Ramcharitmanas Ayodhya Kand Part 8 (Doha 216–236)

दोहा 216#

कीन्ह निमज्जनु तीरथराजा। नाइ मुनिहि सिर सहित समाजा॥
रिषि आयसु असीस सिर राखी। करि दंडवत बिनय बहु भाषी॥
पथ गति कुसल साथ सब लीन्हे। चले चित्रकूटहिं चितु दीन्हें॥
रामसखा कर दीन्हें लागू। चलत देह धरि जनु अनुरागू॥
नहिं पद त्रान सीस नहिं छाया। पेमु नेमु ब्रतु धरमु अमाया॥
लखन राम सिय पंथ कहानी। पूँछत सखहि कहत मृदु बानी॥
राम बास थल बिटप बिलोकें। उर अनुराग रहत नहिं रोकैं॥
देखि दसा सुर बरिसहिं फूला। भइ मृदु महि मगु मंगल मूला॥

kīnha nimajjanu tīratharājā| nāi munihi sira sahita samājā||
riṣi āyasu asīsa sira rākhī| kari daṃḍavata binaya bahu bhāṣī||
patha gati kusala sātha saba līnhe| cale citrakūṭahiṃ citu dīnheṃ||
rāmasakhā kara dīnheṃ lāgū| calata deha dhari janu anurāgū||
nahiṃ pada trāna sīsa nahiṃ chāyā| pemu nemu bratu dharamu amāyā||
lakhana rāma siya paṃtha kahānī| pūm̐chata sakhahi kahata mṛdu bānī||
rāma bāsa thala biṭapa bilokeṃ| ura anurāga rahata nahiṃ rokaiṃ||
dekhi dasā sura barisahiṃ phūlā| bhai mṛdu mahi magu maṃgala mūlā||

दोहा 216
किएँ जाहिं छाया जलद सुखद बहइ बर बात।
तस मगु भयउ न राम कहँ जस भा भरतहि जात॥216॥
kiem̐ jāhiṃ chāyā jalada sukhada bahai bara bāta|
tasa magu bhayau na rāma kaham̐ jasa bhā bharatahi jāta||216||
दोहा 217#

जड़ चेतन मग जीव घनेरे। जे चितए प्रभु जिन्ह प्रभु हेरे॥
ते सब भए परम पद जोगू। भरत दरस मेटा भव रोगू॥
यह बड़ि बात भरत कइ नाहीं। सुमिरत जिनहि रामु मन माहीं॥
बारक राम कहत जग जेऊ। होत तरन तारन नर तेऊ॥
भरत राम प्रिय पुनि लघु भ्राता। कस न होइ मगु मंगलदाता॥
सिद्ध साधु मुनिबर अस कहहीं। भरतहि निरखि हरष हियँ लहहीं॥
देखि प्रभाउ सुरेसहि सोचू। जगु भल भलेहि पोच कहुँ पोचू॥
गुर सन कहेउ करिअ प्रभु सोई। रामहि भरतहि भेंट न होई॥

jaḍa cetana maga jīva ghanere| je citae prabhu jinha prabhu here||
te saba bhae parama pada jogū| bharata darasa meṭā bhava rogū||
yaha baḍi bāta bharata kai nāhīṃ| sumirata jinahi rāmu mana māhīṃ||
bāraka rāma kahata jaga jeū| hota tarana tārana nara teū||
bharata rāma priya puni laghu bhrātā| kasa na hoi magu maṃgaladātā||
siddha sādhu munibara asa kahahīṃ| bharatahi nirakhi haraṣa hiyam̐ lahahīṃ||
dekhi prabhāu suresahi socū| jagu bhala bhalehi poca kahum̐ pocū||
gura sana kaheu karia prabhu soī| rāmahi bharatahi bheṃṭa na hoī||

दोहा 217
रामु सँकोची प्रेम बस भरत सपेम पयोधि।
बनी बात बेगरन चहति करिअ जतनु छलु सोधि॥217॥
rāmu sam̐kocī prema basa bharata sapema payodhi|
banī bāta begarana cahati karia jatanu chalu sodhi||217||
दोहा 218#

बचन सुनत सुरगुरु मुसुकाने। सहसनयन बिनु लोचन जाने॥
मायापति सेवक सन माया। करइ त उलटि परइ सुरराया॥
तब किछु कीन्ह राम रुख जानी। अब कुचालि करि होइहि हानी॥
सुनु सुरेस रघुनाथ सुभाऊ। निज अपराध रिसाहिं न काऊ॥
जो अपराध भगत कर करई। राम रोष पावक सो जरई॥
लोकहुँ बेद बिदित इतिहासा। यह महिमा जानहिं दुरबासा॥
भरत सरिस को राम सनेही। जगु जप राम रामु जप जेही॥

bacana sunata suraguru musukāne| sahasanayana binu locana jāne||
māyāpati sevaka sana māyā| karai ta ulaṭi parai surarāyā||
taba kichu kīnha rāma rukha jānī| aba kucāli kari hoihi hānī||
sunu suresa raghunātha subhāū| nija aparādha risāhiṃ na kāū||
jo aparādha bhagata kara karaī| rāma roṣa pāvaka so jaraī||
lokahum̐ beda bidita itihāsā| yaha mahimā jānahiṃ durabāsā||
bharata sarisa ko rāma sanehī| jagu japa rāma rāmu japa jehī||

दोहा 218
मनहुँ न आनिअ अमरपति रघुबर भगत अकाजु।
अजस लोक परलोक दुख दिन दिन सोक समाज॥218॥
manahum̐ na ānia amarapati raghubara bhagata akāju|
ajasa loka paraloka dukha dina dina soka samāja||218||
दोहा 219#

सुनु सुरेस उपदेसु हमारा। रामहि सेवकु परम पिआरा॥
मानत सुखु सेवक सेवकाई। सेवक बैर बैरु अधिकाई॥
जद्यपि सम नहिं राग न रोषू। गहहिं न पाप पूनु गुन दोषू॥
करम प्रधान बिस्व करि राखा। जो जस करइ सो तस फलु चाखा॥
तदपि करहिं सम बिषम बिहारा। भगत अभगत हृदय अनुसारा॥
अगुन अलेप अमान एकरस। रामु सगुन भए भगत पेम बस॥
राम सदा सेवक रुचि राखी। बेद पुरान साधु सुर साखी॥
अस जियँ जानि तजहु कुटिलाई। करहु भरत पद प्रीति सुहाई॥

sunu suresa upadesu hamārā| rāmahi sevaku parama piārā||
mānata sukhu sevaka sevakāī| sevaka baira bairu adhikāī||
jadyapi sama nahiṃ rāga na roṣū| gahahiṃ na pāpa pūnu guna doṣū||
karama pradhāna bisva kari rākhā| jo jasa karai so tasa phalu cākhā||
tadapi karahiṃ sama biṣama bihārā| bhagata abhagata hṛdaya anusārā||
aguna alepa amāna ekarasa| rāmu saguna bhae bhagata pema basa||
rāma sadā sevaka ruci rākhī| beda purāna sādhu sura sākhī||
asa jiyam̐ jāni tajahu kuṭilāī| karahu bharata pada prīti suhāī||

दोहा 219
राम भगत परहित निरत पर दुख दुखी दयाल।
भगत सिरोमनि भरत तें जनि डरपहु सुरपाल॥219॥
rāma bhagata parahita nirata para dukha dukhī dayāla|
bhagata siromani bharata teṃ jani ḍarapahu surapāla||219||
दोहा 220#

सत्यसंध प्रभु सुर हितकारी। भरत राम आयस अनुसारी॥
स्वारथ बिबस बिकल तुम्ह होहू। भरत दोसु नहिं राउर मोहू॥
सुनि सुरबर सुरगुरु बर बानी। भा प्रमोद मन मिटी गलानी॥
बरषि प्रसून हरषि सुरराऊ। लगे सराहन भरत सुभाऊ॥
एहि बिधि भरत चले मग जाहीं। दसा देखि मुनि सिद्ध सिहाहीं॥
जबहिं रामु कहि लेहिं उसासा। उमगत पेमु मनहुँ चहु पासा॥
द्रवहिं बचन सुनि कुलिस पषाना। पुरजन पेमु न जाइ बखाना॥
बीच बास करि जमुनहिं आए। निरखि नीरु लोचन जल छाए॥

satyasaṃdha prabhu sura hitakārī| bharata rāma āyasa anusārī||
svāratha bibasa bikala tumha hohū| bharata dosu nahiṃ rāura mohū||
suni surabara suraguru bara bānī| bhā pramoda mana miṭī galānī||
baraṣi prasūna haraṣi surarāū| lage sarāhana bharata subhāū||
ehi bidhi bharata cale maga jāhīṃ| dasā dekhi muni siddha sihāhīṃ||
jabahiṃ rāmu kahi lehiṃ usāsā| umagata pemu manahum̐ cahu pāsā||
dravahiṃ bacana suni kulisa paṣānā| purajana pemu na jāi bakhānā||
bīca bāsa kari jamunahiṃ āe| nirakhi nīru locana jala chāe||

दोहा 220
रघुबर बरन बिलोकि बर बारि समेत समाज।
होत मगन बारिधि बिरह चढ़े बिबेक जहाज॥220॥
raghubara barana biloki bara bāri sameta samāja|
hota magana bāridhi biraha caḍhe bibeka jahāja||220||
दोहा 221#

जमुन तीर तेहि दिन करि बासू। भयउ समय सम सबहि सुपासू॥
रातहिं घाट घाट की तरनी। आईं अगनित जाहिं न बरनी॥
प्रात पार भए एकहि खेंवाँ। तोषे रामसखा की सेवाँ॥
चले नहाइ नदिहि सिर नाई। साथ निषादनाथ दोउ भाई॥
आगें मुनिबर बाहन आछें। राजसमाज जाइ सबु पाछें॥
तेहि पाछें दोउ बंधु पयादें। भूषन बसन बेष सुठि सादें॥
सेवक सुह्रद सचिवसुत साथा। सुमिरत लखन सीय रघुनाथा॥
जहँ जहँ राम बास बिश्रामा। तहँ तहँ करहिं सप्रेम प्रनामा॥

jamuna tīra tehi dina kari bāsū| bhayau samaya sama sabahi supāsū||
rātahiṃ ghāṭa ghāṭa kī taranī| āīṃ aganita jāhiṃ na baranī||
prāta pāra bhae ekahi kheṃvām̐| toṣe rāmasakhā kī sevām̐||
cale nahāi nadihi sira nāī| sātha niṣādanātha dou bhāī||
āgeṃ munibara bāhana ācheṃ| rājasamāja jāi sabu pācheṃ||
tehi pācheṃ dou baṃdhu payādeṃ| bhūṣana basana beṣa suṭhi sādeṃ||
sevaka suhrada sacivasuta sāthā| sumirata lakhana sīya raghunāthā||
jaham̐ jaham̐ rāma bāsa biśrāmā| taham̐ taham̐ karahiṃ saprema pranāmā||

दोहा 221
मगबासी नर नारि सुनि धाम काम तजि धाइ।
देखि सरूप सनेह सब मुदित जनम फलु पाइ॥221॥
magabāsī nara nāri suni dhāma kāma taji dhāi|
dekhi sarūpa saneha saba mudita janama phalu pāi||221||
दोहा 222#

कहहिं सपेम एक एक पाहीं। रामु लखनु सखि होहिं कि नाहीं॥
बय बपु बरन रूप सोइ आली। सील सनेह सरिस सम चाली॥
बेषु न सो सखि सीय न संगा। आगें अनी चली चतुरंगा॥
नहिं प्रसन्न मुख मानस खेदा। सखि संदेहु होइ एहिं भेदा॥
तासु तरक तियगन मन मानी। कहहिं सकल तेहि सम न सयानी॥
तेहि सराहि बानी फुरि पूजी। बोली मधुर बचन तिय दूजी॥
कहि सपेम सब कथाप्रसंगू। जेहि बिधि राम राज रस भंगू॥
भरतहि बहुरि सराहन लागी। सील सनेह सुभाय सुभागी॥

kahahiṃ sapema eka eka pāhīṃ| rāmu lakhanu sakhi hohiṃ ki nāhīṃ||
baya bapu barana rūpa soi ālī| sīla saneha sarisa sama cālī||
beṣu na so sakhi sīya na saṃgā| āgeṃ anī calī caturaṃgā||
nahiṃ prasanna mukha mānasa khedā| sakhi saṃdehu hoi ehiṃ bhedā||
tāsu taraka tiyagana mana mānī| kahahiṃ sakala tehi sama na sayānī||
tehi sarāhi bānī phuri pūjī| bolī madhura bacana tiya dūjī||
kahi sapema saba kathāprasaṃgū| jehi bidhi rāma rāja rasa bhaṃgū||
bharatahi bahuri sarāhana lāgī| sīla saneha subhāya subhāgī||

दोहा 222
चलत पयादें खात फल पिता दीन्ह तजि राजु।
जात मनावन रघुबरहि भरत सरिस को आजु॥222॥
calata payādeṃ khāta phala pitā dīnha taji rāju|
jāta manāvana raghubarahi bharata sarisa ko āju||222||
दोहा 223#

भायप भगति भरत आचरनू। कहत सुनत दुख दूषन हरनू॥
जो कछु कहब थोर सखि सोई। राम बंधु अस काहे न होई॥
हम सब सानुज भरतहि देखे। भइन्ह धन्य जुबती जन लेखे॥
सुनि गुन देखि दसा पछिताहीं। कैकइ जननि जोग सुत नाहीं॥
कोउ कह दूषनु रानिहि नाहिन। बिधि सबु कीन्ह हमहि जो दाहिन॥
कहँ हम लोक बेद बिधि हीनी। लघु तिय कुल करतूति मलीनी॥
बसहिं कुदेस कुगाँव कुबामा। कहँ यह दरस पुन्य परिनामा॥
अस अनंदु अचिरिजु प्रति ग्रामा। जनु मरुभूमि कलपतरु जामा॥

bhāyapa bhagati bharata ācaranū| kahata sunata dukha dūṣana haranū||
jo kachu kahaba thora sakhi soī| rāma baṃdhu asa kāhe na hoī||
hama saba sānuja bharatahi dekhe| bhainha dhanya jubatī jana lekhe||
suni guna dekhi dasā pachitāhīṃ| kaikai janani joga suta nāhīṃ||
kou kaha dūṣanu rānihi nāhina| bidhi sabu kīnha hamahi jo dāhina||
kaham̐ hama loka beda bidhi hīnī| laghu tiya kula karatūti malīnī||
basahiṃ kudesa kugām̐va kubāmā| kaham̐ yaha darasa punya parināmā||
asa anaṃdu aciriju prati grāmā| janu marubhūmi kalapataru jāmā||

दोहा 223
भरत दरसु देखत खुलेउ मग लोगन्ह कर भागु।
जनु सिंघलबासिन्ह भयउ बिधि बस सुलभ प्रयागु॥223॥
bharata darasu dekhata khuleu maga loganha kara bhāgu|
janu siṃghalabāsinha bhayau bidhi basa sulabha prayāgu||223||
दोहा 224#

निज गुन सहित राम गुन गाथा। सुनत जाहिं सुमिरत रघुनाथा॥
तीरथ मुनि आश्रम सुरधामा। निरखि निमज्जहिं करहिं प्रनामा॥
मनहीं मन मागहिं बरु एहू। सीय राम पद पदुम सनेहू॥
मिलहिं किरात कोल बनबासी। बैखानस बटु जती उदासी॥
करि प्रनामु पूँछहिं जेहि तेही। केहि बन लखन राम बैदेही॥
ते प्रभु समाचार सब कहहीं। भरतहि देखि जनम फल लहहीं॥
जे जन कहहिं कुसल हम देखे। ते प्रिय राम लखन सम लेखे॥
एहि बिधि बूझत सबहि सुबानी। सुनत राम बनबास कहानी॥

nija guna sahita rāma guna gāthā| sunata jāhiṃ sumirata raghunāthā||
tīratha muni āśrama suradhāmā| nirakhi nimajjahiṃ karahiṃ pranāmā||
manahīṃ mana māgahiṃ baru ehū| sīya rāma pada paduma sanehū||
milahiṃ kirāta kola banabāsī| baikhānasa baṭu jatī udāsī||
kari pranāmu pūm̐chahiṃ jehi tehī| kehi bana lakhana rāma baidehī||
te prabhu samācāra saba kahahīṃ| bharatahi dekhi janama phala lahahīṃ||
je jana kahahiṃ kusala hama dekhe| te priya rāma lakhana sama lekhe||
ehi bidhi būjhata sabahi subānī| sunata rāma banabāsa kahānī||

दोहा 224
तेहि बासर बसि प्रातहीं चले सुमिरि रघुनाथ।
राम दरस की लालसा भरत सरिस सब साथ॥224॥
tehi bāsara basi prātahīṃ cale sumiri raghunātha|
rāma darasa kī lālasā bharata sarisa saba sātha||224||
दोहा 225#

मंगल सगुन होहिं सब काहू। फरकहिं सुखद बिलोचन बाहू॥
भरतहि सहित समाज उछाहू। मिलिहहिं रामु मिटहि दुख दाहू॥
करत मनोरथ जस जियँ जाके। जाहिं सनेह सुरा सब छाके॥
सिथिल अंग पग मग डगि डोलहिं। बिहबल बचन पेम बस बोलहिं॥
रामसखाँ तेहि समय देखावा। सैल सिरोमनि सहज सुहावा॥
जासु समीप सरित पय तीरा। सीय समेत बसहिं दोउ बीरा॥
देखि करहिं सब दंड प्रनामा। कहि जय जानकि जीवन रामा॥
प्रेम मगन अस राज समाजू। जनु फिरि अवध चले रघुराजू॥

maṃgala saguna hohiṃ saba kāhū| pharakahiṃ sukhada bilocana bāhū||
bharatahi sahita samāja uchāhū| milihahiṃ rāmu miṭahi dukha dāhū||
karata manoratha jasa jiyam̐ jāke| jāhiṃ saneha surā saba chāke||
sithila aṃga paga maga ḍagi ḍolahiṃ| bihabala bacana pema basa bolahiṃ||
rāmasakhām̐ tehi samaya dekhāvā| saila siromani sahaja suhāvā||
jāsu samīpa sarita paya tīrā| sīya sameta basahiṃ dou bīrā||
dekhi karahiṃ saba daṃḍa pranāmā| kahi jaya jānaki jīvana rāmā||
prema magana asa rāja samājū| janu phiri avadha cale raghurājū||

दोहा 225
भरत प्रेमु तेहि समय जस तस कहि सकइ न सेषु।
कबिहि अगम जिमि ब्रह्मसुखु अह मम मलिन जनेषु॥225॥
bharata premu tehi samaya jasa tasa kahi sakai na seṣu|
kabihi agama jimi brahmasukhu aha mama malina janeṣu||225||
दोहा 226#

सकल सनेह सिथिल रघुबर कें। गए कोस दुइ दिनकर ढरकें॥
जल थल देखि बसे निसि बीते। कीन्ह गवन रघुनाथ पिरीते॥
उहाँ रामु रजनी अवसेषा। जागे सीयँ सपन अस देखा॥
सहित समाज भरत जनु आए। नाथ बियोग ताप तन ताए॥
सकल मलिन मन दीन दुखारी। देखीं सासु आन अनुहारी॥
सुनि सिय सपन भरे जल लोचन। भए सोचबस सोच बिमोचन॥
लखन सपन यह नीक न होई। कठिन कुचाह सुनाइहि कोई॥
अस कहि बंधु समेत नहाने। पूजि पुरारि साधु सनमाने॥

sakala saneha sithila raghubara keṃ| gae kosa dui dinakara ḍharakeṃ||
jala thala dekhi base nisi bīte| kīnha gavana raghunātha pirīte||
uhām̐ rāmu rajanī avaseṣā| jāge sīyam̐ sapana asa dekhā||
sahita samāja bharata janu āe| nātha biyoga tāpa tana tāe||
sakala malina mana dīna dukhārī| dekhīṃ sāsu āna anuhārī||
suni siya sapana bhare jala locana| bhae socabasa soca bimocana||
lakhana sapana yaha nīka na hoī| kaṭhina kucāha sunāihi koī||
asa kahi baṃdhu sameta nahāne| pūji purāri sādhu sanamāne||

छंद
सनमानि सुर मुनि बंदि बैठे उत्तर दिसि देखत भए।
नभ धूरि खग मृग भूरि भागे बिकल प्रभु आश्रम गए॥
तुलसी उठे अवलोकि कारन काह चित सचकित रहे।
सब समाचार किरात कोलन्हि आइ तेहि अवसर कहे॥
sanamāni sura muni baṃdi baiṭhe uttara disi dekhata bhae|
nabha dhūri khaga mṛga bhūri bhāge bikala prabhu āśrama gae||
tulasī uṭhe avaloki kārana kāha cita sacakita rahe|
saba samācāra kirāta kolanhi āi tehi avasara kahe||

दोहा 226
सुनत सुमंगल बैन मन प्रमोद तन पुलक भर।
सरद सरोरुह नैन तुलसी भरे सनेह जल॥226॥
sunata sumaṃgala baina mana pramoda tana pulaka bhara|
sarada saroruha naina tulasī bhare saneha jala||226||
दोहा 227#

बहुरि सोचबस भे सियरवनू। कारन कवन भरत आगवनू॥
एक आइ अस कहा बहोरी। सेन संग चतुरंग न थोरी॥
सो सुनि रामहि भा अति सोचू। इत पितु बच इत बंधु सकोचू॥
भरत सुभाउ समुझि मन माहीं। प्रभु चित हित थिति पावत नाहीं॥
समाधान तब भा यह जाने। भरत कहे महुँ साधु सयाने॥
लखन लखेउ प्रभु हृदयँ खभारू। कहत समय सम नीति बिचारू॥
बिनु पूँछ कछु कहउँ गोसाईं। सेवक समय न ढीठ ढिठाई॥
तुम्ह सर्बग्य सिरोमनि स्वामी। आपनि समुझि कहउँ अनुगामी॥

bahuri socabasa bhe siyaravanū| kārana kavana bharata āgavanū||
eka āi asa kahā bahorī| sena saṃga caturaṃga na thorī||
so suni rāmahi bhā ati socū| ita pitu baca ita baṃdhu sakocū||
bharata subhāu samujhi mana māhīṃ| prabhu cita hita thiti pāvata nāhīṃ||
samādhāna taba bhā yaha jāne| bharata kahe mahum̐ sādhu sayāne||
lakhana lakheu prabhu hṛdayam̐ khabhārū| kahata samaya sama nīti bicārū||
binu pūm̐cha kachu kahaum̐ gosāīṃ| sevaka samaya na ḍhīṭha ḍhiṭhāī||
tumha sarbagya siromani svāmī| āpani samujhi kahaum̐ anugāmī||

दोहा 227
नाथ सुह्रद सुठि सरल चित सील सनेह निधान॥
सब पर प्रीति प्रतीति जियँ जानिअ आपु समान॥227॥
nātha suhrada suṭhi sarala cita sīla saneha nidhāna||
saba para prīti pratīti jiyam̐ jānia āpu samāna||227||
दोहा 228#

बिषई जीव पाइ प्रभुताई। मूढ़ मोह बस होहिं जनाई॥
भरत नीति रत साधु सुजाना। प्रभु पद प्रेम सकल जग जाना॥
तेऊ आजु राम पद पाई। चले धरम मरजाद मेटाई॥
कुटिल कुबंध कुअवसरु ताकी। जानि राम बनबास एकाकी॥
करि कुमंत्रु मन साजि समाजू। आए करइ अकंटक राजू॥
कोटि प्रकार कलपि कुटिलाई। आए दल बटोरि दोउ भाई॥
जौं जियँ होति न कपट कुचाली। केहि सोहाति रथ बाजि गजाली॥
भरतहि दोसु देइ को जाएँ। जग बौराइ राज पद पाएँ॥

biṣaī jīva pāi prabhutāī| mūḍha moha basa hohiṃ janāī||
bharata nīti rata sādhu sujānā| prabhu pada prema sakala jaga jānā||
teū āju rāma pada pāī| cale dharama marajāda meṭāī||
kuṭila kubaṃdha kuavasaru tākī| jāni rāma banabāsa ekākī||
kari kumaṃtru mana sāji samājū| āe karai akaṃṭaka rājū||
koṭi prakāra kalapi kuṭilāī| āe dala baṭori dou bhāī||
jauṃ jiyam̐ hoti na kapaṭa kucālī| kehi sohāti ratha bāji gajālī||
bharatahi dosu dei ko jāem̐| jaga baurāi rāja pada pāem̐||

दोहा 228
ससि गुर तिय गामी नघुषु चढ़ेउ भूमिसुर जान।
लोक बेद तें बिमुख भा अधम न बेन समान॥228॥
sasi gura tiya gāmī naghuṣu caḍheu bhūmisura jāna|
loka beda teṃ bimukha bhā adhama na bena samāna||228||
दोहा 229#

सहसबाहु सुरनाथु त्रिसंकू। केहि न राजमद दीन्ह कलंकू॥
भरत कीन्ह यह उचित उपाऊ। रिपु रिन रंच न राखब काऊ॥
एक कीन्हि नहिं भरत भलाई। निदरे राम जानि असहाई॥
समुझि परिहि सोउ आजु बिसेषी। समर सरोष राम मुख पेखी॥
एतना कहत नीति रस भूला। रन रस बिटप पुलक मिस फूला॥
प्रभु पद बंदि सीस रज राखी। बोले सत्य सहज बल भाषी॥
अनुचित नाथ न मानब मोरा। भरत हमहि उपचार न थोरा॥
कहँ लगि सहिअ रहिअ मनु मारें। नाथ साथ धनु हाथ हमारे॥

sahasabāhu suranāthu trisaṃkū| kehi na rājamada dīnha kalaṃkū||
bharata kīnha yaha ucita upāū| ripu rina raṃca na rākhaba kāū||
eka kīnhi nahiṃ bharata bhalāī| nidare rāma jāni asahāī||
samujhi parihi sou āju biseṣī| samara saroṣa rāma mukha pekhī||
etanā kahata nīti rasa bhūlā| rana rasa biṭapa pulaka misa phūlā||
prabhu pada baṃdi sīsa raja rākhī| bole satya sahaja bala bhāṣī||
anucita nātha na mānaba morā| bharata hamahi upacāra na thorā||
kaham̐ lagi sahia rahia manu māreṃ| nātha sātha dhanu hātha hamāre||

दोहा 229
छत्रि जाति रघुकुल जनमु राम अनुग जगु जान।
लातहुँ मारे चढ़ति सिर नीच को धूरि समान॥229॥
chatri jāti raghukula janamu rāma anuga jagu jāna|
lātahum̐ māre caḍhati sira nīca ko dhūri samāna||229||
दोहा 230#

उठि कर जोरि रजायसु मागा। मनहुँ बीर रस सोवत जागा॥
बाँधि जटा सिर कसि कटि भाथा। साजि सरासन सायक हाथा॥
आजु राम सेवक जस लेऊँ। भरतहि समर सिखावन देऊँ॥
राम निरादर कर फल पाई। सोवहुँ समर सेज दोउ भाई॥
आइ बना भल सकल समाजू। प्रगट करउँ रिस पाछिल आजू॥
जिमि करि निकर दलइ मृगराजू। लेइ लपेटि लवा जिमि बाजू॥
तैसेहिं भरतहि सेन समेता। सानुज निदरि निपातउँ खेता॥
जौं सहाय कर संकरु आई। तौ मारउँ रन राम दोहाई॥

uṭhi kara jori rajāyasu māgā| manahum̐ bīra rasa sovata jāgā||
bām̐dhi jaṭā sira kasi kaṭi bhāthā| sāji sarāsana sāyaka hāthā||
āju rāma sevaka jasa leūm̐| bharatahi samara sikhāvana deūm̐||
rāma nirādara kara phala pāī| sovahum̐ samara seja dou bhāī||
āi banā bhala sakala samājū| pragaṭa karaum̐ risa pāchila ājū||
jimi kari nikara dalai mṛgarājū| lei lapeṭi lavā jimi bājū||
taisehiṃ bharatahi sena sametā| sānuja nidari nipātaum̐ khetā||
jauṃ sahāya kara saṃkaru āī| tau māraum̐ rana rāma dohāī||

दोहा 230
अति सरोष माखे लखनु लखि सुनि सपथ प्रवान।
सभय लोक सब लोकपति चाहत भभरि भगान॥230॥
ati saroṣa mākhe lakhanu lakhi suni sapatha pravāna|
sabhaya loka saba lokapati cāhata bhabhari bhagāna||230||
दोहा 231#

जगु भय मगन गगन भइ बानी। लखन बाहुबलु बिपुल बखानी॥
तात प्रताप प्रभाउ तुम्हारा। को कहि सकइ को जाननिहारा॥
अनुचित उचित काज कछु होऊ। समुझि करिअ भल कह सबु कोऊ॥
सहसा करि पाछे पछिताहीं। कहहिं बेद बुध ते बुध नाहीं॥
सुनि सुर बचन लखन सकुचाने। राम सीय सादर सनमाने॥
कही तात तुम्ह नीति सुहाई। सब तें कठिन राजमदु भाई॥
जो अचवँत नृप मातहिं तेई। नाहिन साधुसभा जेहिं सेई॥
सुनहु लखन भल भरत सरीसा। बिधि प्रपंच महँ सुना न दीसा॥

jagu bhaya magana gagana bhai bānī| lakhana bāhubalu bipula bakhānī||
tāta pratāpa prabhāu tumhārā| ko kahi sakai ko jānanihārā||
anucita ucita kāja kachu hoū| samujhi karia bhala kaha sabu koū||
sahasā kari pāche pachitāhīṃ| kahahiṃ beda budha te budha nāhīṃ||
suni sura bacana lakhana sakucāne| rāma sīya sādara sanamāne||
kahī tāta tumha nīti suhāī| saba teṃ kaṭhina rājamadu bhāī||
jo acavam̐ta nṛpa mātahiṃ teī| nāhina sādhusabhā jehiṃ seī||
sunahu lakhana bhala bharata sarīsā| bidhi prapaṃca maham̐ sunā na dīsā||

दोहा 231
भरतहि होइ न राजमदु बिधि हरि हर पद पाइ॥
कबहुँ कि काँजी सीकरनि छीरसिंधु बिनसाइ॥231॥
bharatahi hoi na rājamadu bidhi hari hara pada pāi||
kabahum̐ ki kām̐jī sīkarani chīrasiṃdhu binasāi||231||
दोहा 232#

तिमिरु तरुन तरनिहि मकु गिलई। गगनु मगन मकु मेघहिं मिलई॥
गोपद जल बूड़हिं घटजोनी। सहज छमा बरु छाड़इ छोनी॥
मसक फूँक मकु मेरु उड़ाई। होइ न नृपमदु भरतहि भाई॥
लखन तुम्हार सपथ पितु आना। सुचि सुबंधु नहिं भरत समाना॥
सगुन खीरु अवगुन जल ताता। मिलइ रचइ परपंचु बिधाता॥
भरतु हंस रबिबंस तड़ागा। जनमि कीन्ह गुन दोष बिभागा॥
गहि गुन पय तजि अवगुन बारी। निज जस जगत कीन्हि उजिआरी॥
कहत भरत गुन सील सुभाऊ। पेम पयोधि मगन रघुराऊ॥

timiru taruna taranihi maku gilaī| gaganu magana maku meghahiṃ milaī||
gopada jala būḍahiṃ ghaṭajonī| sahaja chamā baru chāḍai chonī||
masaka phūm̐ka maku meru uḍāī| hoi na nṛpamadu bharatahi bhāī||
lakhana tumhāra sapatha pitu ānā| suci subaṃdhu nahiṃ bharata samānā||
saguna khīru avaguna jala tātā| milai racai parapaṃcu bidhātā||
bharatu haṃsa rabibaṃsa taḍāgā| janami kīnha guna doṣa bibhāgā||
gahi guna paya taji avaguna bārī| nija jasa jagata kīnhi ujiārī||
kahata bharata guna sīla subhāū| pema payodhi magana raghurāū||

दोहा 232
सुनि रघुबर बानी बिबुध देखि भरत पर हेतु।
सकल सराहत राम सो प्रभु को कृपानिकेतु॥232॥
suni raghubara bānī bibudha dekhi bharata para hetu|
sakala sarāhata rāma so prabhu ko kṛpāniketu||232||
दोहा 233#

जौं न होत जग जनम भरत को। सकल धरम धुर धरनि धरत को॥
कबि कुल अगम भरत गुन गाथा। को जानइ तुम्ह बिनु रघुनाथा॥
लखन राम सिय सुनि सुर बानी। अति सुख लहेउ न जाइ बखानी॥
इहाँ भरत सब सहित सहाए। मंदाकिनीं पुनीत नहाए॥
सरित समीप राखि सब लोगा। मागि मातु गुर सचिव नियोगा॥
चले भरत जहँ सिय रघुराई। साथ निषादनाथ लघु भाई॥
समुझि मातु करतब सकुचाहीं। करत कुतरक कोटि मन माहीं॥
रामु लखनु सिय सुनि मम नाऊँ। उठि जनि अनत जाहिं तजि ठाऊँ॥

jauṃ na hota jaga janama bharata ko| sakala dharama dhura dharani dharata ko||
kabi kula agama bharata guna gāthā| ko jānai tumha binu raghunāthā||
lakhana rāma siya suni sura bānī| ati sukha laheu na jāi bakhānī||
ihām̐ bharata saba sahita sahāe| maṃdākinīṃ punīta nahāe||
sarita samīpa rākhi saba logā| māgi mātu gura saciva niyogā||
cale bharata jaham̐ siya raghurāī| sātha niṣādanātha laghu bhāī||
samujhi mātu karataba sakucāhīṃ| karata kutaraka koṭi mana māhīṃ||
rāmu lakhanu siya suni mama nāūm̐| uṭhi jani anata jāhiṃ taji ṭhāūm̐||

दोहा 233
मातु मते महुँ मानि मोहि जो कछु करहिं सो थोर।
अघ अवगुन छमि आदरहिं समुझि आपनी ओर॥233॥
mātu mate mahum̐ māni mohi jo kachu karahiṃ so thora|
agha avaguna chami ādarahiṃ samujhi āpanī ora||233||
दोहा 234#

जौं परिहरहिं मलिन मनु जानी। जौं सनमानहिं सेवकु मानी॥
मोरें सरन रामहि की पनही। राम सुस्वामि दोसु सब जनही॥
जग जस भाजन चातक मीना। नेम पेम निज निपुन नबीना॥
अस मन गुनत चले मग जाता। सकुच सनेह सिथिल सब गाता॥
फेरत मनहुँ मातु कृत खोरी। चलत भगति बल धीरज धोरी॥
जब समुझत रघुनाथ सुभाऊ। तब पथ परत उताइल पाऊ॥
भरत दसा तेहि अवसर कैसी। जल प्रबाहँ जल अलि गति जैसी॥
देखि भरत कर सोच सनेहू। भा निषाद तेहि समय बिदेहू॥

jauṃ pariharahiṃ malina manu jānī| jauṃ sanamānahiṃ sevaku mānī||
moreṃ sarana rāmahi kī panahī| rāma susvāmi dosu saba janahī||
jaga jasa bhājana cātaka mīnā| nema pema nija nipuna nabīnā||
asa mana gunata cale maga jātā| sakuca saneha sithila saba gātā||
pherata manahum̐ mātu kṛta khorī| calata bhagati bala dhīraja dhorī||
jaba samujhata raghunātha subhāū| taba patha parata utāila pāū||
bharata dasā tehi avasara kaisī| jala prabāham̐ jala ali gati jaisī||
dekhi bharata kara soca sanehū| bhā niṣāda tehi samaya bidehū||

दोहा 234
लगे होन मंगल सगुन सुनि गुनि कहत निषादु।
मिटिहि सोचु होइहि हरषु पुनि परिनाम बिषादु॥234॥
lage hona maṃgala saguna suni guni kahata niṣādu|
miṭihi socu hoihi haraṣu puni parināma biṣādu||234||
दोहा 235#

सेवक बचन सत्य सब जाने। आश्रम निकट जाइ निअराने॥
भरत दीख बन सैल समाजू। मुदित छुधित जनु पाइ सुनाजू॥
ईति भीति जनु प्रजा दुखारी। त्रिबिध ताप पीड़ित ग्रह मारी॥
जाइ सुराज सुदेस सुखारी। होहिं भरत गति तेहि अनुहारी॥
राम बास बन संपति भ्राजा। सुखी प्रजा जनु पाइ सुराजा॥
सचिव बिरागु बिबेकु नरेसू। बिपिन सुहावन पावन देसू॥
भट जम नियम सैल रजधानी। सांति सुमति सुचि सुंदर रानी॥
सकल अंग संपन्न सुराऊ। राम चरन आश्रित चित चाऊ॥

sevaka bacana satya saba jāne| āśrama nikaṭa jāi niarāne||
bharata dīkha bana saila samājū| mudita chudhita janu pāi sunājū||
īti bhīti janu prajā dukhārī| tribidha tāpa pīḍita graha mārī||
jāi surāja sudesa sukhārī| hohiṃ bharata gati tehi anuhārī||
rāma bāsa bana saṃpati bhrājā| sukhī prajā janu pāi surājā||
saciva birāgu bibeku naresū| bipina suhāvana pāvana desū||
bhaṭa jama niyama saila rajadhānī| sāṃti sumati suci suṃdara rānī||
sakala aṃga saṃpanna surāū| rāma carana āśrita cita cāū||

दोहा 235
जीति मोह महिपालु दल सहित बिबेक भुआलु।
करत अकंटक राजु पुरँ सुख संपदा सुकालु॥235॥
jīti moha mahipālu dala sahita bibeka bhuālu|
karata akaṃṭaka rāju puram̐ sukha saṃpadā sukālu||235||
दोहा 236#

बन प्रदेस मुनि बास घनेरे। जनु पुर नगर गाउँ गन खेरे॥
बिपुल बिचित्र बिहग मृग नाना। प्रजा समाजु न जाइ बखाना॥
खगहा करि हरि बाघ बराहा। देखि महिष बृष साजु सराहा॥
बयरु बिहाइ चरहिं एक संगा। जहँ तहँ मनहुँ सेन चतुरंगा॥
झरना झरहिं मत्त गज गाजहिं। मनहुँ निसान बिबिधि बिधि बाजहिं॥
चक चकोर चातक सुक पिक गन। कूजत मंजु मराल मुदित मन॥
अलिगन गावत नाचत मोरा। जनु सुराज मंगल चहुँ ओरा॥
बेलि बिटप तृन सफल सफूला। सब समाजु मुद मंगल मूला॥

bana pradesa muni bāsa ghanere| janu pura nagara gāum̐ gana khere||
bipula bicitra bihaga mṛga nānā| prajā samāju na jāi bakhānā||
khagahā kari hari bāgha barāhā| dekhi mahiṣa bṛṣa sāju sarāhā||
bayaru bihāi carahiṃ eka saṃgā| jaham̐ taham̐ manahum̐ sena caturaṃgā||
jharanā jharahiṃ matta gaja gājahiṃ| manahum̐ nisāna bibidhi bidhi bājahiṃ||
caka cakora cātaka suka pika gana| kūjata maṃju marāla mudita mana||
aligana gāvata nācata morā| janu surāja maṃgala cahum̐ orā||
beli biṭapa tṛna saphala saphūlā| saba samāju muda maṃgala mūlā||

दोहा 236
राम सैल सोभा निरखि भरत हृदयँ अति पेमु।
तापस तप फल पाइ जिमि सुखी सिरानें नेम॥236॥
rāma saila sobhā nirakhi bharata hṛdayam̐ ati pemu|
tāpasa tapa phala pāi jimi sukhī sirāneṃ nema||236||
मासपारायण, बीसवाँ विश्रामDay 20 of the 30-day Masparayan ends here
नवाह्नपारायण, पाँचवाँ विश्रामDay 5 of the 9-day Navahna path ends here

Completed Ayodhya Kand — Part 8?

Mark Masparayan day 20 done, light a diya, or share the path with family.

Text: the Gita Press edition of Shri Ramcharitmanas, checked against two independent transcriptions. Spotted an error? Suggest a correction.

Ayodhya Kand — Part 8 — text

Completed Ayodhya Kand — Part 8?