Ramcharitmanas Ayodhya Kand Part 5 (Doha 117–133)

दोहा 117#

कोटि मनोज लजावनिहारे। सुमुखि कहहु को आहिं तुम्हारे॥
सुनि सनेहमय मंजुल बानी। सकुची सिय मन महुँ मुसुकानी॥
तिन्हहि बिलोकि बिलोकति धरनी। दुहुँ सकोच सकुचति बरबरनी॥
सकुचि सप्रेम बाल मृग नयनी। बोली मधुर बचन पिकबयनी॥
सहज सुभाय सुभग तन गोरे। नामु लखनु लघु देवर मोरे॥
बहुरि बदनु बिधु अंचल ढाँकी। पिय तन चितइ भौंह करि बाँकी॥
खंजन मंजु तिरीछे नयननि। निज पति कहेउ तिन्हहि सियँ सयननि॥
भइ मुदित सब ग्रामबधूटीं। रंकन्ह राय रासि जनु लूटीं॥

koṭi manoja lajāvanihāre| sumukhi kahahu ko āhiṃ tumhāre||
suni sanehamaya maṃjula bānī| sakucī siya mana mahum̐ musukānī||
tinhahi biloki bilokati dharanī| duhum̐ sakoca sakucati barabaranī||
sakuci saprema bāla mṛga nayanī| bolī madhura bacana pikabayanī||
sahaja subhāya subhaga tana gore| nāmu lakhanu laghu devara more||
bahuri badanu bidhu aṃcala ḍhām̐kī| piya tana citai bhauṃha kari bām̐kī||
khaṃjana maṃju tirīche nayanani| nija pati kaheu tinhahi siyam̐ sayanani||
bhai mudita saba grāmabadhūṭīṃ| raṃkanha rāya rāsi janu lūṭīṃ||

दोहा 117
अति सप्रेम सिय पायँ परि बहुबिधि देहिं असीस।
सदा सोहागिनि होहु तुम्ह जब लगि महि अहि सीस॥117॥
ati saprema siya pāyam̐ pari bahubidhi dehiṃ asīsa|
sadā sohāgini hohu tumha jaba lagi mahi ahi sīsa||117||
दोहा 118#

पारबती सम पतिप्रिय होहू। देबि न हम पर छाड़ब छोहू॥
पुनि पुनि बिनय करिअ कर जोरी। जौं एहि मारग फिरिअ बहोरी॥
दरसनु देब जानि निज दासी। लखीं सीयँ सब प्रेम पिआसी॥
मधुर बचन कहि कहि परितोषीं। जनु कुमुदिनीं कौमुदीं पोषीं॥
तबहिं लखन रघुबर रुख जानी। पूँछेउ मगु लोगन्हि मृदु बानी॥
सुनत नारि नर भए दुखारी। पुलकित गात बिलोचन बारी॥
मिटा मोदु मन भए मलीने। बिधि निधि दीन्ह लेत जनु छीने॥
समुझि करम गति धीरजु कीन्हा। सोधि सुगम मगु तिन्ह कहि दीन्हा॥

pārabatī sama patipriya hohū| debi na hama para chāḍaba chohū||
puni puni binaya karia kara jorī| jauṃ ehi māraga phiria bahorī||
darasanu deba jāni nija dāsī| lakhīṃ sīyam̐ saba prema piāsī||
madhura bacana kahi kahi paritoṣīṃ| janu kumudinīṃ kaumudīṃ poṣīṃ||
tabahiṃ lakhana raghubara rukha jānī| pūm̐cheu magu loganhi mṛdu bānī||
sunata nāri nara bhae dukhārī| pulakita gāta bilocana bārī||
miṭā modu mana bhae malīne| bidhi nidhi dīnha leta janu chīne||
samujhi karama gati dhīraju kīnhā| sodhi sugama magu tinha kahi dīnhā||

दोहा 118
लखन जानकी सहित तब गवनु कीन्ह रघुनाथ।
फेरे सब प्रिय बचन कहि लिए लाइ मन साथ॥118॥
lakhana jānakī sahita taba gavanu kīnha raghunātha|
phere saba priya bacana kahi lie lāi mana sātha||118||
दोहा 119#

फिरत नारि नर अति पछिताहीं। देअहि दोषु देहिं मन माहीं॥
सहित बिषाद परसपर कहहीं। बिधि करतब उलटे सब अहहीं॥
निपट निरंकुस निठुर निसंकू। जेहिं ससि कीन्ह सरुज सकलंकू॥
रूख कलपतरु सागरु खारा। तेहिं पठए बन राजकुमारा॥
जौं पै इन्हहि दीन्ह बनबासू। कीन्ह बादि बिधि भोग बिलासू॥
ए बिचरहिं मग बिनु पदत्राना। रचे बादि बिधि बाहन नाना॥
ए महि परहिं डासि कुस पाता। सुभग सेज कत सृजत बिधाता॥
तरुबर बास इन्हहि बिधि दीन्हा। धवल धाम रचि रचि श्रमु कीन्हा॥

phirata nāri nara ati pachitāhīṃ| deahi doṣu dehiṃ mana māhīṃ||
sahita biṣāda parasapara kahahīṃ| bidhi karataba ulaṭe saba ahahīṃ||
nipaṭa niraṃkusa niṭhura nisaṃkū| jehiṃ sasi kīnha saruja sakalaṃkū||
rūkha kalapataru sāgaru khārā| tehiṃ paṭhae bana rājakumārā||
jauṃ pai inhahi dīnha banabāsū| kīnha bādi bidhi bhoga bilāsū||
e bicarahiṃ maga binu padatrānā| race bādi bidhi bāhana nānā||
e mahi parahiṃ ḍāsi kusa pātā| subhaga seja kata sṛjata bidhātā||
tarubara bāsa inhahi bidhi dīnhā| dhavala dhāma raci raci śramu kīnhā||

दोहा 119
जौं ए मुनि पट धर जटिल सुंदर सुठि सुकुमार।
बिबिध भाँति भूषन बसन बादि किए करतार॥119॥
jauṃ e muni paṭa dhara jaṭila suṃdara suṭhi sukumāra|
bibidha bhām̐ti bhūṣana basana bādi kie karatāra||119||
दोहा 120#

जौं ए कंद मूल फल खाहीं। बादि सुधादि असन जग माहीं॥
एक कहहिं ए सहज सुहाए। आपु प्रगट भए बिधि न बनाए॥
जहँ लगि बेद कही बिधि करनी। श्रवन नयन मन गोचर बरनी॥
देखहु खोजि भुअन दस चारी। कहँ अस पुरुष कहाँ असि नारी॥
इन्हहि देखि बिधि मनु अनुरागा। पटतर जोग बनावै लागा॥
कीन्ह बहुत श्रम ऐक न आए। तेहिं इरिषा बन आनि दुराए॥
एक कहहिं हम बहुत न जानहिं। आपुहि परम धन्य करि मानहिं॥
ते पुनि पुन्यपुंज हम लेखे। जे देखहिं देखिहहिं जिन्ह देखे॥

jauṃ e kaṃda mūla phala khāhīṃ| bādi sudhādi asana jaga māhīṃ||
eka kahahiṃ e sahaja suhāe| āpu pragaṭa bhae bidhi na banāe||
jaham̐ lagi beda kahī bidhi karanī| śravana nayana mana gocara baranī||
dekhahu khoji bhuana dasa cārī| kaham̐ asa puruṣa kahām̐ asi nārī||
inhahi dekhi bidhi manu anurāgā| paṭatara joga banāvai lāgā||
kīnha bahuta śrama aika na āe| tehiṃ iriṣā bana āni durāe||
eka kahahiṃ hama bahuta na jānahiṃ| āpuhi parama dhanya kari mānahiṃ||
te puni punyapuṃja hama lekhe| je dekhahiṃ dekhihahiṃ jinha dekhe||

दोहा 120
एहि बिधि कहि कहि बचन प्रिय लेहिं नयन भरि नीर।
किमि चलिहहि मारग अगम सुठि सुकुमार सरीर॥120॥
ehi bidhi kahi kahi bacana priya lehiṃ nayana bhari nīra|
kimi calihahi māraga agama suṭhi sukumāra sarīra||120||
दोहा 121#

नारि सनेह बिकल बस होहीं। चकई साँझ समय जनु सोहीं॥
मृदु पद कमल कठिन मगु जानी। गहबरि हृदयँ कहहिं बर बानी॥
परसत मृदुल चरन अरुनारे। सकुचति महि जिमि हृदय हमारे॥
जौं जगदीस इन्हहि बनु दीन्हा। कस न सुमनमय मारगु कीन्हा॥
जौं मागा पाइअ बिधि पाहीं। ए रखिअहिं सखि आँखिन्ह माहीं॥
जे नर नारि न अवसर आए। तिन्ह सिय रामु न देखन पाए॥
सुनि सुरुप बूझहिं अकुलाई। अब लगि गए कहाँ लगि भाई॥
समरथ धाइ बिलोकहिं जाई। प्रमुदित फिरहिं जनमफलु पाई॥

nāri saneha bikala basa hohīṃ| cakaī sām̐jha samaya janu sohīṃ||
mṛdu pada kamala kaṭhina magu jānī| gahabari hṛdayam̐ kahahiṃ bara bānī||
parasata mṛdula carana arunāre| sakucati mahi jimi hṛdaya hamāre||
jauṃ jagadīsa inhahi banu dīnhā| kasa na sumanamaya māragu kīnhā||
jauṃ māgā pāia bidhi pāhīṃ| e rakhiahiṃ sakhi ām̐khinha māhīṃ||
je nara nāri na avasara āe| tinha siya rāmu na dekhana pāe||
suni surupa būjhahiṃ akulāī| aba lagi gae kahām̐ lagi bhāī||
samaratha dhāi bilokahiṃ jāī| pramudita phirahiṃ janamaphalu pāī||

दोहा 121
अबला बालक बृद्ध जन कर मीजहिं पछिताहिं॥
होहिं प्रेमबस लोग इमि रामु जहाँ जहँ जाहिं॥121॥
abalā bālaka bṛddha jana kara mījahiṃ pachitāhiṃ||
hohiṃ premabasa loga imi rāmu jahām̐ jaham̐ jāhiṃ||121||
दोहा 122#

गाँव गाँव अस होइ अनंदू। देखि भानुकुल कैरव चंदू॥
जे कछु समाचार सुनि पावहिं। ते नृप रानिहि दोसु लगावहिं॥
कहहिं एक अति भल नरनाहू। दीन्ह हमहि जोइ लोचन लाहू॥
कहहिं परसपर लोग लोगाईं। बातें सरल सनेह सुहाईं॥
ते पितु मातु धन्य जिन्ह जाए। धन्य सो नगरु जहाँ तें आए॥
धन्य सो देसु सैलु बन गाऊँ। जहँ जहँ जाहिं धन्य सोइ ठाऊँ॥
सुख पायउ बिरंचि रचि तेही। ए जेहि के सब भाँति सनेही॥
राम लखन पथि कथा सुहाई। रही सकल मग कानन छाई॥

gām̐va gām̐va asa hoi anaṃdū| dekhi bhānukula kairava caṃdū||
je kachu samācāra suni pāvahiṃ| te nṛpa rānihi dosu lagāvahiṃ||
kahahiṃ eka ati bhala naranāhū| dīnha hamahi joi locana lāhū||
kahahiṃ parasapara loga logāīṃ| bāteṃ sarala saneha suhāīṃ||
te pitu mātu dhanya jinha jāe| dhanya so nagaru jahām̐ teṃ āe||
dhanya so desu sailu bana gāūm̐| jaham̐ jaham̐ jāhiṃ dhanya soi ṭhāūm̐||
sukha pāyau biraṃci raci tehī| e jehi ke saba bhām̐ti sanehī||
rāma lakhana pathi kathā suhāī| rahī sakala maga kānana chāī||

दोहा 122
एहि बिधि रघुकुल कमल रबि मग लोगन्ह सुख देत।
जाहिं चले देखत बिपिन सिय सौमित्रि समेत॥122॥
ehi bidhi raghukula kamala rabi maga loganha sukha deta|
jāhiṃ cale dekhata bipina siya saumitri sameta||122||
दोहा 123#

आगें रामु लखनु बने पाछें। तापस बेष बिराजत काछें॥
उभय बीच सिय सोहति कैसें। ब्रह्म जीव बिच माया जैसें॥
बहुरि कहउँ छबि जसि मन बसई। जनु मधु मदन मध्य रति लसई॥
उपमा बहुरि कहउँ जियँ जोही। जनु बुध बिधु बिच रोहिनि सोही॥
प्रभु पद रेख बीच बिच सीता। धरति चरन मग चलति सभीता॥
सीय राम पद अंक बराएँ। लखन चलहिं मगु दाहिन लाएँ॥
राम लखन सिय प्रीति सुहाई। बचन अगोचर किमि कहि जाई॥
खग मृग मगन देखि छबि होहीं। लिए चोरि चित राम बटोहीं॥

āgeṃ rāmu lakhanu bane pācheṃ| tāpasa beṣa birājata kācheṃ||
ubhaya bīca siya sohati kaiseṃ| brahma jīva bica māyā jaiseṃ||
bahuri kahaum̐ chabi jasi mana basaī| janu madhu madana madhya rati lasaī||
upamā bahuri kahaum̐ jiyam̐ johī| janu budha bidhu bica rohini sohī||
prabhu pada rekha bīca bica sītā| dharati carana maga calati sabhītā||
sīya rāma pada aṃka barāem̐| lakhana calahiṃ magu dāhina lāem̐||
rāma lakhana siya prīti suhāī| bacana agocara kimi kahi jāī||
khaga mṛga magana dekhi chabi hohīṃ| lie cori cita rāma baṭohīṃ||

दोहा 123
जिन्ह जिन्ह देखे पथिक प्रिय सिय समेत दोउ भाइ।
भव मगु अगमु अनंदु तेइ बिनु श्रम रहे सिराइ॥123॥
jinha jinha dekhe pathika priya siya sameta dou bhāi|
bhava magu agamu anaṃdu tei binu śrama rahe sirāi||123||
दोहा 124#

अजहुँ जासु उर सपनेहुँ काऊ। बसहुँ लखनु सिय रामु बटाऊ॥
राम धाम पथ पाइहि सोई। जो पथ पाव कबहुँ मुनि कोई॥
तब रघुबीर श्रमित सिय जानी। देखि निकट बटु सीतल पानी॥
तहँ बसि कंद मूल फल खाई। प्रात नहाइ चले रघुराई॥
देखत बन सर सैल सुहाए। बालमीकि आश्रम प्रभु आए॥
राम दीख मुनि बासु सुहावन। सुंदर गिरि काननु जलु पावन॥
सरनि सरोज बिटप बन फूले। गुंजत मंजु मधुप रस भूले॥
खग मृग बिपुल कोलाहल करहीं। बिरहित बैर मुदित मन चरहीं॥

ajahum̐ jāsu ura sapanehum̐ kāū| basahum̐ lakhanu siya rāmu baṭāū||
rāma dhāma patha pāihi soī| jo patha pāva kabahum̐ muni koī||
taba raghubīra śramita siya jānī| dekhi nikaṭa baṭu sītala pānī||
taham̐ basi kaṃda mūla phala khāī| prāta nahāi cale raghurāī||
dekhata bana sara saila suhāe| bālamīki āśrama prabhu āe||
rāma dīkha muni bāsu suhāvana| suṃdara giri kānanu jalu pāvana||
sarani saroja biṭapa bana phūle| guṃjata maṃju madhupa rasa bhūle||
khaga mṛga bipula kolāhala karahīṃ| birahita baira mudita mana carahīṃ||

दोहा 124
सुचि सुंदर आश्रमु निरखि हरषे राजिवनेन।
सुनि रघुबर आगमनु मुनि आगें आयउ लेन॥124॥
suci suṃdara āśramu nirakhi haraṣe rājivanena|
suni raghubara āgamanu muni āgeṃ āyau lena||124||
दोहा 125#

मुनि कहुँ राम दंडवत कीन्हा। आसिरबादु बिप्रबर दीन्हा॥
देखि राम छबि नयन जुड़ाने। करि सनमानु आश्रमहिं आने॥
मुनिबर अतिथि प्रानप्रिय पाए। कंद मूल फल मधुर मगाए॥
सिय सौमित्रि राम फल खाए। तब मुनि आश्रम दिए सुहाए॥
बालमीकि मन आनँदु भारी। मंगल मूरति नयन निहारी॥
तब कर कमल जोरि रघुराई। बोले बचन श्रवन सुखदाई॥
तुम्ह त्रिकाल दरसी मुनिनाथा। बिस्व बदर जिमि तुम्हरें हाथा॥
अस कहि प्रभु सब कथा बखानी। जेहि जेहि भाँति दीन्ह बनु रानी॥

muni kahum̐ rāma daṃḍavata kīnhā| āsirabādu biprabara dīnhā||
dekhi rāma chabi nayana juḍāne| kari sanamānu āśramahiṃ āne||
munibara atithi prānapriya pāe| kaṃda mūla phala madhura magāe||
siya saumitri rāma phala khāe| taba muni āśrama die suhāe||
bālamīki mana ānam̐du bhārī| maṃgala mūrati nayana nihārī||
taba kara kamala jori raghurāī| bole bacana śravana sukhadāī||
tumha trikāla darasī munināthā| bisva badara jimi tumhareṃ hāthā||
asa kahi prabhu saba kathā bakhānī| jehi jehi bhām̐ti dīnha banu rānī||

दोहा 125
तात बचन पुनि मातु हित भाइ भरत अस राउ।
मो कहुँ दरस तुम्हार प्रभु सबु मम पुन्य प्रभाउ॥125॥
tāta bacana puni mātu hita bhāi bharata asa rāu|
mo kahum̐ darasa tumhāra prabhu sabu mama punya prabhāu||125||
सोरठा 126#

देखि पाय मुनिराय तुम्हारे। भए सुकृत सब सुफल हमारे॥
अब जहँ राउर आयसु होई। मुनि उदबेगु न पावै कोई॥
मुनि तापस जिन्ह तें दुखु लहहीं। ते नरेस बिनु पावक दहहीं॥
मंगल मूल बिप्र परितोषू। दहइ कोटि कुल भूसुर रोषू॥
अस जियँ जानि कहिअ सोइ ठाऊँ। सिय सौमित्रि सहित जहँ जाऊँ॥
तहँ रचि रुचिर परन तृन साला। बासु करौं कछु काल कृपाला॥
सहज सरल सुनि रघुबर बानी। साधु साधु बोले मुनि ग्यानी॥
कस न कहहु अस रघुकुलकेतू। तुम्ह पालक संतत श्रुति सेतू॥

dekhi pāya munirāya tumhāre| bhae sukṛta saba suphala hamāre||
aba jaham̐ rāura āyasu hoī| muni udabegu na pāvai koī||
muni tāpasa jinha teṃ dukhu lahahīṃ| te naresa binu pāvaka dahahīṃ||
maṃgala mūla bipra paritoṣū| dahai koṭi kula bhūsura roṣū||
asa jiyam̐ jāni kahia soi ṭhāūm̐| siya saumitri sahita jaham̐ jāūm̐||
taham̐ raci rucira parana tṛna sālā| bāsu karauṃ kachu kāla kṛpālā||
sahaja sarala suni raghubara bānī| sādhu sādhu bole muni gyānī||
kasa na kahahu asa raghukulaketū| tumha pālaka saṃtata śruti setū||

छंद
श्रुति सेतु पालक राम तुम्ह जगदीस माया जानकी।
जो सृजति जगु पालति हरति रुख पाइ कृपानिधान की॥
जो सहससीसु अहीसु महिधरु लखनु सचराचर धनी।
सुर काज धरि नरराज तनु चले दलन खल निसिचर अनी॥
śruti setu pālaka rāma tumha jagadīsa māyā jānakī|
jo sṛjati jagu pālati harati rukha pāi kṛpānidhāna kī||
jo sahasasīsu ahīsu mahidharu lakhanu sacarācara dhanī|
sura kāja dhari nararāja tanu cale dalana khala nisicara anī||

सोरठा 126
राम सरूप तुम्हार बचन अगोचर बुद्धिपर।
अबिगत अकथ अपार नेति नित निगम कह॥126॥
rāma sarūpa tumhāra bacana agocara buddhipara|
abigata akatha apāra neti nita nigama kaha||126||
दोहा 127#

जगु पेखन तुम्ह देखनिहारे। बिधि हरि संभु नचावनिहारे॥
तेउ न जानहिं मरमु तुम्हारा। औरु तुम्हहि को जाननिहारा॥
सोइ जानइ जेहि देहु जनाई। जानत तुम्हहि तुम्हइ होइ जाई॥
तुम्हरिहि कृपाँ तुम्हहि रघुनंदन। जानहिं भगत भगत उर चंदन॥
चिदानंदमय देह तुम्हारी। बिगत बिकार जान अधिकारी॥
नर तनु धरेहु संत सुर काजा। कहहु करहु जस प्राकृत राजा॥
राम देखि सुनि चरित तुम्हारे। जड़ मोहहिं बुध होहिं सुखारे॥
तुम्ह जो कहहु करहु सबु साँचा। जस काछिअ तस चाहिअ नाचा॥

jagu pekhana tumha dekhanihāre| bidhi hari saṃbhu nacāvanihāre||
teu na jānahiṃ maramu tumhārā| auru tumhahi ko jānanihārā||
soi jānai jehi dehu janāī| jānata tumhahi tumhai hoi jāī||
tumharihi kṛpām̐ tumhahi raghunaṃdana| jānahiṃ bhagata bhagata ura caṃdana||
cidānaṃdamaya deha tumhārī| bigata bikāra jāna adhikārī||
nara tanu dharehu saṃta sura kājā| kahahu karahu jasa prākṛta rājā||
rāma dekhi suni carita tumhāre| jaḍa mohahiṃ budha hohiṃ sukhāre||
tumha jo kahahu karahu sabu sām̐cā| jasa kāchia tasa cāhia nācā||

दोहा 127
पूँछेहु मोहि कि रहौं कहँ मैं पूँछत सकुचाउँ।
जहँ न होहु तहँ देहु कहि तुम्हहि देखावौं ठाउँ॥127॥
pūm̐chehu mohi ki rahauṃ kaham̐ maiṃ pūm̐chata sakucāum̐|
jaham̐ na hohu taham̐ dehu kahi tumhahi dekhāvauṃ ṭhāum̐||127||
दोहा 128#

सुनि मुनि बचन प्रेम रस साने। सकुचि राम मन महुँ मुसुकाने॥
बालमीकि हँसि कहहिं बहोरी। बानी मधुर अमिअ रस बोरी॥
सुनहु राम अब कहउँ निकेता। जहाँ बसहु सिय लखन समेता॥
जिन्ह के श्रवन समुद्र समाना। कथा तुम्हारि सुभग सरि नाना॥
भरहिं निरंतर होहिं न पूरे। तिन्ह के हिय तुम्ह कहुँ गृह रूरे॥
लोचन चातक जिन्ह करि राखे। रहहिं दरस जलधर अभिलाषे॥
निदरहिं सरित सिंधु सर भारी। रूप बिंदु जल होहिं सुखारी॥
तिन्ह के हृदय सदन सुखदायक। बसहु बंधु सिय सह रघुनायक॥

suni muni bacana prema rasa sāne| sakuci rāma mana mahum̐ musukāne||
bālamīki ham̐si kahahiṃ bahorī| bānī madhura amia rasa borī||
sunahu rāma aba kahaum̐ niketā| jahām̐ basahu siya lakhana sametā||
jinha ke śravana samudra samānā| kathā tumhāri subhaga sari nānā||
bharahiṃ niraṃtara hohiṃ na pūre| tinha ke hiya tumha kahum̐ gṛha rūre||
locana cātaka jinha kari rākhe| rahahiṃ darasa jaladhara abhilāṣe||
nidarahiṃ sarita siṃdhu sara bhārī| rūpa biṃdu jala hohiṃ sukhārī||
tinha ke hṛdaya sadana sukhadāyaka| basahu baṃdhu siya saha raghunāyaka||

दोहा 128
जसु तुम्हार मानस बिमल हंसिनि जीहा जासु।
मुकुताहल गुन गन चुनइ राम बसहु हियँ तासु॥128॥
jasu tumhāra mānasa bimala haṃsini jīhā jāsu|
mukutāhala guna gana cunai rāma basahu hiyam̐ tāsu||128||
दोहा 129#

प्रभु प्रसाद सुचि सुभग सुबासा। सादर जासु लहइ नित नासा॥
तुम्हहि निबेदित भोजन करहीं। प्रभु प्रसाद पट भूषन धरहीं॥
सीस नवहिं सुर गुरु द्विज देखी। प्रीति सहित करि बिनय बिसेषी॥
कर नित करहिं राम पद पूजा। राम भरोस हृदयँ नहिं दूजा॥
चरन राम तीरथ चलि जाहीं। राम बसहु तिन्ह के मन माहीं॥
मंत्रराजु नित जपहिं तुम्हारा। पूजहिं तुम्हहि सहित परिवारा॥
तरपन होम करहिं बिधि नाना। बिप्र जेवाँइ देहिं बहु दाना॥
तुम्ह तें अधिक गुरहि जियँ जानी। सकल भायँ सेवहिं सनमानी॥

prabhu prasāda suci subhaga subāsā| sādara jāsu lahai nita nāsā||
tumhahi nibedita bhojana karahīṃ| prabhu prasāda paṭa bhūṣana dharahīṃ||
sīsa navahiṃ sura guru dvija dekhī| prīti sahita kari binaya biseṣī||
kara nita karahiṃ rāma pada pūjā| rāma bharosa hṛdayam̐ nahiṃ dūjā||
carana rāma tīratha cali jāhīṃ| rāma basahu tinha ke mana māhīṃ||
maṃtrarāju nita japahiṃ tumhārā| pūjahiṃ tumhahi sahita parivārā||
tarapana homa karahiṃ bidhi nānā| bipra jevām̐i dehiṃ bahu dānā||
tumha teṃ adhika gurahi jiyam̐ jānī| sakala bhāyam̐ sevahiṃ sanamānī||

दोहा 129
सबु करि मागहिं एक फलु राम चरन रति होउ।
तिन्ह कें मन मंदिर बसहु सिय रघुनंदन दोउ॥129॥
sabu kari māgahiṃ eka phalu rāma carana rati hou|
tinha keṃ mana maṃdira basahu siya raghunaṃdana dou||129||
दोहा 130#

काम कोह मद मान न मोहा। लोभ न छोभ न राग न द्रोहा॥
जिन्ह कें कपट दंभ नहिं माया। तिन्ह कें हृदय बसहु रघुराया॥
सब के प्रिय सब के हितकारी। दुख सुख सरिस प्रसंसा गारी॥
कहहिं सत्य प्रिय बचन बिचारी। जागत सोवत सरन तुम्हारी॥
तुम्हहि छाड़ि गति दूसरि नाहीं। राम बसहु तिन्ह के मन माहीं॥
जननी सम जानहिं परनारी। धनु पराव बिष तें बिष भारी॥
जे हरषहिं पर संपति देखी। दुखित होहिं पर बिपति बिसेषी॥
जिन्हहि राम तुम्ह प्रानपिआरे। तिन्ह के मन सुभ सदन तुम्हारे॥

kāma koha mada māna na mohā| lobha na chobha na rāga na drohā||
jinha keṃ kapaṭa daṃbha nahiṃ māyā| tinha keṃ hṛdaya basahu raghurāyā||
saba ke priya saba ke hitakārī| dukha sukha sarisa prasaṃsā gārī||
kahahiṃ satya priya bacana bicārī| jāgata sovata sarana tumhārī||
tumhahi chāḍi gati dūsari nāhīṃ| rāma basahu tinha ke mana māhīṃ||
jananī sama jānahiṃ paranārī| dhanu parāva biṣa teṃ biṣa bhārī||
je haraṣahiṃ para saṃpati dekhī| dukhita hohiṃ para bipati biseṣī||
jinhahi rāma tumha prānapiāre| tinha ke mana subha sadana tumhāre||

दोहा 130
स्वामि सखा पितु मातु गुर जिन्ह के सब तुम्ह तात।
मन मंदिर तिन्ह कें बसहु सीय सहित दोउ भ्रात॥130॥
svāmi sakhā pitu mātu gura jinha ke saba tumha tāta|
mana maṃdira tinha keṃ basahu sīya sahita dou bhrāta||130||
दोहा 131#

अवगुन तजि सब के गुन गहहीं। बिप्र धेनु हित संकट सहहीं॥
नीति निपुन जिन्ह कइ जग लीका। घर तुम्हार तिन्ह कर मनु नीका॥
गुन तुम्हार समुझइ निज दोसा। जेहि सब भाँति तुम्हार भरोसा॥
राम भगत प्रिय लागहिं जेही। तेहि उर बसहु सहित बैदेही॥
जाति पाँति धनु धरम बड़ाई। प्रिय परिवार सदन सुखदाई॥
सब तजि तुम्हहि रहइ उर लाई। तेहि के हृदयँ रहहु रघुराई॥
सरगु नरकु अपबरगु समाना। जहँ तहँ देख धरें धनु बाना॥
करम बचन मन राउर चेरा। राम करहु तेहि कें उर डेरा॥

avaguna taji saba ke guna gahahīṃ| bipra dhenu hita saṃkaṭa sahahīṃ||
nīti nipuna jinha kai jaga līkā| ghara tumhāra tinha kara manu nīkā||
guna tumhāra samujhai nija dosā| jehi saba bhām̐ti tumhāra bharosā||
rāma bhagata priya lāgahiṃ jehī| tehi ura basahu sahita baidehī||
jāti pām̐ti dhanu dharama baḍāī| priya parivāra sadana sukhadāī||
saba taji tumhahi rahai ura lāī| tehi ke hṛdayam̐ rahahu raghurāī||
saragu naraku apabaragu samānā| jaham̐ taham̐ dekha dhareṃ dhanu bānā||
karama bacana mana rāura cerā| rāma karahu tehi keṃ ura ḍerā||

दोहा 131
जाहि न चाहिअ कबहुँ कछु तुम्ह सन सहज सनेहु।
बसहु निरंतर तासु मन सो राउर निज गेहु॥131॥
jāhi na cāhia kabahum̐ kachu tumha sana sahaja sanehu|
basahu niraṃtara tāsu mana so rāura nija gehu||131||
दोहा 132#

एहि बिधि मुनिबर भवन देखाए। बचन सप्रेम राम मन भाए॥
कह मुनि सुनहु भानुकुलनायक। आश्रम कहउँ समय सुखदायक॥
चित्रकूट गिरि करहु निवासू। तहँ तुम्हार सब भाँति सुपासू॥
सैलु सुहावन कानन चारू। करि केहरि मृग बिहग बिहारू॥
नदी पुनीत पुरान बखानी। अत्रिप्रिया निज तपबल आनी॥
सुरसरि धार नाउँ मंदाकिनि। जो सब पातक पोतक डाकिनि॥
अत्रि आदि मुनिबर बहु बसहीं। करहिं जोग जप तप तन कसहीं॥
चलहु सफल श्रम सब कर करहू। राम देहु गौरव गिरिबरहू॥

ehi bidhi munibara bhavana dekhāe| bacana saprema rāma mana bhāe||
kaha muni sunahu bhānukulanāyaka| āśrama kahaum̐ samaya sukhadāyaka||
citrakūṭa giri karahu nivāsū| taham̐ tumhāra saba bhām̐ti supāsū||
sailu suhāvana kānana cārū| kari kehari mṛga bihaga bihārū||
nadī punīta purāna bakhānī| atripriyā nija tapabala ānī||
surasari dhāra nāum̐ maṃdākini| jo saba pātaka potaka ḍākini||
atri ādi munibara bahu basahīṃ| karahiṃ joga japa tapa tana kasahīṃ||
calahu saphala śrama saba kara karahū| rāma dehu gaurava giribarahū||

दोहा 132
चित्रकूट महिमा अमित कही महामुनि गाइ।
आए नहाए सरित बर सिय समेत दोउ भाइ॥132॥
citrakūṭa mahimā amita kahī mahāmuni gāi|
āe nahāe sarita bara siya sameta dou bhāi||132||
दोहा 133#

रघुबर कहेउ लखन भल घाटू। करहु कतहुँ अब ठाहर ठाटू॥
लखन दीख पय उतर करारा। चहुँ दिसि फिरेउ धनुष जिमि नारा॥
नदी पनच सर सम दम दाना। सकल कलुष कलि साउज नाना॥
चित्रकूट जनु अचल अहेरी। चुकइ न घात मार मुठभेरी॥
अस कहि लखन ठाउँ देखरावा। थलु बिलोकि रघुबर सुखु पावा॥
रमेउ राम मनु देवन्ह जाना। चले सहित सुर थपति प्रधाना॥
कोल किरात बेष सब आए। रचे परन तृन सदन सुहाए॥
बरनि न जाहिं मंजु दुइ साला। एक ललित लघु एक बिसाला॥

raghubara kaheu lakhana bhala ghāṭū| karahu katahum̐ aba ṭhāhara ṭhāṭū||
lakhana dīkha paya utara karārā| cahum̐ disi phireu dhanuṣa jimi nārā||
nadī panaca sara sama dama dānā| sakala kaluṣa kali sāuja nānā||
citrakūṭa janu acala aherī| cukai na ghāta māra muṭhabherī||
asa kahi lakhana ṭhāum̐ dekharāvā| thalu biloki raghubara sukhu pāvā||
rameu rāma manu devanha jānā| cale sahita sura thapati pradhānā||
kola kirāta beṣa saba āe| race parana tṛna sadana suhāe||
barani na jāhiṃ maṃju dui sālā| eka lalita laghu eka bisālā||

दोहा 133
लखन जानकी सहित प्रभु राजत रुचिर निकेत।
सोह मदनु मुनि बेष जनु रति रितुराज समेत॥133॥
lakhana jānakī sahita prabhu rājata rucira niketa|
soha madanu muni beṣa janu rati riturāja sameta||133||
मासपारायण, सत्रहवाँ विश्रामDay 17 of the 30-day Masparayan ends here

Completed Ayodhya Kand — Part 5?

Mark Masparayan day 17 done, light a diya, or share the path with family.

Text: the Gita Press edition of Shri Ramcharitmanas, checked against two independent transcriptions. Spotted an error? Suggest a correction.

Ayodhya Kand — Part 5 — text

Completed Ayodhya Kand — Part 5?