Ramcharitmanas Ayodhya Kand Part 6 (Doha 134–176)

दोहा 134#

अमर नाग किंनर दिसिपाला। चित्रकूट आए तेहि काला॥
राम प्रनामु कीन्ह सब काहू। मुदित देव लहि लोचन लाहू॥
बरषि सुमन कह देव समाजू। नाथ सनाथ भए हम आजू॥
करि बिनती दुख दुसह सुनाए। हरषित निज निज सदन सिधाए॥
चित्रकूट रघुनंदनु छाए। समाचार सुनि सुनि मुनि आए॥
आवत देखि मुदित मुनिबृंदा। कीन्ह दंडवत रघुकुल चंदा॥
मुनि रघुबरहि लाइ उर लेहीं। सुफल होन हित आसिष देहीं॥
सिय सौमित्रि राम छबि देखहिं। साधन सकल सफल करि लेखहिं॥

amara nāga kiṃnara disipālā| citrakūṭa āe tehi kālā||
rāma pranāmu kīnha saba kāhū| mudita deva lahi locana lāhū||
baraṣi sumana kaha deva samājū| nātha sanātha bhae hama ājū||
kari binatī dukha dusaha sunāe| haraṣita nija nija sadana sidhāe||
citrakūṭa raghunaṃdanu chāe| samācāra suni suni muni āe||
āvata dekhi mudita munibṛṃdā| kīnha daṃḍavata raghukula caṃdā||
muni raghubarahi lāi ura lehīṃ| suphala hona hita āsiṣa dehīṃ||
siya saumitri rāma chabi dekhahiṃ| sādhana sakala saphala kari lekhahiṃ||

दोहा 134
जथाजोग सनमानि प्रभु बिदा किए मुनिबृंद।
करहिं जोग जप जाग तप निज आश्रमन्हि सुछंद॥134॥
jathājoga sanamāni prabhu bidā kie munibṛṃda|
karahiṃ joga japa jāga tapa nija āśramanhi suchaṃda||134||
दोहा 135#

यह सुधि कोल किरातन्ह पाई। हरषे जनु नव निधि घर आई॥
कंद मूल फल भरि भरि दोना। चले रंक जनु लूटन सोना॥
तिन्ह महँ जिन्ह देखे दोउ भ्राता। अपर तिन्हहि पूँछहिं मगु जाता॥
कहत सुनत रघुबीर निकाई। आइ सबन्हि देखे रघुराई॥
करहिं जोहारु भेंट धरि आगे। प्रभुहि बिलोकहिं अति अनुरागे॥
चित्र लिखे जनु जहँ तहँ ठाढ़े। पुलक सरीर नयन जल बाढ़े॥
राम सनेह मगन सब जाने। कहि प्रिय बचन सकल सनमाने॥
प्रभुहि जोहारि बहोरि बहोरी। बचन बिनीत कहहिं कर जोरी॥

yaha sudhi kola kirātanha pāī| haraṣe janu nava nidhi ghara āī||
kaṃda mūla phala bhari bhari donā| cale raṃka janu lūṭana sonā||
tinha maham̐ jinha dekhe dou bhrātā| apara tinhahi pūm̐chahiṃ magu jātā||
kahata sunata raghubīra nikāī| āi sabanhi dekhe raghurāī||
karahiṃ johāru bheṃṭa dhari āge| prabhuhi bilokahiṃ ati anurāge||
citra likhe janu jaham̐ taham̐ ṭhāḍhe| pulaka sarīra nayana jala bāḍhe||
rāma saneha magana saba jāne| kahi priya bacana sakala sanamāne||
prabhuhi johāri bahori bahorī| bacana binīta kahahiṃ kara jorī||

दोहा 135
अब हम नाथ सनाथ सब भए देखि प्रभु पाय।
भाग हमारे आगमनु राउर कोसलराय॥135॥
aba hama nātha sanātha saba bhae dekhi prabhu pāya|
bhāga hamāre āgamanu rāura kosalarāya||135||
दोहा 136#

धन्य भूमि बन पंथ पहारा। जहँ जहँ नाथ पाउ तुम्ह धारा॥
धन्य बिहग मृग काननचारी। सफल जनम भए तुम्हहि निहारी॥
हम सब धन्य सहित परिवारा। दीख दरसु भरि नयन तुम्हारा॥
कीन्ह बासु भल ठाउँ बिचारी। इहाँ सकल रितु रहब सुखारी॥
हम सब भाँति करब सेवकाई। करि केहरि अहि बाघ बराई॥
बन बेहड़ गिरि कंदर खोहा। सब हमार प्रभु पग पग जोहा॥
तहँ तहँ तुम्हहि अहेर खेलाउब। सर निरझर जलठाउँ देखाउब॥
हम सेवक परिवार समेता। नाथ न सकुचब आयसु देता॥

dhanya bhūmi bana paṃtha pahārā| jaham̐ jaham̐ nātha pāu tumha dhārā||
dhanya bihaga mṛga kānanacārī| saphala janama bhae tumhahi nihārī||
hama saba dhanya sahita parivārā| dīkha darasu bhari nayana tumhārā||
kīnha bāsu bhala ṭhāum̐ bicārī| ihām̐ sakala ritu rahaba sukhārī||
hama saba bhām̐ti karaba sevakāī| kari kehari ahi bāgha barāī||
bana behaḍa giri kaṃdara khohā| saba hamāra prabhu paga paga johā||
taham̐ taham̐ tumhahi ahera khelāuba| sara nirajhara jalaṭhāum̐ dekhāuba||
hama sevaka parivāra sametā| nātha na sakucaba āyasu detā||

दोहा 136
बेद बचन मुनि मन अगम ते प्रभु करुना ऐन।
बचन किरातन्ह के सुनत जिमि पितु बालक बैन॥136॥
beda bacana muni mana agama te prabhu karunā aina|
bacana kirātanha ke sunata jimi pitu bālaka baina||136||
दोहा 137#

रामहि केवल प्रेमु पिआरा। जानि लेउ जो जाननिहारा॥
राम सकल बनचर तब तोषे। कहि मृदु बचन प्रेम परिपोषे॥
बिदा किए सिर नाइ सिधाए। प्रभु गुन कहत सुनत घर आए॥
एहि बिधि सिय समेत दोउ भाई। बसहिं बिपिन सुर मुनि सुखदाई॥
जब ते आइ रहे रघुनायकु। तब तें भयउ बनु मंगलदायकु॥
फूलहिं फलहिं बिटप बिधि नाना॥मंजु बलित बर बेलि बिताना॥
सुरतरु सरिस सुभायँ सुहाए। मनहुँ बिबुध बन परिहरि आए॥
गंज मंजुतर मधुकर श्रेनी। त्रिबिध बयारि बहइ सुख देनी॥

rāmahi kevala premu piārā| jāni leu jo jānanihārā||
rāma sakala banacara taba toṣe| kahi mṛdu bacana prema paripoṣe||
bidā kie sira nāi sidhāe| prabhu guna kahata sunata ghara āe||
ehi bidhi siya sameta dou bhāī| basahiṃ bipina sura muni sukhadāī||
jaba te āi rahe raghunāyaku| taba teṃ bhayau banu maṃgaladāyaku||
phūlahiṃ phalahiṃ biṭapa bidhi nānā||maṃju balita bara beli bitānā||
surataru sarisa subhāyam̐ suhāe| manahum̐ bibudha bana parihari āe||
gaṃja maṃjutara madhukara śrenī| tribidha bayāri bahai sukha denī||

दोहा 137
नीलकंठ कलकंठ सुक चातक चक्क चकोर।
भाँति भाँति बोलहिं बिहग श्रवन सुखद चित चोर॥137॥
nīlakaṃṭha kalakaṃṭha suka cātaka cakka cakora|
bhām̐ti bhām̐ti bolahiṃ bihaga śravana sukhada cita cora||137||
दोहा 138#

करि केहरि कपि कोल कुरंगा। बिगतबैर बिचरहिं सब संगा॥
फिरत अहेर राम छबि देखी। होहिं मुदित मृगबंद बिसेषी॥
बिबुध बिपिन जहँ लगि जग माहीं। देखि राम बनु सकल सिहाहीं॥
सुरसरि सरसइ दिनकर कन्या। मेकलसुता गोदावरि धन्या॥
सब सर सिंधु नदी नद नाना। मंदाकिनि कर करहिं बखाना॥
उदय अस्त गिरि अरु कैलासू। मंदर मेरु सकल सुरबासू॥
सैल हिमाचल आदिक जेते। चित्रकूट जसु गावहिं तेते॥
बिंधि मुदित मन सुखु न समाई। श्रम बिनु बिपुल बड़ाई पाई॥

kari kehari kapi kola kuraṃgā| bigatabaira bicarahiṃ saba saṃgā||
phirata ahera rāma chabi dekhī| hohiṃ mudita mṛgabaṃda biseṣī||
bibudha bipina jaham̐ lagi jaga māhīṃ| dekhi rāma banu sakala sihāhīṃ||
surasari sarasai dinakara kanyā| mekalasutā godāvari dhanyā||
saba sara siṃdhu nadī nada nānā| maṃdākini kara karahiṃ bakhānā||
udaya asta giri aru kailāsū| maṃdara meru sakala surabāsū||
saila himācala ādika jete| citrakūṭa jasu gāvahiṃ tete||
biṃdhi mudita mana sukhu na samāī| śrama binu bipula baḍāī pāī||

दोहा 138
चित्रकूट के बिहग मृग बेलि बिटप तृन जाति।
पुन्य पुंज सब धन्य अस कहहिं देव दिन राति॥138॥
citrakūṭa ke bihaga mṛga beli biṭapa tṛna jāti|
punya puṃja saba dhanya asa kahahiṃ deva dina rāti||138||
दोहा 139#

नयनवंत रघुबरहि बिलोकी। पाइ जनम फल होहिं बिसोकी॥
परसि चरन रज अचर सुखारी। भए परम पद के अधिकारी॥
सो बनु सैलु सुभायँ सुहावन। मंगलमय अति पावन पावन॥
महिमा कहिअ कवनि बिधि तासू। सुखसागर जहँ कीन्ह निवासू॥
पय पयोधि तजि अवध बिहाई। जहँ सिय लखनु रामु रहे आई॥
कहि न सकहिं सुषमा जसि कानन। जौं सत सहस होहिं सहसानन॥
सो मैं बरनि कहौं बिधि केहीं। डाबर कमठ कि मंदर लेहीं॥
सेवहिं लखनु करम मन बानी। जाइ न सीलु सनेहु बखानी॥

nayanavaṃta raghubarahi bilokī| pāi janama phala hohiṃ bisokī||
parasi carana raja acara sukhārī| bhae parama pada ke adhikārī||
so banu sailu subhāyam̐ suhāvana| maṃgalamaya ati pāvana pāvana||
mahimā kahia kavani bidhi tāsū| sukhasāgara jaham̐ kīnha nivāsū||
paya payodhi taji avadha bihāī| jaham̐ siya lakhanu rāmu rahe āī||
kahi na sakahiṃ suṣamā jasi kānana| jauṃ sata sahasa hohiṃ sahasānana||
so maiṃ barani kahauṃ bidhi kehīṃ| ḍābara kamaṭha ki maṃdara lehīṃ||
sevahiṃ lakhanu karama mana bānī| jāi na sīlu sanehu bakhānī||

दोहा 139
छिनु छिनु लखि सिय राम पद जानि आपु पर नेहु।
करत न सपनेहुँ लखनु चितु बंधु मातु पितु गेहु॥139॥
chinu chinu lakhi siya rāma pada jāni āpu para nehu|
karata na sapanehum̐ lakhanu citu baṃdhu mātu pitu gehu||139||
दोहा 140#

राम संग सिय रहति सुखारी। पुर परिजन गृह सुरति बिसारी॥
छिनु छिनु पिय बिधु बदनु निहारी। प्रमुदित मनहुँ चकोरकुमारी॥
नाह नेहु नित बढ़त बिलोकी। हरषित रहति दिवस जिमि कोकी॥
सिय मनु राम चरन अनुरागा। अवध सहस सम बनु प्रिय लागा॥
परनकुटी प्रिय प्रियतम संगा। प्रिय परिवारु कुरंग बिहंगा॥
सासु ससुर सम मुनितिय मुनिबर। असनु अमिअ सम कंद मूल फर॥
नाथ साथ साँथरी सुहाई। मयन सयन सय सम सुखदाई॥
लोकप होहिं बिलोकत जासू। तेहि कि मोहि सक बिषय बिलासू॥

rāma saṃga siya rahati sukhārī| pura parijana gṛha surati bisārī||
chinu chinu piya bidhu badanu nihārī| pramudita manahum̐ cakorakumārī||
nāha nehu nita baḍhata bilokī| haraṣita rahati divasa jimi kokī||
siya manu rāma carana anurāgā| avadha sahasa sama banu priya lāgā||
paranakuṭī priya priyatama saṃgā| priya parivāru kuraṃga bihaṃgā||
sāsu sasura sama munitiya munibara| asanu amia sama kaṃda mūla phara||
nātha sātha sām̐tharī suhāī| mayana sayana saya sama sukhadāī||
lokapa hohiṃ bilokata jāsū| tehi ki mohi saka biṣaya bilāsū||

दोहा 140
सुमिरत रामहि तजहिं जन तृन सम बिषय बिलासु।
रामप्रिया जग जननि सिय कछु न आचरजु तासु॥140॥
sumirata rāmahi tajahiṃ jana tṛna sama biṣaya bilāsu|
rāmapriyā jaga janani siya kachu na ācaraju tāsu||140||
दोहा 141#

सीय लखन जेहि बिधि सुखु लहहीं। सोइ रघुनाथ करहिं सोइ कहहीं॥
कहहिं पुरातन कथा कहानी। सुनहिं लखनु सिय अति सुखु मानी।
जब जब रामु अवध सुधि करहीं। तब तब बारि बिलोचन भरहीं॥
सुमिरि मातु पितु परिजन भाई। भरत सनेहु सीलु सेवकाई॥
कृपासिंधु प्रभु होहिं दुखारी। धीरजु धरहिं कुसमउ बिचारी॥
लखि सिय लखनु बिकल होइ जाहीं। जिमि पुरुषहि अनुसर परिछाहीं॥
प्रिया बंधु गति लखि रघुनंदनु। धीर कृपाल भगत उर चंदनु॥
लगे कहन कछु कथा पुनीता। सुनि सुखु लहहिं लखनु अरु सीता॥

sīya lakhana jehi bidhi sukhu lahahīṃ| soi raghunātha karahiṃ soi kahahīṃ||
kahahiṃ purātana kathā kahānī| sunahiṃ lakhanu siya ati sukhu mānī|
jaba jaba rāmu avadha sudhi karahīṃ| taba taba bāri bilocana bharahīṃ||
sumiri mātu pitu parijana bhāī| bharata sanehu sīlu sevakāī||
kṛpāsiṃdhu prabhu hohiṃ dukhārī| dhīraju dharahiṃ kusamau bicārī||
lakhi siya lakhanu bikala hoi jāhīṃ| jimi puruṣahi anusara parichāhīṃ||
priyā baṃdhu gati lakhi raghunaṃdanu| dhīra kṛpāla bhagata ura caṃdanu||
lage kahana kachu kathā punītā| suni sukhu lahahiṃ lakhanu aru sītā||

दोहा 141
रामु लखन सीता सहित सोहत परन निकेत।
जिमि बासव बस अमरपुर सची जयंत समेत॥141॥
rāmu lakhana sītā sahita sohata parana niketa|
jimi bāsava basa amarapura sacī jayaṃta sameta||141||
दोहा 142#

जोगवहिं प्रभु सिय लखनहिं कैसें। पलक बिलोचन गोलक जैसें॥
सेवहिं लखनु सीय रघुबीरहि। जिमि अबिबेकी पुरुष सरीरहि॥
एहि बिधि प्रभु बन बसहिं सुखारी। खग मृग सुर तापस हितकारी॥
कहेउँ राम बन गवनु सुहावा। सुनहु सुमंत्र अवध जिमि आवा॥
फिरेउ निषादु प्रभुहि पहुँचाई। सचिव सहित रथ देखेसि आई॥
मंत्री बिकल बिलोकि निषादू। कहि न जाइ जस भयउ बिषादू॥
राम राम सिय लखन पुकारी। परेउ धरनितल ब्याकुल भारी॥
देखि दखिन दिसि हय हिहिनाहीं। जनु बिनु पंख बिहग अकुलाहीं॥

jogavahiṃ prabhu siya lakhanahiṃ kaiseṃ| palaka bilocana golaka jaiseṃ||
sevahiṃ lakhanu sīya raghubīrahi| jimi abibekī puruṣa sarīrahi||
ehi bidhi prabhu bana basahiṃ sukhārī| khaga mṛga sura tāpasa hitakārī||
kaheum̐ rāma bana gavanu suhāvā| sunahu sumaṃtra avadha jimi āvā||
phireu niṣādu prabhuhi pahum̐cāī| saciva sahita ratha dekhesi āī||
maṃtrī bikala biloki niṣādū| kahi na jāi jasa bhayau biṣādū||
rāma rāma siya lakhana pukārī| pareu dharanitala byākula bhārī||
dekhi dakhina disi haya hihināhīṃ| janu binu paṃkha bihaga akulāhīṃ||

दोहा 142
नहिं तृन चरहिं पिअहिं जलु मोचहिं लोचन बारि।
ब्याकुल भए निषाद सब रघुबर बाजि निहारि॥142॥
nahiṃ tṛna carahiṃ piahiṃ jalu mocahiṃ locana bāri|
byākula bhae niṣāda saba raghubara bāji nihāri||142||
दोहा 143#

धरि धीरजु तब कहइ निषादू। अब सुमंत्र परिहरहु बिषादू॥
तुम्ह पंडित परमारथ ग्याता। धरहु धीर लखि बिमुख बिधाता
बिबिध कथा कहि कहि मृदु बानी। रथ बैठारेउ बरबस आनी॥
सोक सिथिल रथ सकइ न हाँकी। रघुबर बिरह पीर उर बाँकी॥
चरफराहिँ मग चलहिं न घोरे। बन मृग मनहुँ आनि रथ जोरे॥
अढ़ुकि परहिं फिरि हेरहिं पीछें। राम बियोगि बिकल दुख तीछें॥
जो कह रामु लखनु बैदेही। हिंकरि हिंकरि हित हेरहिं तेही॥
बाजि बिरह गति कहि किमि जाती। बिनु मनि फनिक बिकल जेहि भाँती॥

dhari dhīraju taba kahai niṣādū| aba sumaṃtra pariharahu biṣādū||
tumha paṃḍita paramāratha gyātā| dharahu dhīra lakhi bimukha bidhātā
bibidha kathā kahi kahi mṛdu bānī| ratha baiṭhāreu barabasa ānī||
soka sithila ratha sakai na hām̐kī| raghubara biraha pīra ura bām̐kī||
carapharāhim̐ maga calahiṃ na ghore| bana mṛga manahum̐ āni ratha jore||
aḍhuki parahiṃ phiri herahiṃ pīcheṃ| rāma biyogi bikala dukha tīcheṃ||
jo kaha rāmu lakhanu baidehī| hiṃkari hiṃkari hita herahiṃ tehī||
bāji biraha gati kahi kimi jātī| binu mani phanika bikala jehi bhām̐tī||

दोहा 143
भयउ निषाद बिषादबस देखत सचिव तुरंग।
बोलि सुसेवक चारि तब दिए सारथी संग॥143॥
bhayau niṣāda biṣādabasa dekhata saciva turaṃga|
boli susevaka cāri taba die sārathī saṃga||143||
दोहा 144#

गुह सारथिहि फिरेउ पहुँचाई। बिरहु बिषादु बरनि नहिं जाई॥
चले अवध लेइ रथहि निषादा। होहिं छनहिं छन मगन बिषादा॥
सोच सुमंत्र बिकल दुख दीना। धिग जीवन रघुबीर बिहीना॥
रहिहि न अंतहुँ अधम सरीरू। जसु न लहेउ बिछुरत रघुबीरू॥
भए अजस अघ भाजन प्राना। कवन हेतु नहिं करत पयाना॥
अहह मंद मनु अवसर चूका। अजहुँ न हृदय होत दुइ टूका॥
मीजि हाथ सिरु धुनि पछिताई। मनहुँ कृपन धन रासि गवाँई॥
बिरिद बाँधि बर बीरु कहाई। चलेउ समर जनु सुभट पराई॥

guha sārathihi phireu pahum̐cāī| birahu biṣādu barani nahiṃ jāī||
cale avadha lei rathahi niṣādā| hohiṃ chanahiṃ chana magana biṣādā||
soca sumaṃtra bikala dukha dīnā| dhiga jīvana raghubīra bihīnā||
rahihi na aṃtahum̐ adhama sarīrū| jasu na laheu bichurata raghubīrū||
bhae ajasa agha bhājana prānā| kavana hetu nahiṃ karata payānā||
ahaha maṃda manu avasara cūkā| ajahum̐ na hṛdaya hota dui ṭūkā||
mīji hātha siru dhuni pachitāī| manahum̐ kṛpana dhana rāsi gavām̐ī||
birida bām̐dhi bara bīru kahāī| caleu samara janu subhaṭa parāī||

दोहा 144
बिप्र बिबेकी बेदबिद संमत साधु सुजाति।
जिमि धोखें मदपान कर सचिव सोच तेहि भाँति॥144॥
bipra bibekī bedabida saṃmata sādhu sujāti|
jimi dhokheṃ madapāna kara saciva soca tehi bhām̐ti||144||
दोहा 145#

जिमि कुलीन तिय साधु सयानी। पतिदेवता करम मन बानी॥
रहै करम बस परिहरि नाहू। सचिव हृदयँ तिमि दारुन दाहू॥
लोचन सजल डीठि भइ थोरी। सुनइ न श्रवन बिकल मति भोरी॥
सूखहिं अधर लागि मुहँ लाटी। जिउ न जाइ उर अवधि कपाटी॥
बिबरन भयउ न जाइ निहारी। मारेसि मनहुँ पिता महतारी॥
हानि गलानि बिपुल मन ब्यापी। जमपुर पंथ सोच जिमि पापी॥
बचनु न आव हृदयँ पछिताई। अवध काह मैं देखब जाई॥
राम रहित रथ देखिहि जोई। सकुचिहि मोहि बिलोकत सोई॥

jimi kulīna tiya sādhu sayānī| patidevatā karama mana bānī||
rahai karama basa parihari nāhū| saciva hṛdayam̐ timi dāruna dāhū||
locana sajala ḍīṭhi bhai thorī| sunai na śravana bikala mati bhorī||
sūkhahiṃ adhara lāgi muham̐ lāṭī| jiu na jāi ura avadhi kapāṭī||
bibarana bhayau na jāi nihārī| māresi manahum̐ pitā mahatārī||
hāni galāni bipula mana byāpī| jamapura paṃtha soca jimi pāpī||
bacanu na āva hṛdayam̐ pachitāī| avadha kāha maiṃ dekhaba jāī||
rāma rahita ratha dekhihi joī| sakucihi mohi bilokata soī||

दोहा 145
धाइ पूँछिहहिं मोहि जब बिकल नगर नर नारि।
उतरु देब मैं सबहि तब हृदयँ बज्रु बैठारि॥145॥
dhāi pūm̐chihahiṃ mohi jaba bikala nagara nara nāri|
utaru deba maiṃ sabahi taba hṛdayam̐ bajru baiṭhāri||145||
दोहा 146#

पुछिहहिं दीन दुखित सब माता। कहब काह मैं तिन्हहि बिधाता॥
पूछिहि जबहिं लखन महतारी। कहिहउँ कवन सँदेस सुखारी॥
राम जननि जब आइहि धाई। सुमिरि बच्छु जिमि धेनु लवाई॥
पूँछत उतरु देब मैं तेही। गे बनु राम लखनु बैदेही॥
जोइ पूँछिहि तेहि ऊतरु देबा।जाइ अवध अब यहु सुखु लेबा॥
पूँछिहि जबहिं राउ दुख दीना। जिवनु जासु रघुनाथ अधीना॥
देहउँ उतरु कौनु मुहु लाई। आयउँ कुसल कुअँर पहुँचाई॥
सुनत लखन सिय राम सँदेसू। तृन जिमि तनु परिहरिहि नरेसू॥

puchihahiṃ dīna dukhita saba mātā| kahaba kāha maiṃ tinhahi bidhātā||
pūchihi jabahiṃ lakhana mahatārī| kahihaum̐ kavana sam̐desa sukhārī||
rāma janani jaba āihi dhāī| sumiri bacchu jimi dhenu lavāī||
pūm̐chata utaru deba maiṃ tehī| ge banu rāma lakhanu baidehī||
joi pūm̐chihi tehi ūtaru debā|jāi avadha aba yahu sukhu lebā||
pūm̐chihi jabahiṃ rāu dukha dīnā| jivanu jāsu raghunātha adhīnā||
dehaum̐ utaru kaunu muhu lāī| āyaum̐ kusala kuam̐ra pahum̐cāī||
sunata lakhana siya rāma sam̐desū| tṛna jimi tanu pariharihi naresū||

दोहा 146
ह्रदउ न बिदरेउ पंक जिमि बिछुरत प्रीतमु नीरु॥
जानत हौं मोहि दीन्ह बिधि यहु जातना सरीरु॥146॥
hradau na bidareu paṃka jimi bichurata prītamu nīru||
jānata hauṃ mohi dīnha bidhi yahu jātanā sarīru||146||
दोहा 147#

एहि बिधि करत पंथ पछितावा। तमसा तीर तुरत रथु आवा॥
बिदा किए करि बिनय निषादा। फिरे पायँ परि बिकल बिषादा॥
पैठत नगर सचिव सकुचाई। जनु मारेसि गुर बाँभन गाई॥
बैठि बिटप तर दिवसु गवाँवा। साँझ समय तब अवसरु पावा॥
अवध प्रबेसु कीन्ह अँधिआरें। पैठ भवन रथु राखि दुआरें॥
जिन्ह जिन्ह समाचार सुनि पाए। भूप द्वार रथु देखन आए॥
रथु पहिचानि बिकल लखि घोरे। गरहिं गात जिमि आतप ओरे॥
नगर नारि नर ब्याकुल कैसें। निघटत नीर मीनगन जैसें॥

ehi bidhi karata paṃtha pachitāvā| tamasā tīra turata rathu āvā||
bidā kie kari binaya niṣādā| phire pāyam̐ pari bikala biṣādā||
paiṭhata nagara saciva sakucāī| janu māresi gura bām̐bhana gāī||
baiṭhi biṭapa tara divasu gavām̐vā| sām̐jha samaya taba avasaru pāvā||
avadha prabesu kīnha am̐dhiāreṃ| paiṭha bhavana rathu rākhi duāreṃ||
jinha jinha samācāra suni pāe| bhūpa dvāra rathu dekhana āe||
rathu pahicāni bikala lakhi ghore| garahiṃ gāta jimi ātapa ore||
nagara nāri nara byākula kaiseṃ| nighaṭata nīra mīnagana jaiseṃ||

दोहा 147
सचिव आगमनु सुनत सबु बिकल भयउ रनिवासु।
भवन भयंकरु लाग तेहि मानहुँ प्रेत निवासु॥147॥
saciva āgamanu sunata sabu bikala bhayau ranivāsu|
bhavana bhayaṃkaru lāga tehi mānahum̐ preta nivāsu||147||
दोहा 148#

अति आरति सब पूँछहिं रानी। उतरु न आव बिकल भइ बानी॥
सुनइ न श्रवन नयन नहिं सूझा। कहहु कहाँ नृप तेहि तेहि बूझा॥
दासिन्ह दीख सचिव बिकलाई। कौसल्या गृहँ गईं लवाई॥
जाइ सुमंत्र दीख कस राजा। अमिअ रहित जनु चंदु बिराजा॥
आसन सयन बिभूषन हीना। परेउ भूमितल निपट मलीना॥
लेइ उसासु सोच एहि भाँती। सुरपुर तें जनु खँसेउ जजाती॥
लेत सोच भरि छिनु छिनु छाती। जनु जरि पंख परेउ संपाती॥
राम राम कह राम सनेही। पुनि कह राम लखन बैदेही॥

ati ārati saba pūm̐chahiṃ rānī| utaru na āva bikala bhai bānī||
sunai na śravana nayana nahiṃ sūjhā| kahahu kahām̐ nṛpa tehi tehi būjhā||
dāsinha dīkha saciva bikalāī| kausalyā gṛham̐ gaīṃ lavāī||
jāi sumaṃtra dīkha kasa rājā| amia rahita janu caṃdu birājā||
āsana sayana bibhūṣana hīnā| pareu bhūmitala nipaṭa malīnā||
lei usāsu soca ehi bhām̐tī| surapura teṃ janu kham̐seu jajātī||
leta soca bhari chinu chinu chātī| janu jari paṃkha pareu saṃpātī||
rāma rāma kaha rāma sanehī| puni kaha rāma lakhana baidehī||

दोहा 148
देखि सचिवँ जय जीव कहि कीन्हेउ दंड प्रनामु।
सुनत उठेउ ब्याकुल नृपति कहु सुमंत्र कहँ रामु॥148॥
dekhi sacivam̐ jaya jīva kahi kīnheu daṃḍa pranāmu|
sunata uṭheu byākula nṛpati kahu sumaṃtra kaham̐ rāmu||148||
दोहा 149#

भूप सुमंत्रु लीन्ह उर लाई। बूड़त कछु अधार जनु पाई॥
सहित सनेह निकट बैठारी। पूँछत राउ नयन भरि बारी॥
राम कुसल कहु सखा सनेही। कहँ रघुनाथु लखनु बैदेही॥
आने फेरि कि बनहि सिधाए। सुनत सचिव लोचन जल छाए॥
सोक बिकल पुनि पूँछ नरेसू। कहु सिय राम लखन संदेसू॥
राम रूप गुन सील सुभाऊ। सुमिरि सुमिरि उर सोचत राऊ॥
राउ सुनाइ दीन्ह बनबासू। सुनि मन भयउ न हरषु हराँसू॥
सो सुत बिछुरत गए न प्राना। को पापी बड़ मोहि समाना॥

bhūpa sumaṃtru līnha ura lāī| būḍata kachu adhāra janu pāī||
sahita saneha nikaṭa baiṭhārī| pūm̐chata rāu nayana bhari bārī||
rāma kusala kahu sakhā sanehī| kaham̐ raghunāthu lakhanu baidehī||
āne pheri ki banahi sidhāe| sunata saciva locana jala chāe||
soka bikala puni pūm̐cha naresū| kahu siya rāma lakhana saṃdesū||
rāma rūpa guna sīla subhāū| sumiri sumiri ura socata rāū||
rāu sunāi dīnha banabāsū| suni mana bhayau na haraṣu harām̐sū||
so suta bichurata gae na prānā| ko pāpī baḍa mohi samānā||

दोहा 149
सखा रामु सिय लखनु जहँ तहाँ मोहि पहुँचाउ।
नाहिं त चाहत चलन अब प्रान कहउँ सतिभाउ॥149॥
sakhā rāmu siya lakhanu jaham̐ tahām̐ mohi pahum̐cāu|
nāhiṃ ta cāhata calana aba prāna kahaum̐ satibhāu||149||
दोहा 150#

पुनि पुनि पूँछत मंत्रिहि राऊ। प्रियतम सुअन सँदेस सुनाऊ॥
करहि सखा सोइ बेगि उपाऊ। रामु लखनु सिय नयन देखाऊ॥
सचिव धीर धरि कह मृदु बानी। महाराज तुम्ह पंडित ग्यानी॥
बीर सुधीर धुरंधर देवा। साधु समाजु सदा तुम्ह सेवा॥
जनम मरन सब दुख भोगा। हानि लाभ प्रिय मिलन बियोगा॥
काल करम बस होहिं गोसाईं। बरबस राति दिवस की नाईं॥
सुख हरषहिं जड़ दुख बिलखाहीं। दोउ सम धीर धरहिं मन माहीं॥
धीरज धरहु बिबेकु बिचारी। छाड़िअ सोच सकल हितकारी॥

puni puni pūm̐chata maṃtrihi rāū| priyatama suana sam̐desa sunāū||
karahi sakhā soi begi upāū| rāmu lakhanu siya nayana dekhāū||
saciva dhīra dhari kaha mṛdu bānī| mahārāja tumha paṃḍita gyānī||
bīra sudhīra dhuraṃdhara devā| sādhu samāju sadā tumha sevā||
janama marana saba dukha bhogā| hāni lābha priya milana biyogā||
kāla karama basa hohiṃ gosāīṃ| barabasa rāti divasa kī nāīṃ||
sukha haraṣahiṃ jaḍa dukha bilakhāhīṃ| dou sama dhīra dharahiṃ mana māhīṃ||
dhīraja dharahu bibeku bicārī| chāḍia soca sakala hitakārī||

दोहा 150
प्रथम बासु तमसा भयउ दूसर सुरसरि तीर।
न्हाइ रहे जलपानु करि सिय समेत दोउ बीर॥150॥
prathama bāsu tamasā bhayau dūsara surasari tīra|
nhāi rahe jalapānu kari siya sameta dou bīra||150||
सोरठा 151#

केवट कीन्हि बहुत सेवकाई। सो जामिनि सिंगरौर गवाँई॥
होत प्रात बट छीरु मगावा। जटा मुकुट निज सीस बनावा॥
राम सखाँ तब नाव मगाई। प्रिया चढ़ाइ चढ़े रघुराई॥
लखन बान धनु धरे बनाई। आपु चढ़े प्रभु आयसु पाई॥
बिकल बिलोकि मोहि रघुबीरा। बोले मधुर बचन धरि धीरा॥
तात प्रनामु तात सन कहेहु। बार बार पद पंकज गहेहू॥
करबि पायँ परि बिनय बहोरी। तात करिअ जनि चिंता मोरी॥
बन मग मंगल कुसल हमारें। कृपा अनुग्रह पुन्य तुम्हारें॥

kevaṭa kīnhi bahuta sevakāī| so jāmini siṃgaraura gavām̐ī||
hota prāta baṭa chīru magāvā| jaṭā mukuṭa nija sīsa banāvā||
rāma sakhām̐ taba nāva magāī| priyā caḍhāi caḍhe raghurāī||
lakhana bāna dhanu dhare banāī| āpu caḍhe prabhu āyasu pāī||
bikala biloki mohi raghubīrā| bole madhura bacana dhari dhīrā||
tāta pranāmu tāta sana kahehu| bāra bāra pada paṃkaja gahehū||
karabi pāyam̐ pari binaya bahorī| tāta karia jani ciṃtā morī||
bana maga maṃgala kusala hamāreṃ| kṛpā anugraha punya tumhāreṃ||

छंद
तुम्हरें अनुग्रह तात कानन जात सब सुखु पाइहौं।
प्रतिपालि आयसु कुसल देखन पाय पुनि फिरि आइहौं॥
जननीं सकल परितोषि परि परि पायँ करि बिनती घनी।
तुलसी करेहु सोइ जतनु जेहिं कुसली रहहिं कोसल धनी॥
tumhareṃ anugraha tāta kānana jāta saba sukhu pāihauṃ|
pratipāli āyasu kusala dekhana pāya puni phiri āihauṃ||
jananīṃ sakala paritoṣi pari pari pāyam̐ kari binatī ghanī|
tulasī karehu soi jatanu jehiṃ kusalī rahahiṃ kosala dhanī||

सोरठा 151
गुर सन कहब सँदेसु बार बार पद पदुम गहि।
करब सोइ उपदेसु जेहिं न सोच मोहि अवधपति॥151॥
gura sana kahaba sam̐desu bāra bāra pada paduma gahi|
karaba soi upadesu jehiṃ na soca mohi avadhapati||151||
दोहा 152#

पुरजन परिजन सकल निहोरी। तात सुनाएहु बिनती मोरी॥
सोइ सब भाँति मोर हितकारी। जातें रह नरनाहु सुखारी॥
कहब सँदेसु भरत के आएँ। नीति न तजिअ राजपदु पाएँ॥
पालेहु प्रजहि करम मन बानी। सेएहु मातु सकल सम जानी॥
ओर निबाहेहु भायप भाई। करि पितु मातु सुजन सेवकाई॥
तात भाँति तेहि राखब राऊ। सोच मोर जेहिं करै न काऊ॥
लखन कहे कछु बचन कठोरा। बरजि राम पुनि मोहि निहोरा॥
बार बार निज सपथ देवाई। कहबि न तात लखन लरिकाई॥

purajana parijana sakala nihorī| tāta sunāehu binatī morī||
soi saba bhām̐ti mora hitakārī| jāteṃ raha naranāhu sukhārī||
kahaba sam̐desu bharata ke āem̐| nīti na tajia rājapadu pāem̐||
pālehu prajahi karama mana bānī| seehu mātu sakala sama jānī||
ora nibāhehu bhāyapa bhāī| kari pitu mātu sujana sevakāī||
tāta bhām̐ti tehi rākhaba rāū| soca mora jehiṃ karai na kāū||
lakhana kahe kachu bacana kaṭhorā| baraji rāma puni mohi nihorā||
bāra bāra nija sapatha devāī| kahabi na tāta lakhana larikāī||

दोहा 152
कहि प्रनामु कछु कहन लिय सिय भइ सिथिल सनेह।
थकित बचन लोचन सजल पुलक पल्लवित देह॥152॥
kahi pranāmu kachu kahana liya siya bhai sithila saneha|
thakita bacana locana sajala pulaka pallavita deha||152||
दोहा 153#

तेहि अवसर रघुबर रुख पाई। केवट पारहि नाव चलाई॥
रघुकुलतिलक चले एहि भाँती। देखउँ ठाढ़ कुलिस धरि छाती॥
मैं आपन किमि कहौं कलेसू। जिअत फिरेउँ लेइ राम सँदेसू॥
अस कहि सचिव बचन रहि गयऊ। हानि गलानि सोच बस भयऊ॥
सुत बचन सुनतहिं नरनाहू। परेउ धरनि उर दारुन दाहू॥
तलफत बिषम मोह मन मापा। माजा मनहुँ मीन कहुँ ब्यापा॥
करि बिलाप सब रोवहिं रानी। महा बिपति किमि जाइ बखानी॥
सुनि बिलाप दुखहू दुखु लागा। धीरजहू कर धीरजु भागा॥

tehi avasara raghubara rukha pāī| kevaṭa pārahi nāva calāī||
raghukulatilaka cale ehi bhām̐tī| dekhaum̐ ṭhāḍha kulisa dhari chātī||
maiṃ āpana kimi kahauṃ kalesū| jiata phireum̐ lei rāma sam̐desū||
asa kahi saciva bacana rahi gayaū| hāni galāni soca basa bhayaū||
suta bacana sunatahiṃ naranāhū| pareu dharani ura dāruna dāhū||
talaphata biṣama moha mana māpā| mājā manahum̐ mīna kahum̐ byāpā||
kari bilāpa saba rovahiṃ rānī| mahā bipati kimi jāi bakhānī||
suni bilāpa dukhahū dukhu lāgā| dhīrajahū kara dhīraju bhāgā||

दोहा 153
भयउ कोलाहलु अवध अति सुनि नृप राउर सोरु।
बिपुल बिहग बन परेउ निसि मानहुँ कुलिस कठोरु॥153॥
bhayau kolāhalu avadha ati suni nṛpa rāura soru|
bipula bihaga bana pareu nisi mānahum̐ kulisa kaṭhoru||153||
दोहा 154#

प्रान कंठगत भयउ भुआलू। मनि बिहीन जनु ब्याकुल ब्यालू॥
इंद्रीं सकल बिकल भइँ भारी। जनु सर सरसिज बनु बिनु बारी॥
कौसल्याँ नृपु दीख मलाना। रबिकुल रबि अँथयउ जियँ जाना।
उर धरि धीर राम महतारी। बोली बचन समय अनुसारी॥
नाथ समुझि मन करिअ बिचारू। राम बियोग पयोधि अपारू॥
करनधार तुम्ह अवध जहाजू। चढ़ेउ सकल प्रिय पथिक समाजू॥
धीरजु धरिअ त पाइअ पारू। नाहिं त बूड़िहि सबु परिवारू॥
जौं जियँ धरिअ बिनय पिय मोरी। रामु लखनु सिय मिलहिं बहोरी॥

prāna kaṃṭhagata bhayau bhuālū| mani bihīna janu byākula byālū||
iṃdrīṃ sakala bikala bhaim̐ bhārī| janu sara sarasija banu binu bārī||
kausalyām̐ nṛpu dīkha malānā| rabikula rabi am̐thayau jiyam̐ jānā|
ura dhari dhīra rāma mahatārī| bolī bacana samaya anusārī||
nātha samujhi mana karia bicārū| rāma biyoga payodhi apārū||
karanadhāra tumha avadha jahājū| caḍheu sakala priya pathika samājū||
dhīraju dharia ta pāia pārū| nāhiṃ ta būḍihi sabu parivārū||
jauṃ jiyam̐ dharia binaya piya morī| rāmu lakhanu siya milahiṃ bahorī||

दोहा 154
प्रिया बचन मृदु सुनत नृपु चितयउ आँखि उघारि।
तलफत मीन मलीन जनु सींचत सीतल बारि॥154॥
priyā bacana mṛdu sunata nṛpu citayau ām̐khi ughāri|
talaphata mīna malīna janu sīṃcata sītala bāri||154||
दोहा 155#

धरि धीरजु उठि बैठ भुआलू। कहु सुमंत्र कहँ राम कृपालू॥
कहाँ लखनु कहँ रामु सनेही। कहँ प्रिय पुत्रबधू बैदेही॥
बिलपत राउ बिकल बहु भाँती। भइ जुग सरिस सिराति न राती॥
तापस अंध साप सुधि आई। कौसल्यहि सब कथा सुनाई॥
भयउ बिकल बरनत इतिहासा। राम रहित धिग जीवन आसा॥
सो तनु राखि करब मैं काहा। जेहिं न प्रेम पनु मोर निबाहा॥
हा रघुनंदन प्रान पिरीते। तुम्ह बिनु जिअत बहुत दिन बीते॥
हा जानकी लखन हा रघुबर। हा पितु हित चित चातक जलधर।

dhari dhīraju uṭhi baiṭha bhuālū| kahu sumaṃtra kaham̐ rāma kṛpālū||
kahām̐ lakhanu kaham̐ rāmu sanehī| kaham̐ priya putrabadhū baidehī||
bilapata rāu bikala bahu bhām̐tī| bhai juga sarisa sirāti na rātī||
tāpasa aṃdha sāpa sudhi āī| kausalyahi saba kathā sunāī||
bhayau bikala baranata itihāsā| rāma rahita dhiga jīvana āsā||
so tanu rākhi karaba maiṃ kāhā| jehiṃ na prema panu mora nibāhā||
hā raghunaṃdana prāna pirīte| tumha binu jiata bahuta dina bīte||
hā jānakī lakhana hā raghubara| hā pitu hita cita cātaka jaladhara|

दोहा 155
राम राम कहि राम कहि राम राम कहि राम।
तनु परिहरि रघुबर बिरहँ राउ गयउ सुरधाम॥155॥
rāma rāma kahi rāma kahi rāma rāma kahi rāma|
tanu parihari raghubara biraham̐ rāu gayau suradhāma||155||
दोहा 156#

जिअन मरन फलु दसरथ पावा। अंड अनेक अमल जसु छावा॥
जिअत राम बिधु बदनु निहारा। राम बिरह करि मरनु सँवारा॥
सोक बिकल सब रोवहिं रानी। रूपु सील बलु तेजु बखानी॥
करहिं बिलाप अनेक प्रकारा। परहिं भूमितल बारहिं बारा॥
बिलपहिं बिकल दास अरु दासी। घर घर रुदनु करहिं पुरबासी॥
अँथयउ आजु भानुकुल भानू। धरम अवधि गुन रूप निधानू॥
गारीं सकल कैकइहि देहीं। नयन बिहीन कीन्ह जग जेहीं॥
एहि बिधि बिलपत रैनि बिहानी। आए सकल महामुनि ग्यानी॥

jiana marana phalu dasaratha pāvā| aṃḍa aneka amala jasu chāvā||
jiata rāma bidhu badanu nihārā| rāma biraha kari maranu sam̐vārā||
soka bikala saba rovahiṃ rānī| rūpu sīla balu teju bakhānī||
karahiṃ bilāpa aneka prakārā| parahiṃ bhūmitala bārahiṃ bārā||
bilapahiṃ bikala dāsa aru dāsī| ghara ghara rudanu karahiṃ purabāsī||
am̐thayau āju bhānukula bhānū| dharama avadhi guna rūpa nidhānū||
gārīṃ sakala kaikaihi dehīṃ| nayana bihīna kīnha jaga jehīṃ||
ehi bidhi bilapata raini bihānī| āe sakala mahāmuni gyānī||

दोहा 156
तब बसिष्ठ मुनि समय सम कहि अनेक इतिहास।
सोक नेवारेउ सबहि कर निज बिग्यान प्रकास॥156॥
taba basiṣṭha muni samaya sama kahi aneka itihāsa|
soka nevāreu sabahi kara nija bigyāna prakāsa||156||
दोहा 157#

तेल नाँव भरि नृप तनु राखा। दूत बोलाइ बहुरि अस भाषा॥
धावहु बेगि भरत पहिं जाहू। नृप सुधि कतहुँ कहहु जनि काहू॥
एतनेइ कहेहु भरत सन जाई। गुर बोलाई पठयउ दोउ भाई॥
सुनि मुनि आयसु धावन धाए। चले बेग बर बाजि लजाए॥
अनरथु अवध अरंभेउ जब तें। कुसगुन होहिं भरत कहुँ तब तें॥
देखहिं राति भयानक सपना। जागि करहिं कटु कोटि कलपना॥
बिप्र जेवाँइ देहिं दिन दाना। सिव अभिषेक करहिं बिधि नाना॥
मागहिं हृदयँ महेस मनाई। कुसल मातु पितु परिजन भाई॥

tela nām̐va bhari nṛpa tanu rākhā| dūta bolāi bahuri asa bhāṣā||
dhāvahu begi bharata pahiṃ jāhū| nṛpa sudhi katahum̐ kahahu jani kāhū||
etanei kahehu bharata sana jāī| gura bolāī paṭhayau dou bhāī||
suni muni āyasu dhāvana dhāe| cale bega bara bāji lajāe||
anarathu avadha araṃbheu jaba teṃ| kusaguna hohiṃ bharata kahum̐ taba teṃ||
dekhahiṃ rāti bhayānaka sapanā| jāgi karahiṃ kaṭu koṭi kalapanā||
bipra jevām̐i dehiṃ dina dānā| siva abhiṣeka karahiṃ bidhi nānā||
māgahiṃ hṛdayam̐ mahesa manāī| kusala mātu pitu parijana bhāī||

दोहा 157
एहि बिधि सोचत भरत मन धावन पहुँचे आइ।
गुर अनुसासन श्रवन सुनि चले गनेसु मनाई॥157॥
ehi bidhi socata bharata mana dhāvana pahum̐ce āi|
gura anusāsana śravana suni cale ganesu manāī||157||
दोहा 158#

चले समीर बेग हय हाँके। नाघत सरित सैल बन बाँके॥
हृदयँ सोचु बड़ कछु न सोहाई। अस जानहिं जियँ जाउँ उड़ाई॥
एक निमेष बरष सम जाई। एहि बिधि भरत नगर निअराई॥
असगुन होहिं नगर पैठारा। रटहिं कुभाँति कुखेत करारा॥
खर सिआर बोलहिं प्रतिकूला। सुनि सुनि होइ भरत मन सूला॥
श्रीहत सर सरिता बन बागा। नगरु बिसेषि भयावनु लागा॥
खग मृग हय गय जाहिं न जोए। राम बियोग कुरोग बिगोए॥
नगर नारि नर निपट दुखारी। मनहुँ सबन्हि सब संपति हारी॥

cale samīra bega haya hām̐ke| nāghata sarita saila bana bām̐ke||
hṛdayam̐ socu baḍa kachu na sohāī| asa jānahiṃ jiyam̐ jāum̐ uḍāī||
eka nimeṣa baraṣa sama jāī| ehi bidhi bharata nagara niarāī||
asaguna hohiṃ nagara paiṭhārā| raṭahiṃ kubhām̐ti kukheta karārā||
khara siāra bolahiṃ pratikūlā| suni suni hoi bharata mana sūlā||
śrīhata sara saritā bana bāgā| nagaru biseṣi bhayāvanu lāgā||
khaga mṛga haya gaya jāhiṃ na joe| rāma biyoga kuroga bigoe||
nagara nāri nara nipaṭa dukhārī| manahum̐ sabanhi saba saṃpati hārī||

दोहा 158
पुरजन मिलहिं न कहहिं कछु गवँहिं जोहारहिं जाहिं।
भरत कुसल पूँछि न सकहिं भय बिषाद मन माहिं॥158॥
purajana milahiṃ na kahahiṃ kachu gavam̐hiṃ johārahiṃ jāhiṃ|
bharata kusala pūm̐chi na sakahiṃ bhaya biṣāda mana māhiṃ||158||
दोहा 159#

हाट बाट नहिं जाइ निहारी। जनु पुर दहँ दिसि लागि दवारी॥
आवत सुत सुनि कैकयनंदिनि। हरषी रबिकुल जलरुह चंदिनि॥
सजि आरती मुदित उठि धाई। द्वारेहिं भेंटि भवन लेइ आई॥
भरत दुखित परिवारु निहारा। मानहुँ तुहिन बनज बनु मारा॥
कैकेई हरषित एहि भाँति। मनहुँ मुदित दव लाइ किराती॥
सुतहि ससोच देखि मनु मारें। पूँछति नैहर कुसल हमारें॥
सकल कुसल कहि भरत सुनाई। पूँछी निज कुल कुसल भलाई॥
कहु कहँ तात कहाँ सब माता। कहँ सिय राम लखन प्रिय भ्राता॥

hāṭa bāṭa nahiṃ jāi nihārī| janu pura daham̐ disi lāgi davārī||
āvata suta suni kaikayanaṃdini| haraṣī rabikula jalaruha caṃdini||
saji āratī mudita uṭhi dhāī| dvārehiṃ bheṃṭi bhavana lei āī||
bharata dukhita parivāru nihārā| mānahum̐ tuhina banaja banu mārā||
kaikeī haraṣita ehi bhām̐ti| manahum̐ mudita dava lāi kirātī||
sutahi sasoca dekhi manu māreṃ| pūm̐chati naihara kusala hamāreṃ||
sakala kusala kahi bharata sunāī| pūm̐chī nija kula kusala bhalāī||
kahu kaham̐ tāta kahām̐ saba mātā| kaham̐ siya rāma lakhana priya bhrātā||

दोहा 159
सुनि सुत बचन सनेहमय कपट नीर भरि नैन।
भरत श्रवन मन सूल सम पापिनि बोली बैन॥159॥
suni suta bacana sanehamaya kapaṭa nīra bhari naina|
bharata śravana mana sūla sama pāpini bolī baina||159||
दोहा 160#

तात बात मैं सकल सँवारी। भै मंथरा सहाय बिचारी॥
कछुक काज बिधि बीच बिगारेउ। भूपति सुरपति पुर पगु धारेउ॥
सुनत भरतु भए बिबस बिषादा। जनु सहमेउ करि केहरि नादा॥
तात तात हा तात पुकारी। परे भूमितल ब्याकुल भारी॥
चलत न देखन पायउँ तोही। तात न रामहि सौंपेहु मोही॥
बहुरि धीर धरि उठे सँभारी। कहु पितु मरन हेतु महतारी॥
सुनि सुत बचन कहति कैकेई। मरमु पाँछि जनु माहुर देई॥
आदिहु तें सब आपनि करनी। कुटिल कठोर मुदित मन बरनी॥

tāta bāta maiṃ sakala sam̐vārī| bhai maṃtharā sahāya bicārī||
kachuka kāja bidhi bīca bigāreu| bhūpati surapati pura pagu dhāreu||
sunata bharatu bhae bibasa biṣādā| janu sahameu kari kehari nādā||
tāta tāta hā tāta pukārī| pare bhūmitala byākula bhārī||
calata na dekhana pāyaum̐ tohī| tāta na rāmahi sauṃpehu mohī||
bahuri dhīra dhari uṭhe sam̐bhārī| kahu pitu marana hetu mahatārī||
suni suta bacana kahati kaikeī| maramu pām̐chi janu māhura deī||
ādihu teṃ saba āpani karanī| kuṭila kaṭhora mudita mana baranī||

दोहा 160
भरतहि बिसरेउ पितु मरन सुनत राम बन गौनु।
हेतु अपनपउ जानि जियँ थकित रहे धरि मौनु॥160॥
bharatahi bisareu pitu marana sunata rāma bana gaunu|
hetu apanapau jāni jiyam̐ thakita rahe dhari maunu||160||
दोहा 161#

बिकल बिलोकि सुतहि समुझावति। मनहुँ जरे पर लोनु लगावति॥
तात राउ नहिं सोचै जोगू। बिढ़इ सुकृत जसु कीन्हेउ भोगू॥
जीवत सकल जनम फल पाए। अंत अमरपति सदन सिधाए॥
अस अनुमानि सोच परिहरहू। सहित समाज राज पुर करहू॥
सुनि सुठि सहमेउ राजकुमारू। पाकें छत जनु लाग अँगारू॥
धीरज धरि भरि लेहिं उसासा। पापिनि सबहि भाँति कुल नासा॥
जौं पै कुरुचि रही अति तोही। जनमत काहे न मारे मोही॥
पेड़ काटि तैं पालउ सींचा। मीन जिअन निति बारि उलीचा॥

bikala biloki sutahi samujhāvati| manahum̐ jare para lonu lagāvati||
tāta rāu nahiṃ socai jogū| biḍhai sukṛta jasu kīnheu bhogū||
jīvata sakala janama phala pāe| aṃta amarapati sadana sidhāe||
asa anumāni soca pariharahū| sahita samāja rāja pura karahū||
suni suṭhi sahameu rājakumārū| pākeṃ chata janu lāga am̐gārū||
dhīraja dhari bhari lehiṃ usāsā| pāpini sabahi bhām̐ti kula nāsā||
jauṃ pai kuruci rahī ati tohī| janamata kāhe na māre mohī||
peḍa kāṭi taiṃ pālau sīṃcā| mīna jiana niti bāri ulīcā||

दोहा 161
हंसबंसु दसरथु जनकु राम लखन से भाइ।
जननी तूँ जननी भई बिधि सन कछु न बसाइ॥161॥
haṃsabaṃsu dasarathu janaku rāma lakhana se bhāi|
jananī tūm̐ jananī bhaī bidhi sana kachu na basāi||161||
दोहा 162#

जब तैं कुमति कुमत जियँ ठयऊ। खंड खंड होइ ह्रदउ न गयऊ॥
बर मागत मन भइ नहिं पीरा। गरि न जीह मुँह परेउ न कीरा॥
भूपँ प्रतीति तोरि किमि कीन्ही। मरन काल बिधि मति हरि लीन्ही॥
बिधिहुँ न नारि हृदय गति जानी। सकल कपट अघ अवगुन खानी॥
सरल सुसील धरम रत राऊ। सो किमि जानै तीय सुभाऊ॥
अस को जीव जंतु जग माहीं। जेहि रघुनाथ प्रानप्रिय नाहीं॥
भे अति अहित रामु तेउ तोही। को तू अहसि सत्य कहु मोही॥
जो हसि सो हसि मुँह मसि लाई। आँखि ओट उठि बैठहिं जाई॥

jaba taiṃ kumati kumata jiyam̐ ṭhayaū| khaṃḍa khaṃḍa hoi hradau na gayaū||
bara māgata mana bhai nahiṃ pīrā| gari na jīha mum̐ha pareu na kīrā||
bhūpam̐ pratīti tori kimi kīnhī| marana kāla bidhi mati hari līnhī||
bidhihum̐ na nāri hṛdaya gati jānī| sakala kapaṭa agha avaguna khānī||
sarala susīla dharama rata rāū| so kimi jānai tīya subhāū||
asa ko jīva jaṃtu jaga māhīṃ| jehi raghunātha prānapriya nāhīṃ||
bhe ati ahita rāmu teu tohī| ko tū ahasi satya kahu mohī||
jo hasi so hasi mum̐ha masi lāī| ām̐khi oṭa uṭhi baiṭhahiṃ jāī||

दोहा 162
राम बिरोधी हृदय तें प्रगट कीन्ह बिधि मोहि।
मो समान को पातकी बादि कहउँ कछु तोहि॥162॥
rāma birodhī hṛdaya teṃ pragaṭa kīnha bidhi mohi|
mo samāna ko pātakī bādi kahaum̐ kachu tohi||162||
दोहा 163#

सुनि सत्रुघुन मातु कुटिलाई। जरहिं गात रिस कछु न बसाई॥
तेहि अवसर कुबरी तहँ आई। बसन बिभूषन बिबिध बनाई॥
लखि रिस भरेउ लखन लघु भाई। बरत अनल घृत आहुति पाई॥
हुमगि लात तकि कूबर मारा। परि मुँह भर महि करत पुकारा॥
कूबर टूटेउ फूट कपारू। दलित दसन मुख रुधिर प्रचारू॥
आह दइअ मैं काह नसावा। करत नीक फलु अनइस पावा॥
सुनि रिपुहन लखि नख सिख खोटी। लगे घसीटन धरि धरि झोंटी॥
भरत दयानिधि दीन्हि छड़ाई। कौसल्या पहिं गे दोउ भाई॥

suni satrughuna mātu kuṭilāī| jarahiṃ gāta risa kachu na basāī||
tehi avasara kubarī taham̐ āī| basana bibhūṣana bibidha banāī||
lakhi risa bhareu lakhana laghu bhāī| barata anala ghṛta āhuti pāī||
humagi lāta taki kūbara mārā| pari mum̐ha bhara mahi karata pukārā||
kūbara ṭūṭeu phūṭa kapārū| dalita dasana mukha rudhira pracārū||
āha daia maiṃ kāha nasāvā| karata nīka phalu anaisa pāvā||
suni ripuhana lakhi nakha sikha khoṭī| lage ghasīṭana dhari dhari jhoṃṭī||
bharata dayānidhi dīnhi chaḍāī| kausalyā pahiṃ ge dou bhāī||

दोहा 163
मलिन बसन बिबरन बिकल कृस सरीर दुख भार।
कनक कलप बर बेलि बन मानहुँ हनी तुसार॥163॥
malina basana bibarana bikala kṛsa sarīra dukha bhāra|
kanaka kalapa bara beli bana mānahum̐ hanī tusāra||163||
दोहा 164#

भरतहि देखि मातु उठि धाई। मुरुछित अवनि परी झइँ आई॥
देखत भरतु बिकल भए भारी। परे चरन तन दसा बिसारी॥
मातु तात कहँ देहि देखाई। कहँ सिय रामु लखनु दोउ भाई॥
कैकइ कत जनमी जग माझा। जौं जनमि त भइ काहे न बाँझा॥
कुल कलंकु जेहिं जनमेउ मोही। अपजस भाजन प्रियजन द्रोही॥
को तिभुवन मोहि सरिस अभागी। गति असि तोरि मातु जेहि लागी॥
पितु सुरपुर बन रघुबर केतू। मैं केवल सब अनरथ हेतु॥
धिग मोहि भयउँ बेनु बन आगी। दुसह दाह दुख दूषन भागी॥

bharatahi dekhi mātu uṭhi dhāī| muruchita avani parī jhaim̐ āī||
dekhata bharatu bikala bhae bhārī| pare carana tana dasā bisārī||
mātu tāta kaham̐ dehi dekhāī| kaham̐ siya rāmu lakhanu dou bhāī||
kaikai kata janamī jaga mājhā| jauṃ janami ta bhai kāhe na bām̐jhā||
kula kalaṃku jehiṃ janameu mohī| apajasa bhājana priyajana drohī||
ko tibhuvana mohi sarisa abhāgī| gati asi tori mātu jehi lāgī||
pitu surapura bana raghubara ketū| maiṃ kevala saba anaratha hetu||
dhiga mohi bhayaum̐ benu bana āgī| dusaha dāha dukha dūṣana bhāgī||

दोहा 164
मातु भरत के बचन मृदु सुनि सुनि उठी सँभारि॥
लिए उठाइ लगाइ उर लोचन मोचति बारि॥164॥
mātu bharata ke bacana mṛdu suni suni uṭhī sam̐bhāri||
lie uṭhāi lagāi ura locana mocati bāri||164||
दोहा 165#

सरल सुभाय मायँ हियँ लाए। अति हित मनहुँ राम फिरि आए॥
भेंटेउ बहुरि लखन लघु भाई। सोकु सनेहु न हृदयँ समाई॥
देखि सुभाउ कहत सबु कोई। राम मातु अस काहे न होई॥
माताँ भरतु गोद बैठारे। आँसु पौंछि मृदु बचन उचारे॥
अजहुँ बच्छ बलि धीरज धरहू। कुसमउ समुझि सोक परिहरहू॥
जनि मानहु हियँ हानि गलानी। काल करम गति अघटित जानि॥
काहुहि दोसु देहु जनि ताता। भा मोहि सब बिधि बाम बिधाता॥
जो एतेहुँ दुख मोहि जिआवा। अजहुँ को जानइ का तेहि भावा॥

sarala subhāya māyam̐ hiyam̐ lāe| ati hita manahum̐ rāma phiri āe||
bheṃṭeu bahuri lakhana laghu bhāī| soku sanehu na hṛdayam̐ samāī||
dekhi subhāu kahata sabu koī| rāma mātu asa kāhe na hoī||
mātām̐ bharatu goda baiṭhāre| ām̐su pauṃchi mṛdu bacana ucāre||
ajahum̐ baccha bali dhīraja dharahū| kusamau samujhi soka pariharahū||
jani mānahu hiyam̐ hāni galānī| kāla karama gati aghaṭita jāni||
kāhuhi dosu dehu jani tātā| bhā mohi saba bidhi bāma bidhātā||
jo etehum̐ dukha mohi jiāvā| ajahum̐ ko jānai kā tehi bhāvā||

दोहा 165
पितु आयस भूषन बसन तात तजे रघुबीर।
बिसमउ हरषु न हृदयँ कछु पहिरे बलकल चीर। 165॥
pitu āyasa bhūṣana basana tāta taje raghubīra|
bisamau haraṣu na hṛdayam̐ kachu pahire balakala cīra| 165||
दोहा 166#

मुख प्रसन्न मन रंग न रोषू। सब कर सब बिधि करि परितोषू॥
चले बिपिन सुनि सिय सँग लागी। रहइ न राम चरन अनुरागी॥
सुनतहिं लखनु चले उठि साथा। रहहिं न जतन किए रघुनाथा॥
तब रघुपति सबही सिरु नाई। चले संग सिय अरु लघु भाई॥
रामु लखनु सिय बनहि सिधाए। गइउँ न संग न प्रान पठाए॥
यहु सबु भा इन्ह आँखिन्ह आगें। तउ न तजा तनु जीव अभागें॥
मोहि न लाज निज नेहु निहारी। राम सरिस सुत मैं महतारी॥
जिऐ मरै भल भूपति जाना। मोर हृदय सत कुलिस समाना॥

mukha prasanna mana raṃga na roṣū| saba kara saba bidhi kari paritoṣū||
cale bipina suni siya sam̐ga lāgī| rahai na rāma carana anurāgī||
sunatahiṃ lakhanu cale uṭhi sāthā| rahahiṃ na jatana kie raghunāthā||
taba raghupati sabahī siru nāī| cale saṃga siya aru laghu bhāī||
rāmu lakhanu siya banahi sidhāe| gaium̐ na saṃga na prāna paṭhāe||
yahu sabu bhā inha ām̐khinha āgeṃ| tau na tajā tanu jīva abhāgeṃ||
mohi na lāja nija nehu nihārī| rāma sarisa suta maiṃ mahatārī||
jiai marai bhala bhūpati jānā| mora hṛdaya sata kulisa samānā||

दोहा 166
कौसल्या के बचन सुनि भरत सहित रनिवासु।
ब्याकुल बिलपत राजगृह मानहुँ सोक नेवासु॥166॥
kausalyā ke bacana suni bharata sahita ranivāsu|
byākula bilapata rājagṛha mānahum̐ soka nevāsu||166||
दोहा 167#

बिलपहिं बिकल भरत दोउ भाई। कौसल्याँ लिए हृदयँ लगाई॥
भाँति अनेक भरतु समुझाए। कहि बिबेकमय बचन सुनाए॥
भरतहुँ मातु सकल समुझाईं। कहि पुरान श्रुति कथा सुहाईं॥
छल बिहीन सुचि सरल सुबानी। बोले भरत जोरि जुग पानी॥
जे अघ मातु पिता सुत मारें। गाइ गोठ महिसुर पुर जारें॥
जे अघ तिय बालक बध कीन्हें। मीत महीपति माहुर दीन्हें॥
जे पातक उपपातक अहहीं। करम बचन मन भव कबि कहहीं॥
ते पातक मोहि होहुँ बिधाता। जौं यहु होइ मोर मत माता॥

bilapahiṃ bikala bharata dou bhāī| kausalyām̐ lie hṛdayam̐ lagāī||
bhām̐ti aneka bharatu samujhāe| kahi bibekamaya bacana sunāe||
bharatahum̐ mātu sakala samujhāīṃ| kahi purāna śruti kathā suhāīṃ||
chala bihīna suci sarala subānī| bole bharata jori juga pānī||
je agha mātu pitā suta māreṃ| gāi goṭha mahisura pura jāreṃ||
je agha tiya bālaka badha kīnheṃ| mīta mahīpati māhura dīnheṃ||
je pātaka upapātaka ahahīṃ| karama bacana mana bhava kabi kahahīṃ||
te pātaka mohi hohum̐ bidhātā| jauṃ yahu hoi mora mata mātā||

दोहा 167
जे परिहरि हरि हर चरन भजहिं भूतगन घोर।
तेहि कइ गति मोहि देउ बिधि जौं जननी मत मोर॥167॥
je parihari hari hara carana bhajahiṃ bhūtagana ghora|
tehi kai gati mohi deu bidhi jauṃ jananī mata mora||167||
दोहा 168#

बेचहिं बेदु धरमु दुहि लेहीं। पिसुन पराय पाप कहि देहीं॥
कपटी कुटिल कलहप्रिय क्रोधी। बेद बिदूषक बिस्व बिरोधी॥
लोभी लंपट लोलुपचारा। जे ताकहिं परधनु परदारा॥
पावौं मैं तिन्ह के गति घोरा। जौं जननी यहु संमत मोरा॥
जे नहिं साधुसंग अनुरागे। परमारथ पथ बिमुख अभागे॥
जे न भजहिं हरि नरतनु पाई। जिन्हहि न हरि हर सुजसु सोहाई॥
तजि श्रुतिपंथु बाम पथ चलहीं। बंचक बिरचि बेष जगु छलहीं॥
तिन्ह कै गति मोहि संकर देऊ। जननी जौं यहु जानौं भेऊ॥

becahiṃ bedu dharamu duhi lehīṃ| pisuna parāya pāpa kahi dehīṃ||
kapaṭī kuṭila kalahapriya krodhī| beda bidūṣaka bisva birodhī||
lobhī laṃpaṭa lolupacārā| je tākahiṃ paradhanu paradārā||
pāvauṃ maiṃ tinha ke gati ghorā| jauṃ jananī yahu saṃmata morā||
je nahiṃ sādhusaṃga anurāge| paramāratha patha bimukha abhāge||
je na bhajahiṃ hari naratanu pāī| jinhahi na hari hara sujasu sohāī||
taji śrutipaṃthu bāma patha calahīṃ| baṃcaka biraci beṣa jagu chalahīṃ||
tinha kai gati mohi saṃkara deū| jananī jauṃ yahu jānauṃ bheū||

दोहा 168
मातु भरत के बचन सुनि साँचे सरल सुभायँ।
कहति राम प्रिय तात तुम्ह सदा बचन मन कायँ॥168॥
mātu bharata ke bacana suni sām̐ce sarala subhāyam̐|
kahati rāma priya tāta tumha sadā bacana mana kāyam̐||168||
दोहा 169#

राम प्रानहु तें प्रान तुम्हारे। तुम्ह रघुपतिहि प्रानहु तें प्यारे॥
बिधु बिष चवै स्त्रवै हिमु आगी। होइ बारिचर बारि बिरागी॥
भएँ ग्यानु बरु मिटै न मोहू। तुम्ह रामहि प्रतिकूल न होहू॥
मत तुम्हार यहु जो जग कहहीं। सो सपनेहुँ सुख सुगति न लहहीं॥
अस कहि मातु भरतु हियँ लाए। थन पय स्त्रवहिं नयन जल छाए॥
करत बिलाप बहुत एहि भाँती। बैठेहिं बीति गई सब राती॥
बामदेउ बसिष्ठ तब आए। सचिव महाजन सकल बोलाए॥
मुनि बहु भाँति भरत उपदेसे। कहि परमारथ बचन सुदेसे॥

rāma prānahu teṃ prāna tumhāre| tumha raghupatihi prānahu teṃ pyāre||
bidhu biṣa cavai stravai himu āgī| hoi bāricara bāri birāgī||
bhaem̐ gyānu baru miṭai na mohū| tumha rāmahi pratikūla na hohū||
mata tumhāra yahu jo jaga kahahīṃ| so sapanehum̐ sukha sugati na lahahīṃ||
asa kahi mātu bharatu hiyam̐ lāe| thana paya stravahiṃ nayana jala chāe||
karata bilāpa bahuta ehi bhām̐tī| baiṭhehiṃ bīti gaī saba rātī||
bāmadeu basiṣṭha taba āe| saciva mahājana sakala bolāe||
muni bahu bhām̐ti bharata upadese| kahi paramāratha bacana sudese||

दोहा 169
तात हृदयँ धीरजु धरहु करहु जो अवसर आजु।
उठे भरत गुर बचन सुनि करन कहेउ सबु साजु॥169॥
tāta hṛdayam̐ dhīraju dharahu karahu jo avasara āju|
uṭhe bharata gura bacana suni karana kaheu sabu sāju||169||
दोहा 170#

नृपतनु बेद बिदित अन्हवावा। परम बिचित्र बिमानु बनावा॥
गहि पद भरत मातु सब राखी। रहीं रानि दरसन अभिलाषी॥
चंदन अगर भार बहु आए। अमित अनेक सुगंध सुहाए॥
सरजु तीर रचि चिता बनाई। जनु सुरपुर सोपान सुहाई॥
एहि बिधि दाह क्रिया सब कीन्ही। बिधिवत न्हाइ तिलांजुलि दीन्ही॥
सोधि सुमृति सब बेद पुराना। कीन्ह भरत दसगात बिधाना॥
जहँ जस मुनिबर आयसु दीन्हा। तहँ तस सहस भाँति सबु कीन्हा॥
भए बिसुद्ध दिए सब दाना। धेनु बाजि गज बाहन नाना॥

nṛpatanu beda bidita anhavāvā| parama bicitra bimānu banāvā||
gahi pada bharata mātu saba rākhī| rahīṃ rāni darasana abhilāṣī||
caṃdana agara bhāra bahu āe| amita aneka sugaṃdha suhāe||
saraju tīra raci citā banāī| janu surapura sopāna suhāī||
ehi bidhi dāha kriyā saba kīnhī| bidhivata nhāi tilāṃjuli dīnhī||
sodhi sumṛti saba beda purānā| kīnha bharata dasagāta bidhānā||
jaham̐ jasa munibara āyasu dīnhā| taham̐ tasa sahasa bhām̐ti sabu kīnhā||
bhae bisuddha die saba dānā| dhenu bāji gaja bāhana nānā||

दोहा 170
सिंघासन भूषन बसन अन्न धरनि धन धाम।
दिए भरत लहि भूमिसुर भे परिपूरन काम॥170॥
siṃghāsana bhūṣana basana anna dharani dhana dhāma|
die bharata lahi bhūmisura bhe paripūrana kāma||170||
दोहा 171#

पितु हित भरत कीन्हि जसि करनी। सो मुख लाख जाइ नहिं बरनी॥
सुदिनु सोधि मुनिबर तब आए। सचिव महाजन सकल बोलाए॥
बैठे राजसभाँ सब जाई। पठए बोलि भरत दोउ भाई॥
भरतु बसिष्ठ निकट बैठारे। नीति धरममय बचन उचारे॥
प्रथम कथा सब मुनिबर बरनी। कैकइ कुटिल कीन्हि जसि करनी॥
भूप धरमब्रतु सत्य सराहा। जेहिं तनु परिहरि प्रेमु निबाहा॥
कहत राम गुन सील सुभाऊ। सजल नयन पुलकेउ मुनिराऊ॥
बहुरि लखन सिय प्रीति बखानी। सोक सनेह मगन मुनि ग्यानी॥

pitu hita bharata kīnhi jasi karanī| so mukha lākha jāi nahiṃ baranī||
sudinu sodhi munibara taba āe| saciva mahājana sakala bolāe||
baiṭhe rājasabhām̐ saba jāī| paṭhae boli bharata dou bhāī||
bharatu basiṣṭha nikaṭa baiṭhāre| nīti dharamamaya bacana ucāre||
prathama kathā saba munibara baranī| kaikai kuṭila kīnhi jasi karanī||
bhūpa dharamabratu satya sarāhā| jehiṃ tanu parihari premu nibāhā||
kahata rāma guna sīla subhāū| sajala nayana pulakeu munirāū||
bahuri lakhana siya prīti bakhānī| soka saneha magana muni gyānī||

दोहा 171
सुनहु भरत भावी प्रबल बिलखि कहेउ मुनिनाथ।
हानि लाभु जीवन मरनु जसु अपजसु बिधि हाथ॥171॥
sunahu bharata bhāvī prabala bilakhi kaheu muninātha|
hāni lābhu jīvana maranu jasu apajasu bidhi hātha||171||
दोहा 172#

अस बिचारि केहि देइअ दोसू। ब्यरथ काहि पर कीजिअ रोसू॥
तात बिचारु केहि करहु मन माहीं। सोच जोगु दसरथु नृपु नाहीं॥
सोचिअ बिप्र जो बेद बिहीना। तजि निज धरमु बिषय लयलीना॥
सोचिअ नृपति जो नीति न जाना। जेहि न प्रजा प्रिय प्रान समाना॥
सोचिअ बयसु कृपन धनवानू। जो न अतिथि सिव भगति सुजानू॥
सोचिअ सूद्रु बिप्र अवमानी। मुखर मानप्रिय ग्यान गुमानी॥
सोचिअ पुनि पति बंचक नारी। कुटिल कलहप्रिय इच्छाचारी॥
सोचिअ बटु निज ब्रतु परिहरई। जो नहिं गुर आयसु अनुसरई॥

asa bicāri kehi deia dosū| byaratha kāhi para kījia rosū||
tāta bicāru kehi karahu mana māhīṃ| soca jogu dasarathu nṛpu nāhīṃ||
socia bipra jo beda bihīnā| taji nija dharamu biṣaya layalīnā||
socia nṛpati jo nīti na jānā| jehi na prajā priya prāna samānā||
socia bayasu kṛpana dhanavānū| jo na atithi siva bhagati sujānū||
socia sūdru bipra avamānī| mukhara mānapriya gyāna gumānī||
socia puni pati baṃcaka nārī| kuṭila kalahapriya icchācārī||
socia baṭu nija bratu pariharaī| jo nahiṃ gura āyasu anusaraī||

दोहा 172
सोचिअ गृही जो मोह बस करइ करम पथ त्याग।
सोचिअ जती प्रपंच रत बिगत बिबेक बिराग॥172॥
socia gṛhī jo moha basa karai karama patha tyāga|
socia jatī prapaṃca rata bigata bibeka birāga||172||
दोहा 173#

बैखानस सोइ सोचै जोगु। तपु बिहाइ जेहि भावइ भोगू॥
सोचिअ पिसुन अकारन क्रोधी। जननि जनक गुर बंधु बिरोधी॥
सब बिधि सोचिअ पर अपकारी। निज तनु पोषक निरदय भारी॥
सोचनीय सबहि बिधि सोई। जो न छाड़ि छलु हरि जन होई॥
सोचनीय नहिं कोसलराऊ। भुवन चारिदस प्रगट प्रभाऊ॥
भयउ न अहइ न अब होनिहारा। भूप भरत जस पिता तुम्हारा॥
बिधि हरि हरु सुरपति दिसिनाथा। बरनहिं सब दसरथ गुन गाथा॥

baikhānasa soi socai jogu| tapu bihāi jehi bhāvai bhogū||
socia pisuna akārana krodhī| janani janaka gura baṃdhu birodhī||
saba bidhi socia para apakārī| nija tanu poṣaka niradaya bhārī||
socanīya sabahi bidhi soī| jo na chāḍi chalu hari jana hoī||
socanīya nahiṃ kosalarāū| bhuvana cāridasa pragaṭa prabhāū||
bhayau na ahai na aba honihārā| bhūpa bharata jasa pitā tumhārā||
bidhi hari haru surapati disināthā| baranahiṃ saba dasaratha guna gāthā||

दोहा 173
कहहु तात केहि भाँति कोउ करिहि बड़ाई तासु।
राम लखन तुम्ह सत्रुहन सरिस सुअन सुचि जासु॥173॥
kahahu tāta kehi bhām̐ti kou karihi baḍāī tāsu|
rāma lakhana tumha satruhana sarisa suana suci jāsu||173||
दोहा 174#

सब प्रकार भूपति बड़भागी। बादि बिषादु करिअ तेहि लागी॥
यह सुनि समुझि सोचु परिहरहू। सिर धरि राज रजायसु करहू॥
रायँ राजपदु तुम्ह कहुँ दीन्हा। पिता बचनु फुर चाहिअ कीन्हा॥
तजे रामु जेहिं बचनहि लागी। तनु परिहरेउ राम बिरहागी॥
नृपहि बचन प्रिय नहिं प्रिय प्राना। करहु तात पितु बचन प्रवाना॥
करहु सीस धरि भूप रजाई। हइ तुम्ह कहँ सब भाँति भलाई॥
परसुराम पितु अग्या राखी। मारी मातु लोक सब साखी॥
तनय जजातिहि जौबनु दयऊ। पितु अग्याँ अघ अजसु न भयऊ॥

saba prakāra bhūpati baḍabhāgī| bādi biṣādu karia tehi lāgī||
yaha suni samujhi socu pariharahū| sira dhari rāja rajāyasu karahū||
rāyam̐ rājapadu tumha kahum̐ dīnhā| pitā bacanu phura cāhia kīnhā||
taje rāmu jehiṃ bacanahi lāgī| tanu parihareu rāma birahāgī||
nṛpahi bacana priya nahiṃ priya prānā| karahu tāta pitu bacana pravānā||
karahu sīsa dhari bhūpa rajāī| hai tumha kaham̐ saba bhām̐ti bhalāī||
parasurāma pitu agyā rākhī| mārī mātu loka saba sākhī||
tanaya jajātihi jaubanu dayaū| pitu agyām̐ agha ajasu na bhayaū||

दोहा 174
अनुचित उचित बिचारु तजि जे पालहिं पितु बैन।
ते भाजन सुख सुजस के बसहिं अमरपति ऐन॥174॥
anucita ucita bicāru taji je pālahiṃ pitu baina|
te bhājana sukha sujasa ke basahiṃ amarapati aina||174||
दोहा 175#

अवसि नरेस बचन फुर करहू। पालहु प्रजा सोकु परिहरहू॥
सुरपुर नृप पाइहि परितोषू। तुम्ह कहुँ सुकृत सुजसु नहिं दोषू॥
बेद बिदित संमत सबही का। जेहि पितु देइ सो पावइ टीका॥
करहु राजु परिहरहु गलानी। मानहु मोर बचन हित जानी॥
सुनि सुखु लहब राम बैदेहीं। अनुचित कहब न पंडित केहीं॥
कौसल्यादि सकल महतारीं। तेउ प्रजा सुख होहिं सुखारीं॥
परम तुम्हार राम कर जानिहि। सो सब बिधि तुम्ह सन भल मानिहि॥
सौंपेहु राजु राम के आएँ। सेवा करेहु सनेह सुहाएँ॥

avasi naresa bacana phura karahū| pālahu prajā soku pariharahū||
surapura nṛpa pāihi paritoṣū| tumha kahum̐ sukṛta sujasu nahiṃ doṣū||
beda bidita saṃmata sabahī kā| jehi pitu dei so pāvai ṭīkā||
karahu rāju pariharahu galānī| mānahu mora bacana hita jānī||
suni sukhu lahaba rāma baidehīṃ| anucita kahaba na paṃḍita kehīṃ||
kausalyādi sakala mahatārīṃ| teu prajā sukha hohiṃ sukhārīṃ||
parama tumhāra rāma kara jānihi| so saba bidhi tumha sana bhala mānihi||
sauṃpehu rāju rāma ke āem̐| sevā karehu saneha suhāem̐||

दोहा 175
कीजिअ गुर आयसु अवसि कहहिं सचिव कर जोरि।
रघुपति आएँ उचित जस तस तब करब बहोरि॥175॥
kījia gura āyasu avasi kahahiṃ saciva kara jori|
raghupati āem̐ ucita jasa tasa taba karaba bahori||175||
सोरठा 176#

कौसल्या धरि धीरजु कहई। पूत पथ्य गुर आयसु अहई॥
सो आदरिअ करिअ हित मानी। तजिअ बिषादु काल गति जानी॥
बन रघुपति सुरपति नरनाहू। तुम्ह एहि भाँति तात कदराहू॥
परिजन प्रजा सचिव सब अंबा। तुम्हही सुत सब कहँ अवलंबा॥
लखि बिधि बाम कालु कठिनाई। धीरजु धरहु मातु बलि जाई॥
सिर धरि गुर आयसु अनुसरहू। प्रजा पालि परिजन दुखु हरहू॥
गुर के बचन सचिव अभिनंदनु। सुने भरत हिय हित जनु चंदनु॥
सुनी बहोरि मातु मृदु बानी। सील सनेह सरल रस सानी॥

kausalyā dhari dhīraju kahaī| pūta pathya gura āyasu ahaī||
so ādaria karia hita mānī| tajia biṣādu kāla gati jānī||
bana raghupati surapati naranāhū| tumha ehi bhām̐ti tāta kadarāhū||
parijana prajā saciva saba aṃbā| tumhahī suta saba kaham̐ avalaṃbā||
lakhi bidhi bāma kālu kaṭhināī| dhīraju dharahu mātu bali jāī||
sira dhari gura āyasu anusarahū| prajā pāli parijana dukhu harahū||
gura ke bacana saciva abhinaṃdanu| sune bharata hiya hita janu caṃdanu||
sunī bahori mātu mṛdu bānī| sīla saneha sarala rasa sānī||

छंद
सानी सरल रस मातु बानी सुनि भरत ब्याकुल भए।
लोचन सरोरुह स्त्रवत सींचत बिरह उर अंकुर नए॥
सो दसा देखत समय तेहि बिसरी सबहि सुधि देह की।
तुलसी सराहत सकल सादर सीवँ सहज सनेह की॥
sānī sarala rasa mātu bānī suni bharata byākula bhae|
locana saroruha stravata sīṃcata biraha ura aṃkura nae||
so dasā dekhata samaya tehi bisarī sabahi sudhi deha kī|
tulasī sarāhata sakala sādara sīvam̐ sahaja saneha kī||

सोरठा 176
भरतु कमल कर जोरि धीर धुरंधर धीर धरि।
बचन अमिअँ जनु बोरि देत उचित उत्तर सबहि॥176॥
bharatu kamala kara jori dhīra dhuraṃdhara dhīra dhari|
bacana amiam̐ janu bori deta ucita uttara sabahi||176||
मासपारायण, अठारहवाँ विश्रामDay 18 of the 30-day Masparayan ends here

Completed Ayodhya Kand — Part 6?

Mark Masparayan day 18 done, light a diya, or share the path with family.

Text: the Gita Press edition of Shri Ramcharitmanas, checked against two independent transcriptions. Spotted an error? Suggest a correction.

Ayodhya Kand — Part 6 — text

Completed Ayodhya Kand — Part 6?