Ramcharitmanas Uttar Kand Part 2 (Doha 63–114)

दोहा 63#

गयउ गरुड़ जहँ बसइ भुसुंडा। मति अकुंठ हरि भगति अखंडा॥
देखि सैल प्रसन्न मन भयउ। माया मोह सोच सब गयऊ॥
करि तड़ाग मज्जन जलपाना। बट तर गयउ हृदयँ हरषाना॥
बृद्ध बृद्ध बिहंग तहँ आए। सुनै राम के चरित सुहाए॥
कथा अरंभ करै सोइ चाहा। तेही समय गयउ खगनाहा॥
आवत देखि सकल खगराजा। हरषेउ बायस सहित समाजा॥
अति आदर खगपति कर कीन्हा। स्वागत पूछि सुआसन दीन्हा॥
करि पूजा समेत अनुरागा। मधुर बचन तब बोलेउ कागा॥

gayau garuḍa jaham̐ basai bhusuṃḍā| mati akuṃṭha hari bhagati akhaṃḍā||
dekhi saila prasanna mana bhayau| māyā moha soca saba gayaū||
kari taḍāga majjana jalapānā| baṭa tara gayau hṛdayam̐ haraṣānā||
bṛddha bṛddha bihaṃga taham̐ āe| sunai rāma ke carita suhāe||
kathā araṃbha karai soi cāhā| tehī samaya gayau khaganāhā||
āvata dekhi sakala khagarājā| haraṣeu bāyasa sahita samājā||
ati ādara khagapati kara kīnhā| svāgata pūchi suāsana dīnhā||
kari pūjā sameta anurāgā| madhura bacana taba boleu kāgā||

दोहा 63(क)
नाथ कृतारथ भयउँ मैं तव दरसन खगराज।
आयसु देहु सो करौं अब प्रभु आयहु केहि काज॥63(क)॥
nātha kṛtāratha bhayaum̐ maiṃ tava darasana khagarāja|
āyasu dehu so karauṃ aba prabhu āyahu kehi kāja||63(ka)||

दोहा 63(ख)
सदा कृतारथ रूप तुम्ह कह मृदु बचन खगेस।
जेहि कै अस्तुति सादर निज मुख कीन्ह महेस॥63(ख)॥
sadā kṛtāratha rūpa tumha kaha mṛdu bacana khagesa|
jehi kai astuti sādara nija mukha kīnha mahesa||63(kha)||
दोहा 64#

सुनहु तात जेहि कारन आयउँ। सो सब भयउ दरस तव पायउँ॥
देखि परम पावन तव आश्रम। गयउ मोह संसय नाना भ्रम॥
अब श्रीराम कथा अति पावनि। सदा सुखद दुख पुंज नसावनि॥
सादर तात सुनावहु मोही। बार बार बिनवउँ प्रभु तोही॥
सुनत गरुड़ कै गिरा बिनीता। सरल सुप्रेम सुखद सुपुनीता॥
भयउ तासु मन परम उछाहा। लाग कहै रघुपति गुन गाहा॥
प्रथमहिं अति अनुराग भवानी। रामचरित सर कहेसि बखानी॥
पुनि नारद कर मोह अपारा। कहेसि बहुरि रावन अवतारा॥
प्रभु अवतार कथा पुनि गाई। तब सिसु चरित कहेसि मन लाई॥

sunahu tāta jehi kārana āyaum̐| so saba bhayau darasa tava pāyaum̐||
dekhi parama pāvana tava āśrama| gayau moha saṃsaya nānā bhrama||
aba śrīrāma kathā ati pāvani| sadā sukhada dukha puṃja nasāvani||
sādara tāta sunāvahu mohī| bāra bāra binavaum̐ prabhu tohī||
sunata garuḍa kai girā binītā| sarala suprema sukhada supunītā||
bhayau tāsu mana parama uchāhā| lāga kahai raghupati guna gāhā||
prathamahiṃ ati anurāga bhavānī| rāmacarita sara kahesi bakhānī||
puni nārada kara moha apārā| kahesi bahuri rāvana avatārā||
prabhu avatāra kathā puni gāī| taba sisu carita kahesi mana lāī||

दोहा 64
बालचरित कहि बिबिध बिधि मन महँ परम उछाह।
रिषि आगवन कहेसि पुनि श्री रघुबीर बिबाह॥64॥
bālacarita kahi bibidha bidhi mana maham̐ parama uchāha|
riṣi āgavana kahesi puni śrī raghubīra bibāha||64||
दोहा 65#

बहुरि राम अभिषेक प्रसंगा। पुनि नृप बचन राज रस भंगा॥
पुरबासिन्ह कर बिरह बिषादा। कहेसि राम लछिमन संबादा॥
बिपिन गवन केवट अनुरागा। सुरसरि उतरि निवास प्रयागा॥
बालमीक प्रभु मिलन बखाना। चित्रकूट जिमि बसे भगवाना॥
सचिवागवन नगर नृप मरना। भरतागवन प्रेम बहु बरना॥
करि नृप क्रिया संग पुरबासी। भरत गए जहँ प्रभु सुख रासी॥
पुनि रघुपति बहु बिधि समुझाए। लै पादुका अवधपुर आए॥
भरत रहनि सुरपति सुत करनी। प्रभु अरु अत्रि भेंट पुनि बरनी॥

bahuri rāma abhiṣeka prasaṃgā| puni nṛpa bacana rāja rasa bhaṃgā||
purabāsinha kara biraha biṣādā| kahesi rāma lachimana saṃbādā||
bipina gavana kevaṭa anurāgā| surasari utari nivāsa prayāgā||
bālamīka prabhu milana bakhānā| citrakūṭa jimi base bhagavānā||
sacivāgavana nagara nṛpa maranā| bharatāgavana prema bahu baranā||
kari nṛpa kriyā saṃga purabāsī| bharata gae jaham̐ prabhu sukha rāsī||
puni raghupati bahu bidhi samujhāe| lai pādukā avadhapura āe||
bharata rahani surapati suta karanī| prabhu aru atri bheṃṭa puni baranī||

दोहा 65
कहि बिराध बध जेहि बिधि देह तजी सरभंग॥
बरनि सुतीछन प्रीति पुनि प्रभु अगस्ति सतसंग॥65॥
kahi birādha badha jehi bidhi deha tajī sarabhaṃga||
barani sutīchana prīti puni prabhu agasti satasaṃga||65||
दोहा 66#

कहि दंडक बन पावनताई। गीध मइत्री पुनि तेहिं गाई॥
पुनि प्रभु पंचबटीं कृत बासा। भंजी सकल मुनिन्ह की त्रासा॥
पुनि लछिमन उपदेस अनूपा। सूपनखा जिमि कीन्हि कुरूपा॥
खर दूषन बध बहुरि बखाना। जिमि सब मरमु दसानन जाना॥
दसकंधर मारीच बतकही। जेहि बिधि भई सो सब तेहिं कही॥
पुनि माया सीता कर हरना। श्रीरघुबीर बिरह कछु बरना॥
पुनि प्रभु गीध क्रिया जिमि कीन्ही। बधि कबंध सबरिहि गति दीन्ही॥
बहुरि बिरह बरनत रघुबीरा। जेहि बिधि गए सरोबर तीरा॥

kahi daṃḍaka bana pāvanatāī| gīdha maitrī puni tehiṃ gāī||
puni prabhu paṃcabaṭīṃ kṛta bāsā| bhaṃjī sakala muninha kī trāsā||
puni lachimana upadesa anūpā| sūpanakhā jimi kīnhi kurūpā||
khara dūṣana badha bahuri bakhānā| jimi saba maramu dasānana jānā||
dasakaṃdhara mārīca batakahī| jehi bidhi bhaī so saba tehiṃ kahī||
puni māyā sītā kara haranā| śrīraghubīra biraha kachu baranā||
puni prabhu gīdha kriyā jimi kīnhī| badhi kabaṃdha sabarihi gati dīnhī||
bahuri biraha baranata raghubīrā| jehi bidhi gae sarobara tīrā||

दोहा 66(क)
प्रभु नारद संबाद कहि मारुति मिलन प्रसंग।
पुनि सुग्रीव मिताई बालि प्रान कर भंग॥66(क)॥
prabhu nārada saṃbāda kahi māruti milana prasaṃga|
puni sugrīva mitāī bāli prāna kara bhaṃga||66(ka)||

दोहा 66(ख)
कपिहि तिलक करि प्रभु कृत सैल प्रबरषन बास।
बरनन बर्षा सरद अरु राम रोष कपि त्रास॥66(ख)॥
kapihi tilaka kari prabhu kṛta saila prabaraṣana bāsa|
baranana barṣā sarada aru rāma roṣa kapi trāsa||66(kha)||
दोहा 67#

जेहि बिधि कपिपति कीस पठाए। सीता खोज सकल दिसि धाए॥
बिबर प्रबेस कीन्ह जेहि भाँति। कपिन्ह बहोरि मिला संपाती॥
सुनि सब कथा समीरकुमारा। नाघत भयउ पयोधि अपारा॥
लंकाँ कपि प्रबेस जिमि कीन्हा। पुनि सीतहि धीरजु जिमि दीन्हा॥
बन उजारि रावनहि प्रबोधी। पुर दहि नाघेउ बहुरि पयोधी॥
आए कपि सब जहँ रघुराई। बैदेही की कुसल सुनाई॥
सेन समेति जथा रघुबीरा। उतरे जाइ बारिनिधि तीरा॥
मिला बिभीषन जेहि बिधि आई। सागर निग्रह कथा सुनाई॥

jehi bidhi kapipati kīsa paṭhāe| sītā khoja sakala disi dhāe||
bibara prabesa kīnha jehi bhām̐ti| kapinha bahori milā saṃpātī||
suni saba kathā samīrakumārā| nāghata bhayau payodhi apārā||
laṃkām̐ kapi prabesa jimi kīnhā| puni sītahi dhīraju jimi dīnhā||
bana ujāri rāvanahi prabodhī| pura dahi nāgheu bahuri payodhī||
āe kapi saba jaham̐ raghurāī| baidehī kī kusala sunāī||
sena sameti jathā raghubīrā| utare jāi bārinidhi tīrā||
milā bibhīṣana jehi bidhi āī| sāgara nigraha kathā sunāī||

दोहा 67(क)
सेतु बाँधि कपि सेन जिमि उतरी सागर पार।
गयउ बसीठी बीरबर जेहि बिधि बालिकुमार॥67(क)॥
setu bām̐dhi kapi sena jimi utarī sāgara pāra|
gayau basīṭhī bīrabara jehi bidhi bālikumāra||67(ka)||

दोहा 67(ख)
निसिचर कीस लराई बरनिसि बिबिध प्रकार।
कुंभकरन घननाद कर बल पौरुष संघार॥67(ख)॥
nisicara kīsa larāī baranisi bibidha prakāra|
kuṃbhakarana ghananāda kara bala pauruṣa saṃghāra||67(kha)||
सोरठा 68#

निसिचर निकर मरन बिधि नाना। रघुपति रावन समर बखाना॥
रावन बध मंदोदरि सोका। राज बिभीषन देव असोका॥
सीता रघुपति मिलन बहोरी। सुरन्ह कीन्ह अस्तुति कर जोरी॥
पुनि पुष्पक चढ़ि कपिन्ह समेता। अवध चले प्रभु कृपा निकेता॥
जेहि बिधि राम नगर निज आए। बायस बिसद चरित सब गाए॥
कहेसि बहोरि राम अभिषेका। पुर बरनत नृपनीति अनेका॥
कथा समस्त भुसुंड बखानी। जो मैं तुम्ह सन कही भवानी॥
सुनि सब राम कथा खगनाहा। कहत बचन मन परम उछाहा॥

nisicara nikara marana bidhi nānā| raghupati rāvana samara bakhānā||
rāvana badha maṃdodari sokā| rāja bibhīṣana deva asokā||
sītā raghupati milana bahorī| suranha kīnha astuti kara jorī||
puni puṣpaka caḍhi kapinha sametā| avadha cale prabhu kṛpā niketā||
jehi bidhi rāma nagara nija āe| bāyasa bisada carita saba gāe||
kahesi bahori rāma abhiṣekā| pura baranata nṛpanīti anekā||
kathā samasta bhusuṃḍa bakhānī| jo maiṃ tumha sana kahī bhavānī||
suni saba rāma kathā khaganāhā| kahata bacana mana parama uchāhā||

सोरठा 68(क)
गयउ मोर संदेह सुनेउँ सकल रघुपति चरित।
भयउ राम पद नेह तव प्रसाद बायस तिलक॥68(क)॥
gayau mora saṃdeha suneum̐ sakala raghupati carita|
bhayau rāma pada neha tava prasāda bāyasa tilaka||68(ka)||

सोरठा 68(ख)
मोहि भयउ अति मोह प्रभु बंधन रन महुँ निरखि।
चिदानंद संदोह राम बिकल कारन कवन। 68(ख)॥
mohi bhayau ati moha prabhu baṃdhana rana mahum̐ nirakhi|
cidānaṃda saṃdoha rāma bikala kārana kavana| 68(kha)||
दोहा 69#

देखि चरित अति नर अनुसारी। भयउ हृदयँ मम संसय भारी॥
सोइ भ्रम अब हित करि मैं माना। कीन्ह अनुग्रह कृपानिधाना॥
जो अति आतप ब्याकुल होई। तरु छाया सुख जानइ सोई॥
जौं नहिं होत मोह अति मोही। मिलतेउँ तात कवन बिधि तोही॥
सुनतेउँ किमि हरि कथा सुहाई। अति बिचित्र बहु बिधि तुम्ह गाई॥
निगमागम पुरान मत एहा। कहहिं सिद्ध मुनि नहिं संदेहा॥
संत बिसुद्ध मिलहिं परि तेही। चितवहिं राम कृपा करि जेही॥
राम कृपाँ तव दरसन भयऊ। तव प्रसाद सब संसय गयऊ॥

dekhi carita ati nara anusārī| bhayau hṛdayam̐ mama saṃsaya bhārī||
soi bhrama aba hita kari maiṃ mānā| kīnha anugraha kṛpānidhānā||
jo ati ātapa byākula hoī| taru chāyā sukha jānai soī||
jauṃ nahiṃ hota moha ati mohī| milateum̐ tāta kavana bidhi tohī||
sunateum̐ kimi hari kathā suhāī| ati bicitra bahu bidhi tumha gāī||
nigamāgama purāna mata ehā| kahahiṃ siddha muni nahiṃ saṃdehā||
saṃta bisuddha milahiṃ pari tehī| citavahiṃ rāma kṛpā kari jehī||
rāma kṛpām̐ tava darasana bhayaū| tava prasāda saba saṃsaya gayaū||

दोहा 69(क)
सुनि बिहंगपति बानी सहित बिनय अनुराग।
पुलक गात लोचन सजल मन हरषेउ अति काग॥69(क)॥
suni bihaṃgapati bānī sahita binaya anurāga|
pulaka gāta locana sajala mana haraṣeu ati kāga||69(ka)||

दोहा 69(ख)
श्रोता सुमति सुसील सुचि कथा रसिक हरि दास।
पाइ उमा अति गोप्यमपि सज्जन करहिं प्रकास॥69(ख)॥
śrotā sumati susīla suci kathā rasika hari dāsa|
pāi umā ati gopyamapi sajjana karahiṃ prakāsa||69(kha)||
दोहा 70#

बोलेउ काकभसुंड बहोरी। नभग नाथ पर प्रीति न थोरी॥
सब बिधि नाथ पूज्य तुम्ह मेरे। कृपापात्र रघुनायक केरे॥
तुम्हहि न संसय मोह न माया। मो पर नाथ कीन्ह तुम्ह दाया॥
पठइ मोह मिस खगपति तोही। रघुपति दीन्हि बड़ाई मोही॥
तुम्ह निज मोह कही खग साईं। सो नहिं कछु आचरज गोसाईं॥
नारद भव बिरंचि सनकादी। जे मुनिनायक आतमबादी॥
मोह न अंध कीन्ह केहि केही। को जग काम नचाव न जेही॥
तृस्नाँ केहि न कीन्ह बौराहा। केहि कर हृदय क्रोध नहिं दाहा॥

boleu kākabhasuṃḍa bahorī| nabhaga nātha para prīti na thorī||
saba bidhi nātha pūjya tumha mere| kṛpāpātra raghunāyaka kere||
tumhahi na saṃsaya moha na māyā| mo para nātha kīnha tumha dāyā||
paṭhai moha misa khagapati tohī| raghupati dīnhi baḍāī mohī||
tumha nija moha kahī khaga sāīṃ| so nahiṃ kachu ācaraja gosāīṃ||
nārada bhava biraṃci sanakādī| je munināyaka ātamabādī||
moha na aṃdha kīnha kehi kehī| ko jaga kāma nacāva na jehī||
tṛsnām̐ kehi na kīnha baurāhā| kehi kara hṛdaya krodha nahiṃ dāhā||

दोहा 70(क)
ग्यानी तापस सूर कबि कोबिद गुन आगार।
केहि कै लोभ बिडंबना कीन्हि न एहिं संसार॥70(क)॥
gyānī tāpasa sūra kabi kobida guna āgāra|
kehi kai lobha biḍaṃbanā kīnhi na ehiṃ saṃsāra||70(ka)||

दोहा 70(ख)
श्री मद बक्र न कीन्ह केहि प्रभुता बधिर न काहि।
मृगलोचनि के नैन सर को अस लाग न जाहि॥70(ख)॥
śrī mada bakra na kīnha kehi prabhutā badhira na kāhi|
mṛgalocani ke naina sara ko asa lāga na jāhi||70(kha)||
दोहा 71#

गुन कृत सन्यपात नहिं केही। कोउ न मान मद तजेउ निबेही॥
जोबन ज्वर केहि नहिं बलकावा। ममता केहि कर जस न नसावा॥
मच्छर काहि कलंक न लावा। काहि न सोक समीर डोलावा॥
चिंता साँपिनि को नहिं खाया। को जग जाहि न ब्यापी माया॥
कीट मनोरथ दारु सरीरा। जेहि न लाग घुन को अस धीरा॥
सुत बित लोक ईषना तीनी। केहि के मति इन्ह कृत न मलीनी॥
यह सब माया कर परिवारा। प्रबल अमिति को बरनै पारा॥
सिव चतुरानन जाहि डेराहीं। अपर जीव केहि लेखे माहीं॥

guna kṛta sanyapāta nahiṃ kehī| kou na māna mada tajeu nibehī||
jobana jvara kehi nahiṃ balakāvā| mamatā kehi kara jasa na nasāvā||
macchara kāhi kalaṃka na lāvā| kāhi na soka samīra ḍolāvā||
ciṃtā sām̐pini ko nahiṃ khāyā| ko jaga jāhi na byāpī māyā||
kīṭa manoratha dāru sarīrā| jehi na lāga ghuna ko asa dhīrā||
suta bita loka īṣanā tīnī| kehi ke mati inha kṛta na malīnī||
yaha saba māyā kara parivārā| prabala amiti ko baranai pārā||
siva caturānana jāhi ḍerāhīṃ| apara jīva kehi lekhe māhīṃ||

दोहा 71(क)
ब्यापि रहेउ संसार महुँ माया कटक प्रचंड॥
सेनापति कामादि भट दंभ कपट पाषंड॥71(क)॥
byāpi raheu saṃsāra mahum̐ māyā kaṭaka pracaṃḍa||
senāpati kāmādi bhaṭa daṃbha kapaṭa pāṣaṃḍa||71(ka)||

दोहा 71(ख)
सो दासी रघुबीर कै समुझें मिथ्या सोपि।
छूट न राम कृपा बिनु नाथ कहउँ पद रोपि॥71(ख)॥
so dāsī raghubīra kai samujheṃ mithyā sopi|
chūṭa na rāma kṛpā binu nātha kahaum̐ pada ropi||71(kha)||
दोहा 72#

जो माया सब जगहि नचावा। जासु चरित लखि काहुँ न पावा॥
सोइ प्रभु भ्रू बिलास खगराजा। नाच नटी इव सहित समाजा॥
सोइ सच्चिदानंद घन रामा। अज बिग्यान रूप बल धामा॥
ब्यापक ब्याप्य अखंड अनंता। अखिल अमोघसक्ति भगवंता॥
अगुन अदभ्र गिरा गोतीता। सबदरसी अनवद्य अजीता॥
निर्मम निराकार निरमोहा। नित्य निरंजन सुख संदोहा॥
प्रकृति पार प्रभु सब उर बासी। ब्रह्म निरीह बिरज अबिनासी॥
इहाँ मोह कर कारन नाहीं। रबि सन्मुख तम कबहुँ कि जाहीं॥

jo māyā saba jagahi nacāvā| jāsu carita lakhi kāhum̐ na pāvā||
soi prabhu bhrū bilāsa khagarājā| nāca naṭī iva sahita samājā||
soi saccidānaṃda ghana rāmā| aja bigyāna rūpa bala dhāmā||
byāpaka byāpya akhaṃḍa anaṃtā| akhila amoghasakti bhagavaṃtā||
aguna adabhra girā gotītā| sabadarasī anavadya ajītā||
nirmama nirākāra niramohā| nitya niraṃjana sukha saṃdohā||
prakṛti pāra prabhu saba ura bāsī| brahma nirīha biraja abināsī||
ihām̐ moha kara kārana nāhīṃ| rabi sanmukha tama kabahum̐ ki jāhīṃ||

दोहा 72(क)
भगत हेतु भगवान प्रभु राम धरेउ तनु भूप।
किए चरित पावन परम प्राकृत नर अनुरूप॥72(क)॥
bhagata hetu bhagavāna prabhu rāma dhareu tanu bhūpa|
kie carita pāvana parama prākṛta nara anurūpa||72(ka)||

दोहा 72(ख)
जथा अनेक बेष धरि नृत्य करइ नट कोइ।
सोइ सोइ भाव देखावइ आपुन होइ न सोइ॥72(ख)॥
jathā aneka beṣa dhari nṛtya karai naṭa koi|
soi soi bhāva dekhāvai āpuna hoi na soi||72(kha)||
दोहा 73#

असि रघुपति लीला उरगारी। दनुज बिमोहनि जन सुखकारी॥
जे मति मलिन बिषयबस कामी। प्रभु मोह धरहिं इमि स्वामी॥
नयन दोष जा कहँ जब होई। पीत बरन ससि कहुँ कह सोई॥
जब जेहि दिसि भ्रम होइ खगेसा। सो कह पच्छिम उयउ दिनेसा॥
नौकारूढ़ चलत जग देखा। अचल मोह बस आपुहि लेखा॥
बालक भ्रमहिं न भ्रमहिं गृहादीं। कहहिं परस्पर मिथ्याबादी॥
हरि बिषइक अस मोह बिहंगा। सपनेहुँ नहिं अग्यान प्रसंगा॥
मायाबस मतिमंद अभागी। हृदयँ जमनिका बहुबिधि लागी॥
ते सठ हठ बस संसय करहीं। निज अग्यान राम पर धरहीं॥

asi raghupati līlā uragārī| danuja bimohani jana sukhakārī||
je mati malina biṣayabasa kāmī| prabhu moha dharahiṃ imi svāmī||
nayana doṣa jā kaham̐ jaba hoī| pīta barana sasi kahum̐ kaha soī||
jaba jehi disi bhrama hoi khagesā| so kaha pacchima uyau dinesā||
naukārūḍha calata jaga dekhā| acala moha basa āpuhi lekhā||
bālaka bhramahiṃ na bhramahiṃ gṛhādīṃ| kahahiṃ paraspara mithyābādī||
hari biṣaika asa moha bihaṃgā| sapanehum̐ nahiṃ agyāna prasaṃgā||
māyābasa matimaṃda abhāgī| hṛdayam̐ jamanikā bahubidhi lāgī||
te saṭha haṭha basa saṃsaya karahīṃ| nija agyāna rāma para dharahīṃ||

दोहा 73(क)
काम क्रोध मद लोभ रत गृहासक्त दुखरूप।
ते किमि जानहिं रघुपतिहि मूढ़ परे तम कूप॥73(क)॥
kāma krodha mada lobha rata gṛhāsakta dukharūpa|
te kimi jānahiṃ raghupatihi mūḍha pare tama kūpa||73(ka)||

दोहा 73(ख)
निर्गुन रूप सुलभ अति सगुन जान नहिं कोई।
सुगम अगम नाना चरित सुनि मुनि मन भ्रम होइ॥73(ख)॥
nirguna rūpa sulabha ati saguna jāna nahiṃ koī|
sugama agama nānā carita suni muni mana bhrama hoi||73(kha)||
दोहा 74#

सुनु खगेस रघुपति प्रभुताई। कहउँ जथामति कथा सुहाई॥
जेहि बिधि मोह भयउ प्रभु मोही। सोउ सब कथा सुनावउँ तोही॥
राम कृपा भाजन तुम्ह ताता। हरि गुन प्रीति मोहि सुखदाता॥
ताते नहिं कछु तुम्हहि दुरावउँ। परम रहस्य मनोहर गावउँ॥
सुनहु राम कर सहज सुभाऊ। जन अभिमान न राखहिं काऊ॥
संसृत मूल सूलप्रद नाना। सकल सोक दायक अभिमाना॥
ताते करहिं कृपानिधि दूरी। सेवक पर ममता अति भूरी॥
जिमि सिसु तन ब्रन होइ गोसाईं। मातु चिराव कठिन की नाईं॥

sunu khagesa raghupati prabhutāī| kahaum̐ jathāmati kathā suhāī||
jehi bidhi moha bhayau prabhu mohī| sou saba kathā sunāvaum̐ tohī||
rāma kṛpā bhājana tumha tātā| hari guna prīti mohi sukhadātā||
tāte nahiṃ kachu tumhahi durāvaum̐| parama rahasya manohara gāvaum̐||
sunahu rāma kara sahaja subhāū| jana abhimāna na rākhahiṃ kāū||
saṃsṛta mūla sūlaprada nānā| sakala soka dāyaka abhimānā||
tāte karahiṃ kṛpānidhi dūrī| sevaka para mamatā ati bhūrī||
jimi sisu tana brana hoi gosāīṃ| mātu cirāva kaṭhina kī nāīṃ||

दोहा 74(क)
जदपि प्रथम दुख पावइ रोवइ बाल अधीर।
ब्याधि नास हित जननी गनति न सो सिसु पीर॥74(क)॥
jadapi prathama dukha pāvai rovai bāla adhīra|
byādhi nāsa hita jananī ganati na so sisu pīra||74(ka)||

दोहा 74(ख)
तिमि रघुपति निज दासकर हरहिं मान हित लागि।
तुलसिदास ऐसे प्रभुहि कस न भजहु भ्रम त्यागि॥74(ख)॥
timi raghupati nija dāsakara harahiṃ māna hita lāgi|
tulasidāsa aise prabhuhi kasa na bhajahu bhrama tyāgi||74(kha)||
दोहा 75#

राम कृपा आपनि जड़ताई। कहउँ खगेस सुनहु मन लाई॥
जब जब राम मनुज तनु धरहीं। भक्त हेतु लीला बहु करहीं॥
तब तब अवधपुरी मैं जाऊँ। बालचरित बिलोकि हरषाऊँ॥
जन्म महोत्सव देखउँ जाई। बरष पाँच तहँ रहउँ लोभाई॥
इष्टदेव मम बालक रामा। सोभा बपुष कोटि सत कामा॥
निज प्रभु बदन निहारि निहारी। लोचन सुफल करउँ उरगारी॥
लघु बायस बपु धरि हरि संगा। देखउँ बालचरित बहुरंगा॥

rāma kṛpā āpani jaḍatāī| kahaum̐ khagesa sunahu mana lāī||
jaba jaba rāma manuja tanu dharahīṃ| bhakta hetu līlā bahu karahīṃ||
taba taba avadhapurī maiṃ jāūm̐| bālacarita biloki haraṣāūm̐||
janma mahotsava dekhaum̐ jāī| baraṣa pām̐ca taham̐ rahaum̐ lobhāī||
iṣṭadeva mama bālaka rāmā| sobhā bapuṣa koṭi sata kāmā||
nija prabhu badana nihāri nihārī| locana suphala karaum̐ uragārī||
laghu bāyasa bapu dhari hari saṃgā| dekhaum̐ bālacarita bahuraṃgā||

दोहा 75(क)
लरिकाईं जहँ जहँ फिरहिं तहँ तहँ संग उड़ाउँ।
जूठनि परइ अजिर महँ सो उठाइ करि खाउँ॥75(क)॥
larikāīṃ jaham̐ jaham̐ phirahiṃ taham̐ taham̐ saṃga uḍāum̐|
jūṭhani parai ajira maham̐ so uṭhāi kari khāum̐||75(ka)||

दोहा 75(ख)
एक बार अतिसय सब चरित किए रघुबीर।
सुमिरत प्रभु लीला सोइ पुलकित भयउ सरीर॥75(ख)॥
eka bāra atisaya saba carita kie raghubīra|
sumirata prabhu līlā soi pulakita bhayau sarīra||75(kha)||
दोहा 76#

कहइ भसुंड सुनहु खगनायक। रामचरित सेवक सुखदायक॥
नृपमंदिर सुंदर सब भाँती। खचित कनक मनि नाना जाती॥
बरनि न जाइ रुचिर अँगनाई। जहँ खेलहिं नित चारिउ भाई॥
बालबिनोद करत रघुराई। बिचरत अजिर जननि सुखदाई॥
मरकत मृदुल कलेवर स्यामा। अंग अंग प्रति छबि बहु कामा॥
नव राजीव अरुन मृदु चरना। पदज रुचिर नख ससि दुति हरना॥
ललित अंक कुलिसादिक चारी। नूपुर चारु मधुर रवकारी॥
चारु पुरट मनि रचित बनाई। कटि किंकिनि कल मुखर सुहाई॥

kahai bhasuṃḍa sunahu khaganāyaka| rāmacarita sevaka sukhadāyaka||
nṛpamaṃdira suṃdara saba bhām̐tī| khacita kanaka mani nānā jātī||
barani na jāi rucira am̐ganāī| jaham̐ khelahiṃ nita cāriu bhāī||
bālabinoda karata raghurāī| bicarata ajira janani sukhadāī||
marakata mṛdula kalevara syāmā| aṃga aṃga prati chabi bahu kāmā||
nava rājīva aruna mṛdu caranā| padaja rucira nakha sasi duti haranā||
lalita aṃka kulisādika cārī| nūpura cāru madhura ravakārī||
cāru puraṭa mani racita banāī| kaṭi kiṃkini kala mukhara suhāī||

दोहा 76
रेखा त्रय सुन्दर उदर नाभी रुचिर गँभीर।
उर आयत भ्राजत बिबिध बाल बिभूषन चीर॥76॥
rekhā traya sundara udara nābhī rucira gam̐bhīra|
ura āyata bhrājata bibidha bāla bibhūṣana cīra||76||
दोहा 77#

अरुन पानि नख करज मनोहर। बाहु बिसाल बिभूषन सुंदर॥
कंध बाल केहरि दर ग्रीवा। चारु चिबुक आनन छबि सींवा॥
कलबल बचन अधर अरुनारे। दुइ दुइ दसन बिसद बर बारे॥
ललित कपोल मनोहर नासा। सकल सुखद ससि कर सम हासा॥
नील कंज लोचन भव मोचन। भ्राजत भाल तिलक गोरोचन॥
बिकट भृकुटि सम श्रवन सुहाए। कुंचित कच मेचक छबि छाए॥
पीत झीनि झगुली तन सोही। किलकनि चितवनि भावति मोही॥
रूप रासि नृप अजिर बिहारी। नाचहिं निज प्रतिबिंब निहारी॥
मोहि सन करहिं बिबिध बिधि क्रीड़ा। बरनत मोहि होति अति ब्रीड़ा॥
किलकत मोहि धरन जब धावहिं। चलउँ भागि तब पूप देखावहिं॥

aruna pāni nakha karaja manohara| bāhu bisāla bibhūṣana suṃdara||
kaṃdha bāla kehari dara grīvā| cāru cibuka ānana chabi sīṃvā||
kalabala bacana adhara arunāre| dui dui dasana bisada bara bāre||
lalita kapola manohara nāsā| sakala sukhada sasi kara sama hāsā||
nīla kaṃja locana bhava mocana| bhrājata bhāla tilaka gorocana||
bikaṭa bhṛkuṭi sama śravana suhāe| kuṃcita kaca mecaka chabi chāe||
pīta jhīni jhagulī tana sohī| kilakani citavani bhāvati mohī||
rūpa rāsi nṛpa ajira bihārī| nācahiṃ nija pratibiṃba nihārī||
mohi sana karahiṃ bibidha bidhi krīḍā| baranata mohi hoti ati brīḍā||
kilakata mohi dharana jaba dhāvahiṃ| calaum̐ bhāgi taba pūpa dekhāvahiṃ||

दोहा 77(क)
आवत निकट हँसहिं प्रभु भाजत रुदन कराहिं।
जाउँ समीप गहन पद फिरि फिरि चितइ पराहिं॥77(क)॥
āvata nikaṭa ham̐sahiṃ prabhu bhājata rudana karāhiṃ|
jāum̐ samīpa gahana pada phiri phiri citai parāhiṃ||77(ka)||

दोहा 77(ख)
प्राकृत सिसु इव लीला देखि भयउ मोहि मोह।
कवन चरित्र करत प्रभु चिदानंद संदोह॥77(ख)॥
prākṛta sisu iva līlā dekhi bhayau mohi moha|
kavana caritra karata prabhu cidānaṃda saṃdoha||77(kha)||
दोहा 78#

एतना मन आनत खगराया। रघुपति प्रेरित ब्यापी माया॥
सो माया न दुखद मोहि काहीं। आन जीव इव संसृत नाहीं॥
नाथ इहाँ कछु कारन आना। सुनहु सो सावधान हरिजाना॥
ग्यान अखंड एक सीताबर। माया बस्य जीव सचराचर॥
जौं सब कें रह ग्यान एकरस। ईस्वर जीवहि भेद कहहु कस॥
माया बस्य जीव अभिमानी। ईस बस्य माया गुनखानी॥
परबस जीव स्वबस भगवंता। जीव अनेक एक श्रीकंता॥
मुधा भेद जद्यपि कृत माया। बिनु हरि जाइ न कोटि उपाया॥

etanā mana ānata khagarāyā| raghupati prerita byāpī māyā||
so māyā na dukhada mohi kāhīṃ| āna jīva iva saṃsṛta nāhīṃ||
nātha ihām̐ kachu kārana ānā| sunahu so sāvadhāna harijānā||
gyāna akhaṃḍa eka sītābara| māyā basya jīva sacarācara||
jauṃ saba keṃ raha gyāna ekarasa| īsvara jīvahi bheda kahahu kasa||
māyā basya jīva abhimānī| īsa basya māyā gunakhānī||
parabasa jīva svabasa bhagavaṃtā| jīva aneka eka śrīkaṃtā||
mudhā bheda jadyapi kṛta māyā| binu hari jāi na koṭi upāyā||

दोहा 78(क)
रामचंद्र के भजन बिनु जो चह पद निर्बान।
ग्यानवंत अपि सो नर पसु बिनु पूँछ बिषान॥78(क)॥
rāmacaṃdra ke bhajana binu jo caha pada nirbāna|
gyānavaṃta api so nara pasu binu pūm̐cha biṣāna||78(ka)||

दोहा 78(ख)
राकापति षोड़स उअहिं तारागन समुदाइ॥
सकल गिरिन्ह दव लाइअ बिनु रबि राति न जाइ॥78(ख)॥
rākāpati ṣoḍasa uahiṃ tārāgana samudāi||
sakala girinha dava lāia binu rabi rāti na jāi||78(kha)||
दोहा 79#

ऐसेहिं हरि बिनु भजन खगेसा। मिटइ न जीवन्ह केर कलेसा॥
हरि सेवकहि न ब्याप अबिद्या। प्रभु प्रेरित ब्यापइ तेहि बिद्या॥
ताते नास न होइ दास कर। भेद भगति बाढ़इ बिहंगबर॥
भ्रम ते चकित राम मोहि देखा। बिहँसे सो सुनु चरित बिसेषा॥
तेहि कौतुक कर मरमु न काहूँ। जाना अनुज न मातु पिताहूँ॥
जानु पानि धाए मोहि धरना। स्यामल गात अरुन कर चरना॥
तब मैं भागि चलेउँ उरगारी। राम गहन कहँ भुजा पसारी॥
जिमि जिमि दूरि उड़ाउँ अकासा। तहँ भुज हरि देखउँ निज पासा॥

aisehiṃ hari binu bhajana khagesā| miṭai na jīvanha kera kalesā||
hari sevakahi na byāpa abidyā| prabhu prerita byāpai tehi bidyā||
tāte nāsa na hoi dāsa kara| bheda bhagati bāḍhai bihaṃgabara||
bhrama te cakita rāma mohi dekhā| biham̐se so sunu carita biseṣā||
tehi kautuka kara maramu na kāhūm̐| jānā anuja na mātu pitāhūm̐||
jānu pāni dhāe mohi dharanā| syāmala gāta aruna kara caranā||
taba maiṃ bhāgi caleum̐ uragārī| rāma gahana kaham̐ bhujā pasārī||
jimi jimi dūri uḍāum̐ akāsā| taham̐ bhuja hari dekhaum̐ nija pāsā||

दोहा 79(क)
ब्रह्मलोक लगि गयउँ मैं चितयउँ पाछ उड़ात।
जुग अंगुल कर बीच सब राम भुजहि मोहि तात॥79(क)॥
brahmaloka lagi gayaum̐ maiṃ citayaum̐ pācha uḍāta|
juga aṃgula kara bīca saba rāma bhujahi mohi tāta||79(ka)||

दोहा 79(ख)
सप्ताबरन भेद करि जहाँ लगें गति मोरि।
गयउँ तहाँ प्रभु भुज निरखि ब्याकुल भयउँ बहोरि॥79(ख)॥
saptābarana bheda kari jahām̐ lageṃ gati mori|
gayaum̐ tahām̐ prabhu bhuja nirakhi byākula bhayaum̐ bahori||79(kha)||
दोहा 80#

मूदेउँ नयन त्रसित जब भयउँ। पुनि चितवत कोसलपुर गयऊँ॥
मोहि बिलोकि राम मुसुकाहीं। बिहँसत तुरत गयउँ मुख माहीं॥
उदर माझ सुनु अंडज राया। देखेउँ बहु ब्रह्मांड निकाया॥
अति बिचित्र तहँ लोक अनेका। रचना अधिक एक ते एका॥
कोटिन्ह चतुरानन गौरीसा। अगनित उडगन रबि रजनीसा॥
अगनित लोकपाल जम काला। अगनित भूधर भूमि बिसाला॥
सागर सरि सर बिपिन अपारा। नाना भाँति सृष्टि बिस्तारा॥
सुर मुनि सिद्ध नाग नर किंनर। चारि प्रकार जीव सचराचर॥

mūdeum̐ nayana trasita jaba bhayaum̐| puni citavata kosalapura gayaūm̐||
mohi biloki rāma musukāhīṃ| biham̐sata turata gayaum̐ mukha māhīṃ||
udara mājha sunu aṃḍaja rāyā| dekheum̐ bahu brahmāṃḍa nikāyā||
ati bicitra taham̐ loka anekā| racanā adhika eka te ekā||
koṭinha caturānana gaurīsā| aganita uḍagana rabi rajanīsā||
aganita lokapāla jama kālā| aganita bhūdhara bhūmi bisālā||
sāgara sari sara bipina apārā| nānā bhām̐ti sṛṣṭi bistārā||
sura muni siddha nāga nara kiṃnara| cāri prakāra jīva sacarācara||

दोहा 80(क)
जो नहिं देखा नहिं सुना जो मनहूँ न समाइ।
सो सब अद्भुत देखेउँ बरनि कवनि बिधि जाइ॥80(क)॥
jo nahiṃ dekhā nahiṃ sunā jo manahūm̐ na samāi|
so saba adbhuta dekheum̐ barani kavani bidhi jāi||80(ka)||

दोहा 80(ख)
एक एक ब्रह्मांड महुँ रहउँ बरष सत एक।
एहि बिधि देखत फिरउँ मैं अंड कटाह अनेक॥
एहि बिधि देखत फिरउँ मैं अंड कटाह अनेक॥80(ख)॥
eka eka brahmāṃḍa mahum̐ rahaum̐ baraṣa sata eka|
ehi bidhi dekhata phiraum̐ maiṃ aṃḍa kaṭāha aneka||
ehi bidhi dekhata phiraum̐ maiṃ aṃḍa kaṭāha aneka||80(kha)||
दोहा 81#

लोक लोक प्रति भिन्न बिधाता। भिन्न बिष्नु सिव मनु दिसित्राता॥
नर गंधर्ब भूत बेताला। किंनर निसिचर पसु खग ब्याला॥
देव दनुज गन नाना जाती। सकल जीव तहँ आनहि भाँती॥
महि सरि सागर सर गिरि नाना। सब प्रपंच तहँ आनइ आना॥
अंडकोस प्रति प्रति निज रूपा। देखेउँ जिनस अनेक अनूपा॥
अवधपुरी प्रति भुवन निनारी। सरजू भिन्न भिन्न नर नारी॥
दसरथ कौसल्या सुनु ताता। बिबिध रूप भरतादिक भ्राता॥
प्रति ब्रह्मांड राम अवतारा। देखउँ बालबिनोद अपारा॥

loka loka prati bhinna bidhātā| bhinna biṣnu siva manu disitrātā||
nara gaṃdharba bhūta betālā| kiṃnara nisicara pasu khaga byālā||
deva danuja gana nānā jātī| sakala jīva taham̐ ānahi bhām̐tī||
mahi sari sāgara sara giri nānā| saba prapaṃca taham̐ ānai ānā||
aṃḍakosa prati prati nija rūpā| dekheum̐ jinasa aneka anūpā||
avadhapurī prati bhuvana ninārī| sarajū bhinna bhinna nara nārī||
dasaratha kausalyā sunu tātā| bibidha rūpa bharatādika bhrātā||
prati brahmāṃḍa rāma avatārā| dekhaum̐ bālabinoda apārā||

दोहा 81(क)
भिन्न भिन्न मैं दीख सबु अति बिचित्र हरिजान।
अगनित भुवन फिरेउँ प्रभु राम न देखेउँ आन॥81(क)॥
bhinna bhinna maiṃ dīkha sabu ati bicitra harijāna|
aganita bhuvana phireum̐ prabhu rāma na dekheum̐ āna||81(ka)||
दोहा 82#

सोइ सिसुपन सोइ सोभा सोइ कृपाल रघुबीर।
भुवन भुवन देखत फिरउँ प्रेरित मोह समीर॥81(ख)
भ्रमत मोहि ब्रह्मांड अनेका। बीते मनहुँ कल्प सत एका॥
फिरत फिरत निज आश्रम आयउँ। तहँ पुनि रहि कछु काल गवाँयउँ॥
निज प्रभु जन्म अवध सुनि पायउँ। निर्भर प्रेम हरषि उठि धायउँ॥
देखउँ जन्म महोत्सव जाई। जेहि बिधि प्रथम कहा मैं गाई॥
राम उदर देखेउँ जग नाना। देखत बनइ न जाइ बखाना॥
तहँ पुनि देखेउँ राम सुजाना। माया पति कृपाल भगवाना॥
करउँ बिचार बहोरि बहोरी। मोह कलिल ब्यापित मति मोरी॥
उभय घरी महँ मैं सब देखा। भयउँ भ्रमित मन मोह बिसेषा॥

soi sisupana soi sobhā soi kṛpāla raghubīra|
bhuvana bhuvana dekhata phiraum̐ prerita moha samīra||81(kha)
bhramata mohi brahmāṃḍa anekā| bīte manahum̐ kalpa sata ekā||
phirata phirata nija āśrama āyaum̐| taham̐ puni rahi kachu kāla gavām̐yaum̐||
nija prabhu janma avadha suni pāyaum̐| nirbhara prema haraṣi uṭhi dhāyaum̐||
dekhaum̐ janma mahotsava jāī| jehi bidhi prathama kahā maiṃ gāī||
rāma udara dekheum̐ jaga nānā| dekhata banai na jāi bakhānā||
taham̐ puni dekheum̐ rāma sujānā| māyā pati kṛpāla bhagavānā||
karaum̐ bicāra bahori bahorī| moha kalila byāpita mati morī||
ubhaya gharī maham̐ maiṃ saba dekhā| bhayaum̐ bhramita mana moha biseṣā||

दोहा 82(क)
देखि कृपाल बिकल मोहि बिहँसे तब रघुबीर।
बिहँसतहीं मुख बाहेर आयउँ सुनु मतिधीर॥82(क)॥
dekhi kṛpāla bikala mohi biham̐se taba raghubīra|
biham̐satahīṃ mukha bāhera āyaum̐ sunu matidhīra||82(ka)||

दोहा 82(ख)
सोइ लरिकाई मो सन करन लगे पुनि राम।
कोटि भाँति समुझावउँ मनु न लहइ बिश्राम॥82(ख)॥
soi larikāī mo sana karana lage puni rāma|
koṭi bhām̐ti samujhāvaum̐ manu na lahai biśrāma||82(kha)||
दोहा 83#

देखि चरित यह सो प्रभुताई। समुझत देह दसा बिसराई॥
धरनि परेउँ मुख आव न बाता। त्राहि त्राहि आरत जन त्राता॥
प्रेमाकुल प्रभु मोहि बिलोकी। निज माया प्रभुता तब रोकी॥
कर सरोज प्रभु मम सिर धरेऊ। दीनदयाल सकल दुख हरेऊ॥
कीन्ह राम मोहि बिगत बिमोहा। सेवक सुखद कृपा संदोहा॥
प्रभुता प्रथम बिचारि बिचारी। मन महँ होइ हरष अति भारी॥
भगत बछलता प्रभु कै देखी। उपजी मम उर प्रीति बिसेषी॥
सजल नयन पुलकित कर जोरी। कीन्हिउँ बहु बिधि बिनय बहोरी॥

dekhi carita yaha so prabhutāī| samujhata deha dasā bisarāī||
dharani pareum̐ mukha āva na bātā| trāhi trāhi ārata jana trātā||
premākula prabhu mohi bilokī| nija māyā prabhutā taba rokī||
kara saroja prabhu mama sira dhareū| dīnadayāla sakala dukha hareū||
kīnha rāma mohi bigata bimohā| sevaka sukhada kṛpā saṃdohā||
prabhutā prathama bicāri bicārī| mana maham̐ hoi haraṣa ati bhārī||
bhagata bachalatā prabhu kai dekhī| upajī mama ura prīti biseṣī||
sajala nayana pulakita kara jorī| kīnhium̐ bahu bidhi binaya bahorī||

दोहा 83(क)
सुनि सप्रेम मम बानी देखि दीन निज दास।
बचन सुखद गंभीर मृदु बोले रमानिवास॥83(क)॥
suni saprema mama bānī dekhi dīna nija dāsa|
bacana sukhada gaṃbhīra mṛdu bole ramānivāsa||83(ka)||

दोहा 83(ख)
काकभसुंडि मागु बर अति प्रसन्न मोहि जानि।
अनिमादिक सिधि अपर रिधि मोच्छ सकल सुख खानि॥83(ख)॥
kākabhasuṃḍi māgu bara ati prasanna mohi jāni|
animādika sidhi apara ridhi moccha sakala sukha khāni||83(kha)||
दोहा 84#

ग्यान बिबेक बिरति बिग्याना। मुनि दुर्लभ गुन जे जग नाना॥
आजु देउँ सब संसय नाहीं। मागु जो तोहि भाव मन माहीं॥
सुनि प्रभु बचन अधिक अनुरागेउँ। मन अनुमान करन तब लागेऊँ॥
प्रभु कह देन सकल सुख सही। भगति आपनी देन न कही॥
भगति हीन गुन सब सुख ऐसे। लवन बिना बहु बिंजन जैसे॥
भजन हीन सुख कवने काजा। अस बिचारि बोलेउँ खगराजा॥
जौं प्रभु होइ प्रसन्न बर देहू। मो पर करहु कृपा अरु नेहू॥
मन भावत बर मागउँ स्वामी। तुम्ह उदार उर अंतरजामी॥

gyāna bibeka birati bigyānā| muni durlabha guna je jaga nānā||
āju deum̐ saba saṃsaya nāhīṃ| māgu jo tohi bhāva mana māhīṃ||
suni prabhu bacana adhika anurāgeum̐| mana anumāna karana taba lāgeūm̐||
prabhu kaha dena sakala sukha sahī| bhagati āpanī dena na kahī||
bhagati hīna guna saba sukha aise| lavana binā bahu biṃjana jaise||
bhajana hīna sukha kavane kājā| asa bicāri boleum̐ khagarājā||
jauṃ prabhu hoi prasanna bara dehū| mo para karahu kṛpā aru nehū||
mana bhāvata bara māgaum̐ svāmī| tumha udāra ura aṃtarajāmī||

दोहा 84(क)
अबिरल भगति बिसुध्द तव श्रुति पुरान जो गाव।
जेहि खोजत जोगीस मुनि प्रभु प्रसाद कोउ पाव॥84(क)॥
abirala bhagati bisudhda tava śruti purāna jo gāva|
jehi khojata jogīsa muni prabhu prasāda kou pāva||84(ka)||

दोहा 84(ख)
भगत कल्पतरु प्रनत हित कृपा सिंधु सुख धाम।
सोइ निज भगति मोहि प्रभु देहु दया करि राम॥84(ख)॥
bhagata kalpataru pranata hita kṛpā siṃdhu sukha dhāma|
soi nija bhagati mohi prabhu dehu dayā kari rāma||84(kha)||
दोहा 85#

एवमस्तु कहि रघुकुलनायक। बोले बचन परम सुखदायक॥
सुनु बायस तैं सहज सयाना। काहे न मागसि अस बरदाना॥
सब सुख खानि भगति तैं मागी। नहिं जग कोउ तोहि सम बड़भागी॥
जो मुनि कोटि जतन नहिं लहहीं। जे जप जोग अनल तन दहहीं॥
रीझेउँ देखि तोरि चतुराई। मागेहु भगति मोहि अति भाई॥
सुनु बिहंग प्रसाद अब मोरें। सब सुभ गुन बसिहहिं उर तोरें॥
भगति ग्यान बिग्यान बिरागा। जोग चरित्र रहस्य बिभागा॥
जानब तैं सबही कर भेदा। मम प्रसाद नहिं साधन खेदा॥

evamastu kahi raghukulanāyaka| bole bacana parama sukhadāyaka||
sunu bāyasa taiṃ sahaja sayānā| kāhe na māgasi asa baradānā||
saba sukha khāni bhagati taiṃ māgī| nahiṃ jaga kou tohi sama baḍabhāgī||
jo muni koṭi jatana nahiṃ lahahīṃ| je japa joga anala tana dahahīṃ||
rījheum̐ dekhi tori caturāī| māgehu bhagati mohi ati bhāī||
sunu bihaṃga prasāda aba moreṃ| saba subha guna basihahiṃ ura toreṃ||
bhagati gyāna bigyāna birāgā| joga caritra rahasya bibhāgā||
jānaba taiṃ sabahī kara bhedā| mama prasāda nahiṃ sādhana khedā||

दोहा 85(क)
माया संभव भ्रम सब अब न ब्यापिहहिं तोहि।
जानेसु ब्रह्म अनादि अज अगुन गुनाकर मोहि॥85(क)॥
māyā saṃbhava bhrama saba aba na byāpihahiṃ tohi|
jānesu brahma anādi aja aguna gunākara mohi||85(ka)||

दोहा 85(ख)
मोहि भगत प्रिय संतत अस बिचारि सुनु काग।
कायँ बचन मन मम पद करेसु अचल अनुराग॥85(ख)॥
mohi bhagata priya saṃtata asa bicāri sunu kāga|
kāyam̐ bacana mana mama pada karesu acala anurāga||85(kha)||
दोहा 86#

अब सुनु परम बिमल मम बानी। सत्य सुगम निगमादि बखानी॥
निज सिद्धांत सुनावउँ तोही। सुनु मन धरु सब तजि भजु मोही॥
मम माया संभव संसारा। जीव चराचर बिबिधि प्रकारा॥
सब मम प्रिय सब मम उपजाए। सब ते अधिक मनुज मोहि भाए॥
तिन्ह महँ द्विज द्विज महँ श्रुतिधारी। तिन्ह महुँ निगम धरम अनुसारी॥
तिन्ह महँ प्रिय बिरक्त पुनि ग्यानी। ग्यानिहु ते अति प्रिय बिग्यानी॥
तिन्ह ते पुनि मोहि प्रिय निज दासा। जेहि गति मोरि न दूसरि आसा॥
पुनि पुनि सत्य कहउँ तोहि पाहीं। मोहि सेवक सम प्रिय कोउ नाहीं॥
भगति हीन बिरंचि किन होई। सब जीवहु सम प्रिय मोहि सोई॥
भगतिवंत अति नीचउ प्रानी। मोहि प्रानप्रिय असि मम बानी॥

aba sunu parama bimala mama bānī| satya sugama nigamādi bakhānī||
nija siddhāṃta sunāvaum̐ tohī| sunu mana dharu saba taji bhaju mohī||
mama māyā saṃbhava saṃsārā| jīva carācara bibidhi prakārā||
saba mama priya saba mama upajāe| saba te adhika manuja mohi bhāe||
tinha maham̐ dvija dvija maham̐ śrutidhārī| tinha mahum̐ nigama dharama anusārī||
tinha maham̐ priya birakta puni gyānī| gyānihu te ati priya bigyānī||
tinha te puni mohi priya nija dāsā| jehi gati mori na dūsari āsā||
puni puni satya kahaum̐ tohi pāhīṃ| mohi sevaka sama priya kou nāhīṃ||
bhagati hīna biraṃci kina hoī| saba jīvahu sama priya mohi soī||
bhagativaṃta ati nīcau prānī| mohi prānapriya asi mama bānī||

दोहा 86
सुचि सुसील सेवक सुमति प्रिय कहु काहि न लाग।
श्रुति पुरान कह नीति असि सावधान सुनु काग॥86॥
suci susīla sevaka sumati priya kahu kāhi na lāga|
śruti purāna kaha nīti asi sāvadhāna sunu kāga||86||
दोहा 87#

एक पिता के बिपुल कुमारा। होहिं पृथक गुन सील अचारा॥
कोउ पंडिंत कोउ तापस ग्याता। कोउ धनवंत सूर कोउ दाता॥
कोउ सर्बग्य धर्मरत कोई। सब पर पितहि प्रीति सम होई॥
कोउ पितु भगत बचन मन कर्मा। सपनेहुँ जान न दूसर धर्मा॥
सो सुत प्रिय पितु प्रान समाना। जद्यपि सो सब भाँति अयाना॥
एहि बिधि जीव चराचर जेते। त्रिजग देव नर असुर समेते॥
अखिल बिस्व यह मोर उपाया। सब पर मोहि बराबरि दाया॥
तिन्ह महँ जो परिहरि मद माया। भजै मोहि मन बच अरू काया॥

eka pitā ke bipula kumārā| hohiṃ pṛthaka guna sīla acārā||
kou paṃḍiṃta kou tāpasa gyātā| kou dhanavaṃta sūra kou dātā||
kou sarbagya dharmarata koī| saba para pitahi prīti sama hoī||
kou pitu bhagata bacana mana karmā| sapanehum̐ jāna na dūsara dharmā||
so suta priya pitu prāna samānā| jadyapi so saba bhām̐ti ayānā||
ehi bidhi jīva carācara jete| trijaga deva nara asura samete||
akhila bisva yaha mora upāyā| saba para mohi barābari dāyā||
tinha maham̐ jo parihari mada māyā| bhajai mohi mana baca arū kāyā||

दोहा 87(क)
पुरूष नपुंसक नारि वा जीव चराचर कोइ।
सर्ब भाव भज कपट तजि मोहि परम प्रिय सोइ॥87(क)॥
purūṣa napuṃsaka nāri vā jīva carācara koi|
sarba bhāva bhaja kapaṭa taji mohi parama priya soi||87(ka)||

सोरठा 87(ख)
सत्य कहउँ खग तोहि सुचि सेवक मम प्रानप्रिय।
अस बिचारि भजु मोहि परिहरि आस भरोस सब॥87(ख)॥
satya kahaum̐ khaga tohi suci sevaka mama prānapriya|
asa bicāri bhaju mohi parihari āsa bharosa saba||87(kha)||
सोरठा 88#

कबहूँ काल न ब्यापिहि तोही। सुमिरेसु भजेसु निरंतर मोही॥
प्रभु बचनामृत सुनि न अघाऊँ। तनु पुलकित मन अति हरषाऊँ॥
सो सुख जानइ मन अरु काना। नहिं रसना पहिं जाइ बखाना॥
प्रभु सोभा सुख जानहिं नयना। कहि किमि सकहिं तिन्हहि नहिं बयना॥
बहु बिधि मोहि प्रबोधि सुख देई। लगे करन सिसु कौतुक तेई॥
सजल नयन कछु मुख करि रूखा। चितइ मातु लागी अति भूखा॥
देखि मातु आतुर उठि धाई। कहि मृदु बचन लिए उर लाई॥
गोद राखि कराव पय पाना। रघुपति चरित ललित कर गाना॥

kabahūm̐ kāla na byāpihi tohī| sumiresu bhajesu niraṃtara mohī||
prabhu bacanāmṛta suni na aghāūm̐| tanu pulakita mana ati haraṣāūm̐||
so sukha jānai mana aru kānā| nahiṃ rasanā pahiṃ jāi bakhānā||
prabhu sobhā sukha jānahiṃ nayanā| kahi kimi sakahiṃ tinhahi nahiṃ bayanā||
bahu bidhi mohi prabodhi sukha deī| lage karana sisu kautuka teī||
sajala nayana kachu mukha kari rūkhā| citai mātu lāgī ati bhūkhā||
dekhi mātu ātura uṭhi dhāī| kahi mṛdu bacana lie ura lāī||
goda rākhi karāva paya pānā| raghupati carita lalita kara gānā||

सोरठा 88(क)
जेहि सुख लागि पुरारि असुभ बेष कृत सिव सुखद।
अवधपुरी नर नारि तेहि सुख महुँ संतत मगन॥88(क)॥
jehi sukha lāgi purāri asubha beṣa kṛta siva sukhada|
avadhapurī nara nāri tehi sukha mahum̐ saṃtata magana||88(ka)||

सोरठा 88(ख)
सोइ सुख लवलेस जिन्ह बारक सपनेहुँ लहेउ।
ते नहिं गनहिं खगेस ब्रह्मसुखहि सज्जन सुमति॥88(ख)॥
soi sukha lavalesa jinha bāraka sapanehum̐ laheu|
te nahiṃ ganahiṃ khagesa brahmasukhahi sajjana sumati||88(kha)||
सोरठा 89#

मैं पुनि अवध रहेउँ कछु काला। देखेउँ बालबिनोद रसाला॥
राम प्रसाद भगति बर पायउँ। प्रभु पद बंदि निजाश्रम आयउँ॥
तब ते मोहि न ब्यापी माया। जब ते रघुनायक अपनाया॥
यह सब गुप्त चरित मैं गावा। हरि मायाँ जिमि मोहि नचावा॥
निज अनुभव अब कहउँ खगेसा। बिनु हरि भजन न जाहि कलेसा॥
राम कृपा बिनु सुनु खगराई। जानि न जाइ राम प्रभुताई॥
जानें बिनु न होइ परतीती। बिनु परतीति होइ नहिं प्रीती॥
प्रीति बिना नहिं भगति दिढ़ाई। जिमि खगपति जल कै चिकनाई॥

maiṃ puni avadha raheum̐ kachu kālā| dekheum̐ bālabinoda rasālā||
rāma prasāda bhagati bara pāyaum̐| prabhu pada baṃdi nijāśrama āyaum̐||
taba te mohi na byāpī māyā| jaba te raghunāyaka apanāyā||
yaha saba gupta carita maiṃ gāvā| hari māyām̐ jimi mohi nacāvā||
nija anubhava aba kahaum̐ khagesā| binu hari bhajana na jāhi kalesā||
rāma kṛpā binu sunu khagarāī| jāni na jāi rāma prabhutāī||
jāneṃ binu na hoi paratītī| binu paratīti hoi nahiṃ prītī||
prīti binā nahiṃ bhagati diḍhāī| jimi khagapati jala kai cikanāī||

सोरठा 89(क)
बिनु गुर होइ कि ग्यान ग्यान कि होइ बिराग बिनु।
गावहिं बेद पुरान सुख कि लहिअ हरि भगति बिनु॥89(क)॥
binu gura hoi ki gyāna gyāna ki hoi birāga binu|
gāvahiṃ beda purāna sukha ki lahia hari bhagati binu||89(ka)||

सोरठा 89(ख)
कोउ बिश्राम कि पाव तात सहज संतोष बिनु।
चलै कि जल बिनु नाव कोटि जतन पचि पचि मरिअ॥89(ख)॥
kou biśrāma ki pāva tāta sahaja saṃtoṣa binu|
calai ki jala binu nāva koṭi jatana paci paci maria||89(kha)||
दोहा 90#

बिनु संतोष न काम नसाहीं। काम अछत सुख सपनेहुँ नाहीं॥
राम भजन बिनु मिटहिं कि कामा। थल बिहीन तरु कबहुँ कि जामा॥
बिनु बिग्यान कि समता आवइ। कोउ अवकास कि नभ बिनु पावइ॥
श्रद्धा बिना धर्म नहिं होई। बिनु महि गंध कि पावइ कोई॥
बिनु तप तेज कि कर बिस्तारा। जल बिनु रस कि होइ संसारा॥
सील कि मिल बिनु बुध सेवकाई। जिमि बिनु तेज न रूप गोसाई॥
निज सुख बिनु मन होइ कि थीरा। परस कि होइ बिहीन समीरा॥
कवनिउ सिद्धि कि बिनु बिस्वासा। बिनु हरि भजन न भव भय नासा॥

binu saṃtoṣa na kāma nasāhīṃ| kāma achata sukha sapanehum̐ nāhīṃ||
rāma bhajana binu miṭahiṃ ki kāmā| thala bihīna taru kabahum̐ ki jāmā||
binu bigyāna ki samatā āvai| kou avakāsa ki nabha binu pāvai||
śraddhā binā dharma nahiṃ hoī| binu mahi gaṃdha ki pāvai koī||
binu tapa teja ki kara bistārā| jala binu rasa ki hoi saṃsārā||
sīla ki mila binu budha sevakāī| jimi binu teja na rūpa gosāī||
nija sukha binu mana hoi ki thīrā| parasa ki hoi bihīna samīrā||
kavaniu siddhi ki binu bisvāsā| binu hari bhajana na bhava bhaya nāsā||

दोहा 90(क)
बिनु बिस्वास भगति नहिं तेहि बिनु द्रवहिं न रामु।
राम कृपा बिनु सपनेहुँ जीव न लह बिश्रामु॥90(क)॥
binu bisvāsa bhagati nahiṃ tehi binu dravahiṃ na rāmu|
rāma kṛpā binu sapanehum̐ jīva na laha biśrāmu||90(ka)||

सोरठा 90(ख)
अस बिचारि मतिधीर तजि कुतर्क संसय सकल।
भजहु राम रघुबीर करुनाकर सुंदर सुखद॥90(ख)॥
asa bicāri matidhīra taji kutarka saṃsaya sakala|
bhajahu rāma raghubīra karunākara suṃdara sukhada||90(kha)||
दोहा 91#

निज मति सरिस नाथ मैं गाई। प्रभु प्रताप महिमा खगराई॥
कहेउँ न कछु करि जुगुति बिसेषी। यह सब मैं निज नयनन्हि देखी॥
महिमा नाम रूप गुन गाथा। सकल अमित अनंत रघुनाथा॥
निज निज मति मुनि हरि गुन गावहिं। निगम सेष सिव पार न पावहिं॥
तुम्हहि आदि खग मसक प्रजंता। नभ उड़ाहिं नहिं पावहिं अंता॥
तिमि रघुपति महिमा अवगाहा। तात कबहुँ कोउ पाव कि थाहा॥
रामु काम सत कोटि सुभग तन। दुर्गा कोटि अमित अरि मर्दन॥
सक्र कोटि सत सरिस बिलासा। नभ सत कोटि अमित अवकासा॥

nija mati sarisa nātha maiṃ gāī| prabhu pratāpa mahimā khagarāī||
kaheum̐ na kachu kari juguti biseṣī| yaha saba maiṃ nija nayananhi dekhī||
mahimā nāma rūpa guna gāthā| sakala amita anaṃta raghunāthā||
nija nija mati muni hari guna gāvahiṃ| nigama seṣa siva pāra na pāvahiṃ||
tumhahi ādi khaga masaka prajaṃtā| nabha uḍāhiṃ nahiṃ pāvahiṃ aṃtā||
timi raghupati mahimā avagāhā| tāta kabahum̐ kou pāva ki thāhā||
rāmu kāma sata koṭi subhaga tana| durgā koṭi amita ari mardana||
sakra koṭi sata sarisa bilāsā| nabha sata koṭi amita avakāsā||

दोहा 91(क)
मरुत कोटि सत बिपुल बल रबि सत कोटि प्रकास।
ससि सत कोटि सुसीतल समन सकल भव त्रास॥91(क)॥
maruta koṭi sata bipula bala rabi sata koṭi prakāsa|
sasi sata koṭi susītala samana sakala bhava trāsa||91(ka)||

दोहा 91(ख)
काल कोटि सत सरिस अति दुस्तर दुर्ग दुरंत।
धूमकेतु सत कोटि सम दुराधरष भगवंत॥91(ख)॥
kāla koṭi sata sarisa ati dustara durga duraṃta|
dhūmaketu sata koṭi sama durādharaṣa bhagavaṃta||91(kha)||
दोहा 92#

प्रभु अगाध सत कोटि पताला। समन कोटि सत सरिस कराला॥
तीरथ अमित कोटि सम पावन। नाम अखिल अघ पूग नसावन॥
हिमगिरि कोटि अचल रघुबीरा। सिंधु कोटि सत सम गंभीरा॥
कामधेनु सत कोटि समाना। सकल काम दायक भगवाना॥
सारद कोटि अमित चतुराई। बिधि सत कोटि सृष्टि निपुनाई॥
बिष्नु कोटि सम पालन कर्ता। रुद्र कोटि सत सम संहर्ता॥
धनद कोटि सत सम धनवाना। माया कोटि प्रपंच निधाना॥
भार धरन सत कोटि अहीसा। निरवधि निरुपम प्रभु जगदीसा॥

prabhu agādha sata koṭi patālā| samana koṭi sata sarisa karālā||
tīratha amita koṭi sama pāvana| nāma akhila agha pūga nasāvana||
himagiri koṭi acala raghubīrā| siṃdhu koṭi sata sama gaṃbhīrā||
kāmadhenu sata koṭi samānā| sakala kāma dāyaka bhagavānā||
sārada koṭi amita caturāī| bidhi sata koṭi sṛṣṭi nipunāī||
biṣnu koṭi sama pālana kartā| rudra koṭi sata sama saṃhartā||
dhanada koṭi sata sama dhanavānā| māyā koṭi prapaṃca nidhānā||
bhāra dharana sata koṭi ahīsā| niravadhi nirupama prabhu jagadīsā||

छंद
निरुपम न उपमा आन राम समान रामु निगम कहै।
जिमि कोटि सत खद्योत सम रबि कहत अति लघुता लहै॥
एहि भाँति निज निज मति बिलास मुनिस हरिहि बखानहीं।
प्रभु भाव गाहक अति कृपाल सप्रेम सुनि सुख मानहीं॥
nirupama na upamā āna rāma samāna rāmu nigama kahai|
jimi koṭi sata khadyota sama rabi kahata ati laghutā lahai||
ehi bhām̐ti nija nija mati bilāsa munisa harihi bakhānahīṃ|
prabhu bhāva gāhaka ati kṛpāla saprema suni sukha mānahīṃ||

दोहा 92(क)
रामु अमित गुन सागर थाह कि पावइ कोइ।
संतन्ह सन जस किछु सुनेउँ तुम्हहि सुनायउँ सोइ॥92(क)॥
rāmu amita guna sāgara thāha ki pāvai koi|
saṃtanha sana jasa kichu suneum̐ tumhahi sunāyaum̐ soi||92(ka)||

सोरठा 92(ख)
भाव बस्य भगवान सुख निधान करुना भवन।
तजि ममता मद मान भजिअ सदा सीता रवन॥92(ख)॥
bhāva basya bhagavāna sukha nidhāna karunā bhavana|
taji mamatā mada māna bhajia sadā sītā ravana||92(kha)||
दोहा 93#

सुनि भुसुंडि के बचन सुहाए। हरषित खगपति पंख फुलाए॥
नयन नीर मन अति हरषाना। श्रीरघुपति प्रताप उर आना॥
पाछिल मोह समुझि पछिताना। ब्रह्म अनादि मनुज करि माना॥
पुनि पुनि काग चरन सिरु नावा। जानि राम सम प्रेम बढ़ावा॥
गुर बिनु भव निधि तरइ न कोई। जौं बिरंचि संकर सम होई॥
संसय सर्प ग्रसेउ मोहि ताता। दुखद लहरि कुतर्क बहु ब्राता॥
तव सरूप गारुड़ि रघुनायक। मोहि जिआयउ जन सुखदायक॥
तव प्रसाद मम मोह नसाना। राम रहस्य अनूपम जाना॥

suni bhusuṃḍi ke bacana suhāe| haraṣita khagapati paṃkha phulāe||
nayana nīra mana ati haraṣānā| śrīraghupati pratāpa ura ānā||
pāchila moha samujhi pachitānā| brahma anādi manuja kari mānā||
puni puni kāga carana siru nāvā| jāni rāma sama prema baḍhāvā||
gura binu bhava nidhi tarai na koī| jauṃ biraṃci saṃkara sama hoī||
saṃsaya sarpa graseu mohi tātā| dukhada lahari kutarka bahu brātā||
tava sarūpa gāruḍi raghunāyaka| mohi jiāyau jana sukhadāyaka||
tava prasāda mama moha nasānā| rāma rahasya anūpama jānā||

दोहा 93(क)
ताहि प्रसंसि बिबिध बिधि सीस नाइ कर जोरि।
बचन बिनीत सप्रेम मृदु बोलेउ गरुड़ बहोरि॥93(क)॥
tāhi prasaṃsi bibidha bidhi sīsa nāi kara jori|
bacana binīta saprema mṛdu boleu garuḍa bahori||93(ka)||

दोहा 93(ख)
प्रभु अपने अबिबेक ते बूझउँ स्वामी तोहि।
कृपासिंधु सादर कहहु जानि दास निज मोहि॥93(ख)॥
prabhu apane abibeka te būjhaum̐ svāmī tohi|
kṛpāsiṃdhu sādara kahahu jāni dāsa nija mohi||93(kha)||
सोरठा 94#

तुम्ह सर्बग्य तन्य तम पारा। सुमति सुसील सरल आचारा॥
ग्यान बिरति बिग्यान निवासा। रघुनायक के तुम्ह प्रिय दासा॥
कारन कवन देह यह पाई। तात सकल मोहि कहहु बुझाई॥
राम चरित सर सुंदर स्वामी। पायहु कहाँ कहहु नभगामी॥
नाथ सुना मैं अस सिव पाहीं। महा प्रलयहुँ नास तव नाहीं॥
मुधा बचन नहिं ईस्वर कहई। सोउ मोरें मन संसय अहई॥
अग जग जीव नाग नर देवा। नाथ सकल जगु काल कलेवा॥
अंड कटाह अमित लय कारी। कालु सदा दुरतिक्रम भारी॥

tumha sarbagya tanya tama pārā| sumati susīla sarala ācārā||
gyāna birati bigyāna nivāsā| raghunāyaka ke tumha priya dāsā||
kārana kavana deha yaha pāī| tāta sakala mohi kahahu bujhāī||
rāma carita sara suṃdara svāmī| pāyahu kahām̐ kahahu nabhagāmī||
nātha sunā maiṃ asa siva pāhīṃ| mahā pralayahum̐ nāsa tava nāhīṃ||
mudhā bacana nahiṃ īsvara kahaī| sou moreṃ mana saṃsaya ahaī||
aga jaga jīva nāga nara devā| nātha sakala jagu kāla kalevā||
aṃḍa kaṭāha amita laya kārī| kālu sadā duratikrama bhārī||

सोरठा 94(क)
तुम्हहि न ब्यापत काल अति कराल कारन कवन।
मोहि सो कहहु कृपाल ग्यान प्रभाव कि जोग बल॥94(क)॥
tumhahi na byāpata kāla ati karāla kārana kavana|
mohi so kahahu kṛpāla gyāna prabhāva ki joga bala||94(ka)||

दोहा 94(ख)
प्रभु तव आश्रम आएँ मोर मोह भ्रम भाग।
कारन कवन सो नाथ सब कहहु सहित अनुराग॥94(ख)॥
prabhu tava āśrama āem̐ mora moha bhrama bhāga|
kārana kavana so nātha saba kahahu sahita anurāga||94(kha)||
सोरठा 95#

गरुड़ गिरा सुनि हरषेउ कागा। बोलेउ उमा परम अनुरागा॥
धन्य धन्य तव मति उरगारी। प्रस्न तुम्हारि मोहि अति प्यारी॥
सुनि तव प्रस्न सप्रेम सुहाई। बहुत जनम कै सुधि मोहि आई॥
सब निज कथा कहउँ मैं गाई। तात सुनहु सादर मन लाई॥
जप तप मख सम दम ब्रत दाना। बिरति बिबेक जोग बिग्याना॥
सब कर फल रघुपति पद प्रेमा। तेहि बिनु कोउ न पावइ छेमा॥
एहि तन राम भगति मैं पाई। ताते मोहि ममता अधिकाई॥
जेहि तें कछु निज स्वारथ होई। तेहि पर ममता कर सब कोई॥

garuḍa girā suni haraṣeu kāgā| boleu umā parama anurāgā||
dhanya dhanya tava mati uragārī| prasna tumhāri mohi ati pyārī||
suni tava prasna saprema suhāī| bahuta janama kai sudhi mohi āī||
saba nija kathā kahaum̐ maiṃ gāī| tāta sunahu sādara mana lāī||
japa tapa makha sama dama brata dānā| birati bibeka joga bigyānā||
saba kara phala raghupati pada premā| tehi binu kou na pāvai chemā||
ehi tana rāma bhagati maiṃ pāī| tāte mohi mamatā adhikāī||
jehi teṃ kachu nija svāratha hoī| tehi para mamatā kara saba koī||

सोरठा 95(क)
पन्नगारि असि नीति श्रुति संमत सज्जन कहहिं।
अति नीचहु सन प्रीति करिअ जानि निज परम हित॥95(क)॥
pannagāri asi nīti śruti saṃmata sajjana kahahiṃ|
ati nīcahu sana prīti karia jāni nija parama hita||95(ka)||

सोरठा 95(ख)
पाट कीट तें होइ तेहि तें पाटंबर रुचिर।
कृमि पालइ सबु कोइ परम अपावन प्रान सम॥95(ख)॥
pāṭa kīṭa teṃ hoi tehi teṃ pāṭaṃbara rucira|
kṛmi pālai sabu koi parama apāvana prāna sama||95(kha)||
दोहा 96#

स्वारथ साँच जीव कहुँ एहा। मन क्रम बचन राम पद नेहा॥
सोइ पावन सोइ सुभग सरीरा। जो तनु पाइ भजिअ रघुबीरा॥
राम बिमुख लहि बिधि सम देही। कबि कोबिद न प्रसंसहिं तेही॥
राम भगति एहिं तन उर जामी। ताते मोहि परम प्रिय स्वामी॥
तजउँ न तन निज इच्छा मरना। तन बिनु बेद भजन नहिं बरना॥
प्रथम मोहँ मोहि बहुत बिगोवा। राम बिमुख सुख कबहुँ न सोवा॥
नाना जनम कर्म पुनि नाना। किए जोग जप तप मख दाना॥
कवन जोनि जनमेउँ जहँ नाहीं। मैं खगेस भ्रमि भ्रमि जग माहीं॥
देखेउँ करि सब करम गोसाई। सुखी न भयउँ अबहिं की नाई॥
सुधि मोहि नाथ जन्म बहु केरी। सिव प्रसाद मति मोहँ न घेरी॥

svāratha sām̐ca jīva kahum̐ ehā| mana krama bacana rāma pada nehā||
soi pāvana soi subhaga sarīrā| jo tanu pāi bhajia raghubīrā||
rāma bimukha lahi bidhi sama dehī| kabi kobida na prasaṃsahiṃ tehī||
rāma bhagati ehiṃ tana ura jāmī| tāte mohi parama priya svāmī||
tajaum̐ na tana nija icchā maranā| tana binu beda bhajana nahiṃ baranā||
prathama moham̐ mohi bahuta bigovā| rāma bimukha sukha kabahum̐ na sovā||
nānā janama karma puni nānā| kie joga japa tapa makha dānā||
kavana joni janameum̐ jaham̐ nāhīṃ| maiṃ khagesa bhrami bhrami jaga māhīṃ||
dekheum̐ kari saba karama gosāī| sukhī na bhayaum̐ abahiṃ kī nāī||
sudhi mohi nātha janma bahu kerī| siva prasāda mati moham̐ na gherī||

दोहा 96(क)
प्रथम जन्म के चरित अब कहउँ सुनहु बिहगेस।
सुनि प्रभु पद रति उपजइ जातें मिटहिं कलेस॥96(क)॥
prathama janma ke carita aba kahaum̐ sunahu bihagesa|
suni prabhu pada rati upajai jāteṃ miṭahiṃ kalesa||96(ka)||

दोहा 96(ख)
पूरुब कल्प एक प्रभु जुग कलिजुग मल मूल॥
नर अरु नारि अधर्म रत सकल निगम प्रतिकूल॥96(ख)॥
pūruba kalpa eka prabhu juga kalijuga mala mūla||
nara aru nāri adharma rata sakala nigama pratikūla||96(kha)||
दोहा 97#

तेहि कलिजुग कोसलपुर जाई। जन्मत भयउँ सूद्र तनु पाई॥
सिव सेवक मन क्रम अरु बानी। आन देव निंदक अभिमानी॥
धन मद मत्त परम बाचाला। उग्रबुद्धि उर दंभ बिसाला॥
जदपि रहेउँ रघुपति रजधानी। तदपि न कछु महिमा तब जानी॥
अब जाना मैं अवध प्रभावा। निगमागम पुरान अस गावा॥
कवनेहुँ जन्म अवध बस जोई। राम परायन सो परि होई॥
अवध प्रभाव जान तब प्रानी। जब उर बसहिं रामु धनुपानी॥
सो कलिकाल कठिन उरगारी। पाप परायन सब नर नारी॥

tehi kalijuga kosalapura jāī| janmata bhayaum̐ sūdra tanu pāī||
siva sevaka mana krama aru bānī| āna deva niṃdaka abhimānī||
dhana mada matta parama bācālā| ugrabuddhi ura daṃbha bisālā||
jadapi raheum̐ raghupati rajadhānī| tadapi na kachu mahimā taba jānī||
aba jānā maiṃ avadha prabhāvā| nigamāgama purāna asa gāvā||
kavanehum̐ janma avadha basa joī| rāma parāyana so pari hoī||
avadha prabhāva jāna taba prānī| jaba ura basahiṃ rāmu dhanupānī||
so kalikāla kaṭhina uragārī| pāpa parāyana saba nara nārī||

दोहा 97(क)
कलिमल ग्रसे धर्म सब लुप्त भए सदग्रंथ।
दंभिन्ह निज मति कल्पि करि प्रगट किए बहु पंथ॥97(क)॥
kalimala grase dharma saba lupta bhae sadagraṃtha|
daṃbhinha nija mati kalpi kari pragaṭa kie bahu paṃtha||97(ka)||

दोहा 97(ख)
भए लोग सब मोहबस लोभ ग्रसे सुभ कर्म।
सुनु हरिजान ग्यान निधि कहउँ कछुक कलिधर्म॥97(ख)॥
bhae loga saba mohabasa lobha grase subha karma|
sunu harijāna gyāna nidhi kahaum̐ kachuka kalidharma||97(kha)||
दोहा 98#

बरन धर्म नहिं आश्रम चारी। श्रुति बिरोध रत सब नर नारी॥
द्विज श्रुति बेचक भूप प्रजासन। कोउ नहिं मान निगम अनुसासन॥
मारग सोइ जा कहुँ जोइ भावा। पंडित सोइ जो गाल बजावा॥
मिथ्यारंभ दंभ रत जोई। ता कहुँ संत कहइ सब कोई॥
सोइ सयान जो परधन हारी। जो कर दंभ सो बड़ आचारी॥
जौ कह झूँठ मसखरी जाना। कलिजुग सोइ गुनवंत बखाना॥
निराचार जो श्रुति पथ त्यागी। कलिजुग सोइ ग्यानी सो बिरागी॥
जाकें नख अरु जटा बिसाला। सोइ तापस प्रसिद्ध कलिकाला॥

barana dharma nahiṃ āśrama cārī| śruti birodha rata saba nara nārī||
dvija śruti becaka bhūpa prajāsana| kou nahiṃ māna nigama anusāsana||
māraga soi jā kahum̐ joi bhāvā| paṃḍita soi jo gāla bajāvā||
mithyāraṃbha daṃbha rata joī| tā kahum̐ saṃta kahai saba koī||
soi sayāna jo paradhana hārī| jo kara daṃbha so baḍa ācārī||
jau kaha jhūm̐ṭha masakharī jānā| kalijuga soi gunavaṃta bakhānā||
nirācāra jo śruti patha tyāgī| kalijuga soi gyānī so birāgī||
jākeṃ nakha aru jaṭā bisālā| soi tāpasa prasiddha kalikālā||

दोहा 98(क)
असुभ बेष भूषन धरें भच्छाभच्छ जे खाहिं।
तेइ जोगी तेइ सिद्ध नर पूज्य ते कलिजुग माहिं॥98(क)॥
asubha beṣa bhūṣana dhareṃ bhacchābhaccha je khāhiṃ|
tei jogī tei siddha nara pūjya te kalijuga māhiṃ||98(ka)||

सोरठा 98(ख)
जे अपकारी चार तिन्ह कर गौरव मान्य तेइ।
मन क्रम बचन लबार तेइ बकता कलिकाल महुँ॥98(ख)॥
je apakārī cāra tinha kara gaurava mānya tei|
mana krama bacana labāra tei bakatā kalikāla mahum̐||98(kha)||
दोहा 99#

नारि बिबस नर सकल गोसाई। नाचहिं नट मर्कट की नाई॥
सूद्र द्विजन्ह उपदेसहिं ग्याना। मेलि जनेऊ लेहिं कुदाना॥
सब नर काम लोभ रत क्रोधी। देव बिप्र श्रुति संत बिरोधी॥
गुन मंदिर सुंदर पति त्यागी। भजहिं नारि पर पुरुष अभागी॥
सौभागिनीं बिभूषन हीना। बिधवन्ह के सिंगार नबीना॥
गुर सिष बधिर अंध का लेखा। एक न सुनइ एक नहिं देखा॥
हरइ सिष्य धन सोक न हरई। सो गुर घोर नरक महुँ परई॥
मातु पिता बालकन्हि बोलाबहिं। उदर भरै सोइ धर्म सिखावहिं॥

nāri bibasa nara sakala gosāī| nācahiṃ naṭa markaṭa kī nāī||
sūdra dvijanha upadesahiṃ gyānā| meli janeū lehiṃ kudānā||
saba nara kāma lobha rata krodhī| deva bipra śruti saṃta birodhī||
guna maṃdira suṃdara pati tyāgī| bhajahiṃ nāri para puruṣa abhāgī||
saubhāginīṃ bibhūṣana hīnā| bidhavanha ke siṃgāra nabīnā||
gura siṣa badhira aṃdha kā lekhā| eka na sunai eka nahiṃ dekhā||
harai siṣya dhana soka na haraī| so gura ghora naraka mahum̐ paraī||
mātu pitā bālakanhi bolābahiṃ| udara bharai soi dharma sikhāvahiṃ||

दोहा 99(क)
ब्रह्म ग्यान बिनु नारि नर कहहिं न दूसरि बात।
कौड़ी लागि लोभ बस करहिं बिप्र गुर घात॥99(क)॥
brahma gyāna binu nāri nara kahahiṃ na dūsari bāta|
kauḍī lāgi lobha basa karahiṃ bipra gura ghāta||99(ka)||

दोहा 99(ख)
बादहिं सूद्र द्विजन्ह सन हम तुम्ह ते कछु घाटि।
जानइ ब्रह्म सो बिप्रबर आँखि देखावहिं डाटि॥99(ख)॥
bādahiṃ sūdra dvijanha sana hama tumha te kachu ghāṭi|
jānai brahma so biprabara ām̐khi dekhāvahiṃ ḍāṭi||99(kha)||
दोहा 100#

पर त्रिय लंपट कपट सयाने। मोह द्रोह ममता लपटाने॥
तेइ अभेदबादी ग्यानी नर। देखा में चरित्र कलिजुग कर॥
आपु गए अरु तिन्हहू घालहिं। जे कहुँ सत मारग प्रतिपालहिं॥
कल्प कल्प भरि एक एक नरका। परहिं जे दूषहिं श्रुति करि तरका॥
जे बरनाधम तेलि कुम्हारा। स्वपच किरात कोल कलवारा॥
नारि मुई गृह संपति नासी। मूड़ मुड़ाइ होहिं सन्यासी॥
ते बिप्रन्ह सन आपु पुजावहिं। उभय लोक निज हाथ नसावहिं॥
बिप्र निरच्छर लोलुप कामी। निराचार सठ बृषली स्वामी॥
सूद्र करहिं जप तप ब्रत नाना। बैठि बरासन कहहिं पुराना॥
सब नर कल्पित करहिं अचारा। जाइ न बरनि अनीति अपारा॥

para triya laṃpaṭa kapaṭa sayāne| moha droha mamatā lapaṭāne||
tei abhedabādī gyānī nara| dekhā meṃ caritra kalijuga kara||
āpu gae aru tinhahū ghālahiṃ| je kahum̐ sata māraga pratipālahiṃ||
kalpa kalpa bhari eka eka narakā| parahiṃ je dūṣahiṃ śruti kari tarakā||
je baranādhama teli kumhārā| svapaca kirāta kola kalavārā||
nāri muī gṛha saṃpati nāsī| mūḍa muḍāi hohiṃ sanyāsī||
te bipranha sana āpu pujāvahiṃ| ubhaya loka nija hātha nasāvahiṃ||
bipra niracchara lolupa kāmī| nirācāra saṭha bṛṣalī svāmī||
sūdra karahiṃ japa tapa brata nānā| baiṭhi barāsana kahahiṃ purānā||
saba nara kalpita karahiṃ acārā| jāi na barani anīti apārā||

दोहा 100(क)
भए बरन संकर कलि भिन्नसेतु सब लोग।
करहिं पाप पावहिं दुख भय रुज सोक बियोग॥100(क)॥
bhae barana saṃkara kali bhinnasetu saba loga|
karahiṃ pāpa pāvahiṃ dukha bhaya ruja soka biyoga||100(ka)||

दोहा 100(ख)
श्रुति संमत हरि भक्ति पथ संजुत बिरति बिबेक।
तेहि न चलहिं नर मोह बस कल्पहिं पंथ अनेक॥100(ख)॥
śruti saṃmata hari bhakti patha saṃjuta birati bibeka|
tehi na calahiṃ nara moha basa kalpahiṃ paṃtha aneka||100(kha)||
दोहा 101#

छंद
बहु दाम सँवारहिं धाम जती। बिषया हरि लीन्हि न रहि बिरती॥
तपसी धनवंत दरिद्र गृही। कलि कौतुक तात न जात कही॥
कुलवंति निकारहिं नारि सती। गृह आनहिं चेरि निबेरि गती॥
सुत मानहिं मातु पिता तब लौं। अबलानन दीख नहीं जब लौं॥
bahu dāma sam̐vārahiṃ dhāma jatī| biṣayā hari līnhi na rahi biratī||
tapasī dhanavaṃta daridra gṛhī| kali kautuka tāta na jāta kahī||
kulavaṃti nikārahiṃ nāri satī| gṛha ānahiṃ ceri niberi gatī||
suta mānahiṃ mātu pitā taba lauṃ| abalānana dīkha nahīṃ jaba lauṃ||

छंद
ससुरारि पिआरि लगी जब तें। रिपरूप कुटुंब भए तब तें॥
नृप पाप परायन धर्म नहीं। करि दंड बिडंब प्रजा नितहीं॥
धनवंत कुलीन मलीन अपी। द्विज चिन्ह जनेउ उघार तपी॥
नहिं मान पुरान न बेदहि जो। हरि सेवक संत सही कलि सो।
कबि बृंद उदार दुनी न सुनी। गुन दूषक ब्रात न कोपि गुनी॥
कलि बारहिं बार दुकाल परै। बिनु अन्न दुखी सब लोग मरै॥
sasurāri piāri lagī jaba teṃ| riparūpa kuṭuṃba bhae taba teṃ||
nṛpa pāpa parāyana dharma nahīṃ| kari daṃḍa biḍaṃba prajā nitahīṃ||
dhanavaṃta kulīna malīna apī| dvija cinha janeu ughāra tapī||
nahiṃ māna purāna na bedahi jo| hari sevaka saṃta sahī kali so|
kabi bṛṃda udāra dunī na sunī| guna dūṣaka brāta na kopi gunī||
kali bārahiṃ bāra dukāla parai| binu anna dukhī saba loga marai||

दोहा 101(क)
सुनु खगेस कलि कपट हठ दंभ द्वेष पाषंड।
मान मोह मारादि मद ब्यापि रहे ब्रह्मंड॥101(क)॥
sunu khagesa kali kapaṭa haṭha daṃbha dveṣa pāṣaṃḍa|
māna moha mārādi mada byāpi rahe brahmaṃḍa||101(ka)||

दोहा 101(ख)
तामस धर्म करहिं नर जप तप ब्रत मख दान।
देव न बरषहिं धरनी बए न जामहिं धान॥101(ख)॥
tāmasa dharma karahiṃ nara japa tapa brata makha dāna|
deva na baraṣahiṃ dharanī bae na jāmahiṃ dhāna||101(kha)||
दोहा 102#

छंद
अबला कच भूषन भूरि छुधा। धनहीन दुखी ममता बहुधा॥
सुख चाहहिं मूढ़ न धर्म रता। मति थोरि कठोरि न कोमलता॥1॥
नर पीड़ित रोग न भोग कहीं। अभिमान बिरोध अकारनहीं॥
लघु जीवन संबतु पंच दसा। कलपांत न नास गुमानु असा॥2॥
abalā kaca bhūṣana bhūri chudhā| dhanahīna dukhī mamatā bahudhā||
sukha cāhahiṃ mūḍha na dharma ratā| mati thori kaṭhori na komalatā||1||
nara pīḍita roga na bhoga kahīṃ| abhimāna birodha akāranahīṃ||
laghu jīvana saṃbatu paṃca dasā| kalapāṃta na nāsa gumānu asā||2||

छंद
कलिकाल बिहाल किए मनुजा। नहिं मानत क्वौ अनुजा तनुजा।
नहिं तोष बिचार न सीतलता। सब जाति कुजाति भए मगता॥3॥
इरिषा परुषाच्छर लोलुपता। भरि पूरि रही समता बिगता॥
सब लोग बियोग बिसोक हुए। बरनाश्रम धर्म अचार गए॥4॥
kalikāla bihāla kie manujā| nahiṃ mānata kvau anujā tanujā|
nahiṃ toṣa bicāra na sītalatā| saba jāti kujāti bhae magatā||3||
iriṣā paruṣācchara lolupatā| bhari pūri rahī samatā bigatā||
saba loga biyoga bisoka hue| baranāśrama dharma acāra gae||4||

छंद
दम दान दया नहिं जानपनी। जड़ता परबंचनताति घनी॥
तनु पोषक नारि नरा सगरे। परनिंदक जे जग मो बगरे॥5॥
dama dāna dayā nahiṃ jānapanī| jaḍatā parabaṃcanatāti ghanī||
tanu poṣaka nāri narā sagare| paraniṃdaka je jaga mo bagare||5||

दोहा 102(क)
सुनु ब्यालारि काल कलि मल अवगुन आगार।
गुनउँ बहुत कलिजुग कर बिनु प्रयास निस्तार॥102(क)॥
sunu byālāri kāla kali mala avaguna āgāra|
gunaum̐ bahuta kalijuga kara binu prayāsa nistāra||102(ka)||

दोहा 102(ख)
कृतजुग त्रेताँ द्वापर पूजा मख अरु जोग।
जो गति होइ सो कलि हरि नाम ते पावहिं लोग॥102(ख)॥
kṛtajuga tretām̐ dvāpara pūjā makha aru joga|
jo gati hoi so kali hari nāma te pāvahiṃ loga||102(kha)||
दोहा 103#

कृतजुग सब जोगी बिग्यानी। करि हरि ध्यान तरहिं भव प्रानी॥
त्रेताँ बिबिध जग्य नर करहीं। प्रभुहि समर्पि कर्म भव तरहीं॥
द्वापर करि रघुपति पद पूजा। नर भव तरहिं उपाय न दूजा॥
कलिजुग केवल हरि गुन गाहा। गावत नर पावहिं भव थाहा॥
कलिजुग जोग न जग्य न ग्याना। एक अधार राम गुन गाना॥
सब भरोस तजि जो भज रामहि। प्रेम समेत गाव गुन ग्रामहि॥
सोइ भव तर कछु संसय नाहीं। नाम प्रताप प्रगट कलि माहीं॥
कलि कर एक पुनीत प्रतापा। मानस पुन्य होहिं नहिं पापा॥

kṛtajuga saba jogī bigyānī| kari hari dhyāna tarahiṃ bhava prānī||
tretām̐ bibidha jagya nara karahīṃ| prabhuhi samarpi karma bhava tarahīṃ||
dvāpara kari raghupati pada pūjā| nara bhava tarahiṃ upāya na dūjā||
kalijuga kevala hari guna gāhā| gāvata nara pāvahiṃ bhava thāhā||
kalijuga joga na jagya na gyānā| eka adhāra rāma guna gānā||
saba bharosa taji jo bhaja rāmahi| prema sameta gāva guna grāmahi||
soi bhava tara kachu saṃsaya nāhīṃ| nāma pratāpa pragaṭa kali māhīṃ||
kali kara eka punīta pratāpā| mānasa punya hohiṃ nahiṃ pāpā||

दोहा 103(क)
कलिजुग सम जुग आन नहिं जौं नर कर बिस्वास।
गाइ राम गुन गन बिमल भव तर बिनहिं प्रयास॥103(क)॥
kalijuga sama juga āna nahiṃ jauṃ nara kara bisvāsa|
gāi rāma guna gana bimala bhava tara binahiṃ prayāsa||103(ka)||

दोहा 103(ख)
प्रगट चारि पद धर्म के कलिल महुँ एक प्रधान।
जेन केन बिधि दीन्हें दान करइ कल्यान॥103(ख)॥
pragaṭa cāri pada dharma ke kalila mahum̐ eka pradhāna|
jena kena bidhi dīnheṃ dāna karai kalyāna||103(kha)||
दोहा 104#

नित जुग धर्म होहिं सब केरे। हृदयँ राम माया के प्रेरे॥
सुद्ध सत्व समता बिग्याना। कृत प्रभाव प्रसन्न मन जाना॥
सत्व बहुत रज कछु रति कर्मा। सब बिधि सुख त्रेता कर धर्मा॥
बहु रज स्वल्प सत्व कछु तामस। द्वापर धर्म हरष भय मानस॥
तामस बहुत रजोगुन थोरा। कलि प्रभाव बिरोध चहुँ ओरा॥
बुध जुग धर्म जानि मन माहीं। तजि अधर्म रति धर्म कराहीं॥
काल धर्म नहिं ब्यापहिं ताही। रघुपति चरन प्रीति अति जाही॥
नट कृत बिकट कपट खगराया। नट सेवकहि न ब्यापइ माया॥

nita juga dharma hohiṃ saba kere| hṛdayam̐ rāma māyā ke prere||
suddha satva samatā bigyānā| kṛta prabhāva prasanna mana jānā||
satva bahuta raja kachu rati karmā| saba bidhi sukha tretā kara dharmā||
bahu raja svalpa satva kachu tāmasa| dvāpara dharma haraṣa bhaya mānasa||
tāmasa bahuta rajoguna thorā| kali prabhāva birodha cahum̐ orā||
budha juga dharma jāni mana māhīṃ| taji adharma rati dharma karāhīṃ||
kāla dharma nahiṃ byāpahiṃ tāhī| raghupati carana prīti ati jāhī||
naṭa kṛta bikaṭa kapaṭa khagarāyā| naṭa sevakahi na byāpai māyā||

दोहा 104(क)
हरि माया कृत दोष गुन बिनु हरि भजन न जाहिं।
भजिअ राम तजि काम सब अस बिचारि मन माहिं॥104(क)॥
hari māyā kṛta doṣa guna binu hari bhajana na jāhiṃ|
bhajia rāma taji kāma saba asa bicāri mana māhiṃ||104(ka)||

दोहा 104(ख)
तेहि कलिकाल बरष बहु बसेउँ अवध बिहगेस।
परेउ दुकाल बिपति बस तब मैं गयउँ बिदेस॥104(ख)॥
tehi kalikāla baraṣa bahu baseum̐ avadha bihagesa|
pareu dukāla bipati basa taba maiṃ gayaum̐ bidesa||104(kha)||
दोहा 105#

गयउँ उजेनी सुनु उरगारी। दीन मलीन दरिद्र दुखारी॥
गएँ काल कछु संपति पाई। तहँ पुनि करउँ संभु सेवकाई॥
बिप्र एक बैदिक सिव पूजा। करइ सदा तेहि काजु न दूजा॥
परम साधु परमारथ बिंदक। संभु उपासक नहिं हरि निंदक॥
तेहि सेवउँ मैं कपट समेता। द्विज दयाल अति नीति निकेता॥
बाहिज नम्र देखि मोहि साईं। बिप्र पढ़ाव पुत्र की नाईं॥
संभु मंत्र मोहि द्विजबर दीन्हा। सुभ उपदेस बिबिध बिधि कीन्हा॥
जपउँ मंत्र सिव मंदिर जाई। हृदयँ दंभ अहमिति अधिकाई॥

gayaum̐ ujenī sunu uragārī| dīna malīna daridra dukhārī||
gaem̐ kāla kachu saṃpati pāī| taham̐ puni karaum̐ saṃbhu sevakāī||
bipra eka baidika siva pūjā| karai sadā tehi kāju na dūjā||
parama sādhu paramāratha biṃdaka| saṃbhu upāsaka nahiṃ hari niṃdaka||
tehi sevaum̐ maiṃ kapaṭa sametā| dvija dayāla ati nīti niketā||
bāhija namra dekhi mohi sāīṃ| bipra paḍhāva putra kī nāīṃ||
saṃbhu maṃtra mohi dvijabara dīnhā| subha upadesa bibidha bidhi kīnhā||
japaum̐ maṃtra siva maṃdira jāī| hṛdayam̐ daṃbha ahamiti adhikāī||

दोहा 105(क)
मैं खल मल संकुल मति नीच जाति बस मोह।
हरि जन द्विज देखें जरउँ करउँ बिष्नु कर द्रोह॥105(क)॥
maiṃ khala mala saṃkula mati nīca jāti basa moha|
hari jana dvija dekheṃ jaraum̐ karaum̐ biṣnu kara droha||105(ka)||

सोरठा 105(ख)
गुर नित मोहि प्रबोध दुखित देखि आचरन मम।
मोहि उपजइ अति क्रोध दंभिहि नीति कि भावई॥105(ख)॥
gura nita mohi prabodha dukhita dekhi ācarana mama|
mohi upajai ati krodha daṃbhihi nīti ki bhāvaī||105(kha)||
दोहा 106#

एक बार गुर लीन्ह बोलाई। मोहि नीति बहु भाँति सिखाई॥
सिव सेवा कर फल सुत सोई। अबिरल भगति राम पद होई॥
रामहि भजहिं तात सिव धाता। नर पावँर कै केतिक बाता॥
जासु चरन अज सिव अनुरागी। तासु द्रोहँ सुख चहसि अभागी॥
हर कहुँ हरि सेवक गुर कहेऊ। सुनि खगनाथ हृदय मम दहेऊ॥
अधम जाति मैं बिद्या पाएँ। भयउँ जथा अहि दूध पिआएँ॥
मानी कुटिल कुभाग्य कुजाती। गुर कर द्रोह करउँ दिनु राती॥
अति दयाल गुर स्वल्प न क्रोधा। पुनि पुनि मोहि सिखाव सुबोधा॥
जेहि ते नीच बड़ाई पावा। सो प्रथमहिं हति ताहि नसावा॥
धूम अनल संभव सुनु भाई। तेहि बुझाव घन पदवी पाई॥
रज मग परी निरादर रहई। सब कर पद प्रहार नित सहई॥
मरुत उड़ाव प्रथम तेहि भरई। पुनि नृप नयन किरीटन्हि परई॥
सुनु खगपति अस समुझि प्रसंगा। बुध नहिं करहिं अधम कर संगा॥
कबि कोबिद गावहिं असि नीति। खल सन कलह न भल नहिं प्रीति॥
उदासीन नित रहिअ गोसाईं। खल परिहरिअ स्वान की नाईं॥
मैं खल हृदयँ कपट कुटिलाई। गुर हित कहइ न मोहि सोहाई॥

eka bāra gura līnha bolāī| mohi nīti bahu bhām̐ti sikhāī||
siva sevā kara phala suta soī| abirala bhagati rāma pada hoī||
rāmahi bhajahiṃ tāta siva dhātā| nara pāvam̐ra kai ketika bātā||
jāsu carana aja siva anurāgī| tāsu droham̐ sukha cahasi abhāgī||
hara kahum̐ hari sevaka gura kaheū| suni khaganātha hṛdaya mama daheū||
adhama jāti maiṃ bidyā pāem̐| bhayaum̐ jathā ahi dūdha piāem̐||
mānī kuṭila kubhāgya kujātī| gura kara droha karaum̐ dinu rātī||
ati dayāla gura svalpa na krodhā| puni puni mohi sikhāva subodhā||
jehi te nīca baḍāī pāvā| so prathamahiṃ hati tāhi nasāvā||
dhūma anala saṃbhava sunu bhāī| tehi bujhāva ghana padavī pāī||
raja maga parī nirādara rahaī| saba kara pada prahāra nita sahaī||
maruta uḍāva prathama tehi bharaī| puni nṛpa nayana kirīṭanhi paraī||
sunu khagapati asa samujhi prasaṃgā| budha nahiṃ karahiṃ adhama kara saṃgā||
kabi kobida gāvahiṃ asi nīti| khala sana kalaha na bhala nahiṃ prīti||
udāsīna nita rahia gosāīṃ| khala pariharia svāna kī nāīṃ||
maiṃ khala hṛdayam̐ kapaṭa kuṭilāī| gura hita kahai na mohi sohāī||

दोहा 106(क)
एक बार हर मंदिर जपत रहेउँ सिव नाम।
गुर आयउ अभिमान तें उठि नहिं कीन्ह प्रनाम॥106(क)॥
eka bāra hara maṃdira japata raheum̐ siva nāma|
gura āyau abhimāna teṃ uṭhi nahiṃ kīnha pranāma||106(ka)||

दोहा 106(ख)
सो दयाल नहिं कहेउ कछु उर न रोष लवलेस।
अति अघ गुर अपमानता सहि नहिं सके महेस॥106(ख)॥
so dayāla nahiṃ kaheu kachu ura na roṣa lavalesa|
ati agha gura apamānatā sahi nahiṃ sake mahesa||106(kha)||
दोहा 107#

मंदिर माझ भई नभ बानी। रे हतभाग्य अग्य अभिमानी॥
जद्यपि तव गुर के नहिं क्रोधा। अति कृपाल चित सम्यक बोधा॥
तदपि साप सठ दैहउँ तोही। नीति बिरोध सोहाइ न मोही॥
जौं नहिं दंड करौं खल तोरा। भ्रष्ट होइ श्रुतिमारग मोरा॥
जे सठ गुर सन इरिषा करहीं। रौरव नरक कोटि जुग परहीं॥
त्रिजग जोनि पुनि धरहिं सरीरा। अयुत जन्म भरि पावहिं पीरा॥
बैठ रहेसि अजगर इव पापी। सर्प होहि खल मल मति ब्यापी॥
महा बिटप कोटर महुँ जाई॥रहु अधमाधम अधगति पाई॥

maṃdira mājha bhaī nabha bānī| re hatabhāgya agya abhimānī||
jadyapi tava gura ke nahiṃ krodhā| ati kṛpāla cita samyaka bodhā||
tadapi sāpa saṭha daihaum̐ tohī| nīti birodha sohāi na mohī||
jauṃ nahiṃ daṃḍa karauṃ khala torā| bhraṣṭa hoi śrutimāraga morā||
je saṭha gura sana iriṣā karahīṃ| raurava naraka koṭi juga parahīṃ||
trijaga joni puni dharahiṃ sarīrā| ayuta janma bhari pāvahiṃ pīrā||
baiṭha rahesi ajagara iva pāpī| sarpa hohi khala mala mati byāpī||
mahā biṭapa koṭara mahum̐ jāī||rahu adhamādhama adhagati pāī||

दोहा 107(क)
हाहाकार कीन्ह गुर दारुन सुनि सिव साप॥
कंपित मोहि बिलोकि अति उर उपजा परिताप॥107(क)॥
hāhākāra kīnha gura dāruna suni siva sāpa||
kaṃpita mohi biloki ati ura upajā paritāpa||107(ka)||

दोहा 107(ख)
करि दंडवत सप्रेम द्विज सिव सन्मुख कर जोरि।
बिनय करत गदगद स्वर समुझि घोर गति मोरि॥107(ख)॥
kari daṃḍavata saprema dvija siva sanmukha kara jori|
binaya karata gadagada svara samujhi ghora gati mori||107(kha)||
दोहा 108#

नमामीशमीशान निर्वाणरूपं। विभुं ब्यापकं ब्रह्म वेदस्वरूपं।
निजं निर्गुणं निर्विकल्पं निरींह। चिदाकाशमाकाशवासं भजेऽहं॥
निराकारमोंकारमूलं तुरीयं। गिरा ग्यान गोतीतमीशं गिरीशं॥
करालं महाकाल कालं कृपालं। गुणागार संसारपारं नतोऽहं॥
तुषाराद्रि संकाश गौरं गभीरं। मनोभूत कोटि प्रभा श्री शरीरं॥
स्फुरन्मौलि कल्लोलिनी चारु गंगा। लसद्भालबालेन्दु कंठे भुजंगा॥
चलत्कुंडलं भ्रू सुनेत्रं विशालं। प्रसन्नाननं नीलकंठं दयालं॥
मृगाधीशचर्माम्बरं मुण्डमालं। प्रियं शंकरं सर्वनाथं भजामि॥
प्रचंडं प्रकृष्टं प्रगल्भं परेशं। अखंडं अजं भानुकोटिप्रकाशं॥
त्रयःशूल निर्मूलनं शूलपाणिं। भजेऽहं भवानीपतिं भावगम्यं॥
कलातीत कल्याण कल्पान्तकारी। सदा सज्जनान्ददाता पुरारी॥
चिदानंदसंदोह मोहापहारी। प्रसीद प्रसीद प्रभो मन्मथारी॥
न यावद् उमानाथ पादारविन्दं। भजंतीह लोके परे वा नराणां॥
न तावत्सुखं शान्ति सन्तापनाशं। प्रसीद प्रभो सर्वभूताधिवासं॥
न जानामि योगं जपं नैव पूजां। नतोऽहं सदा सर्वदा शंभु तुभ्यं॥
जरा जन्म दुःखौघ तातप्यमानं। प्रभो पाहि आपन्नमामीश शंभो॥
रुद्राष्टकमिदं प्रोक्तं विप्रेण हरतोषये।
ये पठन्ति नरा भक्त्या तेषां शम्भुः प्रसीदति॥

namāmīśamīśāna nirvāṇarūpaṃ| vibhuṃ byāpakaṃ brahma vedasvarūpaṃ|
nijaṃ nirguṇaṃ nirvikalpaṃ nirīṃha| cidākāśamākāśavāsaṃ bhaje'haṃ||
nirākāramoṃkāramūlaṃ turīyaṃ| girā gyāna gotītamīśaṃ girīśaṃ||
karālaṃ mahākāla kālaṃ kṛpālaṃ| guṇāgāra saṃsārapāraṃ nato'haṃ||
tuṣārādri saṃkāśa gauraṃ gabhīraṃ| manobhūta koṭi prabhā śrī śarīraṃ||
sphuranmauli kallolinī cāru gaṃgā| lasadbhālabālendu kaṃṭhe bhujaṃgā||
calatkuṃḍalaṃ bhrū sunetraṃ viśālaṃ| prasannānanaṃ nīlakaṃṭhaṃ dayālaṃ||
mṛgādhīśacarmāmbaraṃ muṇḍamālaṃ| priyaṃ śaṃkaraṃ sarvanāthaṃ bhajāmi||
pracaṃḍaṃ prakṛṣṭaṃ pragalbhaṃ pareśaṃ| akhaṃḍaṃ ajaṃ bhānukoṭiprakāśaṃ||
trayaḥśūla nirmūlanaṃ śūlapāṇiṃ| bhaje'haṃ bhavānīpatiṃ bhāvagamyaṃ||
kalātīta kalyāṇa kalpāntakārī| sadā sajjanāndadātā purārī||
cidānaṃdasaṃdoha mohāpahārī| prasīda prasīda prabho manmathārī||
na yāvad umānātha pādāravindaṃ| bhajaṃtīha loke pare vā narāṇāṃ||
na tāvatsukhaṃ śānti santāpanāśaṃ| prasīda prabho sarvabhūtādhivāsaṃ||
na jānāmi yogaṃ japaṃ naiva pūjāṃ| nato'haṃ sadā sarvadā śaṃbhu tubhyaṃ||
jarā janma duḥkhaugha tātapyamānaṃ| prabho pāhi āpannamāmīśa śaṃbho||
rudrāṣṭakamidaṃ proktaṃ vipreṇa haratoṣaye|
ye paṭhanti narā bhaktyā teṣāṃ śambhuḥ prasīdati||

दोहा 108(क)
सुनि बिनती सर्बग्य सिव देखि ब्रिप्र अनुरागु।
पुनि मंदिर नभबानी भइ द्विजबर बर मागु॥108(क)॥
suni binatī sarbagya siva dekhi bripra anurāgu|
puni maṃdira nabhabānī bhai dvijabara bara māgu||108(ka)||

दोहा 108(ख)
जौं प्रसन्न प्रभु मो पर नाथ दीन पर नेहु।
निज पद भगति देइ प्रभु पुनि दूसर बर देहु॥108(ख)॥
jauṃ prasanna prabhu mo para nātha dīna para nehu|
nija pada bhagati dei prabhu puni dūsara bara dehu||108(kha)||

दोहा 108(ग)
तव माया बस जीव जड़ संतत फिरइ भुलान।
तेहि पर क्रोध न करिअ प्रभु कृपा सिंधु भगवान॥108(ग)॥
tava māyā basa jīva jaḍa saṃtata phirai bhulāna|
tehi para krodha na karia prabhu kṛpā siṃdhu bhagavāna||108(ga)||

दोहा 108(घ)
संकर दीनदयाल अब एहि पर होहु कृपाल।
साप अनुग्रह होइ जेहिं नाथ थोरेहीं काल॥108(घ)॥
saṃkara dīnadayāla aba ehi para hohu kṛpāla|
sāpa anugraha hoi jehiṃ nātha thorehīṃ kāla||108(gha)||
दोहा 109#

एहि कर होइ परम कल्याना। सोइ करहु अब कृपानिधाना॥
बिप्रगिरा सुनि परहित सानी। एवमस्तु इति भइ नभबानी॥
जदपि कीन्ह एहिं दारुन पापा। मैं पुनि दीन्ह कोप करि सापा॥
तदपि तुम्हार साधुता देखी। करिहउँ एहि पर कृपा बिसेषी॥
छमासील जे पर उपकारी। ते द्विज मोहि प्रिय जथा खरारी॥
मोर श्राप द्विज ब्यर्थ न जाइहि। जन्म सहस अवस्य यह पाइहि॥
जनमत मरत दुसह दुख होई। एहि स्वल्पउ नहिं ब्यापिहि सोई॥
कवनेउँ जन्म मिटिहि नहिं ग्याना। सुनहि सूद्र मम बचन प्रवाना॥
रघुपति पुरीं जन्म तब भयऊ। पुनि तैं मम सेवाँ मन दयऊ॥
पुरी प्रभाव अनुग्रह मोरें। राम भगति उपजिहि उर तोरें॥
सुनु मम बचन सत्य अब भाई। हरितोषन ब्रत द्विज सेवकाई॥
अब जनि करहि बिप्र अपमाना। जानेहु संत अनंत समाना॥
इंद्र कुलिस मम सूल बिसाला। कालदंड हरि चक्र कराला॥
जो इन्ह कर मारा नहिं मरई। बिप्रद्रोह पावक सो जरई॥
अस बिबेक राखेहु मन माहीं। तुम्ह कहँ जग दुर्लभ कछु नाहीं॥
औरउ एक आसिषा मोरी। अप्रतिहत गति होइहि तोरी॥

ehi kara hoi parama kalyānā| soi karahu aba kṛpānidhānā||
bipragirā suni parahita sānī| evamastu iti bhai nabhabānī||
jadapi kīnha ehiṃ dāruna pāpā| maiṃ puni dīnha kopa kari sāpā||
tadapi tumhāra sādhutā dekhī| karihaum̐ ehi para kṛpā biseṣī||
chamāsīla je para upakārī| te dvija mohi priya jathā kharārī||
mora śrāpa dvija byartha na jāihi| janma sahasa avasya yaha pāihi||
janamata marata dusaha dukha hoī| ehi svalpau nahiṃ byāpihi soī||
kavaneum̐ janma miṭihi nahiṃ gyānā| sunahi sūdra mama bacana pravānā||
raghupati purīṃ janma taba bhayaū| puni taiṃ mama sevām̐ mana dayaū||
purī prabhāva anugraha moreṃ| rāma bhagati upajihi ura toreṃ||
sunu mama bacana satya aba bhāī| haritoṣana brata dvija sevakāī||
aba jani karahi bipra apamānā| jānehu saṃta anaṃta samānā||
iṃdra kulisa mama sūla bisālā| kāladaṃḍa hari cakra karālā||
jo inha kara mārā nahiṃ maraī| bipradroha pāvaka so jaraī||
asa bibeka rākhehu mana māhīṃ| tumha kaham̐ jaga durlabha kachu nāhīṃ||
aurau eka āsiṣā morī| apratihata gati hoihi torī||

दोहा 109(क)
सुनि सिव बचन हरषि गुर एवमस्तु इति भाषि।
मोहि प्रबोधि गयउ गृह संभु चरन उर राखि॥109(क)॥
suni siva bacana haraṣi gura evamastu iti bhāṣi|
mohi prabodhi gayau gṛha saṃbhu carana ura rākhi||109(ka)||

दोहा 109(ख)
प्रेरित काल बिधि गिरि जाइ भयउँ मैं ब्याल।
पुनि प्रयास बिनु सो तनु जजेउँ गएँ कछु काल॥109(ख)॥
prerita kāla bidhi giri jāi bhayaum̐ maiṃ byāla|
puni prayāsa binu so tanu jajeum̐ gaem̐ kachu kāla||109(kha)||

दोहा 109(ग)
जोइ तनु धरउँ तजउँ पुनि अनायास हरिजान।
जिमि नूतन पट पहिरइ नर परिहरइ पुरान॥109(ग)॥
joi tanu dharaum̐ tajaum̐ puni anāyāsa harijāna|
jimi nūtana paṭa pahirai nara pariharai purāna||109(ga)||

दोहा 109(घ)
सिवँ राखी श्रुति नीति अरु मैं नहिं पावा क्लेस।
एहि बिधि धरेउँ बिबिध तनु ग्यान न गयउ खगेस॥109(घ)॥
sivam̐ rākhī śruti nīti aru maiṃ nahiṃ pāvā klesa|
ehi bidhi dhareum̐ bibidha tanu gyāna na gayau khagesa||109(gha)||
दोहा 110#

त्रिजग देव नर जोइ तनु धरउँ। तहँ तहँ राम भजन अनुसरऊँ॥
एक सूल मोहि बिसर न काऊ। गुर कर कोमल सील सुभाऊ॥
चरम देह द्विज कै मैं पाई। सुर दुर्लभ पुरान श्रुति गाई॥
खेलउँ तहूँ बालकन्ह मीला। करउँ सकल रघुनायक लीला॥
प्रौढ़ भएँ मोहि पिता पढ़ावा। समझउँ सुनउँ गुनउँ नहिं भावा॥
मन ते सकल बासना भागी। केवल राम चरन लय लागी॥
कहु खगेस अस कवन अभागी। खरी सेव सुरधेनुहि त्यागी॥
प्रेम मगन मोहि कछु न सोहाई। हारेउ पिता पढ़ाइ पढ़ाई॥
भए कालबस जब पितु माता। मैं बन गयउँ भजन जनत्राता॥
जहँ जहँ बिपिन मुनीस्वर पावउँ। आश्रम जाइ जाइ सिरु नावउँ॥
बूझत तिन्हहि राम गुन गाहा। कहहिं सुनउँ हरषित खगनाहा॥
सुनत फिरउँ हरि गुन अनुबादा। अब्याहत गति संभु प्रसादा॥
छूटी त्रिबिध ईषना गाढ़ी। एक लालसा उर अति बाढ़ी॥
राम चरन बारिज जब देखौं। तब निज जन्म सफल करि लेखौं॥
जेहि पूँछउँ सोइ मुनि अस कहई। ईस्वर सर्ब भूतमय अहई॥
निर्गुन मत नहिं मोहि सोहाई। सगुन ब्रह्म रति उर अधिकाई॥

trijaga deva nara joi tanu dharaum̐| taham̐ taham̐ rāma bhajana anusaraūm̐||
eka sūla mohi bisara na kāū| gura kara komala sīla subhāū||
carama deha dvija kai maiṃ pāī| sura durlabha purāna śruti gāī||
khelaum̐ tahūm̐ bālakanha mīlā| karaum̐ sakala raghunāyaka līlā||
prauḍha bhaem̐ mohi pitā paḍhāvā| samajhaum̐ sunaum̐ gunaum̐ nahiṃ bhāvā||
mana te sakala bāsanā bhāgī| kevala rāma carana laya lāgī||
kahu khagesa asa kavana abhāgī| kharī seva suradhenuhi tyāgī||
prema magana mohi kachu na sohāī| hāreu pitā paḍhāi paḍhāī||
bhae kālabasa jaba pitu mātā| maiṃ bana gayaum̐ bhajana janatrātā||
jaham̐ jaham̐ bipina munīsvara pāvaum̐| āśrama jāi jāi siru nāvaum̐||
būjhata tinhahi rāma guna gāhā| kahahiṃ sunaum̐ haraṣita khaganāhā||
sunata phiraum̐ hari guna anubādā| abyāhata gati saṃbhu prasādā||
chūṭī tribidha īṣanā gāḍhī| eka lālasā ura ati bāḍhī||
rāma carana bārija jaba dekhauṃ| taba nija janma saphala kari lekhauṃ||
jehi pūm̐chaum̐ soi muni asa kahaī| īsvara sarba bhūtamaya ahaī||
nirguna mata nahiṃ mohi sohāī| saguna brahma rati ura adhikāī||

दोहा 110(क)
गुर के बचन सुरति करि राम चरन मनु लाग।
रघुपति जस गावत फिरउँ छन छन नव अनुराग॥110(क)॥
gura ke bacana surati kari rāma carana manu lāga|
raghupati jasa gāvata phiraum̐ chana chana nava anurāga||110(ka)||

दोहा 110(ख)
मेरु सिखर बट छायाँ मुनि लोमस आसीन।
देखि चरन सिरु नायउँ बचन कहेउँ अति दीन॥110(ख)॥
meru sikhara baṭa chāyām̐ muni lomasa āsīna|
dekhi carana siru nāyaum̐ bacana kaheum̐ ati dīna||110(kha)||

दोहा 110(ग)
सुनि मम बचन बिनीत मृदु मुनि कृपाल खगराज।
मोहि सादर पूँछत भए द्विज आयहु केहि काज॥110(ग)॥
suni mama bacana binīta mṛdu muni kṛpāla khagarāja|
mohi sādara pūm̐chata bhae dvija āyahu kehi kāja||110(ga)||

दोहा 110(घ)
तब मैं कहा कृपानिधि तुम्ह सर्बग्य सुजान।
सगुन ब्रह्म अवराधन मोहि कहहु भगवान॥110(घ)॥
taba maiṃ kahā kṛpānidhi tumha sarbagya sujāna|
saguna brahma avarādhana mohi kahahu bhagavāna||110(gha)||
दोहा 111#

तब मुनिष रघुपति गुन गाथा। कहे कछुक सादर खगनाथा॥
ब्रह्मग्यान रत मुनि बिग्यानि। मोहि परम अधिकारी जानी॥
लागे करन ब्रह्म उपदेसा। अज अद्वेत अगुन हृदयेसा॥
अकल अनीह अनाम अरुपा। अनुभव गम्य अखंड अनूपा॥
मन गोतीत अमल अबिनासी। निर्बिकार निरवधि सुख रासी॥
सो तैं ताहि तोहि नहिं भेदा। बारि बीचि इव गावहि बेदा॥
बिबिध भाँति मोहि मुनि समुझावा। निर्गुन मत मम हृदयँ न आवा॥
पुनि मैं कहेउँ नाइ पद सीसा। सगुन उपासन कहहु मुनीसा॥
राम भगति जल मम मन मीना। किमि बिलगाइ मुनीस प्रबीना॥
सोइ उपदेस कहहु करि दाया। निज नयनन्हि देखौं रघुराया॥
भरि लोचन बिलोकि अवधेसा। तब सुनिहउँ निर्गुन उपदेसा॥
मुनि पुनि कहि हरिकथा अनूपा। खंडि सगुन मत अगुन निरूपा॥
तब मैं निर्गुन मत कर दूरी। सगुन निरूपउँ करि हठ भूरी॥
उत्तर प्रतिउत्तर मैं कीन्हा। मुनि तन भए क्रोध के चीन्हा॥
सुनु प्रभु बहुत अवग्या किएँ। उपज क्रोध ग्यानिन्ह के हिएँ॥
अति संघरषन जौं कर कोई। अनल प्रगट चंदन ते होई॥

taba muniṣa raghupati guna gāthā| kahe kachuka sādara khaganāthā||
brahmagyāna rata muni bigyāni| mohi parama adhikārī jānī||
lāge karana brahma upadesā| aja adveta aguna hṛdayesā||
akala anīha anāma arupā| anubhava gamya akhaṃḍa anūpā||
mana gotīta amala abināsī| nirbikāra niravadhi sukha rāsī||
so taiṃ tāhi tohi nahiṃ bhedā| bāri bīci iva gāvahi bedā||
bibidha bhām̐ti mohi muni samujhāvā| nirguna mata mama hṛdayam̐ na āvā||
puni maiṃ kaheum̐ nāi pada sīsā| saguna upāsana kahahu munīsā||
rāma bhagati jala mama mana mīnā| kimi bilagāi munīsa prabīnā||
soi upadesa kahahu kari dāyā| nija nayananhi dekhauṃ raghurāyā||
bhari locana biloki avadhesā| taba sunihaum̐ nirguna upadesā||
muni puni kahi harikathā anūpā| khaṃḍi saguna mata aguna nirūpā||
taba maiṃ nirguna mata kara dūrī| saguna nirūpaum̐ kari haṭha bhūrī||
uttara pratiuttara maiṃ kīnhā| muni tana bhae krodha ke cīnhā||
sunu prabhu bahuta avagyā kiem̐| upaja krodha gyāninha ke hiem̐||
ati saṃgharaṣana jauṃ kara koī| anala pragaṭa caṃdana te hoī||

दोहा 111(क)
बारंबार सकोप मुनि करइ निरुपन ग्यान।
मैं अपनें मन बैठ तब करउँ बिबिध अनुमान॥111(क)॥
bāraṃbāra sakopa muni karai nirupana gyāna|
maiṃ apaneṃ mana baiṭha taba karaum̐ bibidha anumāna||111(ka)||

दोहा 111(ख)
क्रोध कि द्वेतबुद्धि बिनु द्वैत कि बिनु अग्यान।
मायाबस परिछिन्न जड़ जीव कि ईस समान॥111(ख)॥
krodha ki dvetabuddhi binu dvaita ki binu agyāna|
māyābasa parichinna jaḍa jīva ki īsa samāna||111(kha)||
दोहा 112#

कबहुँ कि दुख सब कर हित ताकें। तेहि कि दरिद्र परस मनि जाकें॥
परद्रोही की होहिं निसंका। कामी पुनि कि रहहिं अकलंका॥
बंस कि रह द्विज अनहित कीन्हें। कर्म कि होहिं स्वरूपहि चीन्हें॥
काहू सुमति कि खल सँग जामी। सुभ गति पाव कि परत्रिय गामी॥
भव कि परहिं परमात्मा बिंदक। सुखी कि होहिं कबहुँ हरिनिंदक॥
राजु कि रहइ नीति बिनु जानें। अघ कि रहहिं हरिचरित बखानें॥
पावन जस कि पुन्य बिनु होई। बिनु अघ अजस कि पावइ कोई॥
लाभु कि किछु हरि भगति समाना। जेहि गावहिं श्रुति संत पुराना॥
हानि कि जग एहि सम किछु भाई। भजिअ न रामहि नर तनु पाई॥
अघ कि पिसुनता सम कछु आना। धर्म कि दया सरिस हरिजाना॥
एहि बिधि अमिति जुगुति मन गुनऊँ। मुनि उपदेस न सादर सुनऊँ॥
पुनि पुनि सगुन पच्छ मैं रोपा। तब मुनि बोलेउ बचन सकोपा॥
मूढ़ परम सिख देउँ न मानसि। उत्तर प्रतिउत्तर बहु आनसि॥
सत्य बचन बिस्वास न करही। बायस इव सबही ते डरही॥
सठ स्वपच्छ तब हृदयँ बिसाला। सपदि होहि पच्छी चंडाला॥
लीन्ह श्राप मैं सीस चढ़ाई। नहिं कछु भय न दीनता आई॥

kabahum̐ ki dukha saba kara hita tākeṃ| tehi ki daridra parasa mani jākeṃ||
paradrohī kī hohiṃ nisaṃkā| kāmī puni ki rahahiṃ akalaṃkā||
baṃsa ki raha dvija anahita kīnheṃ| karma ki hohiṃ svarūpahi cīnheṃ||
kāhū sumati ki khala sam̐ga jāmī| subha gati pāva ki paratriya gāmī||
bhava ki parahiṃ paramātmā biṃdaka| sukhī ki hohiṃ kabahum̐ hariniṃdaka||
rāju ki rahai nīti binu jāneṃ| agha ki rahahiṃ haricarita bakhāneṃ||
pāvana jasa ki punya binu hoī| binu agha ajasa ki pāvai koī||
lābhu ki kichu hari bhagati samānā| jehi gāvahiṃ śruti saṃta purānā||
hāni ki jaga ehi sama kichu bhāī| bhajia na rāmahi nara tanu pāī||
agha ki pisunatā sama kachu ānā| dharma ki dayā sarisa harijānā||
ehi bidhi amiti juguti mana gunaūm̐| muni upadesa na sādara sunaūm̐||
puni puni saguna paccha maiṃ ropā| taba muni boleu bacana sakopā||
mūḍha parama sikha deum̐ na mānasi| uttara pratiuttara bahu ānasi||
satya bacana bisvāsa na karahī| bāyasa iva sabahī te ḍarahī||
saṭha svapaccha taba hṛdayam̐ bisālā| sapadi hohi pacchī caṃḍālā||
līnha śrāpa maiṃ sīsa caḍhāī| nahiṃ kachu bhaya na dīnatā āī||

दोहा 112(क)
तुरत भयउँ मैं काग तब पुनि मुनि पद सिरु नाइ।
सुमिरि राम रघुबंस मनि हरषित चलेउँ उड़ाइ॥112(क)॥
turata bhayaum̐ maiṃ kāga taba puni muni pada siru nāi|
sumiri rāma raghubaṃsa mani haraṣita caleum̐ uḍāi||112(ka)||

दोहा 112(ख)
उमा जे राम चरन रत बिगत काम मद क्रोध॥
निज प्रभुमय देखहिं जगत केहि सन करहिं बिरोध॥112(ख)॥
umā je rāma carana rata bigata kāma mada krodha||
nija prabhumaya dekhahiṃ jagata kehi sana karahiṃ birodha||112(kha)||
दोहा 113#

सुनु खगेस नहिं कछु रिषि दूषन। उर प्रेरक रघुबंस बिभूषन॥
कृपासिंधु मुनि मति करि भोरी। लीन्हि प्रेम परिच्छा मोरी॥
मन बच क्रम मोहि निज जन जाना। मुनि मति पुनि फेरी भगवाना॥
रिषि मम महत सीलता देखी। राम चरन बिस्वास बिसेषी॥
अति बिसमय पुनि पुनि पछिताई। सादर मुनि मोहि लीन्ह बोलाई॥
मम परितोष बिबिध बिधि कीन्हा। हरषित राममंत्र तब दीन्हा॥
बालकरूप राम कर ध्याना। कहेउ मोहि मुनि कृपानिधाना॥
सुंदर सुखद मिहि अति भावा। सो प्रथमहिं मैं तुम्हहि सुनावा॥
मुनि मोहि कछुक काल तहँ राखा। रामचरितमानस तब भाषा॥
सादर मोहि यह कथा सुनाई। पुनि बोले मुनि गिरा सुहाई॥
रामचरित सर गुप्त सुहावा। संभु प्रसाद तात मैं पावा॥
तोहि निज भगत राम कर जानी। ताते मैं सब कहेउँ बखानी॥
राम भगति जिन्ह कें उर नाहीं। कबहुँ न तात कहिअ तिन्ह पाहीं॥
मुनि मोहि बिबिध भाँति समुझावा। मैं सप्रेम मुनि पद सिरु नावा॥
निज कर कमल परसि मम सीसा। हरषित आसिष दीन्ह मुनीसा॥
राम भगति अबिरल उर तोरें। बसिहि सदा प्रसाद अब मोरें॥

sunu khagesa nahiṃ kachu riṣi dūṣana| ura preraka raghubaṃsa bibhūṣana||
kṛpāsiṃdhu muni mati kari bhorī| līnhi prema paricchā morī||
mana baca krama mohi nija jana jānā| muni mati puni pherī bhagavānā||
riṣi mama mahata sīlatā dekhī| rāma carana bisvāsa biseṣī||
ati bisamaya puni puni pachitāī| sādara muni mohi līnha bolāī||
mama paritoṣa bibidha bidhi kīnhā| haraṣita rāmamaṃtra taba dīnhā||
bālakarūpa rāma kara dhyānā| kaheu mohi muni kṛpānidhānā||
suṃdara sukhada mihi ati bhāvā| so prathamahiṃ maiṃ tumhahi sunāvā||
muni mohi kachuka kāla taham̐ rākhā| rāmacaritamānasa taba bhāṣā||
sādara mohi yaha kathā sunāī| puni bole muni girā suhāī||
rāmacarita sara gupta suhāvā| saṃbhu prasāda tāta maiṃ pāvā||
tohi nija bhagata rāma kara jānī| tāte maiṃ saba kaheum̐ bakhānī||
rāma bhagati jinha keṃ ura nāhīṃ| kabahum̐ na tāta kahia tinha pāhīṃ||
muni mohi bibidha bhām̐ti samujhāvā| maiṃ saprema muni pada siru nāvā||
nija kara kamala parasi mama sīsā| haraṣita āsiṣa dīnha munīsā||
rāma bhagati abirala ura toreṃ| basihi sadā prasāda aba moreṃ||

दोहा 113(क)
सदा राम प्रिय होहु तुम्ह सुभ गुन भवन अमान।
कामरूप इच्धामरन ग्यान बिराग निधान॥113(क)॥
sadā rāma priya hohu tumha subha guna bhavana amāna|
kāmarūpa icdhāmarana gyāna birāga nidhāna||113(ka)||

दोहा 113(ख)
जेंहिं आश्रम तुम्ह बसब पुनि सुमिरत श्रीभगवंत।
ब्यापिहि तहँ न अबिद्या जोजन एक प्रजंत॥113(ख)॥
jeṃhiṃ āśrama tumha basaba puni sumirata śrībhagavaṃta|
byāpihi taham̐ na abidyā jojana eka prajaṃta||113(kha)||
दोहा 114#

काल कर्म गुन दोष सुभाऊ। कछु दुख तुम्हहि न ब्यापिहि काऊ॥
राम रहस्य ललित बिधि नाना। गुप्त प्रगट इतिहास पुराना॥
बिनु श्रम तुम्ह जानब सब सोऊ। नित नव नेह राम पद होऊ॥
जो इच्छा करिहहु मन माहीं। हरि प्रसाद कछु दुर्लभ नाहीं॥
सुनि मुनि आसिष सुनु मतिधीरा। ब्रह्मगिरा भइ गगन गँभीरा॥
एवमस्तु तव बच मुनि ग्यानी। यह मम भगत कर्म मन बानी॥
सुनि नभगिरा हरष मोहि भयऊ। प्रेम मगन सब संसय गयऊ॥
करि बिनती मुनि आयसु पाई। पद सरोज पुनि पुनि सिरु नाई॥
हरष सहित एहिं आश्रम आयउँ। प्रभु प्रसाद दुर्लभ बर पायउँ॥
इहाँ बसत मोहि सुनु खग ईसा। बीते कलप सात अरु बीसा॥
करउँ सदा रघुपति गुन गाना। सादर सुनहिं बिहंग सुजाना॥
जब जब अवधपुरीं रघुबीरा। धरहिं भगत हित मनुज सरीरा॥
तब तब जाइ राम पुर रहऊँ। सिसुलीला बिलोकि सुख लहऊँ॥
पुनि उर राखि राम सिसुरूपा। निज आश्रम आवउँ खगभूपा॥
कथा सकल मैं तुम्हहि सुनाई। काग देह जेहिं कारन पाई॥
कहिउँ तात सब प्रस्न तुम्हारी। राम भगति महिमा अति भारी॥

kāla karma guna doṣa subhāū| kachu dukha tumhahi na byāpihi kāū||
rāma rahasya lalita bidhi nānā| gupta pragaṭa itihāsa purānā||
binu śrama tumha jānaba saba soū| nita nava neha rāma pada hoū||
jo icchā karihahu mana māhīṃ| hari prasāda kachu durlabha nāhīṃ||
suni muni āsiṣa sunu matidhīrā| brahmagirā bhai gagana gam̐bhīrā||
evamastu tava baca muni gyānī| yaha mama bhagata karma mana bānī||
suni nabhagirā haraṣa mohi bhayaū| prema magana saba saṃsaya gayaū||
kari binatī muni āyasu pāī| pada saroja puni puni siru nāī||
haraṣa sahita ehiṃ āśrama āyaum̐| prabhu prasāda durlabha bara pāyaum̐||
ihām̐ basata mohi sunu khaga īsā| bīte kalapa sāta aru bīsā||
karaum̐ sadā raghupati guna gānā| sādara sunahiṃ bihaṃga sujānā||
jaba jaba avadhapurīṃ raghubīrā| dharahiṃ bhagata hita manuja sarīrā||
taba taba jāi rāma pura rahaūm̐| sisulīlā biloki sukha lahaūm̐||
puni ura rākhi rāma sisurūpā| nija āśrama āvaum̐ khagabhūpā||
kathā sakala maiṃ tumhahi sunāī| kāga deha jehiṃ kārana pāī||
kahium̐ tāta saba prasna tumhārī| rāma bhagati mahimā ati bhārī||

दोहा 114(क)
ताते यह तन मोहि प्रिय भयउ राम पद नेह।
निज प्रभु दरसन पायउँ गए सकल संदेह॥114(क)॥
tāte yaha tana mohi priya bhayau rāma pada neha|
nija prabhu darasana pāyaum̐ gae sakala saṃdeha||114(ka)||

दोहा 114(ख)
भगति पच्छ हठ करि रहेउँ दीन्हि महारिषि साप।
मुनि दुर्लभ बर पायउँ देखहु भजन प्रताप॥114(ख)॥
bhagati paccha haṭha kari raheum̐ dīnhi mahāriṣi sāpa|
muni durlabha bara pāyaum̐ dekhahu bhajana pratāpa||114(kha)||
मासपारायण, उनतीसवाँ विश्रामDay 29 of the 30-day Masparayan ends here

Completed Uttar Kand — Part 2?

Mark Masparayan day 29 done, light a diya, or share the path with family.

Text: the Gita Press edition of Shri Ramcharitmanas, checked against two independent transcriptions. Spotted an error? Suggest a correction.

Uttar Kand — Part 2 — text

Completed Uttar Kand — Part 2?