Ramcharitmanas Bal Kand Part 5 (Doha 121–152)

दोहा 121#

नवान्हपारायन,पहला विश्राम
सुनु गिरिजा हरिचरित सुहाए। बिपुल बिसद निगमागम गाए॥
हरि अवतार हेतु जेहि होई। इदमित्थं कहि जाइ न सोई॥
राम अतर्क्य बुद्धि मन बानी। मत हमार अस सुनहि सयानी॥
तदपि संत मुनि बेद पुराना। जस कछु कहहिं स्वमति अनुमाना॥
तस मैं सुमुखि सुनावउँ तोही। समुझि परइ जस कारन मोही॥
जब जब होइ धरम कै हानी। बाढ़हिं असुर अधम अभिमानी॥
करहिं अनीति जाइ नहिं बरनी। सीदहिं बिप्र धेनु सुर धरनी॥
तब तब प्रभु धरि बिबिध सरीरा। हरहिं कृपानिधि सज्जन पीरा॥

navānhapārāyana,pahalā viśrāma
sunu girijā haricarita suhāe| bipula bisada nigamāgama gāe||
hari avatāra hetu jehi hoī| idamitthaṃ kahi jāi na soī||
rāma atarkya buddhi mana bānī| mata hamāra asa sunahi sayānī||
tadapi saṃta muni beda purānā| jasa kachu kahahiṃ svamati anumānā||
tasa maiṃ sumukhi sunāvaum̐ tohī| samujhi parai jasa kārana mohī||
jaba jaba hoi dharama kai hānī| bāḍhahiṃ asura adhama abhimānī||
karahiṃ anīti jāi nahiṃ baranī| sīdahiṃ bipra dhenu sura dharanī||
taba taba prabhu dhari bibidha sarīrā| harahiṃ kṛpānidhi sajjana pīrā||

दोहा 121
असुर मारि थापहिं सुरन्ह राखहिं निज श्रुति सेतु।
जग बिस्तारहिं बिसद जस राम जन्म कर हेतु॥121॥
asura māri thāpahiṃ suranha rākhahiṃ nija śruti setu|
jaga bistārahiṃ bisada jasa rāma janma kara hetu||121||
दोहा 122#

सोइ जस गाइ भगत भव तरहीं। कृपासिंधु जन हित तनु धरहीं॥
राम जनम के हेतु अनेका। परम बिचित्र एक तें एका॥
जनम एक दुइ कहउँ बखानी। सावधान सुनु सुमति भवानी॥
द्वारपाल हरि के प्रिय दोऊ। जय अरु बिजय जान सब कोऊ॥
बिप्र श्राप तें दूनउ भाई। तामस असुर देह तिन्ह पाई॥
कनककसिपु अरु हाटक लोचन। जगत बिदित सुरपति मद मोचन॥
बिजई समर बीर बिख्याता। धरि बराह बपु एक निपाता॥
होइ नरहरि दूसर पुनि मारा। जन प्रहलाद सुजस बिस्तारा॥

soi jasa gāi bhagata bhava tarahīṃ| kṛpāsiṃdhu jana hita tanu dharahīṃ||
rāma janama ke hetu anekā| parama bicitra eka teṃ ekā||
janama eka dui kahaum̐ bakhānī| sāvadhāna sunu sumati bhavānī||
dvārapāla hari ke priya doū| jaya aru bijaya jāna saba koū||
bipra śrāpa teṃ dūnau bhāī| tāmasa asura deha tinha pāī||
kanakakasipu aru hāṭaka locana| jagata bidita surapati mada mocana||
bijaī samara bīra bikhyātā| dhari barāha bapu eka nipātā||
hoi narahari dūsara puni mārā| jana prahalāda sujasa bistārā||

दोहा 122
भए निसाचर जाइ तेइ महाबीर बलवान।
कुंभकरन रावन सुभट सुर बिजई जग जान॥122॥
bhae nisācara jāi tei mahābīra balavāna|
kuṃbhakarana rāvana subhaṭa sura bijaī jaga jāna||122||
दोहा 123#

मुकुत न भए हते भगवाना। तीनि जनम द्विज बचन प्रवाना॥
एक बार तिन्ह के हित लागी। धरेउ सरीर भगत अनुरागी॥
कस्यप अदिति तहाँ पितु माता। दसरथ कौसल्या बिख्याता॥
एक कलप एहि बिधि अवतारा। चरित्र पवित्र किए संसारा॥
एक कलप सुर देखि दुखारे। समर जलंधर सन सब हारे॥
संभु कीन्ह संग्राम अपारा। दनुज महाबल मरइ न मारा॥
परम सती असुराधिप नारी। तेहि बल ताहि न जितहिं पुरारी॥

mukuta na bhae hate bhagavānā| tīni janama dvija bacana pravānā||
eka bāra tinha ke hita lāgī| dhareu sarīra bhagata anurāgī||
kasyapa aditi tahām̐ pitu mātā| dasaratha kausalyā bikhyātā||
eka kalapa ehi bidhi avatārā| caritra pavitra kie saṃsārā||
eka kalapa sura dekhi dukhāre| samara jalaṃdhara sana saba hāre||
saṃbhu kīnha saṃgrāma apārā| danuja mahābala marai na mārā||
parama satī asurādhipa nārī| tehi bala tāhi na jitahiṃ purārī||

दोहा 123
छल करि टारेउ तासु ब्रत प्रभु सुर कारज कीन्ह॥
जब तेहि जानेउ मरम तब श्राप कोप करि दीन्ह॥123॥
chala kari ṭāreu tāsu brata prabhu sura kāraja kīnha||
jaba tehi jāneu marama taba śrāpa kopa kari dīnha||123||
दोहा 124#

तासु श्राप हरि दीन्ह प्रमाना। कौतुकनिधि कृपाल भगवाना॥
तहाँ जलंधर रावन भयऊ। रन हति राम परम पद दयऊ॥
एक जनम कर कारन एहा। जेहि लगि राम धरी नरदेहा॥
प्रति अवतार कथा प्रभु केरी। सुनु मुनि बरनी कबिन्ह घनेरी॥
नारद श्राप दीन्ह एक बारा। कलप एक तेहि लगि अवतारा॥
गिरिजा चकित भई सुनि बानी। नारद बिष्नुभगत पुनि ग्यानी॥
कारन कवन श्राप मुनि दीन्हा। का अपराध रमापति कीन्हा॥
यह प्रसंग मोहि कहहु पुरारी। मुनि मन मोह आचरज भारी॥

tāsu śrāpa hari dīnha pramānā| kautukanidhi kṛpāla bhagavānā||
tahām̐ jalaṃdhara rāvana bhayaū| rana hati rāma parama pada dayaū||
eka janama kara kārana ehā| jehi lagi rāma dharī naradehā||
prati avatāra kathā prabhu kerī| sunu muni baranī kabinha ghanerī||
nārada śrāpa dīnha eka bārā| kalapa eka tehi lagi avatārā||
girijā cakita bhaī suni bānī| nārada biṣnubhagata puni gyānī||
kārana kavana śrāpa muni dīnhā| kā aparādha ramāpati kīnhā||
yaha prasaṃga mohi kahahu purārī| muni mana moha ācaraja bhārī||

दोहा 124(क)
बोले बिहसि महेस तब ग्यानी मूढ़ न कोइ।
जेहि जस रघुपति करहिं जब सो तस तेहि छन होइ॥124(क)॥
bole bihasi mahesa taba gyānī mūḍha na koi|
jehi jasa raghupati karahiṃ jaba so tasa tehi chana hoi||124(ka)||

सोरठा 124(ख)
कहउँ राम गुन गाथ भरद्वाज सादर सुनहु।
भव भंजन रघुनाथ भजु तुलसी तजि मान मद॥124(ख)॥
kahaum̐ rāma guna gātha bharadvāja sādara sunahu|
bhava bhaṃjana raghunātha bhaju tulasī taji māna mada||124(kha)||
दोहा 125#

हिमगिरि गुहा एक अति पावनि। बह समीप सुरसरी सुहावनि॥
आश्रम परम पुनीत सुहावा। देखि देवरिषि मन अति भावा॥
निरखि सैल सरि बिपिन बिभागा। भयउ रमापति पद अनुरागा॥
सुमिरत हरिहि श्राप गति बाधी। सहज बिमल मन लागि समाधी॥
मुनि गति देखि सुरेस डेराना। कामहि बोलि कीन्ह समाना॥
सहित सहाय जाहु मम हेतू। चलेउ हरषि हियँ जलचरकेतू॥
सुनासीर मन महुँ असि त्रासा। चहत देवरिषि मम पुर बासा॥
जे कामी लोलुप जग माहीं। कुटिल काक इव सबहि डेराहीं॥

himagiri guhā eka ati pāvani| baha samīpa surasarī suhāvani||
āśrama parama punīta suhāvā| dekhi devariṣi mana ati bhāvā||
nirakhi saila sari bipina bibhāgā| bhayau ramāpati pada anurāgā||
sumirata harihi śrāpa gati bādhī| sahaja bimala mana lāgi samādhī||
muni gati dekhi suresa ḍerānā| kāmahi boli kīnha samānā||
sahita sahāya jāhu mama hetū| caleu haraṣi hiyam̐ jalacaraketū||
sunāsīra mana mahum̐ asi trāsā| cahata devariṣi mama pura bāsā||
je kāmī lolupa jaga māhīṃ| kuṭila kāka iva sabahi ḍerāhīṃ||

दोहा 125
सुख हाड़ लै भाग सठ स्वान निरखि मृगराज।
छीनि लेइ जनि जान जड़ तिमि सुरपतिहि न लाज॥125॥
sukha hāḍa lai bhāga saṭha svāna nirakhi mṛgarāja|
chīni lei jani jāna jaḍa timi surapatihi na lāja||125||
दोहा 126#

तेहि आश्रमहिं मदन जब गयऊ। निज मायाँ बसंत निरमयऊ॥
कुसुमित बिबिध बिटप बहुरंगा। कूजहिं कोकिल गुंजहिं भृंगा॥
चली सुहावनि त्रिबिध बयारी। काम कृसानु बढ़ावनिहारी॥
रंभादिक सुरनारि नबीना । सकल असमसर कला प्रबीना॥
करहिं गान बहु तान तरंगा। बहुबिधि क्रीड़हि पानि पतंगा॥
देखि सहाय मदन हरषाना। कीन्हेसि पुनि प्रपंच बिधि नाना॥
काम कला कछु मुनिहि न ब्यापी। निज भयँ डरेउ मनोभव पापी॥
सीम कि चाँपि सकइ कोउ तासु। बड़ रखवार रमापति जासू॥

tehi āśramahiṃ madana jaba gayaū| nija māyām̐ basaṃta niramayaū||
kusumita bibidha biṭapa bahuraṃgā| kūjahiṃ kokila guṃjahiṃ bhṛṃgā||
calī suhāvani tribidha bayārī| kāma kṛsānu baḍhāvanihārī||
raṃbhādika suranāri nabīnā | sakala asamasara kalā prabīnā||
karahiṃ gāna bahu tāna taraṃgā| bahubidhi krīḍahi pāni pataṃgā||
dekhi sahāya madana haraṣānā| kīnhesi puni prapaṃca bidhi nānā||
kāma kalā kachu munihi na byāpī| nija bhayam̐ ḍareu manobhava pāpī||
sīma ki cām̐pi sakai kou tāsu| baḍa rakhavāra ramāpati jāsū||

दोहा 126
सहित सहाय सभीत अति मानि हारि मन मैन।
गहेसि जाइ मुनि चरन तब कहि सुठि आरत बैन॥126॥
sahita sahāya sabhīta ati māni hāri mana maina|
gahesi jāi muni carana taba kahi suṭhi ārata baina||126||
दोहा 127#

भयउ न नारद मन कछु रोषा। कहि प्रिय बचन काम परितोषा॥
नाइ चरन सिरु आयसु पाई। गयउ मदन तब सहित सहाई॥
मुनि सुसीलता आपनि करनी। सुरपति सभाँ जाइ सब बरनी॥
सुनि सब कें मन अचरजु आवा। मुनिहि प्रसंसि हरिहि सिरु नावा॥
तब नारद गवने सिव पाहीं। जिता काम अहमिति मन माहीं॥
मार चरित संकरहि सुनाए। अतिप्रिय जानि महेस सिखाए॥
बार बार बिनवउँ मुनि तोही। जिमि यह कथा सुनायहु मोही॥
तिमि जनि हरिहि सुनावहु कबहूँ। चलेहुँ प्रसंग दुराएडु तबहूँ॥

bhayau na nārada mana kachu roṣā| kahi priya bacana kāma paritoṣā||
nāi carana siru āyasu pāī| gayau madana taba sahita sahāī||
muni susīlatā āpani karanī| surapati sabhām̐ jāi saba baranī||
suni saba keṃ mana acaraju āvā| munihi prasaṃsi harihi siru nāvā||
taba nārada gavane siva pāhīṃ| jitā kāma ahamiti mana māhīṃ||
māra carita saṃkarahi sunāe| atipriya jāni mahesa sikhāe||
bāra bāra binavaum̐ muni tohī| jimi yaha kathā sunāyahu mohī||
timi jani harihi sunāvahu kabahūm̐| calehum̐ prasaṃga durāeḍu tabahūm̐||

दोहा 127
संभु दीन्ह उपदेस हित नहिं नारदहि सोहान।
भरद्वाज कौतुक सुनहु हरि इच्छा बलवान॥127॥
saṃbhu dīnha upadesa hita nahiṃ nāradahi sohāna|
bharadvāja kautuka sunahu hari icchā balavāna||127||
दोहा 128#

राम कीन्ह चाहहिं सोइ होई। करै अन्यथा अस नहिं कोई॥
संभु बचन मुनि मन नहिं भाए। तब बिरंचि के लोक सिधाए॥
एक बार करतल बर बीना। गावत हरि गुन गान प्रबीना॥
छीरसिंधु गवने मुनिनाथा। जहँ बस श्रीनिवास श्रुतिमाथा॥
हरषि मिले उठि रमानिकेता। बैठे आसन रिषिहि समेता॥
बोले बिहसि चराचर राया। बहुते दिनन कीन्हि मुनि दाया॥
काम चरित नारद सब भाषे। जद्यपि प्रथम बरजि सिवँ राखे॥
अति प्रचंड रघुपति कै माया। जेहि न मोह अस को जग जाया॥

rāma kīnha cāhahiṃ soi hoī| karai anyathā asa nahiṃ koī||
saṃbhu bacana muni mana nahiṃ bhāe| taba biraṃci ke loka sidhāe||
eka bāra karatala bara bīnā| gāvata hari guna gāna prabīnā||
chīrasiṃdhu gavane munināthā| jaham̐ basa śrīnivāsa śrutimāthā||
haraṣi mile uṭhi ramāniketā| baiṭhe āsana riṣihi sametā||
bole bihasi carācara rāyā| bahute dinana kīnhi muni dāyā||
kāma carita nārada saba bhāṣe| jadyapi prathama baraji sivam̐ rākhe||
ati pracaṃḍa raghupati kai māyā| jehi na moha asa ko jaga jāyā||

दोहा 128
रूख बदन करि बचन मृदु बोले श्रीभगवान ।
तुम्हरे सुमिरन तें मिटहिं मोह मार मद मान॥128॥
rūkha badana kari bacana mṛdu bole śrībhagavāna |
tumhare sumirana teṃ miṭahiṃ moha māra mada māna||128||
दोहा 129#

सुनु मुनि मोह होइ मन ताकें। ग्यान बिराग हृदय नहिं जाके॥
ब्रह्मचरज ब्रत रत मतिधीरा। तुम्हहि कि करइ मनोभव पीरा॥
नारद कहेउ सहित अभिमाना। कृपा तुम्हारि सकल भगवाना॥
करुनानिधि मन दीख बिचारी। उर अंकुरेउ गरब तरु भारी॥
बेगि सो मै डारिहउँ उखारी। पन हमार सेवक हितकारी॥
मुनि कर हित मम कौतुक होई। अवसि उपाय करबि मै सोई॥
तब नारद हरि पद सिर नाई। चले हृदयँ अहमिति अधिकाई॥
श्रीपति निज माया तब प्रेरी। सुनहु कठिन करनी तेहि केरी॥

sunu muni moha hoi mana tākeṃ| gyāna birāga hṛdaya nahiṃ jāke||
brahmacaraja brata rata matidhīrā| tumhahi ki karai manobhava pīrā||
nārada kaheu sahita abhimānā| kṛpā tumhāri sakala bhagavānā||
karunānidhi mana dīkha bicārī| ura aṃkureu garaba taru bhārī||
begi so mai ḍārihaum̐ ukhārī| pana hamāra sevaka hitakārī||
muni kara hita mama kautuka hoī| avasi upāya karabi mai soī||
taba nārada hari pada sira nāī| cale hṛdayam̐ ahamiti adhikāī||
śrīpati nija māyā taba prerī| sunahu kaṭhina karanī tehi kerī||

दोहा 129
बिरचेउ मग महुँ नगर तेहिं सत जोजन बिस्तार।
श्रीनिवासपुर तें अधिक रचना बिबिध प्रकार॥129॥
biraceu maga mahum̐ nagara tehiṃ sata jojana bistāra|
śrīnivāsapura teṃ adhika racanā bibidha prakāra||129||
दोहा 130#

बसहिं नगर सुंदर नर नारी। जनु बहु मनसिज रति तनुधारी॥
तेहिं पुर बसइ सीलनिधि राजा। अगनित हय गय सेन समाजा॥
सत सुरेस सम बिभव बिलासा। रूप तेज बल नीति निवासा॥
बिस्वमोहनी तासु कुमारी। श्री बिमोह जिसु रूपु निहारी॥
सोइ हरिमाया सब गुन खानी। सोभा तासु कि जाइ बखानी॥
करइ स्वयंबर सो नृपबाला। आए तहँ अगनित महिपाला॥
मुनि कौतुकी नगर तेहिं गयऊ। पुरबासिन्ह सब पूछत भयऊ॥
सुनि सब चरित भूपगृहँ आए। करि पूजा नृप मुनि बैठाए॥

basahiṃ nagara suṃdara nara nārī| janu bahu manasija rati tanudhārī||
tehiṃ pura basai sīlanidhi rājā| aganita haya gaya sena samājā||
sata suresa sama bibhava bilāsā| rūpa teja bala nīti nivāsā||
bisvamohanī tāsu kumārī| śrī bimoha jisu rūpu nihārī||
soi harimāyā saba guna khānī| sobhā tāsu ki jāi bakhānī||
karai svayaṃbara so nṛpabālā| āe taham̐ aganita mahipālā||
muni kautukī nagara tehiṃ gayaū| purabāsinha saba pūchata bhayaū||
suni saba carita bhūpagṛham̐ āe| kari pūjā nṛpa muni baiṭhāe||

दोहा 130
आनि देखाई नारदहि भूपति राजकुमारि।
कहहु नाथ गुन दोष सब एहि के हृदयँ बिचारि॥130॥
āni dekhāī nāradahi bhūpati rājakumāri|
kahahu nātha guna doṣa saba ehi ke hṛdayam̐ bicāri||130||
दोहा 131#

देखि रूप मुनि बिरति बिसारी। बड़ी बार लगि रहे निहारी॥
लच्छन तासु बिलोकि भुलाने। हृदयँ हरष नहिं प्रगट बखाने॥
जो एहि बरइ अमर सोइ होई। समरभूमि तेहि जीत न कोई॥
सेवहिं सकल चराचर ताही। बरइ सीलनिधि कन्या जाही॥
लच्छन सब बिचारि उर राखे। कछुक बनाइ भूप सन भाषे॥
सुता सुलच्छन कहि नृप पाहीं। नारद चले सोच मन माहीं॥
करौं जाइ सोइ जतन बिचारी। जेहि प्रकार मोहि बरै कुमारी॥
जप तप कछु न होइ तेहि काला। हे बिधि मिलइ कवन बिधि बाला॥

dekhi rūpa muni birati bisārī| baḍī bāra lagi rahe nihārī||
lacchana tāsu biloki bhulāne| hṛdayam̐ haraṣa nahiṃ pragaṭa bakhāne||
jo ehi barai amara soi hoī| samarabhūmi tehi jīta na koī||
sevahiṃ sakala carācara tāhī| barai sīlanidhi kanyā jāhī||
lacchana saba bicāri ura rākhe| kachuka banāi bhūpa sana bhāṣe||
sutā sulacchana kahi nṛpa pāhīṃ| nārada cale soca mana māhīṃ||
karauṃ jāi soi jatana bicārī| jehi prakāra mohi barai kumārī||
japa tapa kachu na hoi tehi kālā| he bidhi milai kavana bidhi bālā||

दोहा 131
एहि अवसर चाहिअ परम सोभा रूप बिसाल।
जो बिलोकि रीझै कुअँरि तब मेलै जयमाल॥131॥
ehi avasara cāhia parama sobhā rūpa bisāla|
jo biloki rījhai kuam̐ri taba melai jayamāla||131||
दोहा 132#

हरि सन मागौं सुंदरताई। होइहि जात गहरु अति भाई॥
मोरें हित हरि सम नहिं कोऊ। एहि अवसर सहाय सोइ होऊ॥
बहुबिधि बिनय कीन्हि तेहि काला। प्रगटेउ प्रभु कौतुकी कृपाला॥
प्रभु बिलोकि मुनि नयन जुड़ाने। होइहि काजु हिएँ हरषाने॥
अति आरति कहि कथा सुनाई। करहु कृपा करि होहु सहाई॥
आपन रूप देहु प्रभु मोही। आन भाँति नहिं पावौं ओही॥
जेहि बिधि नाथ होइ हित मोरा। करहु सो बेगि दास मैं तोरा॥
निज माया बल देखि बिसाला। हियँ हँसि बोले दीनदयाला॥

hari sana māgauṃ suṃdaratāī| hoihi jāta gaharu ati bhāī||
moreṃ hita hari sama nahiṃ koū| ehi avasara sahāya soi hoū||
bahubidhi binaya kīnhi tehi kālā| pragaṭeu prabhu kautukī kṛpālā||
prabhu biloki muni nayana juḍāne| hoihi kāju hiem̐ haraṣāne||
ati ārati kahi kathā sunāī| karahu kṛpā kari hohu sahāī||
āpana rūpa dehu prabhu mohī| āna bhām̐ti nahiṃ pāvauṃ ohī||
jehi bidhi nātha hoi hita morā| karahu so begi dāsa maiṃ torā||
nija māyā bala dekhi bisālā| hiyam̐ ham̐si bole dīnadayālā||

दोहा 132
जेहि बिधि होइहि परम हित नारद सुनहु तुम्हार।
सोइ हम करब न आन कछु बचन न मृषा हमार॥132॥
jehi bidhi hoihi parama hita nārada sunahu tumhāra|
soi hama karaba na āna kachu bacana na mṛṣā hamāra||132||
दोहा 133#

कुपथ माग रुज ब्याकुल रोगी। बैद न देइ सुनहु मुनि जोगी॥
एहि बिधि हित तुम्हार मैं ठयऊ। कहि अस अंतरहित प्रभु भयऊ॥
माया बिबस भए मुनि मूढ़ा। समुझी नहिं हरि गिरा निगूढ़ा॥
गवने तुरत तहाँ रिषिराई। जहाँ स्वयंबर भूमि बनाई॥
निज निज आसन बैठे राजा। बहु बनाव करि सहित समाजा॥
मुनि मन हरष रूप अति मोरें। मोहि तजि आनहि बारिहि न भोरें॥
मुनि हित कारन कृपानिधाना। दीन्ह कुरूप न जाइ बखाना॥
सो चरित्र लखि काहुँ न पावा। नारद जानि सबहिं सिर नावा॥

kupatha māga ruja byākula rogī| baida na dei sunahu muni jogī||
ehi bidhi hita tumhāra maiṃ ṭhayaū| kahi asa aṃtarahita prabhu bhayaū||
māyā bibasa bhae muni mūḍhā| samujhī nahiṃ hari girā nigūḍhā||
gavane turata tahām̐ riṣirāī| jahām̐ svayaṃbara bhūmi banāī||
nija nija āsana baiṭhe rājā| bahu banāva kari sahita samājā||
muni mana haraṣa rūpa ati moreṃ| mohi taji ānahi bārihi na bhoreṃ||
muni hita kārana kṛpānidhānā| dīnha kurūpa na jāi bakhānā||
so caritra lakhi kāhum̐ na pāvā| nārada jāni sabahiṃ sira nāvā||

दोहा 133
रहे तहाँ दुइ रुद्र गन ते जानहिं सब भेउ।
बिप्रबेष देखत फिरहिं परम कौतुकी तेउ॥133॥
rahe tahām̐ dui rudra gana te jānahiṃ saba bheu|
biprabeṣa dekhata phirahiṃ parama kautukī teu||133||
दोहा 134#

जेंहि समाज बैंठे मुनि जाई। हृदयँ रूप अहमिति अधिकाई॥
तहँ बैठ महेस गन दोऊ। बिप्रबेष गति लखइ न कोऊ॥
करहिं कूटि नारदहि सुनाई। नीकि दीन्हि हरि सुंदरताई॥
रीझहि राजकुअँरि छबि देखी। इन्हहि बरिहि हरि जानि बिसेषी॥
मुनिहि मोह मन हाथ पराएँ। हँसहिं संभु गन अति सचु पाएँ॥
जदपि सुनहिं मुनि अटपटि बानी। समुझि न परइ बुद्धि भ्रम सानी॥
काहुँ न लखा सो चरित बिसेषा। सो सरूप नृपकन्याँ देखा॥
मर्कट बदन भयंकर देही। देखत हृदयँ क्रोध भा तेही॥

jeṃhi samāja baiṃṭhe muni jāī| hṛdayam̐ rūpa ahamiti adhikāī||
taham̐ baiṭha mahesa gana doū| biprabeṣa gati lakhai na koū||
karahiṃ kūṭi nāradahi sunāī| nīki dīnhi hari suṃdaratāī||
rījhahi rājakuam̐ri chabi dekhī| inhahi barihi hari jāni biseṣī||
munihi moha mana hātha parāem̐| ham̐sahiṃ saṃbhu gana ati sacu pāem̐||
jadapi sunahiṃ muni aṭapaṭi bānī| samujhi na parai buddhi bhrama sānī||
kāhum̐ na lakhā so carita biseṣā| so sarūpa nṛpakanyām̐ dekhā||
markaṭa badana bhayaṃkara dehī| dekhata hṛdayam̐ krodha bhā tehī||

दोहा 134
सखीं संग लै कुअँरि तब चलि जनु राजमराल।
देखत फिरइ महीप सब कर सरोज जयमाल॥134॥
sakhīṃ saṃga lai kuam̐ri taba cali janu rājamarāla|
dekhata phirai mahīpa saba kara saroja jayamāla||134||
दोहा 135#

जेहि दिसि बैठे नारद फूली। सो दिसि देहि न बिलोकी भूली॥
पुनि पुनि मुनि उकसहिं अकुलाहीं। देखि दसा हर गन मुसकाहीं॥
धरि नृपतनु तहँ गयउ कृपाला। कुअँरि हरषि मेलेउ जयमाला॥
दुलहिनि लै गे लच्छिनिवासा। नृपसमाज सब भयउ निरासा॥
मुनि अति बिकल मोंहँ मति नाठी। मनि गिरि गई छूटि जनु गाँठी॥
तब हर गन बोले मुसुकाई। निज मुख मुकुर बिलोकहु जाई॥
अस कहि दोउ भागे भयँ भारी। बदन दीख मुनि बारि निहारी॥
बेषु बिलोकि क्रोध अति बाढ़ा। तिन्हहि सराप दीन्ह अति गाढ़ा॥

jehi disi baiṭhe nārada phūlī| so disi dehi na bilokī bhūlī||
puni puni muni ukasahiṃ akulāhīṃ| dekhi dasā hara gana musakāhīṃ||
dhari nṛpatanu taham̐ gayau kṛpālā| kuam̐ri haraṣi meleu jayamālā||
dulahini lai ge lacchinivāsā| nṛpasamāja saba bhayau nirāsā||
muni ati bikala moṃham̐ mati nāṭhī| mani giri gaī chūṭi janu gām̐ṭhī||
taba hara gana bole musukāī| nija mukha mukura bilokahu jāī||
asa kahi dou bhāge bhayam̐ bhārī| badana dīkha muni bāri nihārī||
beṣu biloki krodha ati bāḍhā| tinhahi sarāpa dīnha ati gāḍhā||

दोहा 135
होहु निसाचर जाइ तुम्ह कपटी पापी दोउ।
हँसेहु हमहि सो लेहु फल बहुरि हँसेहु मुनि कोउ॥135॥
hohu nisācara jāi tumha kapaṭī pāpī dou|
ham̐sehu hamahi so lehu phala bahuri ham̐sehu muni kou||135||
दोहा 136#

पुनि जल दीख रूप निज पावा। तदपि हृदयँ संतोष न आवा॥
फरकत अधर कोप मन माहीं। सपदी चले कमलापति पाहीं॥
देहउँ श्राप कि मरिहउँ जाई। जगत मोर उपहास कराई॥
बीचहिं पंथ मिले दनुजारी। संग रमा सोइ राजकुमारी॥
बोले मधुर बचन सुरसाईं। मुनि कहँ चले बिकल की नाईं॥
सुनत बचन उपजा अति क्रोधा। माया बस न रहा मन बोधा॥
पर संपदा सकहु नहिं देखी। तुम्हरें इरिषा कपट बिसेषी॥
मथत सिंधु रुद्रहि बौरायहु। सुरन्ह प्रेरी बिष पान करायहु॥

puni jala dīkha rūpa nija pāvā| tadapi hṛdayam̐ saṃtoṣa na āvā||
pharakata adhara kopa mana māhīṃ| sapadī cale kamalāpati pāhīṃ||
dehaum̐ śrāpa ki marihaum̐ jāī| jagata mora upahāsa karāī||
bīcahiṃ paṃtha mile danujārī| saṃga ramā soi rājakumārī||
bole madhura bacana surasāīṃ| muni kaham̐ cale bikala kī nāīṃ||
sunata bacana upajā ati krodhā| māyā basa na rahā mana bodhā||
para saṃpadā sakahu nahiṃ dekhī| tumhareṃ iriṣā kapaṭa biseṣī||
mathata siṃdhu rudrahi baurāyahu| suranha prerī biṣa pāna karāyahu||

दोहा 136
असुर सुरा बिष संकरहि आपु रमा मनि चारु।
स्वारथ साधक कुटिल तुम्ह सदा कपट ब्यवहारु॥136॥
asura surā biṣa saṃkarahi āpu ramā mani cāru|
svāratha sādhaka kuṭila tumha sadā kapaṭa byavahāru||136||
दोहा 137#

परम स्वतंत्र न सिर पर कोई। भावइ मनहि करहु तुम्ह सोई॥
भलेहि मंद मंदेहि भल करहू। बिसमय हरष न हियँ कछु धरहू॥
डहकि डहकि परिचेहु सब काहू। अति असंक मन सदा उछाहू॥
करम सुभासुभ तुम्हहि न बाधा। अब लगि तुम्हहि न काहूँ साधा॥
भले भवन अब बायन दीन्हा। पावहुगे फल आपन कीन्हा॥
बंचेहु मोहि जवनि धरि देहा। सोइ तनु धरहु श्राप मम एहा॥
कपि आकृति तुम्ह कीन्हि हमारी। करिहहिं कीस सहाय तुम्हारी॥
मम अपकार कीन्ही तुम्ह भारी। नारी बिरहँ तुम्ह होब दुखारी॥

parama svataṃtra na sira para koī| bhāvai manahi karahu tumha soī||
bhalehi maṃda maṃdehi bhala karahū| bisamaya haraṣa na hiyam̐ kachu dharahū||
ḍahaki ḍahaki paricehu saba kāhū| ati asaṃka mana sadā uchāhū||
karama subhāsubha tumhahi na bādhā| aba lagi tumhahi na kāhūm̐ sādhā||
bhale bhavana aba bāyana dīnhā| pāvahuge phala āpana kīnhā||
baṃcehu mohi javani dhari dehā| soi tanu dharahu śrāpa mama ehā||
kapi ākṛti tumha kīnhi hamārī| karihahiṃ kīsa sahāya tumhārī||
mama apakāra kīnhī tumha bhārī| nārī biraham̐ tumha hoba dukhārī||

दोहा 137
श्राप सीस धरी हरषि हियँ प्रभु बहु बिनती कीन्हि।
निज माया कै प्रबलता करषि कृपानिधि लीन्हि॥137॥
śrāpa sīsa dharī haraṣi hiyam̐ prabhu bahu binatī kīnhi|
nija māyā kai prabalatā karaṣi kṛpānidhi līnhi||137||
दोहा 138#

जब हरि माया दूरि निवारी। नहिं तहँ रमा न राजकुमारी॥
तब मुनि अति सभीत हरि चरना। गहे पाहि प्रनतारति हरना॥
मृषा होउ मम श्राप कृपाला। मम इच्छा कह दीनदयाला॥
मैं दुर्बचन कहे बहुतेरे। कह मुनि पाप मिटिहिं किमि मेरे॥
जपहु जाइ संकर सत नामा। होइहि हृदयँ तुरंत बिश्रामा॥
कोउ नहिं सिव समान प्रिय मोरें। असि परतीति तजहु जनि भोरें॥
जेहि पर कृपा न करहिं पुरारी। सो न पाव मुनि भगति हमारी॥
अस उर धरि महि बिचरहु जाई। अब न तुम्हहि माया निअराई॥

jaba hari māyā dūri nivārī| nahiṃ taham̐ ramā na rājakumārī||
taba muni ati sabhīta hari caranā| gahe pāhi pranatārati haranā||
mṛṣā hou mama śrāpa kṛpālā| mama icchā kaha dīnadayālā||
maiṃ durbacana kahe bahutere| kaha muni pāpa miṭihiṃ kimi mere||
japahu jāi saṃkara sata nāmā| hoihi hṛdayam̐ turaṃta biśrāmā||
kou nahiṃ siva samāna priya moreṃ| asi paratīti tajahu jani bhoreṃ||
jehi para kṛpā na karahiṃ purārī| so na pāva muni bhagati hamārī||
asa ura dhari mahi bicarahu jāī| aba na tumhahi māyā niarāī||

दोहा 138
बहुबिधि मुनिहि प्रबोधि प्रभु तब भए अंतरधान॥
सत्यलोक नारद चले करत राम गुन गान॥138॥
bahubidhi munihi prabodhi prabhu taba bhae aṃtaradhāna||
satyaloka nārada cale karata rāma guna gāna||138||
दोहा 139#

हर गन मुनिहि जात पथ देखी। बिगतमोह मन हरष बिसेषी॥
अति सभीत नारद पहिं आए। गहि पद आरत बचन सुनाए॥
हर गन हम न बिप्र मुनिराया। बड़ अपराध कीन्ह फल पाया॥
श्राप अनुग्रह करहु कृपाला। बोले नारद दीनदयाला॥
निसिचर जाइ होहु तुम्ह दोऊ। बैभव बिपुल तेज बल होऊ॥
भुजबल बिस्व जितब तुम्ह जहिआ। धरिहहिं बिष्नु मनुज तनु तहिआ।
समर मरन हरि हाथ तुम्हारा। होइहहु मुकुत न पुनि संसारा॥
चले जुगल मुनि पद सिर नाई। भए निसाचर कालहि पाई॥

hara gana munihi jāta patha dekhī| bigatamoha mana haraṣa biseṣī||
ati sabhīta nārada pahiṃ āe| gahi pada ārata bacana sunāe||
hara gana hama na bipra munirāyā| baḍa aparādha kīnha phala pāyā||
śrāpa anugraha karahu kṛpālā| bole nārada dīnadayālā||
nisicara jāi hohu tumha doū| baibhava bipula teja bala hoū||
bhujabala bisva jitaba tumha jahiā| dharihahiṃ biṣnu manuja tanu tahiā|
samara marana hari hātha tumhārā| hoihahu mukuta na puni saṃsārā||
cale jugala muni pada sira nāī| bhae nisācara kālahi pāī||

दोहा 139
एक कलप एहि हेतु प्रभु लीन्ह मनुज अवतार।
सुर रंजन सज्जन सुखद हरि भंजन भुबि भार॥139॥
eka kalapa ehi hetu prabhu līnha manuja avatāra|
sura raṃjana sajjana sukhada hari bhaṃjana bhubi bhāra||139||
सोरठा 140#

एहि बिधि जनम करम हरि केरे। सुंदर सुखद बिचित्र घनेरे॥
कलप कलप प्रति प्रभु अवतरहीं। चारु चरित नानाबिधि करहीं॥
तब तब कथा मुनीसन्ह गाई। परम पुनीत प्रबंध बनाई॥
बिबिध प्रसंग अनूप बखाने। करहिं न सुनि आचरजु सयाने॥
हरि अनंत हरिकथा अनंता। कहहिं सुनहिं बहुबिधि सब संता॥
रामचंद्र के चरित सुहाए। कलप कोटि लगि जाहिं न गाए॥
यह प्रसंग मैं कहा भवानी। हरिमायाँ मोहहिं मुनि ग्यानी॥
प्रभु कौतुकी प्रनत हितकारी॥सेवत सुलभ सकल दुख हारी॥

ehi bidhi janama karama hari kere| suṃdara sukhada bicitra ghanere||
kalapa kalapa prati prabhu avatarahīṃ| cāru carita nānābidhi karahīṃ||
taba taba kathā munīsanha gāī| parama punīta prabaṃdha banāī||
bibidha prasaṃga anūpa bakhāne| karahiṃ na suni ācaraju sayāne||
hari anaṃta harikathā anaṃtā| kahahiṃ sunahiṃ bahubidhi saba saṃtā||
rāmacaṃdra ke carita suhāe| kalapa koṭi lagi jāhiṃ na gāe||
yaha prasaṃga maiṃ kahā bhavānī| harimāyām̐ mohahiṃ muni gyānī||
prabhu kautukī pranata hitakārī||sevata sulabha sakala dukha hārī||

सोरठा 140
सुर नर मुनि कोउ नाहिं जेहि न मोह माया प्रबल॥
अस बिचारि मन माहिं भजिअ महामाया पतिहि॥140॥
sura nara muni kou nāhiṃ jehi na moha māyā prabala||
asa bicāri mana māhiṃ bhajia mahāmāyā patihi||140||
दोहा 141#

अपर हेतु सुनु सैलकुमारी। कहउँ बिचित्र कथा बिस्तारी॥
जेहि कारन अज अगुन अरूपा। ब्रह्म भयउ कोसलपुर भूपा॥
जो प्रभु बिपिन फिरत तुम्ह देखा। बंधु समेत धरें मुनिबेषा॥
जासु चरित अवलोकि भवानी। सती सरीर रहिहु बौरानी॥
अजहुँ न छाया मिटति तुम्हारी। तासु चरित सुनु भ्रम रुज हारी॥
लीला कीन्हि जो तेहिं अवतारा। सो सब कहिहउँ मति अनुसारा॥
भरद्वाज सुनि संकर बानी। सकुचि सप्रेम उमा मुसकानी॥
लगे बहुरि बरने बृषकेतू। सो अवतार भयउ जेहि हेतू॥

apara hetu sunu sailakumārī| kahaum̐ bicitra kathā bistārī||
jehi kārana aja aguna arūpā| brahma bhayau kosalapura bhūpā||
jo prabhu bipina phirata tumha dekhā| baṃdhu sameta dhareṃ munibeṣā||
jāsu carita avaloki bhavānī| satī sarīra rahihu baurānī||
ajahum̐ na chāyā miṭati tumhārī| tāsu carita sunu bhrama ruja hārī||
līlā kīnhi jo tehiṃ avatārā| so saba kahihaum̐ mati anusārā||
bharadvāja suni saṃkara bānī| sakuci saprema umā musakānī||
lage bahuri barane bṛṣaketū| so avatāra bhayau jehi hetū||

दोहा 141
सो मैं तुम्ह सन कहउँ सबु सुनु मुनीस मन लाई॥
राम कथा कलि मल हरनि मंगल करनि सुहाइ॥141॥
so maiṃ tumha sana kahaum̐ sabu sunu munīsa mana lāī||
rāma kathā kali mala harani maṃgala karani suhāi||141||
सोरठा 142#

स्वायंभू मनु अरु सतरूपा। जिन्ह तें भै नरसृष्टि अनूपा॥
दंपति धरम आचरन नीका। अजहुँ गाव श्रुति जिन्ह कै लीका॥
नृप उत्तानपाद सुत तासू। ध्रुव हरि भगत भयउ सुत जासू॥
लघु सुत नाम प्रिय्रब्रत ताही। बेद पुरान प्रसंसहि जाही॥
देवहूति पुनि तासु कुमारी। जो मुनि कर्दम कै प्रिय नारी॥
आदिदेव प्रभु दीनदयाला। जठर धरेउ जेहिं कपिल कृपाला॥
सांख्य सास्त्र जिन्ह प्रगट बखाना। तत्व बिचार निपुन भगवाना॥
तेहिं मनु राज कीन्ह बहु काला। प्रभु आयसु सब बिधि प्रतिपाला॥

svāyaṃbhū manu aru satarūpā| jinha teṃ bhai narasṛṣṭi anūpā||
daṃpati dharama ācarana nīkā| ajahum̐ gāva śruti jinha kai līkā||
nṛpa uttānapāda suta tāsū| dhruva hari bhagata bhayau suta jāsū||
laghu suta nāma priyrabrata tāhī| beda purāna prasaṃsahi jāhī||
devahūti puni tāsu kumārī| jo muni kardama kai priya nārī||
ādideva prabhu dīnadayālā| jaṭhara dhareu jehiṃ kapila kṛpālā||
sāṃkhya sāstra jinha pragaṭa bakhānā| tatva bicāra nipuna bhagavānā||
tehiṃ manu rāja kīnha bahu kālā| prabhu āyasu saba bidhi pratipālā||

सोरठा 142
होइ न बिषय बिराग भवन बसत भा चौथपन।
हृदयँ बहुत दुख लाग जनम गयउ हरिभगति बिनु॥142॥
hoi na biṣaya birāga bhavana basata bhā cauthapana|
hṛdayam̐ bahuta dukha lāga janama gayau haribhagati binu||142||
दोहा 143#

बरबस राज सुतहि तब दीन्हा। नारि समेत गवन बन कीन्हा॥
तीरथ बर नैमिष बिख्याता। अति पुनीत साधक सिधि दाता॥
बसहिं तहाँ मुनि सिद्ध समाजा। तहँ हियँ हरषि चलेउ मनु राजा॥
पंथ जात सोहहिं मतिधीरा। ग्यान भगति जनु धरें सरीरा॥
पहुँचे जाइ धेनुमति तीरा। हरषि नहाने निरमल नीरा॥
आए मिलन सिद्ध मुनि ग्यानी। धरम धुरंधर नृपरिषि जानी॥
जहँ जँह तीरथ रहे सुहाए। मुनिन्ह सकल सादर करवाए॥
कृस सरीर मुनिपट परिधाना। सत समाज नित सुनहिं पुराना ।

barabasa rāja sutahi taba dīnhā| nāri sameta gavana bana kīnhā||
tīratha bara naimiṣa bikhyātā| ati punīta sādhaka sidhi dātā||
basahiṃ tahām̐ muni siddha samājā| taham̐ hiyam̐ haraṣi caleu manu rājā||
paṃtha jāta sohahiṃ matidhīrā| gyāna bhagati janu dhareṃ sarīrā||
pahum̐ce jāi dhenumati tīrā| haraṣi nahāne niramala nīrā||
āe milana siddha muni gyānī| dharama dhuraṃdhara nṛpariṣi jānī||
jaham̐ jam̐ha tīratha rahe suhāe| muninha sakala sādara karavāe||
kṛsa sarīra munipaṭa paridhānā| sata samāja nita sunahiṃ purānā |

दोहा 143
द्वादस अच्छर मंत्र पुनि जपहिं सहित अनुराग।
बासुदेव पद पंकरुह दंपति मन अति लाग॥143॥
dvādasa acchara maṃtra puni japahiṃ sahita anurāga|
bāsudeva pada paṃkaruha daṃpati mana ati lāga||143||
दोहा 144#

करहिं अहार साक फल कंदा। सुमिरहिं ब्रह्म सच्चिदानंदा॥
पुनि हरि हेतु करन तप लागे। बारि अधार मूल फल त्यागे॥
उर अभिलाष निंरंतर होई। देखअ नयन परम प्रभु सोई॥
अगुन अखंड अनंत अनादी। जेहि चिंतहिं परमारथबादी॥
नेति नेति जेहि बेद निरूपा। निजानंद निरुपाधि अनूपा॥
संभु बिरंचि बिष्नु भगवाना। उपजहिं जासु अंस तें नाना॥
ऐसेउ प्रभु सेवक बस अहई। भगत हेतु लीलातनु गहई॥
जौं यह बचन सत्य श्रुति भाषा। तौ हमार पूजहि अभिलाषा॥

karahiṃ ahāra sāka phala kaṃdā| sumirahiṃ brahma saccidānaṃdā||
puni hari hetu karana tapa lāge| bāri adhāra mūla phala tyāge||
ura abhilāṣa niṃraṃtara hoī| dekhaa nayana parama prabhu soī||
aguna akhaṃḍa anaṃta anādī| jehi ciṃtahiṃ paramārathabādī||
neti neti jehi beda nirūpā| nijānaṃda nirupādhi anūpā||
saṃbhu biraṃci biṣnu bhagavānā| upajahiṃ jāsu aṃsa teṃ nānā||
aiseu prabhu sevaka basa ahaī| bhagata hetu līlātanu gahaī||
jauṃ yaha bacana satya śruti bhāṣā| tau hamāra pūjahi abhilāṣā||

दोहा 144
एहि बिधि बीतें बरष षट सहस बारि आहार।
संबत सप्त सहस्त्र पुनि रहे समीर अधार॥144॥
ehi bidhi bīteṃ baraṣa ṣaṭa sahasa bāri āhāra|
saṃbata sapta sahastra puni rahe samīra adhāra||144||
दोहा 145#

बरष सहस दस त्यागेउ सोऊ। ठाढ़े रहे एक पद दोऊ॥
बिधि हरि तप देखि अपारा। मनु समीप आए बहु बारा॥
मागहु बर बहु भाँति लोभाए। परम धीर नहिं चलहिं चलाए॥
अस्थिमात्र होइ रहे सरीरा। तदपि मनाग मनहिं नहिं पीरा॥
प्रभु सर्बग्य दास निज जानी। गति अनन्य तापस नृप रानी॥
मागु मागु बरु भै नभ बानी। परम गभीर कृपामृत सानी॥
मृतक जिआवनि गिरा सुहाई। श्रबन रंध्र होइ उर जब आई॥
ह्रष्टपुष्ट तन भए सुहाए। मानहुँ अबहिं भवन ते आए॥

baraṣa sahasa dasa tyāgeu soū| ṭhāḍhe rahe eka pada doū||
bidhi hari tapa dekhi apārā| manu samīpa āe bahu bārā||
māgahu bara bahu bhām̐ti lobhāe| parama dhīra nahiṃ calahiṃ calāe||
asthimātra hoi rahe sarīrā| tadapi manāga manahiṃ nahiṃ pīrā||
prabhu sarbagya dāsa nija jānī| gati ananya tāpasa nṛpa rānī||
māgu māgu baru bhai nabha bānī| parama gabhīra kṛpāmṛta sānī||
mṛtaka jiāvani girā suhāī| śrabana raṃdhra hoi ura jaba āī||
hraṣṭapuṣṭa tana bhae suhāe| mānahum̐ abahiṃ bhavana te āe||

दोहा 145
श्रवन सुधा सम बचन सुनि पुलक प्रफुल्लित गात।
बोले मनु करि दंडवत प्रेम न हृदयँ समात॥145॥
śravana sudhā sama bacana suni pulaka praphullita gāta|
bole manu kari daṃḍavata prema na hṛdayam̐ samāta||145||
दोहा 146#

सुनु सेवक सुरतरु सुरधेनु। बिधि हरि हर बंदित पद रेनू॥
सेवत सुलभ सकल सुख दायक। प्रनतपाल सचराचर नायक॥
जौं अनाथ हित हम पर नेहू। तौ प्रसन्न होइ यह बर देहू॥
जो सरूप बस सिव मन माहीं। जेहि कारन मुनि जतन कराहीं॥
जो भुसुंडि मन मानस हंसा। सगुन अगुन जेहि निगम प्रसंसा॥
देखहिं हम सो रूप भरि लोचन। कृपा करहु प्रनतारति मोचन॥
दंपति बचन परम प्रिय लागे। मुदुल बिनीत प्रेम रस पागे॥
भगत बछल प्रभु कृपानिधाना। बिस्वबास प्रगटे भगवाना॥

sunu sevaka surataru suradhenu| bidhi hari hara baṃdita pada renū||
sevata sulabha sakala sukha dāyaka| pranatapāla sacarācara nāyaka||
jauṃ anātha hita hama para nehū| tau prasanna hoi yaha bara dehū||
jo sarūpa basa siva mana māhīṃ| jehi kārana muni jatana karāhīṃ||
jo bhusuṃḍi mana mānasa haṃsā| saguna aguna jehi nigama prasaṃsā||
dekhahiṃ hama so rūpa bhari locana| kṛpā karahu pranatārati mocana||
daṃpati bacana parama priya lāge| mudula binīta prema rasa pāge||
bhagata bachala prabhu kṛpānidhānā| bisvabāsa pragaṭe bhagavānā||

दोहा 146
नील सरोरुह नील मनि नील नीरधर स्याम।
लाजहिं तन सोभा निरखि कोटि कोटि सत काम॥146॥
nīla saroruha nīla mani nīla nīradhara syāma|
lājahiṃ tana sobhā nirakhi koṭi koṭi sata kāma||146||
दोहा 147#

सरद मयंक बदन छबि सींवा। चारु कपोल चिबुक दर ग्रीवा॥
अधर अरुन रद सुंदर नासा। बिधु कर निकर बिनिंदक हासा॥
नव अबुंज अंबक छबि नीकी। चितवनि ललित भावँती जी की॥
भुकुटि मनोज चाप छबि हारी। तिलक ललाट पटल दुतिकारी॥
कुंडल मकर मुकुट सिर भ्राजा। कुटिल केस जनु मधुप समाजा॥
उर श्रीबत्स रुचिर बनमाला। पदिक हार भूषन मनिजाला॥
केहरि कंधर चारु जनेउ। बाहु बिभूषन सुंदर तेऊ॥
करि कर सरि सुभग भुजदंडा। कटि निषंग कर सर कोदंडा॥

sarada mayaṃka badana chabi sīṃvā| cāru kapola cibuka dara grīvā||
adhara aruna rada suṃdara nāsā| bidhu kara nikara biniṃdaka hāsā||
nava abuṃja aṃbaka chabi nīkī| citavani lalita bhāvam̐tī jī kī||
bhukuṭi manoja cāpa chabi hārī| tilaka lalāṭa paṭala dutikārī||
kuṃḍala makara mukuṭa sira bhrājā| kuṭila kesa janu madhupa samājā||
ura śrībatsa rucira banamālā| padika hāra bhūṣana manijālā||
kehari kaṃdhara cāru janeu| bāhu bibhūṣana suṃdara teū||
kari kara sari subhaga bhujadaṃḍā| kaṭi niṣaṃga kara sara kodaṃḍā||

दोहा 147
तडित बिनिंदक पीत पट उदर रेख बर तीनि॥
नाभि मनोहर लेति जनु जमुन भवँर छबि छीनि॥147॥
taḍita biniṃdaka pīta paṭa udara rekha bara tīni||
nābhi manohara leti janu jamuna bhavam̐ra chabi chīni||147||
दोहा 148#

पद राजीव बरनि नहि जाहीं। मुनि मन मधुप बसहिं जेन्ह माहीं॥
बाम भाग सोभति अनुकूला। आदिसक्ति छबिनिधि जगमूला॥
जासु अंस उपजहिं गुनखानी। अगनित लच्छि उमा ब्रह्मानी॥
भृकुटि बिलास जासु जग होई। राम बाम दिसि सीता सोई॥
छबिसमुद्र हरि रूप बिलोकी। एकटक रहे नयन पट रोकी॥
चितवहिं सादर रूप अनूपा। तृप्ति न मानहिं मनु सतरूपा॥
हरष बिबस तन दसा भुलानी। परे दंड इव गहि पद पानी॥
सिर परसे प्रभु निज कर कंजा। तुरत उठाए करुनापुंजा॥

pada rājīva barani nahi jāhīṃ| muni mana madhupa basahiṃ jenha māhīṃ||
bāma bhāga sobhati anukūlā| ādisakti chabinidhi jagamūlā||
jāsu aṃsa upajahiṃ gunakhānī| aganita lacchi umā brahmānī||
bhṛkuṭi bilāsa jāsu jaga hoī| rāma bāma disi sītā soī||
chabisamudra hari rūpa bilokī| ekaṭaka rahe nayana paṭa rokī||
citavahiṃ sādara rūpa anūpā| tṛpti na mānahiṃ manu satarūpā||
haraṣa bibasa tana dasā bhulānī| pare daṃḍa iva gahi pada pānī||
sira parase prabhu nija kara kaṃjā| turata uṭhāe karunāpuṃjā||

दोहा 148
बोले कृपानिधान पुनि अति प्रसन्न मोहि जानि।
मागहु बर जोइ भाव मन महादानि अनुमानि॥148॥
bole kṛpānidhāna puni ati prasanna mohi jāni|
māgahu bara joi bhāva mana mahādāni anumāni||148||
दोहा 149#

सुनि प्रभु बचन जोरि जुग पानी। धरि धीरजु बोली मृदु बानी॥
नाथ देखि पद कमल तुम्हारे। अब पूरे सब काम हमारे॥
एक लालसा बड़ि उर माही। सुगम अगम कहि जात सो नाहीं॥
तुम्हहि देत अति सुगम गोसाईं। अगम लाग मोहि निज कृपनाईं॥
जथा दरिद्र बिबुधतरु पाई। बहु संपति मागत सकुचाई॥
तासु प्रभा जान नहिं सोई। तथा हृदयँ मम संसय होई॥
सो तुम्ह जानहु अंतरजामी। पुरवहु मोर मनोरथ स्वामी॥
सकुच बिहाइ मागु नृप मोहि। मोरें नहिं अदेय कछु तोही॥

suni prabhu bacana jori juga pānī| dhari dhīraju bolī mṛdu bānī||
nātha dekhi pada kamala tumhāre| aba pūre saba kāma hamāre||
eka lālasā baḍi ura māhī| sugama agama kahi jāta so nāhīṃ||
tumhahi deta ati sugama gosāīṃ| agama lāga mohi nija kṛpanāīṃ||
jathā daridra bibudhataru pāī| bahu saṃpati māgata sakucāī||
tāsu prabhā jāna nahiṃ soī| tathā hṛdayam̐ mama saṃsaya hoī||
so tumha jānahu aṃtarajāmī| puravahu mora manoratha svāmī||
sakuca bihāi māgu nṛpa mohi| moreṃ nahiṃ adeya kachu tohī||

दोहा 149
दानि सिरोमनि कृपानिधि नाथ कहउँ सतिभाउ॥
चाहउँ तुम्हहि समान सुत प्रभु सन कवन दुराउ॥149॥
dāni siromani kṛpānidhi nātha kahaum̐ satibhāu||
cāhaum̐ tumhahi samāna suta prabhu sana kavana durāu||149||
दोहा 150#

देखि प्रीति सुनि बचन अमोले। एवमस्तु करुनानिधि बोले॥
आपु सरिस खोजौं कहँ जाई। नृप तव तनय होब मैं आई॥
सतरूपहि बिलोकि कर जोरें। देबि मागु बरु जो रुचि तोरे॥
जो बरु नाथ चतुर नृप मागा। सोइ कृपाल मोहि अति प्रिय लागा॥
प्रभु परंतु सुठि होति ढिठाई। जदपि भगत हित तुम्हहि सोहाई॥
तुम्ह ब्रह्मादि जनक जग स्वामी। ब्रह्म सकल उर अंतरजामी॥
अस समुझत मन संसय होई। कहा जो प्रभु प्रवान पुनि सोई॥
जे निज भगत नाथ तव अहहीं। जो सुख पावहिं जो गति लहहीं॥

dekhi prīti suni bacana amole| evamastu karunānidhi bole||
āpu sarisa khojauṃ kaham̐ jāī| nṛpa tava tanaya hoba maiṃ āī||
satarūpahi biloki kara joreṃ| debi māgu baru jo ruci tore||
jo baru nātha catura nṛpa māgā| soi kṛpāla mohi ati priya lāgā||
prabhu paraṃtu suṭhi hoti ḍhiṭhāī| jadapi bhagata hita tumhahi sohāī||
tumha brahmādi janaka jaga svāmī| brahma sakala ura aṃtarajāmī||
asa samujhata mana saṃsaya hoī| kahā jo prabhu pravāna puni soī||
je nija bhagata nātha tava ahahīṃ| jo sukha pāvahiṃ jo gati lahahīṃ||

दोहा 150
सोइ सुख सोइ गति सोइ भगति सोइ निज चरन सनेहु॥
सोइ बिबेक सोइ रहनि प्रभु हमहि कृपा करि देहु॥150॥
soi sukha soi gati soi bhagati soi nija carana sanehu||
soi bibeka soi rahani prabhu hamahi kṛpā kari dehu||150||
सोरठा 151#

सुनु मृदु गूढ़ रुचिर बर रचना। कृपासिंधु बोले मृदु बचना॥
जो कछु रुचि तुम्हेर मन माहीं। मैं सो दीन्ह सब संसय नाहीं॥
मातु बिबेक अलोकिक तोरें। कबहुँ न मिटिहि अनुग्रह मोरें ।
बंदि चरन मनु कहेउ बहोरी। अवर एक बिनति प्रभु मोरी॥
सुत बिषइक तव पद रति होऊ। मोहि बड़ मूढ़ कहै किन कोऊ॥
मनि बिनु फनि जिमि जल बिनु मीना। मम जीवन तिमि तुम्हहि अधीना॥
अस बरु मागि चरन गहि रहेऊ। एवमस्तु करुनानिधि कहेऊ॥
अब तुम्ह मम अनुसासन मानी। बसहु जाइ सुरपति रजधानी॥

sunu mṛdu gūḍha rucira bara racanā| kṛpāsiṃdhu bole mṛdu bacanā||
jo kachu ruci tumhera mana māhīṃ| maiṃ so dīnha saba saṃsaya nāhīṃ||
mātu bibeka alokika toreṃ| kabahum̐ na miṭihi anugraha moreṃ |
baṃdi carana manu kaheu bahorī| avara eka binati prabhu morī||
suta biṣaika tava pada rati hoū| mohi baḍa mūḍha kahai kina koū||
mani binu phani jimi jala binu mīnā| mama jīvana timi tumhahi adhīnā||
asa baru māgi carana gahi raheū| evamastu karunānidhi kaheū||
aba tumha mama anusāsana mānī| basahu jāi surapati rajadhānī||

सोरठा 151
तहँ करि भोग बिसाल तात गउँ कछु काल पुनि।
होइहहु अवध भुआल तब मैं होब तुम्हार सुत॥151॥
taham̐ kari bhoga bisāla tāta gaum̐ kachu kāla puni|
hoihahu avadha bhuāla taba maiṃ hoba tumhāra suta||151||
दोहा 152#

इच्छामय नरबेष सँवारें। होइहउँ प्रगट निकेत तुम्हारे॥
अंसन्ह सहित देह धरि ताता। करिहउँ चरित भगत सुखदाता॥
जे सुनि सादर नर बड़भागी। भव तरिहहिं ममता मद त्यागी॥
आदिसक्ति जेहिं जग उपजाया। सोउ अवतरिहि मोरि यह माया॥
पुरउब मैं अभिलाष तुम्हारा। सत्य सत्य पन सत्य हमारा॥
पुनि पुनि अस कहि कृपानिधाना। अंतरधान भए भगवाना॥
दंपति उर धरि भगत कृपाला। तेहिं आश्रम निवसे कछु काला॥
समय पाइ तनु तजि अनयासा। जाइ कीन्ह अमरावति बासा॥

icchāmaya narabeṣa sam̐vāreṃ| hoihaum̐ pragaṭa niketa tumhāre||
aṃsanha sahita deha dhari tātā| karihaum̐ carita bhagata sukhadātā||
je suni sādara nara baḍabhāgī| bhava tarihahiṃ mamatā mada tyāgī||
ādisakti jehiṃ jaga upajāyā| sou avatarihi mori yaha māyā||
purauba maiṃ abhilāṣa tumhārā| satya satya pana satya hamārā||
puni puni asa kahi kṛpānidhānā| aṃtaradhāna bhae bhagavānā||
daṃpati ura dhari bhagata kṛpālā| tehiṃ āśrama nivase kachu kālā||
samaya pāi tanu taji anayāsā| jāi kīnha amarāvati bāsā||

दोहा 152
यह इतिहास पुनीत अति उमहि कही बृषकेतु।
भरद्वाज सुनु अपर पुनि राम जनम कर हेतु॥152॥
yaha itihāsa punīta ati umahi kahī bṛṣaketu|
bharadvāja sunu apara puni rāma janama kara hetu||152||
मासपारायण, पाँचवाँ विश्रामDay 5 of the 30-day Masparayan ends here

Completed Bal Kand — Part 5?

Mark Masparayan day 5 done, light a diya, or share the path with family.

Text: the Gita Press edition of Shri Ramcharitmanas, checked against two independent transcriptions. Spotted an error? Suggest a correction.

Bal Kand — Part 5 — text

Completed Bal Kand — Part 5?