Ramcharitmanas Ayodhya Kand Part 3 (Doha 61–93)

दोहा 61#

मातु समीप कहत सकुचाहीं। बोले समउ समुझि मन माहीं॥
राजकुमारि सिखावन सुनहू। आन भाँति जियँ जनि कछु गुनहू॥
आपन मोर नीक जौं चहहू। बचनु हमार मानि गृह रहहू॥
आयसु मोर सासु सेवकाई। सब बिधि भामिनि भवन भलाई॥
एहि ते अधिक धरम नहिं दूजा। सादर सासु ससुर पद पूजा॥
जब जब मातु करिहि सुधि मोरी। होइहि प्रेम बिकल मति भारी॥
तब तब तुम्ह कहि कथा पुरानी। सुंदरि समुझाएहु मृदु बानी॥
कहउँ सुभायँ सपथ सत मोही। सुमुखि मातु हित राखउँ तोही॥

mātu samīpa kahata sakucāhīṃ| bole samau samujhi mana māhīṃ||
rājakumāri sikhāvana sunahū| āna bhām̐ti jiyam̐ jani kachu gunahū||
āpana mora nīka jauṃ cahahū| bacanu hamāra māni gṛha rahahū||
āyasu mora sāsu sevakāī| saba bidhi bhāmini bhavana bhalāī||
ehi te adhika dharama nahiṃ dūjā| sādara sāsu sasura pada pūjā||
jaba jaba mātu karihi sudhi morī| hoihi prema bikala mati bhārī||
taba taba tumha kahi kathā purānī| suṃdari samujhāehu mṛdu bānī||
kahaum̐ subhāyam̐ sapatha sata mohī| sumukhi mātu hita rākhaum̐ tohī||

दोहा 61
गुर श्रुति संमत धरम फलु पाइअ बिनहिं कलेस।
हठ बस सब संकट सहे गालव नहुष नरेस॥61॥
gura śruti saṃmata dharama phalu pāia binahiṃ kalesa|
haṭha basa saba saṃkaṭa sahe gālava nahuṣa naresa||61||
दोहा 62#

मैं पुनि करि प्रवान पितु बानी। बेगि फिरब सुनु सुमुखि सयानी॥
दिवस जात नहिं लागिहि बारा। सुंदरि सिखवनु सुनहु हमारा॥
जौं हठ करहु प्रेम बस बामा। तौ तुम्ह दुख पाउब परिनामा॥
काननु कठिन भयंकरु भारी। घोर घामु हिम बारि बयारी॥
कुस कंटक मग काँकर नाना। चलब पयादेहिं बिनु पदत्राना॥
चरन कमल मृदु मंजु तुम्हारे। मारग अगम भूमिधर भारे॥
कंदर खोह नदीं नद नारे। अगम अगाध न जाहिं निहारे॥
भालु बाघ बृक केहरि नागा। करहिं नाद सुनि धीरजु भागा॥

maiṃ puni kari pravāna pitu bānī| begi phiraba sunu sumukhi sayānī||
divasa jāta nahiṃ lāgihi bārā| suṃdari sikhavanu sunahu hamārā||
jauṃ haṭha karahu prema basa bāmā| tau tumha dukha pāuba parināmā||
kānanu kaṭhina bhayaṃkaru bhārī| ghora ghāmu hima bāri bayārī||
kusa kaṃṭaka maga kām̐kara nānā| calaba payādehiṃ binu padatrānā||
carana kamala mṛdu maṃju tumhāre| māraga agama bhūmidhara bhāre||
kaṃdara khoha nadīṃ nada nāre| agama agādha na jāhiṃ nihāre||
bhālu bāgha bṛka kehari nāgā| karahiṃ nāda suni dhīraju bhāgā||

दोहा 62
भूमि सयन बलकल बसन असनु कंद फल मूल।
ते कि सदा सब दिन मिलहिं सबुइ समय अनुकूल॥62॥
bhūmi sayana balakala basana asanu kaṃda phala mūla|
te ki sadā saba dina milahiṃ sabui samaya anukūla||62||
दोहा 63#

नर अहार रजनीचर चरहीं। कपट बेष बिधि कोटिक करहीं॥
लागइ अति पहार कर पानी। बिपिन बिपति नहिं जाइ बखानी॥
ब्याल कराल बिहग बन घोरा। निसिचर निकर नारि नर चोरा॥
डरपहिं धीर गहन सुधि आएँ। मृगलोचनि तुम्ह भीरु सुभाएँ॥
हंसगवनि तुम्ह नहिं बन जोगू। सुनि अपजसु मोहि देइहि लोगू॥
मानस सलिल सुधाँ प्रतिपाली। जिअइ कि लवन पयोधि मराली॥
नव रसाल बन बिहरनसीला। सोह कि कोकिल बिपिन करीला॥
रहहु भवन अस हृदयँ बिचारी। चंदबदनि दुखु कानन भारी॥

nara ahāra rajanīcara carahīṃ| kapaṭa beṣa bidhi koṭika karahīṃ||
lāgai ati pahāra kara pānī| bipina bipati nahiṃ jāi bakhānī||
byāla karāla bihaga bana ghorā| nisicara nikara nāri nara corā||
ḍarapahiṃ dhīra gahana sudhi āem̐| mṛgalocani tumha bhīru subhāem̐||
haṃsagavani tumha nahiṃ bana jogū| suni apajasu mohi deihi logū||
mānasa salila sudhām̐ pratipālī| jiai ki lavana payodhi marālī||
nava rasāla bana biharanasīlā| soha ki kokila bipina karīlā||
rahahu bhavana asa hṛdayam̐ bicārī| caṃdabadani dukhu kānana bhārī||

दोहा 63
सहज सुहृद गुर स्वामि सिख जो न करइ सिर मानि॥
सो पछिताइ अघाइ उर अवसि होइ हित हानि॥63॥
sahaja suhṛda gura svāmi sikha jo na karai sira māni||
so pachitāi aghāi ura avasi hoi hita hāni||63||
दोहा 64#

सुनि मृदु बचन मनोहर पिय के। लोचन ललित भरे जल सिय के॥
सीतल सिख दाहक भइ कैसें। चकइहि सरद चंद निसि जैसें॥
उतरु न आव बिकल बैदेही। तजन चहत सुचि स्वामि सनेही॥
बरबस रोकि बिलोचन बारी। धरि धीरजु उर अवनिकुमारी॥
लागि सासु पग कह कर जोरी। छमबि देबि बड़ि अबिनय मोरी॥
दीन्हि प्रानपति मोहि सिख सोई। जेहि बिधि मोर परम हित होई॥
मैं पुनि समुझि दीख मन माहीं। पिय बियोग सम दुख जग नाहीं॥

suni mṛdu bacana manohara piya ke| locana lalita bhare jala siya ke||
sītala sikha dāhaka bhai kaiseṃ| cakaihi sarada caṃda nisi jaiseṃ||
utaru na āva bikala baidehī| tajana cahata suci svāmi sanehī||
barabasa roki bilocana bārī| dhari dhīraju ura avanikumārī||
lāgi sāsu paga kaha kara jorī| chamabi debi baḍi abinaya morī||
dīnhi prānapati mohi sikha soī| jehi bidhi mora parama hita hoī||
maiṃ puni samujhi dīkha mana māhīṃ| piya biyoga sama dukha jaga nāhīṃ||

दोहा 64
प्राननाथ करुनायतन सुंदर सुखद सुजान।
तुम्ह बिनु रघुकुल कुमुद बिधु सुरपुर नरक समान॥64॥
prānanātha karunāyatana suṃdara sukhada sujāna|
tumha binu raghukula kumuda bidhu surapura naraka samāna||64||
दोहा 65#

मातु पिता भगिनी प्रिय भाई। प्रिय परिवार सुह्रद समुदाई॥
सासु ससुर गुर सजन सहाई। सुत सुंदर सुसील सुखदाई॥
जहँ लगि नाथ नेह अरु नाते। पिय बिनु तियहि तरनिहु ते ताते॥
तनु धनु धाम धरनि पुर राजू। पति बिहीन सबु सोक समाजू॥
भोग रोगसम भूषन भारू। जम जातना सरिस संसारू॥
प्राननाथ तुम्ह बिनु जग माहीं। मो कहुँ सुखद कतहुँ कछु नाहीं॥
जिय बिनु देह नदी बिनु बारी। तैसिअ नाथ पुरुष बिनु नारी॥
नाथ सकल सुख साथ तुम्हारे। सरद बिमल बिधु बदन निहारे॥

mātu pitā bhaginī priya bhāī| priya parivāra suhrada samudāī||
sāsu sasura gura sajana sahāī| suta suṃdara susīla sukhadāī||
jaham̐ lagi nātha neha aru nāte| piya binu tiyahi taranihu te tāte||
tanu dhanu dhāma dharani pura rājū| pati bihīna sabu soka samājū||
bhoga rogasama bhūṣana bhārū| jama jātanā sarisa saṃsārū||
prānanātha tumha binu jaga māhīṃ| mo kahum̐ sukhada katahum̐ kachu nāhīṃ||
jiya binu deha nadī binu bārī| taisia nātha puruṣa binu nārī||
nātha sakala sukha sātha tumhāre| sarada bimala bidhu badana nihāre||

दोहा 65
खग मृग परिजन नगरु बनु बलकल बिमल दुकूल।
नाथ साथ सुरसदन सम परनसाल सुख मूल॥65॥
khaga mṛga parijana nagaru banu balakala bimala dukūla|
nātha sātha surasadana sama paranasāla sukha mūla||65||
दोहा 66#

बनदेवीं बनदेव उदारा। करिहहिं सासु ससुर सम सारा॥
कुस किसलय साथरी सुहाई। प्रभु सँग मंजु मनोज तुराई॥
कंद मूल फल अमिअ अहारू। अवध सौध सत सरिस पहारू॥
छिनु छिनु प्रभु पद कमल बिलोकि। रहिहउँ मुदित दिवस जिमि कोकी॥
बन दुख नाथ कहे बहुतेरे। भय बिषाद परिताप घनेरे॥
प्रभु बियोग लवलेस समाना। सब मिलि होहिं न कृपानिधाना॥
अस जियँ जानि सुजान सिरोमनि। लेइअ संग मोहि छाड़िअ जनि॥
बिनती बहुत करउँ का स्वामी। करुनामय उर अंतरजामी॥

banadevīṃ banadeva udārā| karihahiṃ sāsu sasura sama sārā||
kusa kisalaya sātharī suhāī| prabhu sam̐ga maṃju manoja turāī||
kaṃda mūla phala amia ahārū| avadha saudha sata sarisa pahārū||
chinu chinu prabhu pada kamala biloki| rahihaum̐ mudita divasa jimi kokī||
bana dukha nātha kahe bahutere| bhaya biṣāda paritāpa ghanere||
prabhu biyoga lavalesa samānā| saba mili hohiṃ na kṛpānidhānā||
asa jiyam̐ jāni sujāna siromani| leia saṃga mohi chāḍia jani||
binatī bahuta karaum̐ kā svāmī| karunāmaya ura aṃtarajāmī||

दोहा 66
राखिअ अवध जो अवधि लगि रहत न जनिअहिं प्रान।
दीनबंधु सुंदर सुखद सील सनेह निधान॥66॥
rākhia avadha jo avadhi lagi rahata na janiahiṃ prāna|
dīnabaṃdhu suṃdara sukhada sīla saneha nidhāna||66||
दोहा 67#

मोहि मग चलत न होइहि हारी। छिनु छिनु चरन सरोज निहारी॥
सबहि भाँति पिय सेवा करिहौं। मारग जनित सकल श्रम हरिहौं॥
पाय पखारि बैठि तरु छाहीं। करिहउँ बाउ मुदित मन माहीं॥
श्रम कन सहित स्याम तनु देखें। कहँ दुख समउ प्रानपति पेखें॥
सम महि तृन तरुपल्लव डासी। पाय पलोटिहि सब निसि दासी॥
बारबार मृदु मूरति जोही। लागिहि तात बयारि न मोही।
को प्रभु सँग मोहि चितवनिहारा। सिंघबधुहि जिमि ससक सिआरा॥
मैं सुकुमारि नाथ बन जोगू। तुम्हहि उचित तप मो कहुँ भोगू॥

mohi maga calata na hoihi hārī| chinu chinu carana saroja nihārī||
sabahi bhām̐ti piya sevā karihauṃ| māraga janita sakala śrama harihauṃ||
pāya pakhāri baiṭhi taru chāhīṃ| karihaum̐ bāu mudita mana māhīṃ||
śrama kana sahita syāma tanu dekheṃ| kaham̐ dukha samau prānapati pekheṃ||
sama mahi tṛna tarupallava ḍāsī| pāya paloṭihi saba nisi dāsī||
bārabāra mṛdu mūrati johī| lāgihi tāta bayāri na mohī|
ko prabhu sam̐ga mohi citavanihārā| siṃghabadhuhi jimi sasaka siārā||
maiṃ sukumāri nātha bana jogū| tumhahi ucita tapa mo kahum̐ bhogū||

दोहा 67
ऐसेउ बचन कठोर सुनि जौं न ह्रदउ बिलगान।
तौ प्रभु बिषम बियोग दुख सहिहहिं पावँर प्रान॥67॥
aiseu bacana kaṭhora suni jauṃ na hradau bilagāna|
tau prabhu biṣama biyoga dukha sahihahiṃ pāvam̐ra prāna||67||
दोहा 68#

अस कहि सीय बिकल भइ भारी। बचन बियोग न सकी सँभारी॥
देखि दसा रघुपति जियँ जाना। हठि राखें नहिं राखिहि प्राना॥
कहेउ कृपाल भानुकुलनाथा। परिहरि सोच चलहु बन साथा॥
नहिं बिषाद कर अवसर आजू। बेगि करहु बन गवन समाजू॥
कहि प्रिय बचन प्रिया समुझाई। लगे मातु पद आसिष पाई॥
बेगि प्रजा दुख मेटब आई। जननी निठुर बिसरि जनि जाई॥
फिरहि दसा बिधि बहुरि कि मोरी। देखिहउँ नयन मनोहर जोरी॥
सुदिन सुघरी तात कब होइहि। जननी जिअत बदन बिधु जोइहि॥

asa kahi sīya bikala bhai bhārī| bacana biyoga na sakī sam̐bhārī||
dekhi dasā raghupati jiyam̐ jānā| haṭhi rākheṃ nahiṃ rākhihi prānā||
kaheu kṛpāla bhānukulanāthā| parihari soca calahu bana sāthā||
nahiṃ biṣāda kara avasara ājū| begi karahu bana gavana samājū||
kahi priya bacana priyā samujhāī| lage mātu pada āsiṣa pāī||
begi prajā dukha meṭaba āī| jananī niṭhura bisari jani jāī||
phirahi dasā bidhi bahuri ki morī| dekhihaum̐ nayana manohara jorī||
sudina sugharī tāta kaba hoihi| jananī jiata badana bidhu joihi||

दोहा 68
बहुरि बच्छ कहि लालु कहि रघुपति रघुबर तात।
कबहिं बोलाइ लगाइ हियँ हरषि निरखिहउँ गात॥68॥
bahuri baccha kahi lālu kahi raghupati raghubara tāta|
kabahiṃ bolāi lagāi hiyam̐ haraṣi nirakhihaum̐ gāta||68||
दोहा 69#

लखि सनेह कातरि महतारी। बचनु न आव बिकल भइ भारी॥
राम प्रबोधु कीन्ह बिधि नाना। समउ सनेह न जाइ बखाना॥
तब जानकी सासु पग लागी। सुनिअ माय मैं परम अभागी॥
सेवा समय दैअँ बनु दीन्हा। मोर मनोरथ सफल न कीन्हा॥
तजब छोभु जनि छाड़िअ छोहू। करम कठिन कछु दोसु न मोहू॥
सुनि सिय बचन सासु अकुलानी। दसा कवनि बिधि कहउँ बखानी॥
बारहिं बार लाइ उर लीन्ही। धरि धीरजु सिख आसिष दीन्ही॥
अचल होउ अहिवात तुम्हारा। जब लगि गंग जमुन जल धारा॥

lakhi saneha kātari mahatārī| bacanu na āva bikala bhai bhārī||
rāma prabodhu kīnha bidhi nānā| samau saneha na jāi bakhānā||
taba jānakī sāsu paga lāgī| sunia māya maiṃ parama abhāgī||
sevā samaya daiam̐ banu dīnhā| mora manoratha saphala na kīnhā||
tajaba chobhu jani chāḍia chohū| karama kaṭhina kachu dosu na mohū||
suni siya bacana sāsu akulānī| dasā kavani bidhi kahaum̐ bakhānī||
bārahiṃ bāra lāi ura līnhī| dhari dhīraju sikha āsiṣa dīnhī||
acala hou ahivāta tumhārā| jaba lagi gaṃga jamuna jala dhārā||

दोहा 69
सीतहि सासु असीस सिख दीन्हि अनेक प्रकार।
चली नाइ पद पदुम सिरु अति हित बारहिं बार॥69॥
sītahi sāsu asīsa sikha dīnhi aneka prakāra|
calī nāi pada paduma siru ati hita bārahiṃ bāra||69||
दोहा 70#

समाचार जब लछिमन पाए। ब्याकुल बिलख बदन उठि धाए॥
कंप पुलक तन नयन सनीरा। गहे चरन अति प्रेम अधीरा॥
कहि न सकत कछु चितवत ठाढ़े। मीनु दीन जनु जल तें काढ़े॥
सोच हृदयँ बिधि का होनिहारा। सब सुख सुकृत सिरान हमारा॥
मो कह काह कहब रघुनाथा। रखिहहिं भवन कि लेहहिं साथा॥
राम बिलोकि बंधु कर जोरें। देह गेह सब सन तृनु तोरें॥
बोले बचन राम नय नागर। सील सनेह सरल सुख सागर॥
तात प्रेम बस जनि कदराहू। समुझि हृदयँ परिनाम उछाहू॥

samācāra jaba lachimana pāe| byākula bilakha badana uṭhi dhāe||
kaṃpa pulaka tana nayana sanīrā| gahe carana ati prema adhīrā||
kahi na sakata kachu citavata ṭhāḍhe| mīnu dīna janu jala teṃ kāḍhe||
soca hṛdayam̐ bidhi kā honihārā| saba sukha sukṛta sirāna hamārā||
mo kaha kāha kahaba raghunāthā| rakhihahiṃ bhavana ki lehahiṃ sāthā||
rāma biloki baṃdhu kara joreṃ| deha geha saba sana tṛnu toreṃ||
bole bacana rāma naya nāgara| sīla saneha sarala sukha sāgara||
tāta prema basa jani kadarāhū| samujhi hṛdayam̐ parināma uchāhū||

दोहा 70
मातु पिता गुरु स्वामि सिख सिर धरि करहिं सुभायँ।
लहेउ लाभ तिन्ह जनम कर नतरु जनम जग जायँ॥70॥
mātu pitā guru svāmi sikha sira dhari karahiṃ subhāyam̐|
laheu lābha tinha janama kara nataru janama jaga jāyam̐||70||
दोहा 71#

अस जियँ जानि सुनहु सिख भाई। करहु मातु पितु पद सेवकाई॥
भवन भरत रिपुसूदन नाहीं। राउ बृद्ध मम दुख मन माहीं॥
मैं बन जाउँ तुम्हहि लेइ साथा। होइ सबहि बिधि अवध अनाथा॥
गुरु पितु मातु प्रजा परिवारू। सब कहुँ परइ दुसह दुख भारू॥
रहहु करहु सब कर परितोषू। नतरु तात होइहि बड़ दोषू॥
जासु राज प्रिय प्रजा दुखारी। सो नृपु अवसि नरक अधिकारी॥
रहहु तात अस नीति बिचारी। सुनत लखनु भए ब्याकुल भारी॥
सिअरें बचन सूखि गए कैसें। परसत तुहिन तामरसु जैसें॥

asa jiyam̐ jāni sunahu sikha bhāī| karahu mātu pitu pada sevakāī||
bhavana bharata ripusūdana nāhīṃ| rāu bṛddha mama dukha mana māhīṃ||
maiṃ bana jāum̐ tumhahi lei sāthā| hoi sabahi bidhi avadha anāthā||
guru pitu mātu prajā parivārū| saba kahum̐ parai dusaha dukha bhārū||
rahahu karahu saba kara paritoṣū| nataru tāta hoihi baḍa doṣū||
jāsu rāja priya prajā dukhārī| so nṛpu avasi naraka adhikārī||
rahahu tāta asa nīti bicārī| sunata lakhanu bhae byākula bhārī||
siareṃ bacana sūkhi gae kaiseṃ| parasata tuhina tāmarasu jaiseṃ||

दोहा 71
उतरु न आवत प्रेम बस गहे चरन अकुलाइ।
नाथ दास मैं स्वामि तुम्ह तजहु त काह बसाइ॥71॥
utaru na āvata prema basa gahe carana akulāi|
nātha dāsa maiṃ svāmi tumha tajahu ta kāha basāi||71||
दोहा 72#

दीन्हि मोहि सिख नीकि गोसाईं। लागि अगम अपनी कदराई॥
नरबर धीर धरम धुर धारी। निगम नीति कहुँ ते अधिकारी॥
मैं सिसु प्रभु सनेह प्रतिपाला। मंदरु मेरु कि लेहिं मराला॥
गुर पितु मातु न जानउँ काहू। कहउँ सुभाउ नाथ पतिआहू॥
जहँ लगि जगत सनेह सगाई। प्रीति प्रतीति निगम निजु गाई॥
मोरें सबइ एक तुम्ह स्वामी। दीनबंधु उर अंतरजामी॥
धरम नीति उपदेसिअ ताही। कीरति भूति सुगति प्रिय जाही॥
मन क्रम बचन चरन रत होई। कृपासिंधु परिहरिअ कि सोई॥

dīnhi mohi sikha nīki gosāīṃ| lāgi agama apanī kadarāī||
narabara dhīra dharama dhura dhārī| nigama nīti kahum̐ te adhikārī||
maiṃ sisu prabhu saneha pratipālā| maṃdaru meru ki lehiṃ marālā||
gura pitu mātu na jānaum̐ kāhū| kahaum̐ subhāu nātha patiāhū||
jaham̐ lagi jagata saneha sagāī| prīti pratīti nigama niju gāī||
moreṃ sabai eka tumha svāmī| dīnabaṃdhu ura aṃtarajāmī||
dharama nīti upadesia tāhī| kīrati bhūti sugati priya jāhī||
mana krama bacana carana rata hoī| kṛpāsiṃdhu pariharia ki soī||

दोहा 72
करुनासिंधु सुबंधु के सुनि मृदु बचन बिनीत।
समुझाए उर लाइ प्रभु जानि सनेह सभीत॥72॥
karunāsiṃdhu subaṃdhu ke suni mṛdu bacana binīta|
samujhāe ura lāi prabhu jāni saneha sabhīta||72||
दोहा 73#

मागहु बिदा मातु सन जाई। आवहु बेगि चलहु बन भाई॥
मुदित भए सुनि रघुबर बानी। भयउ लाभ बड़ गइ बड़ि हानी॥
हरषित हृदयँ मातु पहिं आए। मनहुँ अंध फिरि लोचन पाए।
जाइ जननि पग नायउ माथा। मन रघुनंदन जानकि साथा॥
पूछे मातु मलिन मन देखी। लखन कही सब कथा बिसेषी॥
गई सहमि सुनि बचन कठोरा। मृगी देखि दव जनु चहुँ ओरा॥
लखन लखेउ भा अनरथ आजू। एहिं सनेह बस करब अकाजू॥
मागत बिदा सभय सकुचाहीं। जाइ संग बिधि कहिहि कि नाहीं॥

māgahu bidā mātu sana jāī| āvahu begi calahu bana bhāī||
mudita bhae suni raghubara bānī| bhayau lābha baḍa gai baḍi hānī||
haraṣita hṛdayam̐ mātu pahiṃ āe| manahum̐ aṃdha phiri locana pāe|
jāi janani paga nāyau māthā| mana raghunaṃdana jānaki sāthā||
pūche mātu malina mana dekhī| lakhana kahī saba kathā biseṣī||
gaī sahami suni bacana kaṭhorā| mṛgī dekhi dava janu cahum̐ orā||
lakhana lakheu bhā anaratha ājū| ehiṃ saneha basa karaba akājū||
māgata bidā sabhaya sakucāhīṃ| jāi saṃga bidhi kahihi ki nāhīṃ||

दोहा 73
समुझि सुमित्राँ राम सिय रूप सुसीलु सुभाउ।
नृप सनेह लखि धुनेउ सिर पापिनि दीन्ह कुदाउ॥73॥
samujhi sumitrām̐ rāma siya rūpa susīlu subhāu|
nṛpa saneha lakhi dhuneu sira pāpini dīnha kudāu||73||
दोहा 74#

धीरजु धरेउ कुअवसर जानी। सहज सुहृद बोली मृदु बानी॥
तात तुम्हारि मातु बैदेही। पिता राम सब भाँति सनेही॥
अवध तहाँ जहँ राम निवासू। तहँइँ दिवसु जहँ भानु प्रकासू॥
जौं पै सीय राम बन जाहीं। अवध तुम्हार काज कछु नाहीं॥
गुर पितु मातु बंधु सुर साईं। सेइअहिं सकल प्रान की नाईं॥
रामु प्रानप्रिय जीवन जी के। स्वारथ रहित सखा सबही के॥
पूजनीय प्रिय परम जहाँ ते। सब मानिअहिं राम के नातें॥
अस जियँ जानि संग बन जाहू। लेहु तात जग जीवन लाहू॥

dhīraju dhareu kuavasara jānī| sahaja suhṛda bolī mṛdu bānī||
tāta tumhāri mātu baidehī| pitā rāma saba bhām̐ti sanehī||
avadha tahām̐ jaham̐ rāma nivāsū| taham̐im̐ divasu jaham̐ bhānu prakāsū||
jauṃ pai sīya rāma bana jāhīṃ| avadha tumhāra kāja kachu nāhīṃ||
gura pitu mātu baṃdhu sura sāīṃ| seiahiṃ sakala prāna kī nāīṃ||
rāmu prānapriya jīvana jī ke| svāratha rahita sakhā sabahī ke||
pūjanīya priya parama jahām̐ te| saba māniahiṃ rāma ke nāteṃ||
asa jiyam̐ jāni saṃga bana jāhū| lehu tāta jaga jīvana lāhū||

दोहा 74
भूरि भाग भाजनु भयहु मोहि समेत बलि जाउँ।
जौं तुम्हरें मन छाड़ि छलु कीन्ह राम पद ठाउँ॥74॥
bhūri bhāga bhājanu bhayahu mohi sameta bali jāum̐|
jauṃ tumhareṃ mana chāḍi chalu kīnha rāma pada ṭhāum̐||74||
सोरठा 75#

पुत्रवती जुबती जग सोई। रघुपति भगत जासु सुत होई॥
नतरु बाँझ भलि बादि बिआनी। राम बिमुख सुत तें हित जानी॥
तुम्हरेहिं भाग राम बन जाहीं। दूसर हेतु तात कछु नाहीं॥
सकल सुकृत कर बड़ फल एहू। राम सीय पद सहज सनेहू॥
राग रोष इरिषा मद मोहू। जनि सपनेहुँ इन्ह के बस होहू॥
सकल प्रकार बिकार बिहाई। मन क्रम बचन करेहु सेवकाई॥
तुम्ह कहुँ बन सब भाँति सुपासू। सँग पितु मातु रामु सिय जासू॥
जेहि न राम बन लहहिं कलेसू। सुत सोइ करेहु इहइ उपदेसू॥

putravatī jubatī jaga soī| raghupati bhagata jāsu suta hoī||
nataru bām̐jha bhali bādi biānī| rāma bimukha suta teṃ hita jānī||
tumharehiṃ bhāga rāma bana jāhīṃ| dūsara hetu tāta kachu nāhīṃ||
sakala sukṛta kara baḍa phala ehū| rāma sīya pada sahaja sanehū||
rāga roṣa iriṣā mada mohū| jani sapanehum̐ inha ke basa hohū||
sakala prakāra bikāra bihāī| mana krama bacana karehu sevakāī||
tumha kahum̐ bana saba bhām̐ti supāsū| sam̐ga pitu mātu rāmu siya jāsū||
jehi na rāma bana lahahiṃ kalesū| suta soi karehu ihai upadesū||

छंद
उपदेसु यहु जेहिं तात तुम्हरे राम सिय सुख पावहीं।
पितु मातु प्रिय परिवार पुर सुख सुरति बन बिसरावहीं।
तुलसी प्रभुहि सिख देइ आयसु दीन्ह पुनि आसिष दई।
रति होउ अबिरल अमल सिय रघुबीर पद नित नित नई॥
upadesu yahu jehiṃ tāta tumhare rāma siya sukha pāvahīṃ|
pitu mātu priya parivāra pura sukha surati bana bisarāvahīṃ|
tulasī prabhuhi sikha dei āyasu dīnha puni āsiṣa daī|
rati hou abirala amala siya raghubīra pada nita nita naī||

सोरठा 75
मातु चरन सिरु नाइ चले तुरत संकित हृदयँ।
बागुर बिषम तोराइ मनहुँ भाग मृगु भाग बस॥75॥
mātu carana siru nāi cale turata saṃkita hṛdayam̐|
bāgura biṣama torāi manahum̐ bhāga mṛgu bhāga basa||75||
दोहा 76#

गए लखनु जहँ जानकिनाथू। भे मन मुदित पाइ प्रिय साथू॥
बंदि राम सिय चरन सुहाए। चले संग नृपमंदिर आए॥
कहहिं परसपर पुर नर नारी। भलि बनाइ बिधि बात बिगारी॥
तन कृस दुखु बदन मलीने। बिकल मनहुँ माखी मधु छीने॥
कर मीजहिं सिरु धुनि पछिताहीं। जनु बिनु पंख बिहग अकुलाहीं॥
भइ बड़ि भीर भूप दरबारा। बरनि न जाइ बिषाद अपारा॥
सचिव उठाइ राउ बैठारे। कहि प्रिय बचन राम पगु धारे॥
सिय समेत दोउ तनय निहारी। ब्याकुल भयउ भूमिपति भारी॥

gae lakhanu jaham̐ jānakināthū| bhe mana mudita pāi priya sāthū||
baṃdi rāma siya carana suhāe| cale saṃga nṛpamaṃdira āe||
kahahiṃ parasapara pura nara nārī| bhali banāi bidhi bāta bigārī||
tana kṛsa dukhu badana malīne| bikala manahum̐ mākhī madhu chīne||
kara mījahiṃ siru dhuni pachitāhīṃ| janu binu paṃkha bihaga akulāhīṃ||
bhai baḍi bhīra bhūpa darabārā| barani na jāi biṣāda apārā||
saciva uṭhāi rāu baiṭhāre| kahi priya bacana rāma pagu dhāre||
siya sameta dou tanaya nihārī| byākula bhayau bhūmipati bhārī||

दोहा 76
सीय सहित सुत सुभग दोउ देखि देखि अकुलाइ।
बारहिं बार सनेह बस राउ लेइ उर लाइ॥76॥
sīya sahita suta subhaga dou dekhi dekhi akulāi|
bārahiṃ bāra saneha basa rāu lei ura lāi||76||
दोहा 77#

सकइ न बोलि बिकल नरनाहू। सोक जनित उर दारुन दाहू॥
नाइ सीस पद अति अनुरागा। उठि रघुबीर बिदा तब मागा॥
पितु असीस आयसु मोहि दीजै। हरष समय बिसमउ कत कीजै॥
तात किएँ प्रिय प्रेम प्रमादू। जस जग जाइ होइ अपबादू॥
सुनि सनेह बस उठि नरनाहा। बैठारे रघुपति गहि बाहाँ॥
सुनहु तात तुम्ह कहुँ मुनि कहहीं। राम चराचर नायक अहहीं॥
सुभ अरु असुभ करम अनुहारी। ईस देइ फल हृदयँ बिचारी॥
करइ जो करम पाव फल सोई। निगम नीति असि कह सब कोई॥

sakai na boli bikala naranāhū| soka janita ura dāruna dāhū||
nāi sīsa pada ati anurāgā| uṭhi raghubīra bidā taba māgā||
pitu asīsa āyasu mohi dījai| haraṣa samaya bisamau kata kījai||
tāta kiem̐ priya prema pramādū| jasa jaga jāi hoi apabādū||
suni saneha basa uṭhi naranāhā| baiṭhāre raghupati gahi bāhām̐||
sunahu tāta tumha kahum̐ muni kahahīṃ| rāma carācara nāyaka ahahīṃ||
subha aru asubha karama anuhārī| īsa dei phala hṛdayam̐ bicārī||
karai jo karama pāva phala soī| nigama nīti asi kaha saba koī||

दोहा 77
औरु करै अपराधु कोउ और पाव फल भोगु।
अति बिचित्र भगवंत गति को जग जानै जोगु॥77॥
auru karai aparādhu kou aura pāva phala bhogu|
ati bicitra bhagavaṃta gati ko jaga jānai jogu||77||
दोहा 78#

रायँ राम राखन हित लागी। बहुत उपाय किए छल त्यागी॥
लखी राम रुख रहत न जाने। धरम धुरंधर धीर सयाने॥
तब नृप सीय लाइ उर लीन्ही। अति हित बहुत भाँति सिख दीन्ही॥
कहि बन के दुख दुसह सुनाए। सासु ससुर पितु सुख समुझाए॥
सिय मनु राम चरन अनुरागा। घरु न सुगमु बनु बिषमु न लागा॥
औरउ सबहिं सीय समुझाई। कहि कहि बिपिन बिपति अधिकाई॥
सचिव नारि गुर नारि सयानी। सहित सनेह कहहिं मृदु बानी॥
तुम्ह कहुँ तौ न दीन्ह बनबासू। करहु जो कहहिं ससुर गुर सासू॥

rāyam̐ rāma rākhana hita lāgī| bahuta upāya kie chala tyāgī||
lakhī rāma rukha rahata na jāne| dharama dhuraṃdhara dhīra sayāne||
taba nṛpa sīya lāi ura līnhī| ati hita bahuta bhām̐ti sikha dīnhī||
kahi bana ke dukha dusaha sunāe| sāsu sasura pitu sukha samujhāe||
siya manu rāma carana anurāgā| gharu na sugamu banu biṣamu na lāgā||
aurau sabahiṃ sīya samujhāī| kahi kahi bipina bipati adhikāī||
saciva nāri gura nāri sayānī| sahita saneha kahahiṃ mṛdu bānī||
tumha kahum̐ tau na dīnha banabāsū| karahu jo kahahiṃ sasura gura sāsū||

दोहा 78
सिख सीतलि हित मधुर मृदु सुनि सीतहि न सोहानि।
सरद चंद चंदिनि लगत जनु चकई अकुलानि॥78॥
sikha sītali hita madhura mṛdu suni sītahi na sohāni|
sarada caṃda caṃdini lagata janu cakaī akulāni||78||
दोहा 79#

सीय सकुच बस उतरु न देई। सो सुनि तमकि उठी कैकेई॥
मुनि पट भूषन भाजन आनी। आगें धरि बोली मृदु बानी॥
नृपहि प्रान प्रिय तुम्ह रघुबीरा। सील सनेह न छाड़िहि भीरा॥
सुकृत सुजसु परलोकु नसाऊ। तुम्हहि जान बन कहिहि न काऊ॥
अस बिचारि सोइ करहु जो भावा। राम जननि सिख सुनि सुखु पावा॥
भूपहि बचन बानसम लागे। करहिं न प्रान पयान अभागे॥
लोग बिकल मुरुछित नरनाहू। काह करिअ कछु सूझ न काहू॥
राम तुरत मुनि बेष बनाई। चले जनक जननिहि सिर नाई॥

sīya sakuca basa utaru na deī| so suni tamaki uṭhī kaikeī||
muni paṭa bhūṣana bhājana ānī| āgeṃ dhari bolī mṛdu bānī||
nṛpahi prāna priya tumha raghubīrā| sīla saneha na chāḍihi bhīrā||
sukṛta sujasu paraloku nasāū| tumhahi jāna bana kahihi na kāū||
asa bicāri soi karahu jo bhāvā| rāma janani sikha suni sukhu pāvā||
bhūpahi bacana bānasama lāge| karahiṃ na prāna payāna abhāge||
loga bikala muruchita naranāhū| kāha karia kachu sūjha na kāhū||
rāma turata muni beṣa banāī| cale janaka jananihi sira nāī||

दोहा 79
सजि बन साजु समाजु सबु बनिता बंधु समेत।
बंदि बिप्र गुर चरन प्रभु चले करि सबहि अचेत॥79॥
saji bana sāju samāju sabu banitā baṃdhu sameta|
baṃdi bipra gura carana prabhu cale kari sabahi aceta||79||
दोहा 80#

निकसि बसिष्ठ द्वार भए ठाढ़े। देखे लोग बिरह दव दाढ़े॥
कहि प्रिय बचन सकल समुझाए। बिप्र बृंद रघुबीर बोलाए॥
गुर सन कहि बरषासन दीन्हे। आदर दान बिनय बस कीन्हे॥
जाचक दान मान संतोषे। मीत पुनीत प्रेम परितोषे॥
दासी दास बोलाइ बहोरी। गुरहि सौंपि बोले कर जोरी॥
सब के सार सँभार गोसाईं। करबि जनक जननी की नाई॥
बारहिं बार जोरि जुग पानी। कहत राम सब सन मृदु बानी॥
सोइ सब भाँति मोर हितकारी। जेहि ते रहइ भुआल सुखारी॥

nikasi basiṣṭha dvāra bhae ṭhāḍhe| dekhe loga biraha dava dāḍhe||
kahi priya bacana sakala samujhāe| bipra bṛṃda raghubīra bolāe||
gura sana kahi baraṣāsana dīnhe| ādara dāna binaya basa kīnhe||
jācaka dāna māna saṃtoṣe| mīta punīta prema paritoṣe||
dāsī dāsa bolāi bahorī| gurahi sauṃpi bole kara jorī||
saba ke sāra sam̐bhāra gosāīṃ| karabi janaka jananī kī nāī||
bārahiṃ bāra jori juga pānī| kahata rāma saba sana mṛdu bānī||
soi saba bhām̐ti mora hitakārī| jehi te rahai bhuāla sukhārī||

दोहा 80
मातु सकल मोरे बिरहँ जेहिं न होहिं दुख दीन।
सोइ उपाउ तुम्ह करेहु सब पुर जन परम प्रबीन॥80॥
mātu sakala more biraham̐ jehiṃ na hohiṃ dukha dīna|
soi upāu tumha karehu saba pura jana parama prabīna||80||
दोहा 81#

एहि बिधि राम सबहि समुझावा। गुर पद पदुम हरषि सिरु नावा।
गनपति गौरि गिरीस मनाई। चले असीस पाइ रघुराई॥
राम चलत अति भयउ बिषादू। सुनि न जाइ पुर आरत नादू॥
कुसगुन लंक अवध अति सोकू। हहरष बिषाद बिबस सुरलोकू॥
गइ मुरुछा तब भूपति जागे। बोलि सुमंत्रु कहन अस लागे॥
राम चले बन प्रान न जाहीं। केहि सुख लागि रहत तन माहीं।
एहि तें कवन ब्यथा बलवाना। जो दुख पाइ तजहिं तनु प्राना॥
पुनि धरि धीर कहइ नरनाहू। लै रथु संग सखा तुम्ह जाहू॥

ehi bidhi rāma sabahi samujhāvā| gura pada paduma haraṣi siru nāvā|
ganapati gauri girīsa manāī| cale asīsa pāi raghurāī||
rāma calata ati bhayau biṣādū| suni na jāi pura ārata nādū||
kusaguna laṃka avadha ati sokū| haharaṣa biṣāda bibasa suralokū||
gai muruchā taba bhūpati jāge| boli sumaṃtru kahana asa lāge||
rāma cale bana prāna na jāhīṃ| kehi sukha lāgi rahata tana māhīṃ|
ehi teṃ kavana byathā balavānā| jo dukha pāi tajahiṃ tanu prānā||
puni dhari dhīra kahai naranāhū| lai rathu saṃga sakhā tumha jāhū||

दोहा 81
सुठि सुकुमार कुमार दोउ जनकसुता सुकुमारि।
रथ चढ़ाइ देखराइ बन फिरेहु गएँ दिन चारि॥81॥
suṭhi sukumāra kumāra dou janakasutā sukumāri|
ratha caḍhāi dekharāi bana phirehu gaem̐ dina cāri||81||
दोहा 82#

जौं नहिं फिरहिं धीर दोउ भाई। सत्यसंध दृढ़ब्रत रघुराई॥
तौ तुम्ह बिनय करेहु कर जोरी। फेरिअ प्रभु मिथिलेसकिसोरी॥
जब सिय कानन देखि डेराई। कहेहु मोरि सिख अवसर पाई॥
सासु ससुर अस कहेउ सँदेसू। पुत्रि फिरिअ बन बहुत कलेसू॥
पितृगृह कबहुँ कबहुँ ससुरारी। रहेहु जहाँ रुचि होइ तुम्हारी॥
एहि बिधि करेहु उपाय कदंबा। फिरइ त होइ प्रान अवलंबा॥
नाहिं त मोर मरन परिनामा। कछु न बसाइ भएँ बिधि बामा॥
अस कहि मुरुछि परा महि राऊ। राम लखन सिय आनि देखाऊ॥

jauṃ nahiṃ phirahiṃ dhīra dou bhāī| satyasaṃdha dṛḍhabrata raghurāī||
tau tumha binaya karehu kara jorī| pheria prabhu mithilesakisorī||
jaba siya kānana dekhi ḍerāī| kahehu mori sikha avasara pāī||
sāsu sasura asa kaheu sam̐desū| putri phiria bana bahuta kalesū||
pitṛgṛha kabahum̐ kabahum̐ sasurārī| rahehu jahām̐ ruci hoi tumhārī||
ehi bidhi karehu upāya kadaṃbā| phirai ta hoi prāna avalaṃbā||
nāhiṃ ta mora marana parināmā| kachu na basāi bhaem̐ bidhi bāmā||
asa kahi muruchi parā mahi rāū| rāma lakhana siya āni dekhāū||

दोहा 82
पाइ रजायसु नाइ सिरु रथु अति बेग बनाइ।
गयउ जहाँ बाहेर नगर सीय सहित दोउ भाइ॥82॥
pāi rajāyasu nāi siru rathu ati bega banāi|
gayau jahām̐ bāhera nagara sīya sahita dou bhāi||82||
दोहा 83#

तब सुमंत्र नृप बचन सुनाए। करि बिनती रथ राम चढ़ाए॥
चढ़ि रथ सीय सहित दोउ भाई। चले हृदयँ अवधहि सिरु नाई॥
चलत राम लखि अवध अनाथा। बिकल लोग सब लागे साथा॥
कृपासिंधु बहुबिधि समुझावहिं। फिरहिं प्रेम बस पुनि फिरि आवहिं॥
लागति अवध भयावनि भारी। मानहुँ कालराति अँधिआरी॥
घोर जंतु सम पुर नर नारी। डरपहिं एकहि एक निहारी॥
घर मसान परिजन जनु भूता। सुत हित मीत मनहुँ जमदूता॥
बागन्ह बिटप बेलि कुम्हिलाहीं। सरित सरोवर देखि न जाहीं॥

taba sumaṃtra nṛpa bacana sunāe| kari binatī ratha rāma caḍhāe||
caḍhi ratha sīya sahita dou bhāī| cale hṛdayam̐ avadhahi siru nāī||
calata rāma lakhi avadha anāthā| bikala loga saba lāge sāthā||
kṛpāsiṃdhu bahubidhi samujhāvahiṃ| phirahiṃ prema basa puni phiri āvahiṃ||
lāgati avadha bhayāvani bhārī| mānahum̐ kālarāti am̐dhiārī||
ghora jaṃtu sama pura nara nārī| ḍarapahiṃ ekahi eka nihārī||
ghara masāna parijana janu bhūtā| suta hita mīta manahum̐ jamadūtā||
bāganha biṭapa beli kumhilāhīṃ| sarita sarovara dekhi na jāhīṃ||

दोहा 83
हय गय कोटिन्ह केलिमृग पुरपसु चातक मोर।
पिक रथांग सुक सारिका सारस हंस चकोर॥83॥
haya gaya koṭinha kelimṛga purapasu cātaka mora|
pika rathāṃga suka sārikā sārasa haṃsa cakora||83||
दोहा 84#

राम बियोग बिकल सब ठाढ़े। जहँ तहँ मनहुँ चित्र लिखि काढ़े॥
नगरु सफल बनु गहबर भारी। खग मृग बिपुल सकल नर नारी॥
बिधि कैकेई किरातिनि कीन्ही। जेहि दव दुसह दसहुँ दिसि दीन्ही॥
सहि न सके रघुबर बिरहागी। चले लोग सब ब्याकुल भागी॥
सबहिं बिचार कीन्ह मन माहीं। राम लखन सिय बिनु सुख नाहीं॥
जहाँ राम तहँ सबइ समाजू। बिनु रघुबीर अवध नहिं काजू॥
चले साथ अस मंत्रु दृढ़ाई। सुर दुर्लभ सुख सदन बिहाई॥
राम चरन पंकज प्रिय जिन्हही। बिषय भोग बस करहिं कि तिन्हही॥

rāma biyoga bikala saba ṭhāḍhe| jaham̐ taham̐ manahum̐ citra likhi kāḍhe||
nagaru saphala banu gahabara bhārī| khaga mṛga bipula sakala nara nārī||
bidhi kaikeī kirātini kīnhī| jehi dava dusaha dasahum̐ disi dīnhī||
sahi na sake raghubara birahāgī| cale loga saba byākula bhāgī||
sabahiṃ bicāra kīnha mana māhīṃ| rāma lakhana siya binu sukha nāhīṃ||
jahām̐ rāma taham̐ sabai samājū| binu raghubīra avadha nahiṃ kājū||
cale sātha asa maṃtru dṛḍhāī| sura durlabha sukha sadana bihāī||
rāma carana paṃkaja priya jinhahī| biṣaya bhoga basa karahiṃ ki tinhahī||

दोहा 84
बालक बृद्ध बिहाइ गृहँ लगे लोग सब साथ।
तमसा तीर निवास किय प्रथम दिवस रघुनाथ॥84॥
bālaka bṛddha bihāi gṛham̐ lage loga saba sātha|
tamasā tīra nivāsa kiya prathama divasa raghunātha||84||
दोहा 85#

रघुपति प्रजा प्रेमबस देखी। सदय हृदयँ दुख भयउ बिसेषी॥
करुनामय रघुनाथ गोसाँई। बेगि पाइअहिं पीर पराई॥
कहि सप्रेम मृदु बचन सुहाए। बहुबिधि राम लोग समुझाए॥
किए धरम उपदेस घनेरे। लोग प्रेम बस फिरहिं न फेरे॥
सीलु सनेहु छाड़ि नहिं जाई। असमंजस बस भे रघुराई॥
लोग सोग श्रम बस गए सोई। कछुक देवमायाँ मति मोई॥
जबहिं जाम जुग जामिनि बीती। राम सचिव सन कहेउ सप्रीती॥
खोज मोरि रथ हाँकहु ताता। आन उपाय बनिहि नहिं बाता॥

raghupati prajā premabasa dekhī| sadaya hṛdayam̐ dukha bhayau biseṣī||
karunāmaya raghunātha gosām̐ī| begi pāiahiṃ pīra parāī||
kahi saprema mṛdu bacana suhāe| bahubidhi rāma loga samujhāe||
kie dharama upadesa ghanere| loga prema basa phirahiṃ na phere||
sīlu sanehu chāḍi nahiṃ jāī| asamaṃjasa basa bhe raghurāī||
loga soga śrama basa gae soī| kachuka devamāyām̐ mati moī||
jabahiṃ jāma juga jāmini bītī| rāma saciva sana kaheu saprītī||
khoja mori ratha hām̐kahu tātā| āna upāya banihi nahiṃ bātā||

दोहा 85
राम लखन सिय जान चढ़ि संभु चरन सिरु नाइ॥
सचिवँ चलायउ तुरत रथु इत उत खोज दुराइ॥85॥
rāma lakhana siya jāna caḍhi saṃbhu carana siru nāi||
sacivam̐ calāyau turata rathu ita uta khoja durāi||85||
दोहा 86#

जागे सकल लोग भएँ भोरू। गे रघुनाथ भयउ अति सारू॥
रथ कर खोज कतहहुँ नहिं पावहिं। राम राम कहि चहुँ दिसि धावहिं॥
मनहुँ बारिनिधि बूड़ जहाजू। भयउ बिकल बड़ बनिक समाजू॥
एकहि एक देहिं उपदेसू। तजे राम हम जानि कलेसू॥
निंदहिं आपु सराहहिं मीना। धिग जीवन रघुबीर बिहीना॥
जौं पै प्रिय बियोगु बिधि कीन्हा। तौ कस मरनु न मागें दीन्हा॥
एहि बिधि करत प्रलाप कलापा। आए अवध भरे परितापा॥
बिषम बियोग न जाइ बखाना। अवधि आस सब राखहिं प्राना॥

jāge sakala loga bhaem̐ bhorū| ge raghunātha bhayau ati sārū||
ratha kara khoja katahahum̐ nahiṃ pāvahiṃ| rāma rāma kahi cahum̐ disi dhāvahiṃ||
manahum̐ bārinidhi būḍa jahājū| bhayau bikala baḍa banika samājū||
ekahi eka dehiṃ upadesū| taje rāma hama jāni kalesū||
niṃdahiṃ āpu sarāhahiṃ mīnā| dhiga jīvana raghubīra bihīnā||
jauṃ pai priya biyogu bidhi kīnhā| tau kasa maranu na māgeṃ dīnhā||
ehi bidhi karata pralāpa kalāpā| āe avadha bhare paritāpā||
biṣama biyoga na jāi bakhānā| avadhi āsa saba rākhahiṃ prānā||

दोहा 86
राम दरस हित नेम ब्रत लगे करन नर नारि।
मनहुँ कोक कोकी कमल दीन बिहीन तमारि॥86॥
rāma darasa hita nema brata lage karana nara nāri|
manahum̐ koka kokī kamala dīna bihīna tamāri||86||
दोहा 87#

सीता सचिव सहित दोउ भाई। सृंगबेरपुर पहुँचे जाई॥
उतरे राम देवसरि देखी। कीन्ह दंडवत हरष बिसेषी॥
लखन सचिवँ सियँ किए प्रनामा। सबहि सहित सुख पायउ रामा॥
गंग सकल मुद मंगल मूला। सब सुख करनि हरनि सब सूला॥
कहि कहि कोटिक कथा प्रसंगा। रामु बिलोकहिं गंग तरंगा॥
सचिवहि अनुजहि प्रियहि सुनाई। बिबुध नदी महिमा अधिकाई॥
मज्जनु कीन्ह पंथ श्रम गयऊ। सुचि जल पिअत मुदित मन भयऊ॥
सुमिरत जाहि मिटइ श्रम भारू। तेहि श्रम यह लौकिक ब्यवहारू॥

sītā saciva sahita dou bhāī| sṛṃgaberapura pahum̐ce jāī||
utare rāma devasari dekhī| kīnha daṃḍavata haraṣa biseṣī||
lakhana sacivam̐ siyam̐ kie pranāmā| sabahi sahita sukha pāyau rāmā||
gaṃga sakala muda maṃgala mūlā| saba sukha karani harani saba sūlā||
kahi kahi koṭika kathā prasaṃgā| rāmu bilokahiṃ gaṃga taraṃgā||
sacivahi anujahi priyahi sunāī| bibudha nadī mahimā adhikāī||
majjanu kīnha paṃtha śrama gayaū| suci jala piata mudita mana bhayaū||
sumirata jāhi miṭai śrama bhārū| tehi śrama yaha laukika byavahārū||

दोहा 87
सुध्द सचिदानंदमय कंद भानुकुल केतु।
चरित करत नर अनुहरत संसृति सागर सेतु॥87॥
sudhda sacidānaṃdamaya kaṃda bhānukula ketu|
carita karata nara anuharata saṃsṛti sāgara setu||87||
दोहा 88#

यह सुधि गुहँ निषाद जब पाई। मुदित लिए प्रिय बंधु बोलाई॥
लिए फल मूल भेंट भरि भारा। मिलन चलेउ हियँ हरष अपारा॥
करि दंडवत भेंट धरि आगें। प्रभुहि बिलोकत अति अनुरागे॥
सहज सनेह बिबस रघुराई। पूँछी कुसल निकट बैठाई॥
नाथ कुसल पद पंकज देखे। भयउँ भागभाजन जन लेखें॥
देव धरनि धनु धाम तुम्हारा। मैं जनु नीच सहित परिवारा॥
कृपा करिअ पुर धारिअ पाऊ। थापिय जनु सब लोग सिहाऊ॥
कहेहु सत्य सब सखा सुजाना। मोहि दीन्ह पितु आयसु आना॥

yaha sudhi guham̐ niṣāda jaba pāī| mudita lie priya baṃdhu bolāī||
lie phala mūla bheṃṭa bhari bhārā| milana caleu hiyam̐ haraṣa apārā||
kari daṃḍavata bheṃṭa dhari āgeṃ| prabhuhi bilokata ati anurāge||
sahaja saneha bibasa raghurāī| pūm̐chī kusala nikaṭa baiṭhāī||
nātha kusala pada paṃkaja dekhe| bhayaum̐ bhāgabhājana jana lekheṃ||
deva dharani dhanu dhāma tumhārā| maiṃ janu nīca sahita parivārā||
kṛpā karia pura dhāria pāū| thāpiya janu saba loga sihāū||
kahehu satya saba sakhā sujānā| mohi dīnha pitu āyasu ānā||

दोहा 88
बरष चारिदस बासु बन मुनि ब्रत बेषु अहारु।
ग्राम बासु नहिं उचित सुनि गुहहि भयउ दुखु भारु॥88॥
baraṣa cāridasa bāsu bana muni brata beṣu ahāru|
grāma bāsu nahiṃ ucita suni guhahi bhayau dukhu bhāru||88||
दोहा 89#

राम लखन सिय रूप निहारी। कहहिं सप्रेम ग्राम नर नारी॥
ते पितु मातु कहहु सखि कैसे। जिन्ह पठए बन बालक ऐसे॥
एक कहहिं भल भूपति कीन्हा। लोयन लाहु हमहि बिधि दीन्हा॥
तब निषादपति उर अनुमाना। तरु सिंसुपा मनोहर जाना॥
लै रघुनाथहि ठाउँ देखावा। कहेउ राम सब भाँति सुहावा॥
पुरजन करि जोहारु घर आए। रघुबर संध्या करन सिधाए॥
गुहँ सँवारि साँथरी डसाई। कुस किसलयमय मृदुल सुहाई॥
सुचि फल मूल मधुर मृदु जानी। दोना भरि भरि राखेसि पानी॥

rāma lakhana siya rūpa nihārī| kahahiṃ saprema grāma nara nārī||
te pitu mātu kahahu sakhi kaise| jinha paṭhae bana bālaka aise||
eka kahahiṃ bhala bhūpati kīnhā| loyana lāhu hamahi bidhi dīnhā||
taba niṣādapati ura anumānā| taru siṃsupā manohara jānā||
lai raghunāthahi ṭhāum̐ dekhāvā| kaheu rāma saba bhām̐ti suhāvā||
purajana kari johāru ghara āe| raghubara saṃdhyā karana sidhāe||
guham̐ sam̐vāri sām̐tharī ḍasāī| kusa kisalayamaya mṛdula suhāī||
suci phala mūla madhura mṛdu jānī| donā bhari bhari rākhesi pānī||

दोहा 89
सिय सुमंत्र भ्राता सहित कंद मूल फल खाइ।
सयन कीन्ह रघुबंसमनि पाय पलोटत भाइ॥89॥
siya sumaṃtra bhrātā sahita kaṃda mūla phala khāi|
sayana kīnha raghubaṃsamani pāya paloṭata bhāi||89||
दोहा 90#

उठे लखनु प्रभु सोवत जानी। कहि सचिवहि सोवन मृदु बानी॥
कछुक दूरि सजि बान सरासन। जागन लगे बैठि बीरासन॥
गुह बोलाइ पाहरू प्रतीती। ठाँव ठाँव राखे अति प्रीती॥
आपु लखन पहिं बैठेउ जाई। कटि भाथी सर चाप चढ़ाई॥
सोवत प्रभुहि निहारि निषादू। भयउ प्रेम बस हृदयँ बिषादू॥
तनु पुलकित जल लोचन बहई। बचन सप्रेम लखन सन कहई॥
भूपति भवन सुभायँ सुहावा। सुरपति सदनु न पटतर पावा॥
मनिमय रचित चारु चौबारे। जनु रतिपति निज हाथ सँवारे॥

uṭhe lakhanu prabhu sovata jānī| kahi sacivahi sovana mṛdu bānī||
kachuka dūri saji bāna sarāsana| jāgana lage baiṭhi bīrāsana||
guha bolāi pāharū pratītī| ṭhām̐va ṭhām̐va rākhe ati prītī||
āpu lakhana pahiṃ baiṭheu jāī| kaṭi bhāthī sara cāpa caḍhāī||
sovata prabhuhi nihāri niṣādū| bhayau prema basa hṛdayam̐ biṣādū||
tanu pulakita jala locana bahaī| bacana saprema lakhana sana kahaī||
bhūpati bhavana subhāyam̐ suhāvā| surapati sadanu na paṭatara pāvā||
manimaya racita cāru caubāre| janu ratipati nija hātha sam̐vāre||

दोहा 90
सुचि सुबिचित्र सुभोगमय सुमन सुगंध सुबास।
पलँग मंजु मनिदीप जहँ सब बिधि सकल सुपास॥90॥
suci subicitra subhogamaya sumana sugaṃdha subāsa|
palam̐ga maṃju manidīpa jaham̐ saba bidhi sakala supāsa||90||
दोहा 91#

बिबिध बसन उपधान तुराई। छीर फेन मृदु बिसद सुहाई॥
तहँ सिय राम सयन निसि करहीं। निज छबि रति मनोज मदु हरहीं॥
ते सिय रामु साथरीं सोए। श्रमित बसन बिनु जाहिं न जोए॥
मातु पिता परिजन पुरबासी। सखा सुसील दास अरु दासी॥
जोगवहिं जिन्हहि प्रान की नाई। महि सोवत तेइ राम गोसाईं॥
पिता जनक जग बिदित प्रभाऊ। ससुर सुरेस सखा रघुराऊ॥
रामचंदु पति सो बैदेही। सोवत महि बिधि बाम न केही॥
सिय रघुबीर कि कानन जोगू। करम प्रधान सत्य कह लोगू॥

bibidha basana upadhāna turāī| chīra phena mṛdu bisada suhāī||
taham̐ siya rāma sayana nisi karahīṃ| nija chabi rati manoja madu harahīṃ||
te siya rāmu sātharīṃ soe| śramita basana binu jāhiṃ na joe||
mātu pitā parijana purabāsī| sakhā susīla dāsa aru dāsī||
jogavahiṃ jinhahi prāna kī nāī| mahi sovata tei rāma gosāīṃ||
pitā janaka jaga bidita prabhāū| sasura suresa sakhā raghurāū||
rāmacaṃdu pati so baidehī| sovata mahi bidhi bāma na kehī||
siya raghubīra ki kānana jogū| karama pradhāna satya kaha logū||

दोहा 91
कैकयनंदिनि मंदमति कठिन कुटिलपन कीन्ह।
जेहिं रघुनंदन जानकिहि सुख अवसर दुखु दीन्ह॥91॥
kaikayanaṃdini maṃdamati kaṭhina kuṭilapana kīnha|
jehiṃ raghunaṃdana jānakihi sukha avasara dukhu dīnha||91||
दोहा 92#

भइ दिनकर कुल बिटप कुठारी। कुमति कीन्ह सब बिस्व दुखारी॥
भयउ बिषादु निषादहि भारी। राम सीय महि सयन निहारी॥
बोले लखन मधुर मृदु बानी। ग्यान बिराग भगति रस सानी॥
काहु न कोउ सुख दुख कर दाता। निज कृत करम भोग सबु भ्राता॥
जोग बियोग भोग भल मंदा। हित अनहित मध्यम भ्रम फंदा॥
जनमु मरनु जहँ लगि जग जालू। संपति बिपति करमु अरु कालू॥
धरनि धामु धनु पुर परिवारू। सरगु नरकु जहँ लगि ब्यवहारू॥
देखिअ सुनिअ गुनिअ मन माहीं। मोह मूल परमारथु नाहीं॥

bhai dinakara kula biṭapa kuṭhārī| kumati kīnha saba bisva dukhārī||
bhayau biṣādu niṣādahi bhārī| rāma sīya mahi sayana nihārī||
bole lakhana madhura mṛdu bānī| gyāna birāga bhagati rasa sānī||
kāhu na kou sukha dukha kara dātā| nija kṛta karama bhoga sabu bhrātā||
joga biyoga bhoga bhala maṃdā| hita anahita madhyama bhrama phaṃdā||
janamu maranu jaham̐ lagi jaga jālū| saṃpati bipati karamu aru kālū||
dharani dhāmu dhanu pura parivārū| saragu naraku jaham̐ lagi byavahārū||
dekhia sunia gunia mana māhīṃ| moha mūla paramārathu nāhīṃ||

दोहा 92
सपनें होइ भिखारि नृप रंकु नाकपति होइ।
जागें लाभु न हानि कछु तिमि प्रपंच जियँ जोइ॥92॥
sapaneṃ hoi bhikhāri nṛpa raṃku nākapati hoi|
jāgeṃ lābhu na hāni kachu timi prapaṃca jiyam̐ joi||92||
दोहा 93#

अस बिचारि नहिं कीजिअ रोसू। काहुहि बादि न देइअ दोसू॥
मोह निसाँ सबु सोवनिहारा। देखिअ सपन अनेक प्रकारा॥
एहिं जग जामिनि जागहिं जोगी। परमारथी प्रपंच बियोगी॥
जानिअ तबहिं जीव जग जागा। जब जब बिषय बिलास बिरागा॥
होइ बिबेकु मोह भ्रम भागा। तब रघुनाथ चरन अनुरागा॥
सखा परम परमारथु एहू। मन क्रम बचन राम पद नेहू॥
राम ब्रह्म परमारथ रूपा। अबिगत अलख अनादि अनूपा॥
सकल बिकार रहित गतभेदा। कहि नित नेति निरूपहिं बेदा।

asa bicāri nahiṃ kījia rosū| kāhuhi bādi na deia dosū||
moha nisām̐ sabu sovanihārā| dekhia sapana aneka prakārā||
ehiṃ jaga jāmini jāgahiṃ jogī| paramārathī prapaṃca biyogī||
jānia tabahiṃ jīva jaga jāgā| jaba jaba biṣaya bilāsa birāgā||
hoi bibeku moha bhrama bhāgā| taba raghunātha carana anurāgā||
sakhā parama paramārathu ehū| mana krama bacana rāma pada nehū||
rāma brahma paramāratha rūpā| abigata alakha anādi anūpā||
sakala bikāra rahita gatabhedā| kahi nita neti nirūpahiṃ bedā|

दोहा 93
भगत भूमि भूसुर सुरभि सुर हित लागि कृपाल।
करत चरित धरि मनुज तनु सुनत मिटहिं जग जाल॥93॥
bhagata bhūmi bhūsura surabhi sura hita lāgi kṛpāla|
karata carita dhari manuja tanu sunata miṭahiṃ jaga jāla||93||
मासपारायण, पंद्रहवाँ विश्रामDay 15 of the 30-day Masparayan ends here

Completed Ayodhya Kand — Part 3?

Mark Masparayan day 15 done, light a diya, or share the path with family.

Text: the Gita Press edition of Shri Ramcharitmanas, checked against two independent transcriptions. Spotted an error? Suggest a correction.

Ayodhya Kand — Part 3 — text

Completed Ayodhya Kand — Part 3?