Ramcharitmanas Bal Kand Part 4 (Doha 90–120)

दोहा 90#

सुनि बोलीं मुसुकाइ भवानी। उचित कहेहु मुनिबर बिग्यानी॥
तुम्हरें जान कामु अब जारा। अब लगि संभु रहे सबिकारा॥
हमरें जान सदा सिव जोगी। अज अनवद्य अकाम अभोगी॥
जौं मैं सिव सेये अस जानी। प्रीति समेत कर्म मन बानी॥
तौ हमार पन सुनहु मुनीसा। करिहहिं सत्य कृपानिधि ईसा॥
तुम्ह जो कहा हर जारेउ मारा। सोइ अति बड़ अबिबेकु तुम्हारा॥
तात अनल कर सहज सुभाऊ। हिम तेहि निकट जाइ नहिं काऊ॥
गएँ समीप सो अवसि नसाई। असि मन्मथ महेस की नाई॥

suni bolīṃ musukāi bhavānī| ucita kahehu munibara bigyānī||
tumhareṃ jāna kāmu aba jārā| aba lagi saṃbhu rahe sabikārā||
hamareṃ jāna sadā siva jogī| aja anavadya akāma abhogī||
jauṃ maiṃ siva seye asa jānī| prīti sameta karma mana bānī||
tau hamāra pana sunahu munīsā| karihahiṃ satya kṛpānidhi īsā||
tumha jo kahā hara jāreu mārā| soi ati baḍa abibeku tumhārā||
tāta anala kara sahaja subhāū| hima tehi nikaṭa jāi nahiṃ kāū||
gaem̐ samīpa so avasi nasāī| asi manmatha mahesa kī nāī||

दोहा 90
हियँ हरषे मुनि बचन सुनि देखि प्रीति बिस्वास॥
चले भवानिहि नाइ सिर गए हिमाचल पास॥९०॥
hiyam̐ haraṣe muni bacana suni dekhi prīti bisvāsa||
cale bhavānihi nāi sira gae himācala pāsa||90||
दोहा 91#

सबु प्रसंगु गिरिपतिहि सुनावा। मदन दहन सुनि अति दुखु पावा॥
बहुरि कहेउ रति कर बरदाना। सुनि हिमवंत बहुत सुखु माना॥
हृदयँ बिचारि संभु प्रभुताई। सादर मुनिबर लिए बोलाई॥
सुदिनु सुनखतु सुघरी सोचाई। बेगि बेदबिधि लगन धराई॥
पत्री सप्तरिषिन्ह सोइ दीन्ही। गहि पद बिनय हिमाचल कीन्ही॥
जाइ बिधिहि दीन्हि सो पाती। बाचत प्रीति न हृदयँ समाती॥
लगन बाचि अज सबहि सुनाई। हरषे मुनि सब सुर समुदाई॥
सुमन बृष्टि नभ बाजन बाजे। मंगल कलस दसहुँ दिसि साजे॥

sabu prasaṃgu giripatihi sunāvā| madana dahana suni ati dukhu pāvā||
bahuri kaheu rati kara baradānā| suni himavaṃta bahuta sukhu mānā||
hṛdayam̐ bicāri saṃbhu prabhutāī| sādara munibara lie bolāī||
sudinu sunakhatu sugharī socāī| begi bedabidhi lagana dharāī||
patrī saptariṣinha soi dīnhī| gahi pada binaya himācala kīnhī||
jāi bidhihi dīnhi so pātī| bācata prīti na hṛdayam̐ samātī||
lagana bāci aja sabahi sunāī| haraṣe muni saba sura samudāī||
sumana bṛṣṭi nabha bājana bāje| maṃgala kalasa dasahum̐ disi sāje||

दोहा 91
लगे सँवारन सकल सुर बाहन बिबिध बिमान।
होहिं सगुन मंगल सुभद करहिं अपछरा गान॥९१॥
lage sam̐vārana sakala sura bāhana bibidha bimāna|
hohiṃ saguna maṃgala subhada karahiṃ apacharā gāna||91||
दोहा 92#

सिवहि संभुगन करहिं सिंगारा। जटा मुकुट अहि मौरु सँवारा॥
कुंडल कंकन पहिरे ब्याला। तन बिभूति पट केहरि छाला॥
ससि ललाट सुंदर सिर गंगा। नयन तीनि उपबीत भुजंगा॥
गरल कंठ उर नर सिर माला। असिव बेष सिवधाम कृपाला॥
कर त्रिसूल अरु डमरु बिराजा। चले बसहँ चढ़ि बाजहिं बाजा॥
देखि सिवहि सुरत्रिय मुसुकाहीं। बर लायक दुलहिनि जग नाहीं॥
बिष्नु बिरंचि आदि सुरब्राता। चढ़ि चढ़ि बाहन चले बराता॥
सुर समाज सब भाँति अनूपा। नहिं बरात दूलह अनुरूपा॥

sivahi saṃbhugana karahiṃ siṃgārā| jaṭā mukuṭa ahi mauru sam̐vārā||
kuṃḍala kaṃkana pahire byālā| tana bibhūti paṭa kehari chālā||
sasi lalāṭa suṃdara sira gaṃgā| nayana tīni upabīta bhujaṃgā||
garala kaṃṭha ura nara sira mālā| asiva beṣa sivadhāma kṛpālā||
kara trisūla aru ḍamaru birājā| cale basaham̐ caḍhi bājahiṃ bājā||
dekhi sivahi suratriya musukāhīṃ| bara lāyaka dulahini jaga nāhīṃ||
biṣnu biraṃci ādi surabrātā| caḍhi caḍhi bāhana cale barātā||
sura samāja saba bhām̐ti anūpā| nahiṃ barāta dūlaha anurūpā||

दोहा 92
बिष्नु कहा अस बिहसि तब बोलि सकल दिसिराज।
बिलग बिलग होइ चलहु सब निज निज सहित समाज॥९२॥
biṣnu kahā asa bihasi taba boli sakala disirāja|
bilaga bilaga hoi calahu saba nija nija sahita samāja||92||
सोरठा 93#

बर अनुहारि बरात न भाई। हँसी करैहहु पर पुर जाई॥
बिष्नु बचन सुनि सुर मुसुकाने। निज निज सेन सहित बिलगाने॥
मनहीं मन महेसु मुसुकाहीं। हरि के बिंग्य बचन नहिं जाहीं॥
अति प्रिय बचन सुनत प्रिय केरे। भृंगिहि प्रेरि सकल गन टेरे॥
सिव अनुसासन सुनि सब आए। प्रभु पद जलज सीस तिन्ह नाए॥
नाना बाहन नाना बेषा। बिहसे सिव समाज निज देखा॥
कोउ मुखहीन बिपुल मुख काहू। बिनु पद कर कोउ बहु पद बाहू॥
बिपुल नयन कोउ नयन बिहीना। रिष्टपुष्ट कोउ अति तनखीना॥

bara anuhāri barāta na bhāī| ham̐sī karaihahu para pura jāī||
biṣnu bacana suni sura musukāne| nija nija sena sahita bilagāne||
manahīṃ mana mahesu musukāhīṃ| hari ke biṃgya bacana nahiṃ jāhīṃ||
ati priya bacana sunata priya kere| bhṛṃgihi preri sakala gana ṭere||
siva anusāsana suni saba āe| prabhu pada jalaja sīsa tinha nāe||
nānā bāhana nānā beṣā| bihase siva samāja nija dekhā||
kou mukhahīna bipula mukha kāhū| binu pada kara kou bahu pada bāhū||
bipula nayana kou nayana bihīnā| riṣṭapuṣṭa kou ati tanakhīnā||

छंद
तन खीन कोउ अति पीन पावन कोउ अपावन गति धरें।
भूषन कराल कपाल कर सब सद्य सोनित तन भरें॥
खर स्वान सुअर सृकाल मुख गन बेष अगनित को गनै।
बहु जिनस प्रेत पिसाच जोगि जमात बरनत नहिं बनै॥
tana khīna kou ati pīna pāvana kou apāvana gati dhareṃ|
bhūṣana karāla kapāla kara saba sadya sonita tana bhareṃ||
khara svāna suara sṛkāla mukha gana beṣa aganita ko ganai|
bahu jinasa preta pisāca jogi jamāta baranata nahiṃ banai||

सोरठा 93
नाचहिं गावहिं गीत परम तरंगी भूत सब।
देखत अति बिपरीत बोलहिं बचन बिचित्र बिधि॥९३॥
nācahiṃ gāvahiṃ gīta parama taraṃgī bhūta saba|
dekhata ati biparīta bolahiṃ bacana bicitra bidhi||93||
दोहा 94#

जस दूलहु तसि बनी बराता। कौतुक बिबिध होहिं मग जाता॥
इहाँ हिमाचल रचेउ बिताना। अति बिचित्र नहिं जाइ बखाना॥
सैल सकल जहँ लगि जग माहीं। लघु बिसाल नहिं बरनि सिराहीं॥
बन सागर सब नदी तलावा। हिमगिरि सब कहुँ नेवत पठावा॥
कामरूप सुंदर तन धारी। सहित समाज सहित बर नारी॥
गए सकल तुहिनाचल गेहा। गावहिं मंगल सहित सनेहा॥
प्रथमहिं गिरि बहु गृह सँवराए। जथाजोगु तहँ तहँ सब छाए॥
पुर सोभा अवलोकि सुहाई। लागइ लघु बिरंचि निपुनाई॥

jasa dūlahu tasi banī barātā| kautuka bibidha hohiṃ maga jātā||
ihām̐ himācala raceu bitānā| ati bicitra nahiṃ jāi bakhānā||
saila sakala jaham̐ lagi jaga māhīṃ| laghu bisāla nahiṃ barani sirāhīṃ||
bana sāgara saba nadī talāvā| himagiri saba kahum̐ nevata paṭhāvā||
kāmarūpa suṃdara tana dhārī| sahita samāja sahita bara nārī||
gae sakala tuhinācala gehā| gāvahiṃ maṃgala sahita sanehā||
prathamahiṃ giri bahu gṛha sam̐varāe| jathājogu taham̐ taham̐ saba chāe||
pura sobhā avaloki suhāī| lāgai laghu biraṃci nipunāī||

छंद
लघु लाग बिधि की निपुनता अवलोकि पुर सोभा सही।
बन बाग कूप तड़ाग सरिता सुभग सब सक को कही॥
मंगल बिपुल तोरन पताका केतु गृह गृह सोहहीं॥
बनिता पुरुष सुंदर चतुर छबि देखि मुनि मन मोहहीं॥
laghu lāga bidhi kī nipunatā avaloki pura sobhā sahī|
bana bāga kūpa taḍāga saritā subhaga saba saka ko kahī||
maṃgala bipula torana patākā ketu gṛha gṛha sohahīṃ||
banitā puruṣa suṃdara catura chabi dekhi muni mana mohahīṃ||

दोहा 94
जगदंबा जहँ अवतरी सो पुरु बरनि कि जाइ।
रिद्धि सिद्धि संपत्ति सुख नित नूतन अधिकाइ॥९४॥
jagadaṃbā jaham̐ avatarī so puru barani ki jāi|
riddhi siddhi saṃpatti sukha nita nūtana adhikāi||94||
दोहा 95#

नगर निकट बरात सुनि आई। पुर खरभरु सोभा अधिकाई॥
करि बनाव सजि बाहन नाना। चले लेन सादर अगवाना॥
हियँ हरषे सुर सेन निहारी। हरिहि देखि अति भए सुखारी॥
सिव समाज जब देखन लागे। बिडरि चले बाहन सब भागे॥
धरि धीरजु तहँ रहे सयाने। बालक सब लै जीव पराने॥
गएँ भवन पूछहिं पितु माता। कहहिं बचन भय कंपित गाता॥
कहिअ काह कहि जाइ न बाता। जम कर धार किधौं बरिआता॥
बरु बौराह बसहँ असवारा। ब्याल कपाल बिभूषन छारा॥

nagara nikaṭa barāta suni āī| pura kharabharu sobhā adhikāī||
kari banāva saji bāhana nānā| cale lena sādara agavānā||
hiyam̐ haraṣe sura sena nihārī| harihi dekhi ati bhae sukhārī||
siva samāja jaba dekhana lāge| biḍari cale bāhana saba bhāge||
dhari dhīraju taham̐ rahe sayāne| bālaka saba lai jīva parāne||
gaem̐ bhavana pūchahiṃ pitu mātā| kahahiṃ bacana bhaya kaṃpita gātā||
kahia kāha kahi jāi na bātā| jama kara dhāra kidhauṃ bariātā||
baru baurāha basaham̐ asavārā| byāla kapāla bibhūṣana chārā||

छंद
तन छार ब्याल कपाल भूषन नगन जटिल भयंकरा।
सँग भूत प्रेत पिसाच जोगिनि बिकट मुख रजनीचरा॥
जो जिअत रहिहि बरात देखत पुन्य बड़ तेहि कर सही।
देखिहि सो उमा बिबाहु घर घर बात असि लरिकन्ह कही॥
tana chāra byāla kapāla bhūṣana nagana jaṭila bhayaṃkarā|
sam̐ga bhūta preta pisāca jogini bikaṭa mukha rajanīcarā||
jo jiata rahihi barāta dekhata punya baḍa tehi kara sahī|
dekhihi so umā bibāhu ghara ghara bāta asi larikanha kahī||

दोहा 95
समुझि महेस समाज सब जननि जनक मुसुकाहिं।
बाल बुझाए बिबिध बिधि निडर होहु डरु नाहिं॥९५॥
samujhi mahesa samāja saba janani janaka musukāhiṃ|
bāla bujhāe bibidha bidhi niḍara hohu ḍaru nāhiṃ||95||
दोहा 96#

लै अगवान बरातहि आए। दिए सबहि जनवास सुहाए॥
मैनाँ सुभ आरती सँवारी। संग सुमंगल गावहिं नारी॥
कंचन थार सोह बर पानी। परिछन चली हरहि हरषानी॥
बिकट बेष रुद्रहि जब देखा। अबलन्ह उर भय भयउ बिसेषा॥
भागि भवन पैठीं अति त्रासा। गए महेसु जहाँ जनवासा॥
मैना हृदयँ भयउ दुखु भारी। लीन्ही बोलि गिरीसकुमारी॥
अधिक सनेहँ गोद बैठारी। स्याम सरोज नयन भरे बारी॥
जेहिं बिधि तुम्हहि रूपु अस दीन्हा। तेहिं जड़ बरु बाउर कस कीन्हा॥

lai agavāna barātahi āe| die sabahi janavāsa suhāe||
mainām̐ subha āratī sam̐vārī| saṃga sumaṃgala gāvahiṃ nārī||
kaṃcana thāra soha bara pānī| parichana calī harahi haraṣānī||
bikaṭa beṣa rudrahi jaba dekhā| abalanha ura bhaya bhayau biseṣā||
bhāgi bhavana paiṭhīṃ ati trāsā| gae mahesu jahām̐ janavāsā||
mainā hṛdayam̐ bhayau dukhu bhārī| līnhī boli girīsakumārī||
adhika saneham̐ goda baiṭhārī| syāma saroja nayana bhare bārī||
jehiṃ bidhi tumhahi rūpu asa dīnhā| tehiṃ jaḍa baru bāura kasa kīnhā||

छंद
कस कीन्ह बरु बौराह बिधि जेहिं तुम्हहि सुंदरता दई।
जो फलु चहिअ सुरतरुहिं सो बरबस बबूरहिं लागई॥
तुम्ह सहित गिरि तें गिरौं पावक जरौं जलनिधि महुँ परौं॥
घरु जाउ अपजसु होउ जग जीवत बिबाहु न हौं करौं॥
kasa kīnha baru baurāha bidhi jehiṃ tumhahi suṃdaratā daī|
jo phalu cahia surataruhiṃ so barabasa babūrahiṃ lāgaī||
tumha sahita giri teṃ girauṃ pāvaka jarauṃ jalanidhi mahum̐ parauṃ||
gharu jāu apajasu hou jaga jīvata bibāhu na hauṃ karauṃ||

दोहा 96
भईं बिकल अबला सकल दुखित देखि गिरिनारि।
करि बिलापु रोदति बदति सुता सनेहु सँभारि॥९६॥
bhaīṃ bikala abalā sakala dukhita dekhi girināri|
kari bilāpu rodati badati sutā sanehu sam̐bhāri||96||
दोहा 97#

नारद कर मैं काह बिगारा। भवनु मोर जिन्ह बसत उजारा॥
अस उपदेसु उमहि जिन्ह दीन्हा। बौरे बरहि लगि तपु कीन्हा॥
साचेहुँ उन्ह के मोह न माया। उदासीन धनु धामु न जाया॥
पर घर घालक लाज न भीरा। बाँझ कि जान प्रसव कै पीरा॥
जननिहि बिकल बिलोकि भवानी। बोली जुत बिबेक मृदु बानी॥
अस बिचारि सोचहि मति माता। सो न टरइ जो रचइ बिधाता॥
करम लिखा जौं बाउर नाहू। तौ कत दोसु लगाइअ काहू॥
तुम्ह सन मिटहिं कि बिधि के अंका। मातु ब्यर्थ जनि लेहु कलंका॥

nārada kara maiṃ kāha bigārā| bhavanu mora jinha basata ujārā||
asa upadesu umahi jinha dīnhā| baure barahi lagi tapu kīnhā||
sācehum̐ unha ke moha na māyā| udāsīna dhanu dhāmu na jāyā||
para ghara ghālaka lāja na bhīrā| bām̐jha ki jāna prasava kai pīrā||
jananihi bikala biloki bhavānī| bolī juta bibeka mṛdu bānī||
asa bicāri socahi mati mātā| so na ṭarai jo racai bidhātā||
karama likhā jauṃ bāura nāhū| tau kata dosu lagāia kāhū||
tumha sana miṭahiṃ ki bidhi ke aṃkā| mātu byartha jani lehu kalaṃkā||

छंद
जनि लेहु मातु कलंकु करुना परिहरहु अवसर नहीं।
दुखु सुखु जो लिखा लिलार हमरें जाब जहँ पाउब तहीं॥
सुनि उमा बचन बिनीत कोमल सकल अबला सोचहीं॥
बहु भाँति बिधिहि लगाइ दूषन नयन बारि बिमोचहीं॥
jani lehu mātu kalaṃku karunā pariharahu avasara nahīṃ|
dukhu sukhu jo likhā lilāra hamareṃ jāba jaham̐ pāuba tahīṃ||
suni umā bacana binīta komala sakala abalā socahīṃ||
bahu bhām̐ti bidhihi lagāi dūṣana nayana bāri bimocahīṃ||

दोहा 97
तेहि अवसर नारद सहित अरु रिषि सप्त समेत।
समाचार सुनि तुहिनगिरि गवने तुरत निकेत॥९७॥
tehi avasara nārada sahita aru riṣi sapta sameta|
samācāra suni tuhinagiri gavane turata niketa||97||
दोहा 98#

तब नारद सबहि समुझावा। पूरुब कथाप्रसंगु सुनावा॥
मयना सत्य सुनहु मम बानी। जगदंबा तव सुता भवानी॥
अजा अनादि सक्ति अबिनासिनि। सदा संभु अरधंग निवासिनि॥
जग संभव पालन लय कारिनि। निज इच्छा लीला बपु धारिनि॥
जनमीं प्रथम दच्छ गृह जाई। नामु सती सुंदर तनु पाई॥
तहँहुँ सती संकरहि बिबाहीं। कथा प्रसिद्ध सकल जग माहीं॥
एक बार आवत सिव संगा। देखेउ रघुकुल कमल पतंगा॥
भयउ मोहु सिव कहा न कीन्हा। भ्रम बस बेषु सीय कर लीन्हा॥

taba nārada sabahi samujhāvā| pūruba kathāprasaṃgu sunāvā||
mayanā satya sunahu mama bānī| jagadaṃbā tava sutā bhavānī||
ajā anādi sakti abināsini| sadā saṃbhu aradhaṃga nivāsini||
jaga saṃbhava pālana laya kārini| nija icchā līlā bapu dhārini||
janamīṃ prathama daccha gṛha jāī| nāmu satī suṃdara tanu pāī||
taham̐hum̐ satī saṃkarahi bibāhīṃ| kathā prasiddha sakala jaga māhīṃ||
eka bāra āvata siva saṃgā| dekheu raghukula kamala pataṃgā||
bhayau mohu siva kahā na kīnhā| bhrama basa beṣu sīya kara līnhā||

छंद
सिय बेषु सती जो कीन्ह तेहि अपराध संकर परिहरीं।
हर बिरहँ जाइ बहोरि पितु कें जग्य जोगानल जरीं॥
अब जनमि तुम्हरे भवन निज पति लागि दारुन तपु किया।
अस जानि संसय तजहु गिरिजा सर्बदा संकर प्रिया॥
siya beṣu satī jo kīnha tehi aparādha saṃkara pariharīṃ|
hara biraham̐ jāi bahori pitu keṃ jagya jogānala jarīṃ||
aba janami tumhare bhavana nija pati lāgi dāruna tapu kiyā|
asa jāni saṃsaya tajahu girijā sarbadā saṃkara priyā||

दोहा 98
सुनि नारद के बचन तब सब कर मिटा बिषाद।
छन महुँ ब्यापेउ सकल पुर घर घर यह संबाद॥९८॥
suni nārada ke bacana taba saba kara miṭā biṣāda|
chana mahum̐ byāpeu sakala pura ghara ghara yaha saṃbāda||98||
दोहा 99#

तब मयना हिमवंतु अनंदे। पुनि पुनि पारबती पद बंदे॥
नारि पुरुष सिसु जुबा सयाने। नगर लोग सब अति हरषाने॥
लगे होन पुर मंगलगाना। सजे सबहि हाटक घट नाना॥
भाँति अनेक भई जेवनारा। सूपसास्त्र जस कछु ब्यवहारा॥
सो जेवनार कि जाइ बखानी। बसहिं भवन जेहिं मातु भवानी॥
सादर बोले सकल बराती। बिष्नु बिरंचि देव सब जाती॥
बिबिधि पाँति बैठी जेवनारा। लागे परुसन निपुन सुआरा॥
नारिबृंद सुर जेवँत जानी। लगीं देन गारीं मृदु बानी॥

taba mayanā himavaṃtu anaṃde| puni puni pārabatī pada baṃde||
nāri puruṣa sisu jubā sayāne| nagara loga saba ati haraṣāne||
lage hona pura maṃgalagānā| saje sabahi hāṭaka ghaṭa nānā||
bhām̐ti aneka bhaī jevanārā| sūpasāstra jasa kachu byavahārā||
so jevanāra ki jāi bakhānī| basahiṃ bhavana jehiṃ mātu bhavānī||
sādara bole sakala barātī| biṣnu biraṃci deva saba jātī||
bibidhi pām̐ti baiṭhī jevanārā| lāge parusana nipuna suārā||
nāribṛṃda sura jevam̐ta jānī| lagīṃ dena gārīṃ mṛdu bānī||

छंद
गारीं मधुर स्वर देहिं सुंदरि बिंग्य बचन सुनावहीं।
भोजनु करहिं सुर अति बिलंबु बिनोदु सुनि सचु पावहीं॥
जेवँत जो बढ़्यो अनंदु सो मुख कोटिहूँ न परै कह्यो।
अचवाँइ दीन्हे पान गवने बास जहँ जाको रह्यो॥
gārīṃ madhura svara dehiṃ suṃdari biṃgya bacana sunāvahīṃ|
bhojanu karahiṃ sura ati bilaṃbu binodu suni sacu pāvahīṃ||
jevam̐ta jo baḍhyo anaṃdu so mukha koṭihūm̐ na parai kahyo|
acavām̐i dīnhe pāna gavane bāsa jaham̐ jāko rahyo||

दोहा 99
बहुरि मुनिन्ह हिमवंत कहुँ लगन सुनाई आइ।
समय बिलोकि बिबाह कर पठए देव बोलाइ॥९९॥
bahuri muninha himavaṃta kahum̐ lagana sunāī āi|
samaya biloki bibāha kara paṭhae deva bolāi||99||
दोहा 100#

बोलि सकल सुर सादर लीन्हे। सबहि जथोचित आसन दीन्हे॥
बेदी बेद बिधान सँवारी। सुभग सुमंगल गावहिं नारी॥
सिंघासनु अति दिब्य सुहावा। जाइ न बरनि बिरंचि बनावा॥
बैठे सिव बिप्रन्ह सिरु नाई। हृदयँ सुमिरि निज प्रभु रघुराई॥
बहुरि मुनीसन्ह उमा बोलाई। करि सिंगारु सखीं लै आई॥
देखत रूपु सकल सुर मोहे। बरनै छबि अस जग कबि को है॥
जगदंबिका जानि भव भामा। सुरन्ह मनहिं मन कीन्ह प्रनामा॥
सुंदरता मरजाद भवानी। जाइ न कोटिहुँ बदन बखानी॥

boli sakala sura sādara līnhe| sabahi jathocita āsana dīnhe||
bedī beda bidhāna sam̐vārī| subhaga sumaṃgala gāvahiṃ nārī||
siṃghāsanu ati dibya suhāvā| jāi na barani biraṃci banāvā||
baiṭhe siva bipranha siru nāī| hṛdayam̐ sumiri nija prabhu raghurāī||
bahuri munīsanha umā bolāī| kari siṃgāru sakhīṃ lai āī||
dekhata rūpu sakala sura mohe| baranai chabi asa jaga kabi ko hai||
jagadaṃbikā jāni bhava bhāmā| suranha manahiṃ mana kīnha pranāmā||
suṃdaratā marajāda bhavānī| jāi na koṭihum̐ badana bakhānī||

छंद
कोटिहुँ बदन नहिं बनै बरनत जग जननि सोभा महा।
सकुचहिं कहत श्रुति सेष सारद मंदमति तुलसी कहा॥
छबिखानि मातु भवानि गवनी मध्य मंडप सिव जहाँ॥
अवलोकि सकहिं न सकुच पति पद कमल मनु मधुकरु तहाँ॥
koṭihum̐ badana nahiṃ banai baranata jaga janani sobhā mahā|
sakucahiṃ kahata śruti seṣa sārada maṃdamati tulasī kahā||
chabikhāni mātu bhavāni gavanī madhya maṃḍapa siva jahām̐||
avaloki sakahiṃ na sakuca pati pada kamala manu madhukaru tahām̐||

दोहा 100
मुनि अनुसासन गनपतिहि पूजेउ संभु भवानि।
कोउ सुनि संसय करै जनि सुर अनादि जियँ जानि॥१००॥
muni anusāsana ganapatihi pūjeu saṃbhu bhavāni|
kou suni saṃsaya karai jani sura anādi jiyam̐ jāni||100||
दोहा 101#

जसि बिबाह कै बिधि श्रुति गाई। महामुनिन्ह सो सब करवाई॥
गहि गिरीस कुस कन्या पानी। भवहि समरपीं जानि भवानी॥
पानिग्रहन जब कीन्ह महेसा। हियँ हरषे तब सकल सुरेसा॥
बेद मंत्र मुनिबर उच्चरहीं। जय जय जय संकर सुर करहीं॥
बाजहिं बाजन बिबिध बिधाना। सुमनबृष्टि नभ भै बिधि नाना॥
हर गिरिजा कर भयउ बिबाहू। सकल भुवन भरि रहा उछाहू॥
दासीं दास तुरग रथ नागा। धेनु बसन मनि बस्तु बिभागा॥
अन्न कनकभाजन भरि जाना। दाइज दीन्ह न जाइ बखाना॥

jasi bibāha kai bidhi śruti gāī| mahāmuninha so saba karavāī||
gahi girīsa kusa kanyā pānī| bhavahi samarapīṃ jāni bhavānī||
pānigrahana jaba kīnha mahesā| hiyam̐ haraṣe taba sakala suresā||
beda maṃtra munibara uccarahīṃ| jaya jaya jaya saṃkara sura karahīṃ||
bājahiṃ bājana bibidha bidhānā| sumanabṛṣṭi nabha bhai bidhi nānā||
hara girijā kara bhayau bibāhū| sakala bhuvana bhari rahā uchāhū||
dāsīṃ dāsa turaga ratha nāgā| dhenu basana mani bastu bibhāgā||
anna kanakabhājana bhari jānā| dāija dīnha na jāi bakhānā||

छंद
दाइज दियो बहु भाँति पुनि कर जोरि हिमभूधर कह्यो।
का देउँ पूरनकाम संकर चरन पंकज गहि रह्यो॥
सिवँ कृपासागर ससुर कर संतोषु सब भाँतिहिं कियो।
पुनि गहे पद पाथोज मयनाँ प्रेम परिपूरन हियो॥
dāija diyo bahu bhām̐ti puni kara jori himabhūdhara kahyo|
kā deum̐ pūranakāma saṃkara carana paṃkaja gahi rahyo||
sivam̐ kṛpāsāgara sasura kara saṃtoṣu saba bhām̐tihiṃ kiyo|
puni gahe pada pāthoja mayanām̐ prema paripūrana hiyo||

दोहा 101
नाथ उमा मन प्रान सम गृहकिंकरी करेहु।
छमेहु सकल अपराध अब होइ प्रसन्न बरु देहु॥101॥
nātha umā mana prāna sama gṛhakiṃkarī karehu|
chamehu sakala aparādha aba hoi prasanna baru dehu||101||
दोहा 102#

बहु बिधि संभु सासु समुझाई। गवनी भवन चरन सिरु नाई॥
जननीं उमा बोलि तब लीन्ही। लै उछंग सुंदर सिख दीन्ही॥
करेहु सदा संकर पद पूजा। नारिधरमु पति देउ न दूजा॥
बचन कहत भरे लोचन बारी। बहुरि लाइ उर लीन्हि कुमारी॥
कत बिधि सृजीं नारि जग माहीं। पराधीन सपनेहुँ सुखु नाहीं॥
भै अति प्रेम बिकल महतारी। धीरजु कीन्ह कुसमय बिचारी॥
पुनि पुनि मिलति परति गहि चरना। परम प्रेम कछु जाइ न बरना॥
सब नारिन्ह मिलि भेटि भवानी। जाइ जननि उर पुनि लपटानी॥

bahu bidhi saṃbhu sāsu samujhāī| gavanī bhavana carana siru nāī||
jananīṃ umā boli taba līnhī| lai uchaṃga suṃdara sikha dīnhī||
karehu sadā saṃkara pada pūjā| nāridharamu pati deu na dūjā||
bacana kahata bhare locana bārī| bahuri lāi ura līnhi kumārī||
kata bidhi sṛjīṃ nāri jaga māhīṃ| parādhīna sapanehum̐ sukhu nāhīṃ||
bhai ati prema bikala mahatārī| dhīraju kīnha kusamaya bicārī||
puni puni milati parati gahi caranā| parama prema kachu jāi na baranā||
saba nārinha mili bheṭi bhavānī| jāi janani ura puni lapaṭānī||

छंद
जननिहि बहुरि मिलि चली उचित असीस सब काहूँ दईं।
फिरि फिरि बिलोकति मातु तन तब सखीं लै सिव पहिं गई॥
जाचक सकल संतोषि संकरु उमा सहित भवन चले।
सब अमर हरषे सुमन बरषि निसान नभ बाजे भले॥
jananihi bahuri mili calī ucita asīsa saba kāhūm̐ daīṃ|
phiri phiri bilokati mātu tana taba sakhīṃ lai siva pahiṃ gaī||
jācaka sakala saṃtoṣi saṃkaru umā sahita bhavana cale|
saba amara haraṣe sumana baraṣi nisāna nabha bāje bhale||

दोहा 102
चले संग हिमवंतु तब पहुँचावन अति हेतु।
बिबिध भाँति परितोषु करि बिदा कीन्ह बृषकेतु॥102॥
cale saṃga himavaṃtu taba pahum̐cāvana ati hetu|
bibidha bhām̐ti paritoṣu kari bidā kīnha bṛṣaketu||102||
दोहा 103#

तुरत भवन आए गिरिराई। सकल सैल सर लिए बोलाई॥
आदर दान बिनय बहुमाना। सब कर बिदा कीन्ह हिमवाना॥
जबहिं संभु कैलासहिं आए। सुर सब निज निज लोक सिधाए॥
जगत मातु पितु संभु भवानी। तेहिं सिंगारु न कहउँ बखानी॥
करहिं बिबिध बिधि भोग बिलासा। गनन्ह समेत बसहिं कैलासा॥
हर गिरिजा बिहार नित नयऊ। एहि बिधि बिपुल काल चलि गयऊ॥
तब जनमेउ षटबदन कुमारा। तारकु असुर समर जेहिं मारा॥
आगम निगम प्रसिद्ध पुराना। षन्मुख जन्मु सकल जग जाना॥

turata bhavana āe girirāī| sakala saila sara lie bolāī||
ādara dāna binaya bahumānā| saba kara bidā kīnha himavānā||
jabahiṃ saṃbhu kailāsahiṃ āe| sura saba nija nija loka sidhāe||
jagata mātu pitu saṃbhu bhavānī| tehiṃ siṃgāru na kahaum̐ bakhānī||
karahiṃ bibidha bidhi bhoga bilāsā| gananha sameta basahiṃ kailāsā||
hara girijā bihāra nita nayaū| ehi bidhi bipula kāla cali gayaū||
taba janameu ṣaṭabadana kumārā| tāraku asura samara jehiṃ mārā||
āgama nigama prasiddha purānā| ṣanmukha janmu sakala jaga jānā||

छंद
जगु जान षन्मुख जन्मु कर्मु प्रतापु पुरुषारथु महा।
तेहि हेतु मैं बृषकेतु सुत कर चरित संछेपहिं कहा॥
यह उमा संभु बिबाहु जे नर नारि कहहिं जे गावहीं।
कल्यान काज बिबाह मंगल सर्बदा सुखु पावहीं॥
jagu jāna ṣanmukha janmu karmu pratāpu puruṣārathu mahā|
tehi hetu maiṃ bṛṣaketu suta kara carita saṃchepahiṃ kahā||
yaha umā saṃbhu bibāhu je nara nāri kahahiṃ je gāvahīṃ|
kalyāna kāja bibāha maṃgala sarbadā sukhu pāvahīṃ||

दोहा 103
चरित सिंधु गिरिजा रमन बेद न पावहिं पारु।
बरनै तुलसीदासु किमि अति मतिमंद गवाँरु॥103॥
carita siṃdhu girijā ramana beda na pāvahiṃ pāru|
baranai tulasīdāsu kimi ati matimaṃda gavām̐ru||103||
दोहा 104#

संभु चरित सुनि सरस सुहावा। भरद्वाज मुनि अति सुख पावा॥
बहु लालसा कथा पर बाढ़ी। नयनन्हि नीरु रोमावलि ठाढ़ी॥
प्रेम बिबस मुख आव न बानी। दसा देखि हरषे मुनि ग्यानी॥
अहो धन्य तव जन्मु मुनीसा। तुम्हहि प्रान सम प्रिय गौरीसा॥
सिव पद कमल जिन्हहि रति नाहीं। रामहि ते सपनेहुँ न सोहाहीं॥
बिनु छल बिस्वनाथ पद नेहू। राम भगत कर लच्छन एहू॥
सिव सम को रघुपति ब्रतधारी। बिनु अघ तजी सती असि नारी॥
पनु करि रघुपति भगति देखाई। को सिव सम रामहि प्रिय भाई॥

saṃbhu carita suni sarasa suhāvā| bharadvāja muni ati sukha pāvā||
bahu lālasā kathā para bāḍhī| nayananhi nīru romāvali ṭhāḍhī||
prema bibasa mukha āva na bānī| dasā dekhi haraṣe muni gyānī||
aho dhanya tava janmu munīsā| tumhahi prāna sama priya gaurīsā||
siva pada kamala jinhahi rati nāhīṃ| rāmahi te sapanehum̐ na sohāhīṃ||
binu chala bisvanātha pada nehū| rāma bhagata kara lacchana ehū||
siva sama ko raghupati bratadhārī| binu agha tajī satī asi nārī||
panu kari raghupati bhagati dekhāī| ko siva sama rāmahi priya bhāī||

दोहा 104
प्रथमहिं मैं कहि सिव चरित बूझा मरमु तुम्हार।
सुचि सेवक तुम्ह राम के रहित समस्त बिकार॥104॥
prathamahiṃ maiṃ kahi siva carita būjhā maramu tumhāra|
suci sevaka tumha rāma ke rahita samasta bikāra||104||
दोहा 105#

मैं जाना तुम्हार गुन सीला। कहउँ सुनहु अब रघुपति लीला॥
सुनु मुनि आजु समागम तोरें। कहि न जाइ जस सुखु मन मोरें॥
राम चरित अति अमित मुनीसा। कहि न सकहिं सत कोटि अहीसा॥
तदपि जथाश्रुत कहउँ बखानी। सुमिरि गिरापति प्रभु धनुपानी॥
सारद दारुनारि सम स्वामी। रामु सूत्रधर अंतरजामी॥
जेहि पर कृपा करहिं जनु जानी। कबि उर अजिर नचावहिं बानी॥
प्रनवउँ सोइ कृपाल रघुनाथा। बरनउँ बिसद तासु गुन गाथा॥
परम रम्य गिरिबरु कैलासू। सदा जहाँ सिव उमा निवासू॥

maiṃ jānā tumhāra guna sīlā| kahaum̐ sunahu aba raghupati līlā||
sunu muni āju samāgama toreṃ| kahi na jāi jasa sukhu mana moreṃ||
rāma carita ati amita munīsā| kahi na sakahiṃ sata koṭi ahīsā||
tadapi jathāśruta kahaum̐ bakhānī| sumiri girāpati prabhu dhanupānī||
sārada dārunāri sama svāmī| rāmu sūtradhara aṃtarajāmī||
jehi para kṛpā karahiṃ janu jānī| kabi ura ajira nacāvahiṃ bānī||
pranavaum̐ soi kṛpāla raghunāthā| baranaum̐ bisada tāsu guna gāthā||
parama ramya giribaru kailāsū| sadā jahām̐ siva umā nivāsū||

दोहा 105
सिद्ध तपोधन जोगिजन सुर किंनर मुनिबृंद।
बसहिं तहाँ सुकृती सकल सेवहिं सिव सुखकंद॥105॥
siddha tapodhana jogijana sura kiṃnara munibṛṃda|
basahiṃ tahām̐ sukṛtī sakala sevahiṃ siva sukhakaṃda||105||
दोहा 106#

हरि हर बिमुख धर्म रति नाहीं। ते नर तहँ सपनेहुँ नहिं जाहीं॥
तेहि गिरि पर बट बिटप बिसाला। नित नूतन सुंदर सब काला॥
त्रिबिध समीर सुसीतलि छाया। सिव बिश्राम बिटप श्रुति गाया॥
एक बार तेहि तर प्रभु गयऊ। तरु बिलोकि उर अति सुखु भयऊ॥
निज कर डासि नागरिपु छाला। बैठे सहजहिं संभु कृपाला॥
कुंद इंदु दर गौर सरीरा। भुज प्रलंब परिधन मुनिचीरा॥
तरुन अरुन अंबुज सम चरना। नख दुति भगत हृदय तम हरना॥
भुजग भूति भूषन त्रिपुरारी। आननु सरद चंद छबि हारी॥

hari hara bimukha dharma rati nāhīṃ| te nara taham̐ sapanehum̐ nahiṃ jāhīṃ||
tehi giri para baṭa biṭapa bisālā| nita nūtana suṃdara saba kālā||
tribidha samīra susītali chāyā| siva biśrāma biṭapa śruti gāyā||
eka bāra tehi tara prabhu gayaū| taru biloki ura ati sukhu bhayaū||
nija kara ḍāsi nāgaripu chālā| baiṭhe sahajahiṃ saṃbhu kṛpālā||
kuṃda iṃdu dara gaura sarīrā| bhuja pralaṃba paridhana municīrā||
taruna aruna aṃbuja sama caranā| nakha duti bhagata hṛdaya tama haranā||
bhujaga bhūti bhūṣana tripurārī| ānanu sarada caṃda chabi hārī||

दोहा 106
जटा मुकुट सुरसरित सिर लोचन नलिन बिसाल।
नीलकंठ लावन्यनिधि सोह बालबिधु भाल॥106॥
jaṭā mukuṭa surasarita sira locana nalina bisāla|
nīlakaṃṭha lāvanyanidhi soha bālabidhu bhāla||106||
दोहा 107#

बैठे सोह कामरिपु कैसें। धरें सरीरु सांतरसु जैसें॥
पारबती भल अवसरु जानी। गई संभु पहिं मातु भवानी॥
जानि प्रिया आदरु अति कीन्हा। बाम भाग आसनु हर दीन्हा॥
बैठीं सिव समीप हरषाई। पूरुब जन्म कथा चित आई॥
पति हियँ हेतु अधिक अनुमानी। बिहसि उमा बोलीं प्रिय बानी॥
कथा जो सकल लोक हितकारी। सोइ पूछन चह सैलकुमारी॥
बिस्वनाथ मम नाथ पुरारी। त्रिभुवन महिमा बिदित तुम्हारी॥
चर अरु अचर नाग नर देवा। सकल करहिं पद पंकज सेवा॥

baiṭhe soha kāmaripu kaiseṃ| dhareṃ sarīru sāṃtarasu jaiseṃ||
pārabatī bhala avasaru jānī| gaī saṃbhu pahiṃ mātu bhavānī||
jāni priyā ādaru ati kīnhā| bāma bhāga āsanu hara dīnhā||
baiṭhīṃ siva samīpa haraṣāī| pūruba janma kathā cita āī||
pati hiyam̐ hetu adhika anumānī| bihasi umā bolīṃ priya bānī||
kathā jo sakala loka hitakārī| soi pūchana caha sailakumārī||
bisvanātha mama nātha purārī| tribhuvana mahimā bidita tumhārī||
cara aru acara nāga nara devā| sakala karahiṃ pada paṃkaja sevā||

दोहा 107
प्रभु समरथ सर्बग्य सिव सकल कला गुन धाम॥
जोग ग्यान बैराग्य निधि प्रनत कलपतरु नाम॥107॥
prabhu samaratha sarbagya siva sakala kalā guna dhāma||
joga gyāna bairāgya nidhi pranata kalapataru nāma||107||
दोहा 108#

जौं मो पर प्रसन्न सुखरासी। जानिअ सत्य मोहि निज दासी॥
तौ प्रभु हरहु मोर अग्याना। कहि रघुनाथ कथा बिधि नाना॥
जासु भवनु सुरतरु तर होई। सहि कि दरिद्र जनित दुखु सोई॥
ससिभूषन अस हृदयँ बिचारी। हरहु नाथ मम मति भ्रम भारी॥
प्रभु जे मुनि परमारथबादी। कहहिं राम कहुँ ब्रह्म अनादी॥
सेस सारदा बेद पुराना। सकल करहिं रघुपति गुन गाना॥
तुम्ह पुनि राम राम दिन राती। सादर जपहु अनँग आराती॥
रामु सो अवध नृपति सुत सोई। की अज अगुन अलखगति कोई॥

jauṃ mo para prasanna sukharāsī| jānia satya mohi nija dāsī||
tau prabhu harahu mora agyānā| kahi raghunātha kathā bidhi nānā||
jāsu bhavanu surataru tara hoī| sahi ki daridra janita dukhu soī||
sasibhūṣana asa hṛdayam̐ bicārī| harahu nātha mama mati bhrama bhārī||
prabhu je muni paramārathabādī| kahahiṃ rāma kahum̐ brahma anādī||
sesa sāradā beda purānā| sakala karahiṃ raghupati guna gānā||
tumha puni rāma rāma dina rātī| sādara japahu anam̐ga ārātī||
rāmu so avadha nṛpati suta soī| kī aja aguna alakhagati koī||

दोहा 108
जौं नृप तनय त ब्रह्म किमि नारि बिरहँ मति भोरि।
देखि चरित महिमा सुनत भ्रमति बुद्धि अति मोरि॥108॥
jauṃ nṛpa tanaya ta brahma kimi nāri biraham̐ mati bhori|
dekhi carita mahimā sunata bhramati buddhi ati mori||108||
दोहा 109#

जौं अनीह ब्यापक बिभु कोऊ। कहहु बुझाइ नाथ मोहि सोऊ॥
अग्य जानि रिस उर जनि धरहू। जेहि बिधि मोह मिटै सोइ करहू॥
मैं बन दीखि राम प्रभुताई। अति भय बिकल न तुम्हहि सुनाई॥
तदपि मलिन मन बोधु न आवा। सो फलु भली भाँति हम पावा॥
अजहूँ कछु संसउ मन मोरें। करहु कृपा बिनवउँ कर जोरें॥
प्रभु तब मोहि बहु भाँति प्रबोधा। नाथ सो समुझि करहु जनि क्रोधा॥
तब कर अस बिमोह अब नाहीं। रामकथा पर रुचि मन माहीं॥
कहहु पुनीत राम गुन गाथा। भुजगराज भूषन सुरनाथा॥

jauṃ anīha byāpaka bibhu koū| kahahu bujhāi nātha mohi soū||
agya jāni risa ura jani dharahū| jehi bidhi moha miṭai soi karahū||
maiṃ bana dīkhi rāma prabhutāī| ati bhaya bikala na tumhahi sunāī||
tadapi malina mana bodhu na āvā| so phalu bhalī bhām̐ti hama pāvā||
ajahūm̐ kachu saṃsau mana moreṃ| karahu kṛpā binavaum̐ kara joreṃ||
prabhu taba mohi bahu bhām̐ti prabodhā| nātha so samujhi karahu jani krodhā||
taba kara asa bimoha aba nāhīṃ| rāmakathā para ruci mana māhīṃ||
kahahu punīta rāma guna gāthā| bhujagarāja bhūṣana suranāthā||

दोहा 109
बंदउँ पद धरि धरनि सिरु बिनय करउँ कर जोरि।
बरनहु रघुबर बिसद जसु श्रुति सिद्धांत निचोरि॥109॥
baṃdaum̐ pada dhari dharani siru binaya karaum̐ kara jori|
baranahu raghubara bisada jasu śruti siddhāṃta nicori||109||
दोहा 110#

जदपि जोषिता नहिं अधिकारी। दासी मन क्रम बचन तुम्हारी॥
गूढ़उ तत्व न साधु दुरावहिं। आरत अधिकारी जहँ पावहिं॥
अति आरति पूछउँ सुरराया। रघुपति कथा कहहु करि दाया॥
प्रथम सो कारन कहहु बिचारी। निर्गुन ब्रह्म सगुन बपु धारी॥
पुनि प्रभु कहहु राम अवतारा। बालचरित पुनि कहहु उदारा॥
कहहु जथा जानकी बिबाहीं। राज तजा सो दूषन काहीं॥
बन बसि कीन्हे चरित अपारा। कहहु नाथ जिमि रावन मारा॥
राज बैठि कीन्हीं बहु लीला। सकल कहहु संकर सुखलीला॥

jadapi joṣitā nahiṃ adhikārī| dāsī mana krama bacana tumhārī||
gūḍhau tatva na sādhu durāvahiṃ| ārata adhikārī jaham̐ pāvahiṃ||
ati ārati pūchaum̐ surarāyā| raghupati kathā kahahu kari dāyā||
prathama so kārana kahahu bicārī| nirguna brahma saguna bapu dhārī||
puni prabhu kahahu rāma avatārā| bālacarita puni kahahu udārā||
kahahu jathā jānakī bibāhīṃ| rāja tajā so dūṣana kāhīṃ||
bana basi kīnhe carita apārā| kahahu nātha jimi rāvana mārā||
rāja baiṭhi kīnhīṃ bahu līlā| sakala kahahu saṃkara sukhalīlā||

दोहा 110
बहुरि कहहु करुनायतन कीन्ह जो अचरज राम।
प्रजा सहित रघुबंसमनि किमि गवने निज धाम॥110॥
bahuri kahahu karunāyatana kīnha jo acaraja rāma|
prajā sahita raghubaṃsamani kimi gavane nija dhāma||110||
दोहा 111#

पुनि प्रभु कहहु सो तत्व बखानी। जेहिं बिग्यान मगन मुनि ग्यानी॥
भगति ग्यान बिग्यान बिरागा। पुनि सब बरनहु सहित बिभागा॥
औरउ राम रहस्य अनेका। कहहु नाथ अति बिमल बिबेका॥
जो प्रभु मैं पूछा नहिं होई। सोउ दयाल राखहु जनि गोई॥
तुम्ह त्रिभुवन गुर बेद बखाना। आन जीव पाँवर का जाना॥
प्रस्न उमा कै सहज सुहाई। छल बिहीन सुनि सिव मन भाई॥
हर हियँ रामचरित सब आए। प्रेम पुलक लोचन जल छाए॥
श्रीरघुनाथ रूप उर आवा। परमानंद अमित सुख पावा॥

puni prabhu kahahu so tatva bakhānī| jehiṃ bigyāna magana muni gyānī||
bhagati gyāna bigyāna birāgā| puni saba baranahu sahita bibhāgā||
aurau rāma rahasya anekā| kahahu nātha ati bimala bibekā||
jo prabhu maiṃ pūchā nahiṃ hoī| sou dayāla rākhahu jani goī||
tumha tribhuvana gura beda bakhānā| āna jīva pām̐vara kā jānā||
prasna umā kai sahaja suhāī| chala bihīna suni siva mana bhāī||
hara hiyam̐ rāmacarita saba āe| prema pulaka locana jala chāe||
śrīraghunātha rūpa ura āvā| paramānaṃda amita sukha pāvā||

दोहा 111
मगन ध्यानरस दंड जुग पुनि मन बाहेर कीन्ह।
रघुपति चरित महेस तब हरषित बरनै लीन्ह॥111॥
magana dhyānarasa daṃḍa juga puni mana bāhera kīnha|
raghupati carita mahesa taba haraṣita baranai līnha||111||
दोहा 112#

झूठेउ सत्य जाहि बिनु जानें। जिमि भुजंग बिनु रजु पहिचानें॥
जेहि जानें जग जाइ हेराई। जागें जथा सपन भ्रम जाई॥
बंदउँ बालरूप सोइ रामू। सब सिधि सुलभ जपत जिसु नामू॥
मंगल भवन अमंगल हारी। द्रवउ सो दसरथ अजिर बिहारी॥
करि प्रनाम रामहि त्रिपुरारी। हरषि सुधा सम गिरा उचारी॥
धन्य धन्य गिरिराजकुमारी। तुम्ह समान नहिं कोउ उपकारी॥
पूँछेहु रघुपति कथा प्रसंगा। सकल लोक जग पावनि गंगा॥
तुम्ह रघुबीर चरन अनुरागी। कीन्हिहु प्रस्न जगत हित लागी॥

jhūṭheu satya jāhi binu jāneṃ| jimi bhujaṃga binu raju pahicāneṃ||
jehi jāneṃ jaga jāi herāī| jāgeṃ jathā sapana bhrama jāī||
baṃdaum̐ bālarūpa soi rāmū| saba sidhi sulabha japata jisu nāmū||
maṃgala bhavana amaṃgala hārī| dravau so dasaratha ajira bihārī||
kari pranāma rāmahi tripurārī| haraṣi sudhā sama girā ucārī||
dhanya dhanya girirājakumārī| tumha samāna nahiṃ kou upakārī||
pūm̐chehu raghupati kathā prasaṃgā| sakala loka jaga pāvani gaṃgā||
tumha raghubīra carana anurāgī| kīnhihu prasna jagata hita lāgī||

दोहा 112
रामकृपा तें पारबति सपनेहुँ तव मन माहिं।
सोक मोह संदेह भ्रम मम बिचार कछु नाहिं॥112॥
rāmakṛpā teṃ pārabati sapanehum̐ tava mana māhiṃ|
soka moha saṃdeha bhrama mama bicāra kachu nāhiṃ||112||
दोहा 113#

तदपि असंका कीन्हिहु सोई। कहत सुनत सब कर हित होई॥
जिन्ह हरि कथा सुनी नहिं काना। श्रवन रंध्र अहिभवन समाना॥
नयनन्हि संत दरस नहिं देखा। लोचन मोरपंख कर लेखा॥
ते सिर कटु तुंबरि समतूला। जे न नमत हरि गुर पद मूला॥
जिन्ह हरिभगति हृदयँ नहिं आनी। जीवत सव समान तेइ प्रानी॥
जो नहिं करइ राम गुन गाना। जीह सो दादुर जीह समाना॥
कुलिस कठोर निठुर सोइ छाती। सुनि हरिचरित न जो हरषाती॥
गिरिजा सुनहु राम कै लीला। सुर हित दनुज बिमोहनसीला॥

tadapi asaṃkā kīnhihu soī| kahata sunata saba kara hita hoī||
jinha hari kathā sunī nahiṃ kānā| śravana raṃdhra ahibhavana samānā||
nayananhi saṃta darasa nahiṃ dekhā| locana morapaṃkha kara lekhā||
te sira kaṭu tuṃbari samatūlā| je na namata hari gura pada mūlā||
jinha haribhagati hṛdayam̐ nahiṃ ānī| jīvata sava samāna tei prānī||
jo nahiṃ karai rāma guna gānā| jīha so dādura jīha samānā||
kulisa kaṭhora niṭhura soi chātī| suni haricarita na jo haraṣātī||
girijā sunahu rāma kai līlā| sura hita danuja bimohanasīlā||

दोहा 113
रामकथा सुरधेनु सम सेवत सब सुख दानि।
सतसमाज सुरलोक सब को न सुनै अस जानि॥113॥
rāmakathā suradhenu sama sevata saba sukha dāni|
satasamāja suraloka saba ko na sunai asa jāni||113||
दोहा 114#

रामकथा सुंदर कर तारी। संसय बिहग उडावनिहारी॥
रामकथा कलि बिटप कुठारी। सादर सुनु गिरिराजकुमारी॥
राम नाम गुन चरित सुहाए। जनम करम अगनित श्रुति गाए॥
जथा अनंत राम भगवाना। तथा कथा कीरति गुन नाना॥
तदपि जथा श्रुत जसि मति मोरी। कहिहउँ देखि प्रीति अति तोरी॥
उमा प्रस्न तव सहज सुहाई। सुखद संतसंमत मोहि भाई॥
एक बात नहिं मोहि सोहानी। जदपि मोह बस कहेहु भवानी॥
तुम जो कहा राम कोउ आना। जेहि श्रुति गाव धरहिं मुनि ध्याना॥

rāmakathā suṃdara kara tārī| saṃsaya bihaga uḍāvanihārī||
rāmakathā kali biṭapa kuṭhārī| sādara sunu girirājakumārī||
rāma nāma guna carita suhāe| janama karama aganita śruti gāe||
jathā anaṃta rāma bhagavānā| tathā kathā kīrati guna nānā||
tadapi jathā śruta jasi mati morī| kahihaum̐ dekhi prīti ati torī||
umā prasna tava sahaja suhāī| sukhada saṃtasaṃmata mohi bhāī||
eka bāta nahiṃ mohi sohānī| jadapi moha basa kahehu bhavānī||
tuma jo kahā rāma kou ānā| jehi śruti gāva dharahiṃ muni dhyānā||

दोहा 114
कहहिं सुनहिं अस अधम नर ग्रसे जे मोह पिसाच।
पाषंडी हरि पद बिमुख जानहिं झूठ न साच॥114॥
kahahiṃ sunahiṃ asa adhama nara grase je moha pisāca|
pāṣaṃḍī hari pada bimukha jānahiṃ jhūṭha na sāca||114||
सोरठा 115#

अग्य अकोबिद अंध अभागी। काई बिषय मुकुर मन लागी॥
लंपट कपटी कुटिल बिसेषी। सपनेहुँ संतसभा नहिं देखी॥
कहहिं ते बेद असंमत बानी। जिन्ह कें सूझ लाभु नहिं हानी॥
मुकुर मलिन अरु नयन बिहीना। राम रूप देखहिं किमि दीना॥
जिन्ह कें अगुन न सगुन बिबेका। जल्पहिं कल्पित बचन अनेका॥
हरिमाया बस जगत भ्रमाहीं। तिन्हहि कहत कछु अघटित नाहीं॥
बातुल भूत बिबस मतवारे। ते नहिं बोलहिं बचन बिचारे॥
जिन्ह कृत महामोह मद पाना। तिन् कर कहा करिअ नहिं काना॥

agya akobida aṃdha abhāgī| kāī biṣaya mukura mana lāgī||
laṃpaṭa kapaṭī kuṭila biseṣī| sapanehum̐ saṃtasabhā nahiṃ dekhī||
kahahiṃ te beda asaṃmata bānī| jinha keṃ sūjha lābhu nahiṃ hānī||
mukura malina aru nayana bihīnā| rāma rūpa dekhahiṃ kimi dīnā||
jinha keṃ aguna na saguna bibekā| jalpahiṃ kalpita bacana anekā||
harimāyā basa jagata bhramāhīṃ| tinhahi kahata kachu aghaṭita nāhīṃ||
bātula bhūta bibasa matavāre| te nahiṃ bolahiṃ bacana bicāre||
jinha kṛta mahāmoha mada pānā| tin kara kahā karia nahiṃ kānā||

सोरठा 115
अस निज हृदयँ बिचारि तजु संसय भजु राम पद।
सुनु गिरिराज कुमारि भ्रम तम रबि कर बचन मम॥115॥
asa nija hṛdayam̐ bicāri taju saṃsaya bhaju rāma pada|
sunu girirāja kumāri bhrama tama rabi kara bacana mama||115||
दोहा 116#

सगुनहि अगुनहि नहिं कछु भेदा। गावहिं मुनि पुरान बुध बेदा॥
अगुन अरूप अलख अज जोई। भगत प्रेम बस सगुन सो होई॥
जो गुन रहित सगुन सोइ कैसें। जलु हिम उपल बिलग नहिं जैसें॥
जासु नाम भ्रम तिमिर पतंगा। तेहि किमि कहिअ बिमोह प्रसंगा॥
राम सच्चिदानंद दिनेसा। नहिं तहँ मोह निसा लवलेसा॥
सहज प्रकासरुप भगवाना। नहिं तहँ पुनि बिग्यान बिहाना॥
हरष बिषाद ग्यान अग्याना। जीव धर्म अहमिति अभिमाना॥
राम ब्रह्म ब्यापक जग जाना। परमानन्द परेस पुराना॥

sagunahi agunahi nahiṃ kachu bhedā| gāvahiṃ muni purāna budha bedā||
aguna arūpa alakha aja joī| bhagata prema basa saguna so hoī||
jo guna rahita saguna soi kaiseṃ| jalu hima upala bilaga nahiṃ jaiseṃ||
jāsu nāma bhrama timira pataṃgā| tehi kimi kahia bimoha prasaṃgā||
rāma saccidānaṃda dinesā| nahiṃ taham̐ moha nisā lavalesā||
sahaja prakāsarupa bhagavānā| nahiṃ taham̐ puni bigyāna bihānā||
haraṣa biṣāda gyāna agyānā| jīva dharma ahamiti abhimānā||
rāma brahma byāpaka jaga jānā| paramānanda paresa purānā||

दोहा 116
पुरुष प्रसिद्ध प्रकास निधि प्रगट परावर नाथ॥
रघुकुलमनि मम स्वामि सोइ कहि सिवँ नायउ माथ॥116॥
puruṣa prasiddha prakāsa nidhi pragaṭa parāvara nātha||
raghukulamani mama svāmi soi kahi sivam̐ nāyau mātha||116||
दोहा 117#

निज भ्रम नहिं समुझहिं अग्यानी। प्रभु पर मोह धरहिं जड़ प्रानी॥
जथा गगन घन पटल निहारी। झाँपेउ भानु कहहिं कुबिचारी॥
चितव जो लोचन अंगुलि लाएँ। प्रगट जुगल ससि तेहि के भाएँ॥
उमा राम बिषइक अस मोहा। नभ तम धूम धूरि जिमि सोहा॥
बिषय करन सुर जीव समेता। सकल एक तें एक सचेता॥
सब कर परम प्रकासक जोई। राम अनादि अवधपति सोई॥
जगत प्रकास्य प्रकासक रामू। मायाधीस ग्यान गुन धामू॥
जासु सत्यता तें जड़ माया। भास सत्य इव मोह सहाया॥

nija bhrama nahiṃ samujhahiṃ agyānī| prabhu para moha dharahiṃ jaḍa prānī||
jathā gagana ghana paṭala nihārī| jhām̐peu bhānu kahahiṃ kubicārī||
citava jo locana aṃguli lāem̐| pragaṭa jugala sasi tehi ke bhāem̐||
umā rāma biṣaika asa mohā| nabha tama dhūma dhūri jimi sohā||
biṣaya karana sura jīva sametā| sakala eka teṃ eka sacetā||
saba kara parama prakāsaka joī| rāma anādi avadhapati soī||
jagata prakāsya prakāsaka rāmū| māyādhīsa gyāna guna dhāmū||
jāsu satyatā teṃ jaḍa māyā| bhāsa satya iva moha sahāyā||

दोहा 117
रजत सीप महुँ मास जिमि जथा भानु कर बारि।
जदपि मृषा तिहुँ काल सोइ भ्रम न सकइ कोउ टारि॥117॥
rajata sīpa mahum̐ māsa jimi jathā bhānu kara bāri|
jadapi mṛṣā tihum̐ kāla soi bhrama na sakai kou ṭāri||117||
दोहा 118#

एहि बिधि जग हरि आश्रित रहई। जदपि असत्य देत दुख अहई॥
जौं सपनें सिर काटै कोई। बिनु जागें न दूरि दुख होई॥
जासु कृपाँ अस भ्रम मिटि जाई। गिरिजा सोइ कृपाल रघुराई॥
आदि अंत कोउ जासु न पावा। मति अनुमानि निगम अस गावा॥
बिनु पद चलइ सुनइ बिनु काना। कर बिनु करम करइ बिधि नाना॥
आनन रहित सकल रस भोगी। बिनु बानी बकता बड़ जोगी॥
तनु बिनु परस नयन बिनु देखा। ग्रहइ घ्रान बिनु बास असेषा॥
असि सब भाँति अलौकिक करनी। महिमा जासु जाइ नहिं बरनी॥

ehi bidhi jaga hari āśrita rahaī| jadapi asatya deta dukha ahaī||
jauṃ sapaneṃ sira kāṭai koī| binu jāgeṃ na dūri dukha hoī||
jāsu kṛpām̐ asa bhrama miṭi jāī| girijā soi kṛpāla raghurāī||
ādi aṃta kou jāsu na pāvā| mati anumāni nigama asa gāvā||
binu pada calai sunai binu kānā| kara binu karama karai bidhi nānā||
ānana rahita sakala rasa bhogī| binu bānī bakatā baḍa jogī||
tanu binu parasa nayana binu dekhā| grahai ghrāna binu bāsa aseṣā||
asi saba bhām̐ti alaukika karanī| mahimā jāsu jāi nahiṃ baranī||

दोहा 118
जेहि इमि गावहिं बेद बुध जाहि धरहिं मुनि ध्यान॥
सोइ दसरथ सुत भगत हित कोसलपति भगवान॥118॥
jehi imi gāvahiṃ beda budha jāhi dharahiṃ muni dhyāna||
soi dasaratha suta bhagata hita kosalapati bhagavāna||118||
दोहा 119#

कासीं मरत जंतु अवलोकी। जासु नाम बल करउँ बिसोकी॥
सोइ प्रभु मोर चराचर स्वामी। रघुबर सब उर अंतरजामी॥
बिबसहुँ जासु नाम नर कहहीं। जनम अनेक रचित अघ दहहीं॥
सादर सुमिरन जे नर करहीं। भव बारिधि गोपद इव तरहीं॥
राम सो परमातमा भवानी। तहँ भ्रम अति अबिहित तव बानी॥
अस संसय आनत उर माहीं। ग्यान बिराग सकल गुन जाहीं॥
सुनि सिव के भ्रम भंजन बचना। मिटि गै सब कुतरक कै रचना॥
भइ रघुपति पद प्रीति प्रतीती। दारुन असंभावना बीती॥

kāsīṃ marata jaṃtu avalokī| jāsu nāma bala karaum̐ bisokī||
soi prabhu mora carācara svāmī| raghubara saba ura aṃtarajāmī||
bibasahum̐ jāsu nāma nara kahahīṃ| janama aneka racita agha dahahīṃ||
sādara sumirana je nara karahīṃ| bhava bāridhi gopada iva tarahīṃ||
rāma so paramātamā bhavānī| taham̐ bhrama ati abihita tava bānī||
asa saṃsaya ānata ura māhīṃ| gyāna birāga sakala guna jāhīṃ||
suni siva ke bhrama bhaṃjana bacanā| miṭi gai saba kutaraka kai racanā||
bhai raghupati pada prīti pratītī| dāruna asaṃbhāvanā bītī||

दोहा 119
पुनि पुनि प्रभु पद कमल गहि जोरि पंकरुह पानि।
बोली गिरिजा बचन बर मनहुँ प्रेम रस सानि॥119॥
puni puni prabhu pada kamala gahi jori paṃkaruha pāni|
bolī girijā bacana bara manahum̐ prema rasa sāni||119||
दोहा 120#

ससि कर सम सुनि गिरा तुम्हारी। मिटा मोह सरदातप भारी॥
तुम्ह कृपाल सबु संसउ हरेऊ। राम स्वरूप जानि मोहि परेऊ॥
नाथ कृपाँ अब गयउ बिषादा। सुखी भयउँ प्रभु चरन प्रसादा॥
अब मोहि आपनि किंकरि जानी। जदपि सहज जड़ नारि अयानी॥
प्रथम जो मैं पूछा सोइ कहहू। जौं मो पर प्रसन्न प्रभु अहहू॥
राम ब्रह्म चिनमय अबिनासी। सर्ब रहित सब उर पुर बासी॥
नाथ धरेउ नरतनु केहि हेतू। मोहि समुझाइ कहहु बृषकेतू॥
उमा बचन सुनि परम बिनीता। रामकथा पर प्रीति पुनीता॥

sasi kara sama suni girā tumhārī| miṭā moha saradātapa bhārī||
tumha kṛpāla sabu saṃsau hareū| rāma svarūpa jāni mohi pareū||
nātha kṛpām̐ aba gayau biṣādā| sukhī bhayaum̐ prabhu carana prasādā||
aba mohi āpani kiṃkari jānī| jadapi sahaja jaḍa nāri ayānī||
prathama jo maiṃ pūchā soi kahahū| jauṃ mo para prasanna prabhu ahahū||
rāma brahma cinamaya abināsī| sarba rahita saba ura pura bāsī||
nātha dhareu naratanu kehi hetū| mohi samujhāi kahahu bṛṣaketū||
umā bacana suni parama binītā| rāmakathā para prīti punītā||

दोहा 120(क)
हियँ हरषे कामारि तब संकर सहज सुजान
बहु बिधि उमहि प्रसंसि पुनि बोले कृपानिधान॥120(क)॥
hiyam̐ haraṣe kāmāri taba saṃkara sahaja sujāna
bahu bidhi umahi prasaṃsi puni bole kṛpānidhāna||120(ka)||

सोरठा 120(ख)
सुनु सुभ कथा भवानि रामचरितमानस बिमल।
कहा भुसुंडि बखानि सुना बिहग नायक गरुड़॥120(ख)॥
sunu subha kathā bhavāni rāmacaritamānasa bimala|
kahā bhusuṃḍi bakhāni sunā bihaga nāyaka garuḍa||120(kha)||

दोहा 120(ग)
सो संबाद उदार जेहि बिधि भा आगें कहब।
सुनहु राम अवतार चरित परम सुंदर अनघ॥120(ग)॥
so saṃbāda udāra jehi bidhi bhā āgeṃ kahaba|
sunahu rāma avatāra carita parama suṃdara anagha||120(ga)||

दोहा 120(घ)
हरि गुन नाम अपार कथा रूप अगनित अमित।
मैं निज मति अनुसार कहउँ उमा सादर सुनहु॥120(घ॥
hari guna nāma apāra kathā rūpa aganita amita|
maiṃ nija mati anusāra kahaum̐ umā sādara sunahu||120(gha||
मासपारायण, चौथा विश्रामDay 4 of the 30-day Masparayan ends here
नवाह्नपारायण, पहला विश्रामDay 1 of the 9-day Navahna path ends here

Completed Bal Kand — Part 4?

Mark Masparayan day 4 done, light a diya, or share the path with family.

Text: the Gita Press edition of Shri Ramcharitmanas, checked against two independent transcriptions. Spotted an error? Suggest a correction.

Bal Kand — Part 4 — text

Completed Bal Kand — Part 4?