Ramcharitmanas Bal Kand Part 2 (Doha 26–55)

दोहा 26#

नाम प्रसाद संभु अबिनासी। साजु अमंगल मंगल रासी॥
सुक सनकादि सिद्ध मुनि जोगी। नाम प्रसाद ब्रह्मसुख भोगी॥
नारद जानेउ नाम प्रतापू। जग प्रिय हरि हरि हर प्रिय आपू॥
नामु जपत प्रभु कीन्ह प्रसादू। भगत सिरोमनि भे प्रहलादू॥
ध्रुवँ सगलानि जपेउ हरि नाऊँ। पायउ अचल अनूपम ठाऊँ॥
सुमिरि पवनसुत पावन नामू। अपने बस करि राखे रामू॥
अपतु अजामिलु गजु गनिकाऊ। भए मुकुत हरि नाम प्रभाऊ॥
कहौं कहाँ लगि नाम बड़ाई। रामु न सकहिं नाम गुन गाई॥

nāma prasāda saṃbhu abināsī| sāju amaṃgala maṃgala rāsī||
suka sanakādi siddha muni jogī| nāma prasāda brahmasukha bhogī||
nārada jāneu nāma pratāpū| jaga priya hari hari hara priya āpū||
nāmu japata prabhu kīnha prasādū| bhagata siromani bhe prahalādū||
dhruvam̐ sagalāni japeu hari nāūm̐| pāyau acala anūpama ṭhāūm̐||
sumiri pavanasuta pāvana nāmū| apane basa kari rākhe rāmū||
apatu ajāmilu gaju ganikāū| bhae mukuta hari nāma prabhāū||
kahauṃ kahām̐ lagi nāma baḍāī| rāmu na sakahiṃ nāma guna gāī||

दोहा 26
नामु राम को कलपतरु कलि कल्यान निवासु।
जो सुमिरत भयो भाँग तें तुलसी तुलसीदासु॥26॥
nāmu rāma ko kalapataru kali kalyāna nivāsu|
jo sumirata bhayo bhām̐ga teṃ tulasī tulasīdāsu||26||
दोहा 27#

चहुँ जुग तीनि काल तिहुँ लोका। भए नाम जपि जीव बिसोका॥
बेद पुरान संत मत एहू। सकल सुकृत फल राम सनेहू॥
ध्यानु प्रथम जुग मखबिधि दूजें। द्वापर परितोषत प्रभु पूजें॥
कलि केवल मल मूल मलीना। पाप पयोनिधि मन जन मीना॥
नाम कामतरु काल कराला। सुमिरत समन सकल जग जाला॥
राम नाम कलि अभिमत दाता। हित परलोक लोक पितु माता॥
नहिं कलि करम न भगति बिबेकू। राम नाम अवलंबन एकू॥
कालनेमि कलि कपट निधानू। नाम सुमति समरथ हनुमानू॥

cahum̐ juga tīni kāla tihum̐ lokā| bhae nāma japi jīva bisokā||
beda purāna saṃta mata ehū| sakala sukṛta phala rāma sanehū||
dhyānu prathama juga makhabidhi dūjeṃ| dvāpara paritoṣata prabhu pūjeṃ||
kali kevala mala mūla malīnā| pāpa payonidhi mana jana mīnā||
nāma kāmataru kāla karālā| sumirata samana sakala jaga jālā||
rāma nāma kali abhimata dātā| hita paraloka loka pitu mātā||
nahiṃ kali karama na bhagati bibekū| rāma nāma avalaṃbana ekū||
kālanemi kali kapaṭa nidhānū| nāma sumati samaratha hanumānū||

दोहा 27
राम नाम नरकेसरी कनककसिपु कलिकाल।
जापक जन प्रहलाद जिमि पालिहि दलि सुरसाल॥27॥
rāma nāma narakesarī kanakakasipu kalikāla|
jāpaka jana prahalāda jimi pālihi dali surasāla||27||
दोहा 28#

भायँ कुभायँ अनख आलसहूँ। नाम जपत मंगल दिसि दसहूँ॥
सुमिरि सो नाम राम गुन गाथा। करउँ नाइ रघुनाथहि माथा॥
मोरि सुधारिहि सो सब भाँती। जासु कृपा नहिं कृपाँ अघाती॥
राम सुस्वामि कुसेवकु मोसो। निज दिसि देखि दयानिधि पोसो॥
लोकहुँ बेद सुसाहिब रीती। बिनय सुनत पहिचानत प्रीती॥
गनी गरीब ग्रामनर नागर। पंडित मूढ़ मलीन उजागर॥
सुकबि कुकबि निज मति अनुहारी। नृपहि सराहत सब नर नारी॥
साधु सुजान सुसील नृपाला। ईस अंस भव परम कृपाला॥
सुनि सनमानहिं सबहि सुबानी। भनिति भगति नति गति पहिचानी॥
यह प्राकृत महिपाल सुभाऊ। जान सिरोमनि कोसलराऊ॥
रीझत राम सनेह निसोतें। को जग मंद मलिनमति मोतें॥

bhāyam̐ kubhāyam̐ anakha ālasahūm̐| nāma japata maṃgala disi dasahūm̐||
sumiri so nāma rāma guna gāthā| karaum̐ nāi raghunāthahi māthā||
mori sudhārihi so saba bhām̐tī| jāsu kṛpā nahiṃ kṛpām̐ aghātī||
rāma susvāmi kusevaku moso| nija disi dekhi dayānidhi poso||
lokahum̐ beda susāhiba rītī| binaya sunata pahicānata prītī||
ganī garība grāmanara nāgara| paṃḍita mūḍha malīna ujāgara||
sukabi kukabi nija mati anuhārī| nṛpahi sarāhata saba nara nārī||
sādhu sujāna susīla nṛpālā| īsa aṃsa bhava parama kṛpālā||
suni sanamānahiṃ sabahi subānī| bhaniti bhagati nati gati pahicānī||
yaha prākṛta mahipāla subhāū| jāna siromani kosalarāū||
rījhata rāma saneha nisoteṃ| ko jaga maṃda malinamati moteṃ||

दोहा 28(क)
सठ सेवक की प्रीति रुचि रखिहहिं राम कृपालु।
उपल किए जलजान जेहिं सचिव सुमति कपि भालु॥28(क)॥
saṭha sevaka kī prīti ruci rakhihahiṃ rāma kṛpālu|
upala kie jalajāna jehiṃ saciva sumati kapi bhālu||28(ka)||

दोहा 28(ख)
हौहु कहावत सबु कहत राम सहत उपहास।
साहिब सीतानाथ सो सेवक तुलसीदास॥28(ख)॥
hauhu kahāvata sabu kahata rāma sahata upahāsa|
sāhiba sītānātha so sevaka tulasīdāsa||28(kha)||
दोहा 29#

अति बड़ि मोरि ढिठाई खोरी। सुनि अघ नरकहुँ नाक सकोरी॥
समुझि सहम मोहि अपडर अपनें। सो सुधि राम कीन्हि नहिं सपनें॥
सुनि अवलोकि सुचित चख चाही। भगति मोरि मति स्वामि सराही॥
कहत नसाइ होइ हियँ नीकी। रीझत राम जानि जन जी की॥
रहति न प्रभु चित चूक किए की। करत सुरति सय बार हिए की॥
जेहिं अघ बधेउ ब्याध जिमि बाली। फिरि सुकंठ सोइ कीन्ह कुचाली॥
सोइ करतूति बिभीषन केरी। सपनेहुँ सो न राम हियँ हेरी॥
ते भरतहि भेंटत सनमाने। राजसभाँ रघुबीर बखाने॥

ati baḍi mori ḍhiṭhāī khorī| suni agha narakahum̐ nāka sakorī||
samujhi sahama mohi apaḍara apaneṃ| so sudhi rāma kīnhi nahiṃ sapaneṃ||
suni avaloki sucita cakha cāhī| bhagati mori mati svāmi sarāhī||
kahata nasāi hoi hiyam̐ nīkī| rījhata rāma jāni jana jī kī||
rahati na prabhu cita cūka kie kī| karata surati saya bāra hie kī||
jehiṃ agha badheu byādha jimi bālī| phiri sukaṃṭha soi kīnha kucālī||
soi karatūti bibhīṣana kerī| sapanehum̐ so na rāma hiyam̐ herī||
te bharatahi bheṃṭata sanamāne| rājasabhām̐ raghubīra bakhāne||

दोहा 29(क)
प्रभु तरु तर कपि डार पर ते किए आपु समान॥
तुलसी कहूँ न राम से साहिब सीलनिधान॥29(क)॥
prabhu taru tara kapi ḍāra para te kie āpu samāna||
tulasī kahūm̐ na rāma se sāhiba sīlanidhāna||29(ka)||

दोहा 29(ख)
राम निकाईं रावरी है सबही को नीक।
जौं यह साँची है सदा तौ नीको तुलसीक॥29(ख)॥
rāma nikāīṃ rāvarī hai sabahī ko nīka|
jauṃ yaha sām̐cī hai sadā tau nīko tulasīka||29(kha)||

दोहा 29(ग)
एहि बिधि निज गुन दोष कहि सबहि बहुरि सिरु नाइ।
बरनउँ रघुबर बिसद जसु सुनि कलि कलुष नसाइ॥29(ग)॥
ehi bidhi nija guna doṣa kahi sabahi bahuri siru nāi|
baranaum̐ raghubara bisada jasu suni kali kaluṣa nasāi||29(ga)||
दोहा 30#

जागबलिक जो कथा सुहाई। भरद्वाज मुनिबरहि सुनाई॥
कहिहउँ सोइ संबाद बखानी। सुनहुँ सकल सज्जन सुखु मानी॥
संभु कीन्ह यह चरित सुहावा। बहुरि कृपा करि उमहि सुनावा॥
सोइ सिव कागभुसुंडिहि दीन्हा। राम भगत अधिकारी चीन्हा॥
तेहि सन जागबलिक पुनि पावा। तिन्ह पुनि भरद्वाज प्रति गावा॥
ते श्रोता बकता समसीला। सवँदरसी जानहिं हरिलीला॥
जानहिं तीनि काल निज ग्याना। करतल गत आमलक समाना॥
औरउ जे हरिभगत सुजाना। कहहिं सुनहिं समुझहिं बिधि नाना॥

jāgabalika jo kathā suhāī| bharadvāja munibarahi sunāī||
kahihaum̐ soi saṃbāda bakhānī| sunahum̐ sakala sajjana sukhu mānī||
saṃbhu kīnha yaha carita suhāvā| bahuri kṛpā kari umahi sunāvā||
soi siva kāgabhusuṃḍihi dīnhā| rāma bhagata adhikārī cīnhā||
tehi sana jāgabalika puni pāvā| tinha puni bharadvāja prati gāvā||
te śrotā bakatā samasīlā| savam̐darasī jānahiṃ harilīlā||
jānahiṃ tīni kāla nija gyānā| karatala gata āmalaka samānā||
aurau je haribhagata sujānā| kahahiṃ sunahiṃ samujhahiṃ bidhi nānā||

दोहा 30(क)
मैं पुनि निज गुर सन सुनी कथा सो सूकरखेत।
समुझी नहिं तसि बालपन तब अति रहेउँ अचेत॥30(क)॥
maiṃ puni nija gura sana sunī kathā so sūkarakheta|
samujhī nahiṃ tasi bālapana taba ati raheum̐ aceta||30(ka)||
दोहा 31#

श्रोता बकता ग्याननिधि कथा राम कै गूढ़।
किमि समुझौं मैं जीव जड़ कलि मल ग्रसित बिमूढ़॥30(ख)
तदपि कही गुर बारहिं बारा। समुझि परी कछु मति अनुसारा॥
भाषाबद्ध करबि मैं सोई। मोरें मन प्रबोध जेहिं होई॥
जस कछु बुधि बिबेक बल मेरें। तस कहिहउँ हियँ हरि के प्रेरें॥
निज संदेह मोह भ्रम हरनी। करउँ कथा भव सरिता तरनी॥
बुध बिश्राम सकल जन रंजनि। रामकथा कलि कलुष बिभंजनि॥
रामकथा कलि पंनग भरनी। पुनि बिबेक पावक कहुँ अरनी॥
रामकथा कलि कामद गाई। सुजन सजीवनि मूरि सुहाई॥
सोइ बसुधातल सुधा तरंगिनि। भय भंजनि भ्रम भेक भुअंगिनि॥
असुर सेन सम नरक निकंदिनि। साधु बिबुध कुल हित गिरिनंदिनि॥
संत समाज पयोधि रमा सी। बिस्व भार भर अचल छमा सी॥
जम गन मुहँ मसि जग जमुना सी। जीवन मुकुति हेतु जनु कासी॥
रामहि प्रिय पावनि तुलसी सी। तुलसिदास हित हियँ हुलसी सी॥
सिवप्रय मेकल सैल सुता सी। सकल सिद्धि सुख संपति रासी॥
सदगुन सुरगन अंब अदिति सी। रघुबर भगति प्रेम परमिति सी॥

śrotā bakatā gyānanidhi kathā rāma kai gūḍha|
kimi samujhauṃ maiṃ jīva jaḍa kali mala grasita bimūḍha||30(kha)
tadapi kahī gura bārahiṃ bārā| samujhi parī kachu mati anusārā||
bhāṣābaddha karabi maiṃ soī| moreṃ mana prabodha jehiṃ hoī||
jasa kachu budhi bibeka bala mereṃ| tasa kahihaum̐ hiyam̐ hari ke prereṃ||
nija saṃdeha moha bhrama haranī| karaum̐ kathā bhava saritā taranī||
budha biśrāma sakala jana raṃjani| rāmakathā kali kaluṣa bibhaṃjani||
rāmakathā kali paṃnaga bharanī| puni bibeka pāvaka kahum̐ aranī||
rāmakathā kali kāmada gāī| sujana sajīvani mūri suhāī||
soi basudhātala sudhā taraṃgini| bhaya bhaṃjani bhrama bheka bhuaṃgini||
asura sena sama naraka nikaṃdini| sādhu bibudha kula hita girinaṃdini||
saṃta samāja payodhi ramā sī| bisva bhāra bhara acala chamā sī||
jama gana muham̐ masi jaga jamunā sī| jīvana mukuti hetu janu kāsī||
rāmahi priya pāvani tulasī sī| tulasidāsa hita hiyam̐ hulasī sī||
sivapraya mekala saila sutā sī| sakala siddhi sukha saṃpati rāsī||
sadaguna suragana aṃba aditi sī| raghubara bhagati prema paramiti sī||

दोहा 31
राम कथा मंदाकिनी चित्रकूट चित चारु।
तुलसी सुभग सनेह बन सिय रघुबीर बिहारु॥31॥
rāma kathā maṃdākinī citrakūṭa cita cāru|
tulasī subhaga saneha bana siya raghubīra bihāru||31||
दोहा 32#

राम चरित चिंतामनि चारू। संत सुमति तिय सुभग सिंगारू॥
जग मंगल गुन ग्राम राम के। दानि मुकुति धन धरम धाम के॥
सदगुर ग्यान बिराग जोग के। बिबुध बैद भव भीम रोग के॥
जननि जनक सिय राम प्रेम के। बीज सकल ब्रत धरम नेम के॥
समन पाप संताप सोक के। प्रिय पालक परलोक लोक के॥
सचिव सुभट भूपति बिचार के। कुंभज लोभ उदधि अपार के॥
काम कोह कलिमल करिगन के। केहरि सावक जन मन बन के॥
अतिथि पूज्य प्रियतम पुरारि के। कामद घन दारिद दवारि के॥
मंत्र महामनि बिषय ब्याल के। मेटत कठिन कुअंक भाल के॥
हरन मोह तम दिनकर कर से। सेवक सालि पाल जलधर से॥
अभिमत दानि देवतरु बर से। सेवत सुलभ सुखद हरि हर से॥
सुकबि सरद नभ मन उडगन से। रामभगत जन जीवन धन से॥
सकल सुकृत फल भूरि भोग से। जग हित निरुपधि साधु लोग से॥
सेवक मन मानस मराल से। पावन गंग तरंग माल से॥

rāma carita ciṃtāmani cārū| saṃta sumati tiya subhaga siṃgārū||
jaga maṃgala guna grāma rāma ke| dāni mukuti dhana dharama dhāma ke||
sadagura gyāna birāga joga ke| bibudha baida bhava bhīma roga ke||
janani janaka siya rāma prema ke| bīja sakala brata dharama nema ke||
samana pāpa saṃtāpa soka ke| priya pālaka paraloka loka ke||
saciva subhaṭa bhūpati bicāra ke| kuṃbhaja lobha udadhi apāra ke||
kāma koha kalimala karigana ke| kehari sāvaka jana mana bana ke||
atithi pūjya priyatama purāri ke| kāmada ghana dārida davāri ke||
maṃtra mahāmani biṣaya byāla ke| meṭata kaṭhina kuaṃka bhāla ke||
harana moha tama dinakara kara se| sevaka sāli pāla jaladhara se||
abhimata dāni devataru bara se| sevata sulabha sukhada hari hara se||
sukabi sarada nabha mana uḍagana se| rāmabhagata jana jīvana dhana se||
sakala sukṛta phala bhūri bhoga se| jaga hita nirupadhi sādhu loga se||
sevaka mana mānasa marāla se| pāvana gaṃga taraṃga māla se||

दोहा 32(क)
कुपथ कुतरक कुचालि कलि कपट दंभ पाषंड।
दहन राम गुन ग्राम जिमि इंधन अनल प्रचंड॥32(क)॥
kupatha kutaraka kucāli kali kapaṭa daṃbha pāṣaṃḍa|
dahana rāma guna grāma jimi iṃdhana anala pracaṃḍa||32(ka)||

दोहा 32(ख)
रामचरित राकेस कर सरिस सुखद सब काहु।
सज्जन कुमुद चकोर चित हित बिसेषि बड़ लाहु॥32(ख)॥
rāmacarita rākesa kara sarisa sukhada saba kāhu|
sajjana kumuda cakora cita hita biseṣi baḍa lāhu||32(kha)||
दोहा 33#

कीन्हि प्रस्न जेहि भाँति भवानी। जेहि बिधि संकर कहा बखानी॥
सो सब हेतु कहब मैं गाई। कथाप्रबंध बिचित्र बनाई॥
जेहि यह कथा सुनी नहिं होई। जनि आचरजु करै सुनि सोई॥
कथा अलौकिक सुनहिं जे ग्यानी। नहिं आचरजु करहिं अस जानी॥
रामकथा कै मिति जग नाहीं। असि प्रतीति तिन्ह के मन माहीं॥
नाना भाँति राम अवतारा। रामायन सत कोटि अपारा॥
कलपभेद हरिचरित सुहाए। भाँति अनेक मुनीसन्ह गाए॥
करिअ न संसय अस उर आनी। सुनिअ कथा सारद रति मानी॥

kīnhi prasna jehi bhām̐ti bhavānī| jehi bidhi saṃkara kahā bakhānī||
so saba hetu kahaba maiṃ gāī| kathāprabaṃdha bicitra banāī||
jehi yaha kathā sunī nahiṃ hoī| jani ācaraju karai suni soī||
kathā alaukika sunahiṃ je gyānī| nahiṃ ācaraju karahiṃ asa jānī||
rāmakathā kai miti jaga nāhīṃ| asi pratīti tinha ke mana māhīṃ||
nānā bhām̐ti rāma avatārā| rāmāyana sata koṭi apārā||
kalapabheda haricarita suhāe| bhām̐ti aneka munīsanha gāe||
karia na saṃsaya asa ura ānī| sunia kathā sārada rati mānī||

दोहा 33
राम अनंत अनंत गुन अमित कथा बिस्तार।
सुनि आचरजु न मानिहहिं जिन्ह कें बिमल बिचार॥33॥
rāma anaṃta anaṃta guna amita kathā bistāra|
suni ācaraju na mānihahiṃ jinha keṃ bimala bicāra||33||
दोहा 34#

एहि बिधि सब संसय करि दूरी। सिर धरि गुर पद पंकज धूरी॥
पुनि सबही बिनवउँ कर जोरी। करत कथा जेहिं लाग न खोरी॥
सादर सिवहि नाइ अब माथा। बरनउँ बिसद राम गुन गाथा॥
संबत सोरह सै एकतीसा। करउँ कथा हरि पद धरि सीसा॥
नौमी भौम बार मधु मासा। अवधपुरीं यह चरित प्रकासा॥
जेहि दिन राम जनम श्रुति गावहिं। तीरथ सकल तहाँ चलि आवहिं॥
असुर नाग खग नर मुनि देवा। आइ करहिं रघुनायक सेवा॥
जन्म महोत्सव रचहिं सुजाना। करहिं राम कल कीरति गाना॥

ehi bidhi saba saṃsaya kari dūrī| sira dhari gura pada paṃkaja dhūrī||
puni sabahī binavaum̐ kara jorī| karata kathā jehiṃ lāga na khorī||
sādara sivahi nāi aba māthā| baranaum̐ bisada rāma guna gāthā||
saṃbata soraha sai ekatīsā| karaum̐ kathā hari pada dhari sīsā||
naumī bhauma bāra madhu māsā| avadhapurīṃ yaha carita prakāsā||
jehi dina rāma janama śruti gāvahiṃ| tīratha sakala tahām̐ cali āvahiṃ||
asura nāga khaga nara muni devā| āi karahiṃ raghunāyaka sevā||
janma mahotsava racahiṃ sujānā| karahiṃ rāma kala kīrati gānā||

दोहा 34
मज्जहिं सज्जन बृंद बहु पावन सरजू नीर।
जपहिं राम धरि ध्यान उर सुंदर स्याम सरीर॥34॥
majjahiṃ sajjana bṛṃda bahu pāvana sarajū nīra|
japahiṃ rāma dhari dhyāna ura suṃdara syāma sarīra||34||
दोहा 35#

दरस परस मज्जन अरु पाना। हरइ पाप कह बेद पुराना॥
नदी पुनीत अमित महिमा अति। कहि न सकइ सारद बिमलमति॥
राम धामदा पुरी सुहावनि। लोक समस्त बिदित अति पावनि॥
चारि खानि जग जीव अपारा। अवध तजे तनु नहिं संसारा॥
सब बिधि पुरी मनोहर जानी। सकल सिद्धिप्रद मंगल खानी॥
बिमल कथा कर कीन्ह अरंभा। सुनत नसाहिं काम मद दंभा॥
रामचरितमानस एहि नामा। सुनत श्रवन पाइअ बिश्रामा॥
मन करि बिषय अनल बन जरई। होइ सुखी जौं एहिं सर परई॥
रामचरितमानस मुनि भावन। बिरचेउ संभु सुहावन पावन॥
त्रिबिध दोष दुख दारिद दावन। कलि कुचालि कुलि कलुष नसावन॥
रचि महेस निज मानस राखा। पाइ सुसमउ सिवा सन भाषा॥
तातें रामचरितमानस बर। धरेउ नाम हियँ हेरि हरषि हर॥
कहउँ कथा सोइ सुखद सुहाई। सादर सुनहु सुजन मन लाई॥

darasa parasa majjana aru pānā| harai pāpa kaha beda purānā||
nadī punīta amita mahimā ati| kahi na sakai sārada bimalamati||
rāma dhāmadā purī suhāvani| loka samasta bidita ati pāvani||
cāri khāni jaga jīva apārā| avadha taje tanu nahiṃ saṃsārā||
saba bidhi purī manohara jānī| sakala siddhiprada maṃgala khānī||
bimala kathā kara kīnha araṃbhā| sunata nasāhiṃ kāma mada daṃbhā||
rāmacaritamānasa ehi nāmā| sunata śravana pāia biśrāmā||
mana kari biṣaya anala bana jaraī| hoi sukhī jauṃ ehiṃ sara paraī||
rāmacaritamānasa muni bhāvana| biraceu saṃbhu suhāvana pāvana||
tribidha doṣa dukha dārida dāvana| kali kucāli kuli kaluṣa nasāvana||
raci mahesa nija mānasa rākhā| pāi susamau sivā sana bhāṣā||
tāteṃ rāmacaritamānasa bara| dhareu nāma hiyam̐ heri haraṣi hara||
kahaum̐ kathā soi sukhada suhāī| sādara sunahu sujana mana lāī||

दोहा 35
जस मानस जेहि बिधि भयउ जग प्रचार जेहि हेतु।
अब सोइ कहउँ प्रसंग सब सुमिरि उमा बृषकेतु॥35॥
jasa mānasa jehi bidhi bhayau jaga pracāra jehi hetu|
aba soi kahaum̐ prasaṃga saba sumiri umā bṛṣaketu||35||
दोहा 36#

संभु प्रसाद सुमति हियँ हुलसी। रामचरितमानस कबि तुलसी॥
करइ मनोहर मति अनुहारी। सुजन सुचित सुनि लेहु सुधारी॥
सुमति भूमि थल हृदय अगाधू। बेद पुरान उदधि घन साधू॥
बरषहिं राम सुजस बर बारी। मधुर मनोहर मंगलकारी॥
लीला सगुन जो कहहिं बखानी। सोइ स्वच्छता करइ मल हानी॥
प्रेम भगति जो बरनि न जाई। सोइ मधुरता सुसीतलताई॥
सो जल सुकृत सालि हित होई। राम भगत जन जीवन सोई॥
मेधा महि गत सो जल पावन। सकिलि श्रवन मग चलेउ सुहावन॥
भरेउ सुमानस सुथल थिराना। सुखद सीत रुचि चारु चिराना॥

saṃbhu prasāda sumati hiyam̐ hulasī| rāmacaritamānasa kabi tulasī||
karai manohara mati anuhārī| sujana sucita suni lehu sudhārī||
sumati bhūmi thala hṛdaya agādhū| beda purāna udadhi ghana sādhū||
baraṣahiṃ rāma sujasa bara bārī| madhura manohara maṃgalakārī||
līlā saguna jo kahahiṃ bakhānī| soi svacchatā karai mala hānī||
prema bhagati jo barani na jāī| soi madhuratā susītalatāī||
so jala sukṛta sāli hita hoī| rāma bhagata jana jīvana soī||
medhā mahi gata so jala pāvana| sakili śravana maga caleu suhāvana||
bhareu sumānasa suthala thirānā| sukhada sīta ruci cāru cirānā||

दोहा 36
सुठि सुंदर संबाद बर बिरचे बुद्धि बिचारि।
तेइ एहि पावन सुभग सर घाट मनोहर चारि॥36॥
suṭhi suṃdara saṃbāda bara birace buddhi bicāri|
tei ehi pāvana subhaga sara ghāṭa manohara cāri||36||
दोहा 37#

सप्त प्रबन्ध सुभग सोपाना। ग्यान नयन निरखत मन माना॥
रघुपति महिमा अगुन अबाधा। बरनब सोइ बर बारि अगाधा॥
राम सीय जस सलिल सुधासम। उपमा बीचि बिलास मनोरम॥
पुरइनि सघन चारु चौपाई। जुगुति मंजु मनि सीप सुहाई॥
छंद सोरठा सुंदर दोहा। सोइ बहुरंग कमल कुल सोहा॥
अरथ अनूप सुभाव सुभासा। सोइ पराग मकरंद सुबासा॥
सुकृत पुंज मंजुल अलि माला। ग्यान बिराग बिचार मराला॥
धुनि अवरेब कबित गुन जाती। मीन मनोहर ते बहुभाँती॥
अरथ धरम कामादिक चारी। कहब ग्यान बिग्यान बिचारी॥
नव रस जप तप जोग बिरागा। ते सब जलचर चारु तड़ागा॥
सुकृती साधु नाम गुन गाना। ते बिचित्र जल बिहग समाना॥
संतसभा चहुँ दिसि अवँराई। श्रद्धा रितु बसंत सम गाई॥
भगति निरूपन बिबिध बिधाना। छमा दया दम लता बिताना॥
सम जम नियम फूल फल ग्याना। हरि पद रति रस बेद बखाना॥
औरउ कथा अनेक प्रसंगा। तेइ सुक पिक बहुबरन बिहंगा॥

sapta prabandha subhaga sopānā| gyāna nayana nirakhata mana mānā||
raghupati mahimā aguna abādhā| baranaba soi bara bāri agādhā||
rāma sīya jasa salila sudhāsama| upamā bīci bilāsa manorama||
puraini saghana cāru caupāī| juguti maṃju mani sīpa suhāī||
chaṃda soraṭhā suṃdara dohā| soi bahuraṃga kamala kula sohā||
aratha anūpa subhāva subhāsā| soi parāga makaraṃda subāsā||
sukṛta puṃja maṃjula ali mālā| gyāna birāga bicāra marālā||
dhuni avareba kabita guna jātī| mīna manohara te bahubhām̐tī||
aratha dharama kāmādika cārī| kahaba gyāna bigyāna bicārī||
nava rasa japa tapa joga birāgā| te saba jalacara cāru taḍāgā||
sukṛtī sādhu nāma guna gānā| te bicitra jala bihaga samānā||
saṃtasabhā cahum̐ disi avam̐rāī| śraddhā ritu basaṃta sama gāī||
bhagati nirūpana bibidha bidhānā| chamā dayā dama latā bitānā||
sama jama niyama phūla phala gyānā| hari pada rati rasa beda bakhānā||
aurau kathā aneka prasaṃgā| tei suka pika bahubarana bihaṃgā||

दोहा 37
पुलक बाटिका बाग बन सुख सुबिहंग बिहारु।
माली सुमन सनेह जल सींचत लोचन चारु॥37॥
pulaka bāṭikā bāga bana sukha subihaṃga bihāru|
mālī sumana saneha jala sīṃcata locana cāru||37||
दोहा 38#

जे गावहिं यह चरित सँभारे। तेइ एहि ताल चतुर रखवारे॥
सदा सुनहिं सादर नर नारी। तेइ सुरबर मानस अधिकारी॥
अति खल जे बिषई बग कागा। एहि सर निकट न जाहिं अभागा॥
संबुक भेक सेवार समाना। इहाँ न बिषय कथा रस नाना॥
तेहि कारन आवत हियँ हारे। कामी काक बलाक बिचारे॥
आवत एहिं सर अति कठिनाई। राम कृपा बिनु आइ न जाई॥
कठिन कुसंग कुपंथ कराला। तिन्ह के बचन बाघ हरि ब्याला॥
गृह कारज नाना जंजाला। ते अति दुर्गम सैल बिसाला॥
बन बहु बिषम मोह मद माना। नदीं कुतर्क भयंकर नाना॥

je gāvahiṃ yaha carita sam̐bhāre| tei ehi tāla catura rakhavāre||
sadā sunahiṃ sādara nara nārī| tei surabara mānasa adhikārī||
ati khala je biṣaī baga kāgā| ehi sara nikaṭa na jāhiṃ abhāgā||
saṃbuka bheka sevāra samānā| ihām̐ na biṣaya kathā rasa nānā||
tehi kārana āvata hiyam̐ hāre| kāmī kāka balāka bicāre||
āvata ehiṃ sara ati kaṭhināī| rāma kṛpā binu āi na jāī||
kaṭhina kusaṃga kupaṃtha karālā| tinha ke bacana bāgha hari byālā||
gṛha kāraja nānā jaṃjālā| te ati durgama saila bisālā||
bana bahu biṣama moha mada mānā| nadīṃ kutarka bhayaṃkara nānā||

दोहा 38
जे श्रद्धा संबल रहित नहिं संतन्ह कर साथ।
तिन्ह कहुँ मानस अगम अति जिन्हहि न प्रिय रघुनाथ॥38॥
je śraddhā saṃbala rahita nahiṃ saṃtanha kara sātha|
tinha kahum̐ mānasa agama ati jinhahi na priya raghunātha||38||
दोहा 39#

जौं करि कष्ट जाइ पुनि कोई। जातहिं नीद जुड़ाई होई॥
जड़ता जाड़ बिषम उर लागा। गएहुँ न मज्जन पाव अभागा॥
करि न जाइ सर मज्जन पाना। फिरि आवइ समेत अभिमाना॥
जौं बहोरि कोउ पूछन आवा। सर निंदा करि ताहि बुझावा॥
सकल बिघ्न ब्यापहिं नहिं तेही। राम सुकृपाँ बिलोकहिं जेही॥
सोइ सादर सर मज्जनु करई। महा घोर त्रयताप न जरई॥
ते नर यह सर तजहिं न काऊ। जिन्ह के राम चरन भल भाऊ॥
जो नहाइ चह एहिं सर भाई। सो सतसंग करउ मन लाई॥
अस मानस मानस चख चाही। भइ कबि बुद्धि बिमल अवगाही॥
भयउ हृदयँ आनंद उछाहू। उमगेउ प्रेम प्रमोद प्रबाहू॥
चली सुभग कबिता सरिता सो। राम बिमल जस जल भरिता सो॥
सरजू नाम सुमंगल मूला। लोक बेद मत मंजुल कूला॥
नदी पुनीत सुमानस नंदिनि। कलिमल तृन तरु मूल निकंदिनि॥

jauṃ kari kaṣṭa jāi puni koī| jātahiṃ nīda juḍāī hoī||
jaḍatā jāḍa biṣama ura lāgā| gaehum̐ na majjana pāva abhāgā||
kari na jāi sara majjana pānā| phiri āvai sameta abhimānā||
jauṃ bahori kou pūchana āvā| sara niṃdā kari tāhi bujhāvā||
sakala bighna byāpahiṃ nahiṃ tehī| rāma sukṛpām̐ bilokahiṃ jehī||
soi sādara sara majjanu karaī| mahā ghora trayatāpa na jaraī||
te nara yaha sara tajahiṃ na kāū| jinha ke rāma carana bhala bhāū||
jo nahāi caha ehiṃ sara bhāī| so satasaṃga karau mana lāī||
asa mānasa mānasa cakha cāhī| bhai kabi buddhi bimala avagāhī||
bhayau hṛdayam̐ ānaṃda uchāhū| umageu prema pramoda prabāhū||
calī subhaga kabitā saritā so| rāma bimala jasa jala bharitā so||
sarajū nāma sumaṃgala mūlā| loka beda mata maṃjula kūlā||
nadī punīta sumānasa naṃdini| kalimala tṛna taru mūla nikaṃdini||

दोहा 39
श्रोता त्रिबिध समाज पुर ग्राम नगर दुहुँ कूल।
संतसभा अनुपम अवध सकल सुमंगल मूल॥39॥
śrotā tribidha samāja pura grāma nagara duhum̐ kūla|
saṃtasabhā anupama avadha sakala sumaṃgala mūla||39||
दोहा 40#

रामभगति सुरसरितहि जाई। मिली सुकीरति सरजु सुहाई॥
सानुज राम समर जसु पावन। मिलेउ महानदु सोन सुहावन॥
जुग बिच भगति देवधुनि धारा। सोहति सहित सुबिरति बिचारा॥
त्रिबिध ताप त्रासक तिमुहानी। राम सरूप सिंधु समुहानी॥
मानस मूल मिली सुरसरिही। सुनत सुजन मन पावन करिही॥
बिच बिच कथा बिचित्र बिभागा। जनु सरि तीर तीर बन बागा॥
उमा महेस बिबाह बराती। ते जलचर अगनित बहुभाँती॥
रघुबर जनम अनंद बधाई। भवँर तरंग मनोहरताई॥

rāmabhagati surasaritahi jāī| milī sukīrati saraju suhāī||
sānuja rāma samara jasu pāvana| mileu mahānadu sona suhāvana||
juga bica bhagati devadhuni dhārā| sohati sahita subirati bicārā||
tribidha tāpa trāsaka timuhānī| rāma sarūpa siṃdhu samuhānī||
mānasa mūla milī surasarihī| sunata sujana mana pāvana karihī||
bica bica kathā bicitra bibhāgā| janu sari tīra tīra bana bāgā||
umā mahesa bibāha barātī| te jalacara aganita bahubhām̐tī||
raghubara janama anaṃda badhāī| bhavam̐ra taraṃga manoharatāī||

दोहा 40
बालचरित चहु बंधु के बनज बिपुल बहुरंग।
नृप रानी परिजन सुकृत मधुकर बारिबिहंग॥40॥
bālacarita cahu baṃdhu ke banaja bipula bahuraṃga|
nṛpa rānī parijana sukṛta madhukara bāribihaṃga||40||
दोहा 41#

सीय स्वयंबर कथा सुहाई। सरित सुहावनि सो छबि छाई॥
नदी नाव पटु प्रस्न अनेका। केवट कुसल उतर सबिबेका॥
सुनि अनुकथन परस्पर होई। पथिक समाज सोह सरि सोई॥
घोर धार भृगुनाथ रिसानी। घाट सुबद्ध राम बर बानी॥
सानुज राम बिबाह उछाहू। सो सुभ उमग सुखद सब काहू॥
कहत सुनत हरषहिं पुलकाहीं। ते सुकृती मन मुदित नहाहीं॥
राम तिलक हित मंगल साजा। परब जोग जनु जुरे समाजा॥
काई कुमति केकई केरी। परी जासु फल बिपति घनेरी॥

sīya svayaṃbara kathā suhāī| sarita suhāvani so chabi chāī||
nadī nāva paṭu prasna anekā| kevaṭa kusala utara sabibekā||
suni anukathana paraspara hoī| pathika samāja soha sari soī||
ghora dhāra bhṛgunātha risānī| ghāṭa subaddha rāma bara bānī||
sānuja rāma bibāha uchāhū| so subha umaga sukhada saba kāhū||
kahata sunata haraṣahiṃ pulakāhīṃ| te sukṛtī mana mudita nahāhīṃ||
rāma tilaka hita maṃgala sājā| paraba joga janu jure samājā||
kāī kumati kekaī kerī| parī jāsu phala bipati ghanerī||

दोहा 41
समन अमित उतपात सब भरतचरित जपजाग।
कलि अघ खल अवगुन कथन ते जलमल बग काग॥41॥
samana amita utapāta saba bharatacarita japajāga|
kali agha khala avaguna kathana te jalamala baga kāga||41||
दोहा 42#

कीरति सरित छहूँ रितु रूरी। समय सुहावनि पावनि भूरी॥
हिम हिमसैलसुता सिव ब्याहू। सिसिर सुखद प्रभु जनम उछाहू॥
बरनब राम बिबाह समाजू। सो मुद मंगलमय रितुराजू॥
ग्रीषम दुसह राम बनगवनू। पंथकथा खर आतप पवनू॥
बरषा घोर निसाचर रारी। सुरकुल सालि सुमंगलकारी॥
राम राज सुख बिनय बड़ाई। बिसद सुखद सोइ सरद सुहाई॥
सती सिरोमनि सिय गुनगाथा। सोइ गुन अमल अनूपम पाथा॥
भरत सुभाउ सुसीतलताई। सदा एकरस बरनि न जाई॥

kīrati sarita chahūm̐ ritu rūrī| samaya suhāvani pāvani bhūrī||
hima himasailasutā siva byāhū| sisira sukhada prabhu janama uchāhū||
baranaba rāma bibāha samājū| so muda maṃgalamaya riturājū||
grīṣama dusaha rāma banagavanū| paṃthakathā khara ātapa pavanū||
baraṣā ghora nisācara rārī| surakula sāli sumaṃgalakārī||
rāma rāja sukha binaya baḍāī| bisada sukhada soi sarada suhāī||
satī siromani siya gunagāthā| soi guna amala anūpama pāthā||
bharata subhāu susītalatāī| sadā ekarasa barani na jāī||

दोहा 42
अवलोकनि बोलनि मिलनि प्रीति परसपर हास।
भायप भलि चहु बंधु की जल माधुरी सुबास॥42॥
avalokani bolani milani prīti parasapara hāsa|
bhāyapa bhali cahu baṃdhu kī jala mādhurī subāsa||42||
दोहा 43#

आरति बिनय दीनता मोरी। लघुता ललित सुबारि न थोरी॥
अदभुत सलिल सुनत गुनकारी। आस पिआस मनोमल हारी॥
राम सुप्रेमहि पोषत पानी। हरत सकल कलि कलुष गलानी॥
भव श्रम सोषक तोषक तोषा। समन दुरित दुख दारिद दोषा॥
काम कोह मद मोह नसावन। बिमल बिबेक बिराग बढ़ावन॥
सादर मज्जन पान किए तें। मिटहिं पाप परिताप हिए तें॥
जिन्ह एहि बारि न मानस धोए। ते कायर कलिकाल बिगोए॥
तृषित निरखि रबि कर भव बारी। फिरिहहि मृग जिमि जीव दुखारी॥

ārati binaya dīnatā morī| laghutā lalita subāri na thorī||
adabhuta salila sunata gunakārī| āsa piāsa manomala hārī||
rāma supremahi poṣata pānī| harata sakala kali kaluṣa galānī||
bhava śrama soṣaka toṣaka toṣā| samana durita dukha dārida doṣā||
kāma koha mada moha nasāvana| bimala bibeka birāga baḍhāvana||
sādara majjana pāna kie teṃ| miṭahiṃ pāpa paritāpa hie teṃ||
jinha ehi bāri na mānasa dhoe| te kāyara kalikāla bigoe||
tṛṣita nirakhi rabi kara bhava bārī| phirihahi mṛga jimi jīva dukhārī||

दोहा 43(क)
मति अनुहारि सुबारि गुन गनि मन अन्हवाइ।
सुमिरि भवानी संकरहि कह कबि कथा सुहाइ॥43(क)॥
mati anuhāri subāri guna gani mana anhavāi|
sumiri bhavānī saṃkarahi kaha kabi kathā suhāi||43(ka)||

दोहा 43(ख)
अब रघुपति पद पंकरुह हियँ धरि पाइ प्रसाद ।
कहउँ जुगल मुनिबर्ज कर मिलन सुभग संबाद॥43(ख)॥
aba raghupati pada paṃkaruha hiyam̐ dhari pāi prasāda |
kahaum̐ jugala munibarja kara milana subhaga saṃbāda||43(kha)||
दोहा 44#

भरद्वाज मुनि बसहिं प्रयागा। तिन्हहि राम पद अति अनुरागा॥
तापस सम दम दया निधाना। परमारथ पथ परम सुजाना॥
माघ मकरगत रबि जब होई। तीरथपतिहिं आव सब कोई॥
देव दनुज किंनर नर श्रेनी। सादर मज्जहिं सकल त्रिबेनीं॥
पूजहिं माधव पद जलजाता। परसि अखय बटु हरषहिं गाता॥
भरद्वाज आश्रम अति पावन। परम रम्य मुनिबर मन भावन॥
तहाँ होइ मुनि रिषय समाजा। जाहिं जे मज्जन तीरथराजा॥
मज्जहिं प्रात समेत उछाहा। कहहिं परसपर हरि गुन गाहा॥

bharadvāja muni basahiṃ prayāgā| tinhahi rāma pada ati anurāgā||
tāpasa sama dama dayā nidhānā| paramāratha patha parama sujānā||
māgha makaragata rabi jaba hoī| tīrathapatihiṃ āva saba koī||
deva danuja kiṃnara nara śrenī| sādara majjahiṃ sakala tribenīṃ||
pūjahiṃ mādhava pada jalajātā| parasi akhaya baṭu haraṣahiṃ gātā||
bharadvāja āśrama ati pāvana| parama ramya munibara mana bhāvana||
tahām̐ hoi muni riṣaya samājā| jāhiṃ je majjana tīratharājā||
majjahiṃ prāta sameta uchāhā| kahahiṃ parasapara hari guna gāhā||

दोहा 44
ब्रह्म निरूपन धरम बिधि बरनहिं तत्त्व बिभाग।
कहहिं भगति भगवंत कै संजुत ग्यान बिराग॥44॥
brahma nirūpana dharama bidhi baranahiṃ tattva bibhāga|
kahahiṃ bhagati bhagavaṃta kai saṃjuta gyāna birāga||44||
दोहा 45#

एहि प्रकार भरि माघ नहाहीं। पुनि सब निज निज आश्रम जाहीं॥
प्रति संबत अति होइ अनंदा। मकर मज्जि गवनहिं मुनिबृंदा॥
एक बार भरि मकर नहाए। सब मुनीस आश्रमन्ह सिधाए॥
जागबलिक मुनि परम बिबेकी। भरव्दाज राखे पद टेकी॥
सादर चरन सरोज पखारे। अति पुनीत आसन बैठारे॥
करि पूजा मुनि सुजसु बखानी। बोले अति पुनीत मृदु बानी॥
नाथ एक संसउ बड़ मोरें। करगत बेदतत्व सबु तोरें॥
कहत सो मोहि लागत भय लाजा। जौं न कहउँ बड़ होइ अकाजा॥

ehi prakāra bhari māgha nahāhīṃ| puni saba nija nija āśrama jāhīṃ||
prati saṃbata ati hoi anaṃdā| makara majji gavanahiṃ munibṛṃdā||
eka bāra bhari makara nahāe| saba munīsa āśramanha sidhāe||
jāgabalika muni parama bibekī| bharavdāja rākhe pada ṭekī||
sādara carana saroja pakhāre| ati punīta āsana baiṭhāre||
kari pūjā muni sujasu bakhānī| bole ati punīta mṛdu bānī||
nātha eka saṃsau baḍa moreṃ| karagata bedatatva sabu toreṃ||
kahata so mohi lāgata bhaya lājā| jauṃ na kahaum̐ baḍa hoi akājā||

दोहा 45
संत कहहिं असि नीति प्रभु श्रुति पुरान मुनि गाव।
होइ न बिमल बिबेक उर गुर सन किएँ दुराव॥45॥
saṃta kahahiṃ asi nīti prabhu śruti purāna muni gāva|
hoi na bimala bibeka ura gura sana kiem̐ durāva||45||
दोहा 46#

अस बिचारि प्रगटउँ निज मोहू। हरहु नाथ करि जन पर छोहू॥
राम नाम कर अमित प्रभावा। संत पुरान उपनिषद गावा॥
संतत जपत संभु अबिनासी। सिव भगवान ग्यान गुन रासी॥
आकर चारि जीव जग अहहीं। कासीं मरत परम पद लहहीं॥
सोपि राम महिमा मुनिराया। सिव उपदेसु करत करि दाया॥
रामु कवन प्रभु पूछउँ तोही। कहिअ बुझाइ कृपानिधि मोही॥
एक राम अवधेस कुमारा। तिन्ह कर चरित बिदित संसारा॥
नारि बिरहँ दुखु लहेउ अपारा। भयहु रोषु रन रावनु मारा॥

asa bicāri pragaṭaum̐ nija mohū| harahu nātha kari jana para chohū||
rāma nāma kara amita prabhāvā| saṃta purāna upaniṣada gāvā||
saṃtata japata saṃbhu abināsī| siva bhagavāna gyāna guna rāsī||
ākara cāri jīva jaga ahahīṃ| kāsīṃ marata parama pada lahahīṃ||
sopi rāma mahimā munirāyā| siva upadesu karata kari dāyā||
rāmu kavana prabhu pūchaum̐ tohī| kahia bujhāi kṛpānidhi mohī||
eka rāma avadhesa kumārā| tinha kara carita bidita saṃsārā||
nāri biraham̐ dukhu laheu apārā| bhayahu roṣu rana rāvanu mārā||

दोहा 46
प्रभु सोइ राम कि अपर कोउ जाहि जपत त्रिपुरारि।
सत्यधाम सर्बग्य तुम्ह कहहु बिबेकु बिचारि॥46॥
prabhu soi rāma ki apara kou jāhi japata tripurāri|
satyadhāma sarbagya tumha kahahu bibeku bicāri||46||
दोहा 47#

जैसें मिटै मोर भ्रम भारी। कहहु सो कथा नाथ बिस्तारी॥
जागबलिक बोले मुसुकाई। तुम्हहि बिदित रघुपति प्रभुताई॥
रामभगत तुम्ह मन क्रम बानी। चतुराई तुम्हारी मैं जानी॥
चाहहु सुनै राम गुन गूढ़ा। कीन्हिहु प्रस्न मनहुँ अति मूढ़ा॥
तात सुनहु सादर मनु लाई। कहउँ राम कै कथा सुहाई॥
महामोहु महिषेसु बिसाला। रामकथा कालिका कराला॥
रामकथा ससि किरन समाना। संत चकोर करहिं जेहि पाना॥
ऐसेइ संसय कीन्ह भवानी। महादेव तब कहा बखानी॥

jaiseṃ miṭai mora bhrama bhārī| kahahu so kathā nātha bistārī||
jāgabalika bole musukāī| tumhahi bidita raghupati prabhutāī||
rāmabhagata tumha mana krama bānī| caturāī tumhārī maiṃ jānī||
cāhahu sunai rāma guna gūḍhā| kīnhihu prasna manahum̐ ati mūḍhā||
tāta sunahu sādara manu lāī| kahaum̐ rāma kai kathā suhāī||
mahāmohu mahiṣesu bisālā| rāmakathā kālikā karālā||
rāmakathā sasi kirana samānā| saṃta cakora karahiṃ jehi pānā||
aisei saṃsaya kīnha bhavānī| mahādeva taba kahā bakhānī||

दोहा 47
कहउँ सो मति अनुहारि अब उमा संभु संबाद।
भयउ समय जेहि हेतु जेहि सुनु मुनि मिटिहि बिषाद॥47॥
kahaum̐ so mati anuhāri aba umā saṃbhu saṃbāda|
bhayau samaya jehi hetu jehi sunu muni miṭihi biṣāda||47||
दोहा 48#

एक बार त्रेता जुग माहीं। संभु गए कुंभज रिषि पाहीं॥
संग सती जगजननि भवानी। पूजे रिषि अखिलेस्वर जानी॥
रामकथा मुनिबर्ज बखानी। सुनी महेस परम सुखु मानी॥
रिषि पूछी हरिभगति सुहाई। कही संभु अधिकारी पाई॥
कहत सुनत रघुपति गुन गाथा। कछु दिन तहाँ रहे गिरिनाथा॥
मुनि सन बिदा मागि त्रिपुरारी। चले भवन सँग दच्छकुमारी॥
तेहि अवसर भंजन महिभारा। हरि रघुबंस लीन्ह अवतारा॥
पिता बचन तजि राजु उदासी। दंडक बन बिचरत अबिनासी॥

eka bāra tretā juga māhīṃ| saṃbhu gae kuṃbhaja riṣi pāhīṃ||
saṃga satī jagajanani bhavānī| pūje riṣi akhilesvara jānī||
rāmakathā munibarja bakhānī| sunī mahesa parama sukhu mānī||
riṣi pūchī haribhagati suhāī| kahī saṃbhu adhikārī pāī||
kahata sunata raghupati guna gāthā| kachu dina tahām̐ rahe girināthā||
muni sana bidā māgi tripurārī| cale bhavana sam̐ga dacchakumārī||
tehi avasara bhaṃjana mahibhārā| hari raghubaṃsa līnha avatārā||
pitā bacana taji rāju udāsī| daṃḍaka bana bicarata abināsī||

दोहा 48(क)
हृदयँ बिचारत जात हर केहि बिधि दरसनु होइ।
गुप्त रूप अवतरेउ प्रभु गएँ जान सबु कोइ॥48(क)॥
hṛdayam̐ bicārata jāta hara kehi bidhi darasanu hoi|
gupta rūpa avatareu prabhu gaem̐ jāna sabu koi||48(ka)||

सोरठा 48(ख)
संकर उर अति छोभु सती न जानहिं मरमु सोइ॥
तुलसी दरसन लोभु मन डरु लोचन लालची॥48(ख)॥
saṃkara ura ati chobhu satī na jānahiṃ maramu soi||
tulasī darasana lobhu mana ḍaru locana lālacī||48(kha)||
दोहा 49#

रावन मरन मनुज कर जाचा। प्रभु बिधि बचनु कीन्ह चह साचा॥
जौं नहिं जाउँ रहइ पछितावा। करत बिचारु न बनत बनावा॥
एहि बिधि भए सोचबस ईसा। तेहि समय जाइ दससीसा॥
लीन्ह नीच मारीचहि संगा। भयउ तुरत सोइ कपट कुरंगा॥
करि छलु मूढ़ हरी बैदेही। प्रभु प्रभाउ तस बिदित न तेही॥
मृग बधि बन्धु सहित हरि आए। आश्रमु देखि नयन जल छाए॥
बिरह बिकल नर इव रघुराई। खोजत बिपिन फिरत दोउ भाई॥
कबहूँ जोग बियोग न जाकें। देखा प्रगट बिरह दुख ताकें॥

rāvana marana manuja kara jācā| prabhu bidhi bacanu kīnha caha sācā||
jauṃ nahiṃ jāum̐ rahai pachitāvā| karata bicāru na banata banāvā||
ehi bidhi bhae socabasa īsā| tehi samaya jāi dasasīsā||
līnha nīca mārīcahi saṃgā| bhayau turata soi kapaṭa kuraṃgā||
kari chalu mūḍha harī baidehī| prabhu prabhāu tasa bidita na tehī||
mṛga badhi bandhu sahita hari āe| āśramu dekhi nayana jala chāe||
biraha bikala nara iva raghurāī| khojata bipina phirata dou bhāī||
kabahūm̐ joga biyoga na jākeṃ| dekhā pragaṭa biraha dukha tākeṃ||

दोहा 49
अति बिचित्र रघुपति चरित जानहिं परम सुजान।
जे मतिमंद बिमोह बस हृदयँ धरहिं कछु आन॥49॥
ati bicitra raghupati carita jānahiṃ parama sujāna|
je matimaṃda bimoha basa hṛdayam̐ dharahiṃ kachu āna||49||
दोहा 50#

संभु समय तेहि रामहि देखा। उपजा हियँ अति हरषु बिसेषा॥
भरि लोचन छबिसिंधु निहारी। कुसमय जानिन कीन्हि चिन्हारी॥
जय सच्चिदानंद जग पावन। अस कहि चलेउ मनोज नसावन॥
चले जात सिव सती समेता। पुनि पुनि पुलकत कृपानिकेता॥
सतीं सो दसा संभु कै देखी। उर उपजा संदेहु बिसेषी॥
संकरु जगतबंद्य जगदीसा। सुर नर मुनि सब नावत सीसा॥
तिन्ह नृपसुतहि नह परनामा। कहि सच्चिदानंद परधमा॥
भए मगन छबि तासु बिलोकी। अजहुँ प्रीति उर रहति न रोकी॥

saṃbhu samaya tehi rāmahi dekhā| upajā hiyam̐ ati haraṣu biseṣā||
bhari locana chabisiṃdhu nihārī| kusamaya jānina kīnhi cinhārī||
jaya saccidānaṃda jaga pāvana| asa kahi caleu manoja nasāvana||
cale jāta siva satī sametā| puni puni pulakata kṛpāniketā||
satīṃ so dasā saṃbhu kai dekhī| ura upajā saṃdehu biseṣī||
saṃkaru jagatabaṃdya jagadīsā| sura nara muni saba nāvata sīsā||
tinha nṛpasutahi naha paranāmā| kahi saccidānaṃda paradhamā||
bhae magana chabi tāsu bilokī| ajahum̐ prīti ura rahati na rokī||

दोहा 50
ब्रह्म जो ब्यापक बिरज अज अकल अनीह अभेद।
सो कि देह धरि होइ नर जाहि न जानत बेद॥ 50॥
brahma jo byāpaka biraja aja akala anīha abheda|
so ki deha dhari hoi nara jāhi na jānata beda|| 50||
सोरठा 51#

बिष्नु जो सुर हित नरतनु धारी। सोउ सर्बग्य जथा त्रिपुरारी॥
खोजइ सो कि अग्य इव नारी। ग्यानधाम श्रीपति असुरारी॥
संभुगिरा पुनि मृषा न होई। सिव सर्बग्य जान सबु कोई॥
अस संसय मन भयउ अपारा। होइ न हृदयँ प्रबोध प्रचारा॥
जद्यपि प्रगट न कहेउ भवानी। हर अंतरजामी सब जानी॥
सुनहि सती तव नारि सुभाऊ। संसय अस न धरिअ उर काऊ॥
जासु कथा कुंभज रिषि गाई। भगति जासु मैं मुनिहि सुनाई॥
सोइ मम इष्टदेव रघुबीरा। सेवत जाहि सदा मुनि धीरा॥

biṣnu jo sura hita naratanu dhārī| sou sarbagya jathā tripurārī||
khojai so ki agya iva nārī| gyānadhāma śrīpati asurārī||
saṃbhugirā puni mṛṣā na hoī| siva sarbagya jāna sabu koī||
asa saṃsaya mana bhayau apārā| hoi na hṛdayam̐ prabodha pracārā||
jadyapi pragaṭa na kaheu bhavānī| hara aṃtarajāmī saba jānī||
sunahi satī tava nāri subhāū| saṃsaya asa na dharia ura kāū||
jāsu kathā kuṃbhaja riṣi gāī| bhagati jāsu maiṃ munihi sunāī||
soi mama iṣṭadeva raghubīrā| sevata jāhi sadā muni dhīrā||

छंद
मुनि धीर जोगी सिद्ध संतत बिमल मन जेहि ध्यावहीं।
कहि नेति निगम पुरान आगम जासु कीरति गावहीं॥
सोइ रामु ब्यापक ब्रह्म भुवन निकाय पति माया धनी।
अवतरेउ अपने भगत हित निजतंत्र नित रघुकुलमनि॥
muni dhīra jogī siddha saṃtata bimala mana jehi dhyāvahīṃ|
kahi neti nigama purāna āgama jāsu kīrati gāvahīṃ||
soi rāmu byāpaka brahma bhuvana nikāya pati māyā dhanī|
avatareu apane bhagata hita nijataṃtra nita raghukulamani||

सोरठा 51
लाग न उर उपदेसु जदपि कहेउ सिवँ बार बहु।
बोले बिहसि महेसु हरिमाया बलु जानि जियँ॥५१॥
lāga na ura upadesu jadapi kaheu sivam̐ bāra bahu|
bole bihasi mahesu harimāyā balu jāni jiyam̐||51||
दोहा 52#

जौं तुम्हरें मन अति संदेहू। तौ किन जाइ परीछा लेहू॥
तब लगि बैठ अहउँ बटछाहिं। जब लगि तुम्ह ऐहहु मोहि पाहीं॥
जैसें जाइ मोह भ्रम भारी। करेहु सो जतनु बिबेक बिचारी॥
चलीं सती सिव आयसु पाई। करहिं बिचारु करौं का भाई॥
इहाँ संभु अस मन अनुमाना। दच्छसुता कहुँ नहिं कल्याना॥
मोरेहु कहें न संसय जाहीं। बिधि बिपरीत भलाई नाहीं॥
होइहि सोइ जो राम रचि राखा। को करि तर्क बढ़ावै साखा॥
अस कहि लगे जपन हरिनामा। गई सती जहँ प्रभु सुखधामा॥

jauṃ tumhareṃ mana ati saṃdehū| tau kina jāi parīchā lehū||
taba lagi baiṭha ahaum̐ baṭachāhiṃ| jaba lagi tumha aihahu mohi pāhīṃ||
jaiseṃ jāi moha bhrama bhārī| karehu so jatanu bibeka bicārī||
calīṃ satī siva āyasu pāī| karahiṃ bicāru karauṃ kā bhāī||
ihām̐ saṃbhu asa mana anumānā| dacchasutā kahum̐ nahiṃ kalyānā||
morehu kaheṃ na saṃsaya jāhīṃ| bidhi biparīta bhalāī nāhīṃ||
hoihi soi jo rāma raci rākhā| ko kari tarka baḍhāvai sākhā||
asa kahi lage japana harināmā| gaī satī jaham̐ prabhu sukhadhāmā||

दोहा 52
पुनि पुनि हृदयँ बिचारु करि धरि सीता कर रूप।
आगें होइ चलि पंथ तेहि जेहिं आवत नरभूप॥५२॥
puni puni hṛdayam̐ bicāru kari dhari sītā kara rūpa|
āgeṃ hoi cali paṃtha tehi jehiṃ āvata narabhūpa||52||
दोहा 53#

लछिमन दीख उमाकृत बेषा। चकित भए भ्रम हृदयँ बिसेषा॥
कहि न सकत कछु अति गंभीरा। प्रभु प्रभाउ जानत मतिधीरा॥
सती कपटु जानेउ सुरस्वामी। सबदरसी सब अंतरजामी॥
सुमिरत जाहि मिटइ अग्याना। सोइ सरबग्य रामु भगवाना॥
सती कीन्ह चह तहँहुँ दुराऊ। देखहु नारि सुभाव प्रभाऊ॥
निज माया बलु हृदयँ बखानी। बोले बिहसि रामु मृदु बानी॥
जोरि पानि प्रभु कीन्ह प्रनामू। पिता समेत लीन्ह निज नामू॥
कहेउ बहोरि कहाँ बृषकेतू। बिपिन अकेलि फिरहु केहि हेतू॥

lachimana dīkha umākṛta beṣā| cakita bhae bhrama hṛdayam̐ biseṣā||
kahi na sakata kachu ati gaṃbhīrā| prabhu prabhāu jānata matidhīrā||
satī kapaṭu jāneu surasvāmī| sabadarasī saba aṃtarajāmī||
sumirata jāhi miṭai agyānā| soi sarabagya rāmu bhagavānā||
satī kīnha caha taham̐hum̐ durāū| dekhahu nāri subhāva prabhāū||
nija māyā balu hṛdayam̐ bakhānī| bole bihasi rāmu mṛdu bānī||
jori pāni prabhu kīnha pranāmū| pitā sameta līnha nija nāmū||
kaheu bahori kahām̐ bṛṣaketū| bipina akeli phirahu kehi hetū||

दोहा 53
राम बचन मृदु गूढ़ सुनि उपजा अति संकोचु।
सती सभीत महेस पहिं चलीं हृदयँ बड़ सोचु॥५३॥
rāma bacana mṛdu gūḍha suni upajā ati saṃkocu|
satī sabhīta mahesa pahiṃ calīṃ hṛdayam̐ baḍa socu||53||
दोहा 54#

मैं संकर कर कहा न माना। निज अग्यानु राम पर आना॥
जाइ उतरु अब देहउँ काहा। उर उपजा अति दारुन दाहा॥
जाना राम सतीं दुखु पावा। निज प्रभाउ कछु प्रगटि जनावा॥
सतीं दीख कौतुकु मग जाता। आगें रामु सहित श्री भ्राता॥
फिरि चितवा पाछें प्रभु देखा। सहित बंधु सिय सुंदर बेषा॥
जहँ चितवहिं तहँ प्रभु आसीना। सेवहिं सिद्ध मुनीस प्रबीना॥
देखे सिव बिधि बिष्नु अनेका। अमित प्रभाउ एक तें एका॥
बंदत चरन करत प्रभु सेवा। बिबिध बेष देखे सब देवा॥

maiṃ saṃkara kara kahā na mānā| nija agyānu rāma para ānā||
jāi utaru aba dehaum̐ kāhā| ura upajā ati dāruna dāhā||
jānā rāma satīṃ dukhu pāvā| nija prabhāu kachu pragaṭi janāvā||
satīṃ dīkha kautuku maga jātā| āgeṃ rāmu sahita śrī bhrātā||
phiri citavā pācheṃ prabhu dekhā| sahita baṃdhu siya suṃdara beṣā||
jaham̐ citavahiṃ taham̐ prabhu āsīnā| sevahiṃ siddha munīsa prabīnā||
dekhe siva bidhi biṣnu anekā| amita prabhāu eka teṃ ekā||
baṃdata carana karata prabhu sevā| bibidha beṣa dekhe saba devā||

दोहा 54
सती बिधात्री इंदिरा देखीं अमित अनूप।
जेहिं जेहिं बेष अजादि सुर तेहि तेहि तन अनुरूप॥५४॥
satī bidhātrī iṃdirā dekhīṃ amita anūpa|
jehiṃ jehiṃ beṣa ajādi sura tehi tehi tana anurūpa||54||
दोहा 55#

देखे जहँ जहँ रघुपति जेते। सक्तिन्ह सहित सकल सुर तेते॥
जीव चराचर जो संसारा। देखे सकल अनेक प्रकारा॥
पूजहिं प्रभुहि देव बहु बेषा। राम रूप दूसर नहिं देखा॥
अवलोके रघुपति बहुतेरे। सीता सहित न बेष घनेरे॥
सोइ रघुबर सोइ लछिमनु सीता। देखि सती अति भई सभीता॥
हृदय कंप तन सुधि कछु नाहीं। नयन मूदि बैठीं मग माहीं॥
बहुरि बिलोकेउ नयन उघारी। कछु न दीख तहँ दच्छकुमारी॥
पुनि पुनि नाइ राम पद सीसा। चलीं तहाँ जहँ रहे गिरीसा॥

dekhe jaham̐ jaham̐ raghupati jete| saktinha sahita sakala sura tete||
jīva carācara jo saṃsārā| dekhe sakala aneka prakārā||
pūjahiṃ prabhuhi deva bahu beṣā| rāma rūpa dūsara nahiṃ dekhā||
avaloke raghupati bahutere| sītā sahita na beṣa ghanere||
soi raghubara soi lachimanu sītā| dekhi satī ati bhaī sabhītā||
hṛdaya kaṃpa tana sudhi kachu nāhīṃ| nayana mūdi baiṭhīṃ maga māhīṃ||
bahuri bilokeu nayana ughārī| kachu na dīkha taham̐ dacchakumārī||
puni puni nāi rāma pada sīsā| calīṃ tahām̐ jaham̐ rahe girīsā||

दोहा 55
गई समीप महेस तब हँसि पूछी कुसलात।
लीन्हि परीछा कवन बिधि कहहु सत्य सब बात॥५५॥
gaī samīpa mahesa taba ham̐si pūchī kusalāta|
līnhi parīchā kavana bidhi kahahu satya saba bāta||55||
मासपारायण, दूसरा विश्रामDay 2 of the 30-day Masparayan ends here

Completed Bal Kand — Part 2?

Mark Masparayan day 2 done, light a diya, or share the path with family.

Text: the Gita Press edition of Shri Ramcharitmanas, checked against two independent transcriptions. Spotted an error? Suggest a correction.

Bal Kand — Part 2 — text

Completed Bal Kand — Part 2?