Ramcharitmanas Lanka Kand Part 3 (Doha 99–121)

दोहा 99#

तेही निसि सीता पहिं जाई। त्रिजटा कहि सब कथा सुनाई॥
सिर भुज बाढ़ि सुनत रिपु केरी। सीता उर भइ त्रास घनेरी॥
मुख मलीन उपजी मन चिंता। त्रिजटा सन बोली तब सीता॥
होइहि कहा कहसि किन माता। केहि बिधि मरिहि बिस्व दुखदाता॥
रघुपति सर सिर कटेहुँ न मरई। बिधि बिपरीत चरित सब करई॥
मोर अभाग्य जिआवत ओही। जेहिं हौ हरि पद कमल बिछोही॥
जेहिं कृत कपट कनक मृग झूठा। अजहुँ सो दैव मोहि पर रूठा॥
जेहिं बिधि मोहि दुख दुसह सहाए। लछिमन कहुँ कटु बचन कहाए॥
रघुपति बिरह सबिष सर भारी। तकि तकि मार बार बहु मारी॥
ऐसेहुँ दुख जो राख मम प्राना। सोइ बिधि ताहि जिआव न आना॥
बहु बिधि कर बिलाप जानकी। करि करि सुरति कृपानिधान की॥
कह त्रिजटा सुनु राजकुमारी। उर सर लागत मरइ सुरारी॥
प्रभु ताते उर हतइ न तेही। एहि के हृदयँ बसति बैदेही॥

tehī nisi sītā pahiṃ jāī| trijaṭā kahi saba kathā sunāī||
sira bhuja bāḍhi sunata ripu kerī| sītā ura bhai trāsa ghanerī||
mukha malīna upajī mana ciṃtā| trijaṭā sana bolī taba sītā||
hoihi kahā kahasi kina mātā| kehi bidhi marihi bisva dukhadātā||
raghupati sara sira kaṭehum̐ na maraī| bidhi biparīta carita saba karaī||
mora abhāgya jiāvata ohī| jehiṃ hau hari pada kamala bichohī||
jehiṃ kṛta kapaṭa kanaka mṛga jhūṭhā| ajahum̐ so daiva mohi para rūṭhā||
jehiṃ bidhi mohi dukha dusaha sahāe| lachimana kahum̐ kaṭu bacana kahāe||
raghupati biraha sabiṣa sara bhārī| taki taki māra bāra bahu mārī||
aisehum̐ dukha jo rākha mama prānā| soi bidhi tāhi jiāva na ānā||
bahu bidhi kara bilāpa jānakī| kari kari surati kṛpānidhāna kī||
kaha trijaṭā sunu rājakumārī| ura sara lāgata marai surārī||
prabhu tāte ura hatai na tehī| ehi ke hṛdayam̐ basati baidehī||

छंद
एहि के हृदयँ बस जानकी जानकी उर मम बास है।
मम उदर भुअन अनेक लागत बान सब कर नास है॥
सुनि बचन हरष बिषाद मन अति देखि पुनि त्रिजटाँ कहा।
अब मरिहि रिपु एहि बिधि सुनहि सुंदरि तजहि संसय महा॥
ehi ke hṛdayam̐ basa jānakī jānakī ura mama bāsa hai|
mama udara bhuana aneka lāgata bāna saba kara nāsa hai||
suni bacana haraṣa biṣāda mana ati dekhi puni trijaṭām̐ kahā|
aba marihi ripu ehi bidhi sunahi suṃdari tajahi saṃsaya mahā||

दोहा 99
काटत सिर होइहि बिकल छुटि जाइहि तव ध्यान।
तब रावनहि हृदय महुँ मरिहहिं रामु सुजान॥99॥
kāṭata sira hoihi bikala chuṭi jāihi tava dhyāna|
taba rāvanahi hṛdaya mahum̐ marihahiṃ rāmu sujāna||99||
दोहा 100#

अस कहि बहुत भाँति समुझाई। पुनि त्रिजटा निज भवन सिधाई॥
राम सुभाउ सुमिरि बैदेही। उपजी बिरह बिथा अति तेही॥
निसिहि ससिहि निंदति बहु भाँती। जुग सम भई सिराति न राती॥
करति बिलाप मनहिं मन भारी। राम बिरहँ जानकी दुखारी॥
जब अति भयउ बिरह उर दाहू। फरकेउ बाम नयन अरु बाहू॥
सगुन बिचारि धरी मन धीरा। अब मिलिहहिं कृपाल रघुबीरा॥
इहाँ अर्धनिसि रावनु जागा। निज सारथि सन खीझन लागा॥
सठ रनभूमि छड़ाइसि मोही। धिग धिग अधम मंदमति तोही॥
तेहिं पद गहि बहु बिधि समुझावा। भौरु भएँ रथ चढ़ि पुनि धावा॥
सुनि आगवनु दसानन केरा। कपि दल खरभर भयउ घनेरा॥
जहँ तहँ भूधर बिटप उपारी। धाए कटकटाइ भट भारी॥

asa kahi bahuta bhām̐ti samujhāī| puni trijaṭā nija bhavana sidhāī||
rāma subhāu sumiri baidehī| upajī biraha bithā ati tehī||
nisihi sasihi niṃdati bahu bhām̐tī| juga sama bhaī sirāti na rātī||
karati bilāpa manahiṃ mana bhārī| rāma biraham̐ jānakī dukhārī||
jaba ati bhayau biraha ura dāhū| pharakeu bāma nayana aru bāhū||
saguna bicāri dharī mana dhīrā| aba milihahiṃ kṛpāla raghubīrā||
ihām̐ ardhanisi rāvanu jāgā| nija sārathi sana khījhana lāgā||
saṭha ranabhūmi chaḍāisi mohī| dhiga dhiga adhama maṃdamati tohī||
tehiṃ pada gahi bahu bidhi samujhāvā| bhauru bhaem̐ ratha caḍhi puni dhāvā||
suni āgavanu dasānana kerā| kapi dala kharabhara bhayau ghanerā||
jaham̐ taham̐ bhūdhara biṭapa upārī| dhāe kaṭakaṭāi bhaṭa bhārī||

छंद
धाए जो मर्कट बिकट भालु कराल कर भूधर धरा।
अति कोप करहिं प्रहार मारत भजि चले रजनीचरा॥
बिचलाइ दल बलवंत कीसन्ह घेरि पुनि रावनु लियो।
चहुँ दिसि चपेटन्हि मारि नखन्हि बिदारि तनु ब्याकुल कियो॥
dhāe jo markaṭa bikaṭa bhālu karāla kara bhūdhara dharā|
ati kopa karahiṃ prahāra mārata bhaji cale rajanīcarā||
bicalāi dala balavaṃta kīsanha gheri puni rāvanu liyo|
cahum̐ disi capeṭanhi māri nakhanhi bidāri tanu byākula kiyo||

दोहा 100
देखि महा मर्कट प्रबल रावन कीन्ह बिचार।
अंतरहित होइ निमिष महुँ कृत माया बिस्तार॥100॥
dekhi mahā markaṭa prabala rāvana kīnha bicāra|
aṃtarahita hoi nimiṣa mahum̐ kṛta māyā bistāra||100||
दोहा 101#

छंद
जब कीन्ह तेहिं पाषंड। भए प्रगट जंतु प्रचंड॥
बेताल भूत पिसाच। कर धरें धनु नाराच॥1॥
जोगिनि गहें करबाल। एक हाथ मनुज कपाल॥
करि सद्य सोनित पान। नाचहिं करहिं बहु गान॥2॥
jaba kīnha tehiṃ pāṣaṃḍa| bhae pragaṭa jaṃtu pracaṃḍa||
betāla bhūta pisāca| kara dhareṃ dhanu nārāca||1||
jogini gaheṃ karabāla| eka hātha manuja kapāla||
kari sadya sonita pāna| nācahiṃ karahiṃ bahu gāna||2||

छंद
धरु मारु बोलहिं घोर। रहि पूरि धुनि चहुँ ओर॥
मुख बाइ धावहिं खान। तब लगे कीस परान॥3॥
जहँ जाहिं मर्कट भागि। तहँ बरत देखहिं आगि॥
भए बिकल बानर भालु। पुनि लाग बरषै बालु॥4॥
dharu māru bolahiṃ ghora| rahi pūri dhuni cahum̐ ora||
mukha bāi dhāvahiṃ khāna| taba lage kīsa parāna||3||
jaham̐ jāhiṃ markaṭa bhāgi| taham̐ barata dekhahiṃ āgi||
bhae bikala bānara bhālu| puni lāga baraṣai bālu||4||

छंद
जहँ तहँ थकित करि कीस। गर्जेउ बहुरि दससीस॥
लछिमन कपीस समेत। भए सकल बीर अचेत॥5॥
हा राम हा रघुनाथ। कहि सुभट मीजहिं हाथ॥
एहि बिधि सकल बल तोरि। तेहिं कीन्ह कपट बहोरि॥6॥
jaham̐ taham̐ thakita kari kīsa| garjeu bahuri dasasīsa||
lachimana kapīsa sameta| bhae sakala bīra aceta||5||
hā rāma hā raghunātha| kahi subhaṭa mījahiṃ hātha||
ehi bidhi sakala bala tori| tehiṃ kīnha kapaṭa bahori||6||

छंद
प्रगटेसि बिपुल हनुमान। धाए गहे पाषान॥
तिन्ह रामु घेरे जाइ। चहुँ दिसि बरूथ बनाइ॥7॥
मारहु धरहु जनि जाइ। कटकटहिं पूँछ उठाइ॥
दहँ दिसि लँगूर बिराज। तेहिं मध्य कोसलराज॥8॥
pragaṭesi bipula hanumāna| dhāe gahe pāṣāna||
tinha rāmu ghere jāi| cahum̐ disi barūtha banāi||7||
mārahu dharahu jani jāi| kaṭakaṭahiṃ pūm̐cha uṭhāi||
daham̐ disi lam̐gūra birāja| tehiṃ madhya kosalarāja||8||

छंद
तेहिं मध्य कोसलराज सुंदर स्याम तन सोभा लही।
जनु इंद्रधनुष अनेक की बर बारि तुंग तमालही॥
प्रभु देखि हरष बिषाद उर सुर बदत जय जय जय करी।
रघुबीर एकहि तीर कोपि निमेष महुँ माया हरी॥1॥
tehiṃ madhya kosalarāja suṃdara syāma tana sobhā lahī|
janu iṃdradhanuṣa aneka kī bara bāri tuṃga tamālahī||
prabhu dekhi haraṣa biṣāda ura sura badata jaya jaya jaya karī|
raghubīra ekahi tīra kopi nimeṣa mahum̐ māyā harī||1||

छंद
माया बिगत कपि भालु हरषे बिटप गिरि गहि सब फिरे।
सर निकर छाड़े राम रावन बाहु सिर पुनि महि गिरे॥
श्रीराम रावन समर चरित अनेक कल्प जो गावहीं।
सत सेष सारद निगम कबि तेउ तदपि पार न पावहीं॥2॥
māyā bigata kapi bhālu haraṣe biṭapa giri gahi saba phire|
sara nikara chāḍe rāma rāvana bāhu sira puni mahi gire||
śrīrāma rāvana samara carita aneka kalpa jo gāvahīṃ|
sata seṣa sārada nigama kabi teu tadapi pāra na pāvahīṃ||2||

दोहा 101(क)
ताके गुन गन कछु कहे जड़मति तुलसीदास।
जिमि निज बल अनुरूप ते माछी उड़इ अकास॥101(क)॥
tāke guna gana kachu kahe jaḍamati tulasīdāsa|
jimi nija bala anurūpa te māchī uḍai akāsa||101(ka)||

दोहा 101(ख)
काटे सिर भुज बार बहु मरत न भट लंकेस।
प्रभु क्रीड़त सुर सिद्ध मुनि ब्याकुल देखि कलेस॥101(ख)॥
kāṭe sira bhuja bāra bahu marata na bhaṭa laṃkesa|
prabhu krīḍata sura siddha muni byākula dekhi kalesa||101(kha)||
दोहा 102#

काटत बढ़हिं सीस समुदाई। जिमि प्रति लाभ लोभ अधिकाई॥
मरइ न रिपु श्रम भयउ बिसेषा। राम बिभीषन तन तब देखा॥
उमा काल मर जाकीं ईछा। सो प्रभु जन कर प्रीति परीछा॥
सुनु सरबग्य चराचर नायक। प्रनतपाल सुर मुनि सुखदायक॥
नाभिकुंड पियूष बस याकें। नाथ जिअत रावनु बल ताकें॥
सुनत बिभीषन बचन कृपाला। हरषि गहे कर बान कराला॥
असुभ होन लागे तब नाना। रोवहिं खर सृकाल बहु स्वाना॥
बोलहि खग जग आरति हेतू। प्रगट भए नभ जहँ तहँ केतू॥
दस दिसि दाह होन अति लागा। भयउ परब बिनु रबि उपरागा॥
मंदोदरि उर कंपति भारी। प्रतिमा स्त्रवहिं नयन मग बारी॥

kāṭata baḍhahiṃ sīsa samudāī| jimi prati lābha lobha adhikāī||
marai na ripu śrama bhayau biseṣā| rāma bibhīṣana tana taba dekhā||
umā kāla mara jākīṃ īchā| so prabhu jana kara prīti parīchā||
sunu sarabagya carācara nāyaka| pranatapāla sura muni sukhadāyaka||
nābhikuṃḍa piyūṣa basa yākeṃ| nātha jiata rāvanu bala tākeṃ||
sunata bibhīṣana bacana kṛpālā| haraṣi gahe kara bāna karālā||
asubha hona lāge taba nānā| rovahiṃ khara sṛkāla bahu svānā||
bolahi khaga jaga ārati hetū| pragaṭa bhae nabha jaham̐ taham̐ ketū||
dasa disi dāha hona ati lāgā| bhayau paraba binu rabi uparāgā||
maṃdodari ura kaṃpati bhārī| pratimā stravahiṃ nayana maga bārī||

छंद
प्रतिमा रुदहिं पबिपात नभ अति बात बह डोलति मही।
बरषहिं बलाहक रुधिर कच रज असुभ अति सक को कही॥
उतपात अमित बिलोकि नभ सुर बिकल बोलहि जय जए।
सुर सभय जानि कृपाल रघुपति चाप सर जोरत भए॥
pratimā rudahiṃ pabipāta nabha ati bāta baha ḍolati mahī|
baraṣahiṃ balāhaka rudhira kaca raja asubha ati saka ko kahī||
utapāta amita biloki nabha sura bikala bolahi jaya jae|
sura sabhaya jāni kṛpāla raghupati cāpa sara jorata bhae||

दोहा 102
खैचि सरासन श्रवन लगि छाड़े सर एकतीस।
रघुनायक सायक चले मानहुँ काल फनीस॥102॥
khaici sarāsana śravana lagi chāḍe sara ekatīsa|
raghunāyaka sāyaka cale mānahum̐ kāla phanīsa||102||
दोहा 103#

सायक एक नाभि सर सोषा। अपर लगे भुज सिर करि रोषा॥
लै सिर बाहु चले नाराचा। सिर भुज हीन रुंड महि नाचा॥
धरनि धसइ धर धाव प्रचंडा। तब सर हति प्रभु कृत दुइ खंडा॥
गर्जेउ मरत घोर रव भारी। कहाँ रामु रन हतौं पचारी॥
डोली भूमि गिरत दसकंधर। छुभित सिंधु सरि दिग्गज भूधर॥
धरनि परेउ द्वौ खंड बढ़ाई। चापि भालु मर्कट समुदाई॥
मंदोदरि आगें भुज सीसा। धरि सर चले जहाँ जगदीसा॥
प्रबिसे सब निषंग महु जाई। देखि सुरन्ह दुंदुभीं बजाई॥
तासु तेज समान प्रभु आनन। हरषे देखि संभु चतुरानन॥
जय जय धुनि पूरी ब्रह्मंडा। जय रघुबीर प्रबल भुजदंडा॥
बरषहि सुमन देव मुनि बृंदा। जय कृपाल जय जयति मुकुंदा॥

sāyaka eka nābhi sara soṣā| apara lage bhuja sira kari roṣā||
lai sira bāhu cale nārācā| sira bhuja hīna ruṃḍa mahi nācā||
dharani dhasai dhara dhāva pracaṃḍā| taba sara hati prabhu kṛta dui khaṃḍā||
garjeu marata ghora rava bhārī| kahām̐ rāmu rana hatauṃ pacārī||
ḍolī bhūmi girata dasakaṃdhara| chubhita siṃdhu sari diggaja bhūdhara||
dharani pareu dvau khaṃḍa baḍhāī| cāpi bhālu markaṭa samudāī||
maṃdodari āgeṃ bhuja sīsā| dhari sara cale jahām̐ jagadīsā||
prabise saba niṣaṃga mahu jāī| dekhi suranha duṃdubhīṃ bajāī||
tāsu teja samāna prabhu ānana| haraṣe dekhi saṃbhu caturānana||
jaya jaya dhuni pūrī brahmaṃḍā| jaya raghubīra prabala bhujadaṃḍā||
baraṣahi sumana deva muni bṛṃdā| jaya kṛpāla jaya jayati mukuṃdā||

छंद
जय कृपा कंद मुकंद द्वंद हरन सरन सुखप्रद प्रभो।
खल दल बिदारन परम कारन कारुनीक सदा बिभो॥
सुर सुमन बरषहिं हरष संकुल बाज दुंदुभि गहगही।
संग्राम अंगन राम अंग अनंग बहु सोभा लही॥
jaya kṛpā kaṃda mukaṃda dvaṃda harana sarana sukhaprada prabho|
khala dala bidārana parama kārana kārunīka sadā bibho||
sura sumana baraṣahiṃ haraṣa saṃkula bāja duṃdubhi gahagahī|
saṃgrāma aṃgana rāma aṃga anaṃga bahu sobhā lahī||

छंद
सिर जटा मुकुट प्रसून बिच बिच अति मनोहर राजहीं।
जनु नीलगिरि पर तड़ित पटल समेत उड़ुगन भ्राजहीं॥
भुजदंड सर कोदंड फेरत रुधिर कन तन अति बने।
जनु रायमुनीं तमाल पर बैठीं बिपुल सुख आपने॥
sira jaṭā mukuṭa prasūna bica bica ati manohara rājahīṃ|
janu nīlagiri para taḍita paṭala sameta uḍugana bhrājahīṃ||
bhujadaṃḍa sara kodaṃḍa pherata rudhira kana tana ati bane|
janu rāyamunīṃ tamāla para baiṭhīṃ bipula sukha āpane||

दोहा 103
कृपादृष्टि करि प्रभु अभय किए सुर बृंद।
भालु कीस सब हरषे जय सुख धाम मुकंद॥103॥
kṛpādṛṣṭi kari prabhu abhaya kie sura bṛṃda|
bhālu kīsa saba haraṣe jaya sukha dhāma mukaṃda||103||
दोहा 104#

पति सिर देखत मंदोदरी। मुरुछित बिकल धरनि खसि परी॥
जुबति बृंद रोवत उठि धाईं। तेहि उठाइ रावन पहिं आई॥
पति गति देखि ते करहिं पुकारा। छूटे कच नहिं बपुष सँभारा॥
उर ताड़ना करहिं बिधि नाना। रोवत करहिं प्रताप बखाना॥
तव बल नाथ डोल नित धरनी। तेज हीन पावक ससि तरनी॥
सेष कमठ सहि सकहिं न भारा। सो तनु भूमि परेउ भरि छारा॥
बरुन कुबेर सुरेस समीरा। रन सन्मुख धरि काहुँ न धीरा॥
भुजबल जितेहु काल जम साईं। आजु परेहु अनाथ की नाईं॥
जगत बिदित तुम्हारी प्रभुताई। सुत परिजन बल बरनि न जाई॥
राम बिमुख अस हाल तुम्हारा। रहा न कोउ कुल रोवनिहारा॥
तव बस बिधि प्रपंच सब नाथा। सभय दिसिप नित नावहिं माथा॥
अब तव सिर भुज जंबुक खाहीं। राम बिमुख यह अनुचित नाहीं॥
काल बिबस पति कहा न माना। अग जग नाथु मनुज करि जाना॥

pati sira dekhata maṃdodarī| muruchita bikala dharani khasi parī||
jubati bṛṃda rovata uṭhi dhāīṃ| tehi uṭhāi rāvana pahiṃ āī||
pati gati dekhi te karahiṃ pukārā| chūṭe kaca nahiṃ bapuṣa sam̐bhārā||
ura tāḍanā karahiṃ bidhi nānā| rovata karahiṃ pratāpa bakhānā||
tava bala nātha ḍola nita dharanī| teja hīna pāvaka sasi taranī||
seṣa kamaṭha sahi sakahiṃ na bhārā| so tanu bhūmi pareu bhari chārā||
baruna kubera suresa samīrā| rana sanmukha dhari kāhum̐ na dhīrā||
bhujabala jitehu kāla jama sāīṃ| āju parehu anātha kī nāīṃ||
jagata bidita tumhārī prabhutāī| suta parijana bala barani na jāī||
rāma bimukha asa hāla tumhārā| rahā na kou kula rovanihārā||
tava basa bidhi prapaṃca saba nāthā| sabhaya disipa nita nāvahiṃ māthā||
aba tava sira bhuja jaṃbuka khāhīṃ| rāma bimukha yaha anucita nāhīṃ||
kāla bibasa pati kahā na mānā| aga jaga nāthu manuja kari jānā||

छंद
जान्यो मनुज करि दनुज कानन दहन पावक हरि स्वयं।
जेहि नमत सिव ब्रह्मादि सुर पिय भजेहु नहिं करुनामयं॥
आजन्म ते परद्रोह रत पापौघमय तव तनु अयं।
तुम्हहू दियो निज धाम राम नमामि ब्रह्म निरामयं॥
jānyo manuja kari danuja kānana dahana pāvaka hari svayaṃ|
jehi namata siva brahmādi sura piya bhajehu nahiṃ karunāmayaṃ||
ājanma te paradroha rata pāpaughamaya tava tanu ayaṃ|
tumhahū diyo nija dhāma rāma namāmi brahma nirāmayaṃ||

दोहा 104
अहह नाथ रघुनाथ सम कृपासिंधु नहिं आन।
जोगि बृंद दुर्लभ गति तोहि दीन्हि भगवान॥104॥
ahaha nātha raghunātha sama kṛpāsiṃdhu nahiṃ āna|
jogi bṛṃda durlabha gati tohi dīnhi bhagavāna||104||
दोहा 105#

मंदोदरी बचन सुनि काना। सुर मुनि सिद्ध सबन्हि सुख माना॥
अज महेस नारद सनकादी। जे मुनिबर परमारथबादी॥
भरि लोचन रघुपतिहि निहारी। प्रेम मगन सब भए सुखारी॥
रुदन करत देखीं सब नारी। गयउ बिभीषनु मन दुख भारी॥
बंधु दसा बिलोकि दुख कीन्हा। तब प्रभु अनुजहि आयसु दीन्हा॥
लछिमन तेहि बहु बिधि समुझायो। बहुरि बिभीषन प्रभु पहिं आयो॥
कृपादृष्टि प्रभु ताहि बिलोका। करहु क्रिया परिहरि सब सोका॥
कीन्हि क्रिया प्रभु आयसु मानी। बिधिवत देस काल जियँ जानी॥

maṃdodarī bacana suni kānā| sura muni siddha sabanhi sukha mānā||
aja mahesa nārada sanakādī| je munibara paramārathabādī||
bhari locana raghupatihi nihārī| prema magana saba bhae sukhārī||
rudana karata dekhīṃ saba nārī| gayau bibhīṣanu mana dukha bhārī||
baṃdhu dasā biloki dukha kīnhā| taba prabhu anujahi āyasu dīnhā||
lachimana tehi bahu bidhi samujhāyo| bahuri bibhīṣana prabhu pahiṃ āyo||
kṛpādṛṣṭi prabhu tāhi bilokā| karahu kriyā parihari saba sokā||
kīnhi kriyā prabhu āyasu mānī| bidhivata desa kāla jiyam̐ jānī||

दोहा 105
मंदोदरी आदि सब देइ तिलांजलि ताहि।
भवन गई रघुपति गुन गन बरनत मन माहि॥105॥
maṃdodarī ādi saba dei tilāṃjali tāhi|
bhavana gaī raghupati guna gana baranata mana māhi||105||
दोहा 106#

आइ बिभीषन पुनि सिरु नायो। कृपासिंधु तब अनुज बोलायो॥
तुम्ह कपीस अंगद नल नीला। जामवंत मारुति नयसीला॥
सब मिलि जाहु बिभीषन साथा। सारेहु तिलक कहेउ रघुनाथा॥
पिता बचन मैं नगर न आवउँ। आपु सरिस कपि अनुज पठावउँ॥
तुरत चले कपि सुनि प्रभु बचना। कीन्ही जाइ तिलक की रचना॥
सादर सिंहासन बैठारी। तिलक सारि अस्तुति अनुसारी॥
जोरि पानि सबहीं सिर नाए। सहित बिभीषन प्रभु पहिं आए॥
तब रघुबीर बोलि कपि लीन्हे। कहि प्रिय बचन सुखी सब कीन्हे॥

āi bibhīṣana puni siru nāyo| kṛpāsiṃdhu taba anuja bolāyo||
tumha kapīsa aṃgada nala nīlā| jāmavaṃta māruti nayasīlā||
saba mili jāhu bibhīṣana sāthā| sārehu tilaka kaheu raghunāthā||
pitā bacana maiṃ nagara na āvaum̐| āpu sarisa kapi anuja paṭhāvaum̐||
turata cale kapi suni prabhu bacanā| kīnhī jāi tilaka kī racanā||
sādara siṃhāsana baiṭhārī| tilaka sāri astuti anusārī||
jori pāni sabahīṃ sira nāe| sahita bibhīṣana prabhu pahiṃ āe||
taba raghubīra boli kapi līnhe| kahi priya bacana sukhī saba kīnhe||

छंद
किए सुखी कहि बानी सुधा सम बल तुम्हारें रिपु हयो।
पायो बिभीषन राज तिहुँ पुर जसु तुम्हारो नित नयो॥
मोहि सहित सुभ कीरति तुम्हारी परम प्रीति जो गाइहैं।
संसार सिंधु अपार पार प्रयास बिनु नर पाइहैं॥
kie sukhī kahi bānī sudhā sama bala tumhāreṃ ripu hayo|
pāyo bibhīṣana rāja tihum̐ pura jasu tumhāro nita nayo||
mohi sahita subha kīrati tumhārī parama prīti jo gāihaiṃ|
saṃsāra siṃdhu apāra pāra prayāsa binu nara pāihaiṃ||

दोहा 106
प्रभु के बचन श्रवन सुनि नहिं अघाहिं कपि पुंज।
बार बार सिर नावहिं गहहिं सकल पद कंज॥106॥
prabhu ke bacana śravana suni nahiṃ aghāhiṃ kapi puṃja|
bāra bāra sira nāvahiṃ gahahiṃ sakala pada kaṃja||106||
दोहा 107#

पुनि प्रभु बोलि लियउ हनुमाना। लंका जाहु कहेउ भगवाना॥
समाचार जानकिहि सुनावहु। तासु कुसल लै तुम्ह चलि आवहु॥
तब हनुमंत नगर महुँ आए। सुनि निसिचरी निसाचर धाए॥
बहु प्रकार तिन्ह पूजा कीन्ही। जनकसुता देखाइ पुनि दीन्ही॥
दूरहि ते प्रनाम कपि कीन्हा। रघुपति दूत जानकीं चीन्हा॥
कहहु तात प्रभु कृपानिकेता। कुसल अनुज कपि सेन समेता॥
सब बिधि कुसल कोसलाधीसा। मातु समर जीत्यो दससीसा॥
अबिचल राजु बिभीषन पायो। सुनि कपि बचन हरष उर छायो॥

puni prabhu boli liyau hanumānā| laṃkā jāhu kaheu bhagavānā||
samācāra jānakihi sunāvahu| tāsu kusala lai tumha cali āvahu||
taba hanumaṃta nagara mahum̐ āe| suni nisicarī nisācara dhāe||
bahu prakāra tinha pūjā kīnhī| janakasutā dekhāi puni dīnhī||
dūrahi te pranāma kapi kīnhā| raghupati dūta jānakīṃ cīnhā||
kahahu tāta prabhu kṛpāniketā| kusala anuja kapi sena sametā||
saba bidhi kusala kosalādhīsā| mātu samara jītyo dasasīsā||
abicala rāju bibhīṣana pāyo| suni kapi bacana haraṣa ura chāyo||

छंद
अति हरष मन तन पुलक लोचन सजल कह पुनि पुनि रमा।
का देउँ तोहि त्रेलोक महुँ कपि किमपि नहिं बानी समा॥
सुनु मातु मैं पायो अखिल जग राजु आजु न संसयं।
रन जीति रिपुदल बंधु जुत पस्यामि राममनामयं॥
ati haraṣa mana tana pulaka locana sajala kaha puni puni ramā|
kā deum̐ tohi treloka mahum̐ kapi kimapi nahiṃ bānī samā||
sunu mātu maiṃ pāyo akhila jaga rāju āju na saṃsayaṃ|
rana jīti ripudala baṃdhu juta pasyāmi rāmamanāmayaṃ||

दोहा 107
सुनु सुत सदगुन सकल तव हृदयँ बसहुँ हनुमंत।
सानुकूल कोसलपति रहहुँ समेत अनंत॥107॥
sunu suta sadaguna sakala tava hṛdayam̐ basahum̐ hanumaṃta|
sānukūla kosalapati rahahum̐ sameta anaṃta||107||
दोहा 108#

अब सोइ जतन करहु तुम्ह ताता। देखौं नयन स्याम मृदु गाता॥
तब हनुमान राम पहिं जाई। जनकसुता कै कुसल सुनाई॥
सुनि संदेसु भानुकुलभूषन। बोलि लिए जुबराज बिभीषन॥
मारुतसुत के संग सिधावहु। सादर जनकसुतहि लै आवहु॥
तुरतहिं सकल गए जहँ सीता। सेवहिं सब निसिचरीं बिनीता॥
बेगि बिभीषन तिन्हहि सिखायो। तिन्ह बहु बिधि मज्जन करवायो॥
बहु प्रकार भूषन पहिराए। सिबिका रुचिर साजि पुनि ल्याए॥
ता पर हरषि चढ़ी बैदेही। सुमिरि राम सुखधाम सनेही॥
बेतपानि रच्छक चहुँ पासा। चले सकल मन परम हुलासा॥
देखन भालु कीस सब आए। रच्छक कोपि निवारन धाए॥
कह रघुबीर कहा मम मानहु। सीतहि सखा पयादें आनहु॥
देखहुँ कपि जननी की नाईं। बिहसि कहा रघुनाथ गोसाई॥
सुनि प्रभु बचन भालु कपि हरषे। नभ ते सुरन्ह सुमन बहु बरषे॥
सीता प्रथम अनल महुँ राखी। प्रगट कीन्हि चह अंतर साखी॥

aba soi jatana karahu tumha tātā| dekhauṃ nayana syāma mṛdu gātā||
taba hanumāna rāma pahiṃ jāī| janakasutā kai kusala sunāī||
suni saṃdesu bhānukulabhūṣana| boli lie jubarāja bibhīṣana||
mārutasuta ke saṃga sidhāvahu| sādara janakasutahi lai āvahu||
turatahiṃ sakala gae jaham̐ sītā| sevahiṃ saba nisicarīṃ binītā||
begi bibhīṣana tinhahi sikhāyo| tinha bahu bidhi majjana karavāyo||
bahu prakāra bhūṣana pahirāe| sibikā rucira sāji puni lyāe||
tā para haraṣi caḍhī baidehī| sumiri rāma sukhadhāma sanehī||
betapāni racchaka cahum̐ pāsā| cale sakala mana parama hulāsā||
dekhana bhālu kīsa saba āe| racchaka kopi nivārana dhāe||
kaha raghubīra kahā mama mānahu| sītahi sakhā payādeṃ ānahu||
dekhahum̐ kapi jananī kī nāīṃ| bihasi kahā raghunātha gosāī||
suni prabhu bacana bhālu kapi haraṣe| nabha te suranha sumana bahu baraṣe||
sītā prathama anala mahum̐ rākhī| pragaṭa kīnhi caha aṃtara sākhī||

दोहा 108
तेहि कारन करुनानिधि कहे कछुक दुर्बाद।
सुनत जातुधानीं सब लागीं करै बिषाद॥108॥
tehi kārana karunānidhi kahe kachuka durbāda|
sunata jātudhānīṃ saba lāgīṃ karai biṣāda||108||
दोहा 109#

प्रभु के बचन सीस धरि सीता। बोली मन क्रम बचन पुनीता॥
लछिमन होहु धरम के नेगी। पावक प्रगट करहु तुम्ह बेगी॥
सुनि लछिमन सीता कै बानी। बिरह बिबेक धरम निति सानी॥
लोचन सजल जोरि कर दोऊ। प्रभु सन कछु कहि सकत न ओऊ॥
देखि राम रुख लछिमन धाए। पावक प्रगटि काठ बहु लाए॥
पावक प्रबल देखि बैदेही। हृदयँ हरष नहिं भय कछु तेही॥
जौं मन बच क्रम मम उर माहीं। तजि रघुबीर आन गति नाहीं॥
तौ कृसानु सब कै गति जाना। मो कहुँ होउ श्रीखंड समाना॥

prabhu ke bacana sīsa dhari sītā| bolī mana krama bacana punītā||
lachimana hohu dharama ke negī| pāvaka pragaṭa karahu tumha begī||
suni lachimana sītā kai bānī| biraha bibeka dharama niti sānī||
locana sajala jori kara doū| prabhu sana kachu kahi sakata na oū||
dekhi rāma rukha lachimana dhāe| pāvaka pragaṭi kāṭha bahu lāe||
pāvaka prabala dekhi baidehī| hṛdayam̐ haraṣa nahiṃ bhaya kachu tehī||
jauṃ mana baca krama mama ura māhīṃ| taji raghubīra āna gati nāhīṃ||
tau kṛsānu saba kai gati jānā| mo kahum̐ hou śrīkhaṃḍa samānā||

छंद
श्रीखंड सम पावक प्रबेस कियो सुमिरि प्रभु मैथिली।
जय कोसलेस महेस बंदित चरन रति अति निर्मली॥
प्रतिबिंब अरु लौकिक कलंक प्रचंड पावक महुँ जरे।
प्रभु चरित काहुँ न लखे नभ सुर सिद्ध मुनि देखहिं खरे॥1॥
śrīkhaṃḍa sama pāvaka prabesa kiyo sumiri prabhu maithilī|
jaya kosalesa mahesa baṃdita carana rati ati nirmalī||
pratibiṃba aru laukika kalaṃka pracaṃḍa pāvaka mahum̐ jare|
prabhu carita kāhum̐ na lakhe nabha sura siddha muni dekhahiṃ khare||1||

छंद
धरि रूप पावक पानि गहि श्री सत्य श्रुति जग बिदित जो।
जिमि छीरसागर इंदिरा रामहि समर्पी आनि सो॥
सो राम बाम बिभाग राजति रुचिर अति सोभा भली।
नव नील नीरज निकट मानहुँ कनक पंकज की कली॥2॥
dhari rūpa pāvaka pāni gahi śrī satya śruti jaga bidita jo|
jimi chīrasāgara iṃdirā rāmahi samarpī āni so||
so rāma bāma bibhāga rājati rucira ati sobhā bhalī|
nava nīla nīraja nikaṭa mānahum̐ kanaka paṃkaja kī kalī||2||

दोहा 109(क)
बरषहिं सुमन हरषि सुन बाजहिं गगन निसान।
गावहिं किंनर सुरबधू नाचहिं चढ़ीं बिमान॥109(क)॥
baraṣahiṃ sumana haraṣi suna bājahiṃ gagana nisāna|
gāvahiṃ kiṃnara surabadhū nācahiṃ caḍhīṃ bimāna||109(ka)||

दोहा 109(ख)
जनकसुता समेत प्रभु सोभा अमित अपार।
देखि भालु कपि हरषे जय रघुपति सुख सार॥109(ख)॥
janakasutā sameta prabhu sobhā amita apāra|
dekhi bhālu kapi haraṣe jaya raghupati sukha sāra||109(kha)||
दोहा 110#

तब रघुपति अनुसासन पाई। मातलि चलेउ चरन सिरु नाई॥
आए देव सदा स्वारथी। बचन कहहिं जनु परमारथी॥
दीन बंधु दयाल रघुराया। देव कीन्हि देवन्ह पर दाया॥
बिस्व द्रोह रत यह खल कामी। निज अघ गयउ कुमारगगामी॥
तुम्ह समरूप ब्रह्म अबिनासी। सदा एकरस सहज उदासी॥
अकल अगुन अज अनघ अनामय। अजित अमोघसक्ति करुनामय॥
मीन कमठ सूकर नरहरी। बामन परसुराम बपु धरी॥
जब जब नाथ सुरन्ह दुखु पायो। नाना तनु धरि तुम्हइँ नसायो॥
यह खल मलिन सदा सुरद्रोही। काम लोभ मद रत अति कोही॥
अधम सिरोमनि तव पद पावा। यह हमरे मन बिसमय आवा॥
हम देवता परम अधिकारी। स्वारथ रत प्रभु भगति बिसारी॥
भव प्रबाहँ संतत हम परे। अब प्रभु पाहि सरन अनुसरे॥

taba raghupati anusāsana pāī| mātali caleu carana siru nāī||
āe deva sadā svārathī| bacana kahahiṃ janu paramārathī||
dīna baṃdhu dayāla raghurāyā| deva kīnhi devanha para dāyā||
bisva droha rata yaha khala kāmī| nija agha gayau kumāragagāmī||
tumha samarūpa brahma abināsī| sadā ekarasa sahaja udāsī||
akala aguna aja anagha anāmaya| ajita amoghasakti karunāmaya||
mīna kamaṭha sūkara naraharī| bāmana parasurāma bapu dharī||
jaba jaba nātha suranha dukhu pāyo| nānā tanu dhari tumhaim̐ nasāyo||
yaha khala malina sadā suradrohī| kāma lobha mada rata ati kohī||
adhama siromani tava pada pāvā| yaha hamare mana bisamaya āvā||
hama devatā parama adhikārī| svāratha rata prabhu bhagati bisārī||
bhava prabāham̐ saṃtata hama pare| aba prabhu pāhi sarana anusare||

दोहा 110
करि बिनती सुर सिद्ध सब रहे जहँ तहँ कर जोरि।
अति सप्रेम तन पुलकि बिधि अस्तुति करत बहोरि॥110॥
kari binatī sura siddha saba rahe jaham̐ taham̐ kara jori|
ati saprema tana pulaki bidhi astuti karata bahori||110||
दोहा 111#

छंद
जय राम सदा सुखधाम हरे। रघुनायक सायक चाप धरे॥
भव बारन दारन सिंह प्रभो। गुन सागर नागर नाथ बिभो॥
तन काम अनेक अनूप छबी। गुन गावत सिद्ध मुनींद्र कबी॥
जसु पावन रावन नाग महा। खगनाथ जथा करि कोप गहा॥
jaya rāma sadā sukhadhāma hare| raghunāyaka sāyaka cāpa dhare||
bhava bārana dārana siṃha prabho| guna sāgara nāgara nātha bibho||
tana kāma aneka anūpa chabī| guna gāvata siddha munīṃdra kabī||
jasu pāvana rāvana nāga mahā| khaganātha jathā kari kopa gahā||

छंद
जन रंजन भंजन सोक भयं। गतक्रोध सदा प्रभु बोधमयं॥
अवतार उदार अपार गुनं। महि भार बिभंजन ग्यानघनं॥
अज ब्यापकमेकमनादि सदा। करुनाकर राम नमामि मुदा॥
रघुबंस बिभूषन दूषन हा। कृत भूप बिभीषन दीन रहा॥
jana raṃjana bhaṃjana soka bhayaṃ| gatakrodha sadā prabhu bodhamayaṃ||
avatāra udāra apāra gunaṃ| mahi bhāra bibhaṃjana gyānaghanaṃ||
aja byāpakamekamanādi sadā| karunākara rāma namāmi mudā||
raghubaṃsa bibhūṣana dūṣana hā| kṛta bhūpa bibhīṣana dīna rahā||

छंद
गुन ग्यान निधान अमान अजं। नित राम नमामि बिभुं बिरजं॥
भुजदंड प्रचंड प्रताप बलं। खल बृंद निकंद महा कुसलं॥
बिनु कारन दीन दयाल हितं। छबि धाम नमामि रमा सहितं॥
भव तारन कारन काज परं। मन संभव दारुन दोष हरं॥
guna gyāna nidhāna amāna ajaṃ| nita rāma namāmi bibhuṃ birajaṃ||
bhujadaṃḍa pracaṃḍa pratāpa balaṃ| khala bṛṃda nikaṃda mahā kusalaṃ||
binu kārana dīna dayāla hitaṃ| chabi dhāma namāmi ramā sahitaṃ||
bhava tārana kārana kāja paraṃ| mana saṃbhava dāruna doṣa haraṃ||

छंद
सर चाप मनोहर त्रोन धरं। जरजारुन लोचन भूपबरं॥
सुख मंदिर सुंदर श्रीरमनं। मद मार मुधा ममता समनं॥
अनवद्य अखंड न गोचर गो। सबरूप सदा सब होइ न गो॥
इति बेद बदंति न दंतकथा। रबि आतप भिन्नमभिन्न जथा॥
sara cāpa manohara trona dharaṃ| jarajāruna locana bhūpabaraṃ||
sukha maṃdira suṃdara śrīramanaṃ| mada māra mudhā mamatā samanaṃ||
anavadya akhaṃḍa na gocara go| sabarūpa sadā saba hoi na go||
iti beda badaṃti na daṃtakathā| rabi ātapa bhinnamabhinna jathā||

छंद
कृतकृत्य बिभो सब बानर ए। निरखंति तवानन सादर ए॥
धिग जीवन देव सरीर हरे। तव भक्ति बिना भव भूलि परे॥
अब दीन दयाल दया करिऐ। मति मोरि बिभेदकरी हरिऐ॥
जेहि ते बिपरीत क्रिया करिऐ। दुख सो सुख मानि सुखी चरिऐ॥
kṛtakṛtya bibho saba bānara e| nirakhaṃti tavānana sādara e||
dhiga jīvana deva sarīra hare| tava bhakti binā bhava bhūli pare||
aba dīna dayāla dayā kariai| mati mori bibhedakarī hariai||
jehi te biparīta kriyā kariai| dukha so sukha māni sukhī cariai||

छंद
खल खंडन मंडन रम्य छमा। पद पंकज सेवित संभु उमा॥
नृप नायक दे बरदानमिदं। चरनांबुज प्रेम सदा सुभदं॥
khala khaṃḍana maṃḍana ramya chamā| pada paṃkaja sevita saṃbhu umā||
nṛpa nāyaka de baradānamidaṃ| caranāṃbuja prema sadā subhadaṃ||

दोहा 111
बिनय कीन्हि चतुरानन प्रेम पुलक अति गात।
सोभासिंधु बिलोकत लोचन नहीं अघात॥111॥
binaya kīnhi caturānana prema pulaka ati gāta|
sobhāsiṃdhu bilokata locana nahīṃ aghāta||111||
दोहा 112#

तेहि अवसर दसरथ तहँ आए। तनय बिलोकि नयन जल छाए॥
अनुज सहित प्रभु बंदन कीन्हा। आसिरबाद पिताँ तब दीन्हा॥
तात सकल तव पुन्य प्रभाऊ। जीत्यों अजय निसाचर राऊ॥
सुनि सुत बचन प्रीति अति बाढ़ी। नयन सलिल रोमावलि ठाढ़ी॥
रघुपति प्रथम प्रेम अनुमाना। चितइ पितहि दीन्हेउ दृढ़ ग्याना॥
ताते उमा मोच्छ नहिं पायो। दसरथ भेद भगति मन लायो॥
सगुनोपासक मोच्छ न लेहीं। तिन्ह कहुँ राम भगति निज देहीं॥
बार बार करि प्रभुहि प्रनामा। दसरथ हरषि गए सुरधामा॥

tehi avasara dasaratha taham̐ āe| tanaya biloki nayana jala chāe||
anuja sahita prabhu baṃdana kīnhā| āsirabāda pitām̐ taba dīnhā||
tāta sakala tava punya prabhāū| jītyoṃ ajaya nisācara rāū||
suni suta bacana prīti ati bāḍhī| nayana salila romāvali ṭhāḍhī||
raghupati prathama prema anumānā| citai pitahi dīnheu dṛḍha gyānā||
tāte umā moccha nahiṃ pāyo| dasaratha bheda bhagati mana lāyo||
sagunopāsaka moccha na lehīṃ| tinha kahum̐ rāma bhagati nija dehīṃ||
bāra bāra kari prabhuhi pranāmā| dasaratha haraṣi gae suradhāmā||

दोहा 112
अनुज जानकी सहित प्रभु कुसल कोसलाधीस।
सोभा देखि हरषि मन अस्तुति कर सुर ईस॥112॥
anuja jānakī sahita prabhu kusala kosalādhīsa|
sobhā dekhi haraṣi mana astuti kara sura īsa||112||
दोहा 113#

छंद
जय राम सोभा धाम। दायक प्रनत बिश्राम॥
धृत त्रोन बर सर चाप। भुजदंड प्रबल प्रताप॥1॥
जय दूषनारि खरारि। मर्दन निसाचर धारि॥
यह दुष्ट मारेउ नाथ। भए देव सकल सनाथ॥2॥
jaya rāma sobhā dhāma| dāyaka pranata biśrāma||
dhṛta trona bara sara cāpa| bhujadaṃḍa prabala pratāpa||1||
jaya dūṣanāri kharāri| mardana nisācara dhāri||
yaha duṣṭa māreu nātha| bhae deva sakala sanātha||2||

छंद
जय हरन धरनी भार। महिमा उदार अपार॥
जय रावनारि कृपाल। किए जातुधान बिहाल॥3॥
लंकेस अति बल गर्ब। किए बस्य सुर गंधर्ब॥
मुनि सिद्ध नर खग नाग। हठि पंथ सब कें लाग॥4॥
jaya harana dharanī bhāra| mahimā udāra apāra||
jaya rāvanāri kṛpāla| kie jātudhāna bihāla||3||
laṃkesa ati bala garba| kie basya sura gaṃdharba||
muni siddha nara khaga nāga| haṭhi paṃtha saba keṃ lāga||4||

छंद
परद्रोह रत अति दुष्ट। पायो सो फलु पापिष्ट॥
अब सुनहु दीन दयाल। राजीव नयन बिसाल॥5॥
मोहि रहा अति अभिमान। नहिं कोउ मोहि समान॥
अब देखि प्रभु पद कंज। गत मान प्रद दुख पुंज॥6॥
paradroha rata ati duṣṭa| pāyo so phalu pāpiṣṭa||
aba sunahu dīna dayāla| rājīva nayana bisāla||5||
mohi rahā ati abhimāna| nahiṃ kou mohi samāna||
aba dekhi prabhu pada kaṃja| gata māna prada dukha puṃja||6||

छंद
कोउ ब्रह्म निर्गुन ध्याव। अब्यक्त जेहि श्रुति गाव॥
मोहि भाव कोसल भूप। श्रीराम सगुन सरूप॥7॥
बैदेहि अनुज समेत। मम हृदयँ करहु निकेत॥
मोहि जानिए निज दास। दे भक्ति रमानिवास॥8॥
kou brahma nirguna dhyāva| abyakta jehi śruti gāva||
mohi bhāva kosala bhūpa| śrīrāma saguna sarūpa||7||
baidehi anuja sameta| mama hṛdayam̐ karahu niketa||
mohi jānie nija dāsa| de bhakti ramānivāsa||8||

छंद
दे भक्ति रमानिवास त्रास हरन सरन सुखदायकं।
सुख धाम राम नमामि काम अनेक छबि रघुनायकं॥
सुर बृंद रंजन द्वंद भंजन मनुज तनु अतुलितबलं।
ब्रह्मादि संकर सेब्य राम नमामि करुना कोमलं॥
de bhakti ramānivāsa trāsa harana sarana sukhadāyakaṃ|
sukha dhāma rāma namāmi kāma aneka chabi raghunāyakaṃ||
sura bṛṃda raṃjana dvaṃda bhaṃjana manuja tanu atulitabalaṃ|
brahmādi saṃkara sebya rāma namāmi karunā komalaṃ||

दोहा 113
अब करि कृपा बिलोकि मोहि आयसु देहु कृपाल।
काह करौं सुनि प्रिय बचन बोले दीनदयाल॥113॥
aba kari kṛpā biloki mohi āyasu dehu kṛpāla|
kāha karauṃ suni priya bacana bole dīnadayāla||113||
दोहा 114#

सुनु सुरपति कपि भालु हमारे। परे भूमि निसचरन्हि जे मारे॥
मम हित लागि तजे इन्ह प्राना। सकल जिआउ सुरेस सुजाना॥
सुनु खगेस प्रभु कै यह बानी। अति अगाध जानहिं मुनि ग्यानी॥
प्रभु सक त्रिभुअन मारि जिआई। केवल सक्रहि दीन्हि बड़ाई॥
सुधा बरषि कपि भालु जिआए। हरषि उठे सब प्रभु पहिं आए॥
सुधाबृष्टि भै दुहु दल ऊपर। जिए भालु कपि नहिं रजनीचर॥
रामाकार भए तिन्ह के मन। मुक्त भए छूटे भव बंधन॥
सुर अंसिक सब कपि अरु रीछा। जिए सकल रघुपति कीं ईछा॥
राम सरिस को दीन हितकारी। कीन्हे मुकुत निसाचर झारी॥
खल मल धाम काम रत रावन। गति पाई जो मुनिबर पाव न॥

sunu surapati kapi bhālu hamāre| pare bhūmi nisacaranhi je māre||
mama hita lāgi taje inha prānā| sakala jiāu suresa sujānā||
sunu khagesa prabhu kai yaha bānī| ati agādha jānahiṃ muni gyānī||
prabhu saka tribhuana māri jiāī| kevala sakrahi dīnhi baḍāī||
sudhā baraṣi kapi bhālu jiāe| haraṣi uṭhe saba prabhu pahiṃ āe||
sudhābṛṣṭi bhai duhu dala ūpara| jie bhālu kapi nahiṃ rajanīcara||
rāmākāra bhae tinha ke mana| mukta bhae chūṭe bhava baṃdhana||
sura aṃsika saba kapi aru rīchā| jie sakala raghupati kīṃ īchā||
rāma sarisa ko dīna hitakārī| kīnhe mukuta nisācara jhārī||
khala mala dhāma kāma rata rāvana| gati pāī jo munibara pāva na||

दोहा 114(क)
सुमन बरषि सब सुर चले चढ़ि चढ़ि रुचिर बिमान।
देखि सुअवसरु प्रभु पहिं आयउ संभु सुजान॥114(क)॥
sumana baraṣi saba sura cale caḍhi caḍhi rucira bimāna|
dekhi suavasaru prabhu pahiṃ āyau saṃbhu sujāna||114(ka)||

दोहा 114(ख)
परम प्रीति कर जोरि जुग नलिन नयन भरि बारि।
पुलकित तन गदगद गिराँ बिनय करत त्रिपुरारि॥114(ख)॥
parama prīti kara jori juga nalina nayana bhari bāri|
pulakita tana gadagada girām̐ binaya karata tripurāri||114(kha)||
दोहा 115#

छंद
मामभिरक्षय रघुकुल नायक। धृत बर चाप रुचिर कर सायक॥
मोह महा घन पटल प्रभंजन। संसय बिपिन अनल सुर रंजन॥1॥
अगुन सगुन गुन मंदिर सुंदर। भ्रम तम प्रबल प्रताप दिवाकर॥
काम क्रोध मद गज पंचानन। बसहु निरंतर जन मन कानन॥2॥
māmabhirakṣaya raghukula nāyaka| dhṛta bara cāpa rucira kara sāyaka||
moha mahā ghana paṭala prabhaṃjana| saṃsaya bipina anala sura raṃjana||1||
aguna saguna guna maṃdira suṃdara| bhrama tama prabala pratāpa divākara||
kāma krodha mada gaja paṃcānana| basahu niraṃtara jana mana kānana||2||

छंद
बिषय मनोरथ पुंज कंज बन। प्रबल तुषार उदार पार मन॥
भव बारिधि मंदर परमं दर। बारय तारय संसृति दुस्तर॥3॥
स्याम गात राजीव बिलोचन। दीन बंधु प्रनतारति मोचन॥
अनुज जानकी सहित निरंतर। बसहु राम नृप मम उर अंतर॥4॥
biṣaya manoratha puṃja kaṃja bana| prabala tuṣāra udāra pāra mana||
bhava bāridhi maṃdara paramaṃ dara| bāraya tāraya saṃsṛti dustara||3||
syāma gāta rājīva bilocana| dīna baṃdhu pranatārati mocana||
anuja jānakī sahita niraṃtara| basahu rāma nṛpa mama ura aṃtara||4||

छंद
मुनि रंजन महि मंडल मंडन। तुलसिदास प्रभु त्रास बिखंडन॥5॥
muni raṃjana mahi maṃḍala maṃḍana| tulasidāsa prabhu trāsa bikhaṃḍana||5||

दोहा 115
नाथ जबहिं कोसलपुरीं होइहि तिलक तुम्हार।
कृपासिंधु मैं आउब देखन चरित उदार॥115॥
nātha jabahiṃ kosalapurīṃ hoihi tilaka tumhāra|
kṛpāsiṃdhu maiṃ āuba dekhana carita udāra||115||
दोहा 116#

करि बिनती जब संभु सिधाए। तब प्रभु निकट बिभीषनु आए॥
नाइ चरन सिरु कह मृदु बानी। बिनय सुनहु प्रभु सारँगपानी॥
सकुल सदल प्रभु रावन मार् यो। पावन जस त्रिभुवन बिस्तार् यो॥
दीन मलीन हीन मति जाती। मो पर कृपा कीन्हि बहु भाँती॥
अब जन गृह पुनीत प्रभु कीजे। मज्जनु करिअ समर श्रम छीजे॥
देखि कोस मंदिर संपदा। देहु कृपाल कपिन्ह कहुँ मुदा॥
सब बिधि नाथ मोहि अपनाइअ। पुनि मोहि सहित अवधपुर जाइअ॥
सुनत बचन मृदु दीनदयाला। सजल भए द्वौ नयन बिसाला॥

kari binatī jaba saṃbhu sidhāe| taba prabhu nikaṭa bibhīṣanu āe||
nāi carana siru kaha mṛdu bānī| binaya sunahu prabhu sāram̐gapānī||
sakula sadala prabhu rāvana mār yo| pāvana jasa tribhuvana bistār yo||
dīna malīna hīna mati jātī| mo para kṛpā kīnhi bahu bhām̐tī||
aba jana gṛha punīta prabhu kīje| majjanu karia samara śrama chīje||
dekhi kosa maṃdira saṃpadā| dehu kṛpāla kapinha kahum̐ mudā||
saba bidhi nātha mohi apanāia| puni mohi sahita avadhapura jāia||
sunata bacana mṛdu dīnadayālā| sajala bhae dvau nayana bisālā||

दोहा 116(क)
तोर कोस गृह मोर सब सत्य बचन सुनु भ्रात।
भरत दसा सुमिरत मोहि निमिष कल्प सम जात॥116(क)॥
tora kosa gṛha mora saba satya bacana sunu bhrāta|
bharata dasā sumirata mohi nimiṣa kalpa sama jāta||116(ka)||

दोहा 116(ख)
तापस बेष गात कृस जपत निरंतर मोहि।
देखौं बेगि सो जतनु करु सखा निहोरउँ तोहि॥116(ख)॥
tāpasa beṣa gāta kṛsa japata niraṃtara mohi|
dekhauṃ begi so jatanu karu sakhā nihoraum̐ tohi||116(kha)||

दोहा 116(ग)
बीतें अवधि जाउँ जौं जिअत न पावउँ बीर।
सुमिरत अनुज प्रीति प्रभु पुनि पुनि पुलक सरीर॥116(ग)॥
bīteṃ avadhi jāum̐ jauṃ jiata na pāvaum̐ bīra|
sumirata anuja prīti prabhu puni puni pulaka sarīra||116(ga)||

दोहा 116(घ)
करेहु कल्प भरि राजु तुम्ह मोहि सुमिरेहु मन माहिं।
पुनि मम धाम पाइहहु जहाँ संत सब जाहिं॥116(घ)॥
karehu kalpa bhari rāju tumha mohi sumirehu mana māhiṃ|
puni mama dhāma pāihahu jahām̐ saṃta saba jāhiṃ||116(gha)||
दोहा 117#

सुनत बिभीषन बचन राम के। हरषि गहे पद कृपाधाम के॥
बानर भालु सकल हरषाने। गहि प्रभु पद गुन बिमल बखाने॥
बहुरि बिभीषन भवन सिधायो। मनि गन बसन बिमान भरायो॥
लै पुष्पक प्रभु आगें राखा। हँसि करि कृपासिंधु तब भाषा॥
चढ़ि बिमान सुनु सखा बिभीषन। गगन जाइ बरषहु पट भूषन॥
नभ पर जाइ बिभीषन तबही। बरषि दिए मनि अंबर सबही॥
जोइ जोइ मन भावइ सोइ लेहीं। मनि मुख मेलि डारि कपि देहीं॥
हँसे रामु श्री अनुज समेता। परम कौतुकी कृपा निकेता॥

sunata bibhīṣana bacana rāma ke| haraṣi gahe pada kṛpādhāma ke||
bānara bhālu sakala haraṣāne| gahi prabhu pada guna bimala bakhāne||
bahuri bibhīṣana bhavana sidhāyo| mani gana basana bimāna bharāyo||
lai puṣpaka prabhu āgeṃ rākhā| ham̐si kari kṛpāsiṃdhu taba bhāṣā||
caḍhi bimāna sunu sakhā bibhīṣana| gagana jāi baraṣahu paṭa bhūṣana||
nabha para jāi bibhīṣana tabahī| baraṣi die mani aṃbara sabahī||
joi joi mana bhāvai soi lehīṃ| mani mukha meli ḍāri kapi dehīṃ||
ham̐se rāmu śrī anuja sametā| parama kautukī kṛpā niketā||

दोहा 117(क)
मुनि जेहि ध्यान न पावहिं नेति नेति कह बेद।
कृपासिंधु सोइ कपिन्ह सन करत अनेक बिनोद॥117(क)॥
muni jehi dhyāna na pāvahiṃ neti neti kaha beda|
kṛpāsiṃdhu soi kapinha sana karata aneka binoda||117(ka)||

दोहा 117(ख)
उमा जोग जप दान तप नाना मख ब्रत नेम।
राम कृपा नहि करहिं तसि जसि निष्केवल प्रेम॥117(ख)॥
umā joga japa dāna tapa nānā makha brata nema|
rāma kṛpā nahi karahiṃ tasi jasi niṣkevala prema||117(kha)||
दोहा 118#

भालु कपिन्ह पट भूषन पाए। पहिरि पहिरि रघुपति पहिं आए॥
नाना जिनस देखि सब कीसा। पुनि पुनि हँसत कोसलाधीसा॥
चितइ सबन्हि पर कीन्हि दाया। बोले मृदुल बचन रघुराया॥
तुम्हरें बल मैं रावनु मार् यो। तिलक बिभीषन कहँ पुनि सार् यो॥
निज निज गृह अब तुम्ह सब जाहू। सुमिरेहु मोहि डरपहु जनि काहू॥
सुनत बचन प्रेमाकुल बानर। जोरि पानि बोले सब सादर॥
प्रभु जोइ कहहु तुम्हहि सब सोहा। हमरे होत बचन सुनि मोहा॥
दीन जानि कपि किए सनाथा। तुम्ह त्रेलोक ईस रघुनाथा॥
सुनि प्रभु बचन लाज हम मरहीं। मसक कहूँ खगपति हित करहीं॥
देखि राम रुख बानर रीछा। प्रेम मगन नहिं गृह कै ईछा॥

bhālu kapinha paṭa bhūṣana pāe| pahiri pahiri raghupati pahiṃ āe||
nānā jinasa dekhi saba kīsā| puni puni ham̐sata kosalādhīsā||
citai sabanhi para kīnhi dāyā| bole mṛdula bacana raghurāyā||
tumhareṃ bala maiṃ rāvanu mār yo| tilaka bibhīṣana kaham̐ puni sār yo||
nija nija gṛha aba tumha saba jāhū| sumirehu mohi ḍarapahu jani kāhū||
sunata bacana premākula bānara| jori pāni bole saba sādara||
prabhu joi kahahu tumhahi saba sohā| hamare hota bacana suni mohā||
dīna jāni kapi kie sanāthā| tumha treloka īsa raghunāthā||
suni prabhu bacana lāja hama marahīṃ| masaka kahūm̐ khagapati hita karahīṃ||
dekhi rāma rukha bānara rīchā| prema magana nahiṃ gṛha kai īchā||

दोहा 118(क)
प्रभु प्रेरित कपि भालु सब राम रूप उर राखि।
हरष बिषाद सहित चले बिनय बिबिध बिधि भाषि॥118(क)॥
prabhu prerita kapi bhālu saba rāma rūpa ura rākhi|
haraṣa biṣāda sahita cale binaya bibidha bidhi bhāṣi||118(ka)||

दोहा 118(ख)
कपिपति नील रीछपति अंगद नल हनुमान।
सहित बिभीषन अपर जे जूथप कपि बलवान॥118(ख)॥
kapipati nīla rīchapati aṃgada nala hanumāna|
sahita bibhīṣana apara je jūthapa kapi balavāna||118(kha)||

दोहा 118(ग)
कहि न सकहिं कछु प्रेम बस भरि भरि लोचन बारि।
सन्मुख चितवहिं राम तन नयन निमेष निवारि॥118(ग)॥
kahi na sakahiṃ kachu prema basa bhari bhari locana bāri|
sanmukha citavahiṃ rāma tana nayana nimeṣa nivāri||118(ga)||
दोहा 119#

अतिसय प्रीति देख रघुराई। लिन्हे सकल बिमान चढ़ाई॥
मन महुँ बिप्र चरन सिरु नायो। उत्तर दिसिहि बिमान चलायो॥
चलत बिमान कोलाहल होई। जय रघुबीर कहइ सबु कोई॥
सिंहासन अति उच्च मनोहर। श्री समेत प्रभु बैठै ता पर॥
राजत रामु सहित भामिनी। मेरु सृंग जनु घन दामिनी॥
रुचिर बिमानु चलेउ अति आतुर। कीन्ही सुमन बृष्टि हरषे सुर॥
परम सुखद चलि त्रिबिध बयारी। सागर सर सरि निर्मल बारी॥
सगुन होहिं सुंदर चहुँ पासा। मन प्रसन्न निर्मल नभ आसा॥
कह रघुबीर देखु रन सीता। लछिमन इहाँ हत्यो इँद्रजीता॥
हनूमान अंगद के मारे। रन महि परे निसाचर भारे॥
कुंभकरन रावन द्वौ भाई। इहाँ हते सुर मुनि दुखदाई॥

atisaya prīti dekha raghurāī| linhe sakala bimāna caḍhāī||
mana mahum̐ bipra carana siru nāyo| uttara disihi bimāna calāyo||
calata bimāna kolāhala hoī| jaya raghubīra kahai sabu koī||
siṃhāsana ati ucca manohara| śrī sameta prabhu baiṭhai tā para||
rājata rāmu sahita bhāminī| meru sṛṃga janu ghana dāminī||
rucira bimānu caleu ati ātura| kīnhī sumana bṛṣṭi haraṣe sura||
parama sukhada cali tribidha bayārī| sāgara sara sari nirmala bārī||
saguna hohiṃ suṃdara cahum̐ pāsā| mana prasanna nirmala nabha āsā||
kaha raghubīra dekhu rana sītā| lachimana ihām̐ hatyo im̐drajītā||
hanūmāna aṃgada ke māre| rana mahi pare nisācara bhāre||
kuṃbhakarana rāvana dvau bhāī| ihām̐ hate sura muni dukhadāī||

दोहा 119(क)
इहाँ सेतु बाँध्यो अरु थापेउँ सिव सुख धाम।
सीता सहित कृपानिधि संभुहि कीन्ह प्रनाम॥119(क)॥
ihām̐ setu bām̐dhyo aru thāpeum̐ siva sukha dhāma|
sītā sahita kṛpānidhi saṃbhuhi kīnha pranāma||119(ka)||

दोहा 119(ख)
जहँ जहँ कृपासिंधु बन कीन्ह बास बिश्राम।
सकल देखाए जानकिहि कहे सबन्हि के नाम॥119(ख)॥
jaham̐ jaham̐ kṛpāsiṃdhu bana kīnha bāsa biśrāma|
sakala dekhāe jānakihi kahe sabanhi ke nāma||119(kha)||
दोहा 120#

तुरत बिमान तहाँ चलि आवा। दंडक बन जहँ परम सुहावा॥
कुंभजादि मुनिनायक नाना। गए रामु सब कें अस्थाना॥
सकल रिषिन्ह सन पाइ असीसा। चित्रकूट आए जगदीसा॥
तहँ करि मुनिन्ह केर संतोषा। चला बिमानु तहाँ ते चोखा॥
बहुरि राम जानकिहि देखाई। जमुना कलि मल हरनि सुहाई॥
पुनि देखी सुरसरी पुनीता। राम कहा प्रनाम करु सीता॥
तीरथपति पुनि देखु प्रयागा। निरखत जन्म कोटि अघ भागा॥
देखु परम पावनि पुनि बेनी। हरनि सोक हरि लोक निसेनी॥
पुनि देखु अवधपुरी अति पावनि। त्रिबिध ताप भव रोग नसावनि॥।

turata bimāna tahām̐ cali āvā| daṃḍaka bana jaham̐ parama suhāvā||
kuṃbhajādi munināyaka nānā| gae rāmu saba keṃ asthānā||
sakala riṣinha sana pāi asīsā| citrakūṭa āe jagadīsā||
taham̐ kari muninha kera saṃtoṣā| calā bimānu tahām̐ te cokhā||
bahuri rāma jānakihi dekhāī| jamunā kali mala harani suhāī||
puni dekhī surasarī punītā| rāma kahā pranāma karu sītā||
tīrathapati puni dekhu prayāgā| nirakhata janma koṭi agha bhāgā||
dekhu parama pāvani puni benī| harani soka hari loka nisenī||
puni dekhu avadhapurī ati pāvani| tribidha tāpa bhava roga nasāvani|||

दोहा 120(क)
सीता सहित अवध कहुँ कीन्ह कृपाल प्रनाम।
सजल नयन तन पुलकित पुनि पुनि हरषित राम॥120(क)॥
sītā sahita avadha kahum̐ kīnha kṛpāla pranāma|
sajala nayana tana pulakita puni puni haraṣita rāma||120(ka)||

दोहा 120(ख)
पुनि प्रभु आइ त्रिबेनीं हरषित मज्जनु कीन्ह।
कपिन्ह सहित बिप्रन्ह कहुँ दान बिबिध बिधि दीन्ह॥120(ख)॥
puni prabhu āi tribenīṃ haraṣita majjanu kīnha|
kapinha sahita bipranha kahum̐ dāna bibidha bidhi dīnha||120(kha)||
दोहा 121#

प्रभु हनुमंतहि कहा बुझाई। धरि बटु रूप अवधपुर जाई॥
भरतहि कुसल हमारि सुनाएहु। समाचार लै तुम्ह चलि आएहु॥
तुरत पवनसुत गवनत भयउ। तब प्रभु भरद्वाज पहिं गयऊ॥
नाना बिधि मुनि पूजा कीन्ही। अस्तुती करि पुनि आसिष दीन्ही॥
मुनि पद बंदि जुगल कर जोरी। चढ़ि बिमान प्रभु चले बहोरी॥
इहाँ निषाद सुना प्रभु आए। नाव नाव कहँ लोग बोलाए॥
सुरसरि नाघि जान तब आयो। उतरेउ तट प्रभु आयसु पायो॥
तब सीताँ पूजी सुरसरी। बहु प्रकार पुनि चरनन्हि परी॥
दीन्हि असीस हरषि मन गंगा। सुंदरि तव अहिवात अभंगा॥
सुनत गुहा धायउ प्रेमाकुल। आयउ निकट परम सुख संकुल॥
प्रभुहि सहित बिलोकि बैदेही। परेउ अवनि तन सुधि नहिं तेही॥
प्रीति परम बिलोकि रघुराई। हरषि उठाइ लियो उर लाई॥

prabhu hanumaṃtahi kahā bujhāī| dhari baṭu rūpa avadhapura jāī||
bharatahi kusala hamāri sunāehu| samācāra lai tumha cali āehu||
turata pavanasuta gavanata bhayau| taba prabhu bharadvāja pahiṃ gayaū||
nānā bidhi muni pūjā kīnhī| astutī kari puni āsiṣa dīnhī||
muni pada baṃdi jugala kara jorī| caḍhi bimāna prabhu cale bahorī||
ihām̐ niṣāda sunā prabhu āe| nāva nāva kaham̐ loga bolāe||
surasari nāghi jāna taba āyo| utareu taṭa prabhu āyasu pāyo||
taba sītām̐ pūjī surasarī| bahu prakāra puni carananhi parī||
dīnhi asīsa haraṣi mana gaṃgā| suṃdari tava ahivāta abhaṃgā||
sunata guhā dhāyau premākula| āyau nikaṭa parama sukha saṃkula||
prabhuhi sahita biloki baidehī| pareu avani tana sudhi nahiṃ tehī||
prīti parama biloki raghurāī| haraṣi uṭhāi liyo ura lāī||

छंद
लियो हृदयँ लाइ कृपा निधान सुजान रायँ रमापती।
बैठारि परम समीप बूझी कुसल सो कर बीनती।
अब कुसल पद पंकज बिलोकि बिरंचि संकर सेब्य जे।
सुख धाम पूरनकाम राम नमामि राम नमामि ते॥1॥
liyo hṛdayam̐ lāi kṛpā nidhāna sujāna rāyam̐ ramāpatī|
baiṭhāri parama samīpa būjhī kusala so kara bīnatī|
aba kusala pada paṃkaja biloki biraṃci saṃkara sebya je|
sukha dhāma pūranakāma rāma namāmi rāma namāmi te||1||

छंद
सब भाँति अधम निषाद सो हरि भरत ज्यों उर लाइयो।
मतिमंद तुलसीदास सो प्रभु मोह बस बिसराइयो॥
यह रावनारि चरित्र पावन राम पद रतिप्रद सदा।
कामादिहर बिग्यानकर सुर सिद्ध मुनि गावहिं मुदा॥2॥
saba bhām̐ti adhama niṣāda so hari bharata jyoṃ ura lāiyo|
matimaṃda tulasīdāsa so prabhu moha basa bisarāiyo||
yaha rāvanāri caritra pāvana rāma pada ratiprada sadā|
kāmādihara bigyānakara sura siddha muni gāvahiṃ mudā||2||

दोहा 121(क)
समर बिजय रघुबीर के चरित जे सुनहिं सुजान।
बिजय बिबेक बिभूति नित तिन्हहि देहिं भगवान॥121(क)॥
samara bijaya raghubīra ke carita je sunahiṃ sujāna|
bijaya bibeka bibhūti nita tinhahi dehiṃ bhagavāna||121(ka)||

दोहा 121(ख)
यह कलिकाल मलायतन मन करि देखु बिचार।
श्रीरघुनाथ नाम तजि नाहिन आन अधार॥121(ख)॥
yaha kalikāla malāyatana mana kari dekhu bicāra|
śrīraghunātha nāma taji nāhina āna adhāra||121(kha)||
मासपारायण, सत्ताईसवाँ विश्रामDay 27 of the 30-day Masparayan ends here
इति श्रीमद्रामचरितमानसे सकलकलिकलुषविध्वंसने षष्ठः सोपानः समाप्तः।

Completed Lanka Kand — Part 3?

Mark Masparayan day 27 done, light a diya, or share the path with family.

Text: the Gita Press edition of Shri Ramcharitmanas, checked against two independent transcriptions. Spotted an error? Suggest a correction.

Lanka Kand — Part 3 — text

Completed Lanka Kand — Part 3?