Ramcharitmanas Bal Kand Part 6 (Doha 153–183)

दोहा 153#

सुनु मुनि कथा पुनीत पुरानी। जो गिरिजा प्रति संभु बखानी॥
बिस्व बिदित एक कैकय देसू। सत्यकेतु तहँ बसइ नरेसू॥
धरम धुरंधर नीति निधाना। तेज प्रताप सील बलवाना॥
तेहि कें भए जुगल सुत बीरा। सब गुन धाम महा रनधीरा॥
राज धनी जो जेठ सुत आही। नाम प्रतापभानु अस ताही॥
अपर सुतहि अरिमर्दन नामा। भुजबल अतुल अचल संग्रामा॥
भाइहि भाइहि परम समीती। सकल दोष छल बरजित प्रीती॥
जेठे सुतहि राज नृप दीन्हा। हरि हित आपु गवन बन कीन्हा॥

sunu muni kathā punīta purānī| jo girijā prati saṃbhu bakhānī||
bisva bidita eka kaikaya desū| satyaketu taham̐ basai naresū||
dharama dhuraṃdhara nīti nidhānā| teja pratāpa sīla balavānā||
tehi keṃ bhae jugala suta bīrā| saba guna dhāma mahā ranadhīrā||
rāja dhanī jo jeṭha suta āhī| nāma pratāpabhānu asa tāhī||
apara sutahi arimardana nāmā| bhujabala atula acala saṃgrāmā||
bhāihi bhāihi parama samītī| sakala doṣa chala barajita prītī||
jeṭhe sutahi rāja nṛpa dīnhā| hari hita āpu gavana bana kīnhā||

दोहा 153
जब प्रतापरबि भयउ नृप फिरी दोहाई देस।
प्रजा पाल अति बेदबिधि कतहुँ नहीं अघ लेस॥153॥
jaba pratāparabi bhayau nṛpa phirī dohāī desa|
prajā pāla ati bedabidhi katahum̐ nahīṃ agha lesa||153||
दोहा 154#

नृप हितकारक सचिव सयाना। नाम धरमरुचि सुक्र समाना॥
सचिव सयान बंधु बलबीरा। आपु प्रतापपुंज रनधीरा॥
सेन संग चतुरंग अपारा। अमित सुभट सब समर जुझारा॥
सेन बिलोकि राउ हरषाना। अरु बाजे गहगहे निसाना॥
बिजय हेतु कटकई बनाई। सुदिन साधि नृप चलेउ बजाई॥
जहँ तहँ परीं अनेक लराईं। जीते सकल भूप बरिआई॥
सप्त दीप भुजबल बस कीन्हे। लै लै दंड छाड़ि नृप दीन्हे॥
सकल अवनि मंडल तेहि काला। एक प्रतापभानु महिपाला॥

nṛpa hitakāraka saciva sayānā| nāma dharamaruci sukra samānā||
saciva sayāna baṃdhu balabīrā| āpu pratāpapuṃja ranadhīrā||
sena saṃga caturaṃga apārā| amita subhaṭa saba samara jujhārā||
sena biloki rāu haraṣānā| aru bāje gahagahe nisānā||
bijaya hetu kaṭakaī banāī| sudina sādhi nṛpa caleu bajāī||
jaham̐ taham̐ parīṃ aneka larāīṃ| jīte sakala bhūpa bariāī||
sapta dīpa bhujabala basa kīnhe| lai lai daṃḍa chāḍi nṛpa dīnhe||
sakala avani maṃḍala tehi kālā| eka pratāpabhānu mahipālā||

दोहा 154
स्वबस बिस्व करि बाहुबल निज पुर कीन्ह प्रबेसु।
अरथ धरम कामादि सुख सेवइ समयँ नरेसु॥154॥
svabasa bisva kari bāhubala nija pura kīnha prabesu|
aratha dharama kāmādi sukha sevai samayam̐ naresu||154||
दोहा 155#

भूप प्रतापभानु बल पाई। कामधेनु भै भूमि सुहाई॥
सब दुख बरजित प्रजा सुखारी। धरमसील सुंदर नर नारी॥
सचिव धरमरुचि हरि पद प्रीती। नृप हित हेतु सिखव नित नीती॥
गुर सुर संत पितर महिदेवा। करइ सदा नृप सब कै सेवा॥
भूप धरम जे बेद बखाने। सकल करइ सादर सुख माने॥
दिन प्रति देह बिबिध बिधि दाना। सुनहु सास्त्र बर बेद पुराना॥
नाना बापीं कूप तड़ागा। सुमन बाटिका सुंदर बागा॥
बिप्रभवन सुरभवन सुहाए। सब तीरथन्ह बिचित्र बनाए॥

bhūpa pratāpabhānu bala pāī| kāmadhenu bhai bhūmi suhāī||
saba dukha barajita prajā sukhārī| dharamasīla suṃdara nara nārī||
saciva dharamaruci hari pada prītī| nṛpa hita hetu sikhava nita nītī||
gura sura saṃta pitara mahidevā| karai sadā nṛpa saba kai sevā||
bhūpa dharama je beda bakhāne| sakala karai sādara sukha māne||
dina prati deha bibidha bidhi dānā| sunahu sāstra bara beda purānā||
nānā bāpīṃ kūpa taḍāgā| sumana bāṭikā suṃdara bāgā||
biprabhavana surabhavana suhāe| saba tīrathanha bicitra banāe||

दोहा 155
जहँ लगि कहे पुरान श्रुति एक एक सब जाग।
बार सहस्त्र सहस्त्र नृप किए सहित अनुराग॥155॥
jaham̐ lagi kahe purāna śruti eka eka saba jāga|
bāra sahastra sahastra nṛpa kie sahita anurāga||155||
दोहा 156#

हृदयँ न कछु फल अनुसंधाना। भूप बिबेकी परम सुजाना॥
करइ जे धरम करम मन बानी। बासुदेव अर्पित नृप ग्यानी॥
चढ़ि बर बाजि बार एक राजा। मृगया कर सब साजि समाजा॥
बिंध्याचल गभीर बन गयऊ। मृग पुनीत बहु मारत भयऊ॥
फिरत बिपिन नृप दीख बराहू। जनु बन दुरेउ ससिहि ग्रसि राहू॥
बड़ बिधु नहिं समात मुख माहीं। मनहुँ क्रोधबस उगिलत नाहीं॥
कोल कराल दसन छबि गाई। तनु बिसाल पीवर अधिकाई॥
घुरुघुरात हय आरौ पाएँ। चकित बिलोकत कान उठाएँ॥

hṛdayam̐ na kachu phala anusaṃdhānā| bhūpa bibekī parama sujānā||
karai je dharama karama mana bānī| bāsudeva arpita nṛpa gyānī||
caḍhi bara bāji bāra eka rājā| mṛgayā kara saba sāji samājā||
biṃdhyācala gabhīra bana gayaū| mṛga punīta bahu mārata bhayaū||
phirata bipina nṛpa dīkha barāhū| janu bana dureu sasihi grasi rāhū||
baḍa bidhu nahiṃ samāta mukha māhīṃ| manahum̐ krodhabasa ugilata nāhīṃ||
kola karāla dasana chabi gāī| tanu bisāla pīvara adhikāī||
ghurughurāta haya ārau pāem̐| cakita bilokata kāna uṭhāem̐||

दोहा 156
नील महीधर सिखर सम देखि बिसाल बराहु।
चपरि चलेउ हय सुटुकि नृप हाँकि न होइ निबाहु॥156॥
nīla mahīdhara sikhara sama dekhi bisāla barāhu|
capari caleu haya suṭuki nṛpa hām̐ki na hoi nibāhu||156||
दोहा 157#

आवत देखि अधिक रव बाजी। चलेउ बराह मरुत गति भाजी॥
तुरत कीन्ह नृप सर संधाना। महि मिलि गयउ बिलोकत बाना॥
तकि तकि तीर महीस चलावा। करि छल सुअर सरीर बचावा॥
प्रगटत दुरत जाइ मृग भागा। रिस बस भूप चलेउ संग लागा॥
गयउ दूरि घन गहन बराहू। जहँ नाहिन गज बाजि निबाहू॥
अति अकेल बन बिपुल कलेसू। तदपि न मृग मग तजइ नरेसू॥
कोल बिलोकि भूप बड़ धीरा। भागि पैठ गिरिगुहाँ गभीरा॥
अगम देखि नृप अति पछिताई। फिरेउ महाबन परेउ भुलाई॥

āvata dekhi adhika rava bājī| caleu barāha maruta gati bhājī||
turata kīnha nṛpa sara saṃdhānā| mahi mili gayau bilokata bānā||
taki taki tīra mahīsa calāvā| kari chala suara sarīra bacāvā||
pragaṭata durata jāi mṛga bhāgā| risa basa bhūpa caleu saṃga lāgā||
gayau dūri ghana gahana barāhū| jaham̐ nāhina gaja bāji nibāhū||
ati akela bana bipula kalesū| tadapi na mṛga maga tajai naresū||
kola biloki bhūpa baḍa dhīrā| bhāgi paiṭha giriguhām̐ gabhīrā||
agama dekhi nṛpa ati pachitāī| phireu mahābana pareu bhulāī||

दोहा 157
खेद खिन्न छुद्धित तृषित राजा बाजि समेत।
खोजत ब्याकुल सरित सर जल बिनु भयउ अचेत॥157॥
kheda khinna chuddhita tṛṣita rājā bāji sameta|
khojata byākula sarita sara jala binu bhayau aceta||157||
दोहा 158#

फिरत बिपिन आश्रम एक देखा। तहँ बस नृपति कपट मुनिबेषा॥
जासु देस नृप लीन्ह छड़ाई। समर सेन तजि गयउ पराई॥
समय प्रतापभानु कर जानी। आपन अति असमय अनुमानी॥
गयउ न गृह मन बहुत गलानी। मिला न राजहि नृप अभिमानी॥
रिस उर मारि रंक जिमि राजा। बिपिन बसइ तापस कें साजा॥
तासु समीप गवन नृप कीन्हा। यह प्रतापरबि तेहि तब चीन्हा॥
राउ तृषित नहिं सो पहिचाना। देखि सुबेष महामुनि जाना॥
उतरि तुरग तें कीन्ह प्रनामा। परम चतुर न कहेउ निज नामा॥

phirata bipina āśrama eka dekhā| taham̐ basa nṛpati kapaṭa munibeṣā||
jāsu desa nṛpa līnha chaḍāī| samara sena taji gayau parāī||
samaya pratāpabhānu kara jānī| āpana ati asamaya anumānī||
gayau na gṛha mana bahuta galānī| milā na rājahi nṛpa abhimānī||
risa ura māri raṃka jimi rājā| bipina basai tāpasa keṃ sājā||
tāsu samīpa gavana nṛpa kīnhā| yaha pratāparabi tehi taba cīnhā||
rāu tṛṣita nahiṃ so pahicānā| dekhi subeṣa mahāmuni jānā||
utari turaga teṃ kīnha pranāmā| parama catura na kaheu nija nāmā||

दोहा 158
भूपति तृषित बिलोकि तेहिं सरबरु दीन्ह देखाइ।
मज्जन पान समेत हय कीन्ह नृपति हरषाइ॥158॥
bhūpati tṛṣita biloki tehiṃ sarabaru dīnha dekhāi|
majjana pāna sameta haya kīnha nṛpati haraṣāi||158||
दोहा 159#

गै श्रम सकल सुखी नृप भयऊ। निज आश्रम तापस लै गयऊ॥
आसन दीन्ह अस्त रबि जानी। पुनि तापस बोलेउ मृदु बानी॥
को तुम्ह कस बन फिरहु अकेलें। सुंदर जुबा जीव परहेलें॥
चक्रबर्ति के लच्छन तोरें। देखत दया लागि अति मोरें॥
नाम प्रतापभानु अवनीसा। तासु सचिव मैं सुनहु मुनीसा॥
फिरत अहेरें परेउँ भुलाई। बड़ें भाग देखेउँ पद आई॥
हम कहँ दुर्लभ दरस तुम्हारा। जानत हौं कछु भल होनिहारा॥
कह मुनि तात भयउ अँधियारा। जोजन सत्तरि नगरु तुम्हारा॥

gai śrama sakala sukhī nṛpa bhayaū| nija āśrama tāpasa lai gayaū||
āsana dīnha asta rabi jānī| puni tāpasa boleu mṛdu bānī||
ko tumha kasa bana phirahu akeleṃ| suṃdara jubā jīva paraheleṃ||
cakrabarti ke lacchana toreṃ| dekhata dayā lāgi ati moreṃ||
nāma pratāpabhānu avanīsā| tāsu saciva maiṃ sunahu munīsā||
phirata ahereṃ pareum̐ bhulāī| baḍeṃ bhāga dekheum̐ pada āī||
hama kaham̐ durlabha darasa tumhārā| jānata hauṃ kachu bhala honihārā||
kaha muni tāta bhayau am̐dhiyārā| jojana sattari nagaru tumhārā||

दोहा 159(क)
निसा घोर गम्भीर बन पंथ न सुनहु सुजान।
बसहु आजु अस जानि तुम्ह जाएहु होत बिहान॥159(क)॥
nisā ghora gambhīra bana paṃtha na sunahu sujāna|
basahu āju asa jāni tumha jāehu hota bihāna||159(ka)||

दोहा 159(ख)
तुलसी जसि भवतब्यता तैसी मिलइ सहाइ।
आपुनु आवइ ताहि पहिं ताहि तहाँ लै जाइ॥159(ख)॥
tulasī jasi bhavatabyatā taisī milai sahāi|
āpunu āvai tāhi pahiṃ tāhi tahām̐ lai jāi||159(kha)||
दोहा 160#

भलेहिं नाथ आयसु धरि सीसा। बाँधि तुरग तरु बैठ महीसा॥
नृप बहु भाँति प्रसंसेउ ताही। चरन बंदि निज भाग्य सराही॥
पुनि बोले मृदु गिरा सुहाई। जानि पिता प्रभु करउँ ढिठाई॥
मोहि मुनीस सुत सेवक जानी। नाथ नाम निज कहहु बखानी॥
तेहि न जान नृप नृपहि सो जाना। भूप सुह्रद सो कपट सयाना॥
बैरी पुनि छत्री पुनि राजा। छल बल कीन्ह चहइ निज काजा॥
समुझि राजसुख दुखित अराती। अवाँ अनल इव सुलगइ छाती॥
सरल बचन नृप के सुनि काना। बयर सँभारि हृदयँ हरषाना॥

bhalehiṃ nātha āyasu dhari sīsā| bām̐dhi turaga taru baiṭha mahīsā||
nṛpa bahu bhām̐ti prasaṃseu tāhī| carana baṃdi nija bhāgya sarāhī||
puni bole mṛdu girā suhāī| jāni pitā prabhu karaum̐ ḍhiṭhāī||
mohi munīsa suta sevaka jānī| nātha nāma nija kahahu bakhānī||
tehi na jāna nṛpa nṛpahi so jānā| bhūpa suhrada so kapaṭa sayānā||
bairī puni chatrī puni rājā| chala bala kīnha cahai nija kājā||
samujhi rājasukha dukhita arātī| avām̐ anala iva sulagai chātī||
sarala bacana nṛpa ke suni kānā| bayara sam̐bhāri hṛdayam̐ haraṣānā||

दोहा 160
कपट बोरि बानी मृदुल बोलेउ जुगुति समेत।
नाम हमार भिखारि अब निर्धन रहित निकेत॥160॥
kapaṭa bori bānī mṛdula boleu juguti sameta|
nāma hamāra bhikhāri aba nirdhana rahita niketa||160||
दोहा 161#

कह नृप जे बिग्यान निधाना। तुम्ह सारिखे गलित अभिमाना॥
सदा रहहिं अपनपौ दुराएँ। सब बिधि कुसल कुबेष बनाएँ॥
तेहि तें कहहिं संत श्रुति टेरें। परम अकिंचन प्रिय हरि केरें॥
तुम्ह सम अधन भिखारि अगेहा। होत बिरंचि सिवहि संदेहा॥
जोसि सोसि तव चरन नमामी। मो पर कृपा करिअ अब स्वामी॥
सहज प्रीति भूपति कै देखी। आपु बिषय बिस्वास बिसेषी॥
सब प्रकार राजहि अपनाई। बोलेउ अधिक सनेह जनाई॥
सुनु सतिभाउ कहउँ महिपाला। इहाँ बसत बीते बहु काला॥

kaha nṛpa je bigyāna nidhānā| tumha sārikhe galita abhimānā||
sadā rahahiṃ apanapau durāem̐| saba bidhi kusala kubeṣa banāem̐||
tehi teṃ kahahiṃ saṃta śruti ṭereṃ| parama akiṃcana priya hari kereṃ||
tumha sama adhana bhikhāri agehā| hota biraṃci sivahi saṃdehā||
josi sosi tava carana namāmī| mo para kṛpā karia aba svāmī||
sahaja prīti bhūpati kai dekhī| āpu biṣaya bisvāsa biseṣī||
saba prakāra rājahi apanāī| boleu adhika saneha janāī||
sunu satibhāu kahaum̐ mahipālā| ihām̐ basata bīte bahu kālā||

दोहा 161(क)
अब लगि मोहि न मिलेउ कोउ मैं न जनावउँ काहु।
लोकमान्यता अनल सम कर तप कानन दाहु॥161(क)॥
aba lagi mohi na mileu kou maiṃ na janāvaum̐ kāhu|
lokamānyatā anala sama kara tapa kānana dāhu||161(ka)||
सोरठा
तुलसी देखि सुबेषु भूलहिं मूढ़ न चतुर नर।
सुंदर केकिहि पेखु बचन सुधा सम असन अहि॥161(ख)
tulasī dekhi subeṣu bhūlahiṃ mūḍha na catura nara|
suṃdara kekihi pekhu bacana sudhā sama asana ahi||161(kha)
दोहा 162#

तातें गुपुत रहउँ जग माहीं। हरि तजि किमपि प्रयोजन नाहीं॥
प्रभु जानत सब बिनहिं जनाए। कहहु कवनि सिधि लोक रिझाएँ॥
तुम्ह सुचि सुमति परम प्रिय मोरें। प्रीति प्रतीति मोहि पर तोरें॥
अब जौं तात दुरावउँ तोही। दारुन दोष घटइ अति मोही॥
जिमि जिमि तापसु कथइ उदासा। तिमि तिमि नृपहि उपज बिस्वासा॥
देखा स्वबस कर्म मन बानी। तब बोला तापस बगध्यानी॥
नाम हमार एकतनु भाई। सुनि नृप बोले पुनि सिरु नाई॥
कहहु नाम कर अरथ बखानी। मोहि सेवक अति आपन जानी॥

tāteṃ guputa rahaum̐ jaga māhīṃ| hari taji kimapi prayojana nāhīṃ||
prabhu jānata saba binahiṃ janāe| kahahu kavani sidhi loka rijhāem̐||
tumha suci sumati parama priya moreṃ| prīti pratīti mohi para toreṃ||
aba jauṃ tāta durāvaum̐ tohī| dāruna doṣa ghaṭai ati mohī||
jimi jimi tāpasu kathai udāsā| timi timi nṛpahi upaja bisvāsā||
dekhā svabasa karma mana bānī| taba bolā tāpasa bagadhyānī||
nāma hamāra ekatanu bhāī| suni nṛpa bole puni siru nāī||
kahahu nāma kara aratha bakhānī| mohi sevaka ati āpana jānī||

दोहा 162
आदिसृष्टि उपजी जबहिं तब उतपति भै मोरि।
नाम एकतनु हेतु तेहि देह न धरी बहोरि॥162॥
ādisṛṣṭi upajī jabahiṃ taba utapati bhai mori|
nāma ekatanu hetu tehi deha na dharī bahori||162||
सोरठा 163#

जनि आचरजु करहु मन माहीं। सुत तप तें दुर्लभ कछु नाहीं॥
तपबल तें जग सृजइ बिधाता। तपबल बिष्नु भए परित्राता॥
तपबल संभु करहिं संघारा। तप तें अगम न कछु संसारा॥
भयउ नृपहि सुनि अति अनुरागा। कथा पुरातन कहै सो लागा॥
करम धरम इतिहास अनेका। करइ निरूपन बिरति बिबेका॥
उदभव पालन प्रलय कहानी। कहेसि अमित आचरज बखानी॥
सुनि महीप तापस बस भयऊ। आपन नाम कहत तब लयऊ॥
कह तापस नृप जानउँ तोही। कीन्हेहु कपट लाग भल मोही॥

jani ācaraju karahu mana māhīṃ| suta tapa teṃ durlabha kachu nāhīṃ||
tapabala teṃ jaga sṛjai bidhātā| tapabala biṣnu bhae paritrātā||
tapabala saṃbhu karahiṃ saṃghārā| tapa teṃ agama na kachu saṃsārā||
bhayau nṛpahi suni ati anurāgā| kathā purātana kahai so lāgā||
karama dharama itihāsa anekā| karai nirūpana birati bibekā||
udabhava pālana pralaya kahānī| kahesi amita ācaraja bakhānī||
suni mahīpa tāpasa basa bhayaū| āpana nāma kahata taba layaū||
kaha tāpasa nṛpa jānaum̐ tohī| kīnhehu kapaṭa lāga bhala mohī||

सोरठा 163
सुनु महीस असि नीति जहँ तहँ नाम न कहहिं नृप।
मोहि तोहि पर अति प्रीति सोइ चतुरता बिचारि तव॥163॥
sunu mahīsa asi nīti jaham̐ taham̐ nāma na kahahiṃ nṛpa|
mohi tohi para ati prīti soi caturatā bicāri tava||163||
दोहा 164#

नाम तुम्हार प्रताप दिनेसा। सत्यकेतु तव पिता नरेसा॥
गुर प्रसाद सब जानिअ राजा। कहिअ न आपन जानि अकाजा॥
देखि तात तव सहज सुधाई। प्रीति प्रतीति नीति निपुनाई॥
उपजि परी ममता मन मोरें। कहउँ कथा निज पूछे तोरें॥
अब प्रसन्न मैं संसय नाहीं। मागु जो भूप भाव मन माहीं॥
सुनि सुबचन भूपति हरषाना। गहि पद बिनय कीन्हि बिधि नाना॥
कृपासिंधु मुनि दरसन तोरें। चारि पदारथ करतल मोरें॥
प्रभुहि तथापि प्रसन्न बिलोकी। मागि अगम बर होउँ असोकी॥

nāma tumhāra pratāpa dinesā| satyaketu tava pitā naresā||
gura prasāda saba jānia rājā| kahia na āpana jāni akājā||
dekhi tāta tava sahaja sudhāī| prīti pratīti nīti nipunāī||
upaji parī mamatā mana moreṃ| kahaum̐ kathā nija pūche toreṃ||
aba prasanna maiṃ saṃsaya nāhīṃ| māgu jo bhūpa bhāva mana māhīṃ||
suni subacana bhūpati haraṣānā| gahi pada binaya kīnhi bidhi nānā||
kṛpāsiṃdhu muni darasana toreṃ| cāri padāratha karatala moreṃ||
prabhuhi tathāpi prasanna bilokī| māgi agama bara houm̐ asokī||

दोहा 164
जरा मरन दुख रहित तनु समर जितै जनि कोउ।
एकछत्र रिपुहीन महि राज कलप सत होउ॥164॥
jarā marana dukha rahita tanu samara jitai jani kou|
ekachatra ripuhīna mahi rāja kalapa sata hou||164||
दोहा 165#

कह तापस नृप ऐसेइ होऊ। कारन एक कठिन सुनु सोऊ॥
कालउ तुअ पद नाइहि सीसा। एक बिप्रकुल छाड़ि महीसा॥
तपबल बिप्र सदा बरिआरा। तिन्ह के कोप न कोउ रखवारा॥
जौं बिप्रन्ह सब करहु नरेसा। तौ तुअ बस बिधि बिष्नु महेसा॥
चल न ब्रह्मकुल सन बरिआई। सत्य कहउँ दोउ भुजा उठाई॥
बिप्र श्राप बिनु सुनु महिपाला। तोर नास नहिं कवनेहुँ काला॥
हरषेउ राउ बचन सुनि तासू। नाथ न होइ मोर अब नासू॥
तव प्रसाद प्रभु कृपानिधाना। मो कहुँ सर्ब काल कल्याना॥

kaha tāpasa nṛpa aisei hoū| kārana eka kaṭhina sunu soū||
kālau tua pada nāihi sīsā| eka biprakula chāḍi mahīsā||
tapabala bipra sadā bariārā| tinha ke kopa na kou rakhavārā||
jauṃ bipranha saba karahu naresā| tau tua basa bidhi biṣnu mahesā||
cala na brahmakula sana bariāī| satya kahaum̐ dou bhujā uṭhāī||
bipra śrāpa binu sunu mahipālā| tora nāsa nahiṃ kavanehum̐ kālā||
haraṣeu rāu bacana suni tāsū| nātha na hoi mora aba nāsū||
tava prasāda prabhu kṛpānidhānā| mo kahum̐ sarba kāla kalyānā||

दोहा 165
एवमस्तु कहि कपटमुनि बोला कुटिल बहोरि।
मिलब हमार भुलाब निज कहहु त हमहि न खोरि॥165॥
evamastu kahi kapaṭamuni bolā kuṭila bahori|
milaba hamāra bhulāba nija kahahu ta hamahi na khori||165||
दोहा 166#

तातें मैं तोहि बरजउँ राजा। कहें कथा तव परम अकाजा॥
छठें श्रवन यह परत कहानी। नास तुम्हार सत्य मम बानी॥
यह प्रगटें अथवा द्विजश्रापा। नास तोर सुनु भानुप्रतापा॥
आन उपायँ निधन तव नाहीं। जौं हरि हर कोपहिं मन माहीं॥
सत्य नाथ पद गहि नृप भाषा। द्विज गुर कोप कहहु को राखा॥
राखइ गुर जौं कोप बिधाता। गुर बिरोध नहिं कोउ जग त्राता॥
जौं न चलब हम कहे तुम्हारें। होउ नास नहिं सोच हमारें॥
एकहिं डर डरपत मन मोरा। प्रभु महिदेव श्राप अति घोरा॥

tāteṃ maiṃ tohi barajaum̐ rājā| kaheṃ kathā tava parama akājā||
chaṭheṃ śravana yaha parata kahānī| nāsa tumhāra satya mama bānī||
yaha pragaṭeṃ athavā dvijaśrāpā| nāsa tora sunu bhānupratāpā||
āna upāyam̐ nidhana tava nāhīṃ| jauṃ hari hara kopahiṃ mana māhīṃ||
satya nātha pada gahi nṛpa bhāṣā| dvija gura kopa kahahu ko rākhā||
rākhai gura jauṃ kopa bidhātā| gura birodha nahiṃ kou jaga trātā||
jauṃ na calaba hama kahe tumhāreṃ| hou nāsa nahiṃ soca hamāreṃ||
ekahiṃ ḍara ḍarapata mana morā| prabhu mahideva śrāpa ati ghorā||

दोहा 166
होहिं बिप्र बस कवन बिधि कहहु कृपा करि सोउ।
तुम्ह तजि दीनदयाल निज हितू न देखउँ कोउ॥166॥
hohiṃ bipra basa kavana bidhi kahahu kṛpā kari sou|
tumha taji dīnadayāla nija hitū na dekhaum̐ kou||166||
दोहा 167#

सुनु नृप बिबिध जतन जग माहीं। कष्टसाध्य पुनि होहिं कि नाहीं॥
अहइ एक अति सुगम उपाई। तहाँ परंतु एक कठिनाई॥
मम आधीन जुगुति नृप सोई। मोर जाब तव नगर न होई॥
आजु लगें अरु जब तें भयऊँ। काहू के गृह ग्राम न गयऊँ॥
जौं न जाउँ तव होइ अकाजू। बना आइ असमंजस आजू॥
सुनि महीस बोलेउ मृदु बानी। नाथ निगम असि नीति बखानी॥
बड़े सनेह लघुन्ह पर करहीं। गिरि निज सिरनि सदा तृन धरहीं॥
जलधि अगाध मौलि बह फेनू। संतत धरनि धरत सिर रेनू॥

sunu nṛpa bibidha jatana jaga māhīṃ| kaṣṭasādhya puni hohiṃ ki nāhīṃ||
ahai eka ati sugama upāī| tahām̐ paraṃtu eka kaṭhināī||
mama ādhīna juguti nṛpa soī| mora jāba tava nagara na hoī||
āju lageṃ aru jaba teṃ bhayaūm̐| kāhū ke gṛha grāma na gayaūm̐||
jauṃ na jāum̐ tava hoi akājū| banā āi asamaṃjasa ājū||
suni mahīsa boleu mṛdu bānī| nātha nigama asi nīti bakhānī||
baḍe saneha laghunha para karahīṃ| giri nija sirani sadā tṛna dharahīṃ||
jaladhi agādha mauli baha phenū| saṃtata dharani dharata sira renū||

दोहा 167
अस कहि गहे नरेस पद स्वामी होहु कृपाल।
मोहि लागि दुख सहिअ प्रभु सज्जन दीनदयाल॥167॥
asa kahi gahe naresa pada svāmī hohu kṛpāla|
mohi lāgi dukha sahia prabhu sajjana dīnadayāla||167||
दोहा 168#

जानि नृपहि आपन आधीना। बोला तापस कपट प्रबीना॥
सत्य कहउँ भूपति सुनु तोही। जग नाहिन दुर्लभ कछु मोही॥
अवसि काज मैं करिहउँ तोरा। मन तन बचन भगत तैं मोरा॥
जोग जुगुति तप मंत्र प्रभाऊ। फलइ तबहिं जब करिअ दुराऊ॥
जौं नरेस मैं करौं रसोई। तुम्ह परुसहु मोहि जान न कोई॥
अन्न सो जोइ जोइ भोजन करई। सोइ सोइ तव आयसु अनुसरई॥
पुनि तिन्ह के गृह जेवँइ जोऊ। तव बस होइ भूप सुनु सोऊ॥
जाइ उपाय रचहु नृप एहू। संबत भरि संकलप करेहू॥

jāni nṛpahi āpana ādhīnā| bolā tāpasa kapaṭa prabīnā||
satya kahaum̐ bhūpati sunu tohī| jaga nāhina durlabha kachu mohī||
avasi kāja maiṃ karihaum̐ torā| mana tana bacana bhagata taiṃ morā||
joga juguti tapa maṃtra prabhāū| phalai tabahiṃ jaba karia durāū||
jauṃ naresa maiṃ karauṃ rasoī| tumha parusahu mohi jāna na koī||
anna so joi joi bhojana karaī| soi soi tava āyasu anusaraī||
puni tinha ke gṛha jevam̐i joū| tava basa hoi bhūpa sunu soū||
jāi upāya racahu nṛpa ehū| saṃbata bhari saṃkalapa karehū||

दोहा 168
नित नूतन द्विज सहस सत बरेहु सहित परिवार।
मैं तुम्हरे संकलप लगि दिनहिंûकरिब जेवनार॥168॥
nita nūtana dvija sahasa sata barehu sahita parivāra|
maiṃ tumhare saṃkalapa lagi dinahiṃûkariba jevanāra||168||
दोहा 169#

एहि बिधि भूप कष्ट अति थोरें। होइहहिं सकल बिप्र बस तोरें॥
करिहहिं बिप्र होम मख सेवा। तेहिं प्रसंग सहजेहिं बस देवा॥
और एक तोहि कहउँ लखाऊ। मैं एहि बेष न आउब काऊ॥
तुम्हरे उपरोहित कहुँ राया। हरि आनब मैं करि निज माया॥
तपबल तेहि करि आपु समाना। रखिहउँ इहाँ बरष परवाना॥
मैं धरि तासु बेषु सुनु राजा। सब बिधि तोर सँवारब काजा॥
गै निसि बहुत सयन अब कीजे। मोहि तोहि भूप भेंट दिन तीजे॥
मैं तपबल तोहि तुरग समेता। पहुँचेहउँ सोवतहि निकेता॥

ehi bidhi bhūpa kaṣṭa ati thoreṃ| hoihahiṃ sakala bipra basa toreṃ||
karihahiṃ bipra homa makha sevā| tehiṃ prasaṃga sahajehiṃ basa devā||
aura eka tohi kahaum̐ lakhāū| maiṃ ehi beṣa na āuba kāū||
tumhare uparohita kahum̐ rāyā| hari ānaba maiṃ kari nija māyā||
tapabala tehi kari āpu samānā| rakhihaum̐ ihām̐ baraṣa paravānā||
maiṃ dhari tāsu beṣu sunu rājā| saba bidhi tora sam̐vāraba kājā||
gai nisi bahuta sayana aba kīje| mohi tohi bhūpa bheṃṭa dina tīje||
maiṃ tapabala tohi turaga sametā| pahum̐cehaum̐ sovatahi niketā||

दोहा 169
मैं आउब सोइ बेषु धरि पहिचानेहु तब मोहि।
जब एकांत बोलाइ सब कथा सुनावौं तोहि॥169॥
maiṃ āuba soi beṣu dhari pahicānehu taba mohi|
jaba ekāṃta bolāi saba kathā sunāvauṃ tohi||169||
दोहा 170#

सयन कीन्ह नृप आयसु मानी। आसन जाइ बैठ छलग्यानी॥
श्रमित भूप निद्रा अति आई। सो किमि सोव सोच अधिकाई॥
कालकेतु निसिचर तहँ आवा। जेहिं सूकर होइ नृपहि भुलावा॥
परम मित्र तापस नृप केरा। जानइ सो अति कपट घनेरा॥
तेहि के सत सुत अरु दस भाई। खल अति अजय देव दुखदाई॥
प्रथमहिं भूप समर सब मारे। बिप्र संत सुर देखि दुखारे॥
तेहिं खल पाछिल बयरु सँभारा। तापस नृप मिलि मंत्र बिचारा॥
जेहि रिपु छय सोइ रचेन्हि उपाऊ। भावी बस न जान कछु राऊ॥

sayana kīnha nṛpa āyasu mānī| āsana jāi baiṭha chalagyānī||
śramita bhūpa nidrā ati āī| so kimi sova soca adhikāī||
kālaketu nisicara taham̐ āvā| jehiṃ sūkara hoi nṛpahi bhulāvā||
parama mitra tāpasa nṛpa kerā| jānai so ati kapaṭa ghanerā||
tehi ke sata suta aru dasa bhāī| khala ati ajaya deva dukhadāī||
prathamahiṃ bhūpa samara saba māre| bipra saṃta sura dekhi dukhāre||
tehiṃ khala pāchila bayaru sam̐bhārā| tāpasa nṛpa mili maṃtra bicārā||
jehi ripu chaya soi racenhi upāū| bhāvī basa na jāna kachu rāū||

दोहा 170
रिपु तेजसी अकेल अपि लघु करि गनिअ न ताहु।
अजहुँ देत दुख रबि ससिहि सिर अवसेषित राहु॥170॥
ripu tejasī akela api laghu kari gania na tāhu|
ajahum̐ deta dukha rabi sasihi sira avaseṣita rāhu||170||
दोहा 171#

तापस नृप निज सखहि निहारी। हरषि मिलेउ उठि भयउ सुखारी॥
मित्रहि कहि सब कथा सुनाई। जातुधान बोला सुख पाई॥
अब साधेउँ रिपु सुनहु नरेसा। जौं तुम्ह कीन्ह मोर उपदेसा॥
परिहरि सोच रहहु तुम्ह सोई। बिनु औषध बिआधि बिधि खोई॥
कुल समेत रिपु मूल बहाई। चौथें दिवस मिलब मैं आई॥
तापस नृपहि बहुत परितोषी। चला महाकपटी अतिरोषी॥
भानुप्रतापहि बाजि समेता। पहुँचाएसि छन माझ निकेता॥
नृपहि नारि पहिं सयन कराई। हयगृहँ बाँधेसि बाजि बनाई॥

tāpasa nṛpa nija sakhahi nihārī| haraṣi mileu uṭhi bhayau sukhārī||
mitrahi kahi saba kathā sunāī| jātudhāna bolā sukha pāī||
aba sādheum̐ ripu sunahu naresā| jauṃ tumha kīnha mora upadesā||
parihari soca rahahu tumha soī| binu auṣadha biādhi bidhi khoī||
kula sameta ripu mūla bahāī| cautheṃ divasa milaba maiṃ āī||
tāpasa nṛpahi bahuta paritoṣī| calā mahākapaṭī atiroṣī||
bhānupratāpahi bāji sametā| pahum̐cāesi chana mājha niketā||
nṛpahi nāri pahiṃ sayana karāī| hayagṛham̐ bām̐dhesi bāji banāī||

दोहा 171
राजा के उपरोहितहि हरि लै गयउ बहोरि।
लै राखेसि गिरि खोह महुँ मायाँ करि मति भोरि॥171॥
rājā ke uparohitahi hari lai gayau bahori|
lai rākhesi giri khoha mahum̐ māyām̐ kari mati bhori||171||
दोहा 172#

आपु बिरचि उपरोहित रूपा। परेउ जाइ तेहि सेज अनूपा॥
जागेउ नृप अनभएँ बिहाना। देखि भवन अति अचरजु माना॥
मुनि महिमा मन महुँ अनुमानी। उठेउ गवँहिं जेहि जान न रानी॥
कानन गयउ बाजि चढ़ि तेहीं। पुर नर नारि न जानेउ केहीं॥
गएँ जाम जुग भूपति आवा। घर घर उत्सव बाज बधावा॥
उपरोहितहि देख जब राजा। चकित बिलोकि सुमिरि सोइ काजा॥
जुग सम नृपहि गए दिन तीनी। कपटी मुनि पद रह मति लीनी॥
समय जानि उपरोहित आवा। नृपहि मते सब कहि समुझावा॥

āpu biraci uparohita rūpā| pareu jāi tehi seja anūpā||
jāgeu nṛpa anabhaem̐ bihānā| dekhi bhavana ati acaraju mānā||
muni mahimā mana mahum̐ anumānī| uṭheu gavam̐hiṃ jehi jāna na rānī||
kānana gayau bāji caḍhi tehīṃ| pura nara nāri na jāneu kehīṃ||
gaem̐ jāma juga bhūpati āvā| ghara ghara utsava bāja badhāvā||
uparohitahi dekha jaba rājā| cakita biloki sumiri soi kājā||
juga sama nṛpahi gae dina tīnī| kapaṭī muni pada raha mati līnī||
samaya jāni uparohita āvā| nṛpahi mate saba kahi samujhāvā||

दोहा 172
नृप हरषेउ पहिचानि गुरु भ्रम बस रहा न चेत।
बरे तुरत सत सहस बर बिप्र कुटुंब समेत॥172॥
nṛpa haraṣeu pahicāni guru bhrama basa rahā na ceta|
bare turata sata sahasa bara bipra kuṭuṃba sameta||172||
दोहा 173#

उपरोहित जेवनार बनाई। छरस चारि बिधि जसि श्रुति गाई॥
मायामय तेहिं कीन्ह रसोई। बिंजन बहु गनि सकइ न कोई॥
बिबिध मृगन्ह कर आमिष राँधा। तेहि महुँ बिप्र माँसु खल साँधा॥
भोजन कहुँ सब बिप्र बोलाए। पद पखारि सादर बैठाए॥
परुसन जबहिं लाग महिपाला। भै अकासबानी तेहि काला॥
बिप्रबृंद उठि उठि गृह जाहू। है बड़ि हानि अन्न जनि खाहू॥
भयउ रसोईं भूसुर माँसू। सब द्विज उठे मानि बिस्वासू॥
भूप बिकल मति मोहँ भुलानी। भावी बस आव मुख बानी॥

uparohita jevanāra banāī| charasa cāri bidhi jasi śruti gāī||
māyāmaya tehiṃ kīnha rasoī| biṃjana bahu gani sakai na koī||
bibidha mṛganha kara āmiṣa rām̐dhā| tehi mahum̐ bipra mām̐su khala sām̐dhā||
bhojana kahum̐ saba bipra bolāe| pada pakhāri sādara baiṭhāe||
parusana jabahiṃ lāga mahipālā| bhai akāsabānī tehi kālā||
biprabṛṃda uṭhi uṭhi gṛha jāhū| hai baḍi hāni anna jani khāhū||
bhayau rasoīṃ bhūsura mām̐sū| saba dvija uṭhe māni bisvāsū||
bhūpa bikala mati moham̐ bhulānī| bhāvī basa āva mukha bānī||

दोहा 173
बोले बिप्र सकोप तब नहिं कछु कीन्ह बिचार।
जाइ निसाचर होहु नृप मूढ़ सहित परिवार॥173॥
bole bipra sakopa taba nahiṃ kachu kīnha bicāra|
jāi nisācara hohu nṛpa mūḍha sahita parivāra||173||
दोहा 174#

छत्रबंधु तैं बिप्र बोलाई। घालै लिए सहित समुदाई॥
ईस्वर राखा धरम हमारा। जैहसि तैं समेत परिवारा॥
संबत मध्य नास तव होऊ। जलदाता न रहिहि कुल कोऊ॥
नृप सुनि श्राप बिकल अति त्रासा। भै बहोरि बर गिरा अकासा॥
बिप्रहु श्राप बिचारि न दीन्हा। नहिं अपराध भूप कछु कीन्हा॥
चकित बिप्र सब सुनि नभबानी। भूप गयउ जहँ भोजन खानी॥
तहँ न असन नहिं बिप्र सुआरा। फिरेउ राउ मन सोच अपारा॥
सब प्रसंग महिसुरन्ह सुनाई। त्रसित परेउ अवनीं अकुलाई॥

chatrabaṃdhu taiṃ bipra bolāī| ghālai lie sahita samudāī||
īsvara rākhā dharama hamārā| jaihasi taiṃ sameta parivārā||
saṃbata madhya nāsa tava hoū| jaladātā na rahihi kula koū||
nṛpa suni śrāpa bikala ati trāsā| bhai bahori bara girā akāsā||
biprahu śrāpa bicāri na dīnhā| nahiṃ aparādha bhūpa kachu kīnhā||
cakita bipra saba suni nabhabānī| bhūpa gayau jaham̐ bhojana khānī||
taham̐ na asana nahiṃ bipra suārā| phireu rāu mana soca apārā||
saba prasaṃga mahisuranha sunāī| trasita pareu avanīṃ akulāī||

दोहा 174
भूपति भावी मिटइ नहिं जदपि न दूषन तोर।
किएँ अन्यथा होइ नहिं बिप्रश्राप अति घोर॥174॥
bhūpati bhāvī miṭai nahiṃ jadapi na dūṣana tora|
kiem̐ anyathā hoi nahiṃ bipraśrāpa ati ghora||174||
दोहा 175#

अस कहि सब महिदेव सिधाए। समाचार पुरलोगन्ह पाए॥
सोचहिं दूषन दैवहि देहीं। बिचरत हंस काग किय जेहीं॥
उपरोहितहि भवन पहुँचाई। असुर तापसहि खबरि जनाई॥
तेहिं खल जहँ तहँ पत्र पठाए। सजि सजि सेन भूप सब धाए॥
घेरेन्हि नगर निसान बजाई। बिबिध भाँति नित होइ लराई॥
जूझे सकल सुभट करि करनी। बंधु समेत परेउ नृप धरनी॥
सत्यकेतु कुल कोउ नहिं बाँचा। बिप्रश्राप किमि होइ असाँचा॥
रिपु जिति सब नृप नगर बसाई। निज पुर गवने जय जसु पाई॥

asa kahi saba mahideva sidhāe| samācāra puraloganha pāe||
socahiṃ dūṣana daivahi dehīṃ| bicarata haṃsa kāga kiya jehīṃ||
uparohitahi bhavana pahum̐cāī| asura tāpasahi khabari janāī||
tehiṃ khala jaham̐ taham̐ patra paṭhāe| saji saji sena bhūpa saba dhāe||
gherenhi nagara nisāna bajāī| bibidha bhām̐ti nita hoi larāī||
jūjhe sakala subhaṭa kari karanī| baṃdhu sameta pareu nṛpa dharanī||
satyaketu kula kou nahiṃ bām̐cā| bipraśrāpa kimi hoi asām̐cā||
ripu jiti saba nṛpa nagara basāī| nija pura gavane jaya jasu pāī||

दोहा 175
भरद्वाज सुनु जाहि जब होइ बिधाता बाम।
धूरि मेरुसम जनक जम ताहि ब्यालसम दाम॥।175॥
bharadvāja sunu jāhi jaba hoi bidhātā bāma|
dhūri merusama janaka jama tāhi byālasama dāma|||175||
दोहा 176#

काल पाइ मुनि सुनु सोइ राजा। भयउ निसाचर सहित समाजा॥
दस सिर ताहि बीस भुजदंडा। रावन नाम बीर बरिबंडा॥
भूप अनुज अरिमर्दन नामा। भयउ सो कुंभकरन बलधामा॥
सचिव जो रहा धरमरुचि जासू। भयउ बिमात्र बंधु लघु तासू॥
नाम बिभीषन जेहि जग जाना। बिष्नुभगत बिग्यान निधाना॥
रहे जे सुत सेवक नृप केरे। भए निसाचर घोर घनेरे॥
कामरूप खल जिनस अनेका। कुटिल भयंकर बिगत बिबेका॥
कृपा रहित हिंसक सब पापी। बरनि न जाहिं बिस्व परितापी॥

kāla pāi muni sunu soi rājā| bhayau nisācara sahita samājā||
dasa sira tāhi bīsa bhujadaṃḍā| rāvana nāma bīra baribaṃḍā||
bhūpa anuja arimardana nāmā| bhayau so kuṃbhakarana baladhāmā||
saciva jo rahā dharamaruci jāsū| bhayau bimātra baṃdhu laghu tāsū||
nāma bibhīṣana jehi jaga jānā| biṣnubhagata bigyāna nidhānā||
rahe je suta sevaka nṛpa kere| bhae nisācara ghora ghanere||
kāmarūpa khala jinasa anekā| kuṭila bhayaṃkara bigata bibekā||
kṛpā rahita hiṃsaka saba pāpī| barani na jāhiṃ bisva paritāpī||

दोहा 176
उपजे जदपि पुलस्त्यकुल पावन अमल अनूप।
तदपि महीसुर श्राप बस भए सकल अघरूप॥176॥
upaje jadapi pulastyakula pāvana amala anūpa|
tadapi mahīsura śrāpa basa bhae sakala agharūpa||176||
दोहा 177#

कीन्ह बिबिध तप तीनिहुँ भाई। परम उग्र नहिं बरनि सो जाई॥
गयउ निकट तप देखि बिधाता। मागहु बर प्रसन्न मैं ताता॥
करि बिनती पद गहि दससीसा। बोलेउ बचन सुनहु जगदीसा॥
हम काहू के मरहिं न मारें। बानर मनुज जाति दुइ बारें॥
एवमस्तु तुम्ह बड़ तप कीन्हा। मैं ब्रह्माँ मिलि तेहि बर दीन्हा॥
पुनि प्रभु कुंभकरन पहिं गयऊ। तेहि बिलोकि मन बिसमय भयऊ॥
जौं एहिं खल नित करब अहारू। होइहि सब उजारि संसारू॥
सारद प्रेरि तासु मति फेरी। मागेसि नीद मास षट केरी॥

kīnha bibidha tapa tīnihum̐ bhāī| parama ugra nahiṃ barani so jāī||
gayau nikaṭa tapa dekhi bidhātā| māgahu bara prasanna maiṃ tātā||
kari binatī pada gahi dasasīsā| boleu bacana sunahu jagadīsā||
hama kāhū ke marahiṃ na māreṃ| bānara manuja jāti dui bāreṃ||
evamastu tumha baḍa tapa kīnhā| maiṃ brahmām̐ mili tehi bara dīnhā||
puni prabhu kuṃbhakarana pahiṃ gayaū| tehi biloki mana bisamaya bhayaū||
jauṃ ehiṃ khala nita karaba ahārū| hoihi saba ujāri saṃsārū||
sārada preri tāsu mati pherī| māgesi nīda māsa ṣaṭa kerī||

दोहा 177
गए बिभीषन पास पुनि कहेउ पुत्र बर मागु।
तेहिं मागेउ भगवंत पद कमल अमल अनुरागु॥177॥
gae bibhīṣana pāsa puni kaheu putra bara māgu|
tehiṃ māgeu bhagavaṃta pada kamala amala anurāgu||177||
दोहा 178#

तिन्हि देइ बर ब्रह्म सिधाए। हरषित ते अपने गृह आए॥
मय तनुजा मंदोदरि नामा। परम सुंदरी नारि ललामा॥
सोइ मयँ दीन्हि रावनहि आनी। होइहि जातुधानपति जानी॥
हरषित भयउ नारि भलि पाई। पुनि दोउ बंधु बिआहेसि जाई॥
गिरि त्रिकूट एक सिंधु मझारी। बिधि निर्मित दुर्गम अति भारी॥
सोइ मय दानवँ बहुरि सँवारा। कनक रचित मनिभवन अपारा॥
भोगावति जसि अहिकुल बासा। अमरावति जसि सक्रनिवासा॥
तिन्ह तें अधिक रम्य अति बंका। जग बिख्यात नाम तेहि लंका॥

tinhi dei bara brahma sidhāe| haraṣita te apane gṛha āe||
maya tanujā maṃdodari nāmā| parama suṃdarī nāri lalāmā||
soi mayam̐ dīnhi rāvanahi ānī| hoihi jātudhānapati jānī||
haraṣita bhayau nāri bhali pāī| puni dou baṃdhu biāhesi jāī||
giri trikūṭa eka siṃdhu majhārī| bidhi nirmita durgama ati bhārī||
soi maya dānavam̐ bahuri sam̐vārā| kanaka racita manibhavana apārā||
bhogāvati jasi ahikula bāsā| amarāvati jasi sakranivāsā||
tinha teṃ adhika ramya ati baṃkā| jaga bikhyāta nāma tehi laṃkā||

दोहा 178(क)
खाईं सिंधु गभीर अति चारिहुँ दिसि फिरि आव।
कनक कोट मनि खचित दृढ़ बरनि न जाइ बनाव॥178(क)॥
khāīṃ siṃdhu gabhīra ati cārihum̐ disi phiri āva|
kanaka koṭa mani khacita dṛḍha barani na jāi banāva||178(ka)||

दोहा 178(ख)
हरिप्रेरित जेहिं कलप जोइ जातुधानपति होइ।
सूर प्रतापी अतुलबल दल समेत बस सोइ॥178(ख)॥
hariprerita jehiṃ kalapa joi jātudhānapati hoi|
sūra pratāpī atulabala dala sameta basa soi||178(kha)||
दोहा 179#

रहे तहाँ निसिचर भट भारे। ते सब सुरन्ह समर संघारे॥
अब तहँ रहहिं सक्र के प्रेरे। रच्छक कोटि जच्छपति केरे॥
दसमुख कतहुँ खबरि असि पाई। सेन साजि गढ़ घेरेसि जाई॥
देखि बिकट भट बड़ि कटकाई। जच्छ जीव लै गए पराई॥
फिरि सब नगर दसानन देखा। गयउ सोच सुख भयउ बिसेषा॥
सुंदर सहज अगम अनुमानी। कीन्हि तहाँ रावन रजधानी॥
जेहि जस जोग बाँटि गृह दीन्हे। सुखी सकल रजनीचर कीन्हे॥
एक बार कुबेर पर धावा। पुष्पक जान जीति लै आवा॥

rahe tahām̐ nisicara bhaṭa bhāre| te saba suranha samara saṃghāre||
aba taham̐ rahahiṃ sakra ke prere| racchaka koṭi jacchapati kere||
dasamukha katahum̐ khabari asi pāī| sena sāji gaḍha gheresi jāī||
dekhi bikaṭa bhaṭa baḍi kaṭakāī| jaccha jīva lai gae parāī||
phiri saba nagara dasānana dekhā| gayau soca sukha bhayau biseṣā||
suṃdara sahaja agama anumānī| kīnhi tahām̐ rāvana rajadhānī||
jehi jasa joga bām̐ṭi gṛha dīnhe| sukhī sakala rajanīcara kīnhe||
eka bāra kubera para dhāvā| puṣpaka jāna jīti lai āvā||

दोहा 179
कौतुकहीं कैलास पुनि लीन्हेसि जाइ उठाइ।
मनहुँ तौलि निज बाहुबल चला बहुत सुख पाइ॥179॥
kautukahīṃ kailāsa puni līnhesi jāi uṭhāi|
manahum̐ tauli nija bāhubala calā bahuta sukha pāi||179||
दोहा 180#

सुख संपति सुत सेन सहाई। जय प्रताप बल बुद्धि बड़ाई॥
नित नूतन सब बाढ़त जाई। जिमि प्रतिलाभ लोभ अधिकाई॥
अतिबल कुंभकरन अस भ्राता। जेहि कहुँ नहिं प्रतिभट जग जाता॥
करइ पान सोवइ षट मासा। जागत होइ तिहुँ पुर त्रासा॥
जौं दिन प्रति अहार कर सोई। बिस्व बेगि सब चौपट होई॥
समर धीर नहिं जाइ बखाना। तेहि सम अमित बीर बलवाना॥
बारिदनाद जेठ सुत तासू। भट महुँ प्रथम लीक जग जासू॥
जेहि न होइ रन सनमुख कोई। सुरपुर नितहिं परावन होई॥

sukha saṃpati suta sena sahāī| jaya pratāpa bala buddhi baḍāī||
nita nūtana saba bāḍhata jāī| jimi pratilābha lobha adhikāī||
atibala kuṃbhakarana asa bhrātā| jehi kahum̐ nahiṃ pratibhaṭa jaga jātā||
karai pāna sovai ṣaṭa māsā| jāgata hoi tihum̐ pura trāsā||
jauṃ dina prati ahāra kara soī| bisva begi saba caupaṭa hoī||
samara dhīra nahiṃ jāi bakhānā| tehi sama amita bīra balavānā||
bāridanāda jeṭha suta tāsū| bhaṭa mahum̐ prathama līka jaga jāsū||
jehi na hoi rana sanamukha koī| surapura nitahiṃ parāvana hoī||

दोहा 180
कुमुख अकंपन कुलिसरद धूमकेतु अतिकाय।
एक एक जग जीति सक ऐसे सुभट निकाय॥180॥
kumukha akaṃpana kulisarada dhūmaketu atikāya|
eka eka jaga jīti saka aise subhaṭa nikāya||180||
दोहा 181#

कामरूप जानहिं सब माया। सपनेहुँ जिन्ह कें धरम न दाया॥
दसमुख बैठ सभाँ एक बारा। देखि अमित आपन परिवारा॥
सुत समूह जन परिजन नाती। गे को पार निसाचर जाती॥
सेन बिलोकि सहज अभिमानी। बोला बचन क्रोध मद सानी॥
सुनहु सकल रजनीचर जूथा। हमरे बैरी बिबुध बरूथा॥
ते सनमुख नहिं करहिं लराई। देखि सबल रिपु जाहिं पराई॥
तेन्ह कर मरन एक बिधि होई। कहउँ बुझाइ सुनहु अब सोई॥
द्विजभोजन मख होम सराधा॥सब कै जाइ करहु तुम्ह बाधा॥

kāmarūpa jānahiṃ saba māyā| sapanehum̐ jinha keṃ dharama na dāyā||
dasamukha baiṭha sabhām̐ eka bārā| dekhi amita āpana parivārā||
suta samūha jana parijana nātī| ge ko pāra nisācara jātī||
sena biloki sahaja abhimānī| bolā bacana krodha mada sānī||
sunahu sakala rajanīcara jūthā| hamare bairī bibudha barūthā||
te sanamukha nahiṃ karahiṃ larāī| dekhi sabala ripu jāhiṃ parāī||
tenha kara marana eka bidhi hoī| kahaum̐ bujhāi sunahu aba soī||
dvijabhojana makha homa sarādhā||saba kai jāi karahu tumha bādhā||

दोहा 181
छुधा छीन बलहीन सुर सहजेहिं मिलिहहिं आइ।
तब मारिहउँ कि छाड़िहउँ भली भाँति अपनाइ॥181॥
chudhā chīna balahīna sura sahajehiṃ milihahiṃ āi|
taba mārihaum̐ ki chāḍihaum̐ bhalī bhām̐ti apanāi||181||
दोहा 182#

मेघनाद कहुँ पुनि हँकरावा। दीन्ही सिख बलु बयरु बढ़ावा॥
जे सुर समर धीर बलवाना। जिन्ह कें लरिबे कर अभिमाना॥
तिन्हहि जीति रन आनेसु बाँधी। उठि सुत पितु अनुसासन काँधी॥
एहि बिधि सबही अग्या दीन्ही। आपुनु चलेउ गदा कर लीन्ही॥
चलत दसानन डोलति अवनी। गर्जत गर्भ स्त्रवहिं सुर रवनी॥
रावन आवत सुनेउ सकोहा। देवन्ह तके मेरु गिरि खोहा॥
दिगपालन्ह के लोक सुहाए। सूने सकल दसानन पाए॥
पुनि पुनि सिंघनाद करि भारी। देइ देवतन्ह गारि पचारी॥
रन मद मत्त फिरइ जग धावा। प्रतिभट खोजत कतहुँ न पावा॥
रबि ससि पवन बरुन धनधारी। अगिनि काल जम सब अधिकारी॥
किंनर सिद्ध मनुज सुर नागा। हठि सबही के पंथहिं लागा॥
ब्रह्मसृष्टि जहँ लगि तनुधारी। दसमुख बसबर्ती नर नारी॥
आयसु करहिं सकल भयभीता। नवहिं आइ नित चरन बिनीता॥

meghanāda kahum̐ puni ham̐karāvā| dīnhī sikha balu bayaru baḍhāvā||
je sura samara dhīra balavānā| jinha keṃ laribe kara abhimānā||
tinhahi jīti rana ānesu bām̐dhī| uṭhi suta pitu anusāsana kām̐dhī||
ehi bidhi sabahī agyā dīnhī| āpunu caleu gadā kara līnhī||
calata dasānana ḍolati avanī| garjata garbha stravahiṃ sura ravanī||
rāvana āvata suneu sakohā| devanha take meru giri khohā||
digapālanha ke loka suhāe| sūne sakala dasānana pāe||
puni puni siṃghanāda kari bhārī| dei devatanha gāri pacārī||
rana mada matta phirai jaga dhāvā| pratibhaṭa khojata katahum̐ na pāvā||
rabi sasi pavana baruna dhanadhārī| agini kāla jama saba adhikārī||
kiṃnara siddha manuja sura nāgā| haṭhi sabahī ke paṃthahiṃ lāgā||
brahmasṛṣṭi jaham̐ lagi tanudhārī| dasamukha basabartī nara nārī||
āyasu karahiṃ sakala bhayabhītā| navahiṃ āi nita carana binītā||

दोहा 182(ख)
भुजबल बिस्व बस्य करि राखेसि कोउ न सुतंत्र।
मंडलीक मनि रावन राज करइ निज मंत्र॥182(ख)॥
bhujabala bisva basya kari rākhesi kou na sutaṃtra|
maṃḍalīka mani rāvana rāja karai nija maṃtra||182(kha)||

दोहा 182(ख)
देव जच्छ गंधर्ब नर किंनर नाग कुमारि।
जीति बरीं निज बाहुबल बहु सुंदर बर नारि॥182ख॥
deva jaccha gaṃdharba nara kiṃnara nāga kumāri|
jīti barīṃ nija bāhubala bahu suṃdara bara nāri||182kha||
सोरठा 183#

इंद्रजीत सन जो कछु कहेऊ। सो सब जनु पहिलेहिं करि रहेऊ॥
प्रथमहिं जिन्ह कहुँ आयसु दीन्हा। तिन्ह कर चरित सुनहु जो कीन्हा॥
देखत भीमरूप सब पापी। निसिचर निकर देव परितापी॥
करहिं उपद्रव असुर निकाया। नाना रूप धरहिं करि माया॥
जेहि बिधि होइ धर्म निर्मूला। सो सब करहिं बेद प्रतिकूला॥
जेहिं जेहिं देस धेनु द्विज पावहिं। नगर गाउँ पुर आगि लगावहिं॥
सुभ आचरन कतहुँ नहिं होई। देव बिप्र गुरु मान न कोई॥
नहिं हरिभगति जग्य तप ग्याना। सपनेहुँ सुनिअ न बेद पुराना॥

iṃdrajīta sana jo kachu kaheū| so saba janu pahilehiṃ kari raheū||
prathamahiṃ jinha kahum̐ āyasu dīnhā| tinha kara carita sunahu jo kīnhā||
dekhata bhīmarūpa saba pāpī| nisicara nikara deva paritāpī||
karahiṃ upadrava asura nikāyā| nānā rūpa dharahiṃ kari māyā||
jehi bidhi hoi dharma nirmūlā| so saba karahiṃ beda pratikūlā||
jehiṃ jehiṃ desa dhenu dvija pāvahiṃ| nagara gāum̐ pura āgi lagāvahiṃ||
subha ācarana katahum̐ nahiṃ hoī| deva bipra guru māna na koī||
nahiṃ haribhagati jagya tapa gyānā| sapanehum̐ sunia na beda purānā||

छंद
जप जोग बिरागा तप मख भागा श्रवन सुनइ दससीसा।
आपुनु उठि धावइ रहै न पावइ धरि सब घालइ खीसा॥
अस भ्रष्ट अचारा भा संसारा धर्म सुनिअ नहिं काना।
तेहि बहुबिधि त्रासइ देस निकासइ जो कह बेद पुराना॥
japa joga birāgā tapa makha bhāgā śravana sunai dasasīsā|
āpunu uṭhi dhāvai rahai na pāvai dhari saba ghālai khīsā||
asa bhraṣṭa acārā bhā saṃsārā dharma sunia nahiṃ kānā|
tehi bahubidhi trāsai desa nikāsai jo kaha beda purānā||

सोरठा 183
बरनि न जाइ अनीति घोर निसाचर जो करहिं।
हिंसा पर अति प्रीति तिन्ह के पापहि कवनि मिति॥183॥
barani na jāi anīti ghora nisācara jo karahiṃ|
hiṃsā para ati prīti tinha ke pāpahi kavani miti||183||
मासपारायण, छठा विश्रामDay 6 of the 30-day Masparayan ends here

Completed Bal Kand — Part 6?

Mark Masparayan day 6 done, light a diya, or share the path with family.

Text: the Gita Press edition of Shri Ramcharitmanas, checked against two independent transcriptions. Spotted an error? Suggest a correction.

Bal Kand — Part 6 — text

Completed Bal Kand — Part 6?