रभु के सायकन्हि काटे बिकट पिसाच।
पुनि रघुबीर निषंग महुँ प्रबिसे सब नाराच॥68॥
chana mahum̐ prabhu ke sāyakanhi kāṭe bikaṭa pisāca|
puni raghubīra niṣaṃga mahum̐ prabise saba nārāca||68||
दोहा 69#

कुंभकरन मन दीख बिचारी। हति धन माझ निसाचर धारी॥
भा अति क्रुद्ध महाबल बीरा। कियो मृगनायक नाद गँभीरा॥
कोपि महीधर लेइ उपारी। डारइ जहँ मर्कट भट भारी॥
आवत देखि सैल प्रभू भारे। सरन्हि काटि रज सम करि डारे॥।
पुनि धनु तानि कोपि रघुनायक। छाँड़े अति कराल बहु सायक॥
तनु महुँ प्रबिसि निसरि सर जाहीं। जिमि दामिनि घन माझ समाहीं॥
सोनित स्त्रवत सोह तन कारे। जनु कज्जल गिरि गेरु पनारे॥
बिकल बिलोकि भालु कपि धाए। बिहँसा जबहिं निकट कपि आए॥

kuṃbhakarana mana dīkha bicārī| hati dhana mājha nisācara dhārī||
bhā ati kruddha mahābala bīrā| kiyo mṛganāyaka nāda gam̐bhīrā||
kopi mahīdhara lei upārī| ḍārai jaham̐ markaṭa bhaṭa bhārī||
āvata dekhi saila prabhū bhāre| saranhi kāṭi raja sama kari ḍāre|||
puni dhanu tāni kopi raghunāyaka| chām̐ḍe ati karāla bahu sāyaka||
tanu mahum̐ prabisi nisari sara jāhīṃ| jimi dāmini ghana mājha samāhīṃ||
sonita stravata soha tana kāre| janu kajjala giri geru panāre||
bikala biloki bhālu kapi dhāe| biham̐sā jabahiṃ nikaṭa kapi āe||

दोहा 69
महानाद करि गर्जा कोटि कोटि गहि कीस।
महि पटकइ गजराज इव सपथ करइ दससीस॥69॥
mahānāda kari garjā koṭi koṭi gahi kīsa|
mahi paṭakai gajarāja iva sapatha karai dasasīsa||69||
दोहा 70#

भागे भालु बलीमुख जूथा। बृकु बिलोकि जिमि मेष बरूथा॥
चले भागि कपि भालु भवानी। बिकल पुकारत आरत बानी॥
यह निसिचर दुकाल सम अहई। कपिकुल देस परन अब चहई॥
कृपा बारिधर राम खरारी। पाहि पाहि प्रनतारति हारी॥
सकरुन बचन सुनत भगवाना। चले सुधारि सरासन बाना॥
राम सेन निज पाछैं घाली। चले सकोप महा बलसाली॥
खैंचि धनुष सर सत संधाने। छूटे तीर सरीर समाने॥
लागत सर धावा रिस भरा। कुधर डगमगत डोलति धरा॥
लीन्ह एक तेहिं सैल उपाटी। रघुकुल तिलक भुजा सोइ काटी॥
धावा बाम बाहु गिरि धारी। प्रभु सोउ भुजा काटि महि पारी॥
काटें भुजा सोह खल कैसा। पच्छहीन मंदर गिरि जैसा॥
उग्र बिलोकनि प्रभुहि बिलोका। ग्रसन चहत मानहुँ त्रेलोका॥

bhāge bhālu balīmukha jūthā| bṛku biloki jimi meṣa barūthā||
cale bhāgi kapi bhālu bhavānī| bikala pukārata ārata bānī||
yaha nisicara dukāla sama ahaī| kapikula desa parana aba cahaī||
kṛpā bāridhara rāma kharārī| pāhi pāhi pranatārati hārī||
sakaruna bacana sunata bhagavānā| cale sudhāri sarāsana bānā||
rāma sena nija pāchaiṃ ghālī| cale sakopa mahā balasālī||
khaiṃci dhanuṣa sara sata saṃdhāne| chūṭe tīra sarīra samāne||
lāgata sara dhāvā risa bharā| kudhara ḍagamagata ḍolati dharā||
līnha eka tehiṃ saila upāṭī| raghukula tilaka bhujā soi kāṭī||
dhāvā bāma bāhu giri dhārī| prabhu sou bhujā kāṭi mahi pārī||
kāṭeṃ bhujā soha khala kaisā| pacchahīna maṃdara giri jaisā||
ugra bilokani prabhuhi bilokā| grasana cahata mānahum̐ trelokā||

दोहा 70
करि चिक्कार घोर अति धावा बदनु पसारि।
गगन सिद्ध सुर त्रासित हा हा हेति पुकारि॥70॥
kari cikkāra ghora ati dhāvā badanu pasāri|
gagana siddha sura trāsita hā hā heti pukāri||70||
दोहा 71#

सभय देव करुनानिधि जान्यो। श्रवन प्रजंत सरासनु तान्यो॥
बिसिख निकर निसिचर मुख भरेऊ। तदपि महाबल भूमि न परेऊ॥
सरन्हि भरा मुख सन्मुख धावा। काल त्रोन सजीव जनु आवा॥
तब प्रभु कोपि तीब्र सर लीन्हा। धर ते भिन्न तासु सिर कीन्हा॥
सो सिर परेउ दसानन आगें। बिकल भयउ जिमि फनि मनि त्यागें॥
धरनि धसइ धर धाव प्रचंडा। तब प्रभु काटि कीन्ह दुइ खंडा॥
परे भूमि जिमि नभ तें भूधर। हेठ दाबि कपि भालु निसाचर॥
तासु तेज प्रभु बदन समाना। सुर मुनि सबहिं अचंभव माना॥
सुर दुंदुभीं बजावहिं हरषहिं। अस्तुति करहिं सुमन बहु बरषहिं॥
करि बिनती सुर सकल सिधाए। तेही समय देवरिषि आए॥
गगनोपरि हरि गुन गन गाए। रुचिर बीररस प्रभु मन भाए॥
बेगि हतहु खल कहि मुनि गए। राम समर महि सोभत भए॥

sabhaya deva karunānidhi jānyo| śravana prajaṃta sarāsanu tānyo||
bisikha nikara nisicara mukha bhareū| tadapi mahābala bhūmi na pareū||
saranhi bharā mukha sanmukha dhāvā| kāla trona sajīva janu āvā||
taba prabhu kopi tībra sara līnhā| dhara te bhinna tāsu sira kīnhā||
so sira pareu dasānana āgeṃ| bikala bhayau jimi phani mani tyāgeṃ||
dharani dhasai dhara dhāva pracaṃḍā| taba prabhu kāṭi kīnha dui khaṃḍā||
pare bhūmi jimi nabha teṃ bhūdhara| heṭha dābi kapi bhālu nisācara||
tāsu teja prabhu badana samānā| sura muni sabahiṃ acaṃbhava mānā||
sura duṃdubhīṃ bajāvahiṃ haraṣahiṃ| astuti karahiṃ sumana bahu baraṣahiṃ||
kari binatī sura sakala sidhāe| tehī samaya devariṣi āe||
gaganopari hari guna gana gāe| rucira bīrarasa prabhu mana bhāe||
begi hatahu khala kahi muni gae| rāma samara mahi sobhata bhae||

छंद
संग्राम भूमि बिराज रघुपति अतुल बल कोसल धनी।
श्रम बिंदु मुख राजीव लोचन अरुन तन सोनित कनी॥
भुज जुगल फेरत सर सरासन भालु कपि चहु दिसि बने।
कह दास तुलसी कहि न सक छबि सेष जेहि आनन घने॥
saṃgrāma bhūmi birāja raghupati atula bala kosala dhanī|
śrama biṃdu mukha rājīva locana aruna tana sonita kanī||
bhuja jugala pherata sara sarāsana bhālu kapi cahu disi bane|
kaha dāsa tulasī kahi na saka chabi seṣa jehi ānana ghane||

दोहा 71
निसिचर अधम मलाकर ताहि दीन्ह निज धाम।
गिरिजा ते नर मंदमति जे न भजहिं श्रीराम॥71॥
nisicara adhama malākara tāhi dīnha nija dhāma|
girijā te nara maṃdamati je na bhajahiṃ śrīrāma||71||
दोहा 72#

दिन कें अंत फिरीं दोउ अनी। समर भई सुभटन्ह श्रम घनी॥
राम कृपाँ कपि दल बल बाढ़ा। जिमि तृन पाइ लाग अति डाढ़ा॥
छीजहिं निसिचर दिनु अरु राती। निज मुख कहें सुकृत जेहि भाँती॥
बहु बिलाप दसकंधर करई। बंधु सीस पुनि पुनि उर धरई॥
रोवहिं नारि हृदय हति पानी। तासु तेज बल बिपुल बखानी॥
मेघनाद तेहि अवसर आयउ। कहि बहु कथा पिता समुझायउ॥
देखेहु कालि मोरि मनुसाई। अबहिं बहुत का करौं बड़ाई॥
इष्टदेव सैं बल रथ पायउँ। सो बल तात न तोहि देखायउँ॥
एहि बिधि जल्पत भयउ बिहाना। चहुँ दुआर लागे कपि नाना॥
इत कपि भालु काल सम बीरा। उत रजनीचर अति रनधीरा॥
लरहिं सुभट निज निज जय हेतू। बरनि न जाइ समर खगकेतू॥

dina keṃ aṃta phirīṃ dou anī| samara bhaī subhaṭanha śrama ghanī||
rāma kṛpām̐ kapi dala bala bāḍhā| jimi tṛna pāi lāga ati ḍāḍhā||
chījahiṃ nisicara dinu aru rātī| nija mukha kaheṃ sukṛta jehi bhām̐tī||
bahu bilāpa dasakaṃdhara karaī| baṃdhu sīsa puni puni ura dharaī||
rovahiṃ nāri hṛdaya hati pānī| tāsu teja bala bipula bakhānī||
meghanāda tehi avasara āyau| kahi bahu kathā pitā samujhāyau||
dekhehu kāli mori manusāī| abahiṃ bahuta kā karauṃ baḍāī||
iṣṭadeva saiṃ bala ratha pāyaum̐| so bala tāta na tohi dekhāyaum̐||
ehi bidhi jalpata bhayau bihānā| cahum̐ duāra lāge kapi nānā||
ita kapi bhālu kāla sama bīrā| uta rajanīcara ati ranadhīrā||
larahiṃ subhaṭa nija nija jaya hetū| barani na jāi samara khagaketū||

दोहा 72
मेघनाद मायामय रथ चढ़ि गयउ अकास॥
गर्जेउ अट्टहास करि भइ कपि कटकहि त्रास॥72॥
meghanāda māyāmaya ratha caḍhi gayau akāsa||
garjeu aṭṭahāsa kari bhai kapi kaṭakahi trāsa||72||
दोहा 73#

सक्ति सूल तरवारि कृपाना। अस्त्र सस्त्र कुलिसायुध नाना॥
डारह परसु परिघ पाषाना। लागेउ बृष्टि करै बहु बाना॥
दस दिसि रहे बान नभ छाई। मानहुँ मघा मेघ झरि लाई॥
धरु धरु मारु सुनिअ धुनि काना। जो मारइ तेहि कोउ न जाना॥
गहि गिरि तरु अकास कपि धावहिं। देखहि तेहि न दुखित फिरि आवहिं॥
अवघट घाट बाट गिरि कंदर। माया बल कीन्हेसि सर पंजर॥
जाहिं कहाँ ब्याकुल भए बंदर। सुरपति बंदि परे जनु मंदर॥
मारुतसुत अंगद नल नीला। कीन्हेसि बिकल सकल बलसीला॥
पुनि लछिमन सुग्रीव बिभीषन। सरन्हि मारि कीन्हेसि जर्जर तन॥
पुनि रघुपति सैं जूझे लागा। सर छाँड़इ होइ लागहिं नागा॥
ब्याल पास बस भए खरारी। स्वबस अनंत एक अबिकारी॥
नट इव कपट चरित कर नाना। सदा स्वतंत्र एक भगवाना॥
रन सोभा लगि प्रभुहिं बँधायो। नागपास देवन्ह भय पायो॥

sakti sūla taravāri kṛpānā| astra sastra kulisāyudha nānā||
ḍāraha parasu parigha pāṣānā| lāgeu bṛṣṭi karai bahu bānā||
dasa disi rahe bāna nabha chāī| mānahum̐ maghā megha jhari lāī||
dharu dharu māru sunia dhuni kānā| jo mārai tehi kou na jānā||
gahi giri taru akāsa kapi dhāvahiṃ| dekhahi tehi na dukhita phiri āvahiṃ||
avaghaṭa ghāṭa bāṭa giri kaṃdara| māyā bala kīnhesi sara paṃjara||
jāhiṃ kahām̐ byākula bhae baṃdara| surapati baṃdi pare janu maṃdara||
mārutasuta aṃgada nala nīlā| kīnhesi bikala sakala balasīlā||
puni lachimana sugrīva bibhīṣana| saranhi māri kīnhesi jarjara tana||
puni raghupati saiṃ jūjhe lāgā| sara chām̐ḍai hoi lāgahiṃ nāgā||
byāla pāsa basa bhae kharārī| svabasa anaṃta eka abikārī||
naṭa iva kapaṭa carita kara nānā| sadā svataṃtra eka bhagavānā||
rana sobhā lagi prabhuhiṃ bam̐dhāyo| nāgapāsa devanha bhaya pāyo||

दोहा 73
गिरिजा जासु नाम जपि मुनि काटहिं भव पास।
सो कि बंध तर आवइ ब्यापक बिस्व निवास॥73॥
girijā jāsu nāma japi muni kāṭahiṃ bhava pāsa|
so ki baṃdha tara āvai byāpaka bisva nivāsa||73||
दोहा 74#

चरित राम के सगुन भवानी। तर्कि न जाहिं बुद्धि बल बानी॥
अस बिचारि जे तग्य बिरागी। रामहि भजहिं तर्क सब त्यागी॥
ब्याकुल कटकु कीन्ह घननादा। पुनि भा प्रगट कहइ दुर्बादा॥
जामवंत कह खल रहु ठाढ़ा। सुनि करि ताहि क्रोध अति बाढ़ा॥
बूढ़ जानि सठ छाँड़ेउँ तोही। लागेसि अधम पचारै मोही॥
अस कहि तरल त्रिसूल चलायो। जामवंत कर गहि सोइ धायो॥
मारिसि मेघनाद कै छाती। परा भूमि घुर्मित सुरघाती॥
पुनि रिसान गहि चरन फिरायौ। महि पछारि निज बल देखरायो॥
बर प्रसाद सो मरइ न मारा। तब गहि पद लंका पर डारा॥
इहाँ देवरिषि गरुड़ पठायो। राम समीप सपदि सो आयो॥

carita rāma ke saguna bhavānī| tarki na jāhiṃ buddhi bala bānī||
asa bicāri je tagya birāgī| rāmahi bhajahiṃ tarka saba tyāgī||
byākula kaṭaku kīnha ghananādā| puni bhā pragaṭa kahai durbādā||
jāmavaṃta kaha khala rahu ṭhāḍhā| suni kari tāhi krodha ati bāḍhā||
būḍha jāni saṭha chām̐ḍeum̐ tohī| lāgesi adhama pacārai mohī||
asa kahi tarala trisūla calāyo| jāmavaṃta kara gahi soi dhāyo||
mārisi meghanāda kai chātī| parā bhūmi ghurmita suraghātī||
puni risāna gahi carana phirāyau| mahi pachāri nija bala dekharāyo||
bara prasāda so marai na mārā| taba gahi pada laṃkā para ḍārā||
ihām̐ devariṣi garuḍa paṭhāyo| rāma samīpa sapadi so āyo||

दोहा 74(क)
खगपति सब धरि खाए माया नाग बरूथ।
माया बिगत भए सब हरषे बानर जूथ। 74(क)॥
khagapati saba dhari khāe māyā nāga barūtha|
māyā bigata bhae saba haraṣe bānara jūtha| 74(ka)||

दोहा 74(ख)
गहि गिरि पादप उपल नख धाए कीस रिसाइ।
चले तमीचर बिकलतर गढ़ पर चढ़े पराइ॥74(ख)॥
gahi giri pādapa upala nakha dhāe kīsa risāi|
cale tamīcara bikalatara gaḍha para caḍhe parāi||74(kha)||
दोहा 75#

मेघनाद के मुरछा जागी। पितहि बिलोकि लाज अति लागी॥
तुरत गयउ गिरिबर कंदरा। करौं अजय मख अस मन धरा॥
इहाँ बिभीषन मंत्र बिचारा। सुनहु नाथ बल अतुल उदारा॥
मेघनाद मख करइ अपावन। खल मायावी देव सतावन॥
जौं प्रभु सिद्ध होइ सो पाइहि। नाथ बेगि पुनि जीति न जाइहि॥
सुनि रघुपति अतिसय सुख माना। बोले अंगदादि कपि नाना॥
लछिमन संग जाहु सब भाई। करहु बिधंस जग्य कर जाई॥
तुम्ह लछिमन मारेहु रन ओही। देखि सभय सुर दुख अति मोही॥
मारेहु तेहि बल बुद्धि उपाई। जेहिं छीजै निसिचर सुनु भाई॥
जामवंत सुग्रीव बिभीषन। सेन समेत रहेहु तीनिउ जन॥
जब रघुबीर दीन्हि अनुसासन। कटि निषंग कसि साजि सरासन॥
प्रभु प्रताप उर धरि रनधीरा। बोले घन इव गिरा गँभीरा॥
जौं तेहि आजु बधें बिनु आवौं। तौ रघुपति सेवक न कहावौं॥
जौं सत संकर करहिं सहाई। तदपि हतउँ रघुबीर दोहाई॥

meghanāda ke murachā jāgī| pitahi biloki lāja ati lāgī||
turata gayau giribara kaṃdarā| karauṃ ajaya makha asa mana dharā||
ihām̐ bibhīṣana maṃtra bicārā| sunahu nātha bala atula udārā||
meghanāda makha karai apāvana| khala māyāvī deva satāvana||
jauṃ prabhu siddha hoi so pāihi| nātha begi puni jīti na jāihi||
suni raghupati atisaya sukha mānā| bole aṃgadādi kapi nānā||
lachimana saṃga jāhu saba bhāī| karahu bidhaṃsa jagya kara jāī||
tumha lachimana mārehu rana ohī| dekhi sabhaya sura dukha ati mohī||
mārehu tehi bala buddhi upāī| jehiṃ chījai nisicara sunu bhāī||
jāmavaṃta sugrīva bibhīṣana| sena sameta rahehu tīniu jana||
jaba raghubīra dīnhi anusāsana| kaṭi niṣaṃga kasi sāji sarāsana||
prabhu pratāpa ura dhari ranadhīrā| bole ghana iva girā gam̐bhīrā||
jauṃ tehi āju badheṃ binu āvauṃ| tau raghupati sevaka na kahāvauṃ||
jauṃ sata saṃkara karahiṃ sahāī| tadapi hataum̐ raghubīra dohāī||

दोहा 75
रघुपति चरन नाइ सिरु चलेउ तुरंत अनंत।
अंगद नील मयंद नल संग सुभट हनुमंत॥75॥
raghupati carana nāi siru caleu turaṃta anaṃta|
aṃgada nīla mayaṃda nala saṃga subhaṭa hanumaṃta||75||
दोहा 76#

जाइ कपिन्ह सो देखा बैसा। आहुति देत रुधिर अरु भैंसा॥
कीन्ह कपिन्ह सब जग्य बिधंसा। जब न उठइ तब करहिं प्रसंसा॥
तदपि न उठइ धरेन्हि कच जाई। लातन्हि हति हति चले पराई॥
लै त्रिसुल धावा कपि भागे। आए जहँ रामानुज आगे॥
आवा परम क्रोध कर मारा। गर्ज घोर रव बारहिं बारा॥
कोपि मरुतसुत अंगद धाए। हति त्रिसूल उर धरनि गिराए॥
प्रभु कहँ छाँड़ेसि सूल प्रचंडा। सर हति कृत अनंत जुग खंडा॥
उठि बहोरि मारुति जुबराजा। हतहिं कोपि तेहि घाउ न बाजा॥
फिरे बीर रिपु मरइ न मारा। तब धावा करि घोर चिकारा॥
आवत देखि क्रुद्ध जनु काला। लछिमन छाड़े बिसिख कराला॥
देखेसि आवत पबि सम बाना। तुरत भयउ खल अंतरधाना॥
बिबिध बेष धरि करइ लराई। कबहुँक प्रगट कबहुँ दुरि जाई॥
देखि अजय रिपु डरपे कीसा। परम क्रुद्ध तब भयउ अहीसा॥
लछिमन मन अस मंत्र दृढ़ावा। एहि पापिहि मैं बहुत खेलावा॥
सुमिरि कोसलाधीस प्रतापा। सर संधान कीन्ह करि दापा॥
छाड़ा बान माझ उर लागा। मरती बार कपटु सब त्यागा॥

jāi kapinha so dekhā baisā| āhuti deta rudhira aru bhaiṃsā||
kīnha kapinha saba jagya bidhaṃsā| jaba na uṭhai taba karahiṃ prasaṃsā||
tadapi na uṭhai dharenhi kaca jāī| lātanhi hati hati cale parāī||
lai trisula dhāvā kapi bhāge| āe jaham̐ rāmānuja āge||
āvā parama krodha kara mārā| garja ghora rava bārahiṃ bārā||
kopi marutasuta aṃgada dhāe| hati trisūla ura dharani girāe||
prabhu kaham̐ chām̐ḍesi sūla pracaṃḍā| sara hati kṛta anaṃta juga khaṃḍā||
uṭhi bahori māruti jubarājā| hatahiṃ kopi tehi ghāu na bājā||
phire bīra ripu marai na mārā| taba dhāvā kari ghora cikārā||
āvata dekhi kruddha janu kālā| lachimana chāḍe bisikha karālā||
dekhesi āvata pabi sama bānā| turata bhayau khala aṃtaradhānā||
bibidha beṣa dhari karai larāī| kabahum̐ka pragaṭa kabahum̐ duri jāī||
dekhi ajaya ripu ḍarape kīsā| parama kruddha taba bhayau ahīsā||
lachimana mana asa maṃtra dṛḍhāvā| ehi pāpihi maiṃ bahuta khelāvā||
sumiri kosalādhīsa pratāpā| sara saṃdhāna kīnha kari dāpā||
chāḍā bāna mājha ura lāgā| maratī bāra kapaṭu saba tyāgā||

दोहा 76
रामानुज कहँ रामु कहँ अस कहि छाँड़ेसि प्रान।
धन्य धन्य तव जननी कह अंगद हनुमान॥76॥
rāmānuja kaham̐ rāmu kaham̐ asa kahi chām̐ḍesi prāna|
dhanya dhanya tava jananī kaha aṃgada hanumāna||76||
दोहा 77#

बिनु प्रयास हनुमान उठायो। लंका द्वार राखि पुनि आयो॥
तासु मरन सुनि सुर गंधर्बा। चढ़ि बिमान आए नभ सर्बा॥
बरषि सुमन दुंदुभीं बजावहिं। श्रीरघुनाथ बिमल जसु गावहिं॥
जय अनंत जय जगदाधारा। तुम्ह प्रभु सब देवन्हि निस्तारा॥
अस्तुति करि सुर सिद्ध सिधाए। लछिमन कृपासिन्धु पहिं आए॥
सुत बध सुना दसानन जबहीं। मुरुछित भयउ परेउ महि तबहीं॥
मंदोदरी रुदन कर भारी। उर ताड़न बहु भाँति पुकारी॥
नगर लोग सब ब्याकुल सोचा। सकल कहहिं दसकंधर पोचा॥

binu prayāsa hanumāna uṭhāyo| laṃkā dvāra rākhi puni āyo||
tāsu marana suni sura gaṃdharbā| caḍhi bimāna āe nabha sarbā||
baraṣi sumana duṃdubhīṃ bajāvahiṃ| śrīraghunātha bimala jasu gāvahiṃ||
jaya anaṃta jaya jagadādhārā| tumha prabhu saba devanhi nistārā||
astuti kari sura siddha sidhāe| lachimana kṛpāsindhu pahiṃ āe||
suta badha sunā dasānana jabahīṃ| muruchita bhayau pareu mahi tabahīṃ||
maṃdodarī rudana kara bhārī| ura tāḍana bahu bhām̐ti pukārī||
nagara loga saba byākula socā| sakala kahahiṃ dasakaṃdhara pocā||

दोहा 77
तब दसकंठ बिबिध बिधि समुझाईं सब नारि।
नस्वर रूप जगत सब देखहु हृदयँ बिचारि॥77॥
taba dasakaṃṭha bibidha bidhi samujhāīṃ saba nāri|
nasvara rūpa jagata saba dekhahu hṛdayam̐ bicāri||77||
दोहा 78#

तिन्हहि ग्यान उपदेसा रावन। आपुन मंद कथा सुभ पावन॥
पर उपदेस कुसल बहुतेरे। जे आचरहिं ते नर न घनेरे॥
निसा सिरानि भयउ भिनुसारा। लगे भालु कपि चारिहुँ द्वारा॥
सुभट बोलाइ दसानन बोला। रन सन्मुख जा कर मन डोला॥
सो अबहीं बरु जाउ पराई। संजुग बिमुख भएँ न भलाई॥
निज भुज बल मैं बयरु बढ़ावा। देहउँ उतरु जो रिपु चढ़ि आवा॥
अस कहि मरुत बेग रथ साजा। बाजे सकल जुझाऊ बाजा॥
चले बीर सब अतुलित बली। जनु कज्जल कै आँधी चली॥
असगुन अमित होहिं तेहि काला। गनइ न भुजबल गर्ब बिसाला॥

tinhahi gyāna upadesā rāvana| āpuna maṃda kathā subha pāvana||
para upadesa kusala bahutere| je ācarahiṃ te nara na ghanere||
nisā sirāni bhayau bhinusārā| lage bhālu kapi cārihum̐ dvārā||
subhaṭa bolāi dasānana bolā| rana sanmukha jā kara mana ḍolā||
so abahīṃ baru jāu parāī| saṃjuga bimukha bhaem̐ na bhalāī||
nija bhuja bala maiṃ bayaru baḍhāvā| dehaum̐ utaru jo ripu caḍhi āvā||
asa kahi maruta bega ratha sājā| bāje sakala jujhāū bājā||
cale bīra saba atulita balī| janu kajjala kai ām̐dhī calī||
asaguna amita hohiṃ tehi kālā| ganai na bhujabala garba bisālā||

छंद
अति गर्ब गनइ न सगुन असगुन स्त्रवहिं आयुध हाथ ते।
भट गिरत रथ ते बाजि गज चिक्करत भाजहिं साथ ते॥
गोमाय गीध कराल खर रव स्वान बोलहिं अति घने।
जनु कालदूत उलूक बोलहिं बचन परम भयावने॥
ati garba ganai na saguna asaguna stravahiṃ āyudha hātha te|
bhaṭa girata ratha te bāji gaja cikkarata bhājahiṃ sātha te||
gomāya gīdha karāla khara rava svāna bolahiṃ ati ghane|
janu kāladūta ulūka bolahiṃ bacana parama bhayāvane||

दोहा 78
ताहि कि संपति सगुन सुभ सपनेहुँ मन बिश्राम।
भूत द्रोह रत मोहबस राम बिमुख रति काम॥78॥
tāhi ki saṃpati saguna subha sapanehum̐ mana biśrāma|
bhūta droha rata mohabasa rāma bimukha rati kāma||78||
दोहा 79#

चलेउ निसाचर कटकु अपारा। चतुरंगिनी अनी बहु धारा॥
बिबिध भाँति बाहन रथ जाना। बिपुल बरन पताक ध्वज नाना॥
चले मत्त गज जूथ घनेरे। प्राबिट जलद मरुत जनु प्रेरे॥
बरन बरद बिरदैत निकाया। समर सूर जानहिं बहु माया॥
अति बिचित्र बाहिनी बिराजी। बीर बसंत सेन जनु साजी॥
चलत कटक दिगसिधुंर डगहीं। छुभित पयोधि कुधर डगमगहीं॥
उठी रेनु रबि गयउ छपाई। मरुत थकित बसुधा अकुलाई॥
पनव निसान घोर रव बाजहिं। प्रलय समय के घन जनु गाजहिं॥
भेरि नफीरि बाज सहनाई। मारू राग सुभट सुखदाई॥
केहरि नाद बीर सब करहीं। निज निज बल पौरुष उच्चरहीं॥
कहइ दसानन सुनहु सुभट्टा। मर्दहु भालु कपिन्ह के ठट्टा॥
हौं मारिहउँ भूप द्वौ भाई। अस कहि सन्मुख फौज रेंगाई॥
यह सुधि सकल कपिन्ह जब पाई। धाए करि रघुबीर दोहाई॥

caleu nisācara kaṭaku apārā| caturaṃginī anī bahu dhārā||
bibidha bhām̐ti bāhana ratha jānā| bipula barana patāka dhvaja nānā||
cale matta gaja jūtha ghanere| prābiṭa jalada maruta janu prere||
barana barada biradaita nikāyā| samara sūra jānahiṃ bahu māyā||
ati bicitra bāhinī birājī| bīra basaṃta sena janu sājī||
calata kaṭaka digasidhuṃra ḍagahīṃ| chubhita payodhi kudhara ḍagamagahīṃ||
uṭhī renu rabi gayau chapāī| maruta thakita basudhā akulāī||
panava nisāna ghora rava bājahiṃ| pralaya samaya ke ghana janu gājahiṃ||
bheri naphīri bāja sahanāī| mārū rāga subhaṭa sukhadāī||
kehari nāda bīra saba karahīṃ| nija nija bala pauruṣa uccarahīṃ||
kahai dasānana sunahu subhaṭṭā| mardahu bhālu kapinha ke ṭhaṭṭā||
hauṃ mārihaum̐ bhūpa dvau bhāī| asa kahi sanmukha phauja reṃgāī||
yaha sudhi sakala kapinha jaba pāī| dhāe kari raghubīra dohāī||

छंद
धाए बिसाल कराल मर्कट भालु काल समान ते।
मानहुँ सपच्छ उड़ाहिं भूधर बृंद नाना बान ते॥
नख दसन सैल महाद्रुमायुध सबल संक न मानहीं।
जय राम रावन मत्त गज मृगराज सुजसु बखानहीं॥
dhāe bisāla karāla markaṭa bhālu kāla samāna te|
mānahum̐ sapaccha uḍāhiṃ bhūdhara bṛṃda nānā bāna te||
nakha dasana saila mahādrumāyudha sabala saṃka na mānahīṃ|
jaya rāma rāvana matta gaja mṛgarāja sujasu bakhānahīṃ||

दोहा 79
दुहु दिसि जय जयकार करि निज निज जोरी जानि।
भिरे बीर इत रामहि उत रावनहि बखानि॥79॥
duhu disi jaya jayakāra kari nija nija jorī jāni|
bhire bīra ita rāmahi uta rāvanahi bakhāni||79||
दोहा 80#

रावनु रथी बिरथ रघुबीरा। देखि बिभीषन भयउ अधीरा॥
अधिक प्रीति मन भा संदेहा। बंदि चरन कह सहित सनेहा॥
नाथ न रथ नहिं तन पद त्राना। केहि बिधि जितब बीर बलवाना॥
सुनहु सखा कह कृपानिधाना। जेहिं जय होइ सो स्यंदन आना॥
सौरज धीरज तेहि रथ चाका। सत्य सील दृढ़ ध्वजा पताका॥
बल बिबेक दम परहित घोरे। छमा कृपा समता रजु जोरे॥
ईस भजनु सारथी सुजाना। बिरति चर्म संतोष कृपाना॥
दान परसु बुधि सक्ति प्रचंड़ा। बर बिग्यान कठिन कोदंडा॥
अमल अचल मन त्रोन समाना। सम जम नियम सिलीमुख नाना॥
कवच अभेद बिप्र गुर पूजा। एहि सम बिजय उपाय न दूजा॥
सखा धर्ममय अस रथ जाकें। जीतन कहँ न कतहुँ रिपु ताकें॥

rāvanu rathī biratha raghubīrā| dekhi bibhīṣana bhayau adhīrā||
adhika prīti mana bhā saṃdehā| baṃdi carana kaha sahita sanehā||
nātha na ratha nahiṃ tana pada trānā| kehi bidhi jitaba bīra balavānā||
sunahu sakhā kaha kṛpānidhānā| jehiṃ jaya hoi so syaṃdana ānā||
sauraja dhīraja tehi ratha cākā| satya sīla dṛḍha dhvajā patākā||
bala bibeka dama parahita ghore| chamā kṛpā samatā raju jore||
īsa bhajanu sārathī sujānā| birati carma saṃtoṣa kṛpānā||
dāna parasu budhi sakti pracaṃḍā| bara bigyāna kaṭhina kodaṃḍā||
amala acala mana trona samānā| sama jama niyama silīmukha nānā||
kavaca abheda bipra gura pūjā| ehi sama bijaya upāya na dūjā||
sakhā dharmamaya asa ratha jākeṃ| jītana kaham̐ na katahum̐ ripu tākeṃ||

दोहा 80(क)
महा अजय संसार रिपु जीति सकइ सो बीर।
जाकें अस रथ होइ दृढ़ सुनहु सखा मतिधीर॥80(क)॥
mahā ajaya saṃsāra ripu jīti sakai so bīra|
jākeṃ asa ratha hoi dṛḍha sunahu sakhā matidhīra||80(ka)||

दोहा 80(ख)
सुनि प्रभु बचन बिभीषन हरषि गहे पद कंज।
एहि मिस मोहि उपदेसेहु राम कृपा सुख पुंज॥80(ख)॥
suni prabhu bacana bibhīṣana haraṣi gahe pada kaṃja|
ehi misa mohi upadesehu rāma kṛpā sukha puṃja||80(kha)||

दोहा 80(ग)
उत पचार दसकंधर इत अंगद हनुमान।
लरत निसाचर भालु कपि करि निज निज प्रभु आन॥80(ग)॥
uta pacāra dasakaṃdhara ita aṃgada hanumāna|
larata nisācara bhālu kapi kari nija nija prabhu āna||80(ga)||
दोहा 81#

सुर ब्रह्मादि सिद्ध मुनि नाना। देखत रन नभ चढ़े बिमाना॥
हमहू उमा रहे तेहि संगा। देखत राम चरित रन रंगा॥
सुभट समर रस दुहु दिसि माते। कपि जयसील राम बल ताते॥
एक एक सन भिरहिं पचारहिं। एकन्ह एक मर्दि महि पारहिं॥
मारहिं काटहिं धरहिं पछारहिं। सीस तोरि सीसन्ह सन मारहिं॥
उदर बिदारहिं भुजा उपारहिं। गहि पद अवनि पटकि भट डारहिं॥
निसिचर भट महि गाड़हि भालू। ऊपर ढारि देहिं बहु बालू॥
बीर बलिमुख जुद्ध बिरुद्धे। देखिअत बिपुल काल जनु क्रुद्धे॥

sura brahmādi siddha muni nānā| dekhata rana nabha caḍhe bimānā||
hamahū umā rahe tehi saṃgā| dekhata rāma carita rana raṃgā||
subhaṭa samara rasa duhu disi māte| kapi jayasīla rāma bala tāte||
eka eka sana bhirahiṃ pacārahiṃ| ekanha eka mardi mahi pārahiṃ||
mārahiṃ kāṭahiṃ dharahiṃ pachārahiṃ| sīsa tori sīsanha sana mārahiṃ||
udara bidārahiṃ bhujā upārahiṃ| gahi pada avani paṭaki bhaṭa ḍārahiṃ||
nisicara bhaṭa mahi gāḍahi bhālū| ūpara ḍhāri dehiṃ bahu bālū||
bīra balimukha juddha biruddhe| dekhiata bipula kāla janu kruddhe||

छंद
क्रुद्धे कृतांत समान कपि तन स्त्रवत सोनित राजहीं।
मर्दहिं निसाचर कटक भट बलवंत घन जिमि गाजहीं॥
मारहिं चपेटन्हि डाटि दातन्ह काटि लातन्ह मीजहीं।
चिक्करहिं मर्कट भालु छल बल करहिं जेहिं खल छीजहीं॥
kruddhe kṛtāṃta samāna kapi tana stravata sonita rājahīṃ|
mardahiṃ nisācara kaṭaka bhaṭa balavaṃta ghana jimi gājahīṃ||
mārahiṃ capeṭanhi ḍāṭi dātanha kāṭi lātanha mījahīṃ|
cikkarahiṃ markaṭa bhālu chala bala karahiṃ jehiṃ khala chījahīṃ||

छंद
धरि गाल फारहिं उर बिदारहिं गल अँतावरि मेलहीं।
प्रहलादपति जनु बिबिध तनु धरि समर अंगन खेलहीं॥
धरु मारु काटु पछारु घोर गिरा गगन महि भरि रही।
जय राम जो तृन ते कुलिस कर कुलिस ते कर तृन सही॥
dhari gāla phārahiṃ ura bidārahiṃ gala am̐tāvari melahīṃ|
prahalādapati janu bibidha tanu dhari samara aṃgana khelahīṃ||
dharu māru kāṭu pachāru ghora girā gagana mahi bhari rahī|
jaya rāma jo tṛna te kulisa kara kulisa te kara tṛna sahī||

दोहा 81
निज दल बिचलत देखेसि बीस भुजाँ दस चाप।
रथ चढ़ि चलेउ दसानन फिरहु फिरहु करि दाप॥81॥
nija dala bicalata dekhesi bīsa bhujām̐ dasa cāpa|
ratha caḍhi caleu dasānana phirahu phirahu kari dāpa||81||
दोहा 82#

धायउ परम क्रुद्ध दसकंधर। सन्मुख चले हूह दै बंदर॥
गहि कर पादप उपल पहारा। डारेन्हि ता पर एकहिं बारा॥
लागहिं सैल बज्र तन तासू। खंड खंड होइ फूटहिं आसू॥
चला न अचल रहा रथ रोपी। रन दुर्मद रावन अति कोपी॥
इत उत झपटि दपटि कपि जोधा। मर्दै लाग भयउ अति क्रोधा॥
चले पराइ भालु कपि नाना। त्राहि त्राहि अंगद हनुमाना॥
पाहि पाहि रघुबीर गोसाई। यह खल खाइ काल की नाई॥
तेहि देखे कपि सकल पराने। दसहुँ चाप सायक संधाने॥

dhāyau parama kruddha dasakaṃdhara| sanmukha cale hūha dai baṃdara||
gahi kara pādapa upala pahārā| ḍārenhi tā para ekahiṃ bārā||
lāgahiṃ saila bajra tana tāsū| khaṃḍa khaṃḍa hoi phūṭahiṃ āsū||
calā na acala rahā ratha ropī| rana durmada rāvana ati kopī||
ita uta jhapaṭi dapaṭi kapi jodhā| mardai lāga bhayau ati krodhā||
cale parāi bhālu kapi nānā| trāhi trāhi aṃgada hanumānā||
pāhi pāhi raghubīra gosāī| yaha khala khāi kāla kī nāī||
tehi dekhe kapi sakala parāne| dasahum̐ cāpa sāyaka saṃdhāne||

छंद
संधानि धनु सर निकर छाड़ेसि उरग जिमि उड़ि लागहीं।
रहे पूरि सर धरनी गगन दिसि बिदसि कहँ कपि भागहीं॥
भयो अति कोलाहल बिकल कपि दल भालु बोलहिं आतुरे।
रघुबीर करुना सिंधु आरत बंधु जन रच्छक हरे॥
saṃdhāni dhanu sara nikara chāḍesi uraga jimi uḍi lāgahīṃ|
rahe pūri sara dharanī gagana disi bidasi kaham̐ kapi bhāgahīṃ||
bhayo ati kolāhala bikala kapi dala bhālu bolahiṃ āture|
raghubīra karunā siṃdhu ārata baṃdhu jana racchaka hare||

दोहा 82
निज दल बिकल देखि कटि कसि निषंग धनु हाथ।
लछिमन चले क्रुद्ध होइ नाइ राम पद माथ॥82॥
nija dala bikala dekhi kaṭi kasi niṣaṃga dhanu hātha|
lachimana cale kruddha hoi nāi rāma pada mātha||82||
दोहा 83#

रे खल का मारसि कपि भालू। मोहि बिलोकु तोर मैं कालू॥
खोजत रहेउँ तोहि सुतघाती। आजु निपाति जुड़ावउँ छाती॥
अस कहि छाड़ेसि बान प्रचंडा। लछिमन किए सकल सत खंडा॥
कोटिन्ह आयुध रावन डारे। तिल प्रवान करि काटि निवारे॥
पुनि निज बानन्ह कीन्ह प्रहारा। स्यंदनु भंजि सारथी मारा॥
सत सत सर मारे दस भाला। गिरि सृंगन्ह जनु प्रबिसहिं ब्याला॥
पुनि सत सर मारा उर माहीं। परेउ धरनि तल सुधि कछु नाहीं॥
उठा प्रबल पुनि मुरुछा जागी। छाड़िसि ब्रह्म दीन्हि जो साँगी॥

re khala kā mārasi kapi bhālū| mohi biloku tora maiṃ kālū||
khojata raheum̐ tohi sutaghātī| āju nipāti juḍāvaum̐ chātī||
asa kahi chāḍesi bāna pracaṃḍā| lachimana kie sakala sata khaṃḍā||
koṭinha āyudha rāvana ḍāre| tila pravāna kari kāṭi nivāre||
puni nija bānanha kīnha prahārā| syaṃdanu bhaṃji sārathī mārā||
sata sata sara māre dasa bhālā| giri sṛṃganha janu prabisahiṃ byālā||
puni sata sara mārā ura māhīṃ| pareu dharani tala sudhi kachu nāhīṃ||
uṭhā prabala puni muruchā jāgī| chāḍisi brahma dīnhi jo sām̐gī||

छंद
सो ब्रह्म दत्त प्रचंड सक्ति अनंत उर लागी सही।
पर्यो बीर बिकल उठाव दसमुख अतुल बल महिमा रही॥
ब्रह्मांड भवन बिराज जाकें एक सिर जिमि रज कनी।
तेहि चह उठावन मूढ़ रावन जान नहिं त्रिभुअन धनी॥
so brahma datta pracaṃḍa sakti anaṃta ura lāgī sahī|
paryo bīra bikala uṭhāva dasamukha atula bala mahimā rahī||
brahmāṃḍa bhavana birāja jākeṃ eka sira jimi raja kanī|
tehi caha uṭhāvana mūḍha rāvana jāna nahiṃ tribhuana dhanī||

दोहा 83
देखि पवनसुत धायउ बोलत बचन कठोर।
आवत कपिहि हन्यो तेहिं मुष्टि प्रहार प्रघोर॥83॥
dekhi pavanasuta dhāyau bolata bacana kaṭhora|
āvata kapihi hanyo tehiṃ muṣṭi prahāra praghora||83||
दोहा 84#

जानु टेकि कपि भूमि न गिरा। उठा सँभारि बहुत रिस भरा॥
मुठिका एक ताहि कपि मारा। परेउ सैल जनु बज्र प्रहारा॥
मुरुछा गै बहोरि सो जागा। कपि बल बिपुल सराहन लागा॥
धिग धिग मम पौरुष धिग मोही। जौं तैं जिअत रहेसि सुरद्रोही॥
अस कहि लछिमन कहुँ कपि ल्यायो। देखि दसानन बिसमय पायो॥
कह रघुबीर समुझु जियँ भ्राता। तुम्ह कृतांत भच्छक सुर त्राता॥
सुनत बचन उठि बैठ कृपाला। गई गगन सो सकति कराला॥
पुनि कोदंड बान गहि धाए। रिपु सन्मुख अति आतुर आए॥

jānu ṭeki kapi bhūmi na girā| uṭhā sam̐bhāri bahuta risa bharā||
muṭhikā eka tāhi kapi mārā| pareu saila janu bajra prahārā||
muruchā gai bahori so jāgā| kapi bala bipula sarāhana lāgā||
dhiga dhiga mama pauruṣa dhiga mohī| jauṃ taiṃ jiata rahesi suradrohī||
asa kahi lachimana kahum̐ kapi lyāyo| dekhi dasānana bisamaya pāyo||
kaha raghubīra samujhu jiyam̐ bhrātā| tumha kṛtāṃta bhacchaka sura trātā||
sunata bacana uṭhi baiṭha kṛpālā| gaī gagana so sakati karālā||
puni kodaṃḍa bāna gahi dhāe| ripu sanmukha ati ātura āe||

छंद
आतुर बहोरि बिभंजि स्यंदन सूत हति ब्याकुल कियो।
गिर् यो धरनि दसकंधर बिकलतर बान सत बेध्यो हियो॥
सारथी दूसर घालि रथ तेहि तुरत लंका लै गयो।
रघुबीर बंधु प्रताप पुंज बहोरि प्रभु चरनन्हि नयो॥
ātura bahori bibhaṃji syaṃdana sūta hati byākula kiyo|
gir yo dharani dasakaṃdhara bikalatara bāna sata bedhyo hiyo||
sārathī dūsara ghāli ratha tehi turata laṃkā lai gayo|
raghubīra baṃdhu pratāpa puṃja bahori prabhu carananhi nayo||

दोहा 84
उहाँ दसानन जागि करि करै लाग कछु जग्य।
राम बिरोध बिजय चह सठ हठ बस अति अग्य॥84॥
uhām̐ dasānana jāgi kari karai lāga kachu jagya|
rāma birodha bijaya caha saṭha haṭha basa ati agya||84||
दोहा 85#

इहाँ बिभीषन सब सुधि पाई। सपदि जाइ रघुपतिहि सुनाई॥
नाथ करइ रावन एक जागा। सिद्ध भएँ नहिं मरिहि अभागा॥
पठवहु नाथ बेगि भट बंदर। करहिं बिधंस आव दसकंधर॥
प्रात होत प्रभु सुभट पठाए। हनुमदादि अंगद सब धाए॥
कौतुक कूदि चढ़े कपि लंका। पैठे रावन भवन असंका॥
जग्य करत जबहीं सो देखा। सकल कपिन्ह भा क्रोध बिसेषा॥
रन ते निलज भाजि गृह आवा। इहाँ आइ बक ध्यान लगावा॥
अस कहि अंगद मारा लाता। चितव न सठ स्वारथ मन राता॥

ihām̐ bibhīṣana saba sudhi pāī| sapadi jāi raghupatihi sunāī||
nātha karai rāvana eka jāgā| siddha bhaem̐ nahiṃ marihi abhāgā||
paṭhavahu nātha begi bhaṭa baṃdara| karahiṃ bidhaṃsa āva dasakaṃdhara||
prāta hota prabhu subhaṭa paṭhāe| hanumadādi aṃgada saba dhāe||
kautuka kūdi caḍhe kapi laṃkā| paiṭhe rāvana bhavana asaṃkā||
jagya karata jabahīṃ so dekhā| sakala kapinha bhā krodha biseṣā||
rana te nilaja bhāji gṛha āvā| ihām̐ āi baka dhyāna lagāvā||
asa kahi aṃgada mārā lātā| citava na saṭha svāratha mana rātā||

छंद
नहिं चितव जब करि कोप कपि गहि दसन लातन्ह मारहीं।
धरि केस नारि निकारि बाहेर तेऽतिदीन पुकारहीं॥
तब उठेउ क्रुद्ध कृतांत सम गहि चरन बानर डारई।
एहि बीच कपिन्ह बिधंस कृत मख देखि मन महुँ हारई॥
nahiṃ citava jaba kari kopa kapi gahi dasana lātanha mārahīṃ|
dhari kesa nāri nikāri bāhera te'tidīna pukārahīṃ||
taba uṭheu kruddha kṛtāṃta sama gahi carana bānara ḍāraī|
ehi bīca kapinha bidhaṃsa kṛta makha dekhi mana mahum̐ hāraī||

दोहा 85
जग्य बिधंसि कुसल कपि आए रघुपति पास।
चलेउ निसाचर क्रुर्द्ध होइ त्यागि जिवन कै आस॥85॥
jagya bidhaṃsi kusala kapi āe raghupati pāsa|
caleu nisācara krurddha hoi tyāgi jivana kai āsa||85||
दोहा 86#

चलत होहिं अति असुभ भयंकर। बैठहिं गीध उड़ाइ सिरन्ह पर॥
भयउ कालबस काहु न माना। कहेसि बजावहु जुद्ध निसाना॥
चली तमीचर अनी अपारा। बहु गज रथ पदाति असवारा॥
प्रभु सन्मुख धाए खल कैंसें। सलभ समूह अनल कहँ जैंसें॥
इहाँ देवतन्ह अस्तुति कीन्ही। दारुन बिपति हमहि एहिं दीन्ही॥
अब जनि राम खेलावहु एही। अतिसय दुखित होति बैदेही॥
देव बचन सुनि प्रभु मुसकाना। उठि रघुबीर सुधारे बाना।
जटा जूट दृढ़ बाँधै माथे। सोहहिं सुमन बीच बिच गाथे॥
अरुन नयन बारिद तनु स्यामा। अखिल लोक लोचनाभिरामा॥
कटितट परिकर कस्यो निषंगा। कर कोदंड कठिन सारंगा॥

calata hohiṃ ati asubha bhayaṃkara| baiṭhahiṃ gīdha uḍāi siranha para||
bhayau kālabasa kāhu na mānā| kahesi bajāvahu juddha nisānā||
calī tamīcara anī apārā| bahu gaja ratha padāti asavārā||
prabhu sanmukha dhāe khala kaiṃseṃ| salabha samūha anala kaham̐ jaiṃseṃ||
ihām̐ devatanha astuti kīnhī| dāruna bipati hamahi ehiṃ dīnhī||
aba jani rāma khelāvahu ehī| atisaya dukhita hoti baidehī||
deva bacana suni prabhu musakānā| uṭhi raghubīra sudhāre bānā|
jaṭā jūṭa dṛḍha bām̐dhai māthe| sohahiṃ sumana bīca bica gāthe||
aruna nayana bārida tanu syāmā| akhila loka locanābhirāmā||
kaṭitaṭa parikara kasyo niṣaṃgā| kara kodaṃḍa kaṭhina sāraṃgā||

छंद
सारंग कर सुंदर निषंग सिलीमुखाकर कटि कस्यो।
भुजदंड पीन मनोहरायत उर धरासुर पद लस्यो॥
कह दास तुलसी जबहिं प्रभु सर चाप कर फेरन लगे।
ब्रह्मांड दिग्गज कमठ अहि महि सिंधु भूधर डगमगे॥
sāraṃga kara suṃdara niṣaṃga silīmukhākara kaṭi kasyo|
bhujadaṃḍa pīna manoharāyata ura dharāsura pada lasyo||
kaha dāsa tulasī jabahiṃ prabhu sara cāpa kara pherana lage|
brahmāṃḍa diggaja kamaṭha ahi mahi siṃdhu bhūdhara ḍagamage||

दोहा 86
सोभा देखि हरषि सुर बरषहिं सुमन अपार।
जय जय जय करुनानिधि छबि बल गुन आगार॥86॥
sobhā dekhi haraṣi sura baraṣahiṃ sumana apāra|
jaya jaya jaya karunānidhi chabi bala guna āgāra||86||
दोहा 87#

एहीं बीच निसाचर अनी। कसमसात आई अति घनी।
देखि चले सन्मुख कपि भट्टा। प्रलयकाल के जनु घन घट्टा॥
बहु कृपान तरवारि चमंकहिं। जनु दहँ दिसि दामिनीं दमंकहिं॥
गज रथ तुरग चिकार कठोरा। गर्जहिं मनहुँ बलाहक घोरा॥
कपि लंगूर बिपुल नभ छाए। मनहुँ इंद्रधनु उए सुहाए॥
उठइ धूरि मानहुँ जलधारा। बान बुंद भै बृष्टि अपारा॥
दुहुँ दिसि पर्बत करहिं प्रहारा। बज्रपात जनु बारहिं बारा॥
रघुपति कोपि बान झरि लाई। घायल भै निसिचर समुदाई॥
लागत बान बीर चिक्करहीं। घुर्मि घुर्मि जहँ तहँ महि परहीं॥
स्त्रवहिं सैल जनु निर्झर भारी। सोनित सरि कादर भयकारी॥

ehīṃ bīca nisācara anī| kasamasāta āī ati ghanī|
dekhi cale sanmukha kapi bhaṭṭā| pralayakāla ke janu ghana ghaṭṭā||
bahu kṛpāna taravāri camaṃkahiṃ| janu daham̐ disi dāminīṃ damaṃkahiṃ||
gaja ratha turaga cikāra kaṭhorā| garjahiṃ manahum̐ balāhaka ghorā||
kapi laṃgūra bipula nabha chāe| manahum̐ iṃdradhanu ue suhāe||
uṭhai dhūri mānahum̐ jaladhārā| bāna buṃda bhai bṛṣṭi apārā||
duhum̐ disi parbata karahiṃ prahārā| bajrapāta janu bārahiṃ bārā||
raghupati kopi bāna jhari lāī| ghāyala bhai nisicara samudāī||
lāgata bāna bīra cikkarahīṃ| ghurmi ghurmi jaham̐ taham̐ mahi parahīṃ||
stravahiṃ saila janu nirjhara bhārī| sonita sari kādara bhayakārī||

छंद
कादर भयंकर रुधिर सरिता चली परम अपावनी।
दोउ कूल दल रथ रेत चक्र अबर्त बहति भयावनी॥
जल जंतुगज पदचर तुरग खर बिबिध बाहन को गने।
सर सक्ति तोमर सर्प चाप तरंग चर्म कमठ घने॥
kādara bhayaṃkara rudhira saritā calī parama apāvanī|
dou kūla dala ratha reta cakra abarta bahati bhayāvanī||
jala jaṃtugaja padacara turaga khara bibidha bāhana ko gane|
sara sakti tomara sarpa cāpa taraṃga carma kamaṭha ghane||

दोहा 87
बीर परहिं जनु तीर तरु मज्जा बहु बह फेन।
कादर देखि डरहिं तहँ सुभटन्ह के मन चेन॥87॥
bīra parahiṃ janu tīra taru majjā bahu baha phena|
kādara dekhi ḍarahiṃ taham̐ subhaṭanha ke mana cena||87||
दोहा 88#

मज्जहि भूत पिसाच बेताला। प्रमथ महा झोटिंग कराला॥
काक कंक लै भुजा उड़ाहीं। एक ते छीनि एक लै खाहीं॥
एक कहहिं ऐसिउ सौंघाई। सठहु तुम्हार दरिद्र न जाई॥
कहँरत भट घायल तट गिरे। जहँ तहँ मनहुँ अर्धजल परे॥
खैंचहिं गीध आँत तट भए। जनु बंसी खेलत चित दए॥
बहु भट बहहिं चढ़े खग जाहीं। जनु नावरि खेलहिं सरि माहीं॥
जोगिनि भरि भरि खप्पर संचहिं। भूत पिसाच बधू नभ नंचहिं॥
भट कपाल करताल बजावहिं। चामुंडा नाना बिधि गावहिं॥
जंबुक निकर कटक्कट कट्टहिं। खाहिं हुआहिं अघाहिं दपट्टहिं॥
कोटिन्ह रुंड मुंड बिनु डोल्लहिं। सीस परे महि जय जय बोल्लहिं॥

majjahi bhūta pisāca betālā| pramatha mahā jhoṭiṃga karālā||
kāka kaṃka lai bhujā uḍāhīṃ| eka te chīni eka lai khāhīṃ||
eka kahahiṃ aisiu sauṃghāī| saṭhahu tumhāra daridra na jāī||
kaham̐rata bhaṭa ghāyala taṭa gire| jaham̐ taham̐ manahum̐ ardhajala pare||
khaiṃcahiṃ gīdha ām̐ta taṭa bhae| janu baṃsī khelata cita dae||
bahu bhaṭa bahahiṃ caḍhe khaga jāhīṃ| janu nāvari khelahiṃ sari māhīṃ||
jogini bhari bhari khappara saṃcahiṃ| bhūta pisāca badhū nabha naṃcahiṃ||
bhaṭa kapāla karatāla bajāvahiṃ| cāmuṃḍā nānā bidhi gāvahiṃ||
jaṃbuka nikara kaṭakkaṭa kaṭṭahiṃ| khāhiṃ huāhiṃ aghāhiṃ dapaṭṭahiṃ||
koṭinha ruṃḍa muṃḍa binu ḍollahiṃ| sīsa pare mahi jaya jaya bollahiṃ||

छंद
बोल्लहिं जो जय जय मुंड रुंड प्रचंड सिर बिनु धावहीं।
खप्परिन्ह खग्ग अलुज्झि जुज्झहिं सुभट भटन्ह ढहावहीं॥
बानर निसाचर निकर मर्दहिं राम बल दर्पित भए।
संग्राम अंगन सुभट सोवहिं राम सर निकरन्हि हए॥
bollahiṃ jo jaya jaya muṃḍa ruṃḍa pracaṃḍa sira binu dhāvahīṃ|
khapparinha khagga alujjhi jujjhahiṃ subhaṭa bhaṭanha ḍhahāvahīṃ||
bānara nisācara nikara mardahiṃ rāma bala darpita bhae|
saṃgrāma aṃgana subhaṭa sovahiṃ rāma sara nikaranhi hae||

दोहा 88
रावन हृदयँ बिचारा भा निसिचर संघार।
मैं अकेल कपि भालु बहु माया करौं अपार॥88॥
rāvana hṛdayam̐ bicārā bhā nisicara saṃghāra|
maiṃ akela kapi bhālu bahu māyā karauṃ apāra||88||
दोहा 89#

देवन्ह प्रभुहि पयादें देखा। उपजा उर अति छोभ बिसेषा॥
सुरपति निज रथ तुरत पठावा। हरष सहित मातलि लै आवा॥
तेज पुंज रथ दिब्य अनूपा। हरषि चढ़े कोसलपुर भूपा॥
चंचल तुरग मनोहर चारी। अजर अमर मन सम गतिकारी॥
रथारूढ़ रघुनाथहि देखी। धाए कपि बलु पाइ बिसेषी॥
सही न जाइ कपिन्ह कै मारी। तब रावन माया बिस्तारी॥
सो माया रघुबीरहि बाँची। लछिमन कपिन्ह सो मानी साँची॥
देखी कपिन्ह निसाचर अनी। अनुज सहित बहु कोसलधनी॥

devanha prabhuhi payādeṃ dekhā| upajā ura ati chobha biseṣā||
surapati nija ratha turata paṭhāvā| haraṣa sahita mātali lai āvā||
teja puṃja ratha dibya anūpā| haraṣi caḍhe kosalapura bhūpā||
caṃcala turaga manohara cārī| ajara amara mana sama gatikārī||
rathārūḍha raghunāthahi dekhī| dhāe kapi balu pāi biseṣī||
sahī na jāi kapinha kai mārī| taba rāvana māyā bistārī||
so māyā raghubīrahi bām̐cī| lachimana kapinha so mānī sām̐cī||
dekhī kapinha nisācara anī| anuja sahita bahu kosaladhanī||

छंद
बहु राम लछिमन देखि मर्कट भालु मन अति अपडरे।
जनु चित्र लिखित समेत लछिमन जहँ सो तहँ चितवहिं खरे॥
निज सेन चकित बिलोकि हँसि सर चाप सजि कोसल धनी।
माया हरी हरि निमिष महुँ हरषी सकल मर्कट अनी॥
bahu rāma lachimana dekhi markaṭa bhālu mana ati apaḍare|
janu citra likhita sameta lachimana jaham̐ so taham̐ citavahiṃ khare||
nija sena cakita biloki ham̐si sara cāpa saji kosala dhanī|
māyā harī hari nimiṣa mahum̐ haraṣī sakala markaṭa anī||

दोहा 89
बहुरि राम सब तन चितइ बोले बचन गँभीर।
द्वंदजुद्ध देखहु सकल श्रमित भए अति बीर॥89॥
bahuri rāma saba tana citai bole bacana gam̐bhīra|
dvaṃdajuddha dekhahu sakala śramita bhae ati bīra||89||
दोहा 90#

अस कहि रथ रघुनाथ चलावा। बिप्र चरन पंकज सिरु नावा॥
तब लंकेस क्रोध उर छावा। गर्जत तर्जत सन्मुख धावा॥
जीतेहु जे भट संजुग माहीं। सुनु तापस मैं तिन्ह सम नाहीं॥
रावन नाम जगत जस जाना। लोकप जाकें बंदीखाना॥
खर दूषन बिराध तुम्ह मारा। बधेहु ब्याध इव बालि बिचारा॥
निसिचर निकर सुभट संघारेहु। कुंभकरन घननादहि मारेहु॥
आजु बयरु सबु लेउँ निबाही। जौं रन भूप भाजि नहिं जाहीं॥
आजु करउँ खलु काल हवाले। परेहु कठिन रावन के पाले॥
सुनि दुर्बचन कालबस जाना। बिहँसि बचन कह कृपानिधाना॥
सत्य सत्य सब तव प्रभुताई। जल्पसि जनि देखाउ मनुसाई॥

asa kahi ratha raghunātha calāvā| bipra carana paṃkaja siru nāvā||
taba laṃkesa krodha ura chāvā| garjata tarjata sanmukha dhāvā||
jītehu je bhaṭa saṃjuga māhīṃ| sunu tāpasa maiṃ tinha sama nāhīṃ||
rāvana nāma jagata jasa jānā| lokapa jākeṃ baṃdīkhānā||
khara dūṣana birādha tumha mārā| badhehu byādha iva bāli bicārā||
nisicara nikara subhaṭa saṃghārehu| kuṃbhakarana ghananādahi mārehu||
āju bayaru sabu leum̐ nibāhī| jauṃ rana bhūpa bhāji nahiṃ jāhīṃ||
āju karaum̐ khalu kāla havāle| parehu kaṭhina rāvana ke pāle||
suni durbacana kālabasa jānā| biham̐si bacana kaha kṛpānidhānā||
satya satya saba tava prabhutāī| jalpasi jani dekhāu manusāī||

छंद
जनि जल्पना करि सुजसु नासहि नीति सुनहि करहि छमा।
संसार महँ पूरुष त्रिबिध पाटल रसाल पनस समा॥
एक सुमनप्रद एक सुमन फल एक फलइ केवल लागहीं।
एक कहहिं कहहिं करहिं अपर एक करहिं कहत न बागहीं॥
jani jalpanā kari sujasu nāsahi nīti sunahi karahi chamā|
saṃsāra maham̐ pūruṣa tribidha pāṭala rasāla panasa samā||
eka sumanaprada eka sumana phala eka phalai kevala lāgahīṃ|
eka kahahiṃ kahahiṃ karahiṃ apara eka karahiṃ kahata na bāgahīṃ||

दोहा 90
राम बचन सुनि बिहँसा मोहि सिखावत ग्यान।
बयरु करत नहिं तब डरे अब लागे प्रिय प्रान॥90॥
rāma bacana suni biham̐sā mohi sikhāvata gyāna|
bayaru karata nahiṃ taba ḍare aba lāge priya prāna||90||
दोहा 91#

कहि दुर्बचन क्रुद्ध दसकंधर। कुलिस समान लाग छाँड़ै सर॥
नानाकार सिलीमुख धाए। दिसि अरु बिदिस गगन महि छाए॥
पावक सर छाँड़ेउ रघुबीरा। छन महुँ जरे निसाचर तीरा॥
छाड़िसि तीब्र सक्ति खिसिआई। बान संग प्रभु फेरि चलाई॥
कोटिक चक्र त्रिसूल पबारै। बिनु प्रयास प्रभु काटि निवारै॥
निफल होहिं रावन सर कैसें। खल के सकल मनोरथ जैसें॥
तब सत बान सारथी मारेसि। परेउ भूमि जय राम पुकारेसि॥
राम कृपा करि सूत उठावा। तब प्रभु परम क्रोध कहुँ पावा॥

kahi durbacana kruddha dasakaṃdhara| kulisa samāna lāga chām̐ḍai sara||
nānākāra silīmukha dhāe| disi aru bidisa gagana mahi chāe||
pāvaka sara chām̐ḍeu raghubīrā| chana mahum̐ jare nisācara tīrā||
chāḍisi tībra sakti khisiāī| bāna saṃga prabhu pheri calāī||
koṭika cakra trisūla pabārai| binu prayāsa prabhu kāṭi nivārai||
niphala hohiṃ rāvana sara kaiseṃ| khala ke sakala manoratha jaiseṃ||
taba sata bāna sārathī māresi| pareu bhūmi jaya rāma pukāresi||
rāma kṛpā kari sūta uṭhāvā| taba prabhu parama krodha kahum̐ pāvā||

छंद
भए क्रुद्ध जुद्ध बिरुद्ध रघुपति त्रोन सायक कसमसे।
कोदंड धुनि अति चंड सुनि मनुजाद सब मारुत ग्रसे॥
मँदोदरी उर कंप कंपति कमठ भू भूधर त्रसे।
चिक्करहिं दिग्गज दसन गहि महि देखि कौतुक सुर हँसे॥
bhae kruddha juddha biruddha raghupati trona sāyaka kasamase|
kodaṃḍa dhuni ati caṃḍa suni manujāda saba māruta grase||
mam̐dodarī ura kaṃpa kaṃpati kamaṭha bhū bhūdhara trase|
cikkarahiṃ diggaja dasana gahi mahi dekhi kautuka sura ham̐se||

दोहा 91
तानेउ चाप श्रवन लगि छाँड़े बिसिख कराल।
राम मारगन गन चले लहलहात जनु ब्याल॥91॥
tāneu cāpa śravana lagi chām̐ḍe bisikha karāla|
rāma māragana gana cale lahalahāta janu byāla||91||
दोहा 92#

चले बान सपच्छ जनु उरगा। प्रथमहिं हतेउ सारथी तुरगा॥
रथ बिभंजि हति केतु पताका। गर्जा अति अंतर बल थाका॥
तुरत आन रथ चढ़ि खिसिआना। अस्त्र सस्त्र छाँड़ेसि बिधि नाना॥
बिफल होहिं सब उद्यम ताके। जिमि परद्रोह निरत मनसा के॥
तब रावन दस सूल चलावा। बाजि चारि महि मारि गिरावा॥
तुरग उठाइ कोपि रघुनायक। खैंचि सरासन छाँड़े सायक॥
रावन सिर सरोज बनचारी। चलि रघुबीर सिलीमुख धारी॥
दस दस बान भाल दस मारे। निसरि गए चले रुधिर पनारे॥
स्त्रवत रुधिर धायउ बलवाना। प्रभु पुनि कृत धनु सर संधाना॥
तीस तीर रघुबीर पबारे। भुजन्हि समेत सीस महि पारे॥
काटतहीं पुनि भए नबीने। राम बहोरि भुजा सिर छीने॥
प्रभु बहु बार बाहु सिर हए। कटत झटिति पुनि नूतन भए॥
पुनि पुनि प्रभु काटत भुज सीसा। अति कौतुकी कोसलाधीसा॥
रहे छाइ नभ सिर अरु बाहू। मानहुँ अमित केतु अरु राहू॥

cale bāna sapaccha janu uragā| prathamahiṃ hateu sārathī turagā||
ratha bibhaṃji hati ketu patākā| garjā ati aṃtara bala thākā||
turata āna ratha caḍhi khisiānā| astra sastra chām̐ḍesi bidhi nānā||
biphala hohiṃ saba udyama tāke| jimi paradroha nirata manasā ke||
taba rāvana dasa sūla calāvā| bāji cāri mahi māri girāvā||
turaga uṭhāi kopi raghunāyaka| khaiṃci sarāsana chām̐ḍe sāyaka||
rāvana sira saroja banacārī| cali raghubīra silīmukha dhārī||
dasa dasa bāna bhāla dasa māre| nisari gae cale rudhira panāre||
stravata rudhira dhāyau balavānā| prabhu puni kṛta dhanu sara saṃdhānā||
tīsa tīra raghubīra pabāre| bhujanhi sameta sīsa mahi pāre||
kāṭatahīṃ puni bhae nabīne| rāma bahori bhujā sira chīne||
prabhu bahu bāra bāhu sira hae| kaṭata jhaṭiti puni nūtana bhae||
puni puni prabhu kāṭata bhuja sīsā| ati kautukī kosalādhīsā||
rahe chāi nabha sira aru bāhū| mānahum̐ amita ketu aru rāhū||

छंद
जनु राहु केतु अनेक नभ पथ स्त्रवत सोनित धावहीं।
रघुबीर तीर प्रचंड लागहिं भूमि गिरन न पावहीं॥
एक एक सर सिर निकर छेदे नभ उड़त इमि सोहहीं।
जनु कोपि दिनकर कर निकर जहँ तहँ बिधुंतुद पोहहीं॥
janu rāhu ketu aneka nabha patha stravata sonita dhāvahīṃ|
raghubīra tīra pracaṃḍa lāgahiṃ bhūmi girana na pāvahīṃ||
eka eka sara sira nikara chede nabha uḍata imi sohahīṃ|
janu kopi dinakara kara nikara jaham̐ taham̐ bidhuṃtuda pohahīṃ||

दोहा 92
जिमि जिमि प्रभु हर तासु सिर तिमि तिमि होहिं अपार।
सेवत बिषय बिबर्ध जिमि नित नित नूतन मार॥92॥
jimi jimi prabhu hara tāsu sira timi timi hohiṃ apāra|
sevata biṣaya bibardha jimi nita nita nūtana māra||92||
दोहा 93#

दसमुख देखि सिरन्ह कै बाढ़ी। बिसरा मरन भई रिस गाढ़ी॥
गर्जेउ मूढ़ महा अभिमानी। धायउ दसहु सरासन तानी॥
समर भूमि दसकंधर कोप्यो। बरषि बान रघुपति रथ तोप्यो॥
दंड एक रथ देखि न परेऊ। जनु निहार महुँ दिनकर दुरेऊ॥
हाहाकार सुरन्ह जब कीन्हा। तब प्रभु कोपि कारमुक लीन्हा॥
सर निवारि रिपु के सिर काटे। ते दिसि बिदिस गगन महि पाटे॥
काटे सिर नभ मारग धावहिं। जय जय धुनि करि भय उपजावहिं॥
कहँ लछिमन सुग्रीव कपीसा। कहँ रघुबीर कोसलाधीसा॥

dasamukha dekhi siranha kai bāḍhī| bisarā marana bhaī risa gāḍhī||
garjeu mūḍha mahā abhimānī| dhāyau dasahu sarāsana tānī||
samara bhūmi dasakaṃdhara kopyo| baraṣi bāna raghupati ratha topyo||
daṃḍa eka ratha dekhi na pareū| janu nihāra mahum̐ dinakara dureū||
hāhākāra suranha jaba kīnhā| taba prabhu kopi kāramuka līnhā||
sara nivāri ripu ke sira kāṭe| te disi bidisa gagana mahi pāṭe||
kāṭe sira nabha māraga dhāvahiṃ| jaya jaya dhuni kari bhaya upajāvahiṃ||
kaham̐ lachimana sugrīva kapīsā| kaham̐ raghubīra kosalādhīsā||

छंद
कहँ रामु कहि सिर निकर धाए देखि मर्कट भजि चले।
संधानि धनु रघुबंसमनि हँसि सरन्हि सिर बेधे भले॥
सिर मालिका कर कालिका गहि बृंद बृंदन्हि बहु मिलीं।
करि रुधिर सरि मज्जनु मनहुँ संग्राम बट पूजन चलीं॥
kaham̐ rāmu kahi sira nikara dhāe dekhi markaṭa bhaji cale|
saṃdhāni dhanu raghubaṃsamani ham̐si saranhi sira bedhe bhale||
sira mālikā kara kālikā gahi bṛṃda bṛṃdanhi bahu milīṃ|
kari rudhira sari majjanu manahum̐ saṃgrāma baṭa pūjana calīṃ||

दोहा 93
पुनि दसकंठ क्रुद्ध होइ छाँड़ी सक्ति प्रचंड।
चली बिभीषन सन्मुख मनहुँ काल कर दंड॥93॥
puni dasakaṃṭha kruddha hoi chām̐ḍī sakti pracaṃḍa|
calī bibhīṣana sanmukha manahum̐ kāla kara daṃḍa||93||
दोहा 94#

आवत देखि सक्ति अति घोरा। प्रनतारति भंजन पन मोरा॥
तुरत बिभीषन पाछें मेला। सन्मुख राम सहेउ सोइ सेला॥
लागि सक्ति मुरुछा कछु भई। प्रभु कृत खेल सुरन्ह बिकलई॥
देखि बिभीषन प्रभु श्रम पायो। गहि कर गदा क्रुद्ध होइ धायो॥
रे कुभाग्य सठ मंद कुबुद्धे। तैं सुर नर मुनि नाग बिरुद्धे॥
सादर सिव कहुँ सीस चढ़ाए। एक एक के कोटिन्ह पाए॥
तेहि कारन खल अब लगि बाँच्यो। अब तव कालु सीस पर नाच्यो॥
राम बिमुख सठ चहसि संपदा। अस कहि हनेसि माझ उर गदा॥

āvata dekhi sakti ati ghorā| pranatārati bhaṃjana pana morā||
turata bibhīṣana pācheṃ melā| sanmukha rāma saheu soi selā||
lāgi sakti muruchā kachu bhaī| prabhu kṛta khela suranha bikalaī||
dekhi bibhīṣana prabhu śrama pāyo| gahi kara gadā kruddha hoi dhāyo||
re kubhāgya saṭha maṃda kubuddhe| taiṃ sura nara muni nāga biruddhe||
sādara siva kahum̐ sīsa caḍhāe| eka eka ke koṭinha pāe||
tehi kārana khala aba lagi bām̐cyo| aba tava kālu sīsa para nācyo||
rāma bimukha saṭha cahasi saṃpadā| asa kahi hanesi mājha ura gadā||

छंद
उर माझ गदा प्रहार घोर कठोर लागत महि पर् यो।
दस बदन सोनित स्त्रवत पुनि संभारि धायो रिस भर् यो॥
द्वौ भिरे अतिबल मल्लजुद्ध बिरुद्ध एकु एकहि हनै।
रघुबीर बल दर्पित बिभीषनु घालि नहिं ता कहुँ गनै॥
ura mājha gadā prahāra ghora kaṭhora lāgata mahi par yo|
dasa badana sonita stravata puni saṃbhāri dhāyo risa bhar yo||
dvau bhire atibala mallajuddha biruddha eku ekahi hanai|
raghubīra bala darpita bibhīṣanu ghāli nahiṃ tā kahum̐ ganai||

दोहा 94
उमा बिभीषनु रावनहि सन्मुख चितव कि काउ।
सो अब भिरत काल ज्यों श्रीरघुबीर प्रभाउ॥94॥
umā bibhīṣanu rāvanahi sanmukha citava ki kāu|
so aba bhirata kāla jyoṃ śrīraghubīra prabhāu||94||
दोहा 95#

देखा श्रमित बिभीषनु भारी। धायउ हनूमान गिरि धारी॥
रथ तुरंग सारथी निपाता। हृदय माझ तेहि मारेसि लाता॥
ठाढ़ रहा अति कंपित गाता। गयउ बिभीषनु जहँ जनत्राता॥
पुनि रावन कपि हतेउ पचारी। चलेउ गगन कपि पूँछ पसारी॥
गहिसि पूँछ कपि सहित उड़ाना। पुनि फिरि भिरेउ प्रबल हनुमाना॥
लरत अकास जुगल सम जोधा। एकहि एकु हनत करि क्रोधा॥
सोहहिं नभ छल बल बहु करहीं। कज्जल गिरि सुमेरु जनु लरहीं॥
बुधि बल निसिचर परइ न पार् यो। तब मारुत सुत प्रभु संभार् यो॥

dekhā śramita bibhīṣanu bhārī| dhāyau hanūmāna giri dhārī||
ratha turaṃga sārathī nipātā| hṛdaya mājha tehi māresi lātā||
ṭhāḍha rahā ati kaṃpita gātā| gayau bibhīṣanu jaham̐ janatrātā||
puni rāvana kapi hateu pacārī| caleu gagana kapi pūm̐cha pasārī||
gahisi pūm̐cha kapi sahita uḍānā| puni phiri bhireu prabala hanumānā||
larata akāsa jugala sama jodhā| ekahi eku hanata kari krodhā||
sohahiṃ nabha chala bala bahu karahīṃ| kajjala giri sumeru janu larahīṃ||
budhi bala nisicara parai na pār yo| taba māruta suta prabhu saṃbhār yo||

छंद
संभारि श्रीरघुबीर धीर पचारि कपि रावनु हन्यो।
महि परत पुनि उठि लरत देवन्ह जुगल कहुँ जय जय भन्यो॥
हनुमंत संकट देखि मर्कट भालु क्रोधातुर चले।
रन मत्त रावन सकल सुभट प्रचंड भुज बल दलमले॥
saṃbhāri śrīraghubīra dhīra pacāri kapi rāvanu hanyo|
mahi parata puni uṭhi larata devanha jugala kahum̐ jaya jaya bhanyo||
hanumaṃta saṃkaṭa dekhi markaṭa bhālu krodhātura cale|
rana matta rāvana sakala subhaṭa pracaṃḍa bhuja bala dalamale||

दोहा 95
तब रघुबीर पचारे धाए कीस प्रचंड।
कपि बल प्रबल देखि तेहिं कीन्ह प्रगट पाषंड॥95॥
taba raghubīra pacāre dhāe kīsa pracaṃḍa|
kapi bala prabala dekhi tehiṃ kīnha pragaṭa pāṣaṃḍa||95||
दोहा 96#

अंतरधान भयउ छन एका। पुनि प्रगटे खल रूप अनेका॥
रघुपति कटक भालु कपि जेते। जहँ तहँ प्रगट दसानन तेते॥
देखे कपिन्ह अमित दससीसा। जहँ तहँ भजे भालु अरु कीसा॥
भागे बानर धरहिं न धीरा। त्राहि त्राहि लछिमन रघुबीरा॥
दहँ दिसि धावहिं कोटिन्ह रावन। गर्जहिं घोर कठोर भयावन॥
डरे सकल सुर चले पराई। जय कै आस तजहु अब भाई॥
सब सुर जिते एक दसकंधर। अब बहु भए तकहु गिरि कंदर॥
रहे बिरंचि संभु मुनि ग्यानी। जिन्ह जिन्ह प्रभु महिमा कछु जानी॥

aṃtaradhāna bhayau chana ekā| puni pragaṭe khala rūpa anekā||
raghupati kaṭaka bhālu kapi jete| jaham̐ taham̐ pragaṭa dasānana tete||
dekhe kapinha amita dasasīsā| jaham̐ taham̐ bhaje bhālu aru kīsā||
bhāge bānara dharahiṃ na dhīrā| trāhi trāhi lachimana raghubīrā||
daham̐ disi dhāvahiṃ koṭinha rāvana| garjahiṃ ghora kaṭhora bhayāvana||
ḍare sakala sura cale parāī| jaya kai āsa tajahu aba bhāī||
saba sura jite eka dasakaṃdhara| aba bahu bhae takahu giri kaṃdara||
rahe biraṃci saṃbhu muni gyānī| jinha jinha prabhu mahimā kachu jānī||

छंद
जाना प्रताप ते रहे निर्भय कपिन्ह रिपु माने फुरे।
चले बिचलि मर्कट भालु सकल कृपाल पाहि भयातुरे॥
हनुमंत अंगद नील नल अतिबल लरत रन बाँकुरे।
मर्दहिं दसानन कोटि कोटिन्ह कपट भू भट अंकुरे॥
jānā pratāpa te rahe nirbhaya kapinha ripu māne phure|
cale bicali markaṭa bhālu sakala kṛpāla pāhi bhayāture||
hanumaṃta aṃgada nīla nala atibala larata rana bām̐kure|
mardahiṃ dasānana koṭi koṭinha kapaṭa bhū bhaṭa aṃkure||

दोहा 96
सुर बानर देखे बिकल हँस्यो कोसलाधीस।
सजि सारंग एक सर हते सकल दससीस॥96॥
sura bānara dekhe bikala ham̐syo kosalādhīsa|
saji sāraṃga eka sara hate sakala dasasīsa||96||
दोहा 97#

प्रभु छन महुँ माया सब काटी। जिमि रबि उएँ जाहिं तम फाटी॥
रावनु एकु देखि सुर हरषे। फिरे सुमन बहु प्रभु पर बरषे॥
भुज उठाइ रघुपति कपि फेरे। फिरे एक एकन्ह तब टेरे॥
प्रभु बलु पाइ भालु कपि धाए। तरल तमकि संजुग महि आए॥
अस्तुति करत देवतन्हि देखें। भयउँ एक मैं इन्ह के लेखें॥
सठहु सदा तुम्ह मोर मरायल। अस कहि कोपि गगन पर धायल॥
हाहाकार करत सुर भागे। खलहु जाहु कहँ मोरें आगे॥
देखि बिकल सुर अंगद धायो। कूदि चरन गहि भूमि गिरायो॥

prabhu chana mahum̐ māyā saba kāṭī| jimi rabi uem̐ jāhiṃ tama phāṭī||
rāvanu eku dekhi sura haraṣe| phire sumana bahu prabhu para baraṣe||
bhuja uṭhāi raghupati kapi phere| phire eka ekanha taba ṭere||
prabhu balu pāi bhālu kapi dhāe| tarala tamaki saṃjuga mahi āe||
astuti karata devatanhi dekheṃ| bhayaum̐ eka maiṃ inha ke lekheṃ||
saṭhahu sadā tumha mora marāyala| asa kahi kopi gagana para dhāyala||
hāhākāra karata sura bhāge| khalahu jāhu kaham̐ moreṃ āge||
dekhi bikala sura aṃgada dhāyo| kūdi carana gahi bhūmi girāyo||

छंद
गहि भूमि पार् यो लात मार् यो बालिसुत प्रभु पहिं गयो।
संभारि उठि दसकंठ घोर कठोर रव गर्जत भयो॥
करि दाप चाप चढ़ाइ दस संधानि सर बहु बरषई।
किए सकल भट घायल भयाकुल देखि निज बल हरषई॥
gahi bhūmi pār yo lāta mār yo bālisuta prabhu pahiṃ gayo|
saṃbhāri uṭhi dasakaṃṭha ghora kaṭhora rava garjata bhayo||
kari dāpa cāpa caḍhāi dasa saṃdhāni sara bahu baraṣaī|
kie sakala bhaṭa ghāyala bhayākula dekhi nija bala haraṣaī||

दोहा 97
तब रघुपति रावन के सीस भुजा सर चाप।
काटे बहुत बढ़े पुनि जिमि तीरथ कर पाप। 97॥
taba raghupati rāvana ke sīsa bhujā sara cāpa|
kāṭe bahuta baḍhe puni jimi tīratha kara pāpa| 97||
दोहा 98#

सिर भुज बाढ़ि देखि रिपु केरी। भालु कपिन्ह रिस भई घनेरी॥
मरत न मूढ़ कटेउ भुज सीसा। धाए कोपि भालु भट कीसा॥
बालितनय मारुति नल नीला। बानरराज दुबिद बलसीला॥
बिटप महीधर करहिं प्रहारा। सोइ गिरि तरु गहि कपिन्ह सो मारा॥
एक नखन्हि रिपु बपुष बिदारी। भअगि चलहिं एक लातन्ह मारी॥
तब नल नील सिरन्हि चढ़ि गयऊ। नखन्हि लिलार बिदारत भयऊ॥
रुधिर देखि बिषाद उर भारी। तिन्हहि धरन कहुँ भुजा पसारी॥
गहे न जाहिं करन्हि पर फिरहीं। जनु जुग मधुप कमल बन चरहीं॥
कोपि कूदि द्वौ धरेसि बहोरी। महि पटकत भजे भुजा मरोरी॥
पुनि सकोप दस धनु कर लीन्हे। सरन्हि मारि घायल कपि कीन्हे॥
हनुमदादि मुरुछित करि बंदर। पाइ प्रदोष हरष दसकंधर॥
मुरुछित देखि सकल कपि बीरा। जामवंत धायउ रनधीरा॥
संग भालु भूधर तरु धारी। मारन लगे पचारि पचारी॥
भयउ क्रुद्ध रावन बलवाना। गहि पद महि पटकइ भट नाना॥
देखि भालुपति निज दल घाता। कोपि माझ उर मारेसि लाता॥

sira bhuja bāḍhi dekhi ripu kerī| bhālu kapinha risa bhaī ghanerī||
marata na mūḍha kaṭeu bhuja sīsā| dhāe kopi bhālu bhaṭa kīsā||
bālitanaya māruti nala nīlā| bānararāja dubida balasīlā||
biṭapa mahīdhara karahiṃ prahārā| soi giri taru gahi kapinha so mārā||
eka nakhanhi ripu bapuṣa bidārī| bhaagi calahiṃ eka lātanha mārī||
taba nala nīla siranhi caḍhi gayaū| nakhanhi lilāra bidārata bhayaū||
rudhira dekhi biṣāda ura bhārī| tinhahi dharana kahum̐ bhujā pasārī||
gahe na jāhiṃ karanhi para phirahīṃ| janu juga madhupa kamala bana carahīṃ||
kopi kūdi dvau dharesi bahorī| mahi paṭakata bhaje bhujā marorī||
puni sakopa dasa dhanu kara līnhe| saranhi māri ghāyala kapi kīnhe||
hanumadādi muruchita kari baṃdara| pāi pradoṣa haraṣa dasakaṃdhara||
muruchita dekhi sakala kapi bīrā| jāmavaṃta dhāyau ranadhīrā||
saṃga bhālu bhūdhara taru dhārī| mārana lage pacāri pacārī||
bhayau kruddha rāvana balavānā| gahi pada mahi paṭakai bhaṭa nānā||
dekhi bhālupati nija dala ghātā| kopi mājha ura māresi lātā||

छंद
उर लात घात प्रचंड लागत बिकल रथ ते महि परा।
गहि भालु बीसहुँ कर मनहुँ कमलन्हि बसे निसि मधुकरा॥
मुरुछित बिलोकि बहोरि पद हति भालुपति प्रभु पहिं गयौ।
निसि जानि स्यंदन घालि तेहि तब सूत जतनु करत भयो॥
ura lāta ghāta pracaṃḍa lāgata bikala ratha te mahi parā|
gahi bhālu bīsahum̐ kara manahum̐ kamalanhi base nisi madhukarā||
muruchita biloki bahori pada hati bhālupati prabhu pahiṃ gayau|
nisi jāni syaṃdana ghāli tehi taba sūta jatanu karata bhayo||

दोहा 98
मुरुछा बिगत भालु कपि सब आए प्रभु पास।
निसिचर सकल रावनहि घेरि रहे अति त्रास॥98॥
muruchā bigata bhālu kapi saba āe prabhu pāsa|
nisicara sakala rāvanahi gheri rahe ati trāsa||98||
मासपारायण, छब्बीसवाँ विश्रामDay 26 of the 30-day Masparayan ends here

Completed Lanka Kand — Part 2?

Mark Masparayan day 26 done, light a diya, or share the path with family.

Text: the Gita Press edition of Shri Ramcharitmanas, checked against two independent transcriptions. Spotted an error? Suggest a correction.

Lanka Kand — Part 2 — text

Completed Lanka Kand — Part 2?