Ramcharitmanas Bal Kand Part 12 (Doha 327–361)

दोहा 327#

स्याम सरीरु सुभायँ सुहावन। सोभा कोटि मनोज लजावन॥
जावक जुत पद कमल सुहाए। मुनि मन मधुप रहत जिन्ह छाए॥
पीत पुनीत मनोहर धोती। हरति बाल रबि दामिनि जोती॥
कल किंकिनि कटि सूत्र मनोहर। बाहु बिसाल बिभूषन सुंदर॥
पीत जनेउ महाछबि देई। कर मुद्रिका चोरि चितु लेई॥
सोहत ब्याह साज सब साजे। उर आयत उरभूषन राजे॥
पिअर उपरना काखासोती। दुहुँ आँचरन्हि लगे मनि मोती॥
नयन कमल कल कुंडल काना। बदनु सकल सौंदर्ज निधाना॥
सुंदर भृकुटि मनोहर नासा। भाल तिलकु रुचिरता निवासा॥
सोहत मौरु मनोहर माथे। मंगलमय मुकुता मनि गाथे॥

syāma sarīru subhāyam̐ suhāvana| sobhā koṭi manoja lajāvana||
jāvaka juta pada kamala suhāe| muni mana madhupa rahata jinha chāe||
pīta punīta manohara dhotī| harati bāla rabi dāmini jotī||
kala kiṃkini kaṭi sūtra manohara| bāhu bisāla bibhūṣana suṃdara||
pīta janeu mahāchabi deī| kara mudrikā cori citu leī||
sohata byāha sāja saba sāje| ura āyata urabhūṣana rāje||
piara uparanā kākhāsotī| duhum̐ ām̐caranhi lage mani motī||
nayana kamala kala kuṃḍala kānā| badanu sakala sauṃdarja nidhānā||
suṃdara bhṛkuṭi manohara nāsā| bhāla tilaku ruciratā nivāsā||
sohata mauru manohara māthe| maṃgalamaya mukutā mani gāthe||

छंद
गाथे महामनि मौर मंजुल अंग सब चित चोरहीं।
पुर नारि सुर सुंदरीं बरहि बिलोकि सब तिन तोरहीं॥
मनि बसन भूषन वारि आरति करहिं मंगल गावहिं।
सुर सुमन बरिसहिं सूत मागध बंदि सुजसु सुनावहीं॥1॥
gāthe mahāmani maura maṃjula aṃga saba cita corahīṃ|
pura nāri sura suṃdarīṃ barahi biloki saba tina torahīṃ||
mani basana bhūṣana vāri ārati karahiṃ maṃgala gāvahiṃ|
sura sumana barisahiṃ sūta māgadha baṃdi sujasu sunāvahīṃ||1||

छंद
कोहबरहिं आने कुअँर कुअँरि सुआसिनिन्ह सुख पाइ कै।
अति प्रीति लौकिक रीति लागीं करन मंगल गाइ कै॥
लहकौरि गौरि सिखाव रामहि सीय सन सारद कहैं।
रनिवासु हास बिलास रस बस जन्म को फलु सब लहैं॥2॥
kohabarahiṃ āne kuam̐ra kuam̐ri suāsininha sukha pāi kai|
ati prīti laukika rīti lāgīṃ karana maṃgala gāi kai||
lahakauri gauri sikhāva rāmahi sīya sana sārada kahaiṃ|
ranivāsu hāsa bilāsa rasa basa janma ko phalu saba lahaiṃ||2||

छंद
निज पानि मनि महुँ देखिअति मूरति सुरूपनिधान की।
चालति न भुजबल्ली बिलोकनि बिरह भय बस जानकी॥
कौतुक बिनोद प्रमोदु प्रेमु न जाइ कहि जानहिं अलीं।
बर कुअँरि सुंदर सकल सखीं लवाइ जनवासेहि चलीं॥3॥
nija pāni mani mahum̐ dekhiati mūrati surūpanidhāna kī|
cālati na bhujaballī bilokani biraha bhaya basa jānakī||
kautuka binoda pramodu premu na jāi kahi jānahiṃ alīṃ|
bara kuam̐ri suṃdara sakala sakhīṃ lavāi janavāsehi calīṃ||3||

छंद
तेहि समय सुनिअ असीस जहँ तहँ नगर नभ आनँदु महा।
चिरु जिअहुँ जोरीं चारु चारयो मुदित मन सबहीं कहा॥
जोगीन्द्र सिद्ध मुनीस देव बिलोकि प्रभु दुंदुभि हनी।
चले हरषि बरषि प्रसून निज निज लोक जय जय जय भनी॥4॥
tehi samaya sunia asīsa jaham̐ taham̐ nagara nabha ānam̐du mahā|
ciru jiahum̐ jorīṃ cāru cārayo mudita mana sabahīṃ kahā||
jogīndra siddha munīsa deva biloki prabhu duṃdubhi hanī|
cale haraṣi baraṣi prasūna nija nija loka jaya jaya jaya bhanī||4||

दोहा 327
सहित बधूटिन्ह कुअँर सब तब आए पितु पास।
सोभा मंगल मोद भरि उमगेउ जनु जनवास॥327॥
sahita badhūṭinha kuam̐ra saba taba āe pitu pāsa|
sobhā maṃgala moda bhari umageu janu janavāsa||327||
दोहा 328#

पुनि जेवनार भई बहु भाँती। पठए जनक बोलाइ बराती॥
परत पाँवड़े बसन अनूपा। सुतन्ह समेत गवन कियो भूपा॥
सादर सबके पाय पखारे। जथाजोगु पीढ़न्ह बैठारे॥
धोए जनक अवधपति चरना। सीलु सनेहु जाइ नहिं बरना॥
बहुरि राम पद पंकज धोए। जे हर हृदय कमल महुँ गोए॥
तीनिउ भाई राम सम जानी। धोए चरन जनक निज पानी॥
आसन उचित सबहि नृप दीन्हे। बोलि सूपकारी सब लीन्हे॥
सादर लगे परन पनवारे। कनक कील मनि पान सँवारे॥

puni jevanāra bhaī bahu bhām̐tī| paṭhae janaka bolāi barātī||
parata pām̐vaḍe basana anūpā| sutanha sameta gavana kiyo bhūpā||
sādara sabake pāya pakhāre| jathājogu pīḍhanha baiṭhāre||
dhoe janaka avadhapati caranā| sīlu sanehu jāi nahiṃ baranā||
bahuri rāma pada paṃkaja dhoe| je hara hṛdaya kamala mahum̐ goe||
tīniu bhāī rāma sama jānī| dhoe carana janaka nija pānī||
āsana ucita sabahi nṛpa dīnhe| boli sūpakārī saba līnhe||
sādara lage parana panavāre| kanaka kīla mani pāna sam̐vāre||

दोहा 328
सूपोदन सुरभी सरपि सुंदर स्वादु पुनीत।
छन महुँ सब कें परुसि गे चतुर सुआर बिनीत॥328॥
sūpodana surabhī sarapi suṃdara svādu punīta|
chana mahum̐ saba keṃ parusi ge catura suāra binīta||328||
दोहा 329#

पंच कवल करि जेवन लागे। गारि गान सुनि अति अनुरागे॥
भाँति अनेक परे पकवाने। सुधा सरिस नहिं जाहिं बखाने॥
परुसन लगे सुआर सुजाना। बिंजन बिबिध नाम को जाना॥
चारि भाँति भोजन बिधि गाई। एक एक बिधि बरनि न जाई॥
छरस रुचिर बिंजन बहु जाती। एक एक रस अगनित भाँती॥
जेवँत देहिं मधुर धुनि गारी। लै लै नाम पुरुष अरु नारी॥
समय सुहावनि गारि बिराजा। हँसत राउ सुनि सहित समाजा॥
एहि बिधि सबहीं भोजनु कीन्हा। आदर सहित आचमनु दीन्हा॥

paṃca kavala kari jevana lāge| gāri gāna suni ati anurāge||
bhām̐ti aneka pare pakavāne| sudhā sarisa nahiṃ jāhiṃ bakhāne||
parusana lage suāra sujānā| biṃjana bibidha nāma ko jānā||
cāri bhām̐ti bhojana bidhi gāī| eka eka bidhi barani na jāī||
charasa rucira biṃjana bahu jātī| eka eka rasa aganita bhām̐tī||
jevam̐ta dehiṃ madhura dhuni gārī| lai lai nāma puruṣa aru nārī||
samaya suhāvani gāri birājā| ham̐sata rāu suni sahita samājā||
ehi bidhi sabahīṃ bhojanu kīnhā| ādara sahita ācamanu dīnhā||

दोहा 329
देइ पान पूजे जनक दसरथु सहित समाज।
जनवासेहि गवने मुदित सकल भूप सिरताज॥329॥
dei pāna pūje janaka dasarathu sahita samāja|
janavāsehi gavane mudita sakala bhūpa siratāja||329||
दोहा 330#

नित नूतन मंगल पुर माहीं। निमिष सरिस दिन जामिनि जाहीं॥
बड़े भोर भूपतिमनि जागे। जाचक गुन गन गावन लागे॥
देखि कुअँर बर बधुन्ह समेता। किमि कहि जात मोदु मन जेता॥
प्रातक्रिया करि गे गुरु पाहीं। महाप्रमोदु प्रेमु मन माहीं॥
करि प्रनामु पूजा कर जोरी। बोले गिरा अमिअँ जनु बोरी॥
तुम्हरी कृपाँ सुनहु मुनिराजा। भयउँ आजु मैं पूरनकाजा॥
अब सब बिप्र बोलाइ गोसाईं। देहु धेनु सब भाँति बनाई॥
सुनि गुर करि महिपाल बड़ाई। पुनि पठए मुनि बृंद बोलाई॥

nita nūtana maṃgala pura māhīṃ| nimiṣa sarisa dina jāmini jāhīṃ||
baḍe bhora bhūpatimani jāge| jācaka guna gana gāvana lāge||
dekhi kuam̐ra bara badhunha sametā| kimi kahi jāta modu mana jetā||
prātakriyā kari ge guru pāhīṃ| mahāpramodu premu mana māhīṃ||
kari pranāmu pūjā kara jorī| bole girā amiam̐ janu borī||
tumharī kṛpām̐ sunahu munirājā| bhayaum̐ āju maiṃ pūranakājā||
aba saba bipra bolāi gosāīṃ| dehu dhenu saba bhām̐ti banāī||
suni gura kari mahipāla baḍāī| puni paṭhae muni bṛṃda bolāī||

दोहा 330
बामदेउ अरु देवरिषि बालमीकि जाबालि।
आए मुनिबर निकर तब कौसिकादि तपसालि॥330॥
bāmadeu aru devariṣi bālamīki jābāli|
āe munibara nikara taba kausikādi tapasāli||330||
दोहा 331#

दंड प्रनाम सबहि नृप कीन्हे। पूजि सप्रेम बरासन दीन्हे॥
चारि लच्छ बर धेनु मगाईं। कामसुरभि सम सील सुहाई॥
सब बिधि सकल अलंकृत कीन्हीं। मुदित महिप महिदेवन्ह दीन्हीं॥
करत बिनय बहु बिधि नरनाहू। लहेउँ आजु जग जीवन लाहू॥
पाइ असीस महीसु अनंदा। लिए बोलि पुनि जाचक बृंदा॥
कनक बसन मनि हय गय स्यंदन। दिए बूझि रुचि रबिकुलनंदन॥
चले पढ़त गावत गुन गाथा। जय जय जय दिनकर कुल नाथा॥
एहि बिधि राम बिआह उछाहू। सकइ न बरनि सहस मुख जाहू॥

daṃḍa pranāma sabahi nṛpa kīnhe| pūji saprema barāsana dīnhe||
cāri laccha bara dhenu magāīṃ| kāmasurabhi sama sīla suhāī||
saba bidhi sakala alaṃkṛta kīnhīṃ| mudita mahipa mahidevanha dīnhīṃ||
karata binaya bahu bidhi naranāhū| laheum̐ āju jaga jīvana lāhū||
pāi asīsa mahīsu anaṃdā| lie boli puni jācaka bṛṃdā||
kanaka basana mani haya gaya syaṃdana| die būjhi ruci rabikulanaṃdana||
cale paḍhata gāvata guna gāthā| jaya jaya jaya dinakara kula nāthā||
ehi bidhi rāma biāha uchāhū| sakai na barani sahasa mukha jāhū||

दोहा 331
बार बार कौसिक चरन सीसु नाइ कह राउ।
यह सबु सुखु मुनिराज तव कृपा कटाच्छ पसाउ॥331॥
bāra bāra kausika carana sīsu nāi kaha rāu|
yaha sabu sukhu munirāja tava kṛpā kaṭāccha pasāu||331||
दोहा 332#

जनक सनेहु सीलु करतूती। नृपु सब भाँति सराह बिभूती॥
दिन उठि बिदा अवधपति मागा। राखहिं जनकु सहित अनुरागा॥
नित नूतन आदरु अधिकाई। दिन प्रति सहस भाँति पहुनाई॥
नित नव नगर अनंद उछाहू। दसरथ गवनु सोहाइ न काहू॥
बहुत दिवस बीते एहि भाँती। जनु सनेह रजु बँधे बराती॥
कौसिक सतानंद तब जाई। कहा बिदेह नृपहि समुझाई॥
अब दसरथ कहँ आयसु देहू। जद्यपि छाड़ि न सकहु सनेहू॥
भलेहिं नाथ कहि सचिव बोलाए। कहि जय जीव सीस तिन्ह नाए॥

janaka sanehu sīlu karatūtī| nṛpu saba bhām̐ti sarāha bibhūtī||
dina uṭhi bidā avadhapati māgā| rākhahiṃ janaku sahita anurāgā||
nita nūtana ādaru adhikāī| dina prati sahasa bhām̐ti pahunāī||
nita nava nagara anaṃda uchāhū| dasaratha gavanu sohāi na kāhū||
bahuta divasa bīte ehi bhām̐tī| janu saneha raju bam̐dhe barātī||
kausika satānaṃda taba jāī| kahā bideha nṛpahi samujhāī||
aba dasaratha kaham̐ āyasu dehū| jadyapi chāḍi na sakahu sanehū||
bhalehiṃ nātha kahi saciva bolāe| kahi jaya jīva sīsa tinha nāe||

दोहा 332
अवधनाथु चाहत चलन भीतर करहु जनाउ।
भए प्रेमबस सचिव सुनि बिप्र सभासद राउ॥332॥
avadhanāthu cāhata calana bhītara karahu janāu|
bhae premabasa saciva suni bipra sabhāsada rāu||332||
दोहा 333#

पुरबासी सुनि चलिहि बराता। बूझत बिकल परस्पर बाता॥
सत्य गवनु सुनि सब बिलखाने। मनहुँ साँझ सरसिज सकुचाने॥
जहँ जहँ आवत बसे बराती। तहँ तहँ सिद्ध चला बहु भाँती॥
बिबिध भाँति मेवा पकवाना। भोजन साजु न जाइ बखाना॥
भरि भरि बसहँ अपार कहारा। पठई जनक अनेक सुसारा॥
तुरग लाख रथ सहस पचीसा। सकल सँवारे नख अरु सीसा॥
मत्त सहस दस सिंधुर साजे। जिन्हहि देखि दिसिकुंजर लाजे॥
कनक बसन मनि भरि भरि जाना। महिषीं धेनु बस्तु बिधि नाना॥

purabāsī suni calihi barātā| būjhata bikala paraspara bātā||
satya gavanu suni saba bilakhāne| manahum̐ sām̐jha sarasija sakucāne||
jaham̐ jaham̐ āvata base barātī| taham̐ taham̐ siddha calā bahu bhām̐tī||
bibidha bhām̐ti mevā pakavānā| bhojana sāju na jāi bakhānā||
bhari bhari basaham̐ apāra kahārā| paṭhaī janaka aneka susārā||
turaga lākha ratha sahasa pacīsā| sakala sam̐vāre nakha aru sīsā||
matta sahasa dasa siṃdhura sāje| jinhahi dekhi disikuṃjara lāje||
kanaka basana mani bhari bhari jānā| mahiṣīṃ dhenu bastu bidhi nānā||

दोहा 333
दाइज अमित न सकिअ कहि दीन्ह बिदेहँ बहोरि।
जो अवलोकत लोकपति लोक संपदा थोरि॥333॥
dāija amita na sakia kahi dīnha bideham̐ bahori|
jo avalokata lokapati loka saṃpadā thori||333||
दोहा 334#

सबु समाजु एहि भाँति बनाई। जनक अवधपुर दीन्ह पठाई॥
चलिहि बरात सुनत सब रानीं। बिकल मीनगन जनु लघु पानीं॥
पुनि पुनि सीय गोद करि लेहीं। देइ असीस सिखावनु देहीं॥
होएहु संतत पियहि पिआरी। चिरु अहिबात असीस हमारी॥
सासु ससुर गुर सेवा करेहू। पति रुख लखि आयसु अनुसरेहू॥
अति सनेह बस सखीं सयानी। नारि धरम सिखवहिं मृदु बानी॥
सादर सकल कुअँरि समुझाई। रानिन्ह बार बार उर लाई॥
बहुरि बहुरि भेटहिं महतारीं। कहहिं बिरंचि रचीं कत नारीं॥

sabu samāju ehi bhām̐ti banāī| janaka avadhapura dīnha paṭhāī||
calihi barāta sunata saba rānīṃ| bikala mīnagana janu laghu pānīṃ||
puni puni sīya goda kari lehīṃ| dei asīsa sikhāvanu dehīṃ||
hoehu saṃtata piyahi piārī| ciru ahibāta asīsa hamārī||
sāsu sasura gura sevā karehū| pati rukha lakhi āyasu anusarehū||
ati saneha basa sakhīṃ sayānī| nāri dharama sikhavahiṃ mṛdu bānī||
sādara sakala kuam̐ri samujhāī| rāninha bāra bāra ura lāī||
bahuri bahuri bheṭahiṃ mahatārīṃ| kahahiṃ biraṃci racīṃ kata nārīṃ||

दोहा 334
तेहि अवसर भाइन्ह सहित रामु भानु कुल केतु।
चले जनक मंदिर मुदित बिदा करावन हेतु॥334॥
tehi avasara bhāinha sahita rāmu bhānu kula ketu|
cale janaka maṃdira mudita bidā karāvana hetu||334||
दोहा 335#

चारिउ भाइ सुभायँ सुहाए। नगर नारि नर देखन धाए॥
कोउ कह चलन चहत हहिं आजू। कीन्ह बिदेह बिदा कर साजू॥
लेहु नयन भरि रूप निहारी। प्रिय पाहुने भूप सुत चारी॥
को जानै केहि सुकृत सयानी। नयन अतिथि कीन्हे बिधि आनी॥
मरनसीलु जिमि पाव पिऊषा। सुरतरु लहै जनम कर भूखा॥
पाव नारकी हरिपदु जैसें। इन्ह कर दरसनु हम कहँ तैसें॥
निरखि राम सोभा उर धरहू। निज मन फनि मूरति मनि करहू॥
एहि बिधि सबहि नयन फलु देता। गए कुअँर सब राज निकेता॥

cāriu bhāi subhāyam̐ suhāe| nagara nāri nara dekhana dhāe||
kou kaha calana cahata hahiṃ ājū| kīnha bideha bidā kara sājū||
lehu nayana bhari rūpa nihārī| priya pāhune bhūpa suta cārī||
ko jānai kehi sukṛta sayānī| nayana atithi kīnhe bidhi ānī||
maranasīlu jimi pāva piūṣā| surataru lahai janama kara bhūkhā||
pāva nārakī haripadu jaiseṃ| inha kara darasanu hama kaham̐ taiseṃ||
nirakhi rāma sobhā ura dharahū| nija mana phani mūrati mani karahū||
ehi bidhi sabahi nayana phalu detā| gae kuam̐ra saba rāja niketā||

दोहा 335
रूप सिंधु सब बंधु लखि हरषि उठा रनिवासु।
करहिं निछावरि आरती महा मुदित मन सासु॥335॥
rūpa siṃdhu saba baṃdhu lakhi haraṣi uṭhā ranivāsu|
karahiṃ nichāvari āratī mahā mudita mana sāsu||335||
सोरठा 336#

देखि राम छबि अति अनुरागीं। प्रेमबिबस पुनि पुनि पद लागीं॥
रही न लाज प्रीति उर छाई। सहज सनेहु बरनि किमि जाई॥
भाइन्ह सहित उबटि अन्हवाए। छरस असन अति हेतु जेवाँए॥
बोले रामु सुअवसरु जानी। सील सनेह सकुचमय बानी॥
राउ अवधपुर चहत सिधाए। बिदा होन हम इहाँ पठाए॥
मातु मुदित मन आयसु देहू। बालक जानि करब नित नेहू॥
सुनत बचन बिलखेउ रनिवासू। बोलि न सकहिं प्रेमबस सासू॥
हृदयँ लगाइ कुअँरि सब लीन्ही। पतिन्ह सौंपि बिनती अति कीन्ही॥

dekhi rāma chabi ati anurāgīṃ| premabibasa puni puni pada lāgīṃ||
rahī na lāja prīti ura chāī| sahaja sanehu barani kimi jāī||
bhāinha sahita ubaṭi anhavāe| charasa asana ati hetu jevām̐e||
bole rāmu suavasaru jānī| sīla saneha sakucamaya bānī||
rāu avadhapura cahata sidhāe| bidā hona hama ihām̐ paṭhāe||
mātu mudita mana āyasu dehū| bālaka jāni karaba nita nehū||
sunata bacana bilakheu ranivāsū| boli na sakahiṃ premabasa sāsū||
hṛdayam̐ lagāi kuam̐ri saba līnhī| patinha sauṃpi binatī ati kīnhī||

छंद
करि बिनय सिय रामहि समरपी जोरि कर पुनि पुनि कहै।
बलि जाउँ तात सुजान तुम्ह कहुँ बिदित गति सब की अहै॥
परिवार पुरजन मोहि राजहि प्रानप्रिय सिय जानिबी।
तुलसीस सीलु सनेहु लखि निज किंकरी करि मानिबी॥
kari binaya siya rāmahi samarapī jori kara puni puni kahai|
bali jāum̐ tāta sujāna tumha kahum̐ bidita gati saba kī ahai||
parivāra purajana mohi rājahi prānapriya siya jānibī|
tulasīsa sīlu sanehu lakhi nija kiṃkarī kari mānibī||

सोरठा 336
तुम्ह परिपूरन काम जान सिरोमनि भावप्रिय।
जन गुन गाहक राम दोष दलन करुनायतन॥336॥
tumha paripūrana kāma jāna siromani bhāvapriya|
jana guna gāhaka rāma doṣa dalana karunāyatana||336||
दोहा 337#

अस कहि रही चरन गहि रानी। प्रेम पंक जनु गिरा समानी॥
सुनि सनेहसानी बर बानी। बहुबिधि राम सासु सनमानी॥
राम बिदा मागत कर जोरी। कीन्ह प्रनामु बहोरि बहोरी॥
पाइ असीस बहुरि सिरु नाई। भाइन्ह सहित चले रघुराई॥
मंजु मधुर मूरति उर आनी। भई सनेह सिथिल सब रानी॥
पुनि धीरजु धरि कुअँरि हँकारी। बार बार भेटहिं महतारीं॥
पहुँचावहिं फिरि मिलहिं बहोरी। बढ़ी परस्पर प्रीति न थोरी॥
पुनि पुनि मिलत सखिन्ह बिलगाई। बाल बच्छ जिमि धेनु लवाई॥

asa kahi rahī carana gahi rānī| prema paṃka janu girā samānī||
suni sanehasānī bara bānī| bahubidhi rāma sāsu sanamānī||
rāma bidā māgata kara jorī| kīnha pranāmu bahori bahorī||
pāi asīsa bahuri siru nāī| bhāinha sahita cale raghurāī||
maṃju madhura mūrati ura ānī| bhaī saneha sithila saba rānī||
puni dhīraju dhari kuam̐ri ham̐kārī| bāra bāra bheṭahiṃ mahatārīṃ||
pahum̐cāvahiṃ phiri milahiṃ bahorī| baḍhī paraspara prīti na thorī||
puni puni milata sakhinha bilagāī| bāla baccha jimi dhenu lavāī||

दोहा 337
प्रेमबिबस नर नारि सब सखिन्ह सहित रनिवासु।
मानहुँ कीन्ह बिदेहपुर करुनाँ बिरहँ निवासु॥337॥
premabibasa nara nāri saba sakhinha sahita ranivāsu|
mānahum̐ kīnha bidehapura karunām̐ biraham̐ nivāsu||337||
दोहा 338#

सुक सारिका जानकी ज्याए। कनक पिंजरन्हि राखि पढ़ाए॥
ब्याकुल कहहिं कहाँ बैदेही। सुनि धीरजु परिहरइ न केही॥
भए बिकल खग मृग एहि भाँति। मनुज दसा कैसें कहि जाती॥
बंधु समेत जनकु तब आए। प्रेम उमगि लोचन जल छाए॥
सीय बिलोकि धीरता भागी। रहे कहावत परम बिरागी॥
लीन्हि रायँ उर लाइ जानकी। मिटी महामरजाद ग्यान की॥
समुझावत सब सचिव सयाने। कीन्ह बिचारु न अवसर जाने॥
बारहिं बार सुता उर लाई। सजि सुंदर पालकीं मगाईं॥

suka sārikā jānakī jyāe| kanaka piṃjaranhi rākhi paḍhāe||
byākula kahahiṃ kahām̐ baidehī| suni dhīraju pariharai na kehī||
bhae bikala khaga mṛga ehi bhām̐ti| manuja dasā kaiseṃ kahi jātī||
baṃdhu sameta janaku taba āe| prema umagi locana jala chāe||
sīya biloki dhīratā bhāgī| rahe kahāvata parama birāgī||
līnhi rāyam̐ ura lāi jānakī| miṭī mahāmarajāda gyāna kī||
samujhāvata saba saciva sayāne| kīnha bicāru na avasara jāne||
bārahiṃ bāra sutā ura lāī| saji suṃdara pālakīṃ magāīṃ||

दोहा 338
प्रेमबिबस परिवारु सबु जानि सुलगन नरेस।
कुअँरि चढ़ाई पालकिन्ह सुमिरे सिद्धि गनेस॥338॥
premabibasa parivāru sabu jāni sulagana naresa|
kuam̐ri caḍhāī pālakinha sumire siddhi ganesa||338||
दोहा 339#

बहुबिधि भूप सुता समुझाई। नारिधरमु कुलरीति सिखाई॥
दासीं दास दिए बहुतेरे। सुचि सेवक जे प्रिय सिय केरे॥
सीय चलत ब्याकुल पुरबासी। होहिं सगुन सुभ मंगल रासी॥
भूसुर सचिव समेत समाजा। संग चले पहुँचावन राजा॥
समय बिलोकि बाजने बाजे। रथ गज बाजि बरातिन्ह साजे॥
दसरथ बिप्र बोलि सब लीन्हे। दान मान परिपूरन कीन्हे॥
चरन सरोज धूरि धरि सीसा। मुदित महीपति पाइ असीसा॥
सुमिरि गजाननु कीन्ह पयाना। मंगलमूल सगुन भए नाना॥

bahubidhi bhūpa sutā samujhāī| nāridharamu kularīti sikhāī||
dāsīṃ dāsa die bahutere| suci sevaka je priya siya kere||
sīya calata byākula purabāsī| hohiṃ saguna subha maṃgala rāsī||
bhūsura saciva sameta samājā| saṃga cale pahum̐cāvana rājā||
samaya biloki bājane bāje| ratha gaja bāji barātinha sāje||
dasaratha bipra boli saba līnhe| dāna māna paripūrana kīnhe||
carana saroja dhūri dhari sīsā| mudita mahīpati pāi asīsā||
sumiri gajānanu kīnha payānā| maṃgalamūla saguna bhae nānā||

दोहा 339
सुर प्रसून बरषहिं हरषि करहिं अपछरा गान।
चले अवधपति अवधपुर मुदित बजाइ निसान॥339॥
sura prasūna baraṣahiṃ haraṣi karahiṃ apacharā gāna|
cale avadhapati avadhapura mudita bajāi nisāna||339||
दोहा 340#

नृप करि बिनय महाजन फेरे। सादर सकल मागने टेरे॥
भूषन बसन बाजि गज दीन्हे। प्रेम पोषि ठाढ़े सब कीन्हे॥
बार बार बिरिदावलि भाषी। फिरे सकल रामहि उर राखी॥
बहुरि बहुरि कोसलपति कहहीं। जनकु प्रेमबस फिरै न चहहीं॥
पुनि कह भूपति बचन सुहाए। फिरिअ महीस दूरि बड़ि आए॥
राउ बहोरि उतरि भए ठाढ़े। प्रेम प्रबाह बिलोचन बाढ़े॥
तब बिदेह बोले कर जोरी। बचन सनेह सुधाँ जनु बोरी॥
करौं कवन बिधि बिनय बनाई। महाराज मोहि दीन्हि बड़ाई॥

nṛpa kari binaya mahājana phere| sādara sakala māgane ṭere||
bhūṣana basana bāji gaja dīnhe| prema poṣi ṭhāḍhe saba kīnhe||
bāra bāra biridāvali bhāṣī| phire sakala rāmahi ura rākhī||
bahuri bahuri kosalapati kahahīṃ| janaku premabasa phirai na cahahīṃ||
puni kaha bhūpati bacana suhāe| phiria mahīsa dūri baḍi āe||
rāu bahori utari bhae ṭhāḍhe| prema prabāha bilocana bāḍhe||
taba bideha bole kara jorī| bacana saneha sudhām̐ janu borī||
karauṃ kavana bidhi binaya banāī| mahārāja mohi dīnhi baḍāī||

दोहा 340
कोसलपति समधी सजन सनमाने सब भाँति।
मिलनि परसपर बिनय अति प्रीति न हृदयँ समाति॥340॥
kosalapati samadhī sajana sanamāne saba bhām̐ti|
milani parasapara binaya ati prīti na hṛdayam̐ samāti||340||
दोहा 341#

मुनि मंडलिहि जनक सिरु नावा। आसिरबादु सबहि सन पावा॥
सादर पुनि भेंटे जामाता। रूप सील गुन निधि सब भ्राता॥
जोरि पंकरुह पानि सुहाए। बोले बचन प्रेम जनु जाए॥
राम करौं केहि भाँति प्रसंसा। मुनि महेस मन मानस हंसा॥
करहिं जोग जोगी जेहि लागी। कोहु मोहु ममता मदु त्यागी॥
ब्यापकु ब्रह्मु अलखु अबिनासी। चिदानंदु निरगुन गुनरासी॥
मन समेत जेहि जान न बानी। तरकि न सकहिं सकल अनुमानी॥
महिमा निगमु नेति कहि कहई। जो तिहुँ काल एकरस रहई॥

muni maṃḍalihi janaka siru nāvā| āsirabādu sabahi sana pāvā||
sādara puni bheṃṭe jāmātā| rūpa sīla guna nidhi saba bhrātā||
jori paṃkaruha pāni suhāe| bole bacana prema janu jāe||
rāma karauṃ kehi bhām̐ti prasaṃsā| muni mahesa mana mānasa haṃsā||
karahiṃ joga jogī jehi lāgī| kohu mohu mamatā madu tyāgī||
byāpaku brahmu alakhu abināsī| cidānaṃdu niraguna gunarāsī||
mana sameta jehi jāna na bānī| taraki na sakahiṃ sakala anumānī||
mahimā nigamu neti kahi kahaī| jo tihum̐ kāla ekarasa rahaī||

दोहा 341
नयन बिषय मो कहुँ भयउ सो समस्त सुख मूल।
सबइ लाभु जग जीव कहँ भएँ ईसु अनुकूल॥341॥
nayana biṣaya mo kahum̐ bhayau so samasta sukha mūla|
sabai lābhu jaga jīva kaham̐ bhaem̐ īsu anukūla||341||
दोहा 342#

सबहि भाँति मोहि दीन्हि बड़ाई। निज जन जानि लीन्ह अपनाई॥
होहिं सहस दस सारद सेषा। करहिं कलप कोटिक भरि लेखा॥
मोर भाग्य राउर गुन गाथा। कहि न सिराहिं सुनहु रघुनाथा॥
मैं कछु कहउँ एक बल मोरें। तुम्ह रीझहु सनेह सुठि थोरें॥
बार बार मागउँ कर जोरें। मनु परिहरै चरन जनि भोरें॥
सुनि बर बचन प्रेम जनु पोषे। पूरनकाम रामु परितोषे॥
करि बर बिनय ससुर सनमाने। पितु कौसिक बसिष्ठ सम जाने॥
बिनती बहुरि भरत सन कीन्ही। मिलि सप्रेमु पुनि आसिष दीन्ही॥

sabahi bhām̐ti mohi dīnhi baḍāī| nija jana jāni līnha apanāī||
hohiṃ sahasa dasa sārada seṣā| karahiṃ kalapa koṭika bhari lekhā||
mora bhāgya rāura guna gāthā| kahi na sirāhiṃ sunahu raghunāthā||
maiṃ kachu kahaum̐ eka bala moreṃ| tumha rījhahu saneha suṭhi thoreṃ||
bāra bāra māgaum̐ kara joreṃ| manu pariharai carana jani bhoreṃ||
suni bara bacana prema janu poṣe| pūranakāma rāmu paritoṣe||
kari bara binaya sasura sanamāne| pitu kausika basiṣṭha sama jāne||
binatī bahuri bharata sana kīnhī| mili sapremu puni āsiṣa dīnhī||

दोहा 342
मिले लखन रिपुसूदनहि दीन्हि असीस महीस।
भए परसपर प्रेमबस फिरि फिरि नावहिं सीस॥342॥
mile lakhana ripusūdanahi dīnhi asīsa mahīsa|
bhae parasapara premabasa phiri phiri nāvahiṃ sīsa||342||
दोहा 343#

बार बार करि बिनय बड़ाई। रघुपति चले संग सब भाई॥
जनक गहे कौसिक पद जाई। चरन रेनु सिर नयनन्ह लाई॥
सुनु मुनीस बर दरसन तोरें। अगमु न कछु प्रतीति मन मोरें॥
जो सुखु सुजसु लोकपति चहहीं। करत मनोरथ सकुचत अहहीं॥
सो सुखु सुजसु सुलभ मोहि स्वामी। सब सिधि तव दरसन अनुगामी॥
कीन्हि बिनय पुनि पुनि सिरु नाई। फिरे महीसु आसिषा पाई॥
चली बरात निसान बजाई। मुदित छोट बड़ सब समुदाई॥
रामहि निरखि ग्राम नर नारी। पाइ नयन फलु होहिं सुखारी॥

bāra bāra kari binaya baḍāī| raghupati cale saṃga saba bhāī||
janaka gahe kausika pada jāī| carana renu sira nayananha lāī||
sunu munīsa bara darasana toreṃ| agamu na kachu pratīti mana moreṃ||
jo sukhu sujasu lokapati cahahīṃ| karata manoratha sakucata ahahīṃ||
so sukhu sujasu sulabha mohi svāmī| saba sidhi tava darasana anugāmī||
kīnhi binaya puni puni siru nāī| phire mahīsu āsiṣā pāī||
calī barāta nisāna bajāī| mudita choṭa baḍa saba samudāī||
rāmahi nirakhi grāma nara nārī| pāi nayana phalu hohiṃ sukhārī||

दोहा 343
बीच बीच बर बास करि मग लोगन्ह सुख देत।
अवध समीप पुनीत दिन पहुँची आइ जनेत॥343॥
bīca bīca bara bāsa kari maga loganha sukha deta|
avadha samīpa punīta dina pahum̐cī āi janeta||343||
दोहा 344#

हने निसान पनव बर बाजे। भेरि संख धुनि हय गय गाजे॥
झाँझि बिरव डिंडमीं सुहाई। सरस राग बाजहिं सहनाई॥
पुर जन आवत अकनि बराता। मुदित सकल पुलकावलि गाता॥
निज निज सुंदर सदन सँवारे। हाट बाट चौहट पुर द्वारे॥
गलीं सकल अरगजाँ सिंचाई। जहँ तहँ चौकें चारु पुराईं॥
बना बजारु न जाइ बखाना। तोरन केतु पताक बिताना॥
सफल पूगफल कदलि रसाला। रोपे बकुल कदंब तमाला॥
लगे सुभग तरु परसत धरनी। मनिमय आलबाल कल करनी॥

hane nisāna panava bara bāje| bheri saṃkha dhuni haya gaya gāje||
jhām̐jhi birava ḍiṃḍamīṃ suhāī| sarasa rāga bājahiṃ sahanāī||
pura jana āvata akani barātā| mudita sakala pulakāvali gātā||
nija nija suṃdara sadana sam̐vāre| hāṭa bāṭa cauhaṭa pura dvāre||
galīṃ sakala aragajām̐ siṃcāī| jaham̐ taham̐ caukeṃ cāru purāīṃ||
banā bajāru na jāi bakhānā| torana ketu patāka bitānā||
saphala pūgaphala kadali rasālā| rope bakula kadaṃba tamālā||
lage subhaga taru parasata dharanī| manimaya ālabāla kala karanī||

दोहा 344
बिबिध भाँति मंगल कलस गृह गृह रचे सँवारि।
सुर ब्रह्मादि सिहाहिं सब रघुबर पुरी निहारि॥344॥
bibidha bhām̐ti maṃgala kalasa gṛha gṛha race sam̐vāri|
sura brahmādi sihāhiṃ saba raghubara purī nihāri||344||
दोहा 345#

भूप भवन तेहि अवसर सोहा। रचना देखि मदन मनु मोहा॥
मंगल सगुन मनोहरताई। रिधि सिधि सुख संपदा सुहाई॥
जनु उछाह सब सहज सुहाए। तनु धरि धरि दसरथ दसरथ गृहँ छाए॥
देखन हेतु राम बैदेही। कहहु लालसा होहि न केही॥
जूथ जूथ मिलि चलीं सुआसिनि। निज छबि निदरहिं मदन बिलासनि॥
सकल सुमंगल सजें आरती। गावहिं जनु बहु बेष भारती॥
भूपति भवन कोलाहलु होई। जाइ न बरनि समउ सुखु सोई॥
कौसल्यादि राम महतारीं। प्रेम बिबस तन दसा बिसारीं॥

bhūpa bhavana tehi avasara sohā| racanā dekhi madana manu mohā||
maṃgala saguna manoharatāī| ridhi sidhi sukha saṃpadā suhāī||
janu uchāha saba sahaja suhāe| tanu dhari dhari dasaratha dasaratha gṛham̐ chāe||
dekhana hetu rāma baidehī| kahahu lālasā hohi na kehī||
jūtha jūtha mili calīṃ suāsini| nija chabi nidarahiṃ madana bilāsani||
sakala sumaṃgala sajeṃ āratī| gāvahiṃ janu bahu beṣa bhāratī||
bhūpati bhavana kolāhalu hoī| jāi na barani samau sukhu soī||
kausalyādi rāma mahatārīṃ| prema bibasa tana dasā bisārīṃ||

दोहा 345
दिए दान बिप्रन्ह बिपुल पूजि गनेस पुरारी।
प्रमुदित परम दरिद्र जनु पाइ पदारथ चारि॥345॥
die dāna bipranha bipula pūji ganesa purārī|
pramudita parama daridra janu pāi padāratha cāri||345||
दोहा 346#

मोद प्रमोद बिबस सब माता। चलहिं न चरन सिथिल भए गाता॥
राम दरस हित अति अनुरागीं। परिछनि साजु सजन सब लागीं॥
बिबिध बिधान बाजने बाजे। मंगल मुदित सुमित्राँ साजे॥
हरद दूब दधि पल्लव फूला। पान पूगफल मंगल मूला॥
अच्छत अंकुर लोचन लाजा। मंजुल मंजरि तुलसि बिराजा॥
छुहे पुरट घट सहज सुहाए। मदन सकुन जनु नीड़ बनाए॥
सगुन सुगंध न जाहिं बखानी। मंगल सकल सजहिं सब रानी॥
रचीं आरतीं बहुत बिधाना। मुदित करहिं कल मंगल गाना॥

moda pramoda bibasa saba mātā| calahiṃ na carana sithila bhae gātā||
rāma darasa hita ati anurāgīṃ| parichani sāju sajana saba lāgīṃ||
bibidha bidhāna bājane bāje| maṃgala mudita sumitrām̐ sāje||
harada dūba dadhi pallava phūlā| pāna pūgaphala maṃgala mūlā||
acchata aṃkura locana lājā| maṃjula maṃjari tulasi birājā||
chuhe puraṭa ghaṭa sahaja suhāe| madana sakuna janu nīḍa banāe||
saguna sugaṃdha na jāhiṃ bakhānī| maṃgala sakala sajahiṃ saba rānī||
racīṃ āratīṃ bahuta bidhānā| mudita karahiṃ kala maṃgala gānā||

दोहा 346
कनक थार भरि मंगलन्हि कमल करन्हि लिएँ मात।
चलीं मुदित परिछनि करन पुलक पल्लवित गात॥346॥
kanaka thāra bhari maṃgalanhi kamala karanhi liem̐ māta|
calīṃ mudita parichani karana pulaka pallavita gāta||346||
दोहा 347#

धूप धूम नभु मेचक भयऊ। सावन घन घमंडु जनु ठयऊ॥
सुरतरु सुमन माल सुर बरषहिं। मनहुँ बलाक अवलि मनु करषहिं॥
मंजुल मनिमय बंदनिवारे। मनहुँ पाकरिपु चाप सँवारे॥
प्रगटहिं दुरहिं अटन्ह पर भामिनि। चारु चपल जनु दमकहिं दामिनि॥
दुंदुभि धुनि घन गरजनि घोरा। जाचक चातक दादुर मोरा॥
सुर सुगन्ध सुचि बरषहिं बारी। सुखी सकल ससि पुर नर नारी॥
समउ जानि गुर आयसु दीन्हा। पुर प्रबेसु रघुकुलमनि कीन्हा॥
सुमिरि संभु गिरिजा गनराजा। मुदित महीपति सहित समाजा॥

dhūpa dhūma nabhu mecaka bhayaū| sāvana ghana ghamaṃḍu janu ṭhayaū||
surataru sumana māla sura baraṣahiṃ| manahum̐ balāka avali manu karaṣahiṃ||
maṃjula manimaya baṃdanivāre| manahum̐ pākaripu cāpa sam̐vāre||
pragaṭahiṃ durahiṃ aṭanha para bhāmini| cāru capala janu damakahiṃ dāmini||
duṃdubhi dhuni ghana garajani ghorā| jācaka cātaka dādura morā||
sura sugandha suci baraṣahiṃ bārī| sukhī sakala sasi pura nara nārī||
samau jāni gura āyasu dīnhā| pura prabesu raghukulamani kīnhā||
sumiri saṃbhu girijā ganarājā| mudita mahīpati sahita samājā||

दोहा 347
होहिं सगुन बरषहिं सुमन सुर दुंदुभीं बजाइ।
बिबुध बधू नाचहिं मुदित मंजुल मंगल गाइ॥347॥
hohiṃ saguna baraṣahiṃ sumana sura duṃdubhīṃ bajāi|
bibudha badhū nācahiṃ mudita maṃjula maṃgala gāi||347||
दोहा 348#

मागध सूत बंदि नट नागर। गावहिं जसु तिहु लोक उजागर॥
जय धुनि बिमल बेद बर बानी। दस दिसि सुनिअ सुमंगल सानी॥
बिपुल बाजने बाजन लागे। नभ सुर नगर लोग अनुरागे॥
बने बराती बरनि न जाहीं। महा मुदित मन सुख न समाहीं॥
पुरबासिन्ह तब राय जोहारे। देखत रामहि भए सुखारे॥
करहिं निछावरि मनिगन चीरा। बारि बिलोचन पुलक सरीरा॥
आरति करहिं मुदित पुर नारी। हरषहिं निरखि कुअँर बर चारी॥
सिबिका सुभग ओहार उघारी। देखि दुलहिनिन्ह होहिं सुखारी॥

māgadha sūta baṃdi naṭa nāgara| gāvahiṃ jasu tihu loka ujāgara||
jaya dhuni bimala beda bara bānī| dasa disi sunia sumaṃgala sānī||
bipula bājane bājana lāge| nabha sura nagara loga anurāge||
bane barātī barani na jāhīṃ| mahā mudita mana sukha na samāhīṃ||
purabāsinha taba rāya johāre| dekhata rāmahi bhae sukhāre||
karahiṃ nichāvari manigana cīrā| bāri bilocana pulaka sarīrā||
ārati karahiṃ mudita pura nārī| haraṣahiṃ nirakhi kuam̐ra bara cārī||
sibikā subhaga ohāra ughārī| dekhi dulahininha hohiṃ sukhārī||

दोहा 348
एहि बिधि सबही देत सुखु आए राजदुआर।
मुदित मातु परिछनि करहिं बधुन्ह समेत कुमार॥348॥
ehi bidhi sabahī deta sukhu āe rājaduāra|
mudita mātu parichani karahiṃ badhunha sameta kumāra||348||
दोहा 349#

करहिं आरती बारहिं बारा। प्रेमु प्रमोदु कहै को पारा॥
भूषन मनि पट नाना जाती॥करहिं निछावरि अगनित भाँती॥
बधुन्ह समेत देखि सुत चारी। परमानंद मगन महतारी॥
पुनि पुनि सीय राम छबि देखी॥मुदित सफल जग जीवन लेखी॥
सखीं सीय मुख पुनि पुनि चाही। गान करहिं निज सुकृत सराही॥
बरषहिं सुमन छनहिं छन देवा। नाचहिं गावहिं लावहिं सेवा॥
देखि मनोहर चारिउ जोरीं। सारद उपमा सकल ढँढोरीं॥
देत न बनहिं निपट लघु लागी। एकटक रहीं रूप अनुरागीं॥

karahiṃ āratī bārahiṃ bārā| premu pramodu kahai ko pārā||
bhūṣana mani paṭa nānā jātī||karahiṃ nichāvari aganita bhām̐tī||
badhunha sameta dekhi suta cārī| paramānaṃda magana mahatārī||
puni puni sīya rāma chabi dekhī||mudita saphala jaga jīvana lekhī||
sakhīṃ sīya mukha puni puni cāhī| gāna karahiṃ nija sukṛta sarāhī||
baraṣahiṃ sumana chanahiṃ chana devā| nācahiṃ gāvahiṃ lāvahiṃ sevā||
dekhi manohara cāriu jorīṃ| sārada upamā sakala ḍham̐ḍhorīṃ||
deta na banahiṃ nipaṭa laghu lāgī| ekaṭaka rahīṃ rūpa anurāgīṃ||

दोहा 349
निगम नीति कुल रीति करि अरघ पाँवड़े देत।
बधुन्ह सहित सुत परिछि सब चलीं लवाइ निकेत॥349॥
nigama nīti kula rīti kari aragha pām̐vaḍe deta|
badhunha sahita suta parichi saba calīṃ lavāi niketa||349||
दोहा 350#

चारि सिंघासन सहज सुहाए। जनु मनोज निज हाथ बनाए॥
तिन्ह पर कुअँरि कुअँर बैठारे। सादर पाय पुनीत पखारे॥
धूप दीप नैबेद बेद बिधि। पूजे बर दुलहिनि मंगलनिधि॥
बारहिं बार आरती करहीं। ब्यजन चारु चामर सिर ढरहीं॥
बस्तु अनेक निछावरि होहीं। भरीं प्रमोद मातु सब सोहीं॥
पावा परम तत्व जनु जोगीं। अमृत लहेउ जनु संतत रोगीं॥
जनम रंक जनु पारस पावा। अंधहि लोचन लाभु सुहावा॥
मूक बदन जनु सारद छाई। मानहुँ समर सूर जय पाई॥

cāri siṃghāsana sahaja suhāe| janu manoja nija hātha banāe||
tinha para kuam̐ri kuam̐ra baiṭhāre| sādara pāya punīta pakhāre||
dhūpa dīpa naibeda beda bidhi| pūje bara dulahini maṃgalanidhi||
bārahiṃ bāra āratī karahīṃ| byajana cāru cāmara sira ḍharahīṃ||
bastu aneka nichāvari hohīṃ| bharīṃ pramoda mātu saba sohīṃ||
pāvā parama tatva janu jogīṃ| amṛta laheu janu saṃtata rogīṃ||
janama raṃka janu pārasa pāvā| aṃdhahi locana lābhu suhāvā||
mūka badana janu sārada chāī| mānahum̐ samara sūra jaya pāī||

दोहा 350(क)
एहि सुख ते सत कोटि गुन पावहिं मातु अनंदु॥
भाइन्ह सहित बिआहि घर आए रघुकुलचंदु॥350(क)॥
ehi sukha te sata koṭi guna pāvahiṃ mātu anaṃdu||
bhāinha sahita biāhi ghara āe raghukulacaṃdu||350(ka)||

दोहा 350(ख)
लोक रीति जननी करहिं बर दुलहिनि सकुचाहिं।
मोदु बिनोदु बिलोकि बड़ रामु मनहिं मुसुकाहिं॥350(ख)॥
loka rīti jananī karahiṃ bara dulahini sakucāhiṃ|
modu binodu biloki baḍa rāmu manahiṃ musukāhiṃ||350(kha)||
दोहा 351#

देव पितर पूजे बिधि नीकी। पूजीं सकल बासना जी की॥
सबहि बंदि मागहिं बरदाना। भाइन्ह सहित राम कल्याना॥
अंतरहित सुर आसिष देहीं। मुदित मातु अंचल भरि लेहीं॥
भूपति बोलि बराती लीन्हे। जान बसन मनि भूषन दीन्हे॥
आयसु पाइ राखि उर रामहि। मुदित गए सब निज निज धामहि॥
पुर नर नारि सकल पहिराए। घर घर बाजन लगे बधाए॥
जाचक जन जाचहिं जोइ जोई। प्रमुदित राउ देहिं सोइ सोई॥
सेवक सकल बजनिआ नाना। पूरन किए दान सनमाना॥

deva pitara pūje bidhi nīkī| pūjīṃ sakala bāsanā jī kī||
sabahi baṃdi māgahiṃ baradānā| bhāinha sahita rāma kalyānā||
aṃtarahita sura āsiṣa dehīṃ| mudita mātu aṃcala bhari lehīṃ||
bhūpati boli barātī līnhe| jāna basana mani bhūṣana dīnhe||
āyasu pāi rākhi ura rāmahi| mudita gae saba nija nija dhāmahi||
pura nara nāri sakala pahirāe| ghara ghara bājana lage badhāe||
jācaka jana jācahiṃ joi joī| pramudita rāu dehiṃ soi soī||
sevaka sakala bajaniā nānā| pūrana kie dāna sanamānā||

दोहा 351
देहिं असीस जोहारि सब गावहिं गुन गन गाथ।
तब गुर भूसुर सहित गृहँ गवनु कीन्ह नरनाथ॥351॥
dehiṃ asīsa johāri saba gāvahiṃ guna gana gātha|
taba gura bhūsura sahita gṛham̐ gavanu kīnha naranātha||351||
दोहा 352#

जो बसिष्ठ अनुसासन दीन्ही। लोक बेद बिधि सादर कीन्ही॥
भूसुर भीर देखि सब रानी। सादर उठीं भाग्य बड़ जानी॥
पाय पखारि सकल अन्हवाए। पूजि भली बिधि भूप जेवाँए॥
आदर दान प्रेम परिपोषे। देत असीस चले मन तोषे॥
बहु बिधि कीन्हि गाधिसुत पूजा। नाथ मोहि सम धन्य न दूजा॥
कीन्हि प्रसंसा भूपति भूरी। रानिन्ह सहित लीन्हि पग धूरी॥
भीतर भवन दीन्ह बर बासु। मन जोगवत रह नृप रनिवासू॥
पूजे गुर पद कमल बहोरी। कीन्हि बिनय उर प्रीति न थोरी॥

jo basiṣṭha anusāsana dīnhī| loka beda bidhi sādara kīnhī||
bhūsura bhīra dekhi saba rānī| sādara uṭhīṃ bhāgya baḍa jānī||
pāya pakhāri sakala anhavāe| pūji bhalī bidhi bhūpa jevām̐e||
ādara dāna prema paripoṣe| deta asīsa cale mana toṣe||
bahu bidhi kīnhi gādhisuta pūjā| nātha mohi sama dhanya na dūjā||
kīnhi prasaṃsā bhūpati bhūrī| rāninha sahita līnhi paga dhūrī||
bhītara bhavana dīnha bara bāsu| mana jogavata raha nṛpa ranivāsū||
pūje gura pada kamala bahorī| kīnhi binaya ura prīti na thorī||

दोहा 352
बधुन्ह समेत कुमार सब रानिन्ह सहित महीसु।
पुनि पुनि बंदत गुर चरन देत असीस मुनीसु॥352॥
badhunha sameta kumāra saba rāninha sahita mahīsu|
puni puni baṃdata gura carana deta asīsa munīsu||352||
दोहा 353#

बिनय कीन्हि उर अति अनुरागें। सुत संपदा राखि सब आगें॥
नेगु मागि मुनिनायक लीन्हा। आसिरबादु बहुत बिधि दीन्हा॥
उर धरि रामहि सीय समेता। हरषि कीन्ह गुर गवनु निकेता॥
बिप्रबधू सब भूप बोलाई। चैल चारु भूषन पहिराई॥
बहुरि बोलाइ सुआसिनि लीन्हीं। रुचि बिचारि पहिरावनि दीन्हीं॥
नेगी नेग जोग सब लेहीं। रुचि अनुरूप भूपमनि देहीं॥
प्रिय पाहुने पूज्य जे जाने। भूपति भली भाँति सनमाने॥
देव देखि रघुबीर बिबाहू। बरषि प्रसून प्रसंसि उछाहू॥

binaya kīnhi ura ati anurāgeṃ| suta saṃpadā rākhi saba āgeṃ||
negu māgi munināyaka līnhā| āsirabādu bahuta bidhi dīnhā||
ura dhari rāmahi sīya sametā| haraṣi kīnha gura gavanu niketā||
biprabadhū saba bhūpa bolāī| caila cāru bhūṣana pahirāī||
bahuri bolāi suāsini līnhīṃ| ruci bicāri pahirāvani dīnhīṃ||
negī nega joga saba lehīṃ| ruci anurūpa bhūpamani dehīṃ||
priya pāhune pūjya je jāne| bhūpati bhalī bhām̐ti sanamāne||
deva dekhi raghubīra bibāhū| baraṣi prasūna prasaṃsi uchāhū||

दोहा 353
चले निसान बजाइ सुर निज निज पुर सुख पाइ।
कहत परसपर राम जसु प्रेम न हृदयँ समाइ॥353॥
cale nisāna bajāi sura nija nija pura sukha pāi|
kahata parasapara rāma jasu prema na hṛdayam̐ samāi||353||
दोहा 354#

सब बिधि सबहि समदि नरनाहू। रहा हृदयँ भरि पूरि उछाहू॥
जहँ रनिवासु तहाँ पगु धारे। सहित बहूटिन्ह कुअँर निहारे॥
लिए गोद करि मोद समेता। को कहि सकइ भयउ सुखु जेता॥
बधू सप्रेम गोद बैठारीं। बार बार हियँ हरषि दुलारीं॥
देखि समाजु मुदित रनिवासू। सब कें उर अनंद कियो बासू॥
कहेउ भूप जिमि भयउ बिबाहू। सुनि हरषु होत सब काहू॥
जनक राज गुन सीलु बड़ाई। प्रीति रीति संपदा सुहाई॥
बहुबिधि भूप भाट जिमि बरनी। रानीं सब प्रमुदित सुनि करनी॥

saba bidhi sabahi samadi naranāhū| rahā hṛdayam̐ bhari pūri uchāhū||
jaham̐ ranivāsu tahām̐ pagu dhāre| sahita bahūṭinha kuam̐ra nihāre||
lie goda kari moda sametā| ko kahi sakai bhayau sukhu jetā||
badhū saprema goda baiṭhārīṃ| bāra bāra hiyam̐ haraṣi dulārīṃ||
dekhi samāju mudita ranivāsū| saba keṃ ura anaṃda kiyo bāsū||
kaheu bhūpa jimi bhayau bibāhū| suni haraṣu hota saba kāhū||
janaka rāja guna sīlu baḍāī| prīti rīti saṃpadā suhāī||
bahubidhi bhūpa bhāṭa jimi baranī| rānīṃ saba pramudita suni karanī||

दोहा 354
सुतन्ह समेत नहाइ नृप बोलि बिप्र गुर ग्याति।
भोजन कीन्ह अनेक बिधि घरी पंच गइ राति॥354॥
sutanha sameta nahāi nṛpa boli bipra gura gyāti|
bhojana kīnha aneka bidhi gharī paṃca gai rāti||354||
दोहा 355#

मंगलगान करहिं बर भामिनि। भै सुखमूल मनोहर जामिनि॥
अँचइ पान सब काहूँ पाए। स्त्रग सुगंध भूषित छबि छाए॥
रामहि देखि रजायसु पाई। निज निज भवन चले सिर नाई॥
प्रेम प्रमोद बिनोदु बढ़ाई। समउ समाजु मनोहरताई॥
कहि न सकहिं सत सारद सेसू। बेद बिरंचि महेस गनेसू॥
सो मैं कहौं कवन बिधि बरनी। भूमिनागु सिर धरइ कि धरनी॥
नृप सब भाँति सबहि सनमानी। कहि मृदु बचन बोलाई रानी॥
बधू लरिकनीं पर घर आईं। राखेहु नयन पलक की नाई॥

maṃgalagāna karahiṃ bara bhāmini| bhai sukhamūla manohara jāmini||
am̐cai pāna saba kāhūm̐ pāe| straga sugaṃdha bhūṣita chabi chāe||
rāmahi dekhi rajāyasu pāī| nija nija bhavana cale sira nāī||
prema pramoda binodu baḍhāī| samau samāju manoharatāī||
kahi na sakahiṃ sata sārada sesū| beda biraṃci mahesa ganesū||
so maiṃ kahauṃ kavana bidhi baranī| bhūmināgu sira dharai ki dharanī||
nṛpa saba bhām̐ti sabahi sanamānī| kahi mṛdu bacana bolāī rānī||
badhū larikanīṃ para ghara āīṃ| rākhehu nayana palaka kī nāī||

दोहा 355
लरिका श्रमित उनीद बस सयन करावहु जाइ।
अस कहि गे बिश्रामगृहँ राम चरन चितु लाइ॥355॥
larikā śramita unīda basa sayana karāvahu jāi|
asa kahi ge biśrāmagṛham̐ rāma carana citu lāi||355||
दोहा 356#

भूप बचन सुनि सहज सुहाए। जरित कनक मनि पलँग डसाए॥
सुभग सुरभि पय फेन समाना। कोमल कलित सुपेतीं नाना॥
उपबरहन बर बरनि न जाहीं। स्त्रग सुगंध मनिमंदिर माहीं॥
रतनदीप सुठि चारु चँदोवा। कहत न बनइ जान जेहिं जोवा॥
सेज रुचिर रचि रामु उठाए। प्रेम समेत पलँग पौढ़ाए॥
अग्या पुनि पुनि भाइन्ह दीन्ही। निज निज सेज सयन तिन्ह कीन्ही॥
देखि स्याम मृदु मंजुल गाता। कहहिं सप्रेम बचन सब माता॥
मारग जात भयावनि भारी। केहि बिधि तात ताड़का मारी॥

bhūpa bacana suni sahaja suhāe| jarita kanaka mani palam̐ga ḍasāe||
subhaga surabhi paya phena samānā| komala kalita supetīṃ nānā||
upabarahana bara barani na jāhīṃ| straga sugaṃdha manimaṃdira māhīṃ||
ratanadīpa suṭhi cāru cam̐dovā| kahata na banai jāna jehiṃ jovā||
seja rucira raci rāmu uṭhāe| prema sameta palam̐ga pauḍhāe||
agyā puni puni bhāinha dīnhī| nija nija seja sayana tinha kīnhī||
dekhi syāma mṛdu maṃjula gātā| kahahiṃ saprema bacana saba mātā||
māraga jāta bhayāvani bhārī| kehi bidhi tāta tāḍakā mārī||

दोहा 356
घोर निसाचर बिकट भट समर गनहिं नहिं काहु॥
मारे सहित सहाय किमि खल मारीच सुबाहु॥356॥
ghora nisācara bikaṭa bhaṭa samara ganahiṃ nahiṃ kāhu||
māre sahita sahāya kimi khala mārīca subāhu||356||
दोहा 357#

मुनि प्रसाद बलि तात तुम्हारी। ईस अनेक करवरें टारी॥
मख रखवारी करि दुहुँ भाई। गुरु प्रसाद सब बिद्या पाई॥
मुनितिय तरी लगत पग धूरी। कीरति रही भुवन भरि पूरी॥
कमठ पीठि पबि कूट कठोरा। नृप समाज महुँ सिव धनु तोरा॥
बिस्व बिजय जसु जानकि पाई। आए भवन ब्याहि सब भाई॥
सकल अमानुष करम तुम्हारे। केवल कौसिक कृपाँ सुधारे॥
आजु सुफल जग जनमु हमारा। देखि तात बिधुबदन तुम्हारा॥
जे दिन गए तुम्हहि बिनु देखें। ते बिरंचि जनि पारहिं लेखें॥

muni prasāda bali tāta tumhārī| īsa aneka karavareṃ ṭārī||
makha rakhavārī kari duhum̐ bhāī| guru prasāda saba bidyā pāī||
munitiya tarī lagata paga dhūrī| kīrati rahī bhuvana bhari pūrī||
kamaṭha pīṭhi pabi kūṭa kaṭhorā| nṛpa samāja mahum̐ siva dhanu torā||
bisva bijaya jasu jānaki pāī| āe bhavana byāhi saba bhāī||
sakala amānuṣa karama tumhāre| kevala kausika kṛpām̐ sudhāre||
āju suphala jaga janamu hamārā| dekhi tāta bidhubadana tumhārā||
je dina gae tumhahi binu dekheṃ| te biraṃci jani pārahiṃ lekheṃ||

दोहा 357
राम प्रतोषीं मातु सब कहि बिनीत बर बैन।
सुमिरि संभु गुर बिप्र पद किए नीदबस नैन॥357॥
rāma pratoṣīṃ mātu saba kahi binīta bara baina|
sumiri saṃbhu gura bipra pada kie nīdabasa naina||357||
दोहा 358#

नीदउँ बदन सोह सुठि लोना। मनहुँ साँझ सरसीरुह सोना॥
घर घर करहिं जागरन नारीं। देहिं परसपर मंगल गारीं॥
पुरी बिराजति राजति रजनी। रानीं कहहिं बिलोकहु सजनी॥
सुंदर बधुन्ह सासु लै सोई। फनिकन्ह जनु सिरमनि उर गोई॥
प्रात पुनीत काल प्रभु जागे। अरुनचूड़ बर बोलन लागे॥
बंदि मागधन्हि गुनगन गाए। पुरजन द्वार जोहारन आए॥
बंदि बिप्र सुर गुर पितु माता। पाइ असीस मुदित सब भ्राता॥
जननिन्ह सादर बदन निहारे। भूपति संग द्वार पगु धारे॥

nīdaum̐ badana soha suṭhi lonā| manahum̐ sām̐jha sarasīruha sonā||
ghara ghara karahiṃ jāgarana nārīṃ| dehiṃ parasapara maṃgala gārīṃ||
purī birājati rājati rajanī| rānīṃ kahahiṃ bilokahu sajanī||
suṃdara badhunha sāsu lai soī| phanikanha janu siramani ura goī||
prāta punīta kāla prabhu jāge| arunacūḍa bara bolana lāge||
baṃdi māgadhanhi gunagana gāe| purajana dvāra johārana āe||
baṃdi bipra sura gura pitu mātā| pāi asīsa mudita saba bhrātā||
jananinha sādara badana nihāre| bhūpati saṃga dvāra pagu dhāre||

दोहा 358
कीन्ह सौच सब सहज सुचि सरित पुनीत नहाइ।
प्रातक्रिया करि तात पहिं आए चारिउ भाइ॥358॥
kīnha sauca saba sahaja suci sarita punīta nahāi|
prātakriyā kari tāta pahiṃ āe cāriu bhāi||358||
नवाह्नपारायण, तीसरा विश्रामDay 3 of the 9-day Navahna path ends here
दोहा 359#

भूप बिलोकि लिए उर लाई। बैठे हरषि रजायसु पाई॥
देखि रामु सब सभा जुड़ानी। लोचन लाभ अवधि अनुमानी॥
पुनि बसिष्टु मुनि कौसिक आए। सुभग आसनन्हि मुनि बैठाए॥
सुतन्ह समेत पूजि पद लागे। निरखि रामु दोउ गुर अनुरागे॥
कहहिं बसिष्टु धरम इतिहासा। सुनहिं महीसु सहित रनिवासा॥
मुनि मन अगम गाधिसुत करनी। मुदित बसिष्ट बिपुल बिधि बरनी॥
बोले बामदेउ सब साँची। कीरति कलित लोक तिहुँ माची॥
सुनि आनंदु भयउ सब काहू। राम लखन उर अधिक उछाहू॥

bhūpa biloki lie ura lāī| baiṭhe haraṣi rajāyasu pāī||
dekhi rāmu saba sabhā juḍānī| locana lābha avadhi anumānī||
puni basiṣṭu muni kausika āe| subhaga āsananhi muni baiṭhāe||
sutanha sameta pūji pada lāge| nirakhi rāmu dou gura anurāge||
kahahiṃ basiṣṭu dharama itihāsā| sunahiṃ mahīsu sahita ranivāsā||
muni mana agama gādhisuta karanī| mudita basiṣṭa bipula bidhi baranī||
bole bāmadeu saba sām̐cī| kīrati kalita loka tihum̐ mācī||
suni ānaṃdu bhayau saba kāhū| rāma lakhana ura adhika uchāhū||

दोहा 359
मंगल मोद उछाह नित जाहिं दिवस एहि भाँति।
उमगी अवध अनंद भरि अधिक अधिक अधिकाति॥359॥
maṃgala moda uchāha nita jāhiṃ divasa ehi bhām̐ti|
umagī avadha anaṃda bhari adhika adhika adhikāti||359||
दोहा 360#

सुदिन सोधि कल कंकन छोरे। मंगल मोद बिनोद न थोरे॥
नित नव सुखु सुर देखि सिहाहीं। अवध जन्म जाचहिं बिधि पाहीं॥
बिस्वामित्रु चलन नित चहहीं। राम सप्रेम बिनय बस रहहीं॥
दिन दिन सयगुन भूपति भाऊ। देखि सराह महामुनिराऊ॥
मागत बिदा राउ अनुरागे। सुतन्ह समेत ठाढ़ भे आगे॥
नाथ सकल संपदा तुम्हारी। मैं सेवकु समेत सुत नारी॥
करब सदा लरिकनः पर छोहू। दरसन देत रहब मुनि मोहू॥
अस कहि राउ सहित सुत रानी। परेउ चरन मुख आव न बानी॥
दीन्ह असीस बिप्र बहु भाँति। चले न प्रीति रीति कहि जाती॥
रामु सप्रेम संग सब भाई। आयसु पाइ फिरे पहुँचाई॥

sudina sodhi kala kaṃkana chore| maṃgala moda binoda na thore||
nita nava sukhu sura dekhi sihāhīṃ| avadha janma jācahiṃ bidhi pāhīṃ||
bisvāmitru calana nita cahahīṃ| rāma saprema binaya basa rahahīṃ||
dina dina sayaguna bhūpati bhāū| dekhi sarāha mahāmunirāū||
māgata bidā rāu anurāge| sutanha sameta ṭhāḍha bhe āge||
nātha sakala saṃpadā tumhārī| maiṃ sevaku sameta suta nārī||
karaba sadā larikanaḥ para chohū| darasana deta rahaba muni mohū||
asa kahi rāu sahita suta rānī| pareu carana mukha āva na bānī||
dīnha asīsa bipra bahu bhām̐ti| cale na prīti rīti kahi jātī||
rāmu saprema saṃga saba bhāī| āyasu pāi phire pahum̐cāī||

दोहा 360
राम रूपु भूपति भगति ब्याहु उछाहु अनंदु।
जात सराहत मनहिं मन मुदित गाधिकुलचंदु॥360॥
rāma rūpu bhūpati bhagati byāhu uchāhu anaṃdu|
jāta sarāhata manahiṃ mana mudita gādhikulacaṃdu||360||
सोरठा 361#

बामदेव रघुकुल गुर ग्यानी। बहुरि गाधिसुत कथा बखानी॥
सुनि मुनि सुजसु मनहिं मन राऊ। बरनत आपन पुन्य प्रभाऊ॥
बहुरे लोग रजायसु भयऊ। सुतन्ह समेत नृपति गृहँ गयऊ॥
जहँ तहँ राम ब्याहु सबु गावा। सुजसु पुनीत लोक तिहुँ छावा॥
आए ब्याहि रामु घर जब तें। बसइ अनंद अवध सब तब तें॥
प्रभु बिबाहँ जस भयउ उछाहू। सकहिं न बरनि गिरा अहिनाहू॥
कबिकुल जीवनु पावन जानी॥राम सीय जसु मंगल खानी॥
तेहि ते मैं कछु कहा बखानी। करन पुनीत हेतु निज बानी॥

bāmadeva raghukula gura gyānī| bahuri gādhisuta kathā bakhānī||
suni muni sujasu manahiṃ mana rāū| baranata āpana punya prabhāū||
bahure loga rajāyasu bhayaū| sutanha sameta nṛpati gṛham̐ gayaū||
jaham̐ taham̐ rāma byāhu sabu gāvā| sujasu punīta loka tihum̐ chāvā||
āe byāhi rāmu ghara jaba teṃ| basai anaṃda avadha saba taba teṃ||
prabhu bibāham̐ jasa bhayau uchāhū| sakahiṃ na barani girā ahināhū||
kabikula jīvanu pāvana jānī||rāma sīya jasu maṃgala khānī||
tehi te maiṃ kachu kahā bakhānī| karana punīta hetu nija bānī||

छंद
निज गिरा पावनि करन कारन राम जसु तुलसी कह्यो।
रघुबीर चरित अपार बारिधि पारु कबि कौनें लह्यो॥
उपबीत ब्याह उछाह मंगल सुनि जे सादर गावहीं।
बैदेहि राम प्रसाद ते जन सर्बदा सुखु पावहीं॥
nija girā pāvani karana kārana rāma jasu tulasī kahyo|
raghubīra carita apāra bāridhi pāru kabi kauneṃ lahyo||
upabīta byāha uchāha maṃgala suni je sādara gāvahīṃ|
baidehi rāma prasāda te jana sarbadā sukhu pāvahīṃ||

सोरठा 361
सिय रघुबीर बिबाहु जे सप्रेम गावहिं सुनहिं।
तिन्ह कहुँ सदा उछाहु मंगलायतन राम जसु॥361॥
siya raghubīra bibāhu je saprema gāvahiṃ sunahiṃ|
tinha kahum̐ sadā uchāhu maṃgalāyatana rāma jasu||361||
मासपारायण, बारहवाँ विश्रामDay 12 of the 30-day Masparayan ends here
इति श्रीमद्रामचरितमानसे सकलकलिकलुषबिध्वंसने प्रथमः सोपानः समाप्तः।

Completed Bal Kand — Part 12?

Mark Masparayan day 12 done, light a diya, or share the path with family.

Text: the Gita Press edition of Shri Ramcharitmanas, checked against two independent transcriptions. Spotted an error? Suggest a correction.

Bal Kand — Part 12 — text

Completed Bal Kand — Part 12?