Bal Kand — Part 8 बालकाण्ड · भाग 8

Bal Kand — Part 8 — text

1. दोहा 212#

   चले राम लछिमन मुनि संगा। गए जहाँ जग पावनि गंगा॥
   गाधिसूनु सब कथा सुनाई। जेहि प्रकार सुरसरि महि आई॥
   तब प्रभु रिषिन्ह समेत नहाए। बिबिध दान महिदेवन्हि पाए॥
   हरषि चले मुनि बृंद सहाया। बेगि बिदेह नगर निअराया॥
   पुर रम्यता राम जब देखी। हरषे अनुज समेत बिसेषी॥
   बापीं कूप सरित सर नाना। सलिल सुधासम मनि सोपाना॥
   गुंजत मंजु मत्त रस भृंगा। कूजत कल बहुबरन बिहंगा॥
   बरन बरन बिकसे बन जाता। त्रिबिध समीर सदा सुखदाता॥

   cale rāma lachimana muni saṃgā| gae jahām̐ jaga pāvani gaṃgā||
   gādhisūnu saba kathā sunāī| jehi prakāra surasari mahi āī||
   taba prabhu riṣinha sameta nahāe| bibidha dāna mahidevanhi pāe||
   haraṣi cale muni bṛṃda sahāyā| begi bideha nagara niarāyā||
   pura ramyatā rāma jaba dekhī| haraṣe anuja sameta biseṣī||
   bāpīṃ kūpa sarita sara nānā| salila sudhāsama mani sopānā||
   guṃjata maṃju matta rasa bhṛṃgā| kūjata kala bahubarana bihaṃgā||
   barana barana bikase bana jātā| tribidha samīra sadā sukhadātā||

   दोहा 212

   सुमन बाटिका बाग बन बिपुल बिहंग निवास।
   फूलत फलत सुपल्लवत सोहत पुर चहुँ पास॥212॥

   sumana bāṭikā bāga bana bipula bihaṃga nivāsa|
   phūlata phalata supallavata sohata pura cahum̐ pāsa||212||

2. दोहा 213#

   बनइ न बरनत नगर निकाई। जहाँ जाइ मन तहँइँ लोभाई॥
   चारु बजारु बिचित्र अँबारी। मनिमय बिधि जनु स्वकर सँवारी॥
   धनिक बनिक बर धनद समाना। बैठे सकल बस्तु लै नाना॥
   चौहट सुंदर गलीं सुहाई। संतत रहहिं सुगंध सिंचाई॥
   मंगलमय मंदिर सब केरें। चित्रित जनु रतिनाथ चितेरें॥
   पुर नर नारि सुभग सुचि संता। धरमसील ग्यानी गुनवंता॥
   अति अनूप जहँ जनक निवासू। बिथकहिं बिबुध बिलोकि बिलासू॥
   होत चकित चित कोट बिलोकी। सकल भुवन सोभा जनु रोकी॥

   banai na baranata nagara nikāī| jahām̐ jāi mana taham̐im̐ lobhāī||
   cāru bajāru bicitra am̐bārī| manimaya bidhi janu svakara sam̐vārī||
   dhanika banika bara dhanada samānā| baiṭhe sakala bastu lai nānā||
   cauhaṭa suṃdara galīṃ suhāī| saṃtata rahahiṃ sugaṃdha siṃcāī||
   maṃgalamaya maṃdira saba kereṃ| citrita janu ratinātha citereṃ||
   pura nara nāri subhaga suci saṃtā| dharamasīla gyānī gunavaṃtā||
   ati anūpa jaham̐ janaka nivāsū| bithakahiṃ bibudha biloki bilāsū||
   hota cakita cita koṭa bilokī| sakala bhuvana sobhā janu rokī||

   दोहा 213

   धवल धाम मनि पुरट पट सुघटित नाना भाँति।
   सिय निवास सुंदर सदन सोभा किमि कहि जाति॥213॥

   dhavala dhāma mani puraṭa paṭa sughaṭita nānā bhām̐ti|
   siya nivāsa suṃdara sadana sobhā kimi kahi jāti||213||

3. दोहा 214#

   सुभग द्वार सब कुलिस कपाटा। भूप भीर नट मागध भाटा॥
   बनी बिसाल बाजि गज साला। हय गय रथ संकुल सब काला॥
   सूर सचिव सेनप बहुतेरे। नृपगृह सरिस सदन सब केरे॥
   पुर बाहेर सर सरित समीपा। उतरे जहँ तहँ बिपुल महीपा॥
   देखि अनूप एक अँवराई। सब सुपास सब भाँति सुहाई॥
   कौसिक कहेउ मोर मनु माना। इहाँ रहिअ रघुबीर सुजाना॥
   भलेहिं नाथ कहि कृपानिकेता। उतरे तहँ मुनिबृंद समेता॥
   बिस्वामित्र महामुनि आए। समाचार मिथिलापति पाए॥

   subhaga dvāra saba kulisa kapāṭā| bhūpa bhīra naṭa māgadha bhāṭā||
   banī bisāla bāji gaja sālā| haya gaya ratha saṃkula saba kālā||
   sūra saciva senapa bahutere| nṛpagṛha sarisa sadana saba kere||
   pura bāhera sara sarita samīpā| utare jaham̐ taham̐ bipula mahīpā||
   dekhi anūpa eka am̐varāī| saba supāsa saba bhām̐ti suhāī||
   kausika kaheu mora manu mānā| ihām̐ rahia raghubīra sujānā||
   bhalehiṃ nātha kahi kṛpāniketā| utare taham̐ munibṛṃda sametā||
   bisvāmitra mahāmuni āe| samācāra mithilāpati pāe||

   दोहा 214

   संग सचिव सुचि भूरि भट भूसुर बर गुर ग्याति।
   चले मिलन मुनिनायकहि मुदित राउ एहि भाँति॥214॥

   saṃga saciva suci bhūri bhaṭa bhūsura bara gura gyāti|
   cale milana munināyakahi mudita rāu ehi bhām̐ti||214||

4. दोहा 215#

   कीन्ह प्रनामु चरन धरि माथा। दीन्हि असीस मुदित मुनिनाथा॥
   बिप्रबृंद सब सादर बंदे। जानि भाग्य बड़ राउ अनंदे॥
   कुसल प्रस्न कहि बारहिं बारा। बिस्वामित्र नृपहि बैठारा॥
   तेहि अवसर आए दोउ भाई। गए रहे देखन फुलवाई॥
   स्याम गौर मृदु बयस किसोरा। लोचन सुखद बिस्व चित चोरा॥
   उठे सकल जब रघुपति आए। बिस्वामित्र निकट बैठाए॥
   भए सब सुखी देखि दोउ भ्राता। बारि बिलोचन पुलकित गाता॥
   मूरति मधुर मनोहर देखी। भयउ बिदेहु बिदेहु बिसेषी॥

   kīnha pranāmu carana dhari māthā| dīnhi asīsa mudita munināthā||
   biprabṛṃda saba sādara baṃde| jāni bhāgya baḍa rāu anaṃde||
   kusala prasna kahi bārahiṃ bārā| bisvāmitra nṛpahi baiṭhārā||
   tehi avasara āe dou bhāī| gae rahe dekhana phulavāī||
   syāma gaura mṛdu bayasa kisorā| locana sukhada bisva cita corā||
   uṭhe sakala jaba raghupati āe| bisvāmitra nikaṭa baiṭhāe||
   bhae saba sukhī dekhi dou bhrātā| bāri bilocana pulakita gātā||
   mūrati madhura manohara dekhī| bhayau bidehu bidehu biseṣī||

   दोहा 215

   प्रेम मगन मनु जानि नृपु करि बिबेकु धरि धीर।
   बोलेउ मुनि पद नाइ सिरु गदगद गिरा गभीर॥215॥

   prema magana manu jāni nṛpu kari bibeku dhari dhīra|
   boleu muni pada nāi siru gadagada girā gabhīra||215||

5. दोहा 216#

   कहहु नाथ सुंदर दोउ बालक। मुनिकुल तिलक कि नृपकुल पालक॥
   ब्रह्म जो निगम नेति कहि गावा। उभय बेष धरि की सोइ आवा॥
   सहज बिरागरुप मनु मोरा। थकित होत जिमि चंद चकोरा॥
   ताते प्रभु पूछउँ सतिभाऊ। कहहु नाथ जनि करहु दुराऊ॥
   इन्हहि बिलोकत अति अनुरागा। बरबस ब्रह्मसुखहि मन त्यागा॥
   कह मुनि बिहसि कहेहु नृप नीका। बचन तुम्हार न होइ अलीका॥
   ए प्रिय सबहि जहाँ लगि प्रानी। मन मुसुकाहिं रामु सुनि बानी॥
   रघुकुल मनि दसरथ के जाए। मम हित लागि नरेस पठाए॥

   kahahu nātha suṃdara dou bālaka| munikula tilaka ki nṛpakula pālaka||
   brahma jo nigama neti kahi gāvā| ubhaya beṣa dhari kī soi āvā||
   sahaja birāgarupa manu morā| thakita hota jimi caṃda cakorā||
   tāte prabhu pūchaum̐ satibhāū| kahahu nātha jani karahu durāū||
   inhahi bilokata ati anurāgā| barabasa brahmasukhahi mana tyāgā||
   kaha muni bihasi kahehu nṛpa nīkā| bacana tumhāra na hoi alīkā||
   e priya sabahi jahām̐ lagi prānī| mana musukāhiṃ rāmu suni bānī||
   raghukula mani dasaratha ke jāe| mama hita lāgi naresa paṭhāe||

   दोहा 216

   रामु लखनु दोउ बंधुबर रूप सील बल धाम।
   मख राखेउ सबु साखि जगु जिते असुर संग्राम॥216॥

   rāmu lakhanu dou baṃdhubara rūpa sīla bala dhāma|
   makha rākheu sabu sākhi jagu jite asura saṃgrāma||216||

6. दोहा 217#

   मुनि तव चरन देखि कह राऊ। कहि न सकउँ निज पुन्य प्रभाऊ॥
   सुंदर स्याम गौर दोउ भ्राता। आनँदहू के आनँद दाता॥
   इन्ह कै प्रीति परसपर पावनि। कहि न जाइ मन भाव सुहावनि॥
   सुनहु नाथ कह मुदित बिदेहू। ब्रह्म जीव इव सहज सनेहू॥
   पुनि पुनि प्रभुहि चितव नरनाहू। पुलक गात उर अधिक उछाहू॥
   म्रुनिहि प्रसंसि नाइ पद सीसू। चलेउ लवाइ नगर अवनीसू॥
   सुंदर सदनु सुखद सब काला। तहाँ बासु लै दीन्ह भुआला॥
   करि पूजा सब बिधि सेवकाई। गयउ राउ गृह बिदा कराई॥

   muni tava carana dekhi kaha rāū| kahi na sakaum̐ nija punya prabhāū||
   suṃdara syāma gaura dou bhrātā| ānam̐dahū ke ānam̐da dātā||
   inha kai prīti parasapara pāvani| kahi na jāi mana bhāva suhāvani||
   sunahu nātha kaha mudita bidehū| brahma jīva iva sahaja sanehū||
   puni puni prabhuhi citava naranāhū| pulaka gāta ura adhika uchāhū||
   mrunihi prasaṃsi nāi pada sīsū| caleu lavāi nagara avanīsū||
   suṃdara sadanu sukhada saba kālā| tahām̐ bāsu lai dīnha bhuālā||
   kari pūjā saba bidhi sevakāī| gayau rāu gṛha bidā karāī||

   दोहा 217

   रिषय संग रघुबंस मनि करि भोजनु बिश्रामु।
   बैठे प्रभु भ्राता सहित दिवसु रहा भरि जामु॥217॥

   riṣaya saṃga raghubaṃsa mani kari bhojanu biśrāmu|
   baiṭhe prabhu bhrātā sahita divasu rahā bhari jāmu||217||

7. दोहा 218#

   लखन हृदयँ लालसा बिसेषी। जाइ जनकपुर आइअ देखी॥
   प्रभु भय बहुरि मुनिहि सकुचाहीं। प्रगट न कहहिं मनहिं मुसुकाहीं॥
   राम अनुज मन की गति जानी। भगत बछलता हियँ हुलसानी॥
   परम बिनीत सकुचि मुसुकाई। बोले गुर अनुसासन पाई॥
   नाथ लखनु पुरु देखन चहहीं। प्रभु सकोच डर प्रगट न कहहीं॥
   जौं राउर आयसु मैं पावौं। नगर देखाइ तुरत लै आवौं॥
   सुनि मुनीसु कह बचन सप्रीती। कस न राम तुम्ह राखहु नीती॥
   धरम सेतु पालक तुम्ह ताता। प्रेम बिबस सेवक सुखदाता॥

   lakhana hṛdayam̐ lālasā biseṣī| jāi janakapura āia dekhī||
   prabhu bhaya bahuri munihi sakucāhīṃ| pragaṭa na kahahiṃ manahiṃ musukāhīṃ||
   rāma anuja mana kī gati jānī| bhagata bachalatā hiyam̐ hulasānī||
   parama binīta sakuci musukāī| bole gura anusāsana pāī||
   nātha lakhanu puru dekhana cahahīṃ| prabhu sakoca ḍara pragaṭa na kahahīṃ||
   jauṃ rāura āyasu maiṃ pāvauṃ| nagara dekhāi turata lai āvauṃ||
   suni munīsu kaha bacana saprītī| kasa na rāma tumha rākhahu nītī||
   dharama setu pālaka tumha tātā| prema bibasa sevaka sukhadātā||

   दोहा 218

   जाइ देखि आवहु नगरु सुख निधान दोउ भाइ।
   करहु सुफल सब के नयन सुंदर बदन देखाइ॥218॥

   jāi dekhi āvahu nagaru sukha nidhāna dou bhāi|
   karahu suphala saba ke nayana suṃdara badana dekhāi||218||

8. मासपारायण, आठवाँ विश्रामDay 8 of the 30-day Masparayan ends here

   Mark day 8 done

9. नवाह्नपारायण, दूसरा विश्रामDay 2 of the 9-day Navahna path ends here

   Mark day 2 done

Text: the Gita Press edition of Shri Ramcharitmanas, checked against two independent transcriptions. Spotted an error? Suggest a correction.